Акафист Иоанну Златоусту, святителю Акафист Иоанну Златоусту,святителю
иной, священномонаха Мартирия Киево-Печерского

Кондак 1
Изрядному Божию Архиереию, вселеньскому учителю, иже весь мир исполнивщаго Божественых златоточивых учении, благодарьственая пенья приносим ти, Иоанне Златоусте, но, яко имея дръзновение к Христу от всех ны бед избави, яко да зовем ти:
Радуйся пресветлая Святителем красота.

Икос 1
Ангел зрачна тя Божественым разумом, Небесный всех Творец, и Създателъ, Владыка яви тебе проповедыи души твоея светло преподобне, треблаженне Иоанне Златоусте, тя освяти и прослави и всех научи вопити тебе таковая:
Радуйся от младеньства присвоився присно Богу
Радуйся честное красное прозябение рождеши
Радуйся смиреную мудрость издетьска стяжавшии
Радуйся Божественеи въжеле смиренномудрости
Радуйся пресветлое антиохиское светило
Радуйся свестью житья Отчество уяснил еси
Радуйся медоточивыи устне сладъкое поученъныя языци нося
Радуйся напоивыи благочестивыя сладъкыми поученми
Радуйся Божественыи арханъ Пресвятаго Духа
Радуйся обилно излиявшися на тобе Божественая Благодать
Радуйся, имже учением благочестивии просветишася
Радуйся, имьже словесы, писаньми вселеная наполнися
Радуйся Святителем пресветлая красота

Кондак 2
Видяще земныя вси твоих златоточивых уст Божественыих поучении, вещанья, Златоусте, иже всю обьтече Землю, ибо Богомъ даная ти Благодать, вселеннеи конца просвети, и душа верных, твоими сладъкими словесы услади, поющая: Аллилуия.

Икос 2
Разума премудростью, паче радость почерп, во Афины достиже первоседаньемь вельможь почтеся, и высокоречиваго Анфима завистью побеженаго смиреною мудростью словесы того срами, вся в удивление введе, мудрых града Афиньскаго, верныя же възвесели, звати тебе сице:
Радуйся тихостью нрава любопремудростьны учителю
Радуйся своими словесы водивъ веде Афины вся
Радуйся елиньскы велехвалныия мудреца посрамив реченми
Радуйся баснословесныя ветия Боговиденья глаголы претерпев
Радуйся научивыи Анфима к Божественому познанью
Радуйся, иже в купелью крещенья, того к Христу приведе
Радуйся у веривый епарха с начальники града Афиньска веровати Христови
Радуйся введыи в Божественое крещение Афинеи вся
Радуйся Божественым желанием душу расплив к пребыванием горних
Радуйся нивочтоже вмени вся на величество и чести земьныя, Небесных ради.
Радуйся уме, великии превысокыи, и словесы же, ученми и делы
Радуйся уме прощенныи Божественыих доброт Боговидении
Радуйся Святителем пресветлая красота

Кондак 3
Сила вышняго осенит тя пришествие Божественых ученик, Иоанне Златоусте, в молитвеньмъ в нощи ти предстояни Христову наперьстьнику Иоанну, и теплому верою Петру, овому подавшу ти свиток учении от Спаса Христа, другому же ключа Святых Церквеи от нею же приим вопия Аллилуия.

Икос 3
Имущи слово сладкоглаголиво, уснет паче злата премудростю слова украшенеи разумом Божественыя Церкви, Пречестныи Архиереи, и Святым Духом преобручився священнодействовав жертвы бескверныя Христови за всех принося въпиющим ти таковая священное честное Пресвятому Духу вселенье:
Радуйся доме Пресвятыя Троица световиднеиши
Радуйся въсприимыи Господня ученика възлюбленого Иоанна свиток в сонне видении
Радуйся приимыи ключа Святых Церквей от Апостолом Верхатеплего верою Петра
Радуйся матере Церквам, архиереи пречестнеиши Божии
Радуйся матере градомь Царяграда велики светилниче
Радуйся украсивыи златоточивыми своими словесы церкви Божия
Радуйся възвеселивыи люди услажая медоточивымъ словесы ученья, Царяграда народ
Радуйся великоиимениты велегласны вселеньскыи учитлю
Радуйся реченья Божественых твоих словес в конца Земли обьтекше
Радуйся Херувимьская уста Троицу Богословьствующая
Радуйся Трисолнечнаго Света възвестителю
Радуйся пресветлая Святителем красота

Кондак 4
Бюрю неразумья многомятежьнаго жития, прегрешении възмущена ми есть душа и ум, еже по достоинъству пение принестити ти недоумею, к твоеи хвале величью, обаче к тебе верою Златаусте и любовью одръжим дерзнув пити Аллилуия.

Икос 4
Слышана быша твоя добродетели и премудрости словес по вселеннеи, паче меда услаждающи верных душа священными ти поученми Златоглаголиве Иоанне, милости Божия сказуя к согрешьшим, обращенья ожидающи темже тебе покоянью проповедьнику възываемь таковая:
Радуйся к верховнымь третьинадесять Апостоле
Радуйся Апостолом единоравне и спрестолне
Радуйся даровьньмы и нам от Христа покоянья възвестителю
Радуйся падшая в согрешении воставивъ возвещением щедрот Божия человеколюбия
Радуйся Богодуховную жизнь препроводя чистотою светлости
Радуйся твою душу Утешителева Благодать вжеле и чисту показа
Радуйся Апостольскиими правилы и Церковныи корабль управив
Радуйся корьмьчи изрядныи душевныи корабль волнами прелести не погруземъ спасе
Радуйся Богодухновенная гусли сладко бряцащи Божественая словеса
Радуйся высокогласныи арган покоянья всем взвещающи
Радуйся светлы бисер пречестны и многоценныи
Радуйся каменю драгыи светлеши бесценныи
Радуйся пречестная Святителем похвала

Кондак 5
Богозарну тя звезду на Церковнеи высоте мысленое солнце, Солнце поза Христос Бог, яко лучами злотосияньными словес учими паче всех под Небесем облистая, ихже назирает Солнце от Небес бо приятъ свыше Божественую Благодать, воистину вопия Аллилуия.

Икос 5
Видяще людие Царьскаго града Богом даную ти Духа Благодать излиявшуся в устнах твоих изобилно речнымь быстринам, скоротекущи и словеса ти уподобишася, сладко же зело глаголюща, радостно исполнении взывающи тебе таковая:
Радуйся прмудрости Божественыя пречистыи ссуде
Радуйся светоносная уста, Духа Благодати
Радуйся Христове Церкви пресветлое око
Радуйся святолепныи пресвященныи Архриереи
Радуйся одушевленыи к Небесному наследью наставляя
Радуйся поповедниче покоянья, имже в Небесную Жизнь входяще
Радуйся дарованныи нам от Христа изрядныи Архиереи
Радуйся Божественыя Духа Благодати исполнене
Радуйся словесы своими укрепивыи Христво стадо
Радуйся пращею словес отгнав зловерныя
Радуйся премудрыи врачь в недузе лежащи прегрешении
Радуйся уврачевавыи душа пастырем духовным
Радуйся пресветлая Святителем красота

Кондак 6
Павлим посланьем любляше поучатися Иоанне в един вечер председыи, того Богомудрьствия тростью сказанья начертая о избавлении же во скорьби Царева муж, Проклю пришедшю с Каважнею же расмотрь, Павла ко ушеси твоему приникша ужасомь одръжим отиде вопия: Аллилуия.

Икос 6
Въспрошение створьшу ти к Проклу, он же вскорбех мужа Иоанне, и несмедъ резнути предвнити к тобе рекоша за явление и образ Апостола показавшю, ты же пришествием к Царю впервыи сан вочте мужа и взываше ти сице:
Радуйся избавыи мя от гнева ярости Царевы
Радуйся возвративыи мя в первыи сан и честь
Радуйся стражющим скорыи помощник
Радуйся сирым отец и скорьбящим утешение
Радуйся нищим милоствыи и тихыи податель и вдовицам заступление
Радуйся убогым щедрость и съкрушеных исцелитель
Радуйся заблудших к спасеному пути наставник и възвратитель
Радуйся в теницах сущим милостивыи присетитель
Радуйся звезда пресветлая града Византьскаго
Радуйся Солнце Царя града осиян ученми повсюду Православью
Радуйся имже от бед и смерти и скорбеи многых избавляеши нас
Радуйся имже ученми грешнии покояньемь к Богу наставлении быша
Радуйся Святителем пресветлая красота

Кондак 7
Хотяи спасти Господь тобою многыя душа человеческыя, посла ангела своего в юдиенени милостив твоих ужася Иоанне, яко земен паде воставьляя о тебе, глаголя и тебе послалъ есми исповедати ти словеса Господня, и еже паствити Церковь Его, и многых человек душа привести к Нему, словеса бо уст твоих достигнут до краи мира сего, возлюбишя тя Богу въпиють Аллилуия.

Икос 7
Небесню имея свыше духовную Духа Благодать, от Божественаго сиянья, и неизреченная явися исполненъ Златаусте разума, и яко река исходящая из Едема, все лице Земное, напояя, истаявша сердца прохлажая, въпиющим тебе сице:
Радуйся, Божественыя мудрости и учении глубино
Радуйся реко вод животочных исполнь духовных
Радуйся губо всезлатая лютую влагу отемлющия
Радуйся чаша преисполненая Божия мудрости
Радуйся скровище бесценное добродетелеи
Радуйся богатство благых неистощимое
Радуйся краснеиши славеи и покоя весну сказуяи
Радуйся ластовице Богоглаголивая и многовещанная
Радуйся Божественая лествице Духа сладкопесневая
Радуйся славныи красноглаголивыи многых словес учении
Радуйся сладковещанныя глусли привлачающи на Божественое слышанье
Радуйся благостроиная струя словес духовных
Радуйся пресветлая Святителем красота

Кондак 8
Странно зрение виде в бдении нощьнем, верховных Апостол пришествие Петра Ианна посланае све к тобе глаголюще и от общего Владыки нашего Господа Иисуса Христа и Бога, да приидеши от здешних к Господу Богу твоему , вкупе с нами водворяевеся с ангелы тому радостно поющия Аллилуия.

Икос 8
Весь бе к въгорним вперився умом же и душею земная вся преобиде, долу влекущая, в молитвах и в бдениих упражняюся, тем же откровенья сподобися Божественых верха Апостолом зриния, сего ради Апостолом сбеседника и съпричастника взываем ти сице:
Радуйся сподобивыся и во плоти видети Святых Верховных Апостол
Радуйся сподобивыся с ними съпричастникъ быти славы же Царьствия
Радуйся своими многоразличными ученьми освети подсолнечную
Радуйся от Бога дарованных ти словес учении на всеслышанно бысть поднебесней
Радуйся туча Небесная, одождящи напоющи бразды Солнечныя
Радуйся Божественая роса отъемля варъ унынья
Радуйся гора точащия Божественую сладость
Радуйся капьля каплющия сладъкых учении премножество
Радуйся раи пищьныи источник священия
Радуйся нищелюбья добротою украшеныи
Радуйся обидимым спомогатель крепокъ и
Радуйся призывающим тя верою теплыи помощниче
Радуйся пресветлая Святителем красота

Кондак 9
Всякое есство человеческое дивляашяся о данеи ти с Небеси Божественыя ти Благодати, яже в устнах твоих изълиявшися, яко медъ сладокъ каплющи в сердца верных Божественая твоя словеса, имиже украси ученьми любящих тя душа и сих к Небесному Владыце покояньем приводя верьнии ти въпиющих Аллилуия.

Икос 9
Ветии мудреци елиньстии твоими побежени премудриими Божествными речении, недоудоумеют бо глаголати противу даныя ти свыше Благодати Святаго Духа, мы же тебе сердечною любовью душа твоими златословесными наставьляеми ученми, вопием таковая
Радуйся златословесныя уста Божия Благодати
Радуйся премудры Златоусте своими учении миръ умудрив
Радуйся премудрости свыше даровании укращении
Радуйся приснословыи учитель жития, светлостью украшеныи
Радуйся источьники ученья отрину в сердца жажющая твоихь словес
Радуйся твоими истекающими учении, Церьковныя питомици разбогативъ
Радуйся злославъныя от Церкви отгнавы жезлом Веры
Радуйся разрушивыи ереси и люди Божия своими ученми утвердивыи
Радуйся глубино потопляя зловерныя
Радуйся сладьких вод быстрино напоя благочестивыя
Радуйся маслино умащая Богоглаголании душа
Радуйся яблоко Духа благовонное облагоухая всех
Радуйся пресветлая Святителем красота

Кондак 10
Спасти хотя Господь люди Своя, тя Церкви Своеи Архиерея подасть Царствующему граду, треблажене Иоанне Златоусте, Царьски за нюже изгнанье подасть суд имже Божиим молением Царьскым, възвращеся паки к пастве люди твоих, радостно тя сретшии люзно приимши верою Христу въпиюще Аллилуия.

Икос 10
Стекаються Царствующаго града народи ко возвращенью честных моще златоуста, с патриархом служители священных, и множе Царь же благочестивы, пад на перси честных ти мощею ради бысть, и с слезами вопияше таковая:
Радуйся послушавыи молении моих возвращеся к престолу своему
Радуйся непрезревыи молеб моих и не уничиживы порьфиру царьскую ми
Радуйся пречистыи Архыерею, отче мои породивыи мя банею крещенья
Радуйся въсприимь мя собе сына от Божественыя святыя купели
Радуйся незлобивыи отче Златоусте отдаи же гнев рождешии мя съгрешьхъ тобе
Радуйся подражателю милости Владыки своего отпусти негодованье матери моеи
Радуйся началнаго Пастыря Христа учениче
Радуйся пастырю добрии Христовых овец
Радуйся Духу зерьцало красное и чистое ума
Радуйся приимыи с Небеси Духа благодать ученьемъ
Радуйся светилниче свезарныи сияя на свещнице Церковном
Радуйся Божественое сияние Царьскаго град осияющи
Радуйся пресветлая Святителем красота

Кондак 11
Песньми и молитвами подвижеся священныи Аделфии тобе желаше по отшествии видети Златоусте в откровении светоноснаго мужа всех Святитель зренья, сподобльши того, тебе же предсказавше у Престола Христова посреди Херувим и Серафим, предстояща радости исполнься вопия Аллилуия

Икос 11
Светоноснаго тя светлостью добродетелеи, дылы же словесы Златоусте, освети мя во мраце греховне, невидение слежаща, и достоина створимъ чюдо света, да въспрянув от мглы страстей, усердъствуя в добродетелех, радостною душею въпию сице:
Радуйся гоненья, заточенья приими за Истинну
Радуйся ко Церковному молению приклонися, ко своему саду възращеся
Радуйся отложивыи гнев, негодованья Евдоксии Царици.
Радуйся уставивыи от тридесятилетняго тряснованья тоя гробъ
Радуйся подавы виноград Фегнастови
Радуйся и отделивыи виноград о инои вдовице
Радуйся взаим свои язык священому Проклу вдавыи, в поучение народу
Радуйся священным твоим учением Пресвященны Архыереи люди възвесели
Радуйся тебе Церкви и Божия пакы Престольника тя приятъ радостна бысть
Радуйся свои пакы Престол въсприимыи Божиим Судом
Радуйся ангелом равностоятелю у Престола Христова
Радуйся совсельниче Пророком и Апостолом спрестолне
Радуйся пресветлая Святителем красота

Кондак 12
Благодать Духа Пресвятаго с Небеси во светоприемною ти душу вселися Златоусте и мудра благовещателя тя сътвори на всеи Поднебеснуи бысть, повьсюду твоих учении списанья, имиже Церкви вся Божественая украсишяся, с нами Богу вопиюще Аллилуия.

Икос 12
Поющи тя вси въсхваляем честны твои мудростьныи разум Златоглаголиваго ти языка словеса, иже наполнивша весь миръ ученми от златовещателных ти уст, темже вопием ти сице:
Радуйся Богослосныи красныи медоточивыи языче
Радуйся Божия мудрости златоточивыя струя
Радуйся Божественых учении неисчерпаемое море
Радуйся сладки источьниче от негоже верьнии сладость черьплюще
Радуйся честнаго мироположнице Божественаго мира
Радуйся честных арамат съсуде Божественыи
Радуйся цвете прекрасныи и Небесных селъ
Радуйся шипок таиныи процветыи в раиских уделех
Радуйся главо Православная Христове Церкви
Радуйся око благочестья Боговиденья зрително
Радуйся столпе Церковныи солнце Вере
Радуйся всемирныи вселеньскыи учителю
Радуйся пресветлая Святителем красота

Кондак 13
О честныи святыи отче, покоянью светлыи проповедьниче, Златослове, Иоанне Златаусте, приими наша сия приношенья, и от всех свободи, и вечнаго мя избави мучения, молитвами к Господу, яко да спасаем тобою Богу поюще: Аллилуия.
Сей Кондак глаголи трижды, по сем Икос 1, Кондак 1

Набрано по тексту: http://old.stsl.ru/manuscripts/medium.php?col=1&manuscript=768&pagefile=768-0109