Кондак 1
Избранный служителю Воплотившегося Слова,/ преславный угодниче Христа Вседержителя,/ благодатию Духа Святаго щедро украшенный,/ подвиги и чудесы своими землю нашу осветивший,/ великий в скорбех помощниче/ и на путь к небесному Отечеству нас присно наставляющий./ Славяще тя, заступника нашего, с надеждою и любовию воспеваем ти сице:
Радуйся, отче Ионо, теплый молитвенниче и скорый помощниче ищущим спасения!

Икос 1
Ангелоподобную доброту души твоея провидя всея твари Создатель, Егоже вместилищем тщался еси быти, отче Ионо, во вся дни живота твоего. Дарова тя людем земли нашея усерднаго предстателя. Ты же, в житии своем, был скорый заспупниче в нуждах и напастех сущих, усердный молитвенниче о всех чающих твоея помощи. Мы же , видя велие твое дерзновение пред Господом, к тебе припадаем и молимся, во еже спастися нам и избавитися от належащия мглы греховных обстояний, с любовию и умилением зовем ти:
Радуйся, Бога Промыслителя дивный избранниче;
Радуйся, свыше явлением Пресвятыя Богоматери к служению Господу воззванный;
Радуйся, от рук преподобнических самого Кукши ярем Господень иноческаго жития приявый;
Радуйся, трудолюбче, течение жизни своея в великих подвизех совершивый;
Радуйся, в глубине сердца бисер драгий Господа Иисуса Христа обретый;
Радуйся, имя Его Божественное, во устех и в сердце своем выну имевый;
Радуйся, чистотою сердечною и смиренномудрием украсился еси;
Радуйся, пламенную любовь к Богу и ближним показал еси;
Радуйся, древо благосеннолиственное, от бури мирскаго мятежа многих укрывающее;
Радуйся, добродетелей в душах ищущих спасения насадителю;
Радуйся, красоту Православия нам являяй;
Радуйся, лицем к лицу Творца радостно ныне созерцаяй;
Радуйся, отче Ионо, теплый молитвенниче и скорый помощниче ищущим спасения!

Кондак 2
В возрасте мужа зрелаго, посла ти Господь, болезнь тяжкую. Ты же, отче всечестный Ионо, силою любве Божия влекомый и видя суету земных попечений, от мирскаго мятежа изшед. Пешешествовал до гор Кавказских, идеже с отцами отшельниками пребывал еси. Путеводим же, благословением отца преподобнаго Кукши, во обитель Пречистыя Девы града Одесскаго достигл еси, со слезами умоляя приобщити тебе к работающым Богу и вопиющым Ему: Аллилуиа

Икос 2
Сила Вышняго вложи в сердце твое ко иноческому житию велию ревность. Ты же, святче Ионо, Христа возлюбив, стопы своя направил еси по словеси Его: «Иже хощет по Мне ити, да отвержется себе и возмет крест свой и по Мне грядет», и тако обрел еси в сердце своем Спаса Христа. Мы же, видяще твое произволение, всего себе предати служению в Троице славимому Богу поем ти сице:
Радуйся, от рода крестьянскаго пречестная отрасле;
Радуйся, в страсе Божием добре воспитанный;
Радуйся, в Православной вере от младенства утвержденный;
Радуйся, равноангельнаго жития ревнителю;
Радуйся, спасительнаго ига Христова безропотный носителю;
Радуйся, отсечением воли своея диавола препобедивый;
Радуйся, на скрижалях сердца твоею Закон Христов написавый;
Радуйся, от мира дольнаго в мир горний ум и сердце свое вперивый;
Радуйся, многоразличныя беды от ближних и лукавых духов претерпевый;
Радуйся, мужественно врагом плоти, миру и диаволу противоставый.
Радуйся, отче Ионо, теплый молитвенниче и скорый помощниче ищущим спасения!

Кондак 3
Испытуя же, сердцеведец Господь, твердость намерения твоего, не допусти тя во обитель прияти. Ты же, богоносне Ионо, за вся Христа смиренно благодаряще, ископаша себе пещеру на брезе морстем и пребыша тамо, моляся и постяся сугубо, по образу подвижников древних, славяще Бога непрестанным гласом: Аллилуиа.

Икос 3
Лет пятьнадесят послушания труды суровыя несл еси во обители, при сем в тяжцем недузе пребывая. Не ропща, а все с упованием на Христа претерпевая. Мы же, мудре Ионо, таковому убо твердому искусу твоему в терпении удивляющеся, вопием ти сице:
Радуйся, укорения и поругания яко Божие изволение восприявый;
Радуйся, при послушаниях твоих никогдаже возроптавый;
Радуйся, страх Божий в сердцы своем твердо насадивый;
Радуйся, всего себе воли Его покоривый;
Радуйся, всякую гордость житейскую в себе искоренивый;
Радуйся, иго Христово благое и легкое искренне возлюбивый;
Радуйся, любовию ко Христу Богу присно пламеневый;
Радуйся, на камени православныя веры крепко себе поставивый;
Радуйся, строгий блюстителю вертограда души твоея;
Радуйся, братолюбия и незлобия образе верный.
Радуйся, отче Ионо, теплый молитвенниче и скорый помощниче ищущим спасения!

Кондак 4
Силою Божиею укрепляемый, богомудре Ионо, велия труды иноческия подъял еси. Трудолюбием и деланием духовным, аки оружием крепким противу прелести духовной ополчался еси. Весь мирови умерый, страсти своя умерщвляя, храм Духа Святаго в себе благодатиею Божиею устроил еси. Мы же, Вседержителю нашему, премудро тя в горниле испытаний закалявшему и к подвигу старческому уготовлявшему, велегласно возносим: Аллилуиа.

Икос 4
Слышавше людие о благоугоднем житии твоем, блаженнее Ионо, узреша тя великаго светильника веры, надежды и любве и текоша к тебе яко к целебному источнику: ови послушати поучений твоих, ови исцелений от различных недугов прияти, ихже ты с отеческою любовию приемля, путеводил еси ко спасению, отгоняя всяк недуг и всяку немощь. Сего ради мы прибегаем к тебе, велиему помощнику и целителю, славяще тя сице:
Радуйся, безмолвия любителю, обитель подвиги своими украсивый;
Радуйся, воздержанием чувств своих ангелов и человеком удививый;
Радуйся, Единаго Господа во всегдашнюю помощь ти вседушно поискавый;
Радуйся, искус долготерпения благоспешно прошедый;
Радуйся, многих даров Духа Святаго сподобивыйся;
Радуйся, во смирении бремя служения в нуждах сущим понесый;
Радуйся, благодати Божия сосуде избранный;
Радуйся, данный от Бога ти талант сугубо возрастивый;
Радуйся, милости Божией цельбоносный источниче;
Радуйся, любве христианския ревнителю.
Радуйся, отче Ионо, теплый молитвенниче и скорый помощниче ищущим спасения!

Кондак 5
Возсия неизреченным светом, яко велия свеща, жизнь твоя во Христе. Весь бе духом в вышних на небеси и нижних, иже суть на земли злостраждут, николиже отступал еси, предивне Ионо; прогоняя в людех тьму неверия и заблуждения, по множеству беззаконий нашедшую на ня. Постави бо тебе Господь на свещнице, да видят тя вси обремененнии грехми и исходят от тьмы нечестия к свету Божественныя Истины, воспевая Царю Славы: Аллилуиа.

Икос 5
Новый путь духоноснаго старчествования яви тебе Господь, да восприимеши всю скорбь человеческую яко свою, молитвою и теплотою любве сию врачуя. Устремляхуся же к тебе людие от всех пределов Земли Русския, скорби и недуги безчисленные купно ти приношаху; Мы же, ти, мудре Ионо, яко нескудевающему источнику благодати и любви Божией, всем, от грехов люте страждущим, щедре помощь твою изливавшему, во умилении сердец принесем таковая:
Радуйся, во тьме падшаго мира светильниче неугасимый;
Радуйся, на поприще старчества неослабне потрудивыйся;
Радуйся, Духом Святым от сует мирских воззванный, во еже работати Господеви;
Радуйся, великий и теплый о нас предстателю к Богу и молитвенниче;
Радуйся, зерцало Солнца Правды Христа, милость и любовь Его отражающее;
Радуйся, сокровенных зрителю, врага темнаго наветы и ловления прозреваяй и благомощно отражаяй;
Радуйся, от глубины сердечныя, добрая и душевно- спасительная наставления человеком износивый;
Радуйся, смирением, терпением и любовию вся искушения вражия побеждавый;
Радуйся, духовными очима своима на престоле славы Господа выну созерцавый;
Радуйся, любовию своею к Богу Отцу вожделевый.
Радуйся, отче Ионо, теплый молитвенниче и скорый помощниче ищущим спасения!

Кондак 6
Новыми недуги лютыми уязвлялось тело твое, ты же, отче многотерпеливе Ионо, непрестанно в радости духовней пребывал еси. В сердце великодушное твое принимая всех сущих в скорбех. С любовию поучал чада твоя кротости и непрестанному пред Богом хождению, глаголя: «Боже, поможи – а сам не лежи», «Всяк человек лож и я тож», «Это Бог все устрояет, а не убогий Иона». Мы же, Спасу Всемилостивому, в болезнех и подвизех духовных тя укреплявшему и любовь неоскудевающую тебе к людем подававшему, восклицаем: Аллилуиа.

Икос 6
Якоже град, по слову Господню, не может укрытися верху горы стоя, тако Человеколюбец Господь хотя низпослати милость Свою людем земли нашея, дарова тя, отче милостиве, в скорбех помощника, в недузех врача благодатна, отчаявшимся надеяние, лютыми помыслами и унынием смущаемым кроткаго вразумителя, и всем во всякой нужде и обстоянии сущим добраго наставника. Ты же, святче Ионо, недугующих под свой покров отечески приемля, якоже родители чада своя, утешал еси, отраду своим попечением подающе, и отеческою ласкою тяжесть болезней духовных и телесных облегчающе, молитвою всесильною исцелял еси. Сего ради приими от нас богохваления таковая:
Радуйся, на высоту совершенства духовнаго возшедый;
Радуйся, оскудевающих в вере благодатию Божию чрез молитвы своя восполняяй;
Радуйся, душ наших на стезях спасения руководителю;
Радуйся, глаголов небесных слышателю;
Радуйся, отрадо к тебе прибегающым;
Радуйся, во всех нуждах наших скорый помощниче, болезновал еси о всех согрешающих;
Радуйся, о обращении и исправлении грешников усердный к Богу и Богородице ходатаю;
Радуйся, спасения многих душ человеческих виновниче;
Радуйся, ближняя твоя искренне возлюбивый;
Радуйся, спасению их душевному и исцелению телесному усердно послуживый.
Радуйся, отче Ионо, теплый молитвенниче и скорый помощниче ищущим спасения!

Кондак 7
Боготечное светило быв угодник Божий, отче Ионо, всех к Солнцу Правды — Христу путеводил еси примером жития твоего святаго; иже все бысть посвящено на служение Богу и ближним твоим: нищая и убогая милостиво питал еси. Во смирении велием, язвы греховные сердец человеческих, прикровенно открывал еси. Без требников церковных, своими молитвами смиренными, одержимых от уз вражиих свобождал еси. Мы же, Спасу Христу, дух подвига и любови в сердце твоем насадившему, со трепетом сыновним приносим: Аллилуиа.

Икос 7
Весь в Бозе быв, отче блаженне Ионо, о Бозе и угождении Ему присно призывал еси, умоляя ничтоже предпочитати паче любве Христовы и памятуя реченное Христом: “Не собирайте себе сокровища, идеже моль и ржа истребляют, а собирайте себе сокровища на небеси”, глаголал еси: «не желайте ради благ временных лишитися благ вечных». Всех же, приимал с любовию, и поучал еси от Божественнаго Писания и житий отец святых, коих во мнозе на память знал еси. Тем же и нас, якоже и чад твоих, научи истинному деланию на пажитях душ наших, да славим тя благодаряще:
Радуйся, пчело трудолюбивая, соты добродетелей в насыщение ближних с собою носящая;
Радуйся, заблуждшия овцы во ограду Святыя Церкви возвращал еси;
Радуйся, последния укрухи хлеба твоего с неимущими разделяти поучал еси;
Радуйся, покаянию онех вельми радовался еси;
Радуйся, жаждущих от источника истины Христовой напоял еси;
Радуйся, яко чистотою душевною на нечистыя силы крепко поборствовал еси;
Радуйся, откровений Господних приемниче;
Радуйся, покаяния велегласный проповедниче;
Радуйся, милосердия Божия к нам ходатаю;
Радуйся, любовию жертвенною к ближним Богу Сыну последовавый.
Радуйся, отче Ионо, теплый молитвенниче и скорый помощниче ищущим спасения!

Кондак 8
Не знало отказа для страждущих, сердце твое простодушное, славне Ионо, оное же влекло тебе, отче святче, к поклонению местам святым. Многажды, будучи томим болезнями лютыми, на гору Синайскую восходил еси, Гробу Господеню и Горе святей Афонстей поклонялся еси. Обаче, возвращаясь, рекп еси: «Мати Божия назначила служити ми в обитили ея». Тако и мы взываем ти: научи и нас, немощных и обуреваемых в житии сем, взыти к Сиону Горнему, славяще Творца: Аллилуиа.

Икос 8
Видеша братия и чада твоя, отче богоносче Ионо, неотмирность души твоея и яко Сердцеведец Господь, подвигов духовных вершины – непрестанной молитвы сердечной, сподобил тебя. В коей пребывая, духом своим, в Горних и дольних местах пребывал еси, прозревая грядущая, аки настоящая. Странное и дивное бысть деяние сокровенное, егда в келии своей монастырстей, на молитве нощней пребывая, некоему Митрополиту греческому, на острове Крите, пребывающему, телесно явился еси. О сем, удивляшася, славим Творца Непостижимаго, и тебе угодниче Божий возносим, сицевая:
Радуйся, восхождением на гору Святую поучавый трудолюбному восхождению к Сиону вышнему;
Радуйся, яко Ангелов зрел духовными очима;
Радуйся, не точию зрителю, но и причастниче, еще сый на земли, был еси света небеснаго;
Радуйся, чистотою своею Богу Духу Святому во обитель себе уготовил еси;
Радуйся, непрестанную молитву в сердце твоем возгревал еси;
Радуйся, в трудех и молитвенных бдениих древним отцем поревновавый;
Радуйся, помазанием освященным елеем болезни врачевавый;
Радуйся, заповеди Спасовы в житии воплощати ны сподвигающий;
Радуйся, розго, мног плод о Христе сотворшая;
Радуйся, превеликия к нам милости сокровище.
Радуйся, отче Ионо, теплый молитвенниче и скорый помощниче ищущим спасення!

Кондак 9
Ветии велеречивии не могут изрещи достойную похвалу Богу Промыслителю, премудре спасающему род человеческий и благовременне призывающему избранники своя к служению Церкви Христовой, да ни един от сынов света звероуловлен будет волки мысленными. Возсияша же, сугубо во обители, духовная дарования твоя, отче праведне Ионо, яже стяжал еси благодатию Святаго Духа, в тя всельшагося. Провидя же, Господь, благоплодную доброту души твоея, благословил дело рук твоих во славу имени Его святаго на спасение и врачевание всех с верою и надеждою к тебе притекающих и неленостно возносящих песнь Пресвятей Троице: Аллилуиа.

Икос 9
Новаго чудотворца и богоноснаго старца яви тя Господь, егда пришел еси в меру преспеяния духовнаго и стяжал еси Духа Святаго в непорочнем сердце своем. Ты же, богомудре Ионо, будучи девятым чадом у родителей твоих, воспоминал о боговидце Моисее, яко и тот девятым отроком в семье был еси. Воистинну явился еси, отче Ионо, яко древний Моисей, изводяй заблудших из египетскаго рабства греху, ничесоже страшася, токмо единаго Бога. Сего ради умиленно вопием ти:
Радуйся, яко посох старчества, яко пречудный жезл Моисеов, от Господа приял еси;
Радуйся, яко не хитросплетением словес, но силою правды Божия души призывал еси;
Радуйся, словом Божиим нас богатно питаяй;
Радуйся, яко нестареющую мудрость евангельскую - живу и действенну показал еси;
Радуйся, священства велелепая красото;
Радуйся, пастырскаго подвига премудрая доброто;
Радуйся, добродетельнаго жития богомудрый наставниче;
Радуйся, яко широтою любве твоея всех объял еси; Радуйтеся, яко огнем благодати сердца верных воспламенял еси; Радуйтеся, яко пламень злобы адския тайнодейственно угашал еси.
Радуйся, отче Ионо, теплый молитвенниче и скорый помощниче ищущим спасення!

Кондак 10
Духовным отцем был еси, отче Ионо, для тысящ чад, еще же тысящи чрез двери кельи твоея проидоша. Да бы волю Божию у старца, истиннаго познати, и совет духовный улучити. Ты же, себе странника и пришельца в мире сем помышляя, скорбел об оскудении веры святой, и многую паству свою, учил еси служити точию Богу, а не мамоне. Покайтесь люди, взывал отче мудре, да бы отвратить гнев Божий, движимый на землю во гресех утопающую. Мы же, довготерпеливому Царю веков, со трепетом приносим: Аллилуия.

Икос 10
Проповедник Православныя веры и благочестия чрез все житие твое быв, праведне Ионо, словом и делом сие запечатлевый. О людех же, зело бедствующих и скорбящих в мире сем, недоуменьми и соблазны века сего люте обуреваемых, в сетях диаволих запутавшихся - крепко сердцем болел еси. Аки голубь, под крила своя в непогоду лютую, птенцы своя собирает и греет, тако и ты, старче, чада твоя укрывал еси. Мы же, видяще велию силу благодати в тебе, Богом дарованную, со умилением поем:
Радуйся, от Света Присносущнаго богатно осияваемый;
Радуйся, Пастыреначальника Христа к погибшим овцам посланниче;
Радуйся, соль земли, яже никогдаже обуяет;
Радуйся, немощныя и страждущия благостию твоею покрываяй;
Радуйся, благолепие Дома Божия возлюбивший;
Радуйся, доме спасения для чад духовных назданный;
Радуйся, мглу неверия отгоняющий;
Радуйся, лживыя неправды потребляющий;
Радуйся, право стоящим утверждение;
Радуйся, адаманте веры несокрушимый.
Радуйся, отче Ионо, теплый молитвенниче и скорый помощниче ищущим спасення!

Кондак 11
Духом прозревая грядущая, о скором конце времен вещал еси, Ионо богомудре. Лихолетия и брани кровавые, отступления от веры отеческой, оскудении духа Православнаго. Наставлял еси чада своя крепко в вере пребывати, антихристовы номера и начертания не брати. Рекл еси, старче: «Чадца, голод потерпите – спасения ради». Поучал еси крепко к Богу взывати и на Него упование имети. Ему же, Спасителю нашему от сердец воззовем: Аллилуиа.

Икос 11
Весь еси, отче блаженнее, ликом просветлялся еси, егда чадом своим о Царе Русском грядущем, помазаннике Божием, вещал еси. Яко Русь Святая воскреснет под скипетром Царя Самодержавнаго. Веры Православныя расцвет небывалый на Руси предвещал еси. Вещал ты, старче: «Матерь Божия Русь Святую не оставит». Мы же, ти, отче Ионо, Православия поборнику преславному и Церкве Христовыя столпу непоколебимому похвальная принесем таковая:
Радуйся, заступниче наш во дни сия многотрудныя нам дарованный;
Радуйся, неврежденныя веры Христовы пламенный возвестителю;
Радуйся, земли русския добрый сеятелю;
Радуйся, расколов и ересей ревностный обличителю;
Радуйся, за Русь Святую теплый молитвенниче;
Радуйся, неразрушимая крепосте веры;
Радуйся, реку приснотекущую чудес безбожному миру изливый;
Радуйся, Церкве Русския крине преславный;
Радуйся, народ Русский к покаянию призывающий;
Радуйся, о даровании Святой Руси Царя Господа умоляющий.
Радуйся, отче Ионо, теплый молитвенниче и скорый помощниче ищущим спасення!

Кондак 12
Егда же приспе время твоего отшествия, святче Ионо, ты недугами лютыми обстоим был еси, болезновал еси в душе о чадех твоих оставленных. До дней последних утешал и молился еси о всех к тебе притекающих. Богородична икона, любимая твоя, «Взыскание погибших», у дщери твоей духовной, пред отшествием твоим, дивно заблогаухала и мироточила. Царь Небесный прият тя, в покой свой яко раба благаго и вернаго и венцем Небесным увенча подвиги и труды твоя, преславне. Ныне же, Небесныя Славы причастником являешися, купно со ангелы и святыми всеми песнь воспеваеши: Аллилуиа.

Икос 12
Поюще житие твое, отче богоносче Ионо, веруем, яко многомощно есть пред Престолом Владычним твое за ны ходатайство. Ты бо, и по отшествии в селения Горния, обильно изливаеши, яко сосуд благодати неистощимый, всем к тебе припадающим, потребная для спасения. Воистину, чесна пред Господем смерть преподобных Его, отче наша Ионо, и память твоя с похвалами. Мы же, человеческими устама ныне благодарственно воспеваем ти:
Радуйся, душею безсмертною к Сиону горнему воспаривый;
Радуйся, яко голубь чист, горе возлетевый;
Радуйся, за подвиги временнаго жития покой вечный обретший;
Радуйся, по трудех и подвизех твоих блаженное упокоение приявый;
Радуйся, гражданине Иерусалима небеснаго;
Радуйся, яко с лики ангелов на небесех тожествуеши;
Радуйся, обетований Божиих сонаследниче;
Радуйся, любви Христовы сопричастниче;
Радуйся, яко паству твою по отшествии своем не оставил еси;
Радуйся, яко моления наша исполняти не престал еси;
Радуйся, отче Ионо, теплый молитвенниче и скорый помощниче ищущим спасення!

Кондак 13
Пение умиленное от любве чистыя приносим мы ти, святче Божий Ионо, скорбьми и искушениями века сего колеблемыя, зряще бо нищету свою духовную, маловерие и малодушие, окаменение сердечное, молим тя смиренно: елеем молитв твоих умасти язвы сердец наших, буди о спасении нашем, во времена лютыя грядущия - неусыпный пред Богом молитвенник, и да сподобимся с тобою купно, в обителях Горних, Милосердному Господу во веки воспевати: Аллилуйя!
Сей Кондак поется трижды, по сем Икос 1 «Ангелоподобную доброту…» и Кондак 1 «Избранный служителю…»

Молитва
О, предивный угодниче Христов, отче святче Ионо! Призри милостивым твоим оком и виждь яко зело умножишася скорби и злострадания в мире сем, во грехах и беззакониях иждиваем дни своя, данное же нам время на покаяние в суетных и многомятежных страстех провождающе. Моли за ны, отче наш милостивый, за дети своя духовныя, яко имеяй дерзновение к Небесному Царю; не премолчи за ны, вопия ко Господу, и не презри нас верою и любвию чтущих тя, но поминай недостойных у престола Вседержителева, и не престай моляся о нас ко Христу Богу, яко дана тебе бысть благодать молитися за ны. Да добропобедно понесем крест нашего земнаго жития, ты бо обещался еси по отшествии твоем слышати прошения всякаго, аще с верою приидет к месту твоего упокоения.
Егда же приспеет наше от временнаго сего жития отшествие, и к вечности преселение, не лиши нас помощи твоея небесныя, но молитвами твоими всех нас приведи в пристанище спасения и наследники яви нас быти всесветлаго Царствия Христова, да поем и славим неизреченныя щедроты Человеколюбца Бога Отца и Сына и Святаго Духа и твое вкупе со всеми святыми предстательство, во веки веков. Аминь.

Тропарь, глас 5-й
Новою звездою на небе церковнем возсиял еси,/ отче богоносне Ионо,/ Духа же Святаго стяжав чистотою богоугоднаго жития твоего,/ беды и скорби людския, яко вериги незримыя на рамо свое возложи./ Велии труды любве и милосердия подъял еси, / яко луч Света Христова во времена последняя просиял еси, / темже и нам любовию почитающим тя,/ грехов оставление испроси, праведне отче наш,/ молитвенниче о нас пред Богом теплейший.