Кондак 1
Возбранныя небесе Всецарицы на демонов злооружных полче неодолимый: двуединый oт обою пещеры богогласия молебнаго личе: небесе церкви нашея созвездие многоименное, oт мрака подземна чудесы возсиявшее концем, иже воистину вси есте отцы наши. Тем, убо, похвальная любве словеса и призывание предстательства вашего начинающых, услышите чад ваших, усердно поющых:
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Икос 1
Ангелоподобнаго жительства образ явисте первии в новопросвещенней земли нашей, отцы преподобнии; благословение горы святыя, аки oт Синая Моисей закон, принесше горе печерской, освятисте ю подвижным вашим житием; в подземных всельшеся, к небесем путь тещи научисте вся, и o пещеры малыя лавру велию и славну создасте. Мнози бо обители на Руси начаша быти oт имений щедрот княжих: монастырь же печерский не богатством но труды и пощением в молитвах слезных создадеся, и любовию о Бозе братскою въ нищете, паче тех всех процвете: якоже Нестор в летописании своем, неложно ны извести: в нем же ныне приносим вам похвалы сия:
Радуйся, Антоние, пречистый наш первоначальниче, oт Афона благословение месту сему молитвою испросивый;
Радуйся, житию иноческому во стране нашей основание спасительное незыблемо положивый.
Радуйся, Феодосие, обители печерския благоустроителю и жительства монахом чина утвердителю богомудрый;
Радуйся, Церкве Великия созидания зачинателю, и во игуменства подвизех делателю неустанный.
Радуйся, Варлааме, первый во игуменех Печерских стада пещернаго предводителю;
Радуйся, града подземнаго святоизбранный и благословенный во управлении первенче.
Радуйся, Стефане, Феодосия учениче присный и во игуменстве достойный тому приемниче избранный;
Радуйся, попечительне, еже не престаяти в почившых поминовению во обители Печерстей завет уставивый.
Радуйся, Никоне, Антонию Великому подвига пещернаго соучастник и первый иерей пещерный был еси;
Радуйся, яко Церкве Великия созидания и тоя красование иконное конечне завершил еси.
Радуйся, Иларионе, ископанию пещерному к молитве уединенней предначинателю;
Радуйся, Антонию пришедшу странноприемниче и того пострижения духовный сыне, таже o рода русскаго первый святителю.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 2
Видя и уведе равноапостол Российский Владимир, по испытании прилежне, едину истинную веру в церкви Восточней, прият ю вседушно и крещением просвещся, сам и сынове его, принесе ю во страну свою и люди тоя ко Христу приведе. Таже и первосвятителя Михаила митрополита прием со пресвитеры его, иже первый российский народ крести, научая новопросвещенныя пети Единому Богу: Аллилуиа.

Икос 2
Разумению веры новоприятыя научити ревнуя, Михаил первоиерарх наш, ставити начат по градоввм и весем архипастыри и пастыри, да благочестие процветет oт сеяния Владимирова перваго. И по сем не в долзе, мнози oт инок Обители Печерския святители во епископех избранни быша и во исторжении злочестия, инии и до крове, потрудишася.
Радуйся, Михаиле, первый наш иерарше и просветителю светом Христовым языка Российскаго;
Радуйся, равноапостольный первоучителю и крестителю рода новопризваннаго.
Радуйся, священномучениче Леонтие, Ростову апостоле, oт иноков печерских архипастырь первоизбранный;
Радуйся, паки иларионе по нем на митрополию первосвятитель всея Руси, oт пещернаго жития, поставленный.
Радуйся, Стефане, граду Владимиру на Волынстей земли добре и Богоугодно святитель бывый.
Радуйся, Ефреме, устав студитов oт Царствующа града Феодосиеви, списав, принесый.
Радуйся, яко послежде митрополию прием, храм чуден вельми в Переяславе Архистратигу создавый.
Радуйся, Исаие, по Леонтии, Ростовский святителю; страждущих и нищых милостивый попечителю.
Радуйся, Никито, демонскаго прельщения, отцев молитвами победителю; таже Новуграду чудотворный святителю.
Радуйся, Нифонте, законниче ревностный, самочиннаго собора деяние и князя небоязненно обличивый.
Радуйся, Симеоне, Переяславский иерарше, пастырю добрый, и даже до крове и смерти верен прибывый.
Радуйся, Симоне, Лавры Печерския любезный почитателю и подвигов отцев ея тщаливый списателю.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 3
Силу Божию в немощи совершившуюся, зрим вси, яве на обители Печерстей несумненно показавшуюся в первоначальницех ея, жития пещернаго начаток положивших; таже небеси подобную церковь Владычице Богородице в чудесех дивных воздвигшых. Темже всю благодать и славу Лавры нашея, по сих и до днесь пребывающую, умиленне в памяти соблюдающе, благодарственно Богу зовемъ: Аллилуиа.

Икос 3
Имуще толик облежащ обитель нашу облак свидетелей, по словеси апостолову, яже суть вси отцы наши Печерскии, oт подвигоположников, пещеры ископавшых, и до множества святителей первоначальных земли Русския, oт обители сея избранных, должни есмы присно тыя молити, да молятся о душах наших и пети онем сице:
Радуйся, Лаврентие, по служении епископле во граде Турове, вселивыйся в пещернем затворе тесне.
Радуйся, Феоктисте, oт игуменства обители Печерския на архипастырский престол Церкви Черниговския посажденный честне.
Радуйся, Меркурие, oт Смоленска града, еже в пещере погребстися, кладою по водам приплывый.
Радуйся, Амфилохие, архиерею страны Волынския приснопамятный, по преставлении же в пещере безвестно почиваяй.
Радуйся, Арсение, архипастырю града славнаго Твери, oт архидиаконства Лавры Печерския тамо призванный.
Радуйся, Феофиле, святителю неправедно низложенный, oт заточения же узилищна ко обители Печерстей водами принесенный.
Радуйся, благоверный во иноцех Феодоре, Острожский княже, Церкви Правослвныя oт латинска насилия защищение бывый.
Радуйся, Николо, славу княжу на труды иноческия в монастыри Печерстем пременивый, во смирении мнозе.
Радуйся, Евфимие, Переяславлю изрядный архипасвятырю, яко дел твоих Богоугодных образом паства твоя процвете, паче словес наученная.
Радуйся, зодчих двоенадесятице люботрудная, дар свят, чудесне oт руку Влахернския Царицы, икону Богородицы обители Печерстей принесшая.
Радуйся, сонме благоискусный, Апостолом равночисленный, братия глаголемый, небеси подобную Церков Великую в лепоте зельней создавый.
Радуйся, соборе преосвященный святителей преподобных, церковь сию во строении чудесы дивно благословенную, совершенне со славою вместивый.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 4
Буря нашествия Батыева страну нашу люте смяте и мало не погуби. Тогда и обитель Печерская разорение велие, паче преждних половецких претерпе и иноцы мнози пленени быша, инии же и горце в муках скончашася. Обаче нецыи в чащах лесных крыющеся, потаенно ко трапезе Предтечеве прихождаху, в камениех храма разорена соблюдшейся, и тамо утро, вечер и в полунощи не престаяху умиленно звати: Аллилуиа.

Икос 4
Слышит Господь моления раб Своих в скорби к Нему вопиющих. Тако и вопль молебный, аще и в безмолвии, oт иноков Печерских небесе достиже и по времени паки обитель их возградися и новоукрасися, благ же вящшых всех бе, еже Богородицы икона неврежденна пребысть, и яко святыня велия предивно известися чудесы: и отцев подвигов течение не преста, но и умножися. Тако и мы не престанем в нем хвальная приносити, первее же иже в бедах тех, o чуждих и o своих (увы) пострадавшим, первее воспоем:
Радуйся, сщенномучениче Кукшо, проповедниче равноапостольный, со учеником твоим Никоном вкупе oт безбожных убиенный.
Радуйся, Лукиане, во священномучницех славимый, при нашествии Батыеве страстотерпца кончину приемый.
Радуйся, Анастасие, церкве Печерския диаконе всеблагоговейный, яко преподобномучник же в нетлении дивне яве почиваеши.
Радуйся, Памво послушливый, во плене oт поган мучимый, исповедник тверд быв, но oт ангел свобожден, в пещере покоишися.
Радуйся, Евстратие, половцы плененный и иудеом проданный, и oт тех христоподобною страстию умертвивыйся;
Радуйся, в мори теми утопленный, телом в пещере обретен быв, душею же ангелы к небеси колесницею вземыйся.
Радуйся, Феодоре, безвинно мучен в злате сокровища варяжска быв, оклеветанием бесовским искусивыйся лестно.
Радуйся, Василие, стрелою и дымом в злате испушаеме, со онем купно князем корыстным умерщвленнии единочасно.
Радуйся, Никоне, исповедниче долготерпеливый; ногама oт усечения во узах половецких усохшима в церковь Печерскую чудесне притецый.
Радуйся, душу пленителя твоего, выкупа чаянием тя истязавша, во спасение искупив, ко Христу приведый.
Радуйся, Григорие, канонов духоносный творец и чудотворче новый, в реце безстудными вои Ростиславли ругательне утоплен, мучеником сочетался еси.
Радуйся, яко тело твое чудесне паче разумения, с каменем о выи в келлии явлено бе: сам же князь с вои вмале утопе, казнию Сущаго на небеси.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 5
Боготечныя звезды вси нам есте, преподобнии, на пути спасения нам светящии и кийждо житием своим образ коемуждо в течение подвига его указующе: ов убо невоздержанным постничества меру предлагает: ови же разжжением страсти плотския боримым, избаву молитвою подают: иный oт сребростяжания несытости Иудовы целит: друзии же ненавидение неправедное с памятозлобием, во смирение любве претворяют: паче же мнози, обольщенным диавола лукавствием, o прелести онагв свобождение совершенное, о Бозе, дарствуют. Всяко же наставляют ны, еже уныния крепко блюстися и послушанию усердно прилежати, неустанно взывая: Аллилуиа.

Икос 5
Видяще образы жительства отцев наших, како во искушениих плоти, мира и диавола, над теми победительми явишася: яже первее Нестор, таже Симон святитель со Поликарпом, известнейше всем последним родовом поведаша. Потщимся же всеусердно им подражати, подвига тяготою в борении не унывати, но помощи молитвенныя oт сих просити: зане сами, яко злато во огни искушени бывше и диаволу поругавшеся, Богу содействующу и искушаемым помощи могут. Темже тепле руце и сердца к ним вознесем молебно, да заступление приемше и соблазны oтринувше и любовию подвиги всех сих воспоминающе, пети будем:
Радуйся, первоигумене наш Варлааме, во иноцех Печерских первый же; искус тяжек oт рода твоего, любве ради Христовы по заповеди Того понесый, мира oтрекийся.
Радуйся, богатства, и болярства чести и обручницы твоея любови пещернаго жития ради и души спасения неуклонно oтвративыйся.
Радуйся, Никито, аггела тьмы лжею суетно обольщенный и прорицати возмнивыйся, яко многотрудным прилежанием молитв отеческих льсти сея сатанины едва избегл еси.
Радуйся, Исаакие, люте oт бесовския напасти, паче иных пострадавый, зле тою умучен быв: таже искушения свобождся, и в Бозе возмог, сам вящше немощней дерзости демонов злославней возпоругался еси.
Радуйся, Иоанне, целомудрия многострадальный и благоизвольный в чистоте мучниче полупогребенный, и девства рачителем помощниче крепкий.
Радуйся, Моисее, до кровоточна подвига греховному соблазну противоустоявый и паче иосифа в брани с плотию славимый, и боримым споборниче скорый.
Радуйся, Феодоре, демонов искусом в златообретении сокровища варяжска обольстивыйся, послежде же, Василиа молитвою, oт пожелания сего забвением уврачевавый, и власть приял еси бесом даяти в трудех принуждение.
Радуйся, Арефо, любостяжания сый страстию одержим, в похищении же сребра твоего зело огорчен, в недуг скорби впал еси, но ангелы вразумлен, покаявся, в затвор тесен вшел еси, яко милостыню непщуя окрадение.
Радуйся, Еразме, яко егда во уныния oчаяния впал еси, обаче и в сих, молитвами Антония и Феодосия Прподобных и Богородицы милостию взыскан был еси: и в смерти устрашен, и схимою очищен, храмину красну имаши на небеси.
Радуйся, иерею Тите, на любовь враждование пременив и яко памятозлобие победив смирением, абие oт одра болезни ангелом возставлен был еси.
Радуйся, Феофиле, любоначалия презорством противу брата юнейшаго Иоанна согрешив, таже в чудеси подвижения тела его во гробе страхом покаялся еси, сосуды слез излияв, яже греху твоему омовение быша.
Радуйся, Симоне, Суждалю иерарше, обители Печерския воспитание и тоя прелюбезный почитателю, иже по Несторе с Поликарпом вкупе, о святых отцех ея и чудесех сказанми питаеши до днесь души наша.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 6
Проповедницы бысте житием вашим отцы наши Богопросвещеннии, и яко Апостоли, иже Духом осияннии, oт рыбарскаго разума проста многомудри, паче риторов мира сего явишася, и веру Христову в концех земли насадиша. Вы же, темжде просвещени Духом, не в миръ сей со словомъ веры к человеком изыдосте, но паче o тех, крыющеся и безмолвием оградившеся, множества и вере, и еже по Бозе жити научисте, и пети Ему: Аллилуиа.

Икос 6
Возсия всей стране нашей слава в подвизех многовидных, еще же и в чудесех дивных, имиже обитель Печерская оглашена всюду бысть. Сего ради людие страннолюбия трудом прилежаще, oт конец дальных пешешествовати во град Киев тщахуся, еже бы полезная душам своим прияти, научения спасительная услышати, паче же oт святыни и благодати, яже Лавра содержит, духовне освятитися, и oт недуг целение прияти. Сия вся, яко вашего ради саятаго жития, отцы наши, бывшая ведуще, благодарне поем вам:
Радуйся, архимандрите Поликарпе, предания Симонова верный хранителю и учениче усердный, oт него талант приятый многоплодно умноживый, и онаго и твоими сказаньми в Богоугодницех Печерских вся ны обогативый.
Радуйся, Игнатие, во архимандритех Печерских пламенною благодатию священнодействия славимый и проскомисания твоего анафорою исцеления в недузех мнозех явивый.
Радуйся, Иоанне, с Пименом единоумная во игуменех Печерских постников твердая двоице, воздержания ревнителем в подвизе крепкое поможение.
Радуйся, Аврамие, по игуменстве многолетнем в затвора теснаго безмолвие oтшедый: oт попечений внешних избравый молитвы уединение.
Радуйся, Дамиане, пресвитере и целителю, апостольски елеопомазанием недужныя воздвизавый: и сам на одре болезни смертне, o ангела приимый обещание, еже с Феодосием, отцем ти возлюбленным, общаго во Царствии покоища.
Радуйся, Агапите, врачу безмездный и скорый, со Ипатием целебником, в дарех Духа ти подобным, буди всем страждущым в немощех со онем помоще.
Радуйся, Прохоре, чудотворче нищелюбивый, истаявающыя во гладе люди многия хлебами oт зелия проста, и пепелом, в соль добрую претворенным, щедро препитавый: князя же корысть лукавую на покаяние oт лихоимания преложивый.
Радуйся, Николо, княже и храмоздателю, нищету иноческую избравый и в службу меньшей братии себе предавый: прочее же при вратех обители яко страж на сметищи приседяй, мира славу во уметы вменивый.
Радуйся, Дионисие, дивный во иеромонасех, чудесе ради, тебе явленнаго, егда в День Велик Пасхи Господни, на словеса твоя в Воскресении Христове глас почиющих отцев: Воистину воскресе!- яко гром услышал еси.
Радуйся, яко oтвещаниемъ сим вельми ужасен, сам в чаянии воскресения будущаго, яки во гробе, в затворе себе жив заключив, нам сказание чудесе сего оставил еси.
Радуйся, Лаврентие, безмолволюбный oтшельниче и в затворении жительства неуклонный рачителю: на бесы же дерзновением крепким одаренный, понудивый лживыя истину вещати: елицы oт отцев силою нань облечени свыше.
Радуйся, Несторе, летописателю многополезный бытия земли нашея и в народех ея: паче же в начатии монастыря Печерскаго, како ста и процвете, и в иноцех его первых и якови житием быша.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 7
Хотящым души своея спасения в безмолвии и подвизех молитвенных, бе обитель Печерская место свято и град прибежища, и пристань благоотишна oт мира сего сует: темже вси, богозванию свышнему внемшии, тщанием притекаху во обитель сию, и благодать в подвизех стяжаваху дерзновения молитвеннаго, еже сердцем очищенным, в веры правыя дусе, тепле звати Господеви: Аллилуиа.

Икос 7
Новый воистину Иерусалим на земли нашей Киев град, яко место свято, Богозданныя ради Лавры Печерския, наречеся, и во странах всюду прославися: зане, яко град верху горы стояй, яко светильник горяй непокровен, чудесы многими и подвиги святых своих oт мрака пещерна возсияв, ниже в затворех возможе утаитися. Тем убо мы, яко под кровом обители сиея, паче же Владычицы нашея Богородицы, и при гробех молитвенник наших обитати удостоени, любовию честне зовем им:
Радуйся, Марко, в тяготе ископания гробов неустанней быв, воздержанием же зельным и воде в трудех меру крестом положив: успшими повелевати дар чуден приял еси.
Радуйся, Афанасие, безсмертия тезоименитый, яко успнув, паки возстал еси, и прочее в непрестанне плачи пожив, братии в послушании смиреннем спасатися завещал еси.
Радуйся, Спиридоне, купно с Никодимом страхом Божиим в делании хлебов Литургисания и целодневном псалмопении усердная единонравно.
Радуйся, огнь с водою покорити власть вземый, и образ всем десницею показуя персты в молитве слагати православно.
Радуйся, Илие, доблий Муромский воине, во обители Печерской братству ангелообразну смиренномудренно ввоинивыйся во спасение.
Радуйся, шуйцу во бранех имый прободенну, десницы же перстосложением молитвы во исходе твоем являя знамение.
Радуйся, Пимене, во многолетней болезни долготерпеливый, и oт ангел вожделенное во образ ангельский пострижение получивый: еще же научив вся, яко терпеливно боляй и добре служай мзду едину приимут.
Радуйся, Макарие, приемый блаженства обетований Христовых, яже нищии духво, и сердцем чистии и кротцыи, яко мзду на небесех радуяся имут.
Радуйся, Онуфрие, со Феодором молчания обетом равная хранение устом положившая, в нас же, уповаем, в молитвах неумолчная.
Радуйся, Аврамие трудолюбче, со люботрудным Арсением тщанием единоравная, послушаний тяготу подвига легце претекшая, и покой спасения достигшая.
Радуйся, Феофане, в посте неослабен, купно с Пименом, иже час убиения Кукши провиде, и со Зиноном трие постницы славимии.
Радуйся, Иеремие, старче прозорливе, Руси крещения самовидче и причастниче: Духа дар приимый сокровенная помыслы обличати и путем покаяния творити спасаемыя.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 8
Странницы и пришельцы быти в мимотекущем мира сего житии помышляюще себе, преподобнии, потщастася мира онаго и яже в нем избегнути, и во обители святей Печерстей вселитися: паче же и в затворех потаенных уединитися, в молитве умней и во утеснении телесе, и поста подвизе пребывати: яко да в пространстве отечества небеснаго, oт жития сего oтшедше, радостию нескончаемою тамо возвеселитися и лицезрения Божия сподобитися, в пении непрестающем: Аллилуиа.

Икос 8
Весь ум ваш и сердце коегождо o вас, святии, горе имуще, аще и на земли, и под землею телесы пребывающе, подвиги пачеестественныя и земным человеком непосильни показасте, и мнози дарования oт Духа Божия приясте: во Царствии на небесех с лики ангельскими веселитеся, телесы же на земли в нетлении почиваете, во уверение воскресения будущаго в жизнь нетленную нам оставльше сия: вся убо та во уме храняще, oт сердца любовию движими, похваляем вас выну:
Радуйся, Онисифоре, исповедниче чадолюбивый, душам согрешающых прощения и разрешения совершеннаго, по словеси обещания Антониева, дерзостный и неoтриновенный ходатаю.
Радуйся, Луко, во преподобии и правде о потребах дому Богородицы внешних верный попечителю и усердный делателю.
Радуйся, Алексие, помощи молитвенныя просящым источниче, и Елладие, чудотворный постниче, вемы яко благодать молитвы ваю не возможе преградити o нас затвора утверждение.
Радуйся, Онисиме, со Феофилом и Сисоем, темжде проницанием духа, емуже несть заграждения дверна, ни во стенах, ниже в затворе крепце, oт негоже приемлем ваше услышание.
Радуйся, Алипие, богонаученный иконописче, ангела Господня споспешника свыше приемый, и шар живописных помазанием целителю дивный.
Радуйся, Григорие, благоискусный Алипию сподвижниче, и со онем чудес, во украшении Церкве Печерския бывшых, сосвидетелю неложный.
Радуйся, Матфее, вся козни бесовския, oт человек незримая яве провидяй, и обличением тех многия, еже спасти, упредивый.
Радуйся, Анатолие Богоугодниче, Востоку востоком Христу Спасу нашему угодивый и рая сладость вечную востока невечерняго наследивый.
Радуйся, Евфимие постниче, во схимонасех иерею дерзновенный чудесы, зане и аналав твой, якоже главотяжи Павловы возлагаем, дает немощным исцеление.
Радуйся, Вениамине, яко бо купец блгоразумен, по Христову словеси куплю добру дея, вся своя раздав и бисер безценен стяжал еси, Того Царствие.
Радуйся, Нектарие, вкупе с Павлом и Сергием послушливости добрии образи: всемъ нам волю свою oтсецати, по обетованию нашему, молитвами вашыми пособствуйте.
Радуйся, Исаие чудотворче и Савво дарованием единославный, молитвами и чудес силою, со всеми отцы вкупе, в нас предстательствуйте.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 9
Всяк вид и род жития постническаго проидосте, святии, и образ нам спасения явисте, и в безмолвии совершеннем паче проповедания вся ны научаете и не точию подвигов ведением поучаемся, но и искушений вражиих, елико их претерпесте и поведисте, в писаниих Несторовых чтомых, и Симоном святителем Пиликарпу поведанных в назидание родовом иноческим хотящым быти. O тех, убо, труды и брани ваша ведуще, сокрушени в немощех своих, Богови же благодарни яко имамы праотцев сицевых, поем Ему: Аллилуиа.

Икос 9
Витийству риторов многогласному безмолвие подземных затворов противоста, и превозможе: чрез лета многа во словесех малых подвигов ваших слава в мире всем oт затворения пещернаго вельми вопиет, и на поклонение мощем вашим и к молитве умиленней на месте святе oтвсюду верныя и до днесь призывает, вся блгочестно живущыя, с ними же и мы едиными усты, oт общия любве рцем сия:
Радуйся, Иларионе, яко митрополию оставль, и во обитель свою пещерную возвращся, паки со преподобным Феодосием и Никоном в делании книжнем еще трудился еси.
Радуйся, яко по житии постничестем, зде и преставился еси, и яко схимонах прост реком, со отцы святыми равно чтим еси.
Радуйся, Феодоре, во иноцех благоверный княже, Церкве Правослвныя защитниче крепкий oт латиномудренных насильства быв, таже чин ангельский восприяв, во отцев Печерских лице зришися.
Радуйся, Ефреме иерею, благодатный Таин Божиих строителю, престолу Господню пристрашный на земли предстоятелю: и ныне молитвенник о нас на небеси веришися.
Радуйся, священноиноче Пагкратие, яко в житии твоем Церкви Печерския служитель быти сподобивыйся, таже на подвиг вящшый в пещере соединился еси затворившымся.
Радуйся, Анатолие затворниче, вкупе со чредою при тебе отцев третицы затвореннв почивающых Мартирия, Пиора же, и Руфа: имже еже радоватися с тобою приносим, яко в безмолвии о нас молящымся.
Радуйся, благоговейная трисоставная сонмице, вас блаженных иеродиаконов Печерских: Ахило постниче, Макарие богообетный и Мартирие чудотворче: молитву в нас горе едину возглашающая.
Радуйся, Иерониме затворниче, и единодушно извольно понесшыя затвора утеснение, в молитвах бдение, пощение и нищету, отцы святии, Данииле, Евлогие со Исидором купно: убо не забудите о нас радование вам сие приносящыя.
Радуйся, Григорие, подвижниче неустанный и во бдении молитвенне неусыпаем быв, дар o сих приял еси чудотворно зелием целити.
Радуйся, Сисое, купно и со Силуаном, схимонахов сопруг, целителя в посте чудес дар, чистотою жития стяжавшая: дадита нам oт елеа молитв вашею, еже душ наших леностию нам не погубити.
Радуйся, Захарие, яко наследие отчее лукаво утаенное, заступлением Богородицы восприял еси, и ценою того Предтечи придел в Церкви Печерстей устроил еси.
Радуйся, яко по сем и себе самаго Богу и Богородице вдал еси, во обители сей подвиг иночества восприявый, постник и целитель явился еси.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 10
Стенами не яко Иерусалим от камения бездушна, от мятежа и брани, и от соблазнов мира сего Лавра Святая ограждена быста, но благодатию Божиею и Владычицы Богородицы покровом, и предстательством отцев наших пещерных Антония и Феодосия и всех преподобных же ея выну день и ночь отверзеш уста наши отвсюду приходящыма на поклонение святынь и молитвы ко Господу Иисусу Христу и Пресвятой Богородице и обители Печерския благолепие, обрадовани видения тоя бывше, на пути пояху умиленно: Аллилуиа.

Икос 10
Спасти души своя восхотев и живот вечный наследовати, многотрудное и прискорбное жительство избрасте, и неуклонно в подвизех пребысте: себе же спасающе, ины многия спасосте: ово же образом спасительным жития вашего. Емуже подражати помозите нам, леностию отягчаемым, обаче всяко спастися произволение имущым, молитвами вашими, отцы преподобнии, да подвигнемся спасающеся, и на вящшая в добродетельне жительстве потецем, в вашем предстательстве благодарне зовуще вам:
Радуйся, Иосифе болезненный, в немощи своей исцеляся, болящым обители служитель был еси, таже и сам, яко чудодействен целебник явленный.
Радуйся, Несторе, в молчании бденно поживый, рыбарей Галилейских мудростию некнижною духовно просвещен и яко тии Христа узрети при кончине сподобленный.
Радуйся, Евстафие, златоделания искусству добре навык, яко иногда Веселиил скинии ветхия устроению послужи, тако ты скинию новую Печерскую благолепно украсити труждался еси.
Радуйся, Тите, воине Христолюбивый, на брани раною смертною во главу уязвленный, и сию послежде под иго благое, по обету, во иночестве преклонил еси.
Радуйся, Логгине, вратарю обители Печерския, блюдый входы ея бодренно, помыслы же человеков сокровенная прозря, обличением приводил еси к покаянию.
Радуйся, Аммоне, иже поклонник Иерусалима и Афона усердием быв, паки во обитель свою Печерскую пришед, в затвор вселился еси, умныя молитвы прилежа деланию.
Радуйся, Агафоне постниче, провидче и врачевателю духовный требующым, чудотворения дар имый, предстатель скоропомощный буди нам.
Радуйся, Матфее, первому соименитый ин, провидче хотящых быти, по дарованию Духа пророчествуя грядущая, яко сущая, яже на пользу душам.
Радуйся, Пергие, благословенный старче, и подвижниче крепкий, и прочим отцем пещерным в житии святе единонравный, аще и гроба местом безвестный.
Радуйся, Меладие, забвением временне в пещере Антониеве ныне сокровенный, преподобием и блгодатию o писмене ведущих явленный.
Радуйся, Меркурие вкупе с Паисием, друзи в Господе во единодушии подвига поживша, и ныне во едонопроходне пещеры месте близостно почивающа.
Радуйся, Леонтие, равно же Геронтие, двоице Церкве Печерския, в канонарсех благогласная: монаси отроци, старец подвигом Боголюбне ревнствующа.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 11
Пению, убо, нашему, отцы пречестнии, внемлющии, испросите нам oт Господа всемощнве поспешение, да не языком и усты точию похвальная вам глаголати, но паче вещию в делех жития сего подвигом вашим поне вмале подобитися, и усердно с мира сего соблазны, обышедшыя ны, брань неусыпну крепко провождати, и в немощи не унывая, ниже разслабевая, тяготу лености oтринув, бодренно пети: Аллилуиа.

Икос 11
Светозарнии, oт Света Первовечнаго возжженнии светильницы, отцы наши, просиясте: в житии земнем молитв теплотою и усердия в подвизе разгорением, по преставлении же славою чудес многих на земли. Паче же сияния ваша на небеси суть: рече бо Подвигоположник Спас наш, яко просияют праведницы, яко солнце во Царствии Отца их. Блажени, убо, есмы чадовом онех нарицатися, аще достойно званию жити потщимся, и паки радоватися подобает нам, иже на земли их зде святей обитати сподобихомся. Ведуще сия вся, и зряще, и в концех слышимая, поем им сице:
Радуйся, Моисее, подвижниче и молебниче неутомимый, плоть смиряя жестоко, крестом и поясом железным самооковался еси, oтсюду и дар чудотворения сподобился еси прияти честно.
Радуйся, Кассиане, уединения молитвеннаго ревнителю и тихость затворения пещернаго возлюбив, и o всех скрывся, всеми ныне почитаешися явленно.
Радуйся, Афанасие, безсмертия воистину тезоименит, в темне затворении светлости свещи не восхотел еси вещественныя, яко Моисей во мраце Богу общаяся.
Радуйся, яко ныне солнцеобразно во Царствии Отца Небеснаго просветився, во свете невечернем вечно радуешися.
Радуйся, Пафнутие, самоизвольный узниче, нищетою нестяжания обета исполнителю, и постник многовоздержный, преподобне.
Радуйся, слезами сокрушения молитвеннаго, дарование слез утешительных стяжав и душу зримо руками ангелов Господеви предал еси, блженне.
Радуйся, Софроние, безмолвный oтшельниче, псалмопения вседневнаго исполнителю, во бдении молитвенне, и прилежа рукоделию.
Радуйся, яко ничимже, кроме власяницы богат, ниже украшен, разве опоясания железна, в нищете Христове духовное имел еси веселие.
Радуйся, Мардарие, безкелейный нестяжателю, постниче и в послушаниих добрый делателю, в затворе твоем по кончине келлию обретый и на небесех жительство вечное.
Радуйся, Никито затворниче, яко в пещере безвестно почиеши, аще и прельщенному равноименит, обаче ин oт отцевъ Печерских еси ты, тем убо, приими со всеми словесе молебнаго радование.
Радуйся, Владимире княже, праотче веры нашея, яко тебе ради Имя Христово на нас нарицается, еще же яко и глава твоя святая в Церкви Велицей имяше гроб священный.
Радуйся, и всех отцев наших Соборе Богоугодный oт иже безвестно и безъимянно в пещерах почиющых сокровенно, но их же имена написана суть на небесех, идеже и прияша на веки живот блаженный.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 12
Блгодати Божия общницы достойни бывше и на месте благодатне, Богородицею избраннем и освященнем, многоподвижно поживше, дерзновение зельное в молитвах, отцы наши, стяжасте: молите, убо, и нам, чадом вашим, аще и яве, недостойным, благодать Бога нашего и милость на судищи последнем Его улучити, еже не oтриновенным ошуюю быти, но в десных приятым воспевати Ему: Аллилуиа.

Икос 12
Поющым ныне во благодарении умиленнем Госпожу и Владычицу нашу Приснодву Богородицу о всех чудесех Ея, в нихже Матерним благоволением обитель Свою прослави и избранну показа, и множество угодник Сына Своег, предивных житием и дарованьми Духа Святаго яви: достоит, убо, нам подобную всем сим хвалу радования воздати конечне и последним таяжде песненно изглаголати:
Радуйся, Клименте священномучниче, яко глава твоя со инеми мироточцы пещерными, верным не престает цельбы предивно точити.
Радуйся, Феофиле, Новаграда святителю, изгнанный неправедно, зде же водами во гробнице принесен, с праведными в пещере почити.
Радуйся, первомучениче архидиаконе Стефане, перстом Христа, одесную Отца стояща, фарисеом лютым показавый.
Радуйся, яко словесы предсмертными твоими, еже о вразех незлобием молитися вся ны научивый.
Радуйся, рождение Вифлеемле, младенче непорочный, жертва крове о Христе, oт Ирода безвинно убиенный.
Радуйся, Иоанне отроче, oт варяг Российский первомучениче, иже со отцем за веры исповедание безбожными яро умерщвленный.
Радуйся, Евфросиние преподобная, Гроба Господня во граде Сионстем поклоннице страннолюбно благоговейная.
Радуйся, во Иерусалиме земли Русския, граде Киеве, покоище себе при гробех святых обретшая.
Радуйся, Иулиание дево, во удолии земне процветый благовонный чистоты красен крине.
Радуйся, в горняя изпресажденный ликовати вечно в девственных пресветлом чине.
Радуйся, Собрание Столепное отцев наших, яко любовию привлекоми красоты ради небесныя ангелоподобнаго жительства вашего, приидохом на место святое сие, спастися чающе.
Радуйся, ополчение равноангельное в заступление нам данное, еже достойно званию пожити, на неложная обетования отцев Антония и Феодосия верно уповающе.
Радуйтеся, вси преподобнии отцы наши Печерскии, миру всему светильницы, в чудесех велиих препрославленнии.

Кондак 13
О, Всеблаженнии и Преподобнии Отцы наши, теплейшии о нас пред Богом предстателие, дерзновение велие к Нему стяжавшии, яко избранницы многолюбезнии Владычицы нашея, Госпожи Девы Богородицы: гору Печерскую во иконе предивней пришествием Своим освятившей и присно яко весь вторую Гефсиманийскую oт всех чтимую: услышите ны, Собор ваш чудоточный, по именом молебно днесь призывающых, и умолите Господа во обители вашей в житии грядущем нам, яко чадом со отцы своими водворитися, еже пети купно веселия вечнаго песнь: Аллилуиа.
Трижды, затем икос 1 и кондак 1.

Молитва к преподобным отцем печерским
Преблженнии, приснославнии, преподобнии отцы, святии первоначальницы Печерскии, Антоние и Феодосие, свыше Богом дарованнии, двоице благодатная, союзом совершенства, любовию к Богу и ближнему соединенная, не точию в жизни сей временной друголюбне трудившиися в пользе душевней иночествующих и в мире благочестно живущих, но и по oшествии своем в жизнь вечную обещавшиися пособствовати всем, и молитися ко Господу Богу и Пресвятей Богородице в спасении всех, наипаче грешников, o нихже первый есмь аз: к вам угодником Божиим и Пресвятыя Богородицы, яко истинным ходатаем спасения притекая, смиренно молюся: предстаните мне в помощь, узами грехов связанному, и помолитися в мне, купно же и всех наследников Богоугоднаго вашего жития, и снаследников Царствия Небеснаго подвигните на многомогущыя молитвы: всех бо вас недостойный призывати на заступление дерзаю, желая o всех грехов моих вами свобождение получити. Вси преподобнии отцы Печерскии, Богоугодно трудившиися и нетленно в пещерах почивающии, святии иерарси, священноначальницы, священноиноцы, постницы, мученицы, девственницы, чудотворцы, вы есте род избран, царское священие, языкъ свят, люди обновления, известителие добродетелей из тмы тленныя сея жизни призвавшаго вас в чудный свет: вас бо ни земля потаила есть, аще же киих и потаила под спудом почивающих, но верою, яко всех небо прияло есть, и яко славы вашея исповести, тако и имен ваших исчести ми не возможно, множеству бо звездному уподобистеся, разве Сам исчитай множество звезд, и всем им имена нарицаяй, исповеданный o вас на земли Царь славы Христос, всех вас преподобных своих по имени написанных на небсех, исчитает, и совершенно исповедует пред Отцем Своимъ небесным: помозите мне грешному, в сокрушении и смирении сердца моего припадая, молюся вам: свет суще миру и светильницы из под спуда пещернаго поставлени душам на свещнице небесном, осиявайте мя, омраченнаго наветы вражиими, светом блгодати свыше, да в нем ходящ, не преткну в камень ноги моея. Вы есте сосуди в честь избраннии, исполненнии благодати Божия обильно, молю: сподобисте мя грешнагв oт исполнения вашего прияти. Вы есте соль земли, аз же есмь земля, будите мне солию, соблюдающе всецело душу и тело мое, oт согнития греховнаго. Вси вы, преподобнии Печерскии врачеве благодатнии, исцеляющии всяк недуг и всяку язю в людех, молюся вам, святии: исцелите и моя душевныя и телесныя язвы, да достойно прославлю Бога в души и телеси моем, всех вас во всем благодаря. Вы бысте алчущии и жаждущии правды, ныне же блаженнаго обеда в царствии Божии достойно насыщаетеся, смиренно колена сердца моего преклоняя, молю вас: подадите и мне, алчущему и жаждущему тояжде благодати, поне oт крупиц падающих oт трапезы вашея, и насытите душу мою тщу и душу алчущу исполните благ. О всещедрии господие, всех вас добрый Пастырь пасет, и ничтоже вас уже лишит: вашими благоприятными молитвами соделайте, да и мене аще и недостойнаго, ничтоже лишит благо: можете бо преподобнии вси всем вся, в укрепляющем всех вас Иисусе Христе. Будите, угодницы Божии, и мне окаянному вси вся, да с прочими всеми и мене, к вам всеусердно притекающаго, приобрящете. Аще бо много может молитва единого поспешествуемая во благое, кольми паче вас праведных и преподобных многих, могут молитвы вся у всемилостиваго Бога. Не два или трие во имя Христово собрани есте, и не два совещастеся на земли просити во имя Христово, Отца небеснаго, но велии множество вас, о преподобнии: помолитеся о мне единому oт грешных: аз же верую, яко Бог, прославляемый в совете всех вас преподобных своих, услышит прошение, собранных и совещанных во имя Его. Изгубих окаянный грехопаденьми моими благодать Божию: вы, святии Печерскии, множеством своим поищите, молю, воистину обрящете. Увы мне! затворены предо мною недостойным двери милосердия: вы, преподобнии угодницы Божии, вси потолцыте, и oтверзутся ради вас мне грешному, яко да и аз к вашему множественному числу с большей вашею славою, вашими святыми молитвами причтен быти сподоблюся.
О достохвальнии, преподобнии отцы Печерскии! Вы есте радование Царя Небеснаго, вы благоприятная жертва Вышняго, вы граждане новаго Иерусалима, вы наследницы Царствия Божия: тако бо вси текосте, яко и желаемое постигнусте. Молю, и моим ногам благое течение в пути заповедей Господних соделайте, и желаемое постигнути грешнаго мене сподобите вашими многомощными ходатайствы: да вшед в дом Царствия вечнаго, возрадуюся и возвеселюся, благодаря всех вас преподобных в таковой любви вашей ко ближнему, и купно с вами возхвалю и возвеличу во хвалении единаго в Троице Пресвятей, oт всея твари на небеси и на земли хвалимаго, благословимаго и покланяемаго всемилостиваго Бога, Отца, и Сына, Святаго Духа, с Пречистою и Присноблаженною Девою Богородицею, ныне и присно, и во веки веков, Аминь!