Кондак 1
Избранный от чреды владетелей земных, верою, любовию к ближним, попечением и благоукрашением Церкви Православныя и иныма труды добродельми твоима Владыце Небесному угодивый и в лице князей благоверных и монархов праведных Им вчиненный, святый заступниче наш и покровителю многомилостивый, не забуди убо и нас, да пробавит Всеблагий Господь долготерпение свое Отечеству нашему и ниспошлет нам разум и благочестие воспети деяния славного жития твоего, да зовем ти:
Радуйся, святый благоверный княже Константине, ревностию благою на пути спасения нас преславно обогащающий!

Икос 1
Ангелов собеседниче и человеков наставниче воистину явился еси, святый и богомудрый княже Константине, благоволением всех Творца Христа Бога нашего, подвигом добрым подвизавшеся, веру бодре соблюдше и течение свое добре скончавше, приял еси от Подвигоположника Нашего - Господа Иисуса Христа - венец правды. Темже усердно поучающеся в твоих деяниех, с любовию поминаем тя - заступника и покровителя нашего, и тщащеся подражати вере твоей, с надеждою и отрадою взываем ти сице:
Радуйся, во благоухании святыни присно почивающий;
Радуйся, в неизреченной славе Творца мира созерцающий;
Радуйся, всех приходящих к тебе благодатию озаряющий;
Радуйся, от заблуждений духовных нас исцеляющий;
Радуйся, любити Бога и волю Его творити нас научающий;
Радуйся, в добродетели терпения нас утверждающий;
Радуйся, огнем молитвы твоея стрелы вражия попаляющий;
Радуйся, беды и печали от чтущих тя отгоняющий;
Радуйся, святый благоверный княже Константине, ревностию благою на пути спасения нас преславно обогащающий!

Кондак 2
Видевши христолюбивые князь Константин и княгиня Александра Слуцкая оскудение веры и благочестия, запущение градов и весей Малорусских, во славу Бога Всевышнего и на благо народа сего поработаша зело и тебя, святый княже, сподвигоша быти наследником не токмо земных богатств магнатов Острожских и Слуцких, обаче же духовнаго нетленнаго наследия, иже труды и молитвы многима стяжаша прародители твоя, на вся дела благая, укреплявшему я Господу воспевая: Аллилуйа!

Икос 2
Разум свой учением спасительным Церкви Православныя озарил еси, благоверне княже Константине, яко советом наставник твоих богомудрых от дней юности следуя, благоговейно внимал еси тех глаголам и самим житием твоим исполнял еси тех словеса, возрастая в трезвлении, молитве, богомыслии и иных добродетелех богоугодных ; сему же деланию благому и нас, оскудеваюших порою во благочестии настави, да зовем ти сице:
Радуйся, паче достояния земнаго Христа любити наставляющий;
Радуйся, в Нем токмо истинную отраду обретати помогающий;
Радуйся, жажду святой Евхаристии в нас возбуждающий;
Радуйся, таинствами Церкви укреплятися выну сподвигающий;
Радуйся, от колебаний и сомнений нас преславно удаляющий;
Радуйся, угасающую веру и ослабевающую волю благодатно укрепляющий;
Радуйся, надежду нашу непоколебимою быти сотворяющий;
Радуйся, горением любви души теплохладныя пречудно преображающий;
Радуйся, святый благоверный княже Константине, ревностию благою на пути спасения нас преславно обогощающий!

Кондак 3
Силою и благодатию Всесвятаго Духа Утешителя хранимый и озаремый, прехвальне княже Константине, возрастал еси в премудрости, благочестии и уповании на Христа-Вседержителя, венчающего честию и славою верных Своих на земли, яко суету мирскую отринув, о блазе народа и укреплении веры людей твоих усердно поревновал еси, богомудре, неустанно воспевая Господу, просветившему и умудрившему тя: Аллилуйа!

Икос 3
Имуще Господь велие промышление и попечение о тебе, святый княже, сохрани тя от стрел вражиих и копий неприятельских в битвах и сражениех, ибо призва тя Вседержитель на дела великия и славныя призывая, да прославиши ими имя Христово, славимое народом украинским. Мы же, ныне дивныя благодеяния твоя воспоминающее, смиренно молим тя: не остави нас милостью твоей, испроси нам у Милосерднаго Спасителя нашего вся животу временному и вечному полезная и потребная и приими величания сия:
Радуйся, веру твою делами любви утвердивый;
Радуйся, образ и подобие Божие в ближнем возлюбивый;
Радуйся, яко Самому Христу всякому человеку послуживый;
Радуйся, богатство тленное во славу Божию употребивый;
Радуйся, милосердие в сердцах наших пробуждающий;
Радуйся, сострадати страждущим нас научающий;
Радуйся, нас в добродетельнем и христоугоднем житии укрепляющий;
Радуйся, на путь правый всех нас наставляющий;
Радуйся, к любви горней души наша уязвляющий;
Радуйся, святый благоверный княже Константине, ревностию благою на пути спасения нас преславно обогощающий!

Кондак 4
Бурю искушений добродетельми твоими, преславный княже, рассеял еси, тем же подвигом добрым подвизавшеся, течение скончал еси, веру в святости и чистоте спасительной соблюдше, и венец нетленный от Царя царствующих достойно восприял еси. Тем же и нас, взирающих на праведное житие твое, любви ко Христу и ближним преисполненное, подвизаеши твоими молитвы и ходатайствы нас милующему и спасающему Господу воспевати: Аллилуйа!

Икос 4
Слышавше людие Малорусские о великих добродетелех твоих, благоверный княже Константине, зело почитаху тя, яко избранника Божиего, одареннаго Им за благоговение многими добродетелями и мудростию монаршую, яко да возможеши право правити народом своим и люди приводити ко спасению. Ты же, блажене, милостивно над людьми твоима княживше, отцем има по Бозе был еси, учителем благочестия и наставником во всех добрых делех. Мы же сия ныне поминающе, таковые похвалы с любовию приносим ти:
Радуйся, ниву сердца твоего добрым семенем засеевый;
Радуйся, слезами умиления ю оросивый;
Радуйся, яко семя Слова Божия в сердце твоем, яко на земле добрей, укоренися;
Радуйся, мир Христов наитием Духа Святого получивый;
Радуйся, словом мудрым всех приходивших к тебе питавый;
Радуйся, ум и сердце к горнему возводящий;
Радуйся, зрети Бога Вышняго нас просвещающий;
Радуйся, святый благоверный княже Константине, ревностию благою на пути спасения нас преславно обогощающий!

Кондак 5
Богоявленной звезде воистину подобно бе святое житие твое, многомилостивый Константине, яко ты труды многия положил еси, да восторжествует истина Христова в державе твоей, яко книг душеполезных тиснением, училищ духоносных основанием, попечением о храмех, обителех иноческих и покровительством братств благочестивых неленностно работал еси Господеви, воспевая Ему: Аллилуйа!

Икос 5
Видевше ближния и дальния, яко ты, прехвальный Константине, во граде твоем вотчинном Острозе, на высоте стола княжеского возблистал еси, под сень крыл твоих стекахуся; ты бо твоих премудре управлял еси обширныма владениями твоима и благотворил усердно всем людем тебе подвластным; ныне же во славе небесней пребываеши, яко стяжавый блаженство милостивых. Сице просим тя: не остави и нас на предстательство твое упование возлагающих и воспевающих ти сице:
Радуйся, власти предержащия к служению народу Малорусскому воздвизающий;
Радуйся, ревновати об истиннем блазе отчизны их научающий;
Радуйся, бедным и обездоленным достославно покровительствуяй;
Радуйся, богатых и обезпеченных к милосердию и благотворению понуждаяй;
Радуйся, храмоздателем и жертвователем церковным покровительвуяй;
Радуйся, распри и ссоры меж христианами угасающий;
Радуйся, выну в мире и радости жительствовати всех нас научающий;
Радуйся, милосердие Божие ко всем чтущим тя пречудно приклоняющий;
Радуйся, святый благоверный княже Константине, ревностию благою на пути спасения нас преславно обогощающий!

Кондак 6
Проповедник Царствия Божия воистину явился еси, святый княже Константине, яко прежде всего искал еси правды Христовой, а не благ земных и преходящих, богомудре; памятующе слова Писания, яко неудобь имущим богатство во Царствие Божие внити, потщался еси милостыню нищим и убогим раздавати, милосердием своим умилостивляя Всемилостиваго Бога, Иже преумножаше ти милости Своея Небесныя, помощь свыше Божественную посылая, ибо над людьми бо твоима царствуя, слезу всяку от лица страждущих отирал еси, многим бо усердно и сокровенно благотворил еси, водвизая вся подвластныя тебе люди с благодарностию воспевати Господеви: Аллилуйя!

Икос 6
Возсиял еси, святый богомудрый княже Константине, славою твоею на земли, яко правду Христову дерзновенно утвердил еси пред Царем московским и королями Речи Посполитей, яко людие, ти подвластныя управлял еси кротко и милостиво, храмы благолепныя во славу Отца Небеснаго созидая, яко княжество твое от недруг лютых оборонил еси; и сего ради некорованным монархом Малоруссии от благодарных потомков наименован бяше. Сице мы во славу тебе вопием:
Радуйся, аки Ольга равноапостольная державою твоею преславно управлявый;
Радуйся, святому Владимиру – Крестителю Руси подобно народ твой во истине Христовей утвердивый;
Радуйся, Ярославу Мудрому в насаждении просвещения духовнаго поревновавый;
Радуйся, славу Владимира Мономаха и ревность его о блазе людей твоих унаследовавый;
Радуйся, мудрости государственней короля Даниила Галицкого последовавый;
Радуйся, горячей вере и пламенней молитве преподобнаго князя Федора подражавый;
Радуйся, попечению о ближних благоверной княгине Анастасии Слуцкой подражавый;
Радуйся, яко со всеми святыма князие Царя царей о спасении нашем умоляеши;
Радуйся, святый благоверный княже Константине, ревностию благою на пути спасения нас преславно обогощающий!

Кондак 7
Хотяй Всевидец Господь прославити тя,праведный и богомудрый княже, постави тя владыку преславна во смирении людем своим, иже взирающе на тя и добродетелей твоих богатству чудящеся, примеру твоему воследоваша и утвердишася в вере спасительной и житии богоугоднем; сему же и ны настави, святый Константине, да возможем с тобою и святыма сродники твоима во веки воспевати Господеви: Аллилуйя!

Икос 7
Новое и досточудное дело подьял еси, богомудрый княже, спасительныя Священныя Писания Ветхаго и Новаго Заветов на языке словенстем благоволил еси издати в пользу и научение всем людем боголюбивым, яко переводчиков премудрых и просвещенных и преискуснаго Иоанна первопечатника, из Московии высланнаго, призвал еси к сему. Мы же ныне просим тя: настваи и нас житие выну со словом Божиим сопрягати и прими величания:
Радуйся, к регулярному чтению Библии нас призывающий;
Радуйся, светом Слова Божия разум наш просвещающий;
Радуйся, глаголы святыя в сердце хранити научающий;
Радуйся, заповеди Спасовы в житии воплощати ны сподвигающий;
Радуйся, заботитися о духовнем блазе ближних призывающий;
Радуйся, богомыслием и трезвлением благим нас обогащающий;
Радуйся, от преткновений и соблазнов удаляющий;
Радуйся, от прельщений богомерзких исцеляющий;
Радуйся, святый благоверный княже Константине, ревностию благою на пути спасения нас преславно обогощающий!

Кондак 8
Странника и пришельца в мире сем помышляя себе быти, благоверный княже Константине, от юности твоея в молитвах пребывая, и благоугождая Богу благоугождением всяческим, во еже быти тебе освященному сосуду Духа Святаго, всельшагося в непорочное сердце твое, и воздыхании неизглаголанными научившаго тя благоприятно пети Пресвятей Троице: Аллилуйя!

Икос 8
Весь отдал еси ся на служение народу, ти от Бога врученному, вся дни живота твоего, Тому усердно работал еси, богомудре княже; словеса бо твоя беша, яко молния, ереси попаляющая, души верных пламенем веры и любве просвещающая; сие убо ныне поминающе, просим тя: даждь убо и нам, святый Константине, молитвами твоима, искру хотя малую твоей любве и мудрости имети, и приведи молитвами твоими и всесильным ходатайством ко Престолу Отца Небеснаго, немощных чад своих, и соделай гражданами Горняго Иерусалима всех, вопиющих ти сице:
Радуйся, сосуде, Святаго Духа исполненный.
Радуйся, дарами Того укращенный:
Радуйся, сими дарами и молящихся тебе обогащаяй.
Радуйся, из пучин отчаяния нас извлекающий;
Радуйся, светом надежды нас озаряющий;
Радуйся, от плевел ненависти души наша очищающий;
Радуйся, сердец смятенных и отягощенных благодатный умирителю;
Радуйся, от озлобления на нас враждующих хранителю;
Радуйся, святый благоверный княже Константине, ревностию благою на пути спасения нас преславно обогощающий!

Кондак 9
Всякия беды, скорби и напасти избавляеши нас, пречудный Константине, твоими теплыми к Богу молитвами; сего же ради, мы грешныя, к представительству твоему прибегая, молим тя, княже святый, испроси нам вся ко временной и вечной жизни полезная и потребная, да сподобимся Горнего Иерусалима достигнути и купно с тобою Господеви воспевати: Аллилуйя!

Икос 9
Витийствующий язык оскудевает пред множеством дарований, от Бога ти данных, досточудне княже Константине, яже мудре их употребив, многоплодней маслине воистину подобен явился еси. Сего ради, прибегая к предстательству твоему просим тя, богоносный княже: подаждь нам от елея милосердия и сострадания твоего, да научимся тяготы друг друга носити и не себе угождати, но Богу и ближнему выну служити. Тем же мы, любовию к тебе подвизаемы, дерзаем воспети ти сия малыя и нехитростныя похвалы:
Радуйся, ко Святей Троице дерзновение велие стяжавый;
Радуйся, дерзновение сие на помощь людем направляй;
Радуйся, вечныя премудрости Божией дивный служителю;
Радуйся, яко сердце твое скрижальми Духа Божия соделавый;
Радуйся, яко души верных Божественным разумом озаривый;
Радуйся, к деянию богомыслие и усердие велие приложивый;
Радуйся, молитву в основание добродетелей полагати научающий.
Радуйся, к церковным Таинством благоговейно приступати призывающий;
Радуйся, святый благоверный княже Константине, ревностию благою на пути спасения нас преславно обогощающий!

Кондак 10
Спасительнаго подвига совершая течение, старости маститей достигл еси, достоблаженный княже, яко неустаннее во трудех праведных и попечении духовнем о людех твоих проводил еси житие твое. Сице и кончиною достойною завершил еси е, яко со упованием в руце Господни предал еси святую душу твою и обитель в нетленных чертогах Царя Небеснаго обрел еси, идеже со ангелы и праведники воспеваеши ныне: Аллилуйя!

Икос 10
Стену необоримую и забрало крепкое всей державе Малорусской Господь дарова тя, богоносный княже, верным в скорбех и нуждах пребыстрое заступление, ибо смерти крепче любовь твоя бысть, яко Бога бо возлюбил еси всею душею и крепостию твоею и ближняго твоего, яко сам себе и множае паче себе; сего ради увенча тя Вседержитель диадимой нетленною. Темже и ныне вся сия ныне поминающе, похвалы таковыя приносим ти:
Радуйся, любовь нелицемерную в нас воспламеняющий;
Радуйся, терпением и мужеством души наши украшающий;
Радуйся, нас, алчущих и жаждущих правды, насыщающий;
Радуйся, сердца наши благодатью Божиею, ти данною, очищающий;
Радуйся, яко тобою от всех зол избавляемся;
Радуйся, яко твоими молитвами мудрости в вере исполняемся;
Радуйся, яко тобою истина присно утверждается;
Радуйся, яко тобою лицеприятие и человекоугодие посрамляется;
Радуйся, святый благоверный княже Константине, ревностию благою на пути спасения нас преславно обогощающий!

Икос 11
Светлостию подвигов просиял на земли еси, всехвальне княже Константине, и путь благочестне прошедше, востекл еси в чертоги Отца Нашего Небеснаго, идеже во славе невечерней предстоиши Ему купно со всеми святыма, в земли Малорусской просиявшима, престолу Владычню. Мы же молим тя, святый заступниче наш, молися и ныне Всещедрому Богу, да ниспошлет благодать покаяния всем заблудшим чадом небеснаго Отца и от греха к отеческому дому востекших, укрепит веру истинную в державе земной твоей, и нас благословит, взывающих ти сице:
Радуйся, воспевати величие Божие нас научающий;
Радуйся, духовно бодрствовати нам помогающий;
Радуйся, яко тобою ум наш в богомыслии научается;
Радуйся, яко тобою мрак неведения прогоняется;
Радуйся, заповеди Евангельския исполняти нас научающий;
Радуйся, страстьми одержимых от гибели спасающий;
Радуйся, от путей погибельных нас удаляющий;
Радуйся, милосердие Божие к нам приклоняющий
Радуйся, святый благоверный княже Константине, ревностию благою на пути спасения нас преславно обогощающий!

Кондак 12
Благодать Духа Всесвятаго стяжал еси в житии твоем за любовь к Отцу Небесному и ближнем своим; веруем, яко и по смерти благодать сия пребывает с тобою, богоблаженный княже; сего ради и молим тя: испроси у Господа Сил, да сохранит Церковь Православную от неверия и расколов, избавит от всяких бед и напастей, вопиющих Ему: Аллилуйя!

Икос 12
Поюще пречистое житие твое, благоверне княже Константине, величаем Прославльшаго тя Всемилосерднаго Господа Нашего, благодатию Своею укрепившаго и преобразившаго; просим убо тя; святый Константине, сотвори молитвы о нас, да дарует нам Вседержитель помощь во искушениях и скорбех, познание воли Его, благия и спасительныя и сподобит ны христианския, Тайн Божиих причастныя кончины и добраго ответа на Страшнем Судище Его. Сего ради тебе, заступниче и покровителю наш многомилостивый, взываем сице:
Радуйся, от всякия напасти чтущих тя пречудно изымаяй;
Радуйся, от недуг телесных и скорбей душевных избавляяй;
Радуйся, от нечестивых обычаев удалятися научающий;
Радуйся, от ссор и вражды к миру исходити сподобляющий;
Радуйся, благостию и кротостию души наша наполняющий;
Радуйся, мрак скорбей и треволнений от нас удаляющий;
Радуйся, светлою зарею радости все житие наше освещаяй;
Радуйся, к благодарению Бога и славословию Его призывающий;
Радуйся, святый благоверный княже Константине, ревностию благою на пути спасения нас преславно обогощающий!

Кондак 13
О святый благоверный княже Константине, всея земли Малорусския украшение, теплотою любве твоея ко Господу, посети и согрей души наша и прими убогое сие приношение наше, яко венец похвалы сердечныя, и вознеси молитву твою Отцу всех и Владыце и испроси земли нашей – мира благодейственнаго; Церквам Божиим – единства и благосостояния; нам же всем – чистоты сердечныя и любве непорочныя, да тобою охраняемы и спасаемы, Господеви вопием: Аллилуйя!

Сей Кондак читается трижды; затем паки Икос 1 и Кондак 1 и заключительная молитва.