Кондак 1
Возбранный Воеводо и ада Победителю, Ты, яко имеяй победу над смертию, Лазаря Четверодневнаго из мертвых воздвигл еси, и всем радость, свет и воскресение явил еси; мы же, недостойнии, Твоему нас ради снисхождению благодарение приносяще, от души вопием Тебе:
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Икос 1
Ангельския силы в радостный тpeпет приидоша, зря Твое, Сладчайшим Иисусе в Вифанию пришествие, идеже Ты не имеяй, где главу подклонити, и злобою иудейскою везде гонимый, всегда обретал еси по трудех благовестил покой душевный, мир, любовь и тишину у друга Твоего Лaзаря, егоже и Сам до конца возлюбил еси с сестры его Марфою и Мариею, яко тии всегда с верою и любовию служаху Тебе, слушающе при ногу Твоею Слово Твое. Таковое человеколюбное снисхождение Твое воспоминающе, со умилением сердечным вопием Тебе:
Иисусе, Любы Предвечная, до любве к человеком до конца снизшедый.
Иисусе, Милосте Безмерная, Лазаря с сестры его в любовь Свою приявый.
Иисусе, благословенный дом Лазаря во диех плоти Своея с любовию посещавый.
Иисусе, божественным Словом Твоим любящая Тя души тамо в сладость много насыщавый.
Иисусе, Вифанию, отечество Лазаря, местом покоя Твоего избравый.
Иисусе, велия дела силы и любве тамо прежде Креста Твоего явивый.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 2
Видяще сестры праведнаго Лазаря Марфа и Мария, яко брат их лютою болезнию зело страждет, не предашася унынию, не впадоша во отчаяние, но к Тебе, Господи, Целителю недугов, со упованием посласте, с верою глаголюще: Господи, се егоже любиши, болит. Сему последующе, и мы во всяком обстоянии да не предадимся унынию, но со упованием да вопием Тебе: Аллилуйя.

Икос 2
Разум чист имеша ученицы Твои, Господи, обаче не разумеша, почто абие не пошел еси в Вифанию к другу Твоему Лазарю исцелити его, егда приял еси весть лютом недузе его, но рекл еси пришедшим от Марфы и Марии: Сия болезнь несть к смерти, но к славе Божией, да прославится Сын Божий ея ради. Мы же ныне ведуще, яко хотел еси сокровенную глубину веры и любве их явити, и большее чудо пред страданиями Своими совершити, с любовию зовем:
Иисусе, любве исполненный, любящия Тя сердца святых сестер Лазаревых испытуяй.
Иисусе Всеблагий, болезнию братнею к чаянию велия славы Божия тех обращаяй.
Иисусе, велий в чудесех Своих, хотяй над Лазарем всему миру славу Свою явити.
Иисусе, Дивный в советех Своих, положивый в Вифании величия Своя совершити.
Иисусе, смерти не сотворивый, скорбящим сестрам Лазаревым не боятися смерти брата повелевый.
Иисусе, к смерти волею грядый, сомнящимся учеником победу над смертию явити восхотевый.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 3
Силою Божества Твоего ведый, яко належит Ти прежде Креста Твоего, Всеблагий Господи, явити над Лазарем силу Свою, да сущии с Тобою ученицы не устрашатся страданий Твоих и уразумеют из мертвых Воскресение Твое. Сего ради, услышав, яко болит Лазарь, друг Твой, не поспешил еси исцелити его, пребыл на том же месте два дни, да боголюбивыя сестры его и пред лицем смерти брата своего пребудут верою и любовию горяще, поюще Тебе: Аллилуйя.

Икос 3
Имеяй предведение Божественное, Всеблагий Господи, Ты рекл еси учеником Твоим: Идем во Иудею паки, и потом: Лазарь друг наш успе, по иду, да возбужу его. Егда же ученицы не разумеша, мняще, яко о успении сна его глаголеши, тогда не обинуяся рекл еси: Лазарь умре. И радуюся вас ради, да веруете, яко не бех тамо, но идем к нему. Тогда Фома, видев, яко ученицы страх имут во Иудею идти, яко ныне уже искаху Иудеи камением побити Тя, со дерзновением рече им: Идем и мы, да умрем с Ним,— научающе и нас без страха последовати Тебе и воспевати тако:
Иисусе, Друже Лазарев, друга Твоего от смертнаго успения возставити грядый.
Иисусе, Вифании Похвало, в весь Лазареву радость и воскресение несый.
Иисусе, Любы Неизреченная, плач и рыдания сестер Лазаревых услышавый.
Иисусе, Милосте Безконечная, овча Свое бездыханное оживити изволивый.
Иисусе, с Лазарем, в Вифании погребенным, погреби моя лютыя прегрешения.
Иисусе, с Марфиными и Марииными слезами приими о гресех моих тяжкая воздыхания.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 4
Бурю внутрь имуще помышлений сумнительных, Марфа и Мария горько проливаху слезы над гробом Лазаря, поминающе со скорбию обетование Твое, яко болезнь Лазарева не к смерти есть, но к славе Божией, зане тыя лишени уже быша прежния надежды, зряще брата своего во гробе пребывание и тела его разрушение и смердение. Ты же, Господи, об ону страну Иордана ходяй, глаголал еси учеником Своим: Радуюся, друзи мои, вас ради, яко не бех тамо, да увесте, яко вся могу, Бог сый. Идем убо оживити его, яко да смерть яве ощутит сего победу и совершенное разрушение, да воспоете со всеми верными: Аллилуйя.

Икос 4
Слышавши святая праведная Марфа, яко Ты, Господи, в Вифанию грядеши, четыре дни Лазарю во гробе уже бывшу, изыде во сретение Тебе, Марии же дома сидевшей, и глаголаше Тебе, утешения ищущи: Господи, аще бы ecи зде был, не бы брат мой умерл. Но и ныне вем, яко елика аще просиши у Бога, даст Тебе Бог. Сию веру скорбныя сестры Лазаревы в велицей печали ея видевше, со умилением в души зовем Тебе:
Иисусе, к четверодневному мертвецу стопы Своя направивый, посети и мене, во гробе отчаяния сущаго.
Иисусе, в Вифанию пришедый прияти в любовь Свою скорбящия сестры, приими и мене, заблудшаго.
Иисусе, Марфу многотрудную беседою Своею утешивый, утеши и мене, о гресех скорбящего.
Иисусе, Марию с чаянием дома сидевшую не забывый, не забуди и мене, во уныние впадшаго.
Иисусе, смерть, трепетати начинающую, пришествием в Вифанию устрашивый, смерти вечней не предаждъ мя.
Иисусе, ад горький шествием ног Твоих, к Вифании грядущих, страха исполнивый, адских мук избави мя.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 5
Боготечней звезде, нощный мрак разгоняющей, подобно бысть предречение Твое, Господи, егоже, яко Владыка живота и смерти, изрекл еси Марфе, глаголя: Воскреснет брат твой. Она же, яко еще немощная в вере, колеблющися веровати, яко брат ея может ныне по слову Твоему из мертвых возстати, глагола Тебе: Вем, яко воскреснет в воскрешение, в последний день. Мы же, недостойнии, Тебе, Победителю смерти, с верою вопием: Аллилуйя.

Икос 5
Видев, яко сердце святыя Марфы, печалию пораженное о смерти Лазаря, не может еще веровати, яко и ныне, Господи, Ты силен еси из мертвых воскресити его, рекл еси со властию, яко животом и смертию повелеваяй, желая возбудити ю от таковаго малодушия: Аз есмь Воскресение и Живот. Веруяй в Мя, аще и умрет, жив будет. Мы же сему Божественному обетованию внемлюще и живот вечный улучити хотяще, со упованием зовем Ти:
Иисусе, пришедый в Вифанию проповедати Воскресение, воскреси мя во страстех всего истлевшаго.
Иисусе, предвозвестивый Марфе Лазареве воскрешение, воззови мя, от многих грехов возсмердевшаго.
Иисусе, обновивый веру Марфы в Воскресение, обнови душу мою умерщвленную грехми.
Иисусе, призвавый всех нас уповати о умерших, просвети жизнь нашу, омраченную страстьми.
Иисусе, живыми и мертвыми обладаяй, не предаждь мя горькой смерти в преисподней вечно мною обладати.
Иисусе, живот вечный нам даровавый, подаждь ми наследие блаженное на небесех восприяти.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 6
Проповедница Твоего, Христе, Божества явися святая Марфа, во исповедании своем Петру, верховному апостолу Твоему, равная: сия бо, егда вопрошена бысть от Тебе, емлет ли веру, яко всяк веруяй в Тя, аще и умрет, жив будет, глагола Тебе: Ей, Господи, аз веровах, яко Ты ecи Христос, Сын Божий, Иже в мир грядый. Мы же, сему исповеданию с благоговением внемлюще, с верою и любовию вопием Тебе: Аллилуйя.

Икос 6
Возсия новый свет веры и надежды у святыя праведныя Марии, дома в скорби сидевшей, егда прииде к ней сестра ея Марфа и тайно от пришедших ко ея утешению иудей возвести ей о Твоем, Святый Господи, пришествии, глаголющи: Учитель пришел есть и глашает тя. Та же, слышавши сие, возста и скоро пришедши, падше, поклонися Тебе и лобызающе пречистии нози Твои и утешения ищущи, глаголаше Тебе со слезами:
Иисусе, живота Начальниче, аще бы был еси зде, не бы умерл мой брат.
Иисусе, смерти Разрушителю, аще бы пришел еси семо, не бы лежал Лазарь четверодневный во гробе.
Иисусе, Утешителю добрый, утеши в скорби сущую душу мою.
Иисусе, Учителю благий, научи мя творити волю Твою.
Иисусе, Наставниче безнадежных, настави мя с надеждою и терпением нести крест мой.
Иисусе, Прибежище сирых, даждь ми при ногу Твоею обрести в скорби моей покой Твой.
Иисусе, Лазаря, прежде Твоея страсти из мертвых воздвигнувый, яви и нам Свое Воскресение.

Кондак 7
Хотящей Марии излити при ногу Твоею вся чувствия своя о Лазареве лишении и любовь к Тебе, Господи, Ты же увидев ю плачущуюся, и пришедшии с нею иудеи плачущии, огорчился еси духом и возмутился еси, человеческое показуя, и прослезился еси Сам, да и мы, немощнии, в скорбех суще, со дерзновением припадем к Тебе, кающеся изливаем из глубины души слезы своя, и со умилением вопием Тебе, прослезившемуся о наших скорбех: Аллилуйя.

Икос 7
Новое и неизреченное снисхождение и человеколюбие крайнее явил еси, Сладчайший Иисусе,егда зря Мариины слезы, прослезился еси Сам. Иудеи же неции, видяще, яко о Лазаре плачеши, глаголаху: Виждь, како любляше его. Друзии же, во окаменении душ и сердец сущи, не восхотеша разумети Божественное сострадание Твое немощем нашим, мняху самому Тебе немощну быти и глаголаху в Твое посмеяние: Не можаше ли Сей, Отверзый очи слепому, сотворити, да и сей не умрет. Мы же, прославляя человеколюбие Твое, от души вопием Тебе:
Иисусе, слезы о Лазаре с сестры его источивый, струями слезными очисти грехи моя.
Иисусе, Марфины и Мариины слезы утоливый плачем Своим, утоли печали моя.
Иисусе, трости сокрушенныя не преломивый, богозданному храму души моея не попусти сокрушитися.
Иисусе, льна курящася не угасивый, теплящемуся светильнику веры и любве не попусти угаснути во мне.
Иисусе долготерпеливый, немощем нашим даже до конца спострадавый, в немощи моей укрепи мя.
Иисусе Человеколюбивый, даже до возскорбения за ны и до слез снизшедый, вечнаго плача исхити мя.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 8
Странно бе вопрошение Твое, Христе Спасе егда, всем плачущим, Ты о Лазаре вопрошал еси: Где положисте его? Зане яко Бог вся ведый, Ты предрекл еси смерть его, како же ныне, бездна сый ведения, не веси где погребен есть друг Твой? Обаче ныне вопрошаещи не неведый, уведети хотяй, но яко человек, человечески глаголя, хотяй скорбящия сестры Лазаря утешити и сего ради гроб его посети. Таковое человеколюбное снисхождение Твое славяще, поем Тебе: Аллилуйя.

Икос 8
Весь сый Любовь, весь сый желание наше, Господи Иисусе,Ты, пришед на гроб Лазарев, паки претя в Себе о жестосердии тамо бывших, повелел еси взяти камень от гроба, да возсмердением смерти заградятся уста неверных. Марфа же, паки являющи немощь естества человеческаго, глаголаше Тебе: Господи, уже смердит, четверодневен бо есть. Обаче Ты паки укрепил еси ю в малодушии ея, глаголя: Не рех ли ти, яко аще веруеши, узриши славу Божию? Мария же, зрящи камень отвален от гроба, в притрепетном чаянии пребываше, веру в молчании соблюдающи и точию в сердце глаголющи:
Иисусе, ко гробу друга Лазаря пришедый, очисти ум мой от сумнений неверных.
Иисусе, славу Божию явити восхотевый, сохрани сердце мое от похотей скверных.
Иисусе, камень от гроба Лазаря отвалити повелевый, отвали камень жестосердия от гроба души моея.
Иисусе, глаголом уст Твоих вся силы ада устрашивый, не устраши мя явлением обетованныя славы Твоея.
Иисусе кротчайший, кротко гробу Лазаря представый, кроткою душею сподоби мя Твое пришествие ощутити.
Иисусе сладчайший, мертвеца смердяща во гробе узревый, смиренным нравом подаждь ми Твою благодать лицезрети.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 9
Все естество Ангельское смятеся, егда Ты, Чудотворче Господи, являя славу Свою, яко Единороднаго от Отца, пред лицем множества народнаго хвалу воздал еси Небесному Отцу, глаголя: Отче, благодарю Тя, яко услышал еси Мя, и сия рек, гласом велиим воззвал еси: Лазарю, гряди вон, и егда бездыханный повеление Твое послушав, абие одушевлен от смерти возста и изыде, укроем рукама и ногама обязан, да чудо сие зряще, вся колена небесных и земных, и преисподних Тебе, Победителю смерти, преклонися, вопиюще: Аллилуйя.

Икос 9
Витии богоглаголивые, аще и много глаголют, но не возмогут достойно прославити велие и страшное чудо Твое, Господи, егда Ты Лазаря Четверодневнаго от мертвых воздвигл еси, да Марфу и Марию, с нимиже и всех нас, в вере и надежде воскресения и безсмертия души утвердиши. Сего ради мнози от иудей, к Марии пришедших, видевше, яже Ты сотворил еси в Вифании, вероваша в Тя, яко в Сына Божия и радостно принесоша Тебе похвалы сицевыя:
Иисусе, Лазаря мертва четверодневна воскресивый, и мене, умерша страстьми, воскреси.
Иисусе, друга Твоего, пеленами связана, разрешивый, и мене связана узами греха, разреши.
Иисусе, мертвеца смердяща от гроба свободивый, и мене из гроба отчаяния изведи.
Иисусе, агнца любимаго от пропастей ада исхитивый, и мене от вечныя тьмы кромешныя сохрани.
Иисусе, повелением живоноснаго гласа Твоего воздвигнувый смердящаго, и мене, истлевшаго страстьмй, словом Твоим оживи.
Иисусе, всесильною крепостию Твоею Лазаря четверодневна возставивый, и мене общника тридневнаго Воскресения Твоего покажи.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 10
Спасти восхотел еси вся, Христе Спасе, обаче сынове тьмы, зряще умершаго Лазаря, гласом Твоим от тления возставша, не восхотеша в ожесточении сердец своих уверовати в Тя, и неции от них поидоша к первосвященником и фарисеям и возвестиша им, яже Ты сотворил еси в Вифании. Мы же безумию их не вдающеся, но в общее Воскресение по обетованию Твоему верующе, Тебе, Живодавцу и Спасителю нашему велегласно вопием: Аллилуйя.

Икос 10
Царю Превечный, Иисусе! Стены каменныя твердее быша первосвященницы иудейстии, егда услышавше, каковое страшное чудо сотворил еси в Вифании, совет восприяша на Тя, глаголюще: Что сотворим, яко Человек Сей многа знамения творит. Един же от них, Каифа, архиерей сый лету тому, рече, яко уне есть, да Един Человек умрет за люди Своя, а не весь язык погибнет. И от того убо дне совещаша, да убиют Тя, Христа Своего и Владыку, вкупе же и Лазаря, яко мнози его ради прихождаху от иудей и вероваху в Тя. Сего ради вопием Ти сице:
Иисусе, Сыне Божий Безсмертный, Лазаря ради, яко агнец незлобивый на заклание приуготовленный.
Иисусе, Спасе наш, человеки судимый, от Каиафы за люди умрети| неволею предреченный.
Иисусе, на беззаконном соборище вкупе с Лазарем на смерть осужденный, не осуди нас на Судищи Твоем.
Иисусе, в верной Вифании, в дому Лазаря печаль на радость преложивый, помяни нас во царствии Твоем.
Иисусе, Креста предначинание в Вифании совершивый, силою Креста Твоего сохрани нас.
Иисусе, льстивых фарисеев чудесы своими устрашивый, воскресением Лазаря возвесели нас.
Иисусе, Лазаря прежде страсти Твоея из мертвых воздвигнувый, яви и нам Свое Воскресение.

Кондак 11
Пение всеумиленное да принесет Тебе, Христе Спасе наш, Вифания верная и Тобою любимая, яко в радость преложил еси печаль ея, Лазаря, воспитание ея, из гроба воздвизая, и да не сетует, яко на малое время отшел еси во Ефрем, нарицаемый град близ пустыни, идеже ходил еси со ученики Своими, первосвященником заповедь давшим, да имут Тя. Мы же, удивляющеся Твоему о ученицех пред страдании Твоими попечению, поем Тебе: Аллилуйя.

Икос 11
Свет велий и неизреченный осия Вифанию, егда прежде шести дний бытия Пасхи Ты пришел еси в весь сию, сладчайший Иисусе, идеже любящия Тя сотвориша Тебе преславную вечерю, Лазарево воскрешение с радостию и благодарением празднующе. Бе же ту и Лазарь един от возлежащих, Марфа же с любовию многою паки служаше Тебе, Мария же от избытка радости, любве и благодарения, приемше литру мира нарда чиста многоценна, помаза пречистеи нозе Твои и власы своими отираше я, и храмина исполнися вся от вони масти благовонныя. Мы же, недостойнии, в радость оных блаженных сообедников Твоих приникнути желающе, со умилением многим вопием Тебе таковая:
Иисусе, с мертвецем воскресшим разделивый трапезу, даждь ми выну наслаждатися вечныя Твоея вечери на небеси.
Иисусе, Лазаря по воскрешении его небесною радостию исполнивый, сподоби мя небесная мыслити на земли.
Иисусе, Марфу трудолюбную се уже второе на вечери послужити Тебе удостоивый, приими мя на Твое служение.
Иисусе, Марию, Божиею любовию горящую, нози Твои миром помазати сподобивый, даждь ми духа любве пламенение.
Иисусе, Вифанию странноприятием Тя на вечери зело возвеселивый, возвесели мя посреде трудов отдохновением.
Иисусе, Марфины слезы и Мариин плач Лазаревым возстанием скоро утешивый, утеши мя в скорбех Твоим посещением.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 12
Благодать велию даровал еси, Христе, воскрешением Лазаря благословенней Вифанийстей веси, восприявшей Тя. Наутрие сретают Тя в Иерусалиме Крест, злохуление и поношения от злобных фарисей, завистию дышащих, зде же Ты обрел еси прежде Креста любовь, радость и мир о Дусе Святе. Сего ради да будет Тебе похвала вечная, Вифание, яко Зиждителя странноприяти сподобилася еси: благоуготовися, украси божественне твоя входы, расшири преддверия твоя, да и мы с тобою воспоем прославившему тя Господу: Аллилуйя.

Икос 12
Поюще из мертвых Лазарево воскрешение, поклоняемся величию дел Твоих, Христе, прославляем вседержительство Твое и крайнее снисхождение с неизреченным человеколюбием Твоим и веруем с Марфой, яко воистину Ты еси Христос, Сын Божий, Иже в мир грядый, с Марией же приседим при ногу Твоею, внимающе единому на потребу Божественному слову Твоему. Сподоби нас молитвами праведнаго Лазаря, друга Твоего, видети Твою светлую над смертью победу и живоносное Воскресение Твое, вопиющих Тебе тако:
Иисусе, ада Победителю, с Лазарем четверодневным из тьмы кромешныя греха изведи мя.
Иисусе, смерти Низложителю, с другом Твоим умершим к жизни и воскресению паки воззови мя.
Иисусе, Лазаря на острове Крите от злобы фарисейския спасый, ими же веси судьбами спаси мя.
Иисусе, тамо его от апостол во епископа поставивши, от Церкве Твоея не отлучи мя.
Иисусе, тому же омофор, рукама Богоматере истканный, вручивый, под кровом Ея сохрани мя.
Иисусе, Лазаря посещения Пречистыя во днех земныя жизни Ея удостоивый, Тоя предстательства не лиши мя.
Иисусе, Лазаря прежде Твоея страсти из мертвых воздвигнувый, яви и нам Свое Воскресение.

Кондак 13
О Сладчайший Иисусе, всех Радосте, Свете Тихий, Животе мира и Воскресение наше! Приими от нас, якоже от Марфы и Марии, сие малое благодарение наше о воскрешении Лазаря, от всея души Тебе приносимое, и сотвори ны общники быти того из гроба возстания, да всесильным Словом Твоим воздвигнеши и нас от всякаго падения греховнаго и смерти вечныя и сподобиши ны получити наследие неувядаемое на небесех, идеже со всеми святыми да воспоем Тебе: Аллилуйя.
Этот Кондак читается трижды, затем Икос 1-й «Ангельский силы...» и Кондак 1-й «Возбранный Воеводо...»

Тропарь, глас 1
Общее воскресение прежде Твоея страсти уверяя, из мертвых воздвигл еси Лазаря, Христе Боже. Темже и мы, яко отроцы, победы знамения носяще, Тебе, Победителю смерти, вопием: Осанна в вышних, благословен Грядый во имя Господне.

Молитва святому праведному Лазарю, апостолу и другу Христову
О, зело предивный и изрядный друже Христов, святый праведный Лазарю, Вифании похвало и всей вселенней превеликое удивление!
Благословен дом твой, егоже Господь наш Иисус Христос во днех земныя жизни Своея с любовию посещаше, видя веру и доброту души твоея и боголюбивых сестер твоих Марфы и Марии, зане ты возлюбил еси Его всем сердцем твоим, всею душею твоею, всею мыслию твоею и Тем до конца возлюблен был еси. Дивны тайны твоя, на тебе Божественным Другом твоим и Господом нашим явленныя, яко изволися Ему прежде Креста Своего и Воскресения показати на тебе всему миру славу Свою и сотворити тя предвозвестника пресветлаго Своего из мертвых тридневнаго Воскресения.
Сего ради Той, яко Владыка живота и смерти, попусти тебе смертным сном уснути и погребену быти, и даже до адовых глубин снити, идеже ты узрел еси сущия от века умершыя во множестве неисчетном адовыми узами содержимыя и страшные страхи видел еси. И тамо, егда тело твое возсмердению смертному уже предадеся, по четырех днех ты услышал еси Божественный глас Друга твоего, на гроб твой пришедшаго: Лазарю, гряди вон! И по гласу сему ты абие из гроба возстал еси и тако Вифанию возвеселил еси, и Марфины и Мариины слезы утолил еси, фарисеи же и книжники, в ожесточении сердец сущия, устрашил еси.
Утоли же, святый друже Христов, и наши слезы, грех ради наших проливаемии, оживотвори наши души и телеса, в возсмердении страстей и нечистот греховных сущиx, воздвигни нас из гроба отчаяния и лютаго уныния, всех же нас избави от вечныя смерти, якоже и тебе Господь наш возстави от; успения смертнаго.
И умоли Милостиваго Бога, да сподобит нас причастники быти вечныя жизни, еюже и ты по трудех святительства на острове Критстем сам ныне наслаждаешися во обителех райских, прославляя всесвятое имя, Отца и Сына, и Святаго Духа, ныне и присно и, во веки веков. Аминь.

Святой праведный Лазарь, брат Марфы и Марии, жил с сестрами своими недалеко от Иерусалима, в селении Вифания. Лазарь и его сестры удостоивались от Господа Иисуса Христа особенного благоволения. Во время Своей земной жизни, Господь часто посещал их дом в Вифании, Лазаря называл Своим другом, а незадолго до Своих страданий воскресил Лазаря из мертвых, после того как он находился уже четыре дня во гробе. После сего события о Лазаре в Св. Писании упоминается еще один только раз, и именно, когда за шесть дней до Пасхи Господь пришел опять в Вифанию, то там был и воскрешенный Лазарь. В то время, когда Господь находился в Вифании, многие из Иудеев узнали, что Он там, и пришли не только для Иисуса Христа, но чтобы видеть и Лазаря, которого Он воскресил из мертвых. Многие из них убеждались в истине чуда, совершенного Господом, обращались к вере в; Него и делались Его последователями. Видя; это, первосвященники тогда же решили убить и Лазаря.
Более о Лазаре из Евангелия нам ничего неизвестно. Предание говорит, что Лазарь, по воскресении своем, оставался в. живых еще 30 лет, был епископом на острове, Кипре, где подобно апостолам много потрудился в распространении христианства, и там же мирно скончался.
В IХ веке по рождестве Христовом св. мощи праведного Лазаря были обретены в городе Китии, где они лежали в земле, в мраморном ковчеге, на котором было написано: «Лазарь четверодневный, друг Христов». Честное сокровище сие было вынуто из земли и положено в серебряную раку, а при императоре Византийском Льве Мудром перенесено в Константинополь, и положено в храме во имя праведного Лазаря.