Кондак 1
Избранный Премудрым промыслом Божиим во благовестие Христово всему миру, Луко всеблаженне, велие дерзновение стяжавый пред лицем Господа, Его же житие земное и учение возвестил еси всем народом. Испроси и нам, немощным и слабым, прощение согрешений и утверди в нас надежду Царствия Небеснаго, да зовем ти:
Радуйся, святый Луко, евангелисте Христов и апостоле.

Икос 1
Ангелов и человеков Творец, Всемилостивый Господь в грехе потопляему роду людскому посла Сына Своего да житием Своим, смертию и славным Воскресением изведет всех нас из тьмы погибели и направит к Царствию Небесному. Чрез тебя же, евангелисте святый, начертаны бысть тайны неба и земли, да вси человецы до конца века сего путем спасения шествуют и благодарни суще взывают ти:
Радуйся, на возвещение Евангелия Духом Святым просвещенный.
Радуйся, Христа, пришедша грешныя спасти, проповедавый.
Радуйся, в тайны Божии духом возносивыйся.
Радуйся, лучу небесный, во тьме мира сего сияющий.
Радуйся, мрежею твоего Евангелия многия словесныя души уловивый.
Радуйся, Владычицы Богородицы икону первый написавый.
Радуйся, Иисуса Сыном Божиим и Человеческим возвестивый.
Радуйся, к истине спасительней народы приобщивый.
Радуйся, святый Луко, евангелисте Христов и апостоле.

Кондак 2
Видя страдания людския в младости твоей премудрость врачебную, Луко милосердный, усердно взыскал еси, и благим целителем недугов человеческих явился еси. Егда Господь Иисус Христос Свое Божественное слово на земли сеял есть, ты, врачу добрый, сердцем доброе семя воспринял еси и исполнивыйся небесныя радости, воспел еси велегласно Богочеловеку Христу: Аллилуиа.

Икос 2
Разумом твоим познал еси Бога истиннаго, всехвальный Луко, и в сердце твоем светлую обитель Ему устроил еси волею доброю, яко зерно божественныя любве прозябе у тебе стократный плод, ибо ты Христа учению внимая и чудеса творимыя Ним видя, исполнился еси полноты божественныя мудрости и ведения. Господь же, избрав тя, посла на проповедание Благия Вести спасения рода человеческаго. Мы же, чрез твое Святое Евангелие просвещаемся и благодарне воспеваем ти сице:
Радуйся, доброе гроздие винограда Господня.
Радуйся, Христовою благодатию в сердце уязвленный.
Радуйся, яко вся оставивый за Христом Господом последовал еси.
Радуйся, яко славу Божию возвестил еси.
Радуйся, яко лицем к лицу Бога чрез Христа узрел еси.
Радуйся, яко Господа и ныне в Царствии Небеснем зриши.
Радуйся, родословие Христово до Адама возведый.
Радуйся, лесть демонскую теплотою веры отгнавый.
Радуйся, святый Луко, евангелисте Христов и апостоле.

Кондак 3
Силою и властию вооруженный от Господа, святый Луко, ними же возможеши проповедовати Евангелие и творити чудесы, со прочими апостолы и поныне грядеши пред лицем Господа Христа, проповедуя, яко в мир пришел есть от века обетованный Мессия, Коему вси, яко Богу, от ныне и до века взывати возмогут: Аллилуиа.

Икос 3
Имуще в себе, святый Луко, огнь любве Божественныя, усердие велие приложил еси, во еже верно служити и благоугождати Христу Богу, Его же сопутник верный, ученик благоговейный и самовидец великих и преславных чудес сподобился еси быти. В последнии дни земнаго жития Спасителя в Иерусалиме пребывал еси, со слезами взирая, како неповинная кровь Учителя твоего изливашася на грешную землю. Мы же купно с тобою торжество искупления исповедуем, а тебя, сих событий зрителя и списателя, славим сице:
Радуйся, чрез покаяние души обновляти нас научающий.
Радуйся, кающихся грешников с Господем примиряющий.
Радуйся, творити заповеди евангельския нас подвизающий.
Радуйся, прежде всего о Бозе мыслити научающий.
Радуйся, богопротивныя учения отвергати нас подвизающий.
Радуйся, страстей наших бурю укрощающий.
Радуйся, в терпении скорбей укрепляющий.
Радуйся, в обстояниях безысходных помогающий.
Радуйся, святый Луко, евангелисте Христов и апостоле.

Кондак 4
Буря печали твоея светом радости растворися, богоубийц же радость в печаль обратися, яко смерть немощна явися противу Источника Живота и камень гробный не можаше удержати Камень краеугольный. Господь твой воскресе из мертвых и мирови дарова живот вечный. Мы же, сия поминаюше, просим: наполни и наша души радостию пасхальнею, настави нас умиленно Воскресшаго Спасителя славити, воспевая Ему: Аллилуйя.

Икос 4
Слышавше сказания о благочестивом и богоугодном житии твоем, с радостию вспоминаем шествие твое купно с Клеопою в Еммамус, егда явися вам Господь и идоша с вама. Вы же Господа не познаша, дондеже на трапезе вечери не преломи Он хлеб и благослови, и отверзошася вама очи и уразумеша, яко Сей бысть воскресый Господь. Познавая о том из Евангелия твоего, и ныне просим тя: утверди сердца наша по Бозе горети и прими милостивно, наставниче наш, сия похвалы:
Радуйся, светлосте разумнаго Солнца.
Радуйся, яко нас научаеши веровати во Святую Троицу.
Радуйся, многих познанием Христа Спаса обогащающий.
Радуйся, нам Источник спасения отверзающий.
Радуйся, от суеты и праздномыслия исцеляющий.
Радуйся, стези наша к небесам обращающий.
Радуйся, долженствованиями земными не пренебрегати научающий.
Радуйся, от маловерия и сомнения нас благодатно исцеляющий.
Радуйся, святый Луко, евангелисте Христов и апостоле.

Кондак 5
Богоявленней звезде, во дни древния премудрых волхвов к Солнцу правды путеводившей, уподобился еси, богоносне апостоле, егда Господь, спасения нашего ради, основа Церковь Свою и по обетованию ниспосла в день пятидесятый по Воскресении Духа Святаго на апостолы, да их запечатлеет свидетели непоколебимы веры христианския. И ты, святе Луко, пребывал еси купно со иными апостолы во Иерусалиме, верно свидетельствуя Христа и воспевая Ему, яко истинному Богу: Аллилуиа.

Икос 5
Видя, яко в Севастии нетленныя мощи святаго Иоанна Предтечи почивают, возжелал еси, богославный апостоле, с собою их понести, обаче христиане града того не возжелав лишитися таковыя драгоценныя святыни, вручиша ти десницу Иоаннову, под ню же Господь приклони в крещении Божественную главу Свою. Мы же, дивящеся таковей любви твоей ко святым, восклицаем ти таковая:
Радуйся, употреблению вещей освященных начало положивый.
Радуйся, сбережению святынь первых христиан научивый.
Радуйся, Духом Святым Новый Завет в сердце твоем начертавый.
Радуйся, сердце свое святостию Духа Святаго очистивый.
Радуйся, врачу, силою Вышняго Врача исцеление подающий.
Радуйся, всех уязвленных и обиженных утешающий.
Радуйся, уныние из сердец наших изгоняющий.
Радуйся, светом и радостию души наша наполняющий.
Радуйся, святый Луко, евангелисте Христов и апостоле.

Кондак 6
Проповедника Евангелия Христова и возвестителя воли Господней сотвори тя Всемогущий и Милосердный Бог наш, егда, премудрый Луко, с десницею Иоанновою, достигл еси своего отечествия к радости велией христиан Антиохийских, ихже в словесах божественных и радости Христоваго Евангелия паче утвердил еси, глаголаше им Сына Божия чудесы, ихже своима очима видел еси и учение Спасителя мира, егоже своима ушима слышал еси. Внимающе глаголом твоим премудрым, оне воспеваху радостно Богу: Аллилуиа.

Икос 6
Возсиял еси, светоносный учениче Спасов, яко светильник лучезарный в Антиохии Сирийстей. Послежде апостол Павел призва тя в сотрудники себе в трудех благовестия, с ним же купно в страну Еллинскую на проповедь Евангелия потекл еси, возвещая тамо учение христианское. Мы же, дивящеся таковым неустанным трудам твоим, взываем ти:
Радуйся, неутомимый спутниче апостола Павла.
Радуйся, с Павлом премудрым учителю языков избранный.
Радуйся, в трудех твоих благодатию Божиею вдохновленный.
Радуйся, рукою Владычнею вышним ведением обогащеный.
Радуйся, от смертоноснаго яда греховнаго избавляющий.
Радуйся, о преумножении в нас благодати Творца умоляющий.
Радуйся, благовестников Христовых преславно укрепляющий.
Радуйся, пастырем и святителем в служении помогающий.
Радуйся, святый Луко, евангелисте Христов и апостоле.

Кондак 7
Хотяще святый Павел при конце третияго апостольскаго путешествия град Филиппы посетити, в Коринф направи тя да преподаши благословение сиротам христианским в Палестине сущим. С того часа, не отступаяй от апостола великаго, воспевал еси с ним вкупе Всемогущему Богу: Аллилуиа.

Икос 7
Новыя труды во благовестии Христовом подъяли есте, апостоли святии Луко и Павле, в радости обойдя вся Церкви в Азии и Иудеи сущия, и паки Палестины достигли есте. Из града Кесарийскаго, идеже евреи, от лукаваго одержимыя, от римския власти святаго Павла оковами обложиху, в град Рим на суд кесарев приидоша. На пути же том, святому Павлу неотступно спутешествовал еси, святе Луко, многия беды с ним претерпевая. Восхваляя тя за все сие, восклицаем ти тако:
Радуйся, Колоссян чрез Павла во узах приветствовавый.
Радуйся, Христа словом и писанием свидетельствовавый.
Радуйся, не токмо искусством, но и силою благодати исцелявый.
Радуйся, яко горьку от безбожия соль Божественною солию усладивый.
Радуйся, от демонов страждущих скорое избавление.
Радуйся, всех немощных благодатное укрепление.
Радуйся, внутренний мрак душ наших светом Христовым озаряяй.
Радуйся, неизреченное милосердие Божие к нам преклоняяй.
Радуйся, святый Луко, евангелисте Христов и апостоле.

Кондак 8
Странствуя купно со апостолы Павлом и Марком, Христа проповедовал еси, святе Луко, вначале евреом, послежде их, словесам вашим не верующим и распри меж собою творящим, всем иным незнающим Бога Истиннаго, кои, внимая от вас словесам спасения, радостно воспеваху Воплотившемуся Христу Господу: Аллилуиа.

Икос 8
Весь светом небесным серафимския любве пламенел еси, богомудре Луко, в Риме пребывая, и благодатию движимый совершил еси то, на что избра тя Бог от века: в назидание всем народом составил еси Святое Евангелие, в коем начертал еси житие земное Божественного Спасителя нашего, яко сам видел и слышал еси и яко от самовицев и слуг Слова Божия приял еси. И внимая словесем апостола Павла, деяния апостольския преславно изобразил еси. Мы же, вся сия ныне поминающе, похвалы таковыя приносим ти:
Радуйся, Светом Христовым всю вселенную просвещающий.
Радуйся, от заблуждений духовных нас исцеляющий.
Радуйся, от пристрастий греховных нас освобождающий.
Радуйся, яко тобою ум наш в богомыслии поучается.
Радуйся, яко тобою мрак неведения прогоняется.
Радуйся, богатство стяжавшим, благоразумие мытарево в пример приведый.
Радуйся, самарян благодарными и милосердными показавый.
Радуйся, святый Луко, евангелисте Христов и апостоле.

Кондак 9
Вся небесныя силы возрадовася, восхваляя Бога, егда апостол Павел после двухлетних уз отпущен бе и потече из Рима обойти ранее основанныя церкви, ты, Луко святый, его верный спутник в том пути обрелся еси. Егда же Нерон жестокое гонение на христианы в Риме воздвиже, вы, паки возвращься, ободряли и укрепляли есте церковь гонимую, в узах и в крови радостно воспевавшую Богу: Аллилуиа.

Икос 9
Ветия многовещанныя недоумеют достойно восхвалити и прославити вся подвиги, труды и страдания первоверховнаго апостола Павла, с коим ты, святый Луко, верно и неотступно пребывал еси. Егда же наставник твой мученически чистую душу свою Господеви предаде, ты со слезами до конца сострадал еси ему. Сострадая и мы боли твоей сей, поем ти:
Радуйся, от Троады до врат райских Павлу последовавый.
Радуйся, богомудрым Павлом изрядно наставленный.
Радуйся, награду за весть благую в Царствии Небеснем восприявый.
Радуйся, блистанием духа твоего сердца верных просвещаяй.
Радуйся, древо доброе, многия плоды принесшее.
Радуйся, благочестия непоколебимый столпе.
Радуйся, безбожия непоколебимый обличителю.
Радуйся, Божиих преславных чудес возвестителю.
Радуйся, святый Луко, евангелисте Христов и апостоле.

Кондак 10
Спасительнаго подвига ищуще, богомудрый учениче Спасов, после же мученическия кончины апостола Павла, ты, святый Луко, в странах Италийской, Далматской, Гальской, сугубо же в Македонской и Ахайской, Христа проповедывал еси, всюду мрак безбожия разгоняя и народы научая, да вси Богу Живому и Истинному восклицают: Аллилуиа.

Икос 10
Царю Небесному паки и паки послужити желая, апостоле блаженне, в старости твоей во Египет потекл еси с благовестием спасения Христова. Проповедуя же, многия мучения претерпел еси и множества подвигов подъял еси. Возвращшуся же ти в страну Эллинску, во священники и диаконы рукополагал еси, болящия телом и душею исцелял еси. За вся сия мы радостно взываем ти:
Радуйся, светлая заре новаго дне.
Радуйся, путеводителю наш на небесе.
Радуйся, Тело Христово – Церковь Святую устрояющий.
Радуйся, на пустующия нивы делателей посылающий.
Радуйся, о благосостоянии Церквей Божиих Творца умоляющий.
Радуйся, нас на подвиг деятельныя любве подвигающий.
Радуйся, безбожия непоколебимый обличителю.
Радуйся, благочестия и добронравия насадителю.
Радуйся, святый Луко, евангелисте Христов и апостоле.

Кондак 11
Пение хвалебное возносим ти, богоглаголивый апостоле, праведнаго жития и мученическия кончины твоея ради, яко в старости маститей бесоводимыя идолопоклонницы схватиша тя и, бияше Христа ради, на масличном древе повесиша. Душу же твою Святую ангели вознесоша ко Христу, Коему ты верно послужил еси. И ныне в свете горнем воспеваеши Творцу: Аллилуиа.

Икос 11
Светоносною свещею, богопрославленный апостоле Христов, воссиял еси во дни земнаго жития твоего. И по смерти приял еси благодать от Бога чудеса творити и исцеления источати, яко святыя и чудотворныя мощи твоя многия исцеляют, сугубо же очесами болящия. Мы же, поминая сие, просим тя, учениче Спасов, изостри очи наша ко зрению спасения, ниспошли страждущим от недугов свобождение и от скорбей утешение, всем, почитающим тя, память о Бозе и приими величания сия:
Радуйся, яко мученичеством веру во Христа засвидетельствовавый.
Радуйся, яко твое течение доброе страданьми запечатлел еси.
Радуйся, яко верен слуга Господа Христа явился еси.
Радуйся, яко тя и земная и небесная Церкви славят.
Радуйся, яко тя вси концы земли величают.
Радуйся, почитающих тя неусыпный молитвенниче.
Радуйся, вдов и сирот неумытный заступниче.
Радуйся, тяжких страдальцев скорый помощниче.
Радуйся, святый Луко, евангелисте Христов и апостоле.

Кондак 12
Благодатию Божественною просвещенный, апостоле всехвальный, со словесным Евангелием купно, Евангелие во образах нам оставил еси, святый Луко, яко живописал еси прехвальныя образа Божией Матери, рекшей: благодать Рождшагося от Мене и Моя милость с сими иконами да пребудет. Благодарни суще, яко и нас удостоил еси благоговейно взирати на лепоту Девы и Сына Ея, радостно просветившему тя Премудрому Господу взываем: Аллилуиа.

Икос 12
Воспевая дивное житие твое, святый и преславный Луко, сугубо величаем тя, яко живописал еси на дске иконы святых апостолов Петра и Павла. И тако начаток положил еси и в сем дивном и богоугодном деле писания святых икон во славу Божию, Пресвятыя Богородицы и всих святых, они же доныне благолепно украшают храмы Божии и ко спасению призывают всех, благоговейно их почитающих. И за все сие, дарованное нам тобою, благодарнии, восклицаем ти:
Радуйся, Девы Пресвятыя Лик увековечивый.
Радуйся, яко неизреченную радость нам тем в сердца принесший.
Радуйся, изографов и иконописцев духовному зрению научающий.
Радуйся, служити вечной Божественней красоте нас вдохновляющий.
Радуйся, на путь истины, добра и любви всех приводящий.
Радуйся, врачей человеколюбием и милосердием обогащающий.
Радуйся, недуги душ и телес наших преславно исцеляющий.
Радуйся, ревновати о спасении ближних нас научающий.
Радуйся, святый Луко, евангелисте Христов и апостоле.

Кондак 13
О, святый евангелисте и апостоле Луко, приими сии немощныя словеса наша, яко молитву благоугодную, и испроси нам у Господа нашего Иисуса Христа, Коему ты неутомимо служил еси и велию милость от Него стяжал еси, прощение всех согрешений наших, мирный и безболезненный конец живота нашего, невозбранное восхождение в мир духовный, в нем же вси святии воспевают небесную песнь: Аллилуиа. Аллилуиа. Аллилуиа.

Молитва
О, святый Луко, Богом избранный и Материю Божиею благословенный, проповедниче по всей вселенней Евангелия Христова, мучениче и апостоле, помощниче всем молитвенно призывающим тя, помози и нам, непотребным рабам Господним, мы бо, по многим прегрешениям нашим, обретаемся во тьме и сени смертней, далече от Бога отстоя. Чрез то стыдом посрамленныя, не имамы дерзновения Господа молити о прощении нашем, тебя же призываем, великий светильниче Божий, яко пребывающий в непреходящем Его свете, моли о нас Господа, да помилует нас.
Умоли Господа, святый Луко, да обновит в нас страх Господень, нимже любы привлекается, а грех отгоняется. Мы же, хотя и навыкли грешити по всяк день и по всяку нощь, обаче воспоминая словеса Господа: «Бдите, яко не ведаете часа, егда хощу приити», ведаем, яко можем во всякий час быти призванными Ним из сего привременнаго живота в живот вечный.
Пробуди в нас, святый Луко, страх и премудрость, о них же святый царь и псалмопевец Давид рече. Да твоими молитвами получим слезы покаяния, ими же наши души от грехов очистятся. Помози нам, неразумным, да уразумеем писание, еже ты сам списал еси, и бежим от греха, яко от огня, и вся силы своя приложим да приблизит ны Бог к Себе. Да уразумеем, яко грех есть смерть, Бог же есть живот вечный.
Помози нам, святый Луко, да то уразумевше, очистимся от греха и прейдем из смерти в живот. Да будет нам Бог вся во всем. И ныне и во веки да пребудем близ Него. Дабы и нам, яко ти с Клеопою, егда путешествовали во Еммаус, сердце и душа трепетны быша от присутствия Его. Отнюдуже да снидет на ны мир небесный, к Царствию Небесному ны руководящий и радостны ны творящий, да возможем стрелы луковаго, на всяк час в нас испускаемыя, отгнати.
С тем же получим и любы Божию, да руководит нас к Вечному Отечеству, идеже пребывают вся силы небесныя, вси святии, Матерь Божия пред ними, Еяже благой лик в иконе, тобою написанной, увековечен есть. Очи сердец наших да непрестанно взирают на ту лепоту и ею наслаждаются, да царит в нас Царство Небесное, в кое чаем молитвами твоими, святый Луко, преселитися, егда нас Господь призовет, да тамо вечно славим Бога во Святей Троице: Безначальнаго Отца, Единороднаго Сына и Пресвятаго Духа, во вся бесконечныя веки. Аминь.

Тропарь, глас 4.
Апостольских деяний сказателя, и евангелия Христова светла списателя, Луку препетаго, неисписанна суща Христове церкви, песньми священными святаго апостола похвалим, яко врача суща, человеческия немощи, естества недуги и язи душ исцеляюща, и молящася непрестанно о душах наших.

Кондак, глас 2.
Истиннаго благочестия проповедника, и таин неизреченных ритора, звезду церковную, Луку божественнаго восхвалим: Слово бо его избра, с Павлом мудрым языков учителя, Един ведый сердечная.

Автор Евгений Храповицкий

Благословлено для келейного чтения