Преподобномученик Макарий Каневский

память - 13 / 26 мая , 7 / 20 июня и 7 / 20 сентября

Преподобномученик Макарий Каневский жил в XVII веке. Это было тяжелейшее время для православных людей Западной Руси. Жизненный подвиг, совершенный преподобномучеником, был подвигом защиты Православной веры в условиях неравной изнурительной борьбы, когда защищать можно было только будущее Русской Православной Церкви, поскольку то, что сохранялось от проносящегося урагана унии, сносилось татарскими набегами.

В 1942 году мощи были перенесены в Троицкую церковь города Черкассы, а с 1965 года находятся в храме в честь Рождества Пресвятой Богородицы того же города.

Боголюбивые читатели! В специальном выпуске нашей газеты мы предлагаем вашему вниманию два акафиста преподобномученику Макарию. Текст первого издан а Черкассах (1992), второй употребляем в Полтавском Свято-Макариевском Соборе. Каждый, освященный молитвенным опытом сотен Православных, имеет свои преимущества, и посему пусть один из них, или оба попеременно, услаждают Ваши благочестивые чувства.

Молитвами преподобномученика Макария, Господи , Иисусе Христе Боже наш, помилуй нас.  Аминь.

Редакция Полтавского Православного листка.

Два акафиста святому

преподобномученику Макарию

Акафист первый

(по изданию: Служба с акафистом преподобномученику Макарию. Черкассы, облредиздат "Сияч", 1992. - 22 с.)

Кондак 1

Избранный от Бога угодниче и страстотерпче Христов, преподобномучениче Макарие, источаяй мирови многия милости и чудесная дарования! Похвальная восписуем ти, почитающе святую память твою. Ты же на Небеси предстоя Престолу Господа Славы, молися о всех нас, с верою притекающих к тебе и любовию зовущих: Радуйся, преподобномучениче Макарие, Переяславский и Каневский чудотворче.

Икос 1

Ангела земнаго и человека Небеснаго яви тебе от утробы матерни всего мира Создатель: ты бо, блаженне Макарие, еще во отроческих летех пребывая, земная веселия вся презрев, попечение о благочестии имел еси, ко храму Божию прилежа и ревнуя о учении и познании веры Православныя. Мы же, дивящеся сему, вопием: Радуйся, родителей благочестивых мудрый сыне. Радуйся, от утробы матерни Духом Святым осененный. Радуйся, от младенчества Богом избранный. Радуйся, от юности Христа возлюбивый. Радуйся, подвижниче, Божиею благодатию прославленный. Радуйся, многия скорби и мучения за имя Христово претерпевый. Радуйся, прекрасный плоде древа райскаго, Духом Святым возращенный. Радуйся, избранниче Христов, с Нимже ныне и царствуеши во веки. Радуйся, преподобномучениче Макарие, Переяславский и Каневский чудотворче.

Кондак 2

Видяще любовь твою к молитве и попечение, како угодити Богу, отец и мати и сродники твоя не прещаху, но паче споспешествоваху ти возрастати в разуме Божии и добродетели. И промышлением Божиим тако совершися, яко егда в земли твоей времена тяжкая для веры Православныя насташа, великий подвижник и поборник Тоя явился еси, да вси вернии воспоют Богу: Аллилуиа.

Икос 2

Разум несумненный дарова ти Христос, Божия Сила и Божия Премудрость, егда ты, отче Макарие, Моисею Боговидцу подражая, в годину тяжкую восхотел еси паче страдати с ревнители веры Православныя, неже привременныя греха сладости ради уклонитися ко прелести нечестия; сего ради мы грешнии, похваляюще таковое твое дерзновение по Бозе, умиленно вопием ти: Радуйся, душу твою сохранивый и освятивый ю светом Христовым. Радуйся, крест скорби и терпения за Христа в сердце своем водрузивый. Радуйся, верное и послушное чадо Божие. Радуйся, славный проповедниче Православия. Радуйся, сострадательно внемлющий гласу страждущих. Радуйся, отрадо к тебе притекающим. Радуйся, ухо твое не отвративый от вопля и рыдания страждущих. Радуйся, отверзый сердце твое спострадати скорбем и болезнем угнетенных. Радуйся, преподобномучениче Макарие, Переяславский и Каневский чудотворче.

Кондак 3

Силою Божиею укрепляемый и просвещаемый, пламенне возжелел еси, досточудне Макарие, по кончине отца твоего и матере всего себе вдати Господеви; того ради, славу тленнаго мира всю презревши, притекл еси во Овручскую обитель и тамо чин Ангельский прием, воспел еси Христу Богу: Аллилуиа.

Икос 3

Имея попечение об угождении не людем, но Богу, егда приял еси иноческий чин, блаженне Макарие, мнозе поучался еси в словесех Писания Божественнаго и Святых Отец творений, добре любяй Святаго Златоуста письмена; и был еси удостоен благодати священства и власти поставляти и поучати иноки. Мы же, ведуще веру твою во Христа Спаса пламенну и мудрость великую, ублажаем звании сими: Радуйся, смирения, кротости и воздержания учителю. Радуйся, воине Христов непобедимый. Радуйся, плотския похоти Бога ради умертвивый. Радуйся, пощением и молитвою, трудом и послушанием Богу угодивый. Радуйся, иноков похвало и достойный собеседниче Ангелов. Радуйся, яко тобою благодати Божия вернии исполняются. Радуйся, от юности иноческим обетом предавый Господеви чистое сердце твое. Радуйся, умертвивый похоти и страсти постом и молитвою. Радуйся, преподобномучениче Макарие, Переяславский и Каневский чудотворче.

Кондак 4

Бурю внутрь имеяй помышлений сумнительных, вначале отреклся еси, Макарие, правити обителию Овручскою, обаче егда братия гневахуся на тя и суд Божий представиша ти, аще не восхощеши правити обителию в тяжкую годину искушений и бед, ты, блаженне, предав себе воли Господни, приял власть, поюще со всеми Богу: Аллилуиа.

Икос 4

Слышавше и видевше святое житие твое, понеже наставник великий монахов был еси, учаще оныя, такожде и мирския люди словом и делом, како надлежит во благочестии жити, приходиша к тебе ближнии и дальнии послушати словес твоих и житию добродетельному учитися. Молим тя, блаженне Макарие, научи христианскому житию и нас, грешных, вопиющих ти таковая: Радуйся, сосуде, благодати Божия изобильно исполненный. Радуйся, добрый делателю винограда Небеснаго. Радуйся, мудрый сеятелю благочестия. Радуйся, великий наставниче заблуждших. Радуйся, скорый помощниче страждущим. Радуйся, Ангеле, во плоти миру явленный. Радуйся, стада Христова добрый и кроткий пастырю. Радуйся, яко научивый и сотворивый, и великим нареченный в Царствии Небеснем. Радуйся, преподобномучениче Макарие, Переяславский и Каневский чудотворче.

Кондак 5

Боготечней звезде уподобился еси, отче Макарие, егда, показуя людем путь твердый, ко Господу ведущий, в день, воньже нечестивии агаряне нападоша на град Овруч, ты теплою молитвою, исшед с братиею со святыми иконами, отгнал еси враги от града; и тии возмневше, яко полк зело мног на них ополчися, в бегство обратишася. Чудесно же спасеннии благодарственно воспеша Богу: Аллилуиа.

Икос 5

Видевше тя хранителя тверда веры Православныя, врази твои, книжником и фарисеем древним подобящеся, совет нечестивый сотвориша уловити тя и совратити с пути праведнаго. Посрамлени же быша, дышуще злобою, помышляху всячески о разорении и искоренении обители твоея; вскоре же агаряне, паки нашедше, разориша вконец и обитель твою. И ты, поруган зело, отшел еси подвизатися в Киево-Печерскую Лавру. Таковыя ради твоея ревности о Господе Вседержителе, вопием ти, святе Макарие, сице: Радуйся, поборниче Христов, в мужестве неодоленный. Радуйся, советом нечестивых не покоривыйся. Радуйся, непоколебимый столпе Церкве Христовы. Радуйся, щите веры, притупивый стрелы лукавых. Радуйся, молние, разгоняющая враги видимыя и невидимыя. Радуйся, звездо, путь ко Христу показующая. Радуйся, препоясавый чресла твоя истиною. Радуйся, молением поражающий врагов Церкви Христовой. Радуйся, преподобномучениче Макарие, Переяславский и Каневский чудотворче.

Кондак 6

Проповедницы быша твоего непоколебимаго стояния в вере Христовой иноцы, мирстии и святителие, видяще, яко уподобился еси розе среди шипов невредимо растущей, понеже врази, аще и тщахуся, не возмогоша погубити святости и благоухания в Тебе Божия. Мы же, величающе тя, яко преизящный крин Христов, вопием прославльшему тя Господу: Аллилуиа.

Икос 6

Возсиял еси дивным светом жития твоего и борения за веру Православную, отче Макарие, и сего ради якоже во Овруче граде был еси начальник обители, таковым поставлен был еси и во граде Каневе, и зде паки начаху приходити к тебе ближнии и дальнии учитися, како во Христе жити и зло побеждати со упованием на Господа. Ты же был монахом и мирским, яко отец чадом; и нам, грешным, наставник великий являешися, вопиющим ти: Радуйся, скорбящих и обуреваемых приятное утешение. Радуйся, изнемогающих тихое пристанище. Радуйся, заступниче вдов, сирот, немощных и убогих. Радуйся, защитниче обидимых и гонимых. Радуйся, истиннаго Богопочитания насадителю. Радуйся, яко добрая дела твоя сияют на тверди Небесней. Радуйся, многоценное миро любве Христовы, источаемое независтно всем притекающим. Радуйся, мудрый делателю винограда, егоже насади десница Господня. Радуйся, преподобномучениче Макарие, Переяславский и Каневский чудотворче.

Кондак 7

Хотяй путеводити люди ко спасению, якоже повелевают уставы Церковнии и совесть Христианская, в годину скорби учил еси, отче Макарие, яко скорби нуждни суть нам, еже святый Златоуст рече, понеже скорбьми велики подобает внити в Царство Небесное; ревностию же по Бозе пламенеющи, молил еси сильныя о покровении Церкве Православныя, да вси чада ея воспоют Богу: Аллилуиа.

Икос 7

Новую показа милость рабом Своим Спас мира, Христос Господь, тобою, отче Макарие, егда ты, внимая слезам некия жены благочестивыя, обратил еси ко Господу нерадиваго и неблагонравнаго сына ея, кротце научил онаго творити молитву Господню, и чтение тоя прилежное возроди душу человека сего. Мы же, таковаго ради деяния твоего, умиления исполнени, зовем ти та ко: Радуйся, падающих возводяй любовию ко Христу. Радуйся, заблуждших исправление от путей беззаконных. Радуйся, благодатный врачу немощных. Радуйся, прозорливче Божий, тайная ведый человеческая сердца. Радуйся, мечу, посекаяй всяку неправду и беззаконие. Радуйся, неотступный обличителю грешников духом кротости и милосердия. Радуйся, многих на путь истинный наставивый. Радуйся, вразумление нерадивых и неблагонравных. Радуйся, преподобномучениче Макарие, Переяславский и Каневский чудотворче.

Кондак 8

Странное и славное явление силы Божия видеша на тебе чада Церкве Христовы: твоими бо молитвами слепии прозреваху, бесы изгонишася, болящия от одра возставаху. Того ради мы, прославляюще тя, Макарие, яко Врача душ и телес наших - Христа - вернаго служителя, вопием: Аллилуиа.

Икос 8

Весь был еси помышлением твоим в вышних, сего ради и люди ревностне учил еси, како угождати Богу словесы и делы, грешныя же обличал еси, да покаются; в нихже научил еси жити; благочестно судию некоего, во граде живуща, мздоимца и неправедно суд людем творяща, сему тайно в субботы посылающе пенязи и краткия письмена увещания. И егда уведе от тебе судия, яко последняя отдавши, раскаяние и исправление яви. Молитвами твоими, Макарие, помози и нам к покаянию обратитися, зовущим ти: Радуйся, непрестанное и людех имый промышление. Радуйся, неверных на путь истины приводяй. Радуйся, неправо судящих грозный обличителю. Радуйся, праваго пути светило светозарное. Радуйся, сокровище многообразных дарований Животворящего Духа. Радуйся, человече Божий, грады и веси исполнивый славою добрых дел твоих. Радуйся, неотступный обличителю неправды. Радуйся, ищущий бисеров плодами веры и покаяния. Радуйся, преподобномучениче Макарие, Переяславский и Каневский чудотворче.

Кондак 9

Все естество Ангельское срадуется и свеселится Спасу Христу, зряще тя, блаженне Макарие, данный Ти от Господа талант возрастивша: ты бо, расточая стяжания твоя нищим и убогим, от нетленнаго богатства духовнаго питал еси вся приходившия к тебе, тщася всячески, да отложат вернии ветхаго человека с деяньми его, в новаго же облекутся, обновляемаго по образу Создавшаго его, в разуме поюще Богу: Аллилуиа.

Икос 9

Ветии многовещанныя не возмогут достойно славити дела твоя великая: ты бо еще в житии твоем, Спасу тя прославляющу, удостоен был еси от Господа дара прозрения, еже быти имать в летех грядущих. Тако предрекл еси разорение от врагов града Канева и обители твоея, беды лютыя и смерть многих; и увещавал еси братию николиже отпадати от веры, но верными даже до смерти Христу пребывати. Прославляюще твое о Господе мужество, Макарие, вопием ти: Радуйся, правило веры и ревности благочестивыя. Радуйся, древо, плодами благочестия украшенное. Радуйся, велию власть на диавола от Господа получивый. Радуйся, сподобивыйся от Бога дара прозрения будущих. Радуйся, верных твоих уготовавый ко дню воцарения со Христом в жизни вечней. Радуйся, подвигнувый чада твоя мужески терпети вся за имя Христово. Радуйся, душ наших радование. Радуйся, яко тобою сладостей духовных исполняемся. Радуйся, преподобномучениче Макарие, Переяславский и Каневский чудотворче.

Кондак 10

Спастися и в разум истины прийти всем человеком хотящу Спасу работая, егда час нашествия врагов на землю Украинскую и град Канев уже наста, повелел еси братии уготоватися к исходу от жития сего земнаго пощением и причащением Святых Тайн. Вси же послушавше тебе, воспеша Богу: Аллилуиа.

Икос 10

Стена явился еси братии обители твоея, Макарие, и всем верным во граде Каневе, егда врази сокрушивше врата обители и сокровища монастырския ищуще, изведоша тя вон и поруганию и избиению предаша. Вернии же людие со слезами: Отец наш! Отец наш!, - вопияху гласом. Ты же агаряном нечестивым рекл еси, отче: не на земли, но на Небеси Сокровище мое есть. Врази же злобою на тя ярящеся, отсекше главу твою, отъидоша. Моли о нас, мучениче Христов, да помянет во Царствии Небеснем Спас нас, якоже разбойника благоразумнаго, почитающих страдания твоя и зовущих ти: Радуйся, Господа прославивый подвиги твоими. Радуйся, страстотерпче Христов, молитвою и Крестом мучителей посрамивый. Радуйся, дух твой Господу предавый во глас любве к тебе верных. Радуйся, вольная страдания за Христа претерпевый. Радуйся, уничиженный и поруганный на земли. Радуйся, славою и честию украшенный на Небеси. Радуйся, усекновение главы твоея от агарян приявый. Радуйся, убеливый ризы твоя в крови Агнчей. Радуйся, преподобномучениче Макарие, Переяславский и Каневский чудотворче.

Кондак 11

Пение всеумиленное принесоша ти града Канева обитателие, имже судил есть Господь по отшествии нечестивых агарян живыми остати, егда пришедше на место, идеже стояше сожженный агаряны храм обители, и не нашедше останков сродник своих, обретоша токмо честное без главы тело твое, во власяницу одеяно и со Крестом в руце, и погребению честному предаша на месте, идеже стояше жертвенник, поюще Богу: Аллилуиа.

Икос 11

Светильник горяй и светяй был еси в житии твоем земнем, блаженне Макарие, и таковым и поныне всем верным являвшися, и сие узреша людие Православнии, егда десятилетию минувшу по разорении града Канева, обретени быша честныя мощи Твоя и поставлени в новоустроеннем храме обители, и тамо мнози чудеса источиша; такожде бысть и по пренесении мощей твоих во град Переяславль. Прославляюще тя, отче, яко помощника в скорбех и бедах наших, вопием ти: Радуйся, пресветлый светильниче, возсиявый на тверди Небесней. Радуйся, в немерцающем свете с Господем пребываяй. Радуйся, зрящий Господа Вседержителя на Небеси. Радуйся, унаследовавый вечныя радости в Царствии Небеснем. Радуйся, исцелений благодатный источниче. Радуйся, о спасении душ наших великий молитвенниче. Радуйся, псаломски вопиявый от сих ко Господу: не убоюся зла, яко Ты со мною еси. Радуйся, неверных страх и посрамление, венец исповедника Христова стяжавый. Радуйся, преподобномучениче Макарие, Переяславский и Каневский чудотворче.

Кондак 12

Благодать дарова ти обильную Христос Бог наш, святе Макарие, во еже путеводити люди ко спасению. И ныне источают оную честныя мощи твоя, недугующия душею и телом исцеляя. Поклоняющеся им с верою, вопием ти: Предстательством Твоим у Спаса Христа помози нам, преподобномучениче, благочестно на земли пожити, да и Царствия Небеснаго сподобимся, поюще Богу: Аллилуиа.

Икос 12

Поюще труды и подвиги твоя, преподобномучениче Макарие, прославляем Дивнаго во святых Своих Господа, ублажаем мученическую кончину Твою, и ведуще тя, яко Ангела во плоти на земли, Спасу благоугодивша и вольная страдания на Него претерпевша, и яко заступника великаго пред Престолом Господним за люди Православныя, из глубины души в похвалу тебе вопием: Радуйся, дивное сияние истины Евангельския. Радуйся, великий предстателю бедствующих в море житейстем. Радуйся, благодатный утешителю всех славящих имя твое. Радуйся, скорый послушниче всех с верою призывающих тя. Радуйся, теплый ходатаю у Престола Господня о всех, чтущих святую память твою. Радуйся, Небесный покровителю страны нашея, града и храма, идеже почивают святыя мощи твоя. Радуйся, исповедниче веры во Христа неустрашимый. Радуйся, воине Христов непобедимый. Радуйся, преподобномучениче Макарие, Переяславский и Каневский чудотворче.

Кондак 13

О, пресвятый и пречудный угодниче Христов, преподобномучениче Макарие, приими от нас малое моление сие наше, сердцем и устами в похвалу тебе приносимое, и умоли Христа Бога, да направит нас всемогущею силою Своею к житию праведному, и да удостоит деснаго стояния на Страшнем Судищи Своем, радостно поющих: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)

Молитва святому преподобномученику Макарию

О преславный преподобномучениче Макарие, скорый помощниче и теплый заступниче всех, притекающих к тебе, предстательством своим пред Господом умоли Спаса нашего, да обратит души наша к покаянию и исправлению, да дарует мир отечеству нашему и всей земли и да поможет всем нам твердыми быти в вере Православней и делех благих, да отженет от нас дух злобы и лукавства, и братолюбие вселит в нас, и да приносим во всем житии нашем плоды духовныя: любовь, благость, милосердие, веру нелицемерную, кротость и воздержание, и да, распявше на земли плоть нашу со страстьми и похотьми и духом живуще и ходяще, сподобимся жизни вечныя в веце грядущем, и, райския сладости присно наслаждающеся с тобою и со всеми святыми, прославим Отца, и Сына, и Святаго Духа, ныне, и присно, и во веки веков. Аминь.

Акафист второй

(по машинописному изданию: Акафист святому преподобномученику Макарию, Переяславскому чудотворцу. Полтава, 1970. - 27 с.)

Кондак 1

Избранный от Бога, яко истинный воин Христов, преподобномучениче Макарие, измлада презрел еси всю славу тленнаго мира и сугубо подвизался еси иноческим житием и за веру Православную борением; темже и Христос сподоби тя скончати житие в муках от нечестивых агарян со упованием светлаго безсмертия. Ты же ныне на Небеси молишися о всех с верою прибегающих к тебе, и источаеши нам от Господа многия милости и чудесныя дарования; сего ради благодарственная тебе вопием: Радуйся, преподобномучениче Макарие, Переяславский чудотворче.

Икос 1

Ангелов Творец, вся будущая предведый, избра тя изначала, яко да прославиши житием Твоим пречудное имя Святыя Троицы: ты бо, блаженне, издетска во благочестии воспитан был еси, и еще сущь отрок, уклонялся еси от сверстник свеселитися им, но паче прилежал еже посещати храм Божий и преспевати во учении познанием Православныя веры и пути праведнаго. Мы же, дивящеся сему, похвальная восписуем ти: Радуйся, от лона матерня любовию Божиею уязвленный в сердце твое. Радуйся, измлада побеждавый соблазны мира молитвою и воздержанием. Радуйся, от юности возлюбивый всею душею приближатися к Богу. Радуйся, родителей благих добрый плоде и избранный. Радуйся, прекрасный плоде древа райскаго, возращенный Духом Святым. Радуйся, древо Сада Божия, насажденное Отцем Небесным. Радуйся, древо, при исходищах вод учения Христова насажденное, еже дает плод во время свое. Радуйся, от юности избранный и запечатленный Христом, с Нимже ныне царствуеши во веки. Радуйся, преподобномучениче Макарие, Переяславский чудотворче.

Кондак 2

Видяще любовь твою к молитве и попечение, како угодити Богу, отец, мати и ближния твоя не прещаху, паче же споспешествоваху тебе возрастати в разуме Божии, аки бы предвидя, яко в нашедшую годину скорби великия от гонителей веры Православныя, явлен будеши смотрением Божиим подвижник благочестия и поборник веры, да вси вернии воспоют Богу: Аллилуиа.

Икос 2

Разум благ дарова тебе Премудрость Божия - Христос: в скорби велицей Православных слышан бысть тебе их плач и рыдание, и вопль мног; мнози убелиша ризы своя, яко пролияша за веру кровь свою; друзии же прельщени и отпадшии, восприяша благая в животе своем; но ты, блаженне, от юности возжелел еси, яко древле Моисей, паче страдати с людьми Божиими, нежели имети временную греха сладость. Сего ради умиленно зовем ти: Радуйся, ум суетою не омрачен, но озарен Христом, соблюдый. Радуйся, уха твоего не отвративый от вопля и рыдания страждущих. Радуйся, отверзый сердце твое спострадати скорби и болезни угнетаемых. Радуйся, от юности уготовавый душу твою в искушение. Радуйся, адаманте, прелестьми и умышленьми сатанинскими не уязвленный. Радуйся, неизменно послушливое Церкве чадо. Радуйся, от юности водрузивый в сердце твоем крест скорби и терпения. Радуйся, избравый узкия врата и тесный путь в Царство любве Христовы. Радуйся, преподобномучениче Макарие, Переяславский чудотворче.

Кондак 3

Силою свыше соблюдаем и просвещаем, пламенне возжелел еси по кончине отца и матере, еще юн сый, всего себе вдати Господеви и во имя Его подвизатися иноческим подвигом; сего ради притекл еси в Овручскую обитель, да сподоблен будеши зде прияти иноческий чин; егоже улучив, воспел еси Богу: Аллилуиа.

Икос 3

Имея попечение подвизатися неленостно, и возлюбив поучатися в словесех Божественных и в писаниях Святаго Златоуста, прилежно внимал еси глаголемым от него: монастырь есть дом плача, идеже вретище и сокрушение, идеже уединение, смех ни един, ниже житейских вещей молва, идеже пост, молитва, труд и послушание. Пребывая вседушно во всех сих, не по мнозе времени сподобился еси благодати священства и власти, послежде вскоре и власти наставляти иноков во обителех, яко игумен благоговейн, исполнен веры и мудрости.. Мы же, ублажая тя, глаголем: Радуйся, иноческим обетом предавый Господеви от юности чистое сердце твое. Радуйся, умертвивый похоти и страсти плотския пощением, бдением и молитвою Радуйся, чистое зерцало смирение, кротости и послушания. Радуйся, молитвы благоуханное и неугасимое кадило. Радуйся, иноков похвало и пречудное украшение. Радуйся, ниво добрая, богатно творящая плод Божественнаго семене. Радуйся, Богомыслием и Богомудрием достойный собеседниче Ангелов. Радуйся, сохранивый Купятицкую чудотворную икону Пречистыя Богородицы от врагов веры Православныя. Радуйся, преподобномучениче Макарие, Переяславский чудотворче.

Кондак 4

Бурю имея внутрь помышлений сумнительных, егда братия Овручския обители моляху тя прияти жезл отчий. Укротил еси смиренне волны и ветры страхом Божиим и любовию; братия бо глаголаху ти, изначала отрекшуся, яко взыщется от тебе вся согрешения их, аще не восхощеши правити обитель в нашедшую годину великих искушений и скорбей. Тогда убояся суда Божия, и болезнуя скорбию братии, изволи прияти власть, да вкупе с тобою воспевают Богу: Аллилуиа.

Икос 4

Слышавше и видевше житие твое мнози иноки желанием желаху, яко да будеши наставник монахов; ты бо кротце учаше словом и делом, сам искушен быв, увещаваше и братию зло побеждати упованием на Господа, наипаче же назидати себе святыми псалмы, яко и сам сице любяше тожде мудрствовати. Управи молитвами твоими и нас, вопиющих тебе: Радуйся, мудр и желанен наставниче монахов. Радуйся, добрый и кроткий пастырю словеснаго стада Христова. Радуйся, велий наречен в Царствии Небеснем, яко сотворивый и научивый мнозех от малых сих. Радуйся, многажды утесняемый зело, но никождаже отчаяваемый. Радуйся, осиянный немерцающим светом упования, жив во Христе Иисусе был еси. Радуйся, усладивый душу твою Божественными псалмы Псалмопевца Давида. Радуйся, исполненный благодати Божия, сосуд честен в велицем Дому Божии пребывавши. Радуйся, яко духом горящий, в трудах Господних усердный делатель явился еси. Радуйся, преподобномучениче Макарие, Переяславский чудотворче.

Кондак 5

Боготечней звезде уподобился еси, блаженне, показуя людем ведущий ко Господу путь твердыя веры: егда агаряне нападоша на град Овруч, ты явился еси велия веры исправление: отверзтым вратом обители изшел еси со святыми иконами, воздев руце к небу, и теплою молитвою и воплем крепким вкупе с братиею возопи ко Господу. Агаряне возомнеша, яко ополчися на них полк зело мног, и внезапу бежаша во ужасе от обители и града. Чудесно же спасеннии благодарственно воспеша Богу: Аллилуиа.

Икос 5

Видевше, яко хранитель еси веры Православныя, честен всем верным, врази ея зле совещаша уловити тя и совратити в прение о вере, но никакоже возмогоша победити тя в прении, отъидоша постыждени, дыша злобою, всяко стужаху обители, яко да разорят и истребят ю. Вскоре агаряне, паки нашедше, предаша град и обитель граблению и разорению вконец: от братии ни един оста, ты же, уничижен до зела и поруган, но не поколеблен, отшел еси в Киево-Печерскую Лавру смиренно подвизатися во иночестве. Почитающе толикия скорби твоя и поношения от врагов, мы зовем ти: Радуйся, непреоборимый поборниче веры Православныя. Радуйся, непоколебимый столпе Церкве Христовы. Радуйся, препоясавый чресла твоя истиною. Радуйся, щите веры, вся разжженныя стрелы лукаваго угашаяй. Радуйся, молние, облистающая и разгоняющая врагов Церкве Христовой. Радуйся, мечу духовный, глаголом Божиим рассецаяй лжу и сплетения неправды. Радуйся, десницею Господнею путеводяй умы и сердца верных. Радуйся, священная главо, венчанная нетленным венцєм поношений и скорбей за веру. Радуйся, преподобномучениче Макарие, Переяславский чудотворче.

Кондак 6

Проповедницы быша твоего непоколебимаго стояния в вере мнози иноцы, миряне и святителие, от нихже архиепископ Лазарь о тебе мудре написа: Яко еси роза среди шипов; сице бо растет она, красуется и благоухает, тако и врази окрест тебе лукавыми кознями не возмогоша в тебе от Бога угасити красоту святости, ниже подавити благоухание Благодати Божией в тебе. Мы же, величая тя, яко преизящный крин Христов, поем дивному во святых Своих Богови: Аллилуиа.

Икос 6

Возсиявый Небесным светом святаго жития и борения за веру, ты паки яко светильник на свещнице поставлен был еси промышлением Божиим начальником обители во граде Каневе. Ту вскоре начала приходите к тебе ближняя и дальняя, яко да примет кийждо по своей потребе духовное дарование от изобильной в тебе благодати Божией. Ты же был всем яко отец чадом, вопиющим ти: Радуйся, скорбящих и плачущих приятное утешение Радуйся, благий и спостраждущий друже угнетаемым и досаждаемым. Радуйся, благословенное пристанище изнемогающим. Радуйся, отче щедрый сирым и убогим. Радуйся, ненадеянных надеяние светлое. Радуйся, многоценное миро любве Христовы, источаемое всем независтное. Радуйся, искусный делателю винограда, егоже насади десница Господня. Радуйся, граде Божий, на верху горы стоящий. Радуйся, преподобномучениче Макарие, Переяславский чудотворче.

Кондак 7

Хотя всех путеводити во спасение, учил еси в годину скорби внимати глаголемым от святаго Златоуста словесем, яко скорбь везде похваляема и приемлема, аки нужная нам по словеси Божию: многими бо скорбьми подобает внити в Царствие Небесное. Обаче ревнуя ревностию Божиею, моляше князей и сильных земли о покровении Православныя Церкве, да вси чада ея воспевают Богу: Аллилуиа.

Икос 7

Новую показа милость рабом Своим Господь, благоволив излияти на тя избыточествующую благодать Свою: се бо сын благочестивыя матере живяше легкомыслием неблагочестно; ты же, преподобне, внимая слезам матере, многочасне и многообразне увещаваше его обратитися ко Господу, но вся быша вотще. Послежде же той рече, яко не хощет многи и велики молитвы творити, ты же кротце советовал, яко да чтет токмо молитву Господню, глаголемую: Отче наш. Умилився нерадивый, послуша словесе твоего, и возродися душа его. Мы же дивящеся сему, зовем ти: Радуйся, падающих возставляяй любовию, яже долготерпит и николиже отпадает. Радуйся, заблуждших исправление любовию, яже не раздражается и не ищет своя си. Радуйся, душ врачу бодрствующий и благодатный. Радуйся, прозорливче Божий, проницаяй сокровенная человеческаго сердца. Радуйся, многих ко спасению наставил еси. Радуйся, рассмотряяй скорби яко наслаждение на пути в Царствие Небесное. Радуйся, душ наших радование. Радуйся, яко тобою сладостей духовных исполняемся. Радуйся, преподобномучениче Макарие, Переяславский чудотворче.

Кондак 8

Странное и славное силы Божией явление видеша в тебе вси вернии: твоими бо молитвами сподобляхуся от Господа чудесных милостей: слепому даровал еси прозрение, исцеляше бесныя, болящия со одра немощи возставляше, и прочия недуги душевныя и телесныя исцеляше, да вси вернии воспевают о тебе Богови: Аллилуиа.

Икос 8

Весь бе помышлением твоим в горних, не оставль и дольних, множайше уча люди пути спасения, грешныя обличая, да покаются. Бе бо во граде судия беззаконный и мздоимец. Не «тому терпя попрание правды, восхотел еси исправити грешника, сего ради часто в субботы посылаше ему неяве, но яко втай, пенязи, прилагая при сем краткое писание: отдаю последняя, пощади мене и себе. Несытое сердце умягчися напоследок: судия раскаяся и нача жити благочестно. Сподоби молитвами твоими обращатися к покаянию и нам, глаголющим тебе: Радуйся, сокровище различных дарований Животворящаго Духа Божия. Радуйся, тепле приявый сердцем твоим непрестанное о людех помышление. Радуйся, святое очистилище нравов. Радуйся, неотступный согрешающих обличителю духом кротости и милосердия. Радуйся, купец Христов, ищущий добрых бисеров покаяния и веры в сердцах человеческих. Радуйся, яко тобою бывает многа радость на Небеси о кающихся. Радуйся, добрый рабе - Христов, в малом бывый верен и над многими поставленный. Радуйся, розго истинныя Лозы - Христа, множайший плод духовный приносящая. Радуйся, преподобномучениче Макарие, Переяславский чудотворче.

Кондак 9

Все естество Ангельское срадуется и свеселится Христу зря тя, приявша от Него таланты в делание, и принесша сугубы таланты. Ты бо, милосерде, стяжания твоя раздаяше убогим и неимущим, от нетленнаго же богатства духа твоего миловаше вся шедшия к тебе; и дарованиями благодати Божией в себе восходя от силы в силу, воспевая Богу: Аллилуиа.

Икос 9

Ветии многовещаннии недоумеют по достонию славити тя, блаженне, мы же токмо верою и любовию дерзаем приносити смиренная славословия тебе и прославльшему тя Господу, от Негоже сподобился еси и чудеснаго дара прозрения будущих: тако предвидел еси прежде многаго времене зельное разорения града Канева и обители, беды многия и смерть многих Православных, вкупе же и твою с ними, паче же прежде страдания предрекши вся сия; увещаваше братию и мирян уготовити души своя ко страданиим, но никакоже отпадати веры даже до смерти. Прославляя твое о Господе мужество и святое ревнование по Бозе, зовем ти: Радуйся, сподобивыйся от Господа во спасение верным провидети и прорещи им беды и страсти. Радуйся, мужественно не убоявыйся ждущих тя зол. Радуйся, псаломски вопиявый от сих Господу: не убоюся зла, яко Ты со мною еси. Радуйся, воодушевивый и чад твоих о Христе темже правилом жительствовати. Радуйся, уподобивыйся апостолу Павлу, яко живый но и присно в смерть предаяйся Иисуса ради. Радуйся, яко учил еси впадающих во искушения не искати благ видимых, но невидимых, вечных. Радуйся, многих верных соблюдый на день совоцарения с Христом в вечней жизни. Радуйся, вельми любимый отец и благодатный учитель миряном. Радуйся, преподобномучениче Макарие, Переяславский чудотворче.

Кондак 10

Спасти хотя вся дарованная тебе чада о Христе, имеяше бо о них усердное помышление, яко добрый пастырь Христов, егда мрак предреченных зол уже огусте над землею и град нача ожидати нашествия нещадных агарян, повелел еси всей братии и послушающим тебе миряном уготовати аки бы к судному дню души своя пощением и причащением Святых и Животворящих Тайн. Вси же, сподобльшеся святаго Причастия, воспеша Богу: Аллилуиа.

Икос 10

Стена еси и прибежище всем к твоему заступленню прибегающим был еси: егда агаряне приближахуся ко граду, обитель прият многих мирян, бежавших страха ради в твой покров; егда же приступиша ко обители агаряне и сокрушиша врата, узреша тя пред враты стояща и имуща крест в руце, другий же на персех, и абие пояша тя, вопрошая злата. Ты же рекл еси: злато мое на Небеси. Изведоша тя из обители, всяко бияше, поношаху; такожде начаша сокрушати железом голени твоя и все тело терзати. Мнозии вернии зряще вся сия, вопияху издалеча: Отец наш! Отец наш! Агаряне слышавше сия, из уст же твоих токмо молитву о имени Иисусове, отсекоша главу твою; паки же, постыждени, потщашася отъити. Вернии же благоговейно взяша нощию честное тело твое и принесоша во храм обители. Мы же, величая страдания твоя, взываем со умилением: Радуйся, воине Христов, вооружен Крестом на враги видимыя и невидимыя. Радуйся, мысленно с молитвою сораспныйся Христу, Его же Крест крепко держасте руце твои. Радуйся, страстотерпче, притупивый молитвою и Крестом жало мучений. Радуйся, страдавый и предавый Господеви дух твой во гласе любве к тебе верных. Радуйся, приятый Господом, яко всеплодие жертвенное и непорочное. Радуйся, посрамивый мучителей злобу и ухищрения диавольская низложивый. Радуйся, усекновенный на земли, но возглавленный на Небеси. Радуйся, земли изгнанниче, пришедый на Небеса во своя си. Радуйся, преподобномучениче Макарие, Переяславский чудотворче.

Кондак 11

Пение похвальное приносим тебе, пречудне: Господь бо светлейше прослави тя в житии твоем, во блаженней кончине и абие по кончине: еще не погребенну бывшу телу твоему честному, агаряне возвратишася во обитель, но храм обретше заключен, и в нем мнозех верных, обложиша его древом окрест и сожгоша; последи же оставшиися во граде и весех Православнии пришедше искаху в пепле своя ближняя, но вся телеса быша зело пожжена, точию твое честное тело, отче преблаженне, обретеся неврежденно огнем, аки живое, без отсеченныя главы, но со крестом в руце, с другим же на персех и во власянице. И ту священныя останки твоя вернии погребоша на месте жертвенника, воспевше Богу: Аллилуиа.

Икос 11

Светило благосветлое еси, отче Макарие, сияющее в Церкве Христовей, в велицем сонме свидетелей веры, яко един от них. Егда во обновленнем по десятих летех храме обители обретеся священный гроб твой, и в нем нетленныя святыя мощи твоя, абие начата к сим стекатися мнози, чтуще, покланяющеся и молящеся о помощи; такожде и по пренесении святых мощей во град Переяслав, благоговейно чтущим их с верою и усердно молящимся, ты подавши от Господа скорую и чудесную помощь, исцеляя расслабленныя, бесныя, болящия трясявицею, падучею, водною болезнью, и прочими тяжкии недуги, врачуя многи душевныя и телесныя болезни. Сего ради мы, благодаряще, взываем: Радуйся, прореченный именем твоим, воистинну блажен и преблажен, яко зриши на Небеси лицем к лицу Бога Всеблаженнаго. Радуйся, яко зрящи Господа, услаждаешися радостями, яже на сердце человеку не взыдоша. Радуйся, друже Христов, вшедый в Чертог Жениха Христа во одежде добродетелей светлых, кровию твоею преукрашенный. Радуйся, мучениче святый, предстояй Господу в сонме мучеников, кровьми Церковь Христову украсивших. Радуйся, сретенный на Небеси ликом Ангелов, срадующихся тебе. Радуйся, исповедниче веры, завещавый нам отчий завет твой николиже отпадати от веры. Радуйся, неусыпающий молитвенниче, благоуветливый заступниче и скорый помощниче в напастех и немощех наших. Радуйся, непреходящая славо и похвало отечествия нашего. Радуйся, преподобномучениче Макарие, Переяславский чудотворче.

Кондак 12

Благодать преизбыточествующую дарова тебе Господь, во еже просвещати и путеводити нас грешных и смиренных ко спасению, помогати нам в бедах и немощех наших, сего ради и мы пламенно молимся тебе: помогай нам, милосердный отче, соблюсти вседушно заповеди Христовы, якоже ты делал еси, и крепко хранити завет твой стояти в Православии, якоже и ты непоколебимо стоял еси, да в радости вопием спасающему нас Богу: Аллилуиа.

Икос 12

Поюще прославленнаго тобою и дивно прославляющего святых Своих Господа, поминаем во исповедании сердечнем вся милости и щедроты Его, яже подана быша и подаются нам тобою молитвами твоими за нас. Твое святое житие, блаженная кончина и прославление от Господа суть знамения и явления Духа Святаго, сущаго в Церкви Христовей: свята сия и воистинну Духом Божиим живет, аще раждает и возращает таковых славных и великих подвижников веры, яко ты еси, отче преблаженне: се велия милость Божия нам грешным и недостойным, и мы благоговейно и радостно зовем тебе велиим гласом: Радуйся, яко подвигом добрым подвизался еси, течение скончав, веру соблюл еси, сего ради восприял еси венец правды от Господа. Радуйся, неусыпный страже Дома Божия, хранивый его от вхождения лжи и хищений. Радуйся, страдальче за веру Православную, доблестно рекший врагам ея: вы остависте свет и возлюбите тьму, мы же стоим во своей вере, дондеже мир стояти будет. Радуйся, победною почестию одеян, светильник вселенныя и незаходимое светило Церкве Православныя. Радуйся, доброзрачное света Евангельскаго лучезарное сияние. Радуйся, яко пред святыми мощами твоими неоскудно возносится во славу Господа благоуханный фимиам молитв и излияний сердца человеческаго. Радуйся, Небесный покровителю храма нашего, освященнаго во имя твое, преподобне. Радуйся, яко предстоиши Престолу Пресвятыя Троицы и тепле о нас ходатайствуеши. Радуйся, преподобномучениче Макарие, Переяславский чудотворче.

Кондак 13

О, святый преподобномучениче Макарие, приими ныне наше моление сие малое, в похвалу тебе возносимое, и благоприятными молитвами твоими умоли Господа нашего Иисуса Христа, по велицей Его милости избавити всех нас вечныя муки и сподобити Царствия Небеснаго, да вси радостно вопием Богу: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)

Молитва святому преподобномученику Макарию

О, всехвальный, преблаженный, многострадальный, преизящный, предивный чудотворче, преподобномучениче Макарие, скорый наш помощниче и теплый заступниче, духовнаго воинства Христова доблественый страдальче, вся враги душевредныя победивый! К тебе, яко истинному чудес источнику, мы грешнии припадающе, усердно молимся: помози, угодниче Божий, нам грешным и унылым в настоящем сем житии: умоли Господа Бога даровати нам оставление грехов наших, елико согрешихом от юности нашея во всем житии нашем, делом, словом, помышлением и всеми нашими чувствы: и во исходе душ наших помози нам окаянным, умоли Господа Бога, всея твари Содетеля, избавити нас от воздушных мытарств и вечнаго мучения, да всегда прославляем Отца и Сына и Святаго Духа, и твое милостивное предстательство, ныне и присно и во веки веков. Аминь.

Тропарь, глас 8:

Ко всечестному образу твоему, преподобномучениче Макарие, мы, грешнии, со умилением притекающе, дар исцеления приемлем: ты бо присно источаеши болящим здравие, печальным утешение, и всех чтущих тя всякое исполнявши требование, молящеся Христу Богу спастися душам нашим.

Кондак, глас 2:

Постническое и равноангельное житие твое страдальческими уяснил еси подвиги, и Ангелом совсельник явился еси, Богоблаженне Макарие, с ними Христу Богу моляся не престай о всех нас.

Величание:

Ублажаем тя, святый преподобномучениче Макарие, и чтем святую память твою, наставниче монахов и собеседниче Ангелов.

Источники:

Икона - православный календарь (http://www.days.ru/Images/ii1405&253.htm)