Акафист преподобной матери нашей Марии Египетской

Кондак 1
Избранной от Господа во образ спасения всем грешным и отчаянным, из глубины греха востекшей на высоту безстрастия, похвальная пения приносим ти, мати преподобная, ты же, яко имея дерзновение к щедрому Богу, молитвами твоими настави на стезю твоего покаяния любовию тебе зовущих: 
Радуйся, чудо милосердия Божия, Марие равноангельная.

Икос 1
Ангела во плоти узрев тя в пустыни Иорданской великий Зосима, на воздусе стоящую и о мире молящуюся, со удивлением и ужасом одержим весь трепетом быв, слезами обливаяся, вопияше тебе таковая:
Радуйся, благодати и света исполненная.
Радуйся, прозрения даром украшенная.
Радуйся, в молитвах твоих к Богу на воздусе вземлемая. 
Радуйся, пустынное сокровище, от мира утаенное.
Радуйся, безплотных сожительнице.
Радуйся, Духа Святаго селение.
Радуйся, чудо милосердия Божия, Марие равноангельная.

Кондак 2
Видяще старца благоговейнаго ужаса исполнена, тихим гласом рекла еси тому преподобная: не бойся, авво Зосимо, несмь дух, но земля, прах, и пепел, и всячески плоть, ничтоже духовное когда помыслившая и ни единыя добродетели имущая. Жена есмь грешница, недостойная взирати на небо, и со страхом грешными усты зову Богу: Аллилуиа.

Икос 2
Разумети ищя дивную тайну, в тебе сокровенную, старец паде пред ногама твоима, глаголя: заклинаю тя именем Господа нашего Иисуса Христа, Егоже ради наготу носиши сию, не скрый от мене жития твоего, да величия Божия яве сотвориши. С нимже и мы дерзаем ублажити тя сице: 
Радуйся, смирения светлая высото.
Радуйся, дарований духовных богаство неисчерпаемое.
Радуйся, любве ради Божия тело свое умертвившая.
Радуйся, в пустыни непроходней едина, с единым Богом пребывшая.
Радуйся, райскою красотою сияющая.
Радуйся, безстрастия светом озаренная.
Радуйся, чудо милосердия Божия, Марие равноангельная.

Кондак 3
Силою Вышняго укрепляема, исповем ти, человече Божий, грехи и беззакония моя, - отвещала еси Зосиме, - стыжуся, отче, прости мя, но понеже тело мое наго видел еси, обнажу ти и дела моя, обаче молю тя первее: не бежи от мене, не терпя слышати безместная, яже аз содеях; но милосердствуя о мне, молися за мя, блудную, и Богу невозгнушавшуся мною зови: Аллилуиа.

Икос 3
Имея милосердие неизреченное, с мытари и грешники вечерявый, Той и мне, в глубину погибели падшей, простре руку Свою божественную, егда бо возжелах аз внити в храм Господень, некая сила возбрани ми вход, сердца же моего коснувыйся свет разума показа ми тину дел моих и начат плакатися о гресех, в перси биющи и горько рыдающи, мы же, покаянию твоему веселящеся, пение приносим ти сицевое:
Радуйся, яко нощи прешедшей возсиявает ти заря спасения.
Радуйся, яко глас Христов призывает овча заблуждшее от дебрей далеких греха.
Радуйся, яко слезными токи омываеши вся твоя скверны.
Радуйся, яко слезами твоими очищаеши одеяние души твоея.
Радуйся, яко Отец щедрот объятия Своея любве тебе отверзает.
Радуйся, яко ведый твоя тайная рукописания грехов твоих раздирает.
Радуйся, чудо милосердия Божия, Марие равноангельная.

Кондак 4
Бурею скорбных помыслов одержима, узрела еси во угле притвора церковнаго икону Причистыя Богоматери и, стеня, воззвала еси к Ней: повели, о Владычице, да и мне, недостойной, отверзутся божественныя входы, и буди Ты ми Споручница, яко егда узрю Крест Сына Твоего, мира и яже в мире отвергуся и изыду, аможе Ты повелиши мне, зовущи Богу: Аллилуиа.

Икос 4
Слышавше глас издалеча глаголющь: аще Иордан прейдеши добре покой обрящеши, на колена падши пред Приснодевою, рекла еси: о Владычице! Не гнушается девственная чистота Твоя моея недостойныя молитвы, буди мне спасения учительница, руководствующая на путь покаяния! Тем убо Ангели Божии, написующе исповедание твое, возглашаху тебе в той час сицевая:
Радуйся, от тмы греха к чистому свету покаяния преходящая.
Радуйся, неистовство страстей и любовь плотскую отринувшая.
Радуйся, вся узы и сети врага растерзавшая.
Радуйся, тяжкое бремя студныя работы диавола во благое и легкое иго Христово пременившая.
Радуйся, от смерти греховныя к вечному животу возстающая.
Радуйся, от врат погибели к вратам рая восходящая.
Радуйся, чудо милосердия Божия, Марие равноангельная.

Кондак 5
Богосветлыми лучами благодати просвещает тя Прествятая Дева, Та бо споручница грешных к Богу сущи, отверзает тебе двери милосердия Божия и врата храма святаго, в оньже внитши, со многими слезами поклонилася еси Живоносному Древу, имже мир спасен бысть, и распеншемуся Господу, Кровь Свою за твое избавление излиявшему, благодарственно воспела еси: Аллилуиа.

Икос 5
Видев тайны Божия и како готов есть приимати кающихся, всехвальная Мария, воззвала еси всем сердцем: Владычице Богородице! Не остави мене! – и устремилася еси в пустыню об он пол Иордана, мы же, почитая бегство твое, сретаем тя пении сими:
Радуйся, яко всепрощающею любовию Спаса уранися сердце твое.
Радуйся, яко сокровище благодати, тобою приятое, потщалася еси сокрыти в пустыни.
Радуйся, яко мира греховныя сладости скоротечно и невозвратно отбегла еси. 
Рабуйся, яко бегством твоим демоны огнем попалила еси.
Радуйся, яко тем бегством небеса возрадовала еси.
Радуйся, чудо милосердия Божия, Марие равноангельная.

Кондак 6
Проповедуеши всем падшым и отчаянным, всечестная, Божие человеколюбие и силу покаяния, како грешную душу омывает, очищает, светлит и возводит горе и веселие творит Ангелом Божиим, с нимиже и мы бренными усты зовем: Аллилуиа.

Икос 6
Возсия мирови от пустыни Иорданской свет великих подвигов твоих, Марие приснославная, многия бо лета, аки адамант тверд и столп непоколетим, пребыла еси, яко со зверьми лютыми, с похотьми твоими борющеся и оружием креста отражая разжженныя стрелы лукаваго, сего ради дивящеся пачеестественному терпению твоему, любовию зовем ти:
Радуйся, яко злострадания и труд в пустыни четыредесять осмь лет понесла еси.
Радуйся, яко солнечнаго зноя опаление, наготу и мраз нощный претерпела еси.
Радуйся, яко гладом и жаждою истаявала еси.
Радуйся, яко всякое пожелание плоти конечно умертвила еси.
Радуйся, яко в борьбе со грехом, в тебе живущим, до крове подвизалася еси.
Радуйся, чудо милосердия Божия, Марие равноангельная.

Кондак 7
Хотя препятие сотворити твоему светлому к небеси шествию, всеблаженая, исконный враг рода человеческаго не престаяше влагати ти помыслы нечистыя, огнь греховный в удесех твоих разжигая и предлагая тебе на память прежняго жития твоего, ты же, многострадальная, повергалася еси на землю, слезами обливаяся и призывая в помощь Приснодеву, и не воставала еси от земли день и нощь дондеже сладкий свет осияваше тя, воздвизая благодарственно пети Богу: Аллилуиа.

Икос 7
Новый человек, по Богу созданный, явилася еси преподобная, умертвив бо всеконечно ветхаго человека, во Христа облеклася еси всечудная, седмьнадесят лет безчисленныя беды пострадах: Зосиме рекла еси, оттолеже и до днесь сила Божия грешную мою душу и тело смиренное соблюде, приими убо и от нас, недостойных, похвалы сицевыя:
Радуйся, яко умертвила еси страстей взыграния.
Радуйся, яко самое естество победила еси.
Радуйся, яко всякий грех от души и плоти твоея потребила еси.
Радуйся, яко в сердце и умерщвленных удесех твоих носиши Иисуса, тобою любимаго.
Радуйся, яко облеклася еси в одежду веселия духовнаго,
Радуйся, яко вошла еси в вечный покой Сына Божия.
Радуйся, чудо милосердия Божия, Марие равноангельная.

Кондак 8
Странное и преславное изменение твое, преподобная, видяще, демонов темныя полки горько рыдаху, вся же силы небесныя радостию играюще, песнь Христу воспеваху, прославляюще Божие милосердие, грехами людскими непреодоленное, велиим гласом зовуще: Аллилуиа.

Икос 8
Вся была еси в Бозе, Марие всебогатая, егда Зосима, обходя пустыню, видетя тя сподобися. «Заклинаю тя, отче, Спасителем Богом, да никомуже речеши, яже слышал еси от мене, дондеже Бог от земли возмет Мя», - вещала еси тому: ныне с миром отидиши, в посте же грядущаго лета причасти мя Святых Христовых Таин на брезе Иорданстем, то рекши, аки горлица пустыннолюбивая и неудержимая, от очию старца скрылася еси, той же поклонився до земли и целова место, идеже стоясте стопы ног твоих, зовый таковая:
Радуйся, яко обнажившися студа греховнаго, паче снега убелилася еси.
Радуйся, яко паче лучей солнечных просветилася еси.
Радуйся, яко вся грехи твоя забвенны и прощенны суть у Бога.
Радуйся, яко часть твоя со святыми.
Радуйся, яко первее блудница, днесь невеста Христова сотворилася еси.
Радуйся, чудо милосердия Божия, Марие равноангельная.

Кондак 9
Всяк помысл и ум ужасают болезни твоя, всехвальная, како труд пустыни любве ради Божией претерпела еси, взываше превеликий во отцех Зосима, рыдая: О мати духовная! Ты Богу приблизилася еси, хотел бых, аще бы можно было, во след тебе ходити и зрети честное лице твое и купно с тобою немолчно пети: Аллилиуиа.

Икос 9
Витийство земнородных не довлеет достойно похвалити твоя подвиги, всечестная, кто же доволен изрещи слезныя токи, яже пролияла еси в молитвах к Богу! Кто болезни твоя изочтет, кто исповесть всенощныя бдения, борения и тесноту жития твоего, пустыню всю чудесы просветивши, яко солнце, просияла еси, всечудная, тем убо молим тя: озари лучами света твоего наши сердца и испроси оставление грехов всем вопиющым тебе таковая:
Радуйся, помраченный образ Божий в светлости велицей в себе возобразившая.
Радуйся, небесными ароматы благоухающая.
Радуйся, звездами чудес украшенная.
Радуйся, лучами добродетелей сияющая.
Радуйся, величия Божия всем концем земли благовествующая.
Радуйся, небо и землю к пению славы Господа твоего призывающая.
Радуйся, чудо милосердия Божия, Марие равноангельная.

Кондак 10
Спасителя Бога животворящее Тело и Кровь вземше, в день таинственныя Христовы вечери, авва Зосима, по завещанию твоему, в вечер зело поздень изыде на брег Иордана, неуклонно в пустыню лунным светом осияваетую зря, и молящеся к Богу, глаголя: покажи ми, Господи, сокровище Твое, еже в пустыни сокрыл еси! Покажи ми ангела во плоти, да не отиду тощь, нося моя грехи на обличение, но, да радуяся, зову Тебе: Аллилуиа.

Икос 10 
Стену непроходну мысляше старец быти Иордану реце, между ним и тобою, преподобная: обаче ты, став на одной стране реки, знамением крестным Иордан знаменала еси и купно с тем знамением взошла еси на воду: Зосима же, видев идущу тя к себе верху воды, ужасеся и радостию вопияше тебе:
Радуйся, горнаяго рая Божия обитательнице.
Радуйся, яко тварь повинуется велению твоему.
Радуйся, яко волны стелятся под честныя нозе твои.
Радуйся, яко Иордан тебе служит, луна и звезды небесныя дивятся святыни твоей.
Радуйся, силы Божией дивное проявление.
Радуйся, храм одушевленный Бога живаго.
Радуйся, чудо милосердия Божия, Марие равноангельная.

Кондак 11
Пение подобаше тебе приностити всемогущему Богу, авво, по воде шествующе рекла еси тому: что твориши священник сый, како дерзаеши кланятися мне, убозей, сам носяй страшныя Тайны Христа Бога! Имже верою и любовию, прах и земля покланяющися, со страхом зовуще: Аллилуиа.

Икос 11
Светом небесным блистаяся, причастилася еси Божественных Таин и радости премирныя исполнися, на небо руце воздевши, рекла еси: ныне отпущаеши рабу Твою, Владыко! Обращся к старцу, вещала еси: прости, авво Зосимо! В грядущее же лето узриши мя паки в пустыни, якоже хощет Господь, моли Его о мне, отче мой, моли, поминая всегда мое окаянство. И паки Иордан знаменавши, прешла еси верху той воды, старец же, не смея надолзе держати тя, стеня и рыдая, взываше в след тебе таковая:
Радуйся, мертвость Иисуса в теле носящая.
Радуйся, воскресения Его славою сияющая.
Радуйся, благодатию, яко ризою света, облеченная.
Радуйся, яко ангели Божии дивятся чистоте твоей.
Радуйся, яко силы адския ужасаются и трепещут от славы твоея.
Радуйся, светозарная обитель Всесвятыя Троицы.
Радуйся, чудо милосердия Божия, Марие равноангельная.

Кондак 12
Благодатию Божественною окриляема во един час долготу пустыни прешла еси и в нощь спасительныя Христовой стрвсти, по причащении Божественныя Тайныя вечери, сном святым уснула еси, о мире моляся, дух твой Господу предала еси, Емуже со ангелы в неисповедимой радости завеши ныне: Аллилуиа.

Икос 12
Поюще надгробное пение богомудрый Зосима, нозе твои честныя слезами омываше, и много молився тебе, покрыв тело твое землею, наго сущее и ничтоже имеющее, точию ветхую мантию, юже исперва тебе даде, радостию и страхом многим одержим, величию Божию дивяся, стояше зовый к тебе таковая:
Радуйся, яко чадо света сущи прешла еси к Свету невечернему.
Радуйся, яко дух твой с веселием прияша селения святых.
Радуйся, яко тело твое упокоися в могиле, юже лев от пустыни тебе ископа.
Радуйся, яко тобою показа мне Господь, колико отстою от меры совершенства.
Радуйся, о всем мире к Богу ходатаице.
Радуйся, постников высото, преподобных славо страдальцев красото.
Радуйся, чудо милосердия Божия, Марие равноангельная.

Кондак 13
О преподобная мати, богоблаженная Марие! Приими от нас ныне приносимое тебе моление и, Свету неприступному предостоя, молися всещедрому Богу, да милостив быв, ниспослет светозарную благодать покаяния всем заблуждшым чадом небеснаго Отца и от греха к отеческому дому востекших в райских селениих сподобит вкупе с тобою во веки благодарственно пети Ему: Аллилуиа, Аллилуиа, Аллилуиа.
Трижды, затем Икос 1 и Кондак 1.

Молитва преподобной матери Марии Египетской
О равноангельная и всесветлая Марие преподобная, убелившая ризу души своея в Крови Агнчей и зраящая ныне на небеси невечерний свет Царствия Небеснаго Христова, помяни мя, грешнаго и убогаго раба твоего, в Богопроиятных твоих к Богу молитвах и защити мя от ловления врага, веси бо его козни и лютую в сем житии на ны брань, даруй ми слезы покаяния, омывающе душевную мою скверну, испроси ми оставление грехов и жития исправление, избави мя от злых моих обычаев, лености и нерадения, научи мя постоянству и крепости в борьбе с моими греховными навыками, напечатлети в сердце моем и уме пресветлый образ тобою любимаго Христа, уязви мою душу Его всепрощающею любовию, да не оскорблю милосердие Его новыми грехами, умоли о мне и милостивую споручницу твою, Пречистую Деву Богородицу, да и мне, недостойному, дарует всесильную Свою помощь и наставит на стезю спасения, во исходе же от сего мира, о мати преподобная, сподоби мя причащения Святых Божественных Таин: в страшный час смерти помози, на воздушных мытарствах заступи и предстательством твоим отверзи ми двери Небеснаго Царствия, идеже по трудех и подвизех ныне водворяешися, зря и прославляя пресладкаго Искупителя твоего, пришедшаго в мир грешныя спасти и Божествееною Своею Кровию омывающаго нас от всякаго греха. Емуже слава, честь и поклонение со Безначальным Его Отцем и Пречистым и Животворящим Духом в безконечныя веки. Аминь.

Молитва Господу нашему Иисусу Христу
Господи, согрешихом на небо и пред Тобою! Приими обращение и покаяние наше, приими наше стенание и вопль наш даже до смерти, приими нас, окаянных, живших безстудно, приими нас, Владыко, проведших всю жизнь в распутстве и во всяком лукавстве и нечистоте, приими нас и не воздай нам по делом рук наших. Господи! Обрати нас! Господи, вразуми нас! И не прогневайся на нас! Но буди милостив ко грехом нашым. Подаждь нам, Господи, Твою крепкую руку, яко Петру утопающу, и возведи к вечному пристанищу: к Тебе прибегаем, Сыне Божий, Тя исповедуем и в руце Твои жизнь нашу предаем, яко Ты еси упование наше крепкое и спасение несомненное, и Тебе славу возсылаем, со Безначальным Твоим Отцем и Всесвятым и Животворящим Твоим Духом, ныне, и присно, и во веки веков. Аминь.

Молитва Божией Матери
О Пресвятая Владычице моя Богородице, Небесная Царице, спаси и избави мя, грешнаго раба Твоего, от напрасныя клеветы, от всяких бед, и напасти, и внезапныя смерти. Помилуй мя в дневных часех, и в утренних, и вечерних, и во всякое время сохрани мя: стояща, сидяща, соблюди и на всяком пути ходяща, и в нощных часех спяща - снабди, покрый и заступи, защити мя, Владычице Богородице, от всех враг моих, видимых и невидимых, и от вякаго злаго обстояния на всяком месте и на всякое время, буди ми, Мати Преблагая, необоримая стена и крепкое заступление всегда и во веки веков. Аминь.

По благословлению Блаженнейшего Владимира, митрополита Киевского и всея Украины

Общество любителей православной литературы 
Издательство имени святителя Льва, папы Римского
Киев 2002