Кондак 1

Избранная по предуведению Божьему, угоднице Христова, преподобная мати наша Марие! Прославляюще Господа Славы, давшего в тебе всему роду христианскому крепкую заступницу и молитвенницу, в бедах помощницу и утешительницу, похвальное возносим ти пение; Ты же, яко имуще ко Господу велие дерзновение, от всяких бед, зол и болезней свобождай нас, с любовию тебе зовущих:
Радуйся, святая преподобная мати наша Марие, мученице Христова и наставнице богомудрая!

Икос 1

Ангелов собеседнице и человеков наставнице воистину явилася еси, святая преподобномученице Марие, благоволением всех Творца Христа Бога нашего, Ему же усердно послужила еси от юности и за Него же претерпела еси страдания многообразныя и кончину мученическую; Ныне же престолу Вседержителя со всеми святыми предстоиши, отраду и вспоможение даруеши всем, с верою и любовию вопиющим ти сице:
Радуйся, в небесней славе Ангелом уподобившаяся;
Радуйся, к лику апостолов, яко словом и делом Христа благовестившая, сопричтенная;
Радуйся, в сонме мучеников, яко Христа ради претерпевшая, восприятая.
Радуйся, в собрании исповедников саном исповедничества почтенная;
Радуйся, благ преподобных от века уготованных наследия удостоенная;
Радуйся, со всеми святыми Богу угодившими участие обретшая;
Радуйся, мудрая страннице, Отечества горняго искавшая;
Радуйся, Царствия Небесного общнице и обладательнице являющаяся;
Радуйся, святая преподобная мати наша Марие, мученице Христова и наставнице богомудрая!

Кондак 2

Видяще нашими очесы величие духовныя красоты и премудрости твоея, богоблаженная мати наша Марие, мы, яко земнии, удивлением, радостию и благодарением ко Творцу всяческих исполняемся, зовуще: Аллилуиа.

Икос 2

Разум озаренный благодатию Божиею от дней детства твоего стяжала еси, угоднице Христова, от юности бо хранила еси в сердце твоем закон Христов, великим угодником Божиим, прошедшим тернистым путем во Царствие Небесное, подражая. Темже и мы, уповая на твое предстательство, молимся: буди нам скорая помощница и покровительница в земном житии нашем, да благодарно вопием ти:
Радуйся, града Анапы доброплодное прозябение;
Радуйся, рода честнаго отрасле прекрасная;
Радуйся, чадо молитвы родителей благочестивых;
Радуйся, надеждо и утешение сердец их боголюбивых;
Радуйся, чистоту душевную свято оберегавшая;
Радуйся, дом Духу Святому себе сотворившая;
Радуйся, сердцем твоим Единому Христу служити вожделевшая;
Радуйся, Предвечному Отцу Небесному угодившая;
Радуйся, святая преподобная мати наша Марие, мученице Христова и наставнице богомудрая!

Кондак 3

Сила Христова осени тя, преславная Марие, и дарова ти крепость мужественнее претерпети искушения врага невидимаго, его же стрелы разженные угасила еси твоими слезными к Богу молитвами ныне же убо, причащаяся славы небесныя со всеми новомученники российскими, предстоиши Христу – Царю Славы, воспевая: Аллилуйя!

Икос 3

Имущи угоднице Христова свыше данную себе мудрость, яко драгую жемчужину в души своей Христа сохраняла еси, во всем Ему благоугождая. Мы же, верою твоею укрепляемы и материнским попечением твоим окормляемы, со умилением зовем ти:
Радуйся, в помрачении страстей пребывающих просветительнице;
Радуйся, в суете и самозабвении жительствующих вразумительнице;
Радуйся, в недоумении и заблуждении сущих руководительнице;
Радуйся, добре жити начинающих управительнице;
Радуйся, малодушием и унынием колеблемых укрепительнице;
Радуйся, в небрежении спящих возбудительнице;
Радуйся, бодрости и трезвения предобрая учительнице;
Радуйся, чистаго и непорочнаго жития неусыпающая хранительнице;
Радуйся, всех ко спасению верная путеводительнице;
Радуйся, святая преподобная мати наша Марие, мученице Христова и наставнице богомудрая!

Кондак 4

Буря искушений и устремлений диавольских не возможе поколебати храмины твоея душевныя, святая мати наша Марие, основана бо бе на твердом камени веры во Христа, и хранима трезвением и молитвами непрестанными, ими же выну противоборствовала еси врагу спасения человеческаго, и непреткновенно восходила еси по стезям добродетелей к совершенству духовному в меру возраста Христова, радостно воспевая Богу: Аллилуйя.

Икос 4

Слышав словес божественных премудрость, ко благочестию устремлялася еси, угоднице Христова, уразумевши бо суету мира сего, избрала еси едино души твоей на потребу еже благоугождати Богу и свято и праведно ближним служити, тем же претерпела еси изгнание купно с супругом своим и терпением в перенесении тягот изгнания душу свою в терпении и уповании на Бога утвердила еси. Таковому смирению твоему удивляяся, вопием ти:
Радуйся, навыкнувшая хранити страх Божий, премудрости начало;
Радуйся, всем учащимся у тебе бывшая добродетелей зерцало;
Радуйся, многия скорби от врагов страны твоея претерпевшая;
Радуйся, в скорбях сих яко злато в горниле очистившаяся;
Радуйся, от тягот изгнания в уныние не впавшая;
Радуйся, во изгнании крепость духа сохранявшая;
Радуйся, тихий свет любве на всех обильно изливaвшая;
Радуйся, множество людeй окрест себе спасaвшая.
Радуйся, яко тобою ум наш в Богомыслии научается;
Радуйся, яко тобою мрак неведения прогоняется;
Радуйся, святая преподобная мати наша Марие, мученице Христова и наставнице богомудрая!

Кондак 5

Боготечная звезда всем христианам страны гальския явилася, еси, святая мати наша Марие, благочестивым житием на покаяние, на путь несения креста смиренно наставляя. Мы же, верою узревши спасительность смирения и кротости на пути Христовом, с радостию вопием Господеви: Аллилуиа.

Икос 5

Видя суету сует, прошедше путь жития в миру благочестиваго, и разумея, яко «прилеплятися Богови благо есть» богомудрым святителем Евлогием наставляема, потщилася еси всех видимых благ отрищитися и пострижение монашеское прияти сподобилася еси, путем древних и новых подвижников благочестия следуя в трезвлении и богомыслии усердно подвизалася еси, богомудрая Марие, подвиг внутренний с делами милосердия умело сопрягая. Тем же и мы, зряще духовное восхождение твое от силы в силу, тако с благоговением взываем ти:
Радуйся, в служении Богу дарованные ти таланты зело умножившая;
Радуйся, словом мудрым всех приходивших к тебе питавшая;
Радуйся, в мире тварнем десницу Творца созерцавшая;
Радуйся, от красот дольных к лепоте горней воспарявшая;
Радуйся, от вражды к друг другу христиан отвращающая;
Радуйся, к земным богатствам сердцем не приляптися научающая;
Радуйся, от похоти себялюбия нас благодатно исцеляющая;
Радуйся, за вся Творца благодарити нас подвизающая;
Радуйся, святая преподобная мати наша Марие, мученице Христова и наставнице богомудрая!

Кондак 6

Проповедует Святая Церковь подвизи и труды твоя, богоносная мати наша Марие, яко о славе Божией и о спасении всем возвещала еси, о благодатном пламенении души твоея, житием твоим благовествующе, научающе тем благочестивыя христиане благодарственно пети Господу: Аллилуиа.


Икос 6

Возсия в боголюбивей души твоей, мати Марие, свет истиннаго боговедения; ты бо, благодатию Божественною просвещаемая, заповеди Христовы о любви к Богу и ближнему со усердием радостно исполняла еси Мы же, сие ныне поминающе, молим тя, святая преподобномученице, озари и нас лучами добродетелей твоих и милостиво приими величания сия:
Радуйся, образ и подобие Божие в ближнем возлюбившая.
Paдyйcя, все твое утешение и блаженство в нищете духовней положившая;
Paдyйcя, всецело упование твое на Промысл Божий возложившая;
Paдyйcя, pyбищa, аки драгоценныя yкpaшeния выну носившая;
Paдyйcя, за Христом Распятым в житии твоем последовавшая;
Paдyйcя, одежды и крова лишенным в недрах милосердия Божия покров и убeжищe открывающая;
Радуйся, алчущих и гладствующих милостивая кормительнице;
Радуйся, скорбной нищете сущих всещедрая обогатительнице;
Радуйся, святая преподобная мати наша Марие, мученице Христова и наставнице богомудрая!

Кондак 7

Хотяще невозбранно духом в Горные селения возноситися, пречудная мати Марие, в бушующем мире душею надмирно пожила еси, подвигом добрым до конца подвизаясь, писаниями и наставлениям богодухновенными всех праведно чтущих тя просвещая и вдохновляя, труды ко трудам прилагая, неустанно достойно и праведно поя Богу: Аллилуйя!

Икос 7

Новаго Завета благодатию сердце твое насыщая, богоблаженная мати наша Марие, огнем любве Божественныя Господеви всесожжеглася еси и ликом святых мучеников сочеталася еси, с ними же Престолу Вседержителя предстоя, молися о чтущих верою память твою, ублажающих песньми тя таковыми:
Радуйся, яко Духом Святым Новый Завет начертася на сердце твоем;
Радуйся, яко Духом Святым миру изъяснила еси божественную истину;
Радуйся, недугов наших целительнице милосердная;
Радуйся, от напастей многообразных избавительнице святая.
Радуйся, сокровищнице Даров Божиих Всебогатая;
Радуйся, чаше, утешение духовнаго преисполненная.
Радуйся, скорби наша молением твоим растворяющая;
Радуйся, любовию к Богу сердца наша запаляющая.
Радуйся, святая преподобная мати наша Марие, мученице Христова и наставнице богомудрая!

Кондак 8

Странница во стране французской явилася еси, преподобная Марие, сердцем чистым Господа выну взыскующе; темже венец мученический прием, житие твое славно скончала еси; ныне же в Царствии Небеснем водворяяся со Ангелы песнь вопиеши Богови: Аллилуиа!

Икос 8

Всею душею возлюбила еси, всехвальная Марие, новую отчизну твою и во дни испытания военного притесняемых и беззащитных спасительнице, обремененных и страждущих помощнице и заступнице, отчаявшихся и скорбящих утешительнице благодатная явилася еси, не щадила бо еси естества твоего и в слабости телесней силу велию духовную явила еси, служа всем со смирением и любовию. Тем же и нас, грешных, твоею молитвою исцели и буди нам ко спасению управительнице, да благодарственно воспоем ти:
Радуйся, храм Божий в сердце твоем сотворившая;
Радуйся, благому игу Иисусову любомудро себе покорившая;
Радуйся, состраданием скорби бедствующих утолявшая;
Радуйся, обездоленных хлебом насущным питавшая;
Радуйся, веру твою делами любви утвердившая;
Радуйся, скорби и испытания в богатство духа претворившая;
Радуйся, сострадати страждущим нас научающая;
Радуйся, друг друга тяготы носити нас подвизающая;
Радуйся, святая преподобная мати наша Марие, мученице Христова и наставнице богомудрая!

Кондак 9

Всякое естество Ангельское удивися Промыслу милосердия Твоего, Боже наш, яко даровал еси нам толико мудрую и теплую молитвенницу и о спасении душ наших пред Престолом Твоим, Господи, попечительницу. Кто убо сочтет, преподобная Марие, все труды твоя, яже сотворила еси, неустанно Господеви поя: Аллилуиа!

Икос 9.

Вития многовещаныя не возмогут по достоянию восхвалити труды твоя, подвиги твоя и всякую добродетель твою: до самой кончины мученической неустанно Господеви работала еси, труды ко трудом прилагая и от силы в силу восходя, да прославится в тебе Христос, Его же ради подвизалася еси, Его же возлюбила еси, Его же Единого вожделе душа твоя, Его же ради страдания многи претерпела еси. Тем же молим тя, богоносная мати наша Марие, приклони милосердие Божие и к нам, взывающим ти сице:
Радуйся, добрая последовательнице Евангельского учения;
Радуйся, Христа в подвигах прославление;
Радуйся, страждущим и скорбящим вспоможение;
Радуйся, унывающих всерадостное утешение;
Радуйся, сословия дворянского украшение;
Радуйся, монашествующих похвало и утверждение;
Радуйся, людей мирских во благочестии укрепляющая;
Радуйся, милосердие в сердцах наших пробуждающая;
Радуйся, святая преподобная мати наша Марие, мученице Христова и наставнице богомудрая!

Кондак 10

Спасения и радости вечныя достигла еси по мнозех страданиях Христа ради, ты, святая мати наша Марие, уразумела еси, яко вне Церкви несть спасения, несть и мученичества; тамо вне Церкви есть борьба, есть страдание, есть несчастие, но несть мученичества. Сие дарование ведает и озаряет святая Церковь Божия, и в ней токмо едиными усты и единым сердцем Троице Единосущней и Нераздельней возсылается боголепная верных молитва: Аллилуиа!

Икос 10.

Стене нерушимой и адаманту крепчайшему подобна бе вера твоя, богоблаженная Марие; ты бо, велиим упованием на Христа Распятаго озаряема, заточение в смертоносном лагере от богоотступников кротце претерпела еси, соузников твоих в вере и надежде на Милосердие Божие досточудно утверждая; и словам Спасителя Нашего следуя, душу твою за жену боляшую положила еси, смерть за неё в пещи газовей приявши. Мы же, неизреченное величие любви твоея к Богу и ближним воспети желая, таковыя похвалы смиренне приносим ти:
Радуйся, крилами богомыслия сети вражия сокрушившая;
Радуйся, мужественным терпением твоим страх смертный поправшая;
Радуйся, мученическое течение твое добропопобедно завершившая;
Радуйся, во гласе пения ангельскаго на небо душею твоею воспарившая;
Радуйся, в дому Отца Небеснаго обитель себе сотворившая;
Радуйся, от теплохладия и маловерия нас исцеляющая;
Радуйся, в вере и верности Богу нас утверждающая;
Радуйся, о нашем спасении Святую Троицу умоляющая;
Радуйся, святая преподобная мати наша Марие, мученице Христова и наставнице богомудрая!

Кондак 11

Пение похвальное восписуем ти, святая преподобномученице Марие, яко храму Божию, дому Христову и обители Духа Святаго. Ты стояла еси на твердом камени упования небеснаго, его же не сокрушиша стихии мира. Ты пребывала еси в лоне Вселенския Церкви, идеже в Божественной иерархии Сам Христос есть путь в святыне веры и в лице Своем - истина, и в таинствах благодатных, и в существе своем - жизнь безконечная; сего ради просим тя: молитвами твоими сподоби и нас купно с тобою достойно и праведно воспевати ангельскую песнь Богу: Аллилуиа!

Икос 11

Светозарная свеща, просвещающая души верныя бысть душа твоя, преподобномученице Марие, у Престола Божия ныне предстоящая. Молим тя, угоднице Божия, умоли Господа Сил о всех кающихся грешниках, и всех нас укрепи на твердом камени веры Христовой святыми поучении твоими, просвещаеши сердца верных и к разуму Божественному всех нас направляюще, наставляя светло и радостно взывати тебе сице:
Радуйся, звездо, на тверди Церкви Христовой сияющая;
Радуйся, пресветлая заре, верным душам путь к Солнцу Правды показующая;
Радуйся, плоды Духа Святаго стяжати нам помогающая;
Радуйся, доверием Богу души верных обогащающая;
Радуйся, недуги телесныя и язвы духовныя исцеляющая;
Радуйся, от греховных навыков сердца наша освобождающая;
Радуйся, теплотою Божественныя любве души наши согревающая;
Радуйся, в скорбех и болезнех терпению Христову нас научающая;
Радуйся, святая преподобная мати наша Марие, мученице Христова и наставнице богомудрая!

Кондак 12

Благодатная ходатаице буди пред престолом Всевышняго ко спасению и сохранению от бед чтущих святую память твою, преподобномученице Марие. Вознеси ныне теплую и святую молитву о нас, грешных, ко Господу сил, яко да презрев вся наша согрешения, в добродетелях преуспевати нас сотворит, да здравы суще телом и духом, хвалебно воспоим вси Творцу и Отцу Небесному, дивному во святых своих: Аллилуиа!

Икос 12

Поюще пение похвальное усты недостойными, уповаем на милость Божию и твое, богоносная Марие, заступление и ходатайство за нас грешных, молим тя: не престани молитися о всех нас купно со сопострадавшими с тобою мученики святыми Димитрием, Илиею и сыном твоим Юрием, да помилует нас Господь вашего ходатайства ради. О сем воздыхающе, пение похвальное тебе, угоднице Божия, приносим:
Радуйся, молитвам и молениям людей Отечества твоего внемлющая;
Радуйся, духом Евангелия Христова нас обогащающая;
Радуйся, Христа словом и писанием свидетельствовавшая.
Радуйся, горьку от безбожия соль Божественною солью усладившая;
Радуйся, яко твоими молитвами расточенныя стада церковныя собираются;
Радуйся, заступлением твоим вечныя смерти избежати уповаем;
Радуйся, яко тобою бездну милосердия Божиего призываем;
Радуйся, яко тобою спасение вечное улучити чаем;
Радуйся, святая преподобная мати наша Марие, мученице Христова и наставнице богомудрая!

Кондак 13

О, предивная и многострадальная мати наша Марие, нынешнее аще и малое моление приими от нас, почитающих святую память твою. Охраняй нас богоприятными молитвами твоими от всякаго злаго обстояния и скорби, да тихое и мирное житие поживше во юдоли земней, блаженство райское на небеси наследим и купно с тобою сподобимся Дивному во святых Своих Святейшему Богу вечную и безконечную песнь воспевати: Аллилуиа!
(Этот кондак читается трижды, затем икос 1 и кондак 1)

Молитвы к преподобной Марии (Скобцовой)

Молитва первая

О святая преподобная мати Марие, молитвеннице за весь род христианский! Се мы, грехми и треволненьми житейскаго моря обуреваеми, от глубины сердечныя взываем ти: не остави нас, немощных, печальных и унылых призрением милостивнаго твоего заступления!
Во дни земнаго жития твоего явилася еси болящим безмездная целительница, алчущим милостивая кормительница, заблуждшим наставница, скорбящим и обидимым утешительница милосердная и всем притекающим к тебе скорая помощница и чадолюбивая мати. И ныне вемы, яко дана тебе от Господа и Пречистой Богородицы благодать молитися за ны.
О верная слуго Христова, сторицею возрастившая данный тебе талант, уврачуй страсти душ и телес наших, укрепи в добродетели и настави на путь покаяния: умягчи наша злая и хладная сердца, да паче всего возлюбим Христа, в Немже и ближняго своего. Умоли Господа сил низпослати милость Свою многострадальному Отечеству нашему, да тихое и безмолвное житие поживем во всяком благочестии и чистоте: и тако достигнем в немятежное пристанище Небеснаго Царствия, идеже ты в незаходимей сияеши славе, воспевая со всеми святыми хвалебную песнь Отцу и Сыну и Святому Духу, ныне и присно и во веки веков. Аминь.

Молитва вторая

О достоблаженная старице наша, преподобная мати Марие, недужных и скорбных скорая утешительнице и целительнице! Приими ныне моление недостойных чад твоих и донеси сей малый плод сердец и устен наших ко престолу Божию, да предстательством твоим низпослет нам Милосердный Господь щедроты Своя: подаст благоденствие Отечеству нашему: избавит от труса, огня, меча, нашествия иноплеменник и междоусобныя брани: недуь.жным дарует исцеление, скорбящим утешение: гордых смирит, нерадивых к покаянию обратит, монашествуюших дух в горении к Богу укрепит: всем Христианом подаст, яже ко спасению потребная: наипаче же явит нам милость на Страшнем судище Своем и вселит в обители Небесныя со всеми святыми: Емуже подобает хвала и слава, честь и держава, Отцу и Сыну и Святому Духу, ныне и присно и во веки веков. Аминь.

Молитва третья

О, святая преподобная мати Марие! Подвигом добрым подвизалася на земли, восприяла еси на небесех венец правды, егоже уготовал Господь всем любящим Его. Темже предстояще пред образом твом честным, радуемся о преславнем скончании земнаго жития твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойнии есмы, видети благая на земли живых, славяще дивного во святых Своих Бога, Отца и Сына и Святаго Духа, ныне и во веки веков. Аминь.

Иной тропарь преподобномученице Марии (Скобцовой), глас 4
Невеста Христова, честная мати, явилася еси, / тело и душу Ему яко жертву живую принесши,/ и жребию злому себе предаде, / да возсияет тобою свет Воскресения./ Темже память твою, мученице и исповеднице Марие, совершаем, \ моли Христа Бога, да спасет души наша.

Иной кондак, глас 6
Орган явилася еси Божественныя любве, / преподобная мати Марие, / и Христа возлюбити всем существом наставила ны еси, / зло сокрушивши и чашу страданий испивши, душ не повинулася еси растлителю. / Темже и кончину твою Творец паче всякия жертвы прият, / венцем победы тя венча. / Молися усердно Богу, / да не изнеможем творити святую волю Его, \ ты бо еси звезда в нощи светозарная.

Тропарь в честь святых священномученика Димитрия, преподобномученицы Марии, мучеников Юрия и Илии, глас 1
Болезньми святых, имиже о Тебе пострадаша, / умолен буди, Господи, / и вся наша болезни исцели, / Человеколюбче, молимся.

Кондак, глас 8
Подобен: Яко добля:
Яко свидетелей Истины, и благочестия проповедников, / божественными достойно почтим похвалы / Димитрия, Марию, Юрия и Илию, / узы, страдания и неправедное осуждение претерпевшия, // и яко мученики нетленными венцы увенчанныя.

Автор сего акафиста Евгений Владимирович Храповицкий