Кондак 1
Избранный Богом на просвещение языков светом Евангелия, святостию жизни и неустанными труды данный тебе талант умноживый, святителю Мелетие, сподоби ны недостойными усты воспети ти похвальная; ты же, яко имеяй велие дерзновение ко Господу, от всяких нас бед и обстояний свободи, благочестно тебе зовущих:
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Икос 1
Ангелу подобна зря тя существом, яко Захария, возликова отец твой, духом познав, яко мнози о рождестве твоем возрадуются. Мы же, исполнение тоя радости зряще, глаголем ти сицевая:
Радуйся, Единаго Бога от всея души возлюбивый;
Радуйся, к просвещению народов премудрым Промыслом Божиим предызбранный.
Радуйся, избрание твое ревностными труды оправдавый;
Радуйся, образе истиннаго смирения и воплощение мудрости.
Радуйся, кореню, из него же произрасте древо правоверия;
Радуйся, лучу Божественнаго света посреде тмы лжеверия.
Радуйся, преславный сосуде Божественныя благодати;
Радуйся, люботрудный носителю бремене Христова, легкаго и благаго.
Радуйся, яко злато, возсиявый в горниле искушений;
Радуйся, яко имя твое светлое от многих народов с любовию воспевается.
Радуйся, ангелом бесплотным во плоти бренней уподобивыйся;
Радуйся, на земли небесное житие нам показавый.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 2
Видящи благочестивая мати твоя, яко тяжесть сиротства закали характер твой, полагатися на Единаго Господа научивши и крепким, яко адамант, соделавши; зрящи умиленныя молитвы твоя, ревность к ведению слова Божия и твердое желание стопам отца, заблудших вразумлявшаго, следовати, позна Промысл Господень о тебе и благослови тя на путь пастырский, емуже верен был еси до конца жизни твоея, взывая Богу: АЛЛИЛУИА.
Икос 2
Разумом небесным просвещаемый, телесныя недуги и бедность жития превозмогая, в премудрости преуспел еси. Мы же, дивящеся множеству даров, тебе Богом данных, и твердости воли твоея, вопием ти:
Радуйся, добродетелем отца боголюбиваго подражателю;
Радуйся, кротости и благочестия матерняго преемниче.
Радуйся, детских забав и развлечений избегавый;
Радуйся, ревнителей благочестия присный собеседниче.
Радуйся, с детства безмолвие и молитвы возлюбивый;
Радуйся, слезныя молитвы Богу приносивый.
Радуйся, сердцем Господу прилепивыйся;
Радуйся, послушниче Евангелия усерднейший.
Радуйся, заповедем Господним непрестанно поучавыйся;
Радуйся, добродетели высокия в сердце свое вкоренивый.
Радуйся, наставников послушанием и разумом радовавый;
Радуйся, к высокому пути пастырскому усердно готовивыйся.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 3
Силою свыше укрепляемь, горняя выну взыскуя и мудрствуя, дольних же всецело отвергаяся, поревновал еси, богомудре Мелетие, тесному пути иноческому, дабы Единому Господу служити, сице воспевая Ему: АЛЛИЛУИА.
Икос 3
Имея присно в сердце своем лишь глаголы Господни и чая иноческаго жития, к настоятелю обители притекл еси с просьбою облещи тя в чин ангельский. Мы же, ревности твоея о сохранении чистоты сердца дивящеся, глаголем сице:
Радуйся, в законе Господни всегда ходити возжелел еси;
Радуйся, мирския суеты отрешитися желавый.
Радуйся, волею путь жития монашескаго избрал еси;
Радуйся, в чистоте и целомудрии пребыти предпочтый.
Радуйся, волю свою в руце Божии отдавый;
Радуйся, гласу Божественныя благодати прилежно внимавый.
Радуйся, сердце твое в жилище Святому Духу предуставивый;
Радуйся, страху Господню от юности поучавыйся.
Радуйся, непрестанною молитвою паче книг наученный;
Радуйся, в посте и воздержании житие свое проводивый.
Радуйся, в послушании настоятелю и братии пребыти до конца жития обещавый;
Радуйся, послушание прилежно несый.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 4
Бурю юношеских страстей умиряя, проходил еси путь иноческий, поучаяся от Господа, рекшаго: «яко кроток есмь и смирен сердцем», Емуже вопия: АЛЛИЛУИА.
Икос 4
Слышаще и видяще ученицы твои чистое и непорочное житие, тобою проводимое, святителю Мелетие, удивляхуся, следовати тебе желающе. Мы же с любовию воспеваем ти сице:
Радуйся, кротости Давидовы подражателю и наставниче;
Радуйся, правды и истины паче всего искавый.
Радуйся, заповеди Господни исполнивый и оным научивый учеников твоих;
Радуйся, милосердия сокровище неисчерпаемое.
Радуйся, заре, светом новым путь учеником освещаяй;
Радуйся, звезде подобный, путь ко Христу указуяй.
Радуйся, образе благочестия учеником твоим;
Радуйся, трудолюбче нелицемерный.
Радуйся, яко храняй мир, Самем Господем вразумляемь бывый;
Радуйся, подвигами восходяй от силы в силу.
Радуйся, смирением твоим духа тщеславия и гордыни низложивый;
Радуйся, мудрость Соломонову стяжавый.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 5
Светозарной звезде Промысла Божия непрестанно всем существом твоим внимая и благой воле Божией следуя, святителю Мелетие, неусыпно радел еси о главном делании христианстем – стяжанию молитвы, кротости и смирения, благодарно воспевая Богу: АЛЛИЛУИА.
Икос 5
Видя враг рода человеча мягкость характера твоего, восхоте совратити тя с пути спасения, свед с людьми, против предержащих властей злобою дышащими. Но Господь не остави тя, оступившагося, и по милосердию Своему определи тя на высшее служение апостольское в страны Сибирския. Мы же, таковому о тебе Божию благоволению дивящеся, глаголем ти тако:
Радуйся, искушение, Богом попущенное, смиренно пренесый;
Радуйся, за неразумных властем противников усердно моливыйся.
Радуйся, самого себе прежде других смиряяй;
Радуйся, воине духовный непобедимый.
Радуйся, столпе крепкий, в напастех вражиих непоколебимый;
Радуйся, вся стрелы вражия, яко хврастие, сокрушивый.
Радуйся, учениче Христов благопослушный;
Радуйся, игу Христова бремене рамена твои подклонивый.
Радуйся, прошедый путь живота твоего путем тесным;
Радуйся, свеще, в молитве к Богу возжженная.
Радуйся, воистину познавый милость и долготерпение Божие;
Радуйся, на апостольское служение всеблагим Промыслом определенный.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 6
Проповедуют скалы и воды Селенгинския подвиги и труды твоя, святителю Мелетие, яко многотрудное служение начиная, многими молитвы облагоухал еси место сие, взывая к Богу: АЛЛИЛУИА.
Икос 6
Возсия в стране полунощней новый светильник благочестия с принятием тобою благодати священства. Шаманы, злобою дышаще, ворожиша, на тя многия беды накликающе. Ты же силою Господней их препобедил еси. Мы же, таковому чуду дивящеся, вопием:
Радуйся, безкровныя жертвы достойный совершителю;
Радуйся, олтаря Господня благоговейный служителю.
Радуйся, руце твои со многим дерзновением ко Господу воздеявый;
Радуйся, молитвы теплыя от сердца чистаго ко престолу Вседержителя возносивый.
Радуйся, душею твоею всю ширь страны Сибирския объяти хотевый;
Радуйся, сердцем за каждаго заблудшаго болевый.
Радуйся, любовию многия злые сердца умягчивый;
Радуйся, ворожбу шаманскую силою Христа победивый.
Радуйся, маслино, елей милости Божия источающая;
Радуйся, чаше, жаждущих учения спасительнаго напояющая.
Радуйся, моливыйся ко Господу, да поможет ти всех к Нему приближити;
Радуйся, просивый Господа, да добрый ответ на Страшнем Судищи за всех ти подаст.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 7
Хотяй спасти тобою многих, премилосердый Бог призва тя к преложению Писаний на языки сибирския, дабы глас проповеди христианския вся концы страны полунощныя просветил еси. Ты же, сему новому избранию радуяся, воспел еси Господеви: АЛЛИЛУИА.
Икос 7
Новый быв избранник Божий, благодати апостольския сподобился еси, святителю Мелетие. Никогда скверны в сердце не впускавый, не гнушался еси прибегающих к тебе из тмы языческия, светом крещения всех просвещая. Мы же таковому твоему милосердию дивящеся, тепле вопием ти:
Радуйся, апостолом подражателю;
Радуйся, за труды апостольския благодати апостольския сподобивыйся.
Радуйся, об укрепляющем тя Господе вся могий;
Радуйся, об единей славе Господней заботивыйся.
Радуйся, твоими Христоподражательными нравы народ удивляяй;
Радуйся, данною ти благодатию немощных укрепляяй.
Радуйся, яко солнце, паству твоею добротою согревавый;
Радуйся, благолепие дома Божия возлюбивый.
Радуйся, храмы многия воздвигнувый;
Радуйся, в самом себе храм Триипостасному Божеству уготовавый.
Радуйся, преподобием и правдою одеянный;
Радуйся, нищетою духовною богатую милость Господню улучивый.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 8
Странно удивишася жители града Читы, видеша нелицемерное смирение и кротость архиерея своего. Простоте сердца твоего дивящеся и благодаряще Бога, даровавшаго им таковаго милостиваго архипастыря, воспеша: АЛЛИЛУИА.
Икос 8
Всем был еси вся, святителю Мелетие, егда на кафедру Якутскую возшел еси, словом спасения ближних и дальних достизая, самую жизнь свою многократно опасности подвергая, верою телесныя немощи превозмогая, храмы Божии повсюду устрояя. Любовию своею всех объемля, паче всего о несчастных прокаженных заботился еси. Мы же любвеобильным трудом твоим дивящеся, глаголем сице:
Радуйся, истиннаго просвещения и благочестия в стране Якутстей насадителю;
Радуйся, языческих суеверий и злых обычаев в народех сих искоренителю.
Радуйся, идольских требищ и кумиров разрушителю;
Радуйся, святых храмов Божиих создателю.
Радуйся, необозримые пространства преодолевавый;
Радуйся, писаньми богодухновенными народы просвещавый.
Радуйся, благопопечительный пастырю народов Сибирских;
Радуйся, многажды жизнь свою опасностям подвергавый.
Радуйся, лютыя мразы благодушно претерпевавый;
Радуйся, в пучине океанстей не утонувый.
Радуйся, о несчастных прокаженных попечение имевый;
Радуйся, за любовь и труды твоя Апостолом Якутии нареченный.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 9
Все естество ангельское удивишася высоте служения твоего, святителю Мелетие, и Церковь Сибирская прославляет тя, яко многопопечительна о ней молитвенника и ходатая. Но Промысл Божий суди тебе восприяти древнюю кафедру богоспасаемого града Рязани. Ты же, волю Божию послушно приемля, возликовал еси: АЛЛИЛУИА.
Икос 9
Ветии многовещаннии не возмогут изрещи множества трудов твоих, святителю Мелетие, яко и на земли Рязанстей архипастырское служение с апостольскою ревностию продолжал еси, многочисленные недуги преодолевая, храмы и монастыри благоукрашая, пребывающих во тме раскола в лоно Святыя Церкве возвращая, мудро стадо града богоспасаемаго упасл еси. Мы же вопием ти тако:
Радуйся, достойный преемниче святителей Рязанских;
Радуйся, неленостный делателю на жатве Христовей.
Радуйся, плоды Святаго Духа в себе стяжавый;
Радуйся, апостольския деяния твоя на земли Рязанстей продолживый.
Радуйся, славу человеческую суетную ни во что же вменявый;
Радуйся, паче всего о просвещении заблудших радевый.
Радуйся, смирением и мудростию словес сердца к Богу привлекавый;
Радуйся, пастырю добрый, душу твою положити за овцы твоя присно готовый.
Радуйся, страже неусыпный, сугубые молитвы о пастве твоей с любовию возносивый;
Радуйся, ревностный благоукрасителю храмов Божиих.
Радуйся, со праведным Иоанном Кронштадтским Божественную литургию совершивый;
Радуйся, купно с ним в Дусе Святе соединенный.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 10
Спасти хотяй души человеческия от вечныя погибели, всеми образы поучал еси люди веровати во Христа Сына Божия, совесть блюсти и любити друг друга. Сам же стяжа венец добродетелей, иже есть любовь к Богу и ближнему, неболезненно душу твою в руце Божии предал еси, Емуже предстоя ныне с ликом святительским, выну вопиеши: АЛЛИЛУИА.
Икос 10
Стена еси и ограждение твердое богоспасаемому граду нашему, святителю Мелетие. Вкупе со святыми, в земли Рязанстей и Сибирстей просиявшими, предстоиши у престола Божия и молишися за ны. Мы же вопием ти:
Радуйся, праведною кончиною святость жития твоего показавый;
Радуйся, яко пред престолом Всевышняго достойно ликуеши.
Радуйся, светильниче пресветлый, на свещнице церковнем преславно поставленный;
Радуйся, кивоте честный, не камением и златом, но благодатными дарованьми исполненный.
Радуйся, бисере дражайший, Церковь Христову украшающий;
Радуйся, благочестия и добродетели наставниче премудрый.
Радуйся, откровенным лицем созерцаяй славу Триипостаснаго Божества;
Радуйся, наследниче всесветлаго Царствия Христова.
Радуйся, по трудех временныя жизни покой вечный получивый;
Радуйся, блаженство, от века праведным уготованное, восприявый.
Радуйся, стран Сибирских неоцененное украшение;
Радуйся, граду Рязани благонадежное утверждение.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 11
Пение всеумиленное Пресвятей Троице принося во всей жизни твоей, святителю Мелетие, великий подвижник благочестия и ревностный проповедник света Евангельскаго явился еси. Мы же, благодаряще Господа, дивнаго во святых Своих, воспеваем Ему: АЛЛИЛУИА.
Икос 11
Всесветлый светильник быв в житии, и по смерти возсиял еси, святителю Мелетие, источая реки чудес от благоуханных мощей твоих всем, с верою и любовию к тебе притекающим, во умилении сердец зовущим:
Радуйся, нетлением мощей твоих всем нам надежду воскресения подаваяй;
Радуйся, множеством чудес от Господа прославленный.
Радуйся, любовию твоею всей земли возсиявый;
Радуйся, вождю духовный, души многих возводяй в Небесная селения.
Радуйся, апостолом подражателю, просветивый тму неверия светом Евангелия;
Радуйся, молитвенниче пред Богом за весь род христианский.
Радуйся, сокровищнице даров Духа Святаго;
Радуйся, от Бога благодать исцелений восприявый.
Радуйся, цвете нетления, облагоухавый мощами Святую Церковь;
Радуйся, любве и сострадания явление многочудесное.
Радуйся, телес наших Богодарованное врачевание;
Радуйся, о душах наших благоприятный предстателю.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 12
Благодать и велие твое дерзновение пред Богом сведуще, тебе, святителю Мелетие, молимся: молися тепле ко Господу, да подаст нам благодать Святаго Духа, да уклоняющеся от путей нечестия и заблуждений, ходити начнем во свете заповедей Господних, да вечнаго блаженства сподобимся, воспевающе Богу: АЛЛИЛУИА.
Икос 12
Поюще чудеса твоя, имиже по обретении святых мощей твоих Бога прославил еси, святителю Мелетие, величаем тя и трудом твоим подражати желающе, благодарно взываем сице:
Радуйся, Церкве Православныя верный поборниче;
Радуйся, оберегаяй веру святую от нашествия инославных лжеучений.
Радуйся, Отечеству нашему щит и ограждение;
Радуйся, апостолов сопрестольниче и сликовствователю.
Радуйся, языков Божественное призвание предвозвещаяй;
Радуйся, преславное украшение архиереев.
Радуйся, молитвенниче теплый за труждающихся иереев;
Радуйся, монашествующим наставниче и помощниче.
Радуйся, в миру живущим вспоможение велие и утешение;
Радуйся, болящих и недужных скорый целителю.
Радуйся, за неправедно гонимых пред Богом ходатаю;
Радуйся, вдов и сирот скорый заступниче.
Радуйся, МЕЛЕТИЕ, ТЕПЛЫЙ О НАС ПРЕД БОГОМ МОЛИТВЕННИЧЕ.
Кондак 13
О, преславный Церкве Христовы светильниче, земли Рязанстей и Сибирстей украшение, святителю Мелетие, приими от нас, недостойных, малое сие моление и, предстоя ныне Престолу Царя Царствующих, молися о всех нас, да пребудем в светлости истин Евангельских, да, отвергшеся нечестия и заблуждений, внидем в радость Господа своего и обрящем милосердие Его в День Судный, в веселии поюще Ему: АЛЛИЛУИА (трижды).
МОЛИТВА СВЯТИТЕЛЮ МЕЛЕТИЮ РЯЗАНСКОМУ
О досточудный пастырю Христов, теплый наш молитвенниче, святителю отче Мелетие, земли Рязанстей и Сибирстей украшение! Ревностию апостольских трудов великим просветителем земли Сибирския подражавый, добротою сердца, кротостию и мудростию словес твоих множество языков, во тме идолопоклонства блуждающих, ко свету Евангельскому обративый, данный тебе талант умножил еси и сподобился еси внити в радость Господа своего.
Призри с высоты небесныя на нас, притекающих к раце святых мощей твоих, огради молитвами твоими Церковь Православную от нашествия лжеучений, от сект и расколов, от нестроений и раздоров, мир весь умири, грады и страны добре сохрани, от глада и пагубы избави ны. Умоли Господа, да сотворит в Отечестве нашем мир и благоденствие, архиереи благолепием святительства украсит и право правящих слово Истины Своея Церкви дарует, пастырей Церкве умудрит ревностию о спасении пасомых, монашествующих в подвизех укрепит, вся же люди православныя утвердит в вере и благочестии, да не охладеет любовь в сердцах наших, да не погибнем люте без покаяния, но, поживше в смирении и братолюбии, достигнем христианския кончины живота и сподобимся вкупе с тобою и всеми святыми славити и воспевати пречудное имя Всесвятыя Троицы во вся веки. Аминь.
Тропарь, глас 4 (употребляется в Якутской епархии)
Церкви Христовой светильниче, / земли Якутской и Рязанской украшение, / правило веры и образ милосердия людям был еси, / бдением же, постом, молитвою и трудами благовестническими просиял еси / и прославлен от Бога явился еси. / Святителю Мелетие, / моли Христа Бога спастися душам нашим.
Ин тропарь, глас 5 (употребляется в Рязанской епархии)
Церкве Христовы Светильниче, / земли Рязанстей и Сибирстей украшение, / Святителю Мелетие, / Владыце всех молися, / мир вселенней даровати / и душам нашим велию милость.
Кондак, глас 4 (употребляется в Якутской епархии)
Дух мирен и кроток стяжав, / твердое упование на милосердие Божие имея, / служитель верный Церкви Христовой / и проповедник веры во языцех явился еси, / святителю Мелетие, / присный о нас пред Богом предстателю / и молитвенниче о душах наших.
Кондак, глас 3 (употребляется в Рязанской епархии)
Днесь Собор Рязанских и Сибирских Святых предстоит в Церкви, / и невидимо за ны молится Богу. / Днесь Церковь небесная и земная ликовствует, / Ангели и Святии радуются, / купно паства с ними веселится, / прославляя обретение мощей Святителя Мелетия, / нас бо ради молят вси Превечнаго Бога.
Величание
Величаем тя, / святителю отче Мелетие, / и чтем святую память твою / ты бо молиши за нас / Христа Бога нашего.
Святитель Мелетий, в миру Михаил Косьмич Якимов, родился в 1835 году в Вятской епархии, в семье сельского священника. Рано лишившись отца, он остался на попечении своей матери. Несмотря на бедность и слабость здоровья, сумел с успехом окончить училище и семинарию. По окончании обучения Михаил был пострижен в рясофор и исполнял обязанности библиотекаря, а позже и учителя Вятского Духовного училища.
В 1858 году он поступил в Казанскую Духовную академию, где принял постриг с именем Мелетий, а через год покинул академию. Указом Святейшего Синода от 9 декабря 1861 года будущий архиерей был послан на миссионерское служение в Посольский Спасо-Преображенский монастырь на Байкале. С 1862 года иеродиакон Мелетий весьма успешно начал свою миссионерскую деятельность среди бурят, которая ознаменовалась крещением множества язычников, постройкой храмов, основанием постоянных поселений из новокрещеных. С сентября 1872 года он был направлен проповедовать Христа к тунгусам, жившим на самой границе с Монголией.
С 30 августа 1873 года архимандрит Мелетий — начальник Иркутского отдела Духовной миссии и игумен Ниловой пустыни в Саянских горах. Вскоре он был вызван в Казань для ознакомления с методами переводов на инородческие языки книг, содержащих учение христианской веры. Общение в Казани с Н.И. Ильминским сыграло огромную роль в становлении архимандрита Мелетия как замечательного миссионера. Вскоре вышла в свет его книга: «Учение о святой православной христианской вере» на бурятском языке. За пять лет его управления Иркутской миссией было обращено более одиннадцати тысяч язычников.
5 ноября 1878 года произошла хиротония во епископа Селенгинского, викария Иркутской епархии, и он был назначен начальником Забайкальской Духовной миссии с центром в Чите. Для усиления средств к просвещению населения святитель учредил в Чите церковное братство святых Кирилла и Мефодия и святителя Иннокентия. За время управления этой миссией число обращенных из шаманства и ламаизма составило около четырех тысяч человек.
5 июля 1889 года, после двадцатисемилетних трудов в Иркутской епархии, он был назначен управляющим Якутской епархией. Подобно своему предшественнику, епископу Дионисию (Хитрову), он успешно совершал дело архипастырского служения, о чем свидетельствует тот факт, что если к концу 1889 года в епархии числилось 77 церквей, 118 часовен, то всего лишь через шесть лет его правления уже было 9 каменных и 214 деревянных церквей и часовен. Он открыл в 1892 году и церковное братство во имя Христа Спасителя. Для устройства церковно-приходских школ преосвященный Мелетий исходатайствовал ежегодное пособие в шесть тысяч рублей из земских соборов. Для привлечения внимания к участи больных проказой в Якутской епархии, святитель в 1890 году напечатал в Якутских Епархиальных Ведомостях статью «Проказа в Вилюйском округе». После появления этой статьи в следующем году в Якутск приехала даже английская сестра милосердия — мисс Кэт Марсден, не говоря уже о помощи местного православного населения, так много потрудившегося для облегчения участи прокаженных.
Миссионерский характер деятельности этого архиерея в Сибири имел существенное влияние и на его служение в Рязанской епархии, куда он был направлен в 1896 году. Он оживил деятельность противомусульманской миссии в Касимовском уезде и с ревностью апостола-миссионера продолжал свою воистину подвижническую жизнь.
Преосвященный Мелетий оставил после себя немало и письменных трудов. Кроме проповедей, миссионерских записок и отчетов о Забайкальской и Иркутской миссиях, он напечатал множество статей исторического и этнографического содержания, опубликованных в Иркутских, Якутских и Рязанских Епархиальных Ведомостях и в Православном Благовестнике.
14 января 1900 года святитель Мелетий закончил свой земной путь. Память его прославляется 14/27 января — в день мирной кончины и 10/23 июня — в день Собора Сибирских святых.
Ангельски на земли поживших и со ангельскими чинми на Небеси ныне светло ликующих святых, в земли Сибирстей просиявших, песньми почтим: Радуйся, святителю Мелетие, града Тобольска и всея Сибири просветителю. Ты моли о нас Предвечнаго Бога.
Сибирский патерик
Мелетия (Панкова), монахиня,
Серафим (Питерский), игумен
1999 год