Акафист святому священномученику Никите (Дилекторскому), епискому Орехово-Зуевскому 

Кондак 1 (глас 8)

Избранный от архиерейского служения на подвиг мученичества за Христа, молитвою, благочестием Того прославил еси, исповедничеством и юродством преукрасился еси, священномучениче Никито, архипастырю Орехово-Зуевский, но яко имеяй дерзновение ко Владыце всех Богу, от всяких нас бед свободи, да зовем ти:
Радуйся, священномучениче Никито, молитвенниче о душах наших!

Икос 1

Ангелов Творец и всея твари Содетель в годину лютых гонений, обышедших Церковь нашу, яви тя, священномучениче отче наш Никито, веры православия непорочного блюстителя, заповедей Христовых усердного исполнителя, пастыря добраго и богомудраго, многими добродетельми и подвиги украшенного и венцем мученическим увенчаннаго. Сего ради, величающее тя, святителю, зовем ти сице:
Радуйся, Христа ради пострадавый на земли!
Радуйся, с Ним воцаривыйся на небеси!
Радуйся, православныя Церкви украшение!
Радуйся, монашествующих похвало и утверждение!
Радуйся, мирян в благочестивом житии укрепление!
Радуйся, предстателю крепкий на тя уповающих! 
Радуйся, заступниче скорый тя призывающих! 
Радуйся, чтущих тя пред Богом поминающий!
Радуйся, о прославляющих тя Господа умоляющий!
Радуйся, скорби наша в радость претворяющий!
Радуйся, священномучениче Никито, молитвенниче о душах наших!

Кондак 2

Видя Христос сердца твоего благое изволение и рачение, яко от юности твоея немолчно прославлял еси Имя Его чтение псалмов и песней духовных во святем храме Господнем во граде Покрове, в скинии Небесней вчини тя, отче наш Никито, в лике мученик совершенных, идеже ты купно с ними возносиши Ему ангельское пение: Аллилуйа!

Икос 2

Разумом свыше просвещаемь, угодниче Христов, житие добродетельное возлюбил еси; богобоязненному родителю твоему внимая, во страсе Божии и благочестии возрастал еси; к молитве и чтению книг священных навыкл еси, и во трудах твоих образ будущаго добродетельнаго жития явил еси. Мы же, дивящееся таковому от юности твоея усердию вопием ти сице:
Радуйся, добраго корене отрасле благородная!
Радуйся, лозо винограда Христова многоплодная!
Радуйся, чадо молитвы родителей благочестивых!
Радуйся, надеждо и утешение сердец их боголюбивых!
Радуйся, Божественное Писание возлюбивый;
Радуйся, наставлением родителя твоего внимавый;
Радуйся, молитве наученный и в ней преуспевый;
Радуйся, книжную премудрость с детских лет усвоивый;
Радуйся, от юности служити Христу возжелавый;
Радуйся, нелецемерную по Бозе ревность показавый;
Радуйся, священномучениче Никито, молитвенниче о душах наших!

Кондак 3

Силою Вышняго осеняем, в вере, надежде, любви и разуме возрастал еси, угодниче Христов, ко учениям человеческим, святоотеческих и пророческих писаний разумение приложил еси; после же и саном священным почтен был еси, служение пастырское со тщанием и мудростью проходил еси, многих чад духовных собрал еси, Богу же со благодарением поя: Аллилуйа!

Икос 3

Имея тщание и ревность по Бозе, ко трудам пастырским усердно прилежал еси; заповеди Спасителя о любви к Богу и ближним паству твою исполняти научал еси. Мы же, сие ныне поминающее, таковые похвалы тебе приносим:
Радуйся, таинств церковных благоговейный совершителю.
Радуйся, православного благочестия мудрый насадителю;
Радуйся, супругом благочестивым небесный покровителю!
Радуйся, от плевел ненависти сердца наша очищающий!
Радуйся, светом любви нелицемерныя нас озаряющий!
Радуйся, от похоти себялюбия нас исцеляющий!
Радуйся, милосердие в сердцах наших пробуждающий! 
Радуйся, в добродетели терпения нас утверждающий!
Радуйся, от заблуждений духовных нас исцеляющий!
Радуйся, от путей погибельных нас удаляющий!
Радуйся, священномучениче Никито, молитвенниче о душах наших!

Кондак 4

Бурею страстей греховных обуреваемые, народы российские от веры отеческия отхождаху и заповеди Христовы нарушаху. Ты же, святый Никито, наставлял еси паству твою суемудрых и злых обычаев века сего удалятися и выну на Спасителя Нашего уповати; Его же благодатию укрепляем доброчестно святительства и мученичества путь прошедши, востекл еси во обители Отца Небеснаго, вопиюще: Аллилуйя! 

Икос 4

Слыша и видя премногую твою добродетель, отче наш Никито, собор архипастырей россистих благослови тя и торжественно во епископа Святые Церкви Православныя посвяти. Ты же, яко послушник трудолюбивый, святительское служение смиренномудренно совершал еси. Тако и ныне, во обителех небесных пребываяй, наставник неусыпный буди и нам, взывающим ти сице:
Радуйся, духовных совершенств высото;
Радуйся, смирения христианского глубино;
Радуйся, епископство, яко великий дар Божий, восприявый;
Радуйся, обильно в хиротонии благословение небесное стяжавый;
Радуйся, апостолов и святителей достойный приемниче;
Радуйся, страже Церкви Святой неустрашимый;
Радуйся, делателю винограда Христова неутомимый;
Радуйся, овцы заблудшия ко Спасителю призывавый;
Радуйся, людем во тьме сидящим истину Господню возвестивый;
Радуйся, сим от гибели вечныя их сохранивый;
Радуйся, священномучениче Никито, молитвениче о душах наших!

Кондак 5

Боготечною звездою пришел еси в мире, священномучениче отче наш Никито, блистающи многотрудными подвиги твоими, добродетелию и кончиною мученическою. Тем же и сияеши на Небесех славою вечною со лики праведных, с ними же выну воспеваши Христу, Богу Нашему: Аллилуйа!

Икос 5

Видим тя, святителю Никито, очами веры, у Престола Божьего предстоящего и за нас грешных молящегося, твоим бо заступлением в скорбех утешение, в недузех исцеление, в бедах скорое вспоможение обретая величаем возвеличевшего тя Царя Славы Христа; тебе же теплому, предстателю нашему, от любве сердечныя вопием:
Радуйся, яко и по преставлении твоем с нами пребываеши!
Радуйся, яко, в селениях небесных почивая, нас не оставляеши!
Радуйся, яко милосердие Божие о грехах наших умоляеши!
Радуйся, теплотою Божественныя любве души наши согревающий!
Радуйся, в скорбех и болезнех терпению Христову нас научающий!
Радуйся, смирением души верных обогащающий!
Радуйся, недуги телесныя и язвы духовныя исцеляющий!
Радуйся, старых в изнеможении укрепление!
Радуйся, юных в благочестии и целомудрии утверждение!
Радуйся, младенцев воспитание и благодатное хранение!
Радуйся, священномучениче Никито, молитвенниче о душах наших!

Кондак 6

Проповедник немолчный и Евангельских истин вещатель явился еси во святительском служении твоем, всеславне отче Никито, наставляя ближних твоих в добродетелех христианских: смирении, кротости, воздержании и чистоте. Мы же ныне молим тя, угодниче Божий, представительством твоим небесным испроси и нам сия боголюбезныя добродетели, да не поработимся страстем греховным, но благочестно воспоем Спасителю Нашему: Аллилуйа!

Икос 6

Возсиял еси звездою на небосклоне церковном, егда архиерейское служение твое со страхом Божиим и мудростью совершал еси, в проповедях твоих раскол обновленческий обличая, покаянию во гресех и исправлению жития своего паству твою призывая; сего же ради от богоотступников нечествивых заточение темничное, изгнание и иныя злострадания претерпел еси. Мы же вся сия ныне поминая, таковые похвалы приносим ти:
Радуйся, душепагубных расколов ревностный искоренителю;
Радуйся, заблудших неустанный вразумителю;
Радуйся, сердец смятенных умирителю;
Радуйся, от озлобления на нас враждующих хранителю;
Радуйся, святаго патриарха Тихона смиренный сослужителю;
Радуйся, истинаго Православия незыблемое основание;
Радуйся, крепкое падающих возведение;
Радуйся, стоящих право утверждение;
Радуйся, яко многи скорби и труды подъял еси;
Радуйся яко вся ради Возлюбившего тя протерпел еси;
Радуйся, священномучениче Никито, молитвенниче о душах наших!

Кондак 7

Хотяй человеколюбец Господь утвердити Православие в земли Московстей по промышлению Своему направи тя во град Орехово-Зуево, где ты, первый Архипастырь на престоле епископстем сел еси, сугубым добродетельным житием, молитвами и благочестием, а послеже и иными подвиги многими просиял еси во граде сем, яко звезда многосветлая, наставляя всех верных пети Господу Нашему: Аллилуйа!

Икос 7

Новою и велию радостию сердца благочестивых людей града Орехово-Зуево исполнишася, егда оные узреша тя, святителю, первого архиепастыря граду сему. Ты же, добре внимая пастве своей, в ней же Дух Святый постави тя епископом, пасл еси усердно Церковь Божию кротостию, смиренномудрием и пастырскими добродетельми украсился еси. Сего ради ублажающе тя, отче наш Никито, зовем ти сице:
Радуйся, труды многими велию благодать стяжавший;
Радуйся, во тьме мира сего благодатию Божиею сиявший;
Радуйся, светом Евангельских заповедей нас просвещающий;
Радуйся, Бога любити и волю Его творити нас наставляющий;
Радуйся, молитвами твоими души наши в добродетели укрепляющий;
Радуйся, на милость Божию уповати нас подвизающий;
Радуйся, путь из тьмы греховной к невечернему свету освещающий;
Радуйся, плоды Духа Святаго стяжати нам помогающий;
Радуйся, от греховных навыков сердца наша освобождающий;
Радуйся, милость Богородицы к нам преклоняющий;
Радуйся, иконы Ея благоговейно почитати научающий;
Радуйся, священномучениче Никито, молитвенниче о душах наших!

Кондак 8

Странно бысть людем маловерным видети, яко словеса апостола Павла «Ибо когда мир своею мудростию не познал Бога, то благоугодно было Богу юродством проповеди спасти верующих» (1 кор 1:21) в сердце своем восприял еси, святый Никито, и тяжкий подвиг юродственного жития, Христа ради, жития подъял еси, Подвигоположнику же Богу во благодарении воспевая: Аллилуйа!

Икос 8

Весь был еси Божий, святителю, егда древним блаженным уподобился еси во юродственном твоем житии, и Андрею Цареградскому подражая, странником бездомным протекл еси путь жития твоего во граде Орехово-Зуево, в нестяжании, насыщал ими еси всех верных к тебе приходивших. Сего ради, смиренно просим тя, отче наш Никито, прими хвалы сия:
Радуйся, по глаголу апостольскому в ризу юродства облекшийся!
Радуйся, мнимым безумием сияние благодати сокрывший!
Радуйся, чуждый миру, сущих в нем не чуждавшихся!
Радуйся, от почестей земных всецело отвратившийся!
Радуйся, за ненавидивших тя с любовию молившийся!
Радуйся, обидящих тя, яко благодетелей, почитавший!
Радуйся, чашу поругания, яко врачевство чистительное, испивший!
Радуйся, от сетей вражиих верныя избавляющий;
Радуйся, окаменелыя сердца наша оживляющий!
Радуйся, в вере и благочестии нас утверждающий!
Радуйся, священномучениче Никито, молитвенниче о душах наших!

Кондак 9

Всего себе подвигнув Богови, яко раб благий и верный, послужил еси Ему, священномучениче Никито, паче иных для спасения своего потрудился, тем же и внити сподобился еси в радость Господа своего, Ему же предстоиши ныне, со ангелы поя: Аллилуйа!

Икос 9

Ветия многовещанные не возмогут по достоянию воспети славу, от Господа уготованную святым Его, ея же наследником сподобился еси быти, священномучениче отче наш Никито! Сея славы сопричастницы и нас сподоби быти святыми твоими молитвами, да воспоем ти радостно:
Радуйся, со всеми святыми Престолу Божьему предстоящий;
Радуйся, с воинством мученическим Творцу хвалу возносящий; 
Радуйся, с лики ангельскими хвалу Богу воспевающий;
Радуйся, бремя житейское носити нам помогающий;
Радуйся, друг друга тяготы носити нас научающий;
Радуйся, кротких и благих нравов благоискусный насадителю;
Радуйся, нечестивых и душетленных обычаев неуклонный искоренителю!
Радуйся, сердец мятущихся блаженный успокоителю;
Радуйся, почитающих тя верный хранителю;
Радуйся, всех людей скорбящих благостный утешителю;
Радуйся, священномучениче Никито, молитвенниче в душах наших!

Кондак 10

Спастися хотяще от различных напастей и бед мира сего, тя, всеблагий отче Никито, теплаго предстателя и молитвенника к Богу призываем: не тщетну сотвори надежду нашу на заступление твое, не остави нас милосердием твоим; буди нам защитник необоримый от враг видимых и невидимых; избави нас ходатайством твоим от лютых бед и искушений и сподоби с тобою вечно воспевати Господу: Аллилуйа!

Икос 10

Царя небесного возлюбив от всея души твоея и всего мыслею твоею, принесл еси Ему, священномечениче Никито, последи многоразличных приношений веры и усердных подвигов себе самого в жертву живу, святу и богоугодну. Сего ради, мы, ублажающее тя, с любовию зовем ти сице:
Радуйся, богоугодно на земли поживый;
Радуйся, молитися за недруги учивый;
Радуйся, и сам мучители твоя простивый;
Радуйся, воине Христов непобедимый;
Радуйся, в терпении твердейший адаманте невредимый;
Радуйся, любовию Божественною страх смертный победивый; 
Радуйся, ризы твоя в крови агнчей убеливый;
Радуйся, российских мучеников удобрение;
Радуйся, архиреев православных похваление;
Радуйся, лукавым силам устрашение;
Радуйся, священномучениче Никито, молитвенниче о душах наших!

Кондак 11

Пение всеумиленное приносим ти, преблаженне отче наш Никито, и со дерзновением молим тя: вознеси ко Господу о спасении душ наших твои святые молитвы. Да сподобимся вечно в радости блаженной Христу воспевати: Аллилуйа!

Икос 11

Светоподательный светильник явился еси нам, священномучениче отче наш Никито, разгоняяй нощь нечестия и освещаяй путь во тьме грехов и заблуждений ходящих. Ныне же убо умоляти не престай Христа Спаса и Владыку Нашего, да не даст нам уклонитися от стези ко спасению ведущей и сподобит чистым сердцем приносити ти похвалы сия:
Радуйся, страстотерпче долготерпеливый и незлобивый;
Радуйся, венец нетленный от Господа него приявый;
Радуйся, благодать молитвы о нас стяжавый;
Радуйся, древних мучеников достойный сонаследниче;
Радуйся, к сонму новомучеников сопречтенный;
Радуйся, сердца наша огнем Божественныя ревности воспламеняющий;
Радуйся, от теплохладия и маловерия нас исцеляющий;
Радуйся, в вере и верности Богу нас утверждающий;
Радуйся, о нашем спасении Святую Троицу умоляющий;
Радуйся, милость и утешение всем верным являющий;
Радуйся, священномучениче Никито, молитвенниче о душах наших!

Кондак 12

Благодати небесныя Божия странное и преславное чудо является ныне во очию всех верных: долготерпеливый и многомилостливый Господь не прогневался на ны до конца за отступничество и великия беззакония наша, но, помянув щедроты своя, даровал нам тебе пречудне отче наш Никито, заступника и ходатая изрядна, да выну поем Господеви: Аллилуйа!

Кондак 12 (второй вариант)

Благодать и велие дерзновение твое пред Богом ведущее, тебе, святителю отче наш Никито, просим: молися о нас ко Господу, да избавит нас от всяких бед и сохранит, и утвердит во всяком благочестии и чистоте, да тихое безмолвное житие поживем и поем тобою нам благодеющему Богу: Аллилуйа!

Икос 12

Воспевая Премудрость и Милосердие Господа нашего Иисуса Христа, даровавшего нам тя, отче наш Никито, заступника велия, ходатая изрядна, молитвенника теплаго, во всяком благом деле скорого помощника. Восхваляем и тя, преславный Христов священномучениче , яко к те по Бозе мы прибегаем и взываем ти сице:
Радуйся, бедным отраду и вспоможение дарующий;
Радуйся, богатых к милосердию и благотворению подвизающий;
Радуйся, от пристрастия к земным богатствам нас отвращающий;
Радуйся, богатства нетленныя искати нас побуждающий;
Радуйся, от сетей вражиих верныя избавляющий;
Радуйся, светом надежды нас озаряющий;
Радуйся, труды наша на пути спасения облегчающий;
Радуйся, века сего суемудрия отвергати нас научающий;
Радуйся, ходити в заповедях в Божиих наставляющий;
Радуйся, за вся благодарити Господа подвизающий;
Радуйся, священномучениче Никито, молитвенниче о душах наших!

Кондак 13

О, священномучениче отче Никито, заступниче наш теплый, и молитвенниче непрестанный. Прими от нас милостиво малое сие моление и сохрани нас от врагов видимых и невидимых, от всякия скорби, напрасныя смерти и будущия муки; да сподобимся с тобою и всеми новомученики и исповедники Российскими воспевати Господу и Спасителю нашему: Аллилуйа!
Сей кондак – трижды, затем -- паки Икос 1 и Кондак 1.

Тропарь, гл. 4

Послан бысть во град Орехово-Зуево/ для утверждения православиа/ прославился еси молитвою и благочестием/ уподобился еси юродством блаженной Ксении/ венчался еси венцем мученическим/ святителю отче Никито/ моли Христа Бога/ даровати граду нашему мир/ и душам нашим велию милость.

Кондак, гл. 3

На престоле Ореховстем архиерей первый был/ добродетельми многими украшен/ в лике новомучеников радуешися/ блаженне отче Никито/ пастырю наш предивный. 


Молитва ко святому священномученику Никите, епископу Орехово- Зевскому

О преславный священномучениче, святителю отче наш Никито, первоепископе Орехово- Зуевский! Услыши нас грешных, молящихся тебе и к твоему предстательству усердно притекающих и просящих молитвеннаго твоего заступления. Помози нам, угодниче Божий; веру христианскую до конца жития нашего содержати, заповеди Божии неленностно исполняти, обидящих прощати, чистоту и целомудрие хранити и всех ближних прискренне любити. О святый страстотерпче, во дни земнаго жития ты сам, искушен быв, можешь и нам искушаемым помощи, яко немощни есмы и о спасении вечном не радим. Просим убо тя, священномучениче отче наш Никито, воззови ко Творцу всяческих, да дарует всем нам силу победити искушения наши, ревность ко исправлению греховнаго жития нашего, любовь к Богу и ближним нелицемерную; малодушным – успокоение, заблудшим – исправление, согрешившим – дух сокрушения, бедствующим – благовременную помощь. Не посрами нас, к тебе с верою притекающих, споспешествуй, яко отец чадолюбивый чадам, и нам понести иго Христово во благодушии и терпении, и всех управи в мире и покаянии скончати живот свой непостыдно и преселитися со упованием во обитилие небесныя, идеже и ты ныне водворяешися со Ангелы и Святыми, зря и прославляя Бога, в Троице славимаго, Отца и Сына и Святаго Духа. Аминь. 

Молитва вторая

О, преславный и дивный страстотерпче, Архиерее Христов, священномучениче отче наш Никито. К тебе, яко истинному ходатаю и молитвеннику у Престола Божия мы недостойнии прибегаем и смиренно молимся. Ты, яко пастырь добрый, душу свою положивый за овцы своя, приисполнен быв любве и веры Христовой, укрепи и нас на стези спасения, да не погибнем люте. Ты бо приял от Господа благодать и силу за тяжкая и многая страдания твоя, чтущия память твою, помогати и от бед избавляти, избави и нас, молитвенниче всеславне, всяких раздоров и нестроений, призывающих тя с верою и любовию избави от всякаго злаго обстояния. Мир умири предстательством пред Господом, безумныя вразуми и в вере Христовой укрепи, согревая огнем молитвы твоея охладевшия сердца наша, да сподобит Господь нас грешных Небеснаго Царствия Своего, и со всеми святыми прославляти всечестное и великолепое имя Отца и Сына и Святаго Духа, ныне и присно и во веки веков. Аминь.