Кондак 1
Избраннаго мученика Христова, от Восток яко звезда воссиявшаго и в Вуненах священно подвизавшагося, венчаем песненными похвалы; во Христа бо облекийся, силою преподобных и мучеников украсися, емуже глаголем:
Радуйся, Николае блаженне.

Икос 1
Ангельское житие во плоти человечестей пожил еси, Николае, Христов страстотерпче, и человек небеснаго разума познался еси в мире. Сего ради подвигом твоим дивящеся, зовем сице:
Радуйся, тобою бо Бог возвеселися;
Радуйся, тобою бо растлитель потребися.
Радуйся, любви Христовой стяжание;
Радуйся, заблуждения лести посрамление.
Радуйся, высото постничества, возносящая благочестивыя;
Радуйся, глубино страдания, враги поражающая.
Радуйся, яко сияеши от Востока светло;
Радуйся, яко озаряеши Фессалии страны.
Радуйся, славных преподобных единонравный;
Радуйся, твердых мученик единоревностный.
Радуйся, тобою бо ново соделывается сердце;
Радуйся, тобою бо состареется злоба.
Радуйся, Николае блаженне.

Кондак 2
Основание в душе твоей от юности положи страх Господень, треблаженне имже созиждивыйся премудро, от начала грядущее предначертал еси, непорочно шествуя заповедями Бога Слова, пояй: Аллилуиа.

Икос 2
Разума твоего богатством царь восхищаяся, в ризу тя консульства облачает, темже многими добродетели ум предводителем противу страстей поставил еси, делы явив истинное звание, темже слышиши ныне:
Радуйся, скрижале нравов священных;
Радуйся, казно добродетелей честных.
Радуйся, речений Христовых исполнение;
Радуйся, ран Его запечатление.
Радуйся, цвете благовонный благолепия душевнаго;
Радуйся, крине краснейший благодати духовней.
Радуйся, яко явился еси благолепен во нравах;
Радуйся, яко вознеслся еси во славе ипата.
Радуйся, мудрым светлое уподобление;
Радуйся, верным всем наслаждение.
Радуйся, сило царей благочестивых;
Радуйся, копие на врагов неукротимых.
Радуйся, Николае блаженне.

Кондак 3
Силу во бранех дивную показуя, Слово Содетельное обретый, яко сильный и доблественный, мудре, в подвизех священных показался еси, победивый полки невидимаго врага, поя: Аллилуиа.

Икос 3
Имея жажду Божественную, аки елень ко источнику водному, на гору Вуненскую восшел еси с любовию святою, на нейже воды животворныя струи приявый, Николае, Божественне оросил еси вопиющих ти таковая:
Радуйся, яже в мире красная презревый;
Радуйся, воине Господень.
Радуйся, воинство оставивый земное;
Радуйся, мужеством обогативыйся непобедимым.
Радуйся, служителю изряднейший Христа, тя призвавшаго;
Радуйся, неподражаемый Спаса Иисуса подражателю.
Радуйся, яко на рамена Крест Христов подъял еси;
Радуйся, яко бремя земное отвергл еси.
Радуйся, правило преподобных преславное;
Радуйся, верных светильниче многосветлый.
Радуйся, цвете бессмертныя благодати;
Радуйся, богатство присносветлаго сияния.
Радуйся, Николае блаженне.

Кондак 4
Бурю страстей разрушивый, теплотою в подвизех бесстрастия обогатися, и в предних странах нерадивых ко бдению тепле воздвигл еси. Зрящия же усердие твое, Николае, вопияху: Аллилуиа.

Икос 4
Слышим о тебе, таинственне воссиявшем, якоже солнце велие, посреде твоих сподвижников, ихже явил еси, яко звезды светозарныя в подражании трудам твоим, с сими же и ныне моли о нас, зовущих:
Радуйся, сияние единонравных;
Радуйся, славо страстотерпцев.
Радуйся, воздержания Божественное обоняние;
Радуйся, истины велий столпе.
Радуйся, юн сый телом, мудр же душею;
Радуйся, обретый измлада сожителя добродетель.
Радуйся, яко озаряеши гору Вуненскую;
Радуйся, яка разгоняеши мглу демонскую.
Радуйся, образ добрый постников;
Радуйся, светлое подвизающимся зерцало.
Радуйся, светило Эллады яркое;
Радуйся, светильниче Троицы священный.
Радуйся, Николае блаженне.

Кондак 5
Видением и деланием душу твою украсивый, умертвивый плотския вожделения, и струями кровей твоих, яко порфирою, сию облекий и, яко невесту непорочну, ко Христу привел еси, взывая: Аллилуиа.

Икос 5
Крепок и благ, яко воин Христов, на нечестивыя явился еси, всеоружие бо света восприим, варварскую лютость мужески победил еси. Сего ради любовию зовем ти:
Радуйся, победо благочестия;
Радуйся, низпадение нечестия.
Радуйся, мужества светлое начертание;
Радуйся, безумия врагов сокрушение.
Радуйся, финикс цветущий добродетелей постнических;
Радуйся, кедре несокрушимый подвигов мученических.
Радуйся, яко явился еси подвижников украшение;
Радуйся, яко явился еси варваров омрачение.
Радуйся, Христову уяснивый силу;
Радуйся, врага посрамивый крепость.
Радуйся, тобою бо подвижники укрепляются;
Радуйся, тобою бо на подвиги сподобляются.
Радуйся, Николае блаженне.

Кондак 6
Проповедует с небесе сошед Ангел светоносен, тебе, Ангелу в телеси, и им же с тобою, на брань Божественную мученическую укрепляя, славне, вопию щим Богу единомысленно: Аллилуиа.

Икос 6
Копием священное твое и многострадальное тело уязвляя врази лютыя, сообразна Владычних соделаша тя страстей, святе, имиже обретый бесстрастие, страстей избави вопиющих:
Радуйся, преподобных споборниче;
Радуйся, мучеников сподвижниче.
Радуйся, погибель врагов нечестивых;
Радуйся, пристанище верных благочестивых.
Радуйся, мечу Духа обоюдоострый по Писанием;
Радуйся, якорю спасительный плавающих душевно.
Радуйся, яко тело отовсюду уязвил еси;
Радуйся, яко очи ко Господу устремлял еси.
Радуйся, Христу во всем уподобивыйся;
Радуйся, света славы сотрапезниче.
Радуйся, узы и бичевания претерпевый;
Радуйся, наслаждения нескончаема приобщивыйся.
Радуйся, Николае блаженне.

Кондак 7
Хотяще бичеванием честное твое тело, Богоносе, отступницы, умерщвлению предати, посекающе зело, ты же умерщвления и тли совлеклся еси одежды, Николае, и в нетления ризу облеклся еси, Богу вопия: Аллилуиа.

Икос 7
Новый от Востока мучениче, токами кровей твоих, проливаемых неправедно, орошаеши Христову Церковь, яже правды плоды зрелыя плодоносящи, Николае, благодать чудес твоих почитает, зовущи ти сице:
Радуйся, цвете Церковный;
Радуйся, разрешение уныния.
Радуйся, Востока отрасле благоцветная;
Радуйся, Вунен насельник равноангельстий.
Радуйся, яко от юности последовал еси Христу;
Радуйся, яко уязвил еси врага супостата.
Радуйся, монахов световодителю;
Радуйся, всех православных руководителю.
Радуйся, жития лучшаго причастниче;
Радуйся, врага злейшаго посрамление.
Радуйся, тобою бо демони умаляются;
Радуйся, тобою бо людие озаряются.
Радуйся, Николае блаженне.

Кондак 8
Странное чудо, ко древу яко привязан еси, страстотерпче, яви, нещадных бо мучений терпя силу, возвратился еси ко древу жизни вечныя, якоже писано: причащением обожаем, Николае, Господеви поя: Аллилуиа.

Икос 8
Весь сый соединен с главою всех, Христом Подвигоположником твоим, мучениче, усечением главы твоея с Ним соединися, моляся о нас, благочестно ти вопиющих:
Радуйся, Слова венценосче;
Радуйся, лести упразднителю.
Радуйся, воине веры преизрядный;
Радуйся, благодати Духа сокровище.
Радуйся, в трудах богоносным подвижником образе;
Радуйся, слава и похвало победоносным мучеником.
Радуйся, яко озаряеши Фессалию честне;
Радуйся, яко исполняеши подвиг законно.
Радуйся, образе Божественнаго постничества;
Радуйся, светило святаго страдания.
Радуйся, врагов безумие низложивый;
Радуйся, верных сонмище озаривый.
Радуйся, Николае блаженне.

Кондак 9
Вся Фессалия, Эллада и Восток проповедают юже улучил еси благодать чудес от Бога, всем бо верою к тебе притекающим подаеши просимое, исцеляя вопиющия: Аллилуиа.

Икос 9
Глаголам твоим милостивым восточный правитель доверився, Николае, поспеши в Вунену благоговейне, обрете святыя твоя, мучениче, мощи и исцелися от недуга, в веселии же ти вопияше:
Радуйся, крепосте болящих;
Радуйся, утешение скорбящих.
Радуйся, чудес благодать приемый;
Радуйся, демонов державу сокрушивый.
Радуйся, яко уврачевал еси тяжко болящаго;
Радуйся, яко сему даровал еси здравие чудесне.
Радуйся, нетленным твой гроб сохранивый;
Радуйся, растлителей множество сокрушивый.
Радуйся, теплое душевное умилостивление;
Радуйся, многих скорое врачевание.
Радуйся, тобою бо исцелихомся страсти;
Радуйся, тобою бо страннаго исполнихомся удивления.
Радуйся, Николае блаженне.

Кондак 10
Тело твое святое нетленно пребывая, Божественным дивно действом, яко многоценное сокровище, в лесу Вуненстем обретеся, изволением твоим, Николае, благодать подая вопиющим: Аллилуиа.

Икос 10
Стена православным и заступление Божественное тобою дадеся, страстотерпче. Сего ради укрепи нас молитвами твоими, от всякаго обстояния избавляя вопиющия:
Радуйся, покрове православных;
Радуйся, славо страстотерпцев.
Радуйся, Церкве хранителю крепчайший;
Радуйся, Фессалии сияние всезлатое.
Радуйся, яко мощи твоя нам открыл еси;
Радуйся, яко исцелений источник нам явил еси.
Радуйся, облегчение верою к тебе притекающих;
Радуйся, утешение истинное болящих.
Радуйся, честным состраданием обогащаяй;
Радуйся, слезам нашим сострадаяй.
Радуйся, тобою бо благословение даруется;
Радуйся, тобою бо злоба умерщвляется.
Радуйся, Николае блаженне.

Кондак 11
Воспе твою благодать исцеленный твоим заступлением и иже в Византии вернии, твоя милости улучившии, Николае, Господа, прославльшаго тя, прославиша, зовуще: Аллилуиа.

Икос 11
Светозарная твоя память в весенний час, яко весна таинственная мирови показася и якоже цветами даров твоих облагоухает верных помышление, благоухание бо нетления источает всем вопиющим:
Радуйся, жертва Христова словесная;
Радуйся, верных теплое предстательство.
Радуйся, нетления ниво многоцветная;
Радуйся, христиан пристанище необуреваемое.
Радуйся, благовоние веры и кадило животворное;
Радуйся, мироварнице душевная благодати богоначальной.
Радуйся, яко подаеши благодать исцелений;
Радуйся, яко еси пастве твоей во всем увеселение.
Радуйся, верных ко Господу ходатаю;
Радуйся, пристанище наше в Боге.
Радуйся, радости причащаяся непрестанней;
Радуйся, живота наслаждаяйся вечнаго.
Радуйся, Николае блаженне.

Кондак 12
Благодати богатство небесное стяжавый – честную главу твою – радуется остров Андрос и обитель Николая, святителя Мир Ликийских, радуется, Николае, в лоне сию носящая и Спасителю вопиющая: Аллилуиа.

Икос 12
Пояй в вышних со ангельскими чинми трисвятую песнь, умоли, Николае, всякия нужды избавити и скорби верою к тебе притекающия и единомысленно ти вопиющия:
Радуйся, Ангелов сожителю;
Радуйся, бисере Господень.
Радуйся, богоносных отец равночестный;
Радуйся, святых подвижников равновенчанный.
Радуйся, преподобный в мученицех и горних причастниче;
Радуйся, благодати лучшия богоносный подателю.
Радуйся, яко еси неизреченных созерцателю;
Радуйся, яко еси в скорбех избавителю.
Радуйся, тобою бо страстей очищаюся;
Радуйся, тобою бо света исполняюся.
Радуйся, живота моего предстательство;
Радуйся, всех благочестивых радосте.
Радуйся, Николае блаженне.

Кондак 13
О, Николае мучениче, воине Господень, преподобномучеников славо, от всякия скорбнаго обдержания и искушений многообразных избави любовию тя чтущия и Троице вопиющия: Аллилуиа.
Сей Кондак читается трижды. И паки Икос 1 «Ангельское житие…» и Кондак 1 «Избраннаго мученика…»

Молитва
Всеславне преподобномучениче Христов, святе Николае, глаголам Христа Бога всею душею и всем сердцем последовавый, и страдальчески равноангельским житием Ему благоугодивый. Всесвятое имя Спасителя паче всякаго имени исповедовавый, и Его ради готовно кровь свою проливый и от Него достойно чудес дарованием и силою исцелений прославляемый, и всем подававяй теплаго твоего предстательства спасительное заступление. Тебе молимся в час сей: призри с высоты небесныя и исполни прошения наша, со благоговением и верою притекающих ко всечестным мощам твоим. Не презри, святе, моления нашего, и избави нас от всякия душевныя и телесныя болезни и печали, яко многое дерзновение ко Христу стяжавый. Благослови мученическим твоим молением и благодатию жилища наша и дела рук наших, притекающих к тебе тепле. Умоли нам от Господа улучити укрепление и здравие, земли плодоносие и всякое благодеяние, и отгони от нас всякое искушение и всякое действо началозлобника врага, хотящего гибели нашея, и молися ко Господу дати нам прегрешений оставление, в бесконечной Его милости, яко Благ есть и Человеколюбец. Аминь.

Кондак, глас 2
Подобен: Теченьми кровей твоих...
От Восток воссиявый, Николае, озаряеши ны Божественными дарованьми, сего ради, яко честным умилостивлением, твоею пречестною главою обогатившеся, приемлем благодать и милость.

Тропарь, глас 2
Подобен: Егда от древа...
Всех притекающих верно к дивному твоему ходатайству и восхваляющих тя, святе Николае, преподобномучениче Христов и всечестныя мощи твоя лобызающия покрый и сохрани от всякия скорби, избавляя от бед зимы и горьких свобождая болезней, ко Владыце молитвами твоими.

Тропарь, глас 1
Подобен: Пустынный житель...
От востока воссиявый, в Вуненах подвизался еси, Николае всеблаженне, пострадав крепчайше. Сего ради и прославленный Христом источаеши дары притекающим к главе твоей честней, преподобномучениче славне. Слава Давшему ти крепость, слава Венчавшему тя, слава Действующему тобою всем исцеления.

Величание:
Величаем тя, святый преподобномучениче Николае, и чтим честная страдания твоя, яже за Христа претерпел еси.