Кондак 1
Избранную Божией Матерью и крепкую наставницу Иверии, светом Божественной веры ю просветившую, блаженную равноапостольную Нину ныне восхвалим, яко выну со дерзновением предстоящую и молящуюся за нас. Ты же, о, Нино всеблаженная, не престай молитися о нас, да со умилением благодарственно зовем ти:
Радуйся, Нино, страны Иверския просветительнице.

Икос 1
Ангелов и человеков Творец, егда благоизволи призвати народ Иверский от тьмы идолослужения ко свету Истины и Правды вечныя, посла тя, проповедницу воли Своея. Тем же, благодаряще Господа, славословим тя, с веселием зовуще:
Радуйся, равноапостольная Нино, ко просвещению народа Иверского премудрым Промыслом предизбранная.
Радуйся, преславная, яко тобою имя Господне во всех концах земли Иверския прославляется.
Радуйся, яко от всех родов христианских святое имя твое с любовию воспевается.
Радуйся, от Матери Господа пронареченная.
Радуйся, стране Иверской дарованная.
Радуйся, Нино, страны Иверския просветительнице.

Кондак 2
Видя людей, кумирам служащих, яко голубица, воспарившая любовию своею, обратила еси их ко Творцу и, благодатию обновленнии, воспеша Богу с любовию: Аллилуиа!

Икос 2
Разумом Всевышний осени тя, егда предстала еси пред царем Мириамом, — отягченный слух его от гласа проповеди твоея открыся, омрачение ума рассеяся светом учения Христова, тобою возвещеннаго, тем же вопием ти:
Радуйся, яко орел во очию твоею вообразившая страну Иверскую.
Радуйся, святою ревностию ко Господу разжегшаяся.
Радуйся, неоцененное сокровище страны Иверския.
Радуйся, и в земле Российстей благоухающая.
Радуйся, наставнице наша предобрая.
Радуйся, рабо Христова прехвальная.
Радуйся, Нино, страны Иверския просветительнице.

Кондак 3
Силою свыше умудренная, речи чуждых племен уразумела еси, прехвальная Нино, в видении Самого Господа узрела еси, тем же в земли неплодней, богомудрая дево, люди Иверския ко Христу привела еси, воспевая Богу песнь: Аллилуиа!

Икос 3
Имея в сердце своем веру твердую, на подвиг мужественно устремилася еси, мудрая благовестнице, тем же похвалами сими восхваляем тя:
Радуйся, гласу Божественной благодати прилежно внимавшая.
Радуйся, водительству Святаго Духа усердно последовавшая.
Радуйся, яко со тщанием искала еси хитона Христова.
Радуйся, пчело трудолюбивая, мудре взыскавшая цветы райския.
Радуйся, Нино, страны Иверския просветительнице.

Кондак 4
Бурею недоумений не поколебалася еси, всемудрая дево, неверия плевелы исторгла еси, крестивши народы Иверския во Имя Троицы Безначальныя, да вси воспевают Богу песнь: Аллилуиа!

Икос 4
Слышаша царие и старейшины о вере истинней, с веселием востекоша ко Святому Крещению и отрекшеся от пути заблуждения, с радостию восхвалиша тя:
Радуйся, яко святым заветам научила еси.
Радуйся, яко Божественное семя всеяла в сердца наша.
Радуйся, светильниче, светом веры просиявшая.
Радуйся, народы Иверския ко Христу приведшая.
Радуйся, Нино, страны Иверския просветительнице.

Кондак 5
Боготканную одежду святого Крещения людем иверским даровала еси, всю страну плодоносну сотворила еси, тем же благохвальнии людие от лет древних благочестно воспевают Богу: Аллилуиа!

Икос 5
Видевше людие чашу благодати, излияньми Духа Святаго о Церкви Иверския богатно растворенную, преславно торжествуют, на Вечерю вся верныя созывают с похвалами сими:
Радуйся, Венцем Христовым венчанная.
Радуйся, дарами духовными обогащенная.
Радуйся, светом Господним вся озаренная.
Радуйся, Нино, страны Иверския просветительнице.

Кондак 6
Пастыри и учители, их же призвала еси в землю Иверскую, со тщанием течаху на делание Божие, благодарственно поюще Призвавшему народ сей ко спасению Господу: Аллилуиа!

Икос 6
Возсия пречудный Свет Истины в душе народа Иверскаго, его же ощутивше, радостно и мы ублажаем тя:
Радуйся, яко дивно житие твое.
Радуйся, яко вожделенна память твоя.
Радуйся, яко в духовней радости вси народы торжествуют.
Радуйся, яко благословенно пришествие твое.
Радуйся, яко вся нам бывает во благо с тобою.
Радуйся, Нино, страны Иверския просветительнице.

Кондак 7
Хотя взыскати хитон Господень, страну Иверскую посетила еси, тем же и подвиг доблестный совершила еси, да вси людие, последующе стопам твоим, благочестно взывают Богу: Аллилуиа!

Икос 7
Ново творение во Христе яви Господь по святем Крещении люди своя: ревнителие бо первее бывше в идолослужении, последи выну по вере Христовой возревноваша вси, возлюбивше кротость и милосердие, воздержание и целомудрие и все житие по Господним заповедем. Чудящеся убо благому пременению сему, благочестно взываем:
Радуйся, неустанная проповеднице.
Радуйся, славы Божия ревнительнице.
Радуйся, душ человеческих охранительнице.
Радуйся, Нино, страны Иверския просветительнице.

Кондак 8
Странно бе, купно и радостнотворно видение, егда многочисленный сонм мужей и жен, юношей и дев, такожде и незлобивых младенцев с радостию крестися во Имя Отца и Сына и Святаго Духа, поя песнь: Аллилуиа!

Икос 8
Вся была объята радостию неизреченною, Нино достоблаженная, видя люди крещаемыя и в умилении сердца молила еси Господа, да призрит на новопросвещенных людей Своих и утвердит их в вере и благочестии. Воспомиинающе убо дивное чудо сие, приносим ти похвальная пения сицевая:
Радуйся, виновнице спасения безчисленных душ в земле Иверской.
Радуйся, неоскудеваемый источниче благословения и милостей Божих к народу сему.
Радуйся, благая вертоградарнице, сад Божественныя веры насадившая.
Радуйся, поточе сладости, напоившая водою благочестия люди Иверския.
Радуйся, веру Божественную прославившая.
Радуйся, прелесть идольскую посрамившая.
Радуйся, Нино, страны Иверския просветительнице.

Кондак 9
Все естество Ангелов прослави тя, Нино богомудрая, егда увиде тя добрую наставницу веры Православныя, тем же и ныне призри на пастырей и учителей, матерем и отцам споспешествуй и ныне в научении, укрепи и наставь в трудах апостольских, да вси возрастают в вере Истинней, поюще Богу: Аллилуиа!

Икос 9
Витии многовещаннии не могут достойно изобразити величие дел твоих, водворила бо еси веру Божественную, избавила еси люди от вечныя погибели, открыла еси путь истинному просвещению, сего ради с благоговением зовем:
Радуйся, истинного просвещения насадительнице.
Радуйся, злых обычаев искоренительнице.
Радуйся, святых храмов создательнице.
Радуйся, всем чтущим тя верная заступнице.
Радуйся, Нино, страны Иверския просветительнице.

Кондак 10
Спасти хотя люди от бездны погибели, подъяла еси труды попечения, обходя грады и веси земли Иверския, учила всех воспевати Единому Истинному Богу: Аллилуиа!

Икос 10
Стена твердая была еси во дни жития твоего всем притекающим к тебе, недуги душевныя и телесныя врачуя, всем молитвенница была еси. Тем же буди и нам щит необорим в нуждах и скорбех наших, да с любовию вопием ти:
Радуйся, добрая наша молитвеннице.
Радуйся, в бурях житейских охранительнице.
Радуйся, скорая нам помощнице.
Радуйся, вдов и сирот питательнице.
Радуйся, Нино, страны Иверския просветительнице.

Кондак 11
Пение всеумиленное приими от нас, угоднице Божия, утверди веру Православную, искорени вся ереси и расколы, да вси единым сердцем и едиными устами поем Богу: Аллилуиа!

Икос 11
Светильниче пресветлый, сиянием своим всю страну Иверскую просветивший, разгони и ныне мрак искушений, укажи нам путь ко спасению, да прославляя тя, глаголем:
Радуйся, просвещенная от незаходимого Солнца Правды.
Радуйся, путеводительнице, правый путь к вечному спасению нам указующая.
Радуйся, укрепление проповедников Православия.
Радуйся, покровительнице благочестия.
Радуйся, Нино, страны Иверския просветительнице.

Кондак 12
Благодать Пресвятаго Духа испроси нам, Нино преславная, да не бесплодна будет вера, в нас насажденная, но, да уклоняющеся от пути нечестия, достигнем вечнаго спасения, поюще во Свете лица Божия: Аллилуиа!

Икос 12
Поюще твоя премногая и славная деяния, явленная народу Иверскому, вси с любовию поем:
Радуйся, несокрушимая наша оградо.
Радуйся, древо райское.
Радуйся, первостоятельнице святых жен.
Радуйся, Апостолов сопрестольнице.
Радуйся, яко на страну нашу всегда взираеши.
Радуйся, яко благ временных и вечных нам ходатайствуеши.
Радуйся, Нино, страны Иверския просветительнице.

Кондак 13
О, праведная Нино, святая, равноапостольная! Милостиво приими от нас благодарение сие и моли Всеблагаго Господа пробавити милость Свою на род христианский, утверди в правой вере и благочестии, храня от всех бед и зол, да сподобимся вечно купно с тобою воспевати: Аллилуиа, Аллилуиа, Аллилуиа!

Молитва
О, великая угодница Божия, богоизбранная и богопрославленная святая равноапостольная Нино! Услыши наши молитвы, приими и пение умиленное, умилостиви к нам Господа, не попусти нам, хвалы твоея ревнителем, во гресех погибнути, отжени от нас вся искушения, охраняй твоим заступлением, да всегда радостно воспоим:
Радуйся, Нино достохвальная. Аминь.

Автор акафиста архиепископ Никон (Петин).

Взято с сайта http://ierokirik.livejournal.com/17236.html