Акафист краткий Царю Мученику Николаю II Акафист краткий Царю Мученику Николаю Александровичу, пятилетия ради прославления Его земною Церковию составленный, назначенный для частого употребления

Кондак 1
Возбранный адаманте домостроения Божия, Главо угла Священной истории распутия, аще и отвергнутый каменщиками вольными, обаче неотступно Христа о России молящий, подаждь нам веру твою и терпение твое, подаждь любы твою к отечеству нашему, да поем ти: Радуйся, Царю Николае, иконо Руси Святой.

Икос 1
Ангела-хранителя образ являеши нам, всяко неосязаем сый, обаче ближе, негли срачица телеси коемуждо верному сыну России-матушки, иже взывает святому царю:
Радуйся, твердое тверди Небесной;
радуйся, нуждный всем, аки воздух безтелесный.
Радуйся, лицем святым сиявый верным;
радуйся, покровен являяйся скверным.
Радуйся, Царю Николае, иконо Руси Святой.

Кондак 2
Видящи ближния твоя - Царицу святую, святых твоих чад, поучаемся от них имже око не виде, ухо не слыша и не леть словесы человеческими глаголати, яже вся суть о тебе, темже восклицаем: Аллилуиа.

Икос 2
Разум недоразумеваемый буйства проповеди Божией есть вся, яже о тебе: похвалися ныне, святче Божий, токмо о Кресте Христовом, да поем ти:
Радуйся, из шапки Мономаха премудрость заемлющий;
радуйся, полковниче, в полк Руси Святой нас приемлющий.
Радуйся о дружбе с юродом;
радуйся, отрекшийся кровь пролити народа.
Радуйся, Царю Николае, иконо Руси Святой.

Кондак 3
Сила Вышняго ты еси, святый Царю: сии на колесницах ухищрений плотскаго ума, сии же на конех гордости житейской: ты же сердце свое полагал еси в руце Божией: темже силы Божии творятся о имени твоем, аще кто молится о тебе: Аллилуиа.

Икос 3
Имущи приятное Богу существо, вся слагал еси в сердцы твоем, от Аскольда даже до смерти деда и чудеснаго в Борках спасения Семьи твоей, темже "Никто как Бог" архангельски возгласил еси при исходе твоем, слыша с Небеси:
Радуйся, святых праотцев твоих послушниче;
радуйся, присный долга мучениче.
Радуйся, свидетелю Христов;
радуйся, плодоносяй Ему иже во сто.
Радуйся, Царю Николае, иконо Руси Святой.

Кондак 4
Бури житейския умиряются о имени твоем, возлагающу ти руце твои на наши главы, о екзорцисте новый: мир Христов по дару Его подаеши нам, не так как мiр дает; мы же безмолвствуем сице: Аллилуиа.

Икос 4
Слышаша архипастырие ангела земнаго, Русскаго Царя, ангельский образ в пострижении прияти хотящаго, нам прикровенно открыша бездну святыни твоея, да воспоем:
Радуйся, премудраго Невскаго схимы наследниче;
радуйся, Боголюбиваго самодержавия исповедниче.
Радуйся, власяницу Донскаго духовне носивый;
радуйся, опричную тайну по смерти явивый.
Радуйся, Царю Николае, иконо Руси Святой.

Кондак 5
Боготечная звездо явился еси, став пресветло идеже бысть двухтысящелетнее Отроча, якоже пастырие, ускорив ко яслем, и якоже волсви, ладан беззаветныя веры, смирну надежды во тьме кромешной, злато любве твоея ко Христу и России принесл еси, у Престола Троицы поюще: Аллилуиа.

Икос 5
Видевше отроцы яко халдейстии, иновернии и инославнии народы державы твоея верность Белому Царю исповедающих, неверие же Новаго Израиля, якоже и при Иезикииле, обличающих, равен был еси всем, Отче Державный. Обаче сыны русские наказуя прикровенне, инославнии слуги на Крест с собою привел еси: - "Днесь будеши со мною в Раи", - глаголя им, тебе поющим:
Радуйся, поминаяй Георгия Угрина;
радуйся, о имени патриарха-мордвина.
Радуйся, болярина Келлера нам возсиявый;
радуйся, болярином Унгерном монголом престол возставивый.
Радуйся, Царю Николае, иконо Руси Святой.

Кондак 6
Проповедниче Божественныя Тишины еси ты, паче всех возлюбивый Царя Тишайшаго: темже в мире глубоце прави в России Христову Церковь, Никоне Новый, Афону имясловскому Гроб Господень сочетавая в сердцах поющих ти: Аллилуиа.

Икос 6
Возсиявый во Египте новейшем, беснуемом об идолех своих, был еси и близ Египта древлего, праведности великаго русскаго пиита-ефиоплянина взыскуя. Темже святости твоея достало и у богоборнаго Льва останок света Христова узрети, надгробне глаголя о нем. Темже, о воине Христов преизящный, зрим искусну святость твою, и в тернии сеющу, внегда воспоем ти:
Радуйся, русскаго Неба и Земли Богу сотворче;
радуйся, Григорием усердный миротворче.
Радуйся, слово России умно-сердечное;
радуйся, имже творит спасение наше Слово Превечное.
Радуйся, Царю Николае, иконо Руси Святой.

Кондак 7
Хотящу тебе рай насадити на востоце, в землях алтайских, "Адаме, где еси" - взывал Царю-страдальче. Людие же Русскии избраннии обнажилися суть веры отеческия, отверглися пети: Аллилуиа.

Икос 7
Новую Александру, Царицу-мученицу благовествуеши нам, ангела скорбнаго, иже бысть по тебе, обаче ста впереди в вере и любви. Брак честен и ложе нескверно воспеваем сице:
Радуйся, от Бога приявый жену;
радуйся, от Серафима приявый сына.
Радуйся, друже Небеснаго Жениха;
радуйся, напитанный гласом Его излиха.
Радуйся, Царю Николае, иконо Руси Святой.

Кондак 8
Странное рождество сына Царскаго видяще от источника Серафимова, зрим и странное житие его за молитвы пророка Божия страннаго; страшася же устраниться Небесных Стран, Дивному в тайнах поем: Аллилуиа.

Икос 8
Весь бе в нижних, даже до нощи глубокой влачил еси бечеву трудов Государевых, обаче непоступно был еси Небесный Человек: темже остави нам долги наша пред Отечеством, да и мы будем люди долга, тебе восклицающе:
Радуйся, отцем наученный вся на рамех держати;
радуйся, даже доныне тайный за мiр Христов предстатель.
Радуйся, смертный приговор отменивый, возстав в полунощи;
радуйся, авраамскую куплю длящий.
Радуйся, Царю Николае, иконо Руси Святой.

Кондак 9
Всякое естество ангельское удивися целомудрию твоему: темже аще и странне отреклся еси, обаче и во отречении, и по отречении пребыл еси неизменен, тойжде и во веки, Помазанник и Император, Православия охранитель, от неудобопреклонных слыша: Аллилуиа.

Икос 9
Ветия многовещанныя, думныя боляре, прежде крамолы отреклися служити тебе, егда возложил крест командования верховнаго на рамена твоя. Отвещая о всех, иже во отчине твоей, отвещаеши и о сей палате безответной, моляще о ихже не ведают, что творят, глас хлада тонка слыша, сице:
Радуйся, Христово у Ирода молчание;
радуйся, страстотерпцев увенчание.
Радуйся, воеводо сокровенный Руси;
радуйся, наша победа на Небеси.
Радуйся, Царю Николае, иконо Руси Святой.

Кондак 10
Спасти нельзя спастись не хотящих - от человек невозможно, рече Господь: - Богу же вся возможна. О, гряди, Христе, святым Царем - да перекрестится Россия паки быти Русью Святей, Богу поюще: Аллилуиа.

Икос 10
Стена есть непроходимая мытарство немилосердия, обаче милосердым Царем пройдем, яко по суху, милости страшной его сице поюще:
Радуйся, - "аз буду жертва", - глаголющий;
радуйся, другия жертвы не волящий.
Радуйся, у Георгия просящий милости;
радуйся, яко на Пасху народ победою простил.
Радуйся, Царю Николае, иконо Руси Святой.

Кондак 11
Пение наше и крепость наша Господь: ты же, молчальниче дивный, Божия песнь еси об отечестве нашем; темже ликуем о тебе, Боже, Царем храни вся православныя, Аллилуиа.

Икос 11
Светоприемная свеща, во еже взыскати останок, возженная, град, вверху горы времен стоящий, ты святый мучениче-искупителю-Царю. О тебе заблуждшия овчата русские припевают сице:
Радуйся, сосуде исполненный елея и вина;
радуйся, добре самарянине, егоже вемы Руси хозяина.
Радуйся, грядый в полунощи;
радуйся, о Бозе России женише.
Радуйся, Царю Николае, иконо Руси Святой.

Кондак 12
Благодати тезоименная дочь названная твоя, болярыня Анна купно со священными горлицами Ольгою, Татианою, Мариею и Анастасиею пять убо чувствий нам являются, имиже недоведомая небесная познаваем, девами премудрыми пятью воспевающе: Аллилуиа.

Икос 12
Поюще, вопиюще и глаголюще тебе, Никола Святоша новый, уныния и отчаяния свобождаемся, волю Божию о нас и отечестве нашем взыскующе паче всего возлюбити, тебе же благодарим сице:
Радуйся, за ны испивый горькую чашу;
радуйся, яко свет и тепло ты и радость наша.
Радуйся, раздравый клятву еже на нас;
радуйся, павшей России архангельский глас.
Радуйся, Царю Николае, иконо Руси Святой.

Кондак 13
О славо святая отечества, великумучениче царственный Николае! Согрешихом на Небо и пред тобою и уже недостойни есмы нарещися сыны твои, но приими нас, яко опричники твоя, работати Богови со страхом и радоватися Ему со трепетом, о тебе поюще: Аллилуиа, Аллилуиа, Аллилуиа.
Этот кондак, читается трижды, затем 1-й икос и 1-й кондак

МОЛИТВА первая
О Великий, Боговенчанный, Белый Царю, Императоре Рима Третияго, святый страстотерпче и мучениче искупителю Николае! Вся прообразовательная грядущаго паки Христа-Царя на ся кротце возверзаяй Духом Святым, сердце храня присно в руце Небеснаго Отца, ты дал еси сладостный грозд, яко зримый Навином древле: лозу благоденственнаго мирнаго жития, здравия же и спасения и во всем благаго Божия поспешения народу твоему: мы же, упившися вином сим сладчайшим отцовской любви твоей, дерзнули, подобясь Хаму обнажити святую наготу твою и Семьи твоей. Оттуду ослепленные, якоже Савл на пути в Дамаск, взываем ти: приими ны, вспять возвращающихся, якоже Сим и Иафет, покрыти любовию и верою в милость Божию и предстательство твое хамов наш грех, и прости нам измену, и трусость, и обман. Аминь.

Печатается по: Акафист краткий Царю-Мученику Николаю Александровичу, пятилетия ради прославления Его земною Церковию составленный, назначенный для частого употребления. Б.м. и г. 27 с.