Кондак 1
Богоизбранный святый страстотерпче царю Николае, рода царскаго преславное увенчание, сонм Российских новомучеников с семейством твоим возглавивый, воспеваем ти похвальная, яко подвигом веры, любве и терпения прославил еси Отца Небеснаго и честь Отечеству твоему православному стяжал еси. Ты же, предстоя ныне со царицею и чадами своими пред Престолом Царя Всевышняго, умоли Его о нас, поющих ти:
Радуйся, Николае, богоизбранный царю и великий страстотерпче!

Икос 1
Ангелом в любве и смиренномудрии подражая, боголюбиве Николае, во отрочестве о царстем венце, яко о тяжцем кресте помышлял еси, сердцем же стремился еси Христу благоугождати. Обаче, долг свой, яко Наследника Престола, ведая, и о могуществе и процветании Державы Российстей ревнуя, приял еси царство, яко послушание, от Бога ти данное, и всего себе на служение людем своим предал еси. Мы же, благодарни суще за таковое самоотвержение твое, вопием ти:
Радуйся, благочестиваго корене отрасле пречестная;
Радуйся, добродетелем великих предков твоих подражателю.
Радуйся, царскаго их служения мудрый преемниче;
Радуйся, Отечество и народ свой паче жизни возлюбивый.
Радуйся, правителем земли Русския от Бога поставленный;
Радуйся, дома Пресвятыя Богородицы верный хранителю.
Радуйся, нищих и обездоленных щедрый попечителю;
Радуйся, гонимых и обидимых скорый защитниче.
Радуйся, Николае, богоизбранный царю и великий страстотерпче!

Кондак 2
Видев, богомудре царю, единаго Владыку над собою — Бога, Тому единому сердце твое предал еси, и был еси посреде общества богоотступническаго, яко юродивый среди мудрых, посрамляя по словеси апостола Павла мудрость века сего. Сего ради, верно храня заповеди Христовы и твердо кормило власти царстей содержа, велие могущество и процветание народу Русскому и всим народам Российстим стяжал еси, Церковь Православную всюду укрепляя и уча всех пети Богу: Аллилуия!

Икос 2
Разум богопросвещен имея, святе Николае, и возлюбленному Отечеству твоему и всим народом благоденствия желая, к царем и правителем именем Христовым воззвал еси, да вкупе согласившеся, умалят смертоносная вооружения и возбранят войнам кровопролитным. Обаче правителие совет твой зле отвергоша, нечестие свое являюще, тя же единаго воистину благочестиваго царя и миротворца, всыновления Господу достойнаго, показующе. Темже мы, преславным деянием твоим дивящеся, со умилением взываем:
Радуйся, миротворче преславный;
Радуйся, царем и правителем звездо богосветлая.
Радуйся, войн кровопролитных препятие;
Радуйся, православнаго Отечества мудрый строителю.
Радуйся, стено всем обидимым;
Радуйся, всим верным надеждо и упование.
Радуйся, любве Христовой проповедниче;
Радуйся, весь ум и сердце Богу предавый.
Радуйся, Николае, богоизбранный царю и великий страстотерпче!

Кондак 3
Силу и крепость Державы твоея, истинный христолюбче царю Николае, в покрове Божием и молитвах святых угодников полагал еси, а не в мудрованиих человеческих. Сего ради явился еси Церкве Православныя во всем мире заботливый попечитель, мудрость премирную веры Христовой держа противу слепоты разума невернаго. От инех же подданных твоих вместо благодарения и служения вернаго, клеветы и оскорбления приял еси. Обаче, поминая слово Божие: Мне отмщение, Аз воздам — терпел еси вся благодушно, на суд Божий отдая злобу их, да раскаются и воспоют благодеевшему им Богу: Аллилуия!

Икос 3
Имея злобу неутолимую, завистник человеков и отец всякой лжи диавол виде славу России и благочестие твое, царю Николае, непоколебимое, и рассвирепе на тя, лжами, клеветами и коварством возбудив богоотступников Православное царство разрушити. Попусти убо Господь на малое время беззаконием творитися, покаяния злобствующих ожидая. Ты же, царю святый, скоро верных сынов Российских на одоление нечестивых послал еси, и паки мир и покой в стране водворися до времени, да вси благочестивии людие возгласят ти:
Радуйся, дерзостных бунтовщиков скорый победителю;
Радуйся, богопротивных беззаконий крепкий потребителю.
Радуйся, милосердием злобу угашаяй;
Радуйся, терпением и любовию зло побеждаяй.
Радуйся, прельщенных и обманутых терпеливый вразумителю;
Радуйся, милосердный царю, кающихся скоро милующий.
Радуйся, самодержавия надежный защитниче;
Радуйся, о спасении Отечества присный к Богу молитвенниче.
Радуйся, Николае, богоизбранный царю и великий страстотерпче!

Кондак 4
Бури скорбей имущему претерпети, державне Николае, дарова ти Господь во утешение боголюбивую царицу Александру, яко голубицу чистую, имущую быти с тобою единою душею, единым сердцем. Из нея приумножи Бог царский род чадами благословенными: царевнами Ольгою, Татианою, Мариею, Анастасиею и царевичем пречудным, светлым отроком Алексием, да вси в согласии и любве воспевают купно с тобою Вседержителю Богу: Аллилуия!

Икос 4
Чувствоваше сердце твое, царю христолюбиве, радость многую и веселие, егда с семейством твоим малое время пребывал еси, николиже бо являшеся в ближних твоих лицемерие или лукавствие, имиже слуги невернии тя огорчеваху. Буйствующии же подданныи твои истинное благочестие забыша, и в слепоте душевней и страстех пребывающе, поношаху имя твое пречестное безумным злословием, не разумевая, яко Божий Помазанник ты еси и яко тяжко взыщет Господь с рабов неверных. Мы же, ведяще, яко ты любовию вся покрывал еси, и терпению и милосердию твоему дивящеся, вопием ти таковая:
Радуйся, образе царственныя любве и терпения;
Радуйся, на Бога вся своя печали возложивый.
Радуйся, кротостию и молчанием клевету одолевый;
Радуйся, яко любы твоя ко злословящим тя не оскуде.
Радуйся, царице заботливый супруг и чадом отец любвеобильный;
Радуйся, семейство твое на подвиг мученический мужеством своим воодушевивый.
Радуйся, христианскаго благочестия поборниче;
Радуйся, любовию Христовою сердца чад своих просвящаяй.
Радуйся, Николае, богоизбранный царю и великий страстотерпче!

Кондак 5
Богодоховенным повелением твоим, царю боголюбиве, и твердым предписанием нерешительное архиереев преодолено бысть, и велиций угодник Божий преподобный Серафим Саровский волею Господнею прославися. Бысть же прославление сие Ангелом небесным и всему христианскому роду в радость велию, многими бо чудесы возвеличи Христос сего Святаго, тя же яви богомудраго царя, всех научающаго пети Богу: Аллилуия!

Икос 5
Видим мы, людие твои, святе царю Николае, яко твоими неустанными труды и терпеливым попечением укрепися Русь Святая в царствование твое. Многими бо храмы и обители святыми украсися, и многих угодник Божиих честнии мощи православному народу явишася. Вся же сия совершишася, да уготовится народ христолюбивый ко огненному искушению, на Россию грядущему, поспеша бо нивы Божия и виноградник Христов к жатве кровавой. Темже и мы, царю святый, тебе, от мучителей много пострадавшему, взываем:
Радуйся, царю, угождение Богу превыше всяческих поставивый;
Радуйся, разум в послушание Христу пленивый.
Радуйся, народ твой в вере добре утвердивый;
Радуйся, ревностию по Бозе благоволение к себе Того стяжавый.
Радуйся, предстательству святых Божиих Россию вверивый;
Радуйся, православнаго Отечества утверждение.
Радуйся, царскаго рода предивное украшение;
Радуйся, Святей Руси сокровенный светильниче.
Радуйся, Николае, богоизбранный царю и великий страстотерпче!

Кондак 6
Проповедашеся Христос в людех Российских и иноземцех верой и благочестием твоим, царю православный, и труды твоими во славу Его. Сего ради возненавидеша тя богоборцы и потщашася первее опоры и помощи тя лишити, слуг твоих клеветами и всяким коварством поражающе: оваго бо наветами прельстиша, оваго же убиша, оваго убо в безбожие соблазниша. И всяко разжигаху неразумных противу Помазанника Божия, да бы не пели ктому на Российстей земли Богови: Аллилуия!

Икос 6
Возгореся огнь брани велия, егда нападоша завоевателие на царство Сербское, и тако прииде на Державу Российскую испытание тяжкое. Ты же, царю святый, имея тщание о защите православных, воздвигл еси войско свое на спасение страны Сербстей, и по зову твоему ополчися народ Русский противу злочестивых супостатов, воспевая ти таковая:
Радуйся, единоверных братий доблий защитниче;
Радуйся, покровителю народов православных.
Радуйся, России славо и украшение;
Радуйся, врагов Отечества устрашение.
Радуйся, закона и правды твердый хранителю;
Радуйся, антихристу стено неодолимая.
Радуйся, буйствующих завоевателей грозное наказание;
Радуйся, беззаконий их нелицеприятное обличение.
Радуйся, Николае, богоизбранный царю и великий страстотерпче!

Кондак 7
Хотящим лукавым царедворцем измену сотворити, не ведал еси коварства их чистым сердцем твоим, боголюбиве Николае. Пребысть же светла любовь твоя ко всем, яко исчезоша душа твоя о спасении народов славянских. Военачальницы же невернии и сановнии властителие, в безбожии обуявшии, сами яму себе ископаша, обеты присяги по наущению вражию поправше и погибель Российстей Державе уготовляюще, не ведаша бо пети Богови: Аллилуия!

Икос 7
Дивное мужество явил еси, Самодержче Российский, в тяжцей и страшней войне, над войском и корабли единоначальствуя. Молитве же прилежа и благодатию Божиею укрепляяся, купным с вои твоими пребыванием и собеседованием воодушевляти тыя на брань тщался еси. Изменницы же и врази России, яко иуды новии, отсутствующу тебе, воздвигоша на тя пяту свою, смуту в воинех и в народе тайно всевая; не разумеша бо, яко подобает верность царю и Отечеству хранити и воспевати ти:
Радуйся, Помазанниче богоизбранный;
Радуйся, царю великодержавный.
Радуйся, Российстей Державы славо и утверждение;
Радуйся, всякому злодейству крепкое возбранение.
Радуйся, Православия и благочестия в стране твоей несокрушимое ограждение;
Радуйся, благонравия народнаго ревнителю.
Радуйся, войска Российскаго попечителю;
Радуйся, Божиих велений исполнителю.
Радуйся, Николае, богоизбранный царю и великий страстотерпче!

Кондак 8
Странными и чуждими света Христова и благочестия мнози людие Российстии явишася, оскуде бо вера в них, сердца своя ожесточиша, милости Божия и славная дела царская нивочтоже вменяюще, нечестивым же хулителем и слугам антихристовым во всем попускающе. Сего ради прииде исполнение времен на Русь в царствование твое, святый страстотерпче, и испытана бысть держава и народ ея, яко злато в горниле, да отделены будут овцы от козлищ, пшеница от плевел, и да явится дело каждаго, поющаго Богу: Аллилуия!

Икос 8
Всего себе Христу предал еси, царю святый, егда обыдоша тя изменницы и приступиша к тебе, дела страннаго и небывалаго требуя — отречения от престола царского. Сего ради оружие пройде душу твою, страстотерпче Николае, об измене бо скорбя и о державе мятущейся тяжко болезнуя, стал еси об нощь на молитву, печаль горькую Богу изливая, Отечество же свое Пресвятей Богородице вверяя. Бысть же сие моление твое, яко Гефсиманское, и умудри тя Господь уступити, яко да заградятся уста нечестивых и накажутся тии нечестием своим. Мы же, ведуще страдания твоя и подвиг, вопием ти:
Радуйся, безгласным, яко агнец непорочный прямо стригущаго, пребывый;
Радуйся, во смирении глубоцем царский венец на терновый пременивый.
Радуйся, незлобием злочестивых посрамивый;
Радуйся, верность Богу даже до конца сохранивый.
Радуйся, кровопролития не допустити всем сердцем желавый;
Радуйся, горькую обиду кротко понесый.
Радуйся, вся врагом простивый;
Радуйся, отмщати за тебя воспретивый.
Радуйся, Николае, богоизбранный царю и великий страстотерпче!

Кондак 9
Вся бедствия народа богоизбраннаго видящи, умилосердися Матерь Божия о людех Своих, издревле бо Русская земля Домом Пресвятыя Богородицы именуется, и прия Скипетр и Державу от руку царя земнаго, рабами злыми отвергнутаго, новую чудотворную икону Свою «Державную» верным дарующи, да поют непрестанно Господеви: Аллилуия!

Икос 9
Ветии благочестивии недоумеют воспети страдания страстотерпец царственных, егда нечестивцы убиение онех замыслиша для разрушения России Православней, и узы на царя и царицу со чады наложивше, повлекоша тех тяжким Голгофским путем. Попусти же сия Господь Милосердый, да возвеличатся сии святии угодницы Его и паче снега убелятся. Сего ради, новомученицы царственнии, крепче, неже адамант, любовь и вера ваши явишася, и паче солнца праведность ваша возсия, яко и приставником вашим дивитися. Вернии же, видевше, яковии тяжции скорби на вас наидоша, великому царю и страстотерпцу воспеша таковая:
Радуйся, царю, страданием Бога прославивый;
Радуйся, огненное испытание доблестно прошедый.
Радуйся, чашу горькую с семейством честно испивый;
Радуйся, яко мзда ваша многа на Небесех.
Радуйся, семейство твое Господеви уготовавый, яко цветник благоуханный;
Радуйся, возжегший над Россиею светильник седмосветлый.
Радуйся, кротостию Давидовою злобу врагов изобличивый;
Радуйся, Христу и мучеником последствуя, за врагов моливыйся.
Радуйся, Николае, богоизбранный царю и великий страстотерпче!

Кондак 10
Спасти хотя люди маловерныя и теплохладныя, попусти Господь беззаконным властителем самозванным, суетной злобой омраченным, святых победити, семейство царское безжалостне тяжкой смерти предати и святыни земли Российския разорити, прииде бо яко тать в нощи страшный час жатвы Христовой, да явится мудрость боголюбцев и безумие нечестивых. Ты же, царю праведне, умолил еси Господа, да не до конца прогневается, но да сохранит на Руси выну поющих Ему: Аллилуия!

Икос 10
Стеной нерушимой благочестия ограждаема, светло светлой и украсно украшенной бысть Русская земля, многими красотами удивлена бысть, церквами златоглавыми, монастырями белокаменными, и князьями грозными прославлена, и богатствами несметными исполнена. Благочестию же умалившуся, прииде погибель на христиан и пройде огненною бурею Десница Господня, да обновится паки земля Русская и прославится мужеством несокрушимым новомученик и исповедник преславных; ихже возглавившему добропобедному царю-страстотерпцу Николаю вси со умилением воспоем:
Радуйся, рода царскаго преславное увенчание;
Радуйся, сонм Российских новомучеников возглавивый.
Радуйся, Святей Руси славо и украшение;
Радуйся, кровь свою за Христа и Россию излиявый.
Радуйся, венцев небесных с семейством твоим удостоенный;
Радуйся, Отечества Небеснаго светлый жителю.
Радуйся, о народе своем выну Богу молящийся;
Радуйся, многими чудесы верныя укрепляющий.
Радуйся, Николае, богоизбранный царю и великий страстотерпче!

Кондак 11
Пения многаго достойно житие твое, новомучениче Николае, житию древняго Иова подобное, слава бо твоя умножися последи, и яко звезды небесныя явишася чудеса твоя и помощь, верным даруемая по предстательству твоему. Сего ради познаша народи боголюбивии, яко велие дерзновение пред Богом имаши о всех обидимых и во обстояниих сущих, и воспеша благодарно Тому: Аллилуия!

Икос 11
Светоподательным светильником воссия икона святаго царя мироточивая, егда прииде час помилования Святей Руси, в ней же выну останок верных сохраняшеся, безбожником на обличение и вразумление. царственное же семейство прослави Господь многими знаменьми, да познают людие всемощное предстательство пред Богом царя Русскаго, невинно от безбожник убиеннаго, о своем народе возлюбленном, и да поют ему вси радостно:
Радуйся, о возрождении Святей Руси теплый молитвенниче;
Радуйся, плененных страстьми свобождение.
Радуйся, заблуждшим ходатаю прощения;
Радуйся, к покаянию всех призываяй.
Радуйся, верным светильниче богосветлый;
Радуйся, предстателю о нас пред Богом непостыдный.
Радуйся, скорый услышателю в беде сущих;
Радуйся, всим праведным надеждо и упование.
Радуйся, Николае, богоизбранный царю и великий страстотерпче!

Кондак 12
Благодати велией на Небесех сподобишася святии царственнии страстотерпцы, да добродетельми и страданьми своими научат верныя Бога единаго любити, Ему единому служити, вся во славу Его творити, и вся Его ради терпети, да славят выну христоименитии людие российстии имя Божие, и да просветятся Светом Христовым от России вси народи вселенныя, и да воспоют купно Господеви: Аллилуия!

Икос 12
Поюще подвиги твоя, страстотерпче предивный, поминаем глаголы твоя: «Несть той жертвы, юже не принесл бых за благо Отечества моего»,— имиже научаеши всех об Отечестве православием паче жизни радети, Держава бо Российская богоизбранным сосудом истины во свидетельство народом является. Помози нам, великий царю Николае, о спасении Святей Руси помышляти и не своих си, но яже Божия, выну искати, воспевающе ти сице:
Радуйся, страстотерпче, живот свой за други своя положивый;
Радуйся, царю, заповедь любве до конца исполнивый.
Радуйся, наставниче смирения Христова;
Радуйся, святый учителю богопочитания.
Радуйся, раздоров и нестроений умирение;
Радуйся, молитвенниче о нас неусыпаемый.
Радуйся, о роде славянстем дерзновенный предстателю;
Радуйся, Российския земли небесный покровителю.
Радуйся, Николае, богоизбранный царю и великий страстотерпче!

Кондак 13
О избранниче Божий, страстотерпче царю Николае, державы Российстей и всих народов славянских хранителю и покровителю, молим тя, яко предстателя и молитвенника о нас усерднаго, вознеси о нас горячие молитвы твоя ко Господу Сил, да дарует Отечеству нашему мир и благоденствие, роду славянскому во благочестии христианстем преуспеяние, и всим верным милость Божию и спасение, да вси согласно воспеваем Богу: Аллилуия!
Этот Кондак читается трижды, затем Икос 1-й: «Ангелом в любве...» и Кондак 1-й: «Богоизбранный святый страстотерпче...»

Молитва святому царю-мученику Николаю
О святый новомучениче страстотерпче царю Николае, ты от Господа избран и помазан был еси, во еже милостивно и право судити людем твоим и хранителем Державы Православныя быти, и царское свое служение и о душах попечение со страхом Божиим совершил еси.
Испытуя же тя, яко злато в горниле, скорби горькия, яко же Иову Многострадальному, попусти ти Господь, последи же — престола царскаго лишение и смерть мученическую.
Ты же вся сия кротко и безропотно претерпел еси, яко истинный раб Христов, и сего ради ныне наслаждаешися вышния славы у Престола всех Царя, купно со всеми святыми мученики.
Мы же, аще и недостойни есмы, множества грех наших ради, молим тя, славне царю страстотерпче Николае, умоли Господа о нас, да не отвратит лице Свое до конца, да не лишит народ наш избранничества Своего, но да подаст нам разум спасения, во еже восстати нам из глубины падения.
Ты бо, святе царю Николае, имаши дерзновение велие, яко кровь свою за народ свой пролиял еси и душу положил еси не токмо за други, но и за враги своя, и сего ради предстоиши ныне в невечернем свете Царю славы, яко верный слуга Его. И тако буди нам ходатай и заступник и приклони на милосердие правосудие Божие, да не погубит нас до конца Господь, но да простит вся, и милостивно помилует, и спасет святую землю Русскую, и народ ея от всяких бед и напастей защитит.
О святый и славный наш царю страстотерпче Николае, предстательством твоим и молитвами Святаго семейства твоего, невинно убиенных царицы Александры, царевича Алексия, царевен Ольги, Татианы, Марии и Анастасии, да подаст нам Господь грехов прощение и на всякую добродетель наставит нас, да стяжем смирение, кротость и любовь, ихже вы, святии мученицы, явили есте.
И да возродится в народе нашем вера и благочестие, и да дарует нам паки Господь Самодержца благочестиваго, во еже восставити в Российстей земли престол царей православных. Да прославим Бога, и послужим Ему верно до скончания века на земли, и сподобимся царствия Его на небеси, идеже купно с тобою и со всеми новомученики и Исповедники Российскими, и со всеми святыми воспевати будем славу Отцу и Сыну и Святому Духу, ныне и присно и во веки веков. Аминь.

Тропарь святому царю-мученику Николаю, глас 7:
Ангели земли Российския, и воскресения ея путеводителие, царю Николае и царице Александро, начавшемуся богоотступлению, Державою благоверне правившии, и юныя Великия Княжны, в трудех и милосердии добре подвизавшияся, и царевичу-страдальче Алексие, — царственнии страстотерпцы, яко агнцы незлобивии, от безбожных губителей Руси мучимии и закланнии, ныне же царство вечное приимшии, молитеся Небесному Царю Царей о Державе сродников ваших, просветитися ей верою отцев и покаянием паки возродитися.

Празднование 4/17 июля

Взято с сайта kotlovka.ru