Кондак 1
Первоизбранней от всего российскаго рода, славней и равноапостольней угоднице Божией Ольге составим похвалу, яко заре во тьме идолопоклонения светом веры возсиявшей и путь ко Христу всем россияном показавшей. Ты же, яко имущая дерзновение к прославльшему тя Господу, ограждай нас от всяких бед молитвами твоими, да зовем ти:
Радуйся, святая равноапостольная княгине Ольго богомудрая.

Икос 1
Ангелов и человеков Творец, времена и лета во Своей власти положивый и судьбы царств и народов по Своей воли управляяй, егда восхоте род российский святым Крещением просветити, тогда, видя благое изволение сердца твоего, призва тя первее в познание Себе, да будеши всем россияном образ и наставница в христианстей вере. Сего ради восхваляем тя сице:
Радуйся, российскаго небесе утренняя звездо, от первозваннаго апостола на горах Киевских предвозвещенная;
Радуйся, пречудная леторасле, из нея же велие правоверия древо на земли нашей возрасте.
Радуйся, первоучительнице и просветительнице наша;
Радуйся, яко тобою познахом покланятися в Троице Творцу.
Радуйся, яко тебе ради пресвятое имя Господне от всех россиян прославляется;
Радуйся, яко и твое преславное имя вкупе с равноапостольным Владимиром во всех пределех мира восхваляется.
Радуйся, страны нашея Российския духовное сокровище;
Радуйся, всея Христовы Церкве преславное украшение.
Радуйся, градов Киева и Пскова изрядная доброто;
Радуйся, людем нашим на враги благая помощнице.
Радуйся, святая равноапостольная княгине Ольго богомудрая.

Кондак 2
Видяще тя, святая Ольго, яко крин в тернии прозябший: ты бо аще и в роде язычестем рождена еси, обаче закон Божий в сердце твоем написан всегда имела еси и целомудрие твое яко зеницу ока блюла еси, благодарно поем дивному во святых Своих Богу: Аллилуия.

Икос 2
Разумом твоим вся добре ведящи, познала еси, богомудрая Ольго, яко идоли, рукама человеческима сотвореннии, не суть бози, темже, отвергши тыя, потщалася еси познати Бога истиннаго. Сего ради, похваляюще сицевое твое благоразумие, вопием ти сице:
Радуйся, добрая жено, первее всех заблуждение россиян познавшая и тщету иодолопоклонения разумевшая;
Радуйся, истиннаго богопознания и правыя веры усердно искавшая.
Радуйся, прежде разумения закона Божия по закону совести праведно жившая;
Радуйся, прежде приятия христианския веры дела, христианом подобающая, творившая.
Радуйся, державу твою от нашествия супостат мужественно защитившая;
Радуйся, в подчиненных ти людех суды праведныя творившая.
Радуйся, царственною славою на земли и на Небеси почтенная;
Радуйся, яко равноапостольная от Бога прославленная.
Радуйся, святая равноапостольная княгине Ольго богомудрая.

Кондак 3
Силою благодати Божией движима, потщалася еси, богомудрая Ольго, достигнути Царяграда, идеже зрящи красоту церковнаго благолепия и послушающи учения словес Божественных, распалалася еси всем сердцем твоим в любовь Христову, благодарственно вопиющи Ему: Аллилуия.

Икос 3
Имущи сердце яко добрую землю, удобь восприяла еси, Ольго, семя святыя веры, познавши Христа Бога истиннаго. Темже и Крещение святое прияла еси от руку патриарха Царяграда, иже и предрече ти, яко отныне блажити тя имут российстии сынове. Исполнити убо хотяще проречение сие, взываем ти сице:
Радуйся, безконечныя пагубы верою избежавшая;
Радуйся, жизнь вечную во Христе стяжавшая.
Радуйся, благодатию Святаго Духа духовно родившаяся;
Радуйся, разумная горлице, от когтей душепагубнаго врана излетевшая.
Радуйся, под криле Орла Небеснаго прилетевшая;
Радуйся, множество душ Крещением с собою ко Христу приведшая.
Радуйся, с верою несумненною приходящих светом от честных твоих мощей осиявающая;
Радуйся, душам и телесем тех яже на пользу подавающая.
Радуйся, святая равноапостольная княгине Ольго богомудрая.

Кондак 4
Како не дивимся благоразумию твоему, Ольго преблаженная, ты бо предложение царя еллинов о браце с ним разумно отвергла еси, рекши тому: «Не брака ради приидох семо и не соцарствования ради с тобою, но да уневещуся крещением безсмертному Жениху Христу Богу: Его же паче всего возлюби душа моя и Ему же отныне во веки не престану воспевати: Аллилуия».

Икос 4
Слышавши от крестившаго тя Патриарха напутственное слово о чистоте, посте, молитве и о всех добродетелех, христианом подобающих, слагала еси сия в сердцы твоем, делы вся та исполняти обещающи. Тем же убо по долгу воспеваем ти сице:
Радуйся, ниву сердца твоего от терния душевредных страстей очистившая;
Радуйся, слезами покаяния ю оросившая.
Радуйся, яко семя слова Божия в сердцы твоем, яко на земли добрей, укоренися;
Радуйся, вдовственную твою чистоту непорочно сохранившая.
Радуйся, воздержанием и молитвою Богу угодившая;
Радуйся, милостынею Творца умилостивившая.
Радуйся, нищия и убогия потребами снабдившая;
Радуйся, просвещение земли Российския светом Христова учения провидевшая.
Радуйся, святая равноапостольная княгине Ольго богомудрая.

Кондак 5
Боготканною одеждою святаго Крещения облекшися и нетленною пищею Пречистаго Тела и Крове Христовы духовно укрепльшися, Ольго преблаженная, не убоялася еси потещи к неверным соотечественником твоим, предком нашим, проповедати им Единаго истиннаго Бога, Ему же ныне вся Россия, яко единеми усты, воспевает: Аллилуия.

Икос 5
Видевши, святая Ольго, вся люди земли Российския во тьме идолослужения погруженныя, усердно потщалася еси просветити тыя светом Христовы веры и сотворити я сыны дне и наследники Царствия Небеснаго. Поминающе убо сицевое твое попечение о них, благодарственно зовем ти:
Радуйся, премудрая властительнице народа российскаго;
Радуйся, первей христианстей царице Елене в ревности Божественней подражавшая.
Радуйся, и имя тоя во Святем Крещении приявшая;
Радуйся, честный крест Христов и святыя иконы из Царьграда во град Киев принесшая.
Радуйся, иереи и клирики с собою в Россию приведшая;
Радуйся, мудрыми твоими глаголы поучавшая люди оставити тьму языческаго нечестия и восприяти свет христианскаго благочестия.
Радуйся, многия россияны светом веры Христовы просветившая;
Радуйся, первая от земли Российския лику святых причтенная.
Радуйся, святая равноапостольная княгине Ольго богомудрая.

Кондак 6
Проповедником духоносным апостолом подражавши, Ольго богомудрая, обходила еси грады и веси державы твоея, приводящи, елико мощно бе, люди к вере Христовей и научающи их воспевати Единому в Троице славимому Богу: Аллилуия.

Икос 6
Утверждающи в державе твоей начаток веры христианския, создала еси храмы Божии во граде Киеве и в стране рождения твоего, при реце Велицей у града Пскова. И тако начаша россияне прославляти повсюду Христа Бога нашего, тебе же, просветительнице своей, похвальная воспевати:
Радуйся, яко от чистаго источника Святыя Соборныя и Апостольския Церкве чистое учение прияла еси;
Радуйся, идольских требищ и кумиров низложительнице.
Радуйся, якоже и первозванный Апостол, с проповедию Евангелия землю Русскую обходившая;
Радуйся, на местех проповеди твоея честныя кресты водрузившая, от них же многая знамения и чудеса уверения ради неверных силою Божиею содевахуся.
Радуйся, яко тобою Всеблагий Господь сыновом российским познание Свое явил есть;
Радуйся, яко чрез них и прочия многия народы светом веры просветил есть.
Радуйся, яко от корене твоего честнаго Господь святаго равноапостольнаго князя Владимира показал нам есть;
Радуйся, яко образом жития твоего святый князь Владимир подвигся прияти христианскую веру.
Радуйся, святая равноапостольная княгине Ольго богомудрая.

Кондак 7
Хотящи избавити сына твоего Святослава от пагубы вечныя, прилежно увещавала еси его оставити почитание идолов и веровати в Бога истиннаго. Но той не внят матернему наказанию твоему и не восхоте нечестие свое пременити на благочестие. Темже, яко неверный, отчуждися жизни вечныя и не сподобися с тобою в горнем Царствии воспевати: Аллилуия.

Икос 7
Новое знамение благоволения Своего яви тебе Господь, егда, во образ Пресвятыя Троицы, три пресветлыя луча с небесе облиста на месте дубравне, ихже не точию едина ты зрела еси, но и вси сущии тамо людие видеша, и вкупе с тобою прославиша Триединаго Бога. Мы же, ведуще сбытие проречения твоего о создании на месте оном храма Живоначальныя Троицы и града, ублажаем тя сице:
Радуйся, великая Божия угоднице, дара пророчествия сподобльшаяся;
Радуйся, Трисияннаго небеснаго света зрительнице.
Радуйся, всеблагия воли Божией о просвещении народа русскаго по апостоле Андрее первая исполнительнице;
Радуйся, града Пскова начальная основательнице.
Радуйся, всея Российския державы заступнице и покровительнице;
Радуйся, яко изволением Божиим держава Российская ныне от моря до моря распространися.
Радуйся, яко в храмех твоих Безкровная Жертва о людех Богу приносится и хвала Святей Троице воспевается;
Радуйся, яко обитателие града Киева и Пскова сугубо тя превозносят и ублажают.
Радуйся, святая равноапостольная княгине Ольго богомудрая.

Кондак 8
Странствия земнаго течение скончавающи, тепле Господа молила еси, Ольго блаженная, да не оставит Он землю Российскую по преставлении твоем во тьме неведения пребывати, но да возложит на сердце людем российским обратитися к Богу, да воспоют Ему: Аллилуия.

Икос 8
Вся объята бывши благодатию Божественною, достохвальная Ольго, мысленными очесы зрела еси просвещение всего народа твоего и пророчески предрекла еси, яко мнози велиции угодницы Божии, яко звезды светлыя, в земли Российстей возсияют, еже и сбыстся изволением и благодатию Всемогущаго Бога. Сего ради по долгу воспеваем ти сице:
Радуйся, духовная наша мати, испросившая у Бога просвещение праотцем нашим;
Радуйся, яко Всеблагий Господь, зря доброту души твоея, тебе ради вся люди русския возлюби.
Радуйся, яко тя обрете Христос достоин сосуд, чрез негоже нача изливати благодать Свою земли Российстей;
Радуйся, яко прозорливо предзрела еси величие и славу державы твоея.
Радуйся, яко по проречению твоему мнози святии от рода нашего возсияша;
Радуйся, дома Живоначальныя Троицы устроительнице.
Радуйся, молитвами твоими в скорбех и напастех нас заступающая;
Радуйся, во обстояниих злых Отечество наше сохраняющая и от врагов избавляющая.
Радуйся, святая равноапостольная княгине Ольго богомудрая.

Кондак 9
Всяких добродетелей исполнена бывши, Ольго блаженная, с молитвою во устех предала еси дух твой в руце Божии, Иже всели тя в небесныя обители и первую от россиян сопричте лику равноапостольных угодник Своих. Темже испроси и нам у Господа мирную христианскую кончину, да предадим души наша в руце Христа Бога нашего, поюще Тому хвалебную песнь: Аллилуия.

Икос 9
Ветии многовещаннии не могут достойно восхвалити тя, Ольго богомудрая, како ты, никим же от человек учима и увещеваема, познала еси тщету идолослужения, правыя же веры взыскала еси и, якоже равноапостольная Елена, обрела еси безценный бисер, Христа, Егоже лицезрения на Небеси наслаждающися ныне, не забуди нас, прелестьми мира сего омрачаемых и о благах вечных забывающих, да тобою на путь правый наставляеми, взываем ти радостно:
Радуйся, добрыми твоими делы и правым ума и сердца изволением приуготовившая себе в жилище Божественныя благодати;
Радуйся, яко Сам Дух Святый учитель тебе бысть к познанию Христа Сына Божия.
Радуйся, никиих же знамений и чудес видевшая и во Христа верововшая;
Радуйся, совершенную покорность воли Божией показавшая и звавшему тя гласу благодати Святаго Духа послушна явившаяся.
Радуйся, с единонадесятаго часа в вертограде Господнем потрудившаяся и мзду с первыми получившая;
Радуйся, яко умудри тя Господь честь царскую, богатство и славу сочетати со смирением христианским.
Радуйся, яко сим образом яве нам показавшая, яко блага земная не суть препятие души боголюбивей к достижению благ небесных;
Радуйся, крепостию веры и целомудренною чистотою жития твоего пророчества дар от Бога восприявшая.
Радуйся, святая равноапостольная княгине Ольго богомудрая.

Кондак 10
Путь спасения сыновом российским устрояя и предсмертное прошение твое исполняя, Всеблагий Господь возрасти во внуце твоем Владимире всеянное тобою семя веры и чрез него всю землю Российскую просвети святым Крещением. Темже убо прославляем тя, Ольго блаженная, яко виновницу просвещения нашего светом святыя веры, и умильно поем Христу Спасителю нашему: Аллилуия.

Икос 10
Прияв святое Крещение, внук твой Владимир, потщася изъяти из земли нетленныя мощи твоя, чуднаго благоухания исполненныя, и со святителем Леонтием и всем множеством народа постави я в церкве Пречистыя Богоматере, и оттоле начаша источатися от них притекающим с верою цельбы всяким недугом. Сего ради восхваляем тя сице:
Радуйся, яко благодать Святаго Духа, в тя всельшаяся, сотвори в мощех твоих цельбоподательный источник на всякия недуги;
Радуйся, с маловерием к ним приходящия видети я не попускавшая.
Радуйся, явлением мощей твоих младенствовавшую Церковь Российскую возвеселившая;
Радуйся, прославлением их внука твоего Владимира зело обрадовавшая.
Радуйся, яко и до ныне благочестивии людие земли Российския славною памятию твоею услаждаются;
Радуйся, яко твоим к Богу ходатайством вернии россияне многих благ от Господа сподобляются.
Радуйся, молитвами твоими о просвещении земли Российския Бога умолившая;
Радуйся, вскоре многим великим святым явитися на земли Российстей прорекшая.
Радуйся, святая равноапостольная княгине Ольго богомудрая.

Кондак 11
Пение умиленное приносим ти, угоднице Божия, и смиренно тя молим: моли о нас Единаго Человеколюбца Бога, да не отвратит лица Своего от нас, недостойных, присно согрешающих и преогорчевающих благость Его, но да накажет нас зде, яко Отец чадолюбивый, онаможе, в будущем веце, да спасет и помилует, яко Судия и Мздовоздаятель праведный, да тако избавльшеся вечнаго мучения, сподобимся с тобою в райских обителех воспевати Ему: Аллилуия.

Икос 11
Трисиянным светом осияваема, со всеми святыми предстоиши ныне на Небеси Престолу Царя царствующих, Ольго всеблаженная, и оттуду, яко светозарное светило, просвещаеши всю страну Российскую, разгоняющи мрак заблуждений и показующи путь к истинному просвещению и небесному блаженству. Сего ради, прославляюще тя, глаголем:
Радуйся, путеводительнице, правую стезю к вечному спасению нам показующая;
Радуйся, мощная споспешнице и укрепительнице проповедников православныя веры.
Радуйся, присная покровительнице благих наставников, благотрудящихся на пользу общую;
Радуйся, крамол и раздоров потребительнице.
Радуйся, всех обидимых и неправедно гонимых заступнице;
Радуйся, скорбящих скорая утешительнице.
Радуйся, болящих милостивая исцелительнице;
Радуйся, людем нашим помощь молитвами твоими от Бога подавающая.
Радуйся, всея страны Российския предстательнице и заступнице.
Радуйся, святая равноапостольная княгине Ольго богомудрая.

Кондак 12
Благодать Пресвятаго Духа испроси нам, наставнице наша, от всещедраго Бога и Спаса нашего, вразумляющую и укрепляющую нас в деле спасения, да небезплодно будет в нас всеянное тобою семя святыя веры, но да прозябнет и плод сотворит, имже бы возмощи нам питати души наша в будущей вечней жизни, идеже вси святии воспевают Богу: Аллилуия.

Икос 12
Поюще твоя многая и преславная благодеяния, явленная стране Российстей в просвещении той светом веры Христовой, благодарственная приносим ти, с любовию зовуще сицевая:
Радуйся, несокрушимое ограждение земли Русския, ея покров и защищение;
Радуйся, девам российским образе целомудреннаго жития.
Радуйся, матерем наставнице законнаго супружества и добраго чад воспитания;
Радуйся, вдовицам правило спасения.
Радуйся, соучастнице на Небеси жребия проповедников веры Христовы;
Радуйся, усердная о спасении нашем Ходатаице.
Радуйся, в час смерти нашея о нас к Богу молитвеннице;
Радуйся, по исходе нашем от смертнаго сего телесе помощь и утешение подающая.
Радуйся, святая равноапостольная княгине Ольго богомудрая.

Кондак 13
О святая равноапостольная великая княгине Ольго, приими милостивно от нас хвалебное благодарение сие о всех, яже тобою воздаде Господь нам, отцем и праотцем нашим и всей державе Российстей, и моли всеблагаго Бога умножите милость Свою на ны и на роды родов наших, утвердите ны в правоверии и благочестии, хранити же от всех напастей, бед и зол, да сподобимся с тобою, яко чада с материю, во веки воспевати Богу: Аллилуия.
Этот Кондак читается трижды, затем 1-й Икос «Ангелов и человеков Творец...» и 1-й Кондак «Первоизбранней от всего российскаго рода...».

Молитва святой равноапостольной княгине Ольге
О святая равноапостольная великая княгине Ольго, первоугоднице Российская, теплая о нас пред Богом ходатаице и молитвеннице! К тебе прибегаем с верою и молимся с любовию: буди нам во всем ко благу помощница и поспешница и якоже во временней жизни тщалася еси просветити праотцы наша светом святыя веры и наставити я творити волю Господню, тако и ныне, в небесней пребывающи светлости, благоприятными твоими к Богу молитвами вспомоществуй нам в просвещении ума и сердца нашего светом Евангелия Христова, да преспеваем в вере, благочестии и любве Христове. В нищете и скорби сущия утеши, бедствующим подаждь руку помощи, обидимыя и напаствуемыя заступи, заблуждшия вразуми и испроси нам у всещедраго Бога вся благая и полезная в жизни временней и вечней, да тако благоугодне зде поживше, сподобимся наследия благ вечных в безконечнем Царствии Христа Бога нашего, Емуже с Отцем и Святым Духом подобает всякая слава, честь и поклонение всегда, ныне и присно и во веки веков. Аминь.

Тропарь святой равноапостольной княгине Ольге, глас 1
Крилами богоразумия вперивши твой ум, возлетела еси превыше видимыя твари, взыскавши Бога и Творца всяких и Того обретши, паки рождение крещением прияла еси, древа животнаго наслаждающися, нетленна во веки пребывавши, Ольго приснославная.

Ин тропарь, глас 3
Святая равноапостольная избраннице Христова, княгине Ольго, народ твой словесным и чистым Христовым млеком напоившая, молися милостивому Богу, да прегрешений оставление подаст душам нашим.

Ин тропарь, глас 4
Оставивши лесть идольскую, последовала еси Христу, Безсмертному Жениху, Ольго Богомудрая, в Егоже чертозе радующися, непрестанно молися о чтущих верою и любовию святую память твою.

Ин тропарь, глас 8
В тебе, Богомудрая Елено, известен спасения образ бысть в Русстей стране, яко, приимши баню Святаго Крещения, последовала еси Христу, творящи же и учащи, еже оставити идольскую прелесть, восприяти же попечение о души, вещи безсмертней, темже и со ангелы радуется, равноапостольная, дух твой.

Кондак, глас 4
Воспоем днесь Благодетеля всех Бога, прославльшего в России Ольгу богомудрую, да молитвами ея подаст душам нашим грехов оставление.

Ин Кондак, глас 3
Явися днесь благодать всех Бога, прославльши в Руси Ольгу Богомудрую, молитвами ея, Господи, людем подаждь грехов оставление.

Величание
Величаем тя, блаженная и равноапостольная княгине Ольго, и чтим святую память твою, идолы поправшую и многия люди Российския святым Крещением просветившую.

Ино величание
Величаем тя, святая равноапостольная княгине Ольго, яко зарю утреннюю в земли нашей возсиявшую и свет веры Православныя народу своему предвозвестившую.