Кондак 1
Избранней от земли Русския угоднице Божией, скорой помощнице и наставнице нашей похвальная воспеваем ти, святая равноапостольная ольго, яко заре во тьме идолопоклонения светом веры возсиявшей и путь ко Христу всем людем страны твоея показавшей. Ты же, яко имущая дерзновение к прославльшему тя Господу, ограждай нас от всяких бед молитвами твоими, да зовем ти:
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Икос 1
Ангелов и человеков Творец, времена и лета во Своей власти положивый и судьбы царств и народов по Своей воли управляяй, егда восхоте Русь святым крещением просветити, призва тя, святая равноапостольная Ольго, к познанию Бога истиннаго, да будеши всем людем русским образ благочестия и наставница в вере Христове. Мы же, промыслу Божию о тебе явленному дивящеся, восхваляем тя сице:
Радуйся, на просвещение земли Русския предызбранная;
радуйся, пророчествия святаго апостола Андрея Первозваннаго исполнительнице.
Радуйся, Богом данная державы Российския покровительнице;
радуйся, отечества твоего от нашествий вражиих мужественная защитнице.
Радуйся, града Пскова светлое радование;
радуйся, града Киева похвало и утверждение.
Радуйся, первоучительнице и просветительнице наша;
радуйся, яко тобою познахом покланятися в Троице Творцу.
Радуйся, яко тебе ради Пресвятое имя Господне от всех верных земли нашея прославляется;
радуйся, яко и твое имя вкупе с равноапостольным Владимиром повсюду восхваляется.
Радуйся, страны нашея Российския духовное сокровище;
радуйся, всея Христовы Церкве преславное украшение.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 2
Видим тя, святая ольго, яко крин в тернии прозябший: ты бо аще и в роде язычестем рождена еси, обаче закон Божий в сердце твоем написан всегда имела еси и целомудрие твое яко зеницу ока блюла еси. Мы же, взирающе на добродетели твоя, душею и сердцем радуемся и прославльшему тя Христу Богу поем: Аллилуиа.

Икос 2
Разум небесный даровася тебе, Ольго богомудрая, имже добре уразумела еси, яко идоли, рукама человеческима сотвореннии, не суть бози; темже отвергши идолослужение, потщалася еси познати Бога истиннаго. Сего ради, таковой мудрости твоей дивящеся, вопием ти сице:
Радуйся, мудрая жено, тщету идолопоклонения уразумевшая;
радуйся, истиннаго богопознания и правыя веры усердно искавшая.
Радуйся, прежде разумения закона Божия по закону совести праведно пожившая;
радуйся, прежде приятия христианския веры дела, христианом подобающая, творившая.
Радуйся, чистоты душевныя и телесныя хранительнице;
радуйся, супружнице добрая и верная.
Радуйся, много душею за сына своего Святослава болевшая;
радуйся, во вдовстве твоем целомудренное строгое житие проводившая.
Радуйся, Российския державы мудрая правительнице;
радуйся, во отечестве твоем суды праведны творившая.
Радуйся, мудрецов мира сего мудрейшая;
радуйся, жен российских красото.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 3
Силою благодати Божией наставляема, потщалася еси, богомудрая Ольго, достигнути Царьграда, идеже зрящи красоту церковнаго благолепия и послушающи учения словес Божественных, восприяла еси всем сердцем твоим любовь Христову, благодарственно вопиющи Ему: Аллилуиа.

Икос 3
Имущи сердце яко добрую землю, удобь восприяла еси, Ольго блаженная, семя святыя веры, познавши Христа Бога истиннаго. Темже святое крещение прияла еси от руку Патриарха Царьграда, иже и предрече ти, яко отныне ублажат тя вси народи страны твоея. Мы же ведуще тя, яко благовестницу Церкве Русския, едиными усты и единем сердцем взываем сице:
Радуйся, дивным Промыслом Божиим к вере истинней приведенная;
радуйся, от Христа свыше просвещенная.
Радуйся, во святем крещении Богу Отцу усыновленная;
радуйся, во святем причащении Богу Сыну соединившаяся.
Радуйся, Духом Святым умудренная во спасение;
радуйся, миром благодатным запечатленная.
Радуйся, яко дар премудрости и разума прияла еси в миропомазании;
радуйся, яко утвердися в тебе дух совета и крепости.
Радуйся, умом Христовым обогатившаяся;
радуйся, призванная на подвиг духовный.
Радуйся, от купели крещения возрожденная;
радуйся, жизнь благодатную во Христе стяжавшая.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 4
Буря недоумений не смути душу твою, Ольго премудрая, еще не крещену сущу: како возможеши оставити веру отцов твоих. Бог же Промышлением Своим приведе тя к возрождению водою и духом, да в чистоте сердца посреде языческия Руси воспеваеши Ему ангельскую песнь: Аллилуиа.

Икос 4
Слышавши от крестившаго тя Патриарха напутственное слово о чистоте, посте, молитве и о всех добродетелех, христианом подобающих, слагала еси глаголы его в сердцы твоем, и делы вся наставления сия исполняти обещала еси. Тем же убо услыши от нас, любящих тя, похвальное пение сицевое:
Радуйся, единаго Христа всем сердцем возлюбившая;
радуйся, любве и сострадания к людем исполненная.
Радуйся, на непоколебимом камени заповедей Христовых утвержденная;
радуйся, добродетелей светильниче неугасимый.
Радуйся, храмы Божии и божественную службу возлюбившая;
Радуйся, воздержанием и молитвою Богу угодившая.
Радуйся, сердце твое от терния душевредных страстей очистившая;
радуйся, слезами покаяния ю оросившая.
Радуйся, яко просвещение земли Русския светом Христова учения провидела еси.
радуйся, множество душ к пению славы Господа твоего призвавшая.
Радуйся, путь ко спасению познавшая;
радуйся, яко житием и подвиги твоими путь сей и нам указуеши.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 5
Боготканною одеждою святаго крещения облекшися и нетленною пищею Пречистаго Тела и Крове Христовы духовно укрепившися, Ольго преблаженная, возжелела еси языческое нечестие во отечестве твоем разрушити и в сердцах людей русских истинную веру насадити, единым бо желанием горела еси, да приведеши всех ко Христу и научиши вкупе с тобою воспевати Ему: Аллилуиа.

Икос 5
Видевши, святая Ольго, вся люди земли Русския во тьме идолослужения пребывавшия, усердно потщалася еси светом Христовы веры тех озарити и сотворити наследники Царствия Небеснаго. Поминающе убо ревность твою по вере и любовь к чадом твоим, радостно взываем ти:
Радуйся, княгине святая, на земли благочестно царствовавшая;
радуйся, провозвестнице веры истинныя в земли Русстей.
Радуйся, тьму языческую дерзновенно обличившая;
радуйся, единому Христу послужити возжелевшая.
Радуйся, равноапостольная просветительнице страны нашея;
радуйся, ищущим пути ко спасению наставнице благодатная.
Радуйся, первей христианстей царице Елене в ревности божественней подражавшая;
радуйся, яко имя ея во святем крещении прияла еси.
Радуйся, честный крест Христов и святыя иконы из Царьграда во град Киев принесшая;
радуйся, яко иереи и клирики с собою на Русь привела еси.
Радуйся, премудрость и благодать Божию нам открывающая;
радуйся, материнскою любовию нас согревающая.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 6
Проповедником духоносным, апостолом, подражавши, Ольго богомудрая, обходила еси грады и веси державы твоея, приводящи люди к вере Христовей, во благочестии их утверждающи и научающи воспевати Единому в Троице славимому Богу: Аллилуиа.

Икос 6
Возсия свет благодати и милости Божия, егда утверждающи в державе твоей основания веры христианския, воздвигла еси, Ольго блаженная, храмы Божии в матери градов русских Киеве и в стране рождения твоего, при реце Велицей у града Пскова. И тако начаша людие русстии прославляти повсюду Христа Бога нашего, тебе же, просветительницу свою, восхваляя сице:
Радуйся, Богом дарованная на просвещение язычников;
радуйся, веры Христовы благодатная проповеднице.
Радуйся, в стране твоей идольскаго служения искоренительнице;
радуйся, яко многия русския люди к познанию истиннаго Бога привела еси.
Радуйся, с проповедию Евангелия землю Русскую обходившая;
радуйся, силою Божиею и благодатию укрепляемая.
Радуйся, на местех проповеди твоея честныя кресты водрузившая;
радуйся, яко от них многая знамения и чудеса силою Божиею содевахуся.
Радуйся, светильниче Божия благодати, в земли нашей возжженный;
радуйся, православныя веры насадительнице.
Радуйся, словеса жизни вечныя людем твоим провещавшая;
радуйся, Христова учения славная благовестительнице.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 7
Хотя привести народ русский к вере истинней, Ольго всеславная, явилася еси ему наставница богомудрая, и мнози жители Киева дивящеся о глаголах твоих, ихже никтоже прежде слыша, приимаху из уст твоих слово Божие и божественным крещением просвещахуся. Тем же убо вси новопросвещеннии людие, видяще велия труды и добродетели твоя, прославляху Отца Небеснаго, вопиюще Ему: Аллилуиа.

Икос 7
Новое знамение благоволения Своего яви тебе Господь, егда, во образ Пресвятыя Троицы, три пресветлых луча с небесе озариша место дубравное, ихже не точию едина ты зрела еси, но и вси сущии тамо людие видеша, и вкупе с тобою прославиша Триединаго Бога. Мы же, ведуще сбытие проречения твоего о создании на месте оном храма Живоначальныя Троицы, ублажаем тя сице:
Радуйся, великая Божия угоднице, дара пророчествия сподобившаяся;
радуйся, Трисияннаго Небеснаго света зрительнице.
Радуйся, храм чудный во имя Святыя Троицы создавшая;
радуйся, и себ

Кондак 8е храм одушевленный Триипостасному Богу сотворившая.
Радуйся, яко в храмех, тобою созданных, хвала Святей Троице воспевается;
радуйся, яко тобою имя Божие в нашей стране прославляется.
Радуйся, воли Божия о просвещении народа русскаго первая исполнительнице;
радуйся, спасительных благ земных и небесных подательнице.
Радуйся, всея Российския страны заступнице и покровительнице;
радуйся, яко изволением Божиим держава Российская от моря до моря распространися.
Радуйся, людем страны твоея истинную любовь показавшая;
радуйся, житием твоим Бога прославившая.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 8
Странствия земнаго течение скончавающи, тепле Господа молила еси, Ольго блаженная, да не оставит Он люди русския по преставлении твоем во тьме идолослужения пребывати, но да положит им на сердце обратитися к Богу истинному и до скончания века воспевати Ему хвалебную песнь: Аллилуиа.

Икос 8
Вся объята бывши благодатию Божественною, достохвальная Ольго, мысленными очесы зрела еси просвещение всего народа твоего и пророчески предрекла еси, яко мнози угодницы Божии, яко звезды светлыя, в земли Русстей возсияют, еже и сбыстся изволением и благодатию Всемогущаго Бога. Сего ради, любовию побуждаеми, воспеваем ти сице:
Радуйся, духовная наша мати, испросившая у Бога просвещение праотцем нашим;
радуйся, яко по проречению твоему, мнози святии от рода нашего возсияша;
Радуйся, молитвами твоими в скорбех и напастех нас заступающая;
радуйся, во обстояниих злых отечество наше сохраняющая и от врагов избавляющая.
Радуйся, града Пскова основательнице;
радуйся, дома Живоначальныя Троицы в нем устроительнице.
Радуйся, благоволением Пресвятыя Троицы осененная;
радуйся, волею благое иго Христово понесшая.
Радуйся, Пресвятыя Владычицы Богородицы усердная почитательнице;
радуйся, голубице чистая и непорочная сердцем.
Радуйся, ты бо яко солнце новое освещаеши державу Российскую;
радуйся, яко имя твое с любовию во всей стране нашей воспевается.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 9
Всяких добродетелей исполнена бывши, Ольго блаженная, с молитвою на устех предала еси дух твой в руце Христа Бога нашего, иже всели тя в Небесныя обители и первую от верных земли нашея сопричте лику равноапостольных угодников Своих. Темже испроси и нам у Господа мирную христианскую кончину, да предадим души наша в руце Божии, поюще хвалебную песнь: Аллилуиа.

Икос 9
Ветии многовещаннии не могут достойно восхвалити тя, Ольго богомудрая: како ты, ни ким же от человек учима и увещеваема, правую веру взыскала еси и познала еси Христа Бога нашего, Егоже лицезрения на Небеси наслаждаешися ныне. Темже, о мати наша, не забуди нас, страстьми омраченных и о благах вечных забывающих, да тобою на путь правый наставляеми, взываем ти радостно:
Радуйся, душу твою в руце Господа мирно предавшая;
радуйся, угоднице Божия, от земли во обители Небесныя водворившаяся.
Радуйся, с горящим светильником в радость Господа вшедшая;
радуйся, яко светом небесным житие наше озаряеши.
Радуйся, сосуде избранный, источающий небесное благоухание;
радуйся, яко с небесных высот на мольбы наша призираеши.
Радуйся, в селениих праведных ныне ликовствующая;
радуйся, яко и по преставлении твоем присно с нами пребываеши.
Радуйся, яко о всех чтущих тя Господа Иисуса Христа умилостивляеши;
радуйся, яко и Преблагословенную Матерь Его ходатайствовати о нас грешных преклоняеши.
Радуйся, всесветлаго лика святых жен российских первоначальнице;
радуйся, яко житие твое вси вернии немолчно воспевают.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 10
Спасение людем страны твоея устрояя и мольбу твою исполняя, Всеблагий Господь избра внука твоего Владимира и чрез него возрастив всеянное тобою семя веры, всю землю Российскую просвети святым крещением. Тем же убо прославляем тя, Ольго блаженная, яко виновницу озарения народа нашего светом божественныя веры и благодарственно воспеваем Христу Спасителю нашему: Аллилуиа.

Икос 10
Стена и ограждение всем верным явишася нетленныя мощи твоя, чуднаго благоухания исполненныя, ихже внук твой Владимир от земли подъяв, Ольго преблаженная, со святителем Леонтием и множеством народа постави во граде Киеве, в церкви Пречистыя Богоматере, и оттоле начаша источатися благодатная исцеления всем с верою и любовию приходящим к ним. Сего ради от всех концев земли Русския чада Церкве стекающеся, благодарение приносят Богу, воспевающе ти тако:
Радуйся, нетлением мощей твоих от Бога возвеличенная;
радуйся, благоуханием их люди русския усладившая.
Радуйся, явлением мощей твоих Церковь Русскую духовно возвеселившая;
радуйся, прославлением сим внука твоего Владимира зело обрадовавшая.
Радуйся, вечную радость на Небеси обретшая;
радуйся, яко и нас той радости научаеши.
Радуйся, окамененная сердца наша во умиление приводящая;
радуйся, покой душам нашим подающая.
Радуйся, богоблагодатная женам и девам помощнице;
радуйся, от враг видимых и невидимых нас ограждающая.
Радуйся, мати благосердая, от праведнаго гнева Божия нас укрывающая;
радуйся, стено и заступление всех почитающих тя.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 11
Пение умиленное приносим ти, угоднице Божия, и смиренно молим тя: моли о нас Единаго Человеколюбца Бога, да не отвратит лица Своего от нас, недостойных и грешных, но, яко Отец чадолюбивый, да спасет и помилует нас, да избавльшеся вечнаго мучения, сподобимся с тобою в райских обителех воспевати Ему победную песнь: Аллилуиа.

Икос 11
Светом трисиянным осияваема, со всеми святыми предстоиши ныне на Небеси Престолу Царя царствующих, Ольго всеблаженная, и яко светозарное светило, вся грады и веси страны нашея просвещаеши, разгоняющи мрак заблуждений, показующи путь к истинному просвещению и Небесному блаженству ведущий, и молитвами твоими ограждаеши всех верных, любящих тя и вопиющих ти таковая:
Радуйся, Сыном Божиим из тьмы в благодатный свет призванная;
радуйся, звездо света Христова в стране нашей.
Радуйся, пред Престолом Божиим лампадо неугасимая;
радуйся, свеще, на свещнице Церкве Русския поставленная.
Радуйся, светильниче духовный, освещаяй людем путь спасения;
радуйся, яко светом боговедения просвещаеши омраченныя умы.
Радуйся, плодоносное древо, питающее алчущих жизни вечныя;
радуйся, росо благодатная, орошающая и веселящая наша сердца.
Радуйся, чаше, источающая нам елей милости Божия;
радуйся, о нас грешных Судии Праведнаго умоление.
Радуйся, лилие прекрасная, услаждающая души наша;
радуйся, о мире всего мира молитвеннице неусыпная.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 12
Благодать Пресвятаго Духа испроси нам, наставнице и духовная мати наша, вразумляющую и укрепляющую нас в деле спасения, да не безплодно будет в нас всеянное тобою семя святыя веры православныя, но да прозябнет и плод сторичен сотворит, имже возможем напитати души наша для жизни вечныя, идеже вси святии вкупе с тобою воспевают ангельскую песнь Богу: Аллилуиа.

Икос 12
Поюще твоя апостольския труды и многотрудное служение стране Российстей и Церкви Божией в просвещении народа твоего светом веры Христовы, славим и величаем укрепившаго тя Господа, ублажаем тя, яко молитвенницу нашу, восхваляем тя любовию и благодарственно воспеваем тебе сице:
Радуйся, со ангелы Пресвятей Троице предстоящая;
радуйся, о всех нас пред Пречистою Материю Господа предстательнице.
Радуйся, апостолом Христовым в служении поревновавшая;
радуйся, в лице святых благоверных княгинь земли Русския прославленная.
Радуйся, в сонме святых и праведных жен водворившаяся;
радуйся, со всеми святыми земли нашея хвалу Богу возносящая.
Радуйся, молитвеннице крепкая за Русь Православную;
радуйся, страны нашея духовное сокровище.
Радуйся, христолюбивому воинству необоримая споборнице;
радуйся, непоколебимо стояти за веру православную нас научающая.
Радуйся, в скорбех и страданиих наших скорая помощнице;
радуйся, по Бозе и Богородице крепкое наше упование.
Радуйся, святая равноапостольная княгине Ольго богомудрая, свет веры православныя народу твоему предвозвестившая.

Кондак 13
О святая равноапостольная Великая княгине Ольго, приими милостивно от нас хвалебное благодарение сие о всех, яже тобою воздаде Господь нам, отцем и праотцем нашим и всей державе Российстей, и моли Всеблагаго Бога умножити милость Свою на ны и на роды родов наших, утвердити ны в правоверии и благочестии, хранити же от всех напастей, бед и зол, да сподобимся с тобою, яко чада с материю своею, во веки воспевати Богу: Аллилуиа.
Этот Кондак читается трижды, затем Икос 1-й: «Ангелов и человеков Творец…» и Кондак 1-й: «Избранней от земли Русския…»

МОЛИТВЫ КО СВЯТЕЙ РАВНОАПОСТОЛЬНЕЙ ВЕЛИЦЕЙ КНЯГИНИ РОССИЙСТЕЙ ОЛЬГЕ

МОЛИТВА 1
О святая равноапостольная Великая княгине Ольго, первоугоднице Российская, теплая о нас пред Богом ходатаице и молитвеннице! К тебе прибегаем с верою и молимся с любовию: буди нам во всем ко благу помощница и споспешница и якоже во временней жизни тщалася еси просветити праотцы наша светом святыя веры и наставити я творити волю Господню, тако и ныне, в небесней пребывающи светлости, благоприятными твоими к Богу молитвами, вспомоществуй нам в просвещении ума и сердца нашего светом Евангелия, да преспеваем в вере, благочестии и любви Христове. В нищете и скорби сущия утеши, бедствующим подаждь руку помощи, обидимыя и напаствуемыя заступи, заблуждшия вразуми, и испроси нам у Всещедраго Бога вся благая и полезная в жизни временней и вечней, да тако благоугодне зде поживше, сподобимся наследия благ вечных в безконечнем Царствии Христа Бога нашего, Емуже со Отцем и Святым Духом подобает всякая слава, честь и поклонение всегда, ныне и присно и во веки веков. Аминь.

МОЛИТВА 2
О великая угоднице Божия, богоизбранная и богопрославленная, равноапостольная Великая княгине ольго! Ты отринула еси зловерие и нечестие языческое, уверовала еси во Единаго истиннаго Триипостаснаго Бога, восприяла еси святое крещение, и положила еси начало просвещению земли Российския светом веры и благочестия. Ты еси духовная родоначальница наша, ты по Христе Спасителе нашем первая виновница просвещения и спасения рода нашего. Ты еси теплая молитвенница и ходатаица о отечестве нашем, воинстве и всех людех. Сего ради смиренно молим тя: призри на немощи наша и умоли Премилосердаго Царя Небеснаго, да не прогневается на ны зело, яко по немощем нашим по вся дни согрешаем, да не погубит нас со беззаконьми нашими, но да помилует и спасет нас по милости Своей, да всадит в сердца наша спасительный страх Свой, да просветит Своею благодатию ум наш, во еже разумети нам пути Господни, оставити стези нечестия и заблуждений, тщатися же во стезях спасения и истины, неуклоннаго исполнения заповедей Божиих и уставов Святыя Церкве. Моли, блаженная ольго, Человеколюбца Бога, да пробавит нам великую милость Свою, да избавит нас от нашествия иноплеменных, от внутренних нестроений, мятежей и раздоров, от глада, смертоносных болезней и от всякаго зла, да подаст нам благорастворение воздуха и плодоносие земли, да сохранит страну нашу от всех козней и наветов вражиих, да соблюдет в судиях и правителех правду и милость, да даст пастырем ревность о спасении пасомых, всем же людем споспешение, о еже усердно службы своя исправляти, любовь между собою и единомыслие имети, на благо отечества и Святыя Церкве верне подвизатися, да возсияет свет спасительный веры в стране нашей во всех концех ея, да обратятся к вере неверующии, да упразднятся вся ереси и расколы. Да, тако поживше в мире на земли, сподобимся с тобою вечнаго блаженства на Небеси, хваляще и превозносяще Бога во веки веков. Аминь.

МОЛИТВА 3
Величие наше и похвала еси, ольго богомудрая: тобою бо от лести идольския свободихомся и в веру Христову святым крещением уловихомся. Ты закона наставница чистая и веры Христовы учительница людем явилася еси. Приими убо похвалу от нас недостойных, пред честною твоею иконою покланяющихся и смиренно просящих, да твоими молитвами и заступлением от напастей и бед и печалей и лютых грехов свободимся: еще же и от будущих мук избави ны, честно творящия святую память твою и славящия прославльшаго тя Бога, во Святей Троице прославляемаго, Отца и Сына и Святаго Духа, ныне, и присно, и во веки веков. Аминь.

СВЯТЕЙ РАВНОАПОСТОЛЬНЕЙ ВЕЛИЦЕЙ КНЯГИНЕ РОССИЙСТЕЙ ОЛЬГЕ

Тропарь, глас 1
Крилами богоразумия вперивши твой ум, / возлетела еси превыше видимыя твари, / взыскавши Бога и Творца всяческих, / и Того обретши, паки рождение крещением прияла еси: / древа животнаго наслаждающися, // нетленна во веки пребываеши, ольго приснославная.

Кондак, глас 4
Воспоем днесь Благодетеля всех Бога, / прославльшаго в России Ольгу Богомудрую: // да молитвами ея подаст душам нашим грехов оставление.

Величание
Величаем тя, / святая равноапостольная Великая княгине Российская Ольго, / и чтим святую память твою, / яко зарю утреннюю в земли нашей возсиявшую / и свет веры православныя / народу своему предвозвестившую.

Ино величание
Величаем тя, / святая равноапостольная Великая княгине Российская Ольго, / и чтим святую память твою, / идолы поправшую / и многия люди российския святым крещением просветившую.

Взято с http://alexandrtrofimov.ru/?p=80