Акафист Святым Новомученикам Орехово-Зуевским
Кондак 1
Избранные Божии угодницы, всехвальные новомученицы Орехово-Зуевстии, венцами славы Божественныя украшенные и в чертоги
Отца Небеснаго через веру и страдания пришедшие, пение похвальное от усердия приносяще, молим вы и просим: яко имущие
дерзновение ко Святей Троице, молитеся о нас грешных, да избавимся от всех зол и напастей, да с умилением зовем вам:
Радуйтеся, святые новомученицы Орехово-Зуевстии, скорые помощницы и молитвенницы о спасении нашем!
Икос 1
Архангелы и ангелы на небесе и боголюбивия люди на земле ликовствующе, всерадостно православляют Церкви Зиждителя – Христа
Бога Нашего, новыя светила веры преславно возвдигшего в земли Орехово-Зуевстей : святителя Никиту с сонмом новомучеников,
страданиями и исповедническою кровию своею, ада богоборческое нашествие посрамивших и многии из тьмы неведения ко Христу
приведших. Мы же многострадальным подвигом их вере и любви к Богу утверждаемся, с верою зовуще им сице :
Радуйтеся, Церкви Православныя немеркнующие светильницы;
Радуйтеся, Евангелия Христова неустрашимые проповедницы.
Радуйтеся, пламенные ревнитилие Апостольских преданий;
Радуйтеся, преславные обличители богоборческих учений.
Радуйтеся, яко подвигом вашим сатана посрамися;
Радуйтеся, яко терпением вашим Христос прославися.
Радуйтеся, выну в молитвах Богу предстоящие;
Радуйтеся, в радости Творца благодарити нас побуждающие.
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 2
Видя, яко возросло есть злочестие богоотступников на Руси Святой, Всеблагий Господь
наш призва вас, всехвальные
новомученицы Орехово-Зуевстии, дабы вы житием, страданием и смертию пред очами Его честною, исповедали веру вашу, вопиюще
Ему: Аллилуйа.
Икос 2
Разумом свыше просвещаемы, всечестные новомученицы, начаток и конец жития твоего на камене благом, Христе Спасителе
положили есте; Ему же последующие, вся блага мира сего презреша и страдание прескорбное Его же ради претерпеша, востекли
есте в чертоги Отца Небеснаго. Мы же, подвиги ваши досточудныя ныне поминающе, таковыя похвалы приносим вам:
Радуйтеся, Духом Святым просвещенные.
Радуйтеся, соблазнами мира сего не прельщенные;
Радуйтеся, волю вашу в добродетели утвердивые;
Радуйтеся, иго Христово всем сердцем возлюбившие;
Радуйтеся, святых заповедей Спасовых исполнителие;
Радуйтеся, душ смятенных благодатные умирителие.
Радуйтеся, безбожных хулителей веры посрамителие;
Радуйтеся, славы Божия дерзновенные ревнителие.
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 3
Сила Вышняго, немощная врачующая и
оскудевяющая восполняющая, обильно сниде на тя, священномучениче отче Никито, и
укрепи тя во святительском служении твоем, подвизе многотруднаго исповедничества твоего и во юродстве вспоможение
дарова
ти. Егда же наста время пострадати ти имени Христова ради,
ты, угодниче Божий, благодатию Всесвятаго Духа укрепляемь и
вдохновляемь доброчестно прошел еси путь прилежащего
испытания, Господеви песнопоя: Аллилуйа.
Икос 3
Имуще неусыпное попечение о вверенных вам чадех духовных, всеславные священномученицы
Орехово-Зуевстии, во дни смут и
нестроений церковных твердо учили есте веру православную свято соблюдати и не одесную, ни ошую от нея не отлонятися;
видяще, яко властителие богоборные притесняют христиан и иные людие богопротивныя входят в Господем данное вам стадо
духовное, внушали есте пастве вашей, искушения всяческия превознемагати и все упование на Господа (Христа
Ряспятаго)
возлагати. Мы же, вся сия ныне понимающе, молим вы и просим, утвердите и нас в вере и верности, яже к Богу, и примите
похвалы сия:
Радуйтеся, змия лукаваго посрамивые.
Радуйтеся, лик святых возвеселивые;
Радуйтеся, веры Православныя твердое основание.
Радуйтеся, обидимым и страждущим неложное упование;
Радуйтеся, творящих злое скоро вразумляющие.
Радуйтеся, всякую печаль от нас удаляющие;
Радуйтеся, в вере и благочестии нас утверждающие.
Радуйтеся, от напрасныя смерти нас изымающие;
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 4
Бурею скорбей и нестроений многажды Русь святую посещал Господь, но и миловал ее ради тех, кто за други и соотчизники
своя подвизался даже до крове и смерти лютой, не щадя живота своего. Тем же благослови Бог и вас, всечестные страстотерпцы
земли нашея, подвигов и страданий ваших ради и благодать предстательства вам за ны
дарова. Мы же вас молитв ради пред
Царем Славы за нас грешных, почитаем вас и поим Богу песнь: Аллилуиа.
Икос 4
Имея велие дерзновение, святые новомученицы
Орехово-Зуевстии, ко исполнению заповедей Господних, души ваши, любве ради,
положили есте за други своя; каждый бо из вас во время свое предста есте пред судом неправедным, в руце Божии предаде есте
живот свой, во след апостолу помышляя «аще бо живем, Господеви живем, аще бо умираем, Господеви умираем» (Рим. 14:8); и
тако ,благодатию Христовой укрепляемы, угодницы Господни, путь страданий добропобедно прошли есте.
Мы же ныне, воспоминая подвиги и страдания ваши, прославляем вас, с любовию взывая вам сице:
Радуйтеся, правды Божественнней ревностные служителие.
Радуйтеся, Церкви Христовой богосветлые светильницы;
Радуйтеся, судилищу неправедному дерзновенно представшие.
Радуйтеся, соборища нечестивых не убоявшиеся;
Радуйтеся, истину евангельскую пред ним защитившие;
Радуйтеся, мучений лютых не устрашившиеся.
Радуйтеся, веры Христовой непоколебимые столпы.
Радуйтеся, претыкающихся о камень соблазна наставницы;
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 5
Боготечные звезды и молитвенницы неустанные, церкви Русстей явилися есте, яко предстателие за нас и землю нашу. Тем же
величаем Вас, яко мучеников у Престола Христа Спасителя выну предстоящих, и предстателей за нас непостыдных и
нелицемерных, поя о вас Богу: Аллилуиа.
Икос 5
Видевши, яко вся красная блага мира сего, тленна и преходяща суть, к вечным и нетленным сокровищам
устремиша есте взоры
сердец ваших, страстотерпцы богосносные, и веры и верности Христу ради каждый бо из вас, во время свое мученическую смерть
приявше, востекл в чертоги Отца Небеснаго; сего ради сподоби вас Господь во славе вечней предстояти купно со ангелы и
святыма своима у Престола Своего. Не оставите и нас, святые мученицы, память вашу совершающих и вопиющих вам таковая:
Радуйтеся, Правды Христовой ревнителие.
Радуйтеся, Отечества Небеснаго любителие.
Радуйтеся, смерти вечной всеславные победителие.
Радуйтеся, венцев небесных мученических стяжателие;
Радуйтеся, нас грешных благие и мудрые вразумителие.
Радуйтеся, в долготерпении жития нашего учителие;
Радуйтеся, Церкве нашея Православныя украшение;
Радуйтеся, неутешных в скорбях всерадостное утешение;
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 6
Проповедует днесь Церковь Христова подвизи ваша, святые новомученицы, и величает страдания ваши, яже за Христа претерпели
есте, умиленно триединому Богу, Дивному во Святых Своих о вас воспевая:
Аллилуйя.
Икос 6
Возсияли есте, всечестные страстотерпцы, во подвизех и страданиях ваших, яко светила богосветлыя, просветивше мрачную
нощь безбожия лучами Света Троическаго; сего же ради просим вас, всеславные (священно)мученицы; не престайте озаряти
темные души наши лучами благодатными, да вас немолчно ублажаем (величаем) благохвалениями сицевыми:
Радуйтеся, фимиам молитв за нас ко Святей Троице приносящие.
Радуйтеся, милосердие Бога-Отца к нам приклоняющие;
Радуйтеся, о спасении нашем Спасителя умоляющие.
Радуйтеся, плоды (дары) Духа Святаго стяжати нам помогающие;
Радуйтеся, свято и праведно Богородицу почитати научающие.
Радуйся, кающимся слезы утешительныя низпосылающие;
Радуйся, пламень злобный струями любве вашея
угашающие.
Радуйтеся, тяжких грешников от рова
погибельнаго исхищающие;
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 7
Хотяще благочестие и веру Православную в земле нашей утвердити, Серафиме и Иоасафе новомученицы преславныя, во преподобии
и правде и служении пастырстем усердно подвизалися есте. Егда же пришло время испытаний, душу и тело за люди предали есте,
стяжавше венцы мученическия на небеси, да вси вопием о вас Богу: Аллилуиа.
Икос 7
Новые и немеркнущие светильницы явилися, многострадальные страстотерпцы Христовы Иосафе и Серафиме, вы бо за
правду Христову чести лишения, изгнания, заточения темничное, биение, осмеяние, заушения и иные злострадания кротце
претерпели есте прежде кончины мученичестей. Мы же, сие ныне поминающе, величаем вас сице:
Радуйтеся, вся прелести мирския ради Христа ни во что же вменившие!
Радуйтеся, обетом девства чистоту сердец ваших явившие!
Радуйтеся, обетом нестяжания высоту духа вашего показавшие!
Радуйтеся, обетом послушания всецелое служение ваше Богу и Пресвятой Богородице во веки утвердившие!
Радуйтеся, крылами богомыслия сети вражии сокрушившие!
Радуйтеся, того злобные умышления на вас до конца посрамившие!
Радуйтеся, светом Божиим от растления сохраняющие!
Радуйтеся, от глада духовнаго всех нас избавляющие!
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 8.
Странно и неудоприятельно суетному миру слышати, како молитвами вашими, преславныя новомученицы, богатство милосердия
Божиего изливается на всех, с верою притекающих к небесному покровительству вашему. Мы же, славяще Троицу святую, давшую
вам благодать сию, умиленно Творцу нашему поем: Аллилуйа.
Икос 8.
Всеславные и святые страстотерпцы земли нашея, но и нас долу сущих (удаленных от вас не токмо местом, паче же грехьми
нашими) не забываете и молите о нас Милосерднаго Творца и Спаса нашего, яко да дарует нам грехов оставление, страстей
одоление и во всяцей добродетели утверждение, мира душевнаго сохранение и скорбей утоление. Мы же, сия ныне поминающе,
благодарственно восписуем вам сице:
Радуйтеся, светом Христовым умы и сердца наша озаряющие.
Радуйтеся, дух милосердия в душах наших пробуждающие;
Радуйтеся, тайно творити добродетели научающие.
Радуйтеся, на милость Божию уповати нас подвизающие;
Радуйтеся, от искушений и соблазнов избавляющие.
Радуйтеся, к благочестия подвигам нас призывающие;
Радуйтеся, труды наша на пути спасения облегчающие.
Радуйтеся, за вся Творца благодарити нас наставляющие;
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 9
Всех, кто Христа-Бога Нашего пред людьми исповедует обетова Спаситель исповедати пред Отцем Своим Небесным; вы же,
преславные страстотерпцы, верны Господеви даже до крови явилися есте, и сего ради достойно востекли суть в чертоги Отца
Небеснаго, идеже во слове купно со всеми ангелы и святыми предстоите престолу Его, немолчно воспевая:
Аллилуйя!
Икос 9
Ветия многовещанные но не богопросвещеннии, глаголы своими не возмогут достойно житие ваше, святителю отче Никито,
преподобномученицы Иоасафе и Серафиме, вселавные пастырие Николае, Василие, Николае, Иоанне, Сергие, Димитрие, Василие,
Василие, Павле, Василие, и диаконе Димитрие, многострадальнии новомученицы Орехово-Зуевстии, воспети и восхвалити
благочестивое житие и мученическую кончину вашу, обаче же мы, любовию к вам подвизаемые и надеждою на предстательство
ваше окрыляемые, со смирением, любовию и верою таковые похвалы приносим вам:
Радуйтеся, напасти и страдания от безбожных претерпевшия;
Радуйтеся, веру православную да конца сохранившия.
Радуйтеся, на подвиг мученичества самим Христом благословенные;
Радуйтеся, любве ради Господа от страдания на земли не
отрекшиеся;
Радуйтеся, прелести мира ни во что вменившие.
Радуйтеся, ризы ваша в крови Агнчей убелившие;
Радуйтеся, кровию своею торжество веры Христовой явившие.
Радуйтеся, в дому Отца Небеснаго обителие себе сотворившие;
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 10
Спастися хотящим нам, будите помощницы твердые, всехвальные новомученицы земли нашея,
избавляюще и сохраняюще нас от
всяких бед и напастей, наипаче же от грехопадений наших, лишающих нас благодати Божией. Сего ради от сетей бесовских вами
избавляеми, благодарным сердцем и усты зовем Спасителю нашему: Аллилуйя.
Икос 10
Стеною молитв ваших небесных, достохвальные новомученицы Орехово-Зуевстии, защитите нас от враг видимых и невидимых,
помозите нам в скорбех и нуждах наших, и предстательством вашим благомощным избавите нас от лютых бед и искушений
бесовских, утвердите сердца наша по Бозе горети и нелицемерно ближних наших
научите любити. Мы же предстательство ваше
воспевающе, глаголем вам сице:
Радуйтеся, милостию сострадания вашего всех нас объемлющие.
Радуйтеся, любити Бога и творити волю Его нас научающие;
Радуйтеся, дух любви к ближним в сердцах наших
воскрешающие.
Радуйтеся, от плевел ненависти сердца наша очищающие;
Радуйтеся, светом любви нелицемерныя нас озаряющие;
Радуйтеся, милость и утешение всем верным являющие;
Радуйтеся, всех приходящих к вам благодатию озаряющие.
Радуйтеся, отроков во благочестии укрепляющие.
Радуйтеся, дев и юношей в целомудрии утверждающие;
Радуйтеся, старцем отраду и утешение посылающие.
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 11
Пение молебное и похвалу сию смиренную не презрите , угодницы Господни, се бо верою и любовию к вам подвизаемы (пред
образом святым вашим предстояще) ублажаем вас, заступников и покровителей наших, и усердно молим вас: вознесите молитвы
ваша ко Творцу Нашему, имате бо к Нему дерзновение великое и испросите нам дар коемуждо потребен, да зовем всех благих
виновнику и подателю Богу: Аллилуйа!
Икос 11
Света нетварнаго зрителие и радости Божественныя причастницы явилися есте,
всеславные новомученицы Орехово-Зуевстии. Тем же
молим вы: не престаните молитися о всех нас купно со всеми святыми, в земли Российстей просиявшими, да помилует нас
Господь вашего предстательства ради, и сподобит нас немощных новую силу нечестия посрамити и победителие злонравия
явистися, да ублажаем вас сицевыми похвалы:
Радуйтеся, яко орли, к Солнцу Правды воспарившии.
Радуйтеся, к Свету Невечернему из юдоли плача востекшии;
Радуйтеся, Царствия небесного наследницы .
Радуйтеся, вечныя славы сопричастницы;
Радуйтеся, теплотою Божественныя любве души наша согревющии.
Радуйтеся, в скорбях и болезнех терпению Христову нас научающии;
Радуйтеся, от сетей вражиих верныя избавляющии.
Радуйтеся, ходити в заповедях Божиих нас наставляющии;
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 12
Благодать и милость от Господа испросите нам, новомученицы преславные, и в час кончины нашея предстаните в помощь нам,
заступления вашего ныне просящих, и насилия демонскаго нас избавите святыми и благомощными молитвами вашима: да возможем
трудный путь мытарств воздушных проити добропобедно и да сподобимся в селениех райстих
пети Создателю нашему: Аллилуйа !
Икос 12
Поюще Триипостальнаго Бога, Дивнаго во Святых Своих, величаем и славословим вас, святые и всехвальные страстотерпцы, ибо
вы всеблагомощным предстательством вашим (пред престолом Всесвятыя Троицы) приклоняете к нам многогрешным милосердие
Творца и Господа Нашего и даруете: семейным – любовь и согласие, чадам – в послушании и благочестии возрастание и
подвизаете нас умиленным сердцем славити и воспевати вас сице:
Радуйтеся, в неизреченной славе Творца мира созерцающие.
Радуйтеся, во благоухании святыни присно почивающие;
Радуйтеся, нашим молениям милостиво внимающие.
Радуйтеся, омраченные умы светом Христовым озаряющие;
Радуйтеся, века сего суемудрия отвергати научающие.
Радуйтеся, падающим руку помощи простирающие;
Радуйтеся, от обычаев душетленных сердца наши отвращающие.
Радуйтеся, нравы добрые и благочестие в нас насаждающие;
Радуйтеся, святые новомученицы Орехово-Зуевстии, скорые помощницы и молитвенницы о спасеннии нашем!
Кондак 13
О, пречудныя и славныя новомученицы и страстотерпцы Орехво-Зуевстии! Приимите малое сие моление наше, в славную похвалу
возносимое Вам, честным предстателям у Престола Царя Славы, Господа нашего Иисуса Христа. Да обрящем Милость Его по
молитвам Ваших в жизни вечной и нескончаемой, поюще Ему: Аллилуиа, Аллилуиа, Аллилуиа.
(Этот кондак читается трижды, затем икос 1 и кондак1)
Молитвы Святым Новомученикам Орехово-Зуевским
Молитва первая
О Святии новомученицы и страстотерпцы Орехово-Зуевстии! Молитеся о нас грешных Всемилосердному Богу о
низпослании нам милости и благодати Духа Святаго во многогрешном житии нашем, покровительства Матери Божией и всех святых, от века Богу послуживших в Духе и Истине. Надеясь на молитвы ваши за нас грешных, да исправим жизнь нашу, и испросим прощение согрешений наших у Царя Славы, и достигнем Небесного Отечества, где пребывают правда, любовь и бесконечное блаженство жизни Вечной. Да прославим вместе с Вами Отца и Сына и Святаго Духа ныне и присно и во веки веков. Аминь.
Молитва вторая
О всеславные страстотерпцы, достохвальные угодницы Христовы, Церкви Православныя поборницы, святые новомученицы Орехово-Зуевстии! Преклоньше колена, молим вас: призрите на ны, грешныя, к заступлению вашему прибегающия, услышите сие малое моление наше и теплым предстательством вашим умолите Всемилосерднаго Бога, Ему же ныне предстоите со Ангелы и всеми святыми, да сохранит нас в единении Православныя Церкви и утвердит в сердцах наших живый дух правыя веры и благочестия, избавит нас от всякого искушения и прелести бесовския.
По велицей любви вашей, еюже ближния ваша возлюбили есте, испросите у всещедрого Бога Отечеству нашему, мир и благоустроение; всем же нам, недостойным, усердно к вам прибегающим, богоугодное и безмятежное житие и добрую христианскую кончину, Тайн Божиих причастие.
О святые заступницы наши, не оставите нас, слабых и безпомощных, молящеся за ны ко Господу и Спасу Нашему Иисусу Христу и Пречистей Владычице Богородице, и подвигните на молитву за нас богопрославленные соузники своя, всех новомучеников и исповедников российских, с ними же вкупе на Небеси предстоите у Престола Царя Небесного, да дарует Он, Всещедрый и Премилосердный Господь Наш, вся, яже к пользе временней и вечней полезная и потребная; да не воздаст нам по делом нашим, но по неизреченному человеколюбию своему простит нам грехи и согрешения наша, да избавит ны от всякия нужды и печали, скорби и болезни; да
низпошлет нам благое намерение и силу подвизатися во исправлении жития нашего, и в будущем веце да сподобит нас внити в Царствие Небесное и славити купно с вами Всесвятое Имя Отца и Сына и Святаго Духа во веки веков. Аминь.
Автор сего акафиста Евгений Владимирович Храповицкий