Кондак 1
Избранной Богом от рода благороднаго, иконийскаго града, премудрой и всехвальной невесте Христове, яко избавляемии тобою от искушений и бед, благодарственная пения и хваления восписуем ти, молитвенницы твои, святая и многострадальная мученице Параскево. Ты же, имущи дерзновение ко Господу, от всяких нас бед свободи, да со умилением и радостию зовем ти:
Радуйся, Параскево, невесто Христова всехвальная.

Икос 1
Ангелом честную и вселюбезную чистоту твоего сердца, многострадальная Параскево, непорочно сохранши, Ангелом собеседница быти сподобилася еси. С нимиже воспевающи Трисвятую песнь Богу на Небеси, услыши и нас, верою и любовию чтущих тя и вопиющих ти хваления сия на земли:
Радуйся, отроковице, Богом Отцем предуставленная быти сообразной в страдании образу Сына Его;
Радуйся, и Сыном Божиим укрепленная на подвиги страдальческия.
Радуйся, истинную веру в Животворящую и Единосущную Троицу свято соблюдшая;
Радуйся, святое целомудрие и девственную непорочность добре сохраншая.
Радуйся, яко радостно уневестилася еси безсмертному Небесному Жениху, Христу;
Радуйся, земнаго обручника паче Небеснаго знати не восхотевшая.
Радуйся, яко цвет чистоты, в неувядаемой славе цветущая;
Радуйся, яко крин, вонями твоих добродетелей нам благоухающая.
Радуйся, в Небесном вертограде неизреченною радостию наслаждающаяся;
Радуйся, краснейшаго паче сынов человеческих зрением тамо утешающаяся.
Радуйся, убелившая ризы твоя в крови Агнчей на земли;
Радуйся, в лике девственниц предстоящая Божиему Агнцу на небеси.
Радуйся, Параскево, невесто Христова всехвальная.

Кондак 2
Видевше благолепие лица твоего, святая мученице Параскево, людие удивляхуся, взирающе на тя, не у ведяще красоты души твоея. Мы же, поминающе светлейшия паче солнца добродетели твоя, поим Господеви, даровавшему тебе благодать Свою: Аллилуиа.

Икос 2
Мудрости вместилище паче ума мирских мудрецев явилася еси, отроковице непорочная, измлада уклонившися от любве к миру и отвергшися всего яже в мире, всею полнотою любве твоея возлюбила еси Небеснаго Жениха Христа, Царя Славы, Емуже, яко верная раба, в житий твоем апостольски послужила еси, живши свято среди неверных и безбоязненно проповедавши им Христа Бога. Таковому твоему разуму дивящеся, сия похвалы тебе восписуем:
Радуйся, премудрая Евангельская дево, во свете веры и дел благих ходившая;
Радуйся, Христа Господа, Божию Силу и Божию Премудрость, паче всего возлюбившая.
Радуйся, паче мудрецев мира сего мудрейшая;
Радуйся, паче старец идолослужительных разумевшая.
Радуйся, неверных светом веры просвещающая;
Радуйся, чад Церкве Христовы в вере утверждающая.
Радуйся, любовию твоею ко Христу ангельская ликостояния возвеселяющая;
Радуйся, демонская лукавствия оружием Креста Господня отгоняющая.
Радуйся, в проповедании веры богоглаголивая уста апостольская;
Радуйся, дев христианских украшение.
Радуйся, верная ко Христу Богу молитвеннице о нашем спасении;
Радуйся, всех скорбящих крепкое заступление и ограждение.
Радуйся, Параскево, невесто Христова всехвальная.

Кондак 3
Силою Христовою соблюдаема, всеславная мученице Параскево, о болезнех телесных небрегла еси, подвигом добрым подвизатися хотящи. Мужеским смыслом вооружившися, слабость женскую отвергла еси, упованием же укрепившися, радостно предстала еси на судище, идеже ясно веру в Троицу Божественную проповедала еси, Богу вопиющи: Аллилуиа.

Икос 3
Слышав от тебе, мудрая дщерь, неправедный судия неслыханная словеса о твоем рождении, яко благочестивии родители твои, Страсти Христовы почитающе, знаменитаго дне тезоимениту тя нарекоша, Параскевою, в предзнаменование, яко Христовых Страстей имаши быти причастницею. Не разуме же сего нечестивый игемон, но вещаше ти безстудная словеса и повеле бити тя суровыми жилами и полумертву тя сущу ввергнути в темницу. Ты же, доблественне претерпевши жесточайшия муки, в темнице, аки в чертозе светле ликующи, вопияла еси: «Никогдаже отлучуся Тебе, Господи, но посли ми помощь Твою и спаси мя Великия ради Твоея милости». Темже, ублажающе тя, вопием ти таковая:
Радуйся, незлобивая голубице, от искушений лукаваго врага свободившаяся;
Радуйся, словесная агнице, от злаго волка мучителя к доброму пастырю Христу Богу прибегшая.
Радуйся, во двор словесных овец, одесную Его стоящих, вшедшая;
Радуйся, на брак Агнчий радостно текущая.
Радуйся, яко тебе уготовано есть благ вечных сокровище;
Радуйся, яко тебе обетовано есть блаженство Царства Небеснаго.
Радуйся, премудрая Евангельская дево, светло горящий светильник имущая;
Радуйся, дерзновение велие ко Христу Богу стяжавшая.
Радуйся, волею своею благое иго Христово на ся подъявшая;
Радуйся, сердце свое от всякия лести душевредныя чисто сохраншая.
Радуйся, истинная Христовых Страстей причастнице;
Радуйся, во страданиих твоих благодатную помощь от Христа Господа получившая.
Радуйся, Параскево, невесто Христова всехвальная.

Кондак 4
Бурю тяжких искушений воздвигоша врази противу тебе, многострадальная Параскево; ты же от твоих кровей трудолюбно чашу страданий испила еси, желающи по Христе, Женисе твоем, во след потещи, прехвальная мученице, и яко ластовица доброгласная, песнь воспевала еси Христу Богу: Аллилуиа.

Икос 4
Имущи всегда пред очима своима Господа, за исповедание веры палицами немилостивно от мучителей биема, радовалася еси, приснопамятная мученице Параскево, вопиющи: «Ничтоже мя разлучит от любве Твоея, Христе», и тако подвизающися во славу Божию, угодила еси Господу. Темже, поминающе честная твоя страдания, с умилением зовем ти:
Радуйся, агнице вседобляя, пастыреначальнику Христу принесшаяся, яко жертва благоуханная;
Радуйся, безсмертному Жениху Христу непорочное мучение твое, яко вено пречестное, представившая.
Радуйся, отроковице чистая, истинное исповедание веры Православныя пред неверными явившая;
Радуйся, праведная обличительнице, неправду нечестиваго судии яве открывшая.
Радуйся, яко тобою посрамися лукавый враг, видящь себе от юной девы побежденна;
Радуйся, яко радуются о тебе и силы Небесныя, видяще тя немощну и младу сущу, побеждающую лютых мучителей.
Радуйся, голубице чистая и непорочная сердцем;
Радуйся, смиренная агнице, благоуспешно честней и блаженней Страсти Господней уподобльшаяся.
Радуйся, яко принеслася еси Зиждителю твоему, яко кадило благовонное;
Радуйся, яко зрит на тя пресветлое Солнце правды, тридневно возсиявшее от гроба и укрепившее тя к подвигу страдальческому.
Радуйся, яко за преславная твоя страдания сподобилася еси внити в чертог Христа, Царя Небеснаго;
Радуйся, яко тамо вкупе со святыми наслаждаешися неизреченною радостию.
Радуйся, Параскево, невесто Христова всехвальная.

Кондак 5
Боготечною звездою прешла еси в мире, страстотерпице славная Параскево, яко веру во Христа всем проповедающи. Страдания многа и люта мужески претерпевши, мучителя посрамила еси и ко Христу Господу, яко свету незаходимому, радостно востекла еси, Емуже предстоящи с лики праведных, выну вопиеши: Аллилуиа.

Икос 5
Видяще силы Небесныя плотию страждущую Параскеву, Его силою крепящуюся, глаголаху: «Се, и девы на земли прославиша Господа!» Человецы же, трепетом одержими, ужасахуся, и удивляющеся, песньми прославляху: «О чудесе! Дева врага победи и молится милостивому Владыце за спасение мира». Сего ради и мы, поминающе исполненное веры мужество твое, преславная мученице, ублажаем тя, глаголюще:
Радуйся, доблественная страстотерпице, в защиту веры Православныя подвизавшаяся;
Радуйся, наветов вражиих мудрая разорительнице.
Радуйся, иконийскаго града учительнице;
Радуйся, идольския суетныя лести обличительнице.
Радуйся, верных смыслы вонями добродетелей твоих благовонствующая;
Радуйся, смрад страстный благодатию, свыше ти данною, отгоняющая.
Радуйся, еллинския кумиры, яко прах, уничижившая;
Радуйся, твоими подвиги, иже к Богу, тьмы начальника низложившая.
Радуйся, горняя, паче дольних, восхождения в сердце твоем положити возлюбившая;
Радуйся, Христу Господу, Человеколюбцу, всю себе предавшая.
Радуйся, подобне первомученице Фекле, мног народ словом Божиим просветившая;
Радуйся, неверных к Божественней вере приведшая.
Радуйся, Параскево, невесто Христова всехвальная.

Кондак 6
Проповедницу чудес и славы Божия явила еси себе, доблестная мученице Параскево, после преславнаго исцеления в темнице, от Христа Господа тебе дарованнаго. Емуже возсылающе благодарственная моления, радостно мы вопием: Аллилуиа.

Икос 6
Возсияла еси, яко светозарная звезда, обагрившися каплями кровными, и Божественною благодатию отгнала еси безбожия тьму, мученице Параскево, просветивши верныя, чтущия твоя доблественныя подвиги. Темже восхваляюще тя, усердно вопием ти:
Радуйся, богомудрая дево, Христовых Страстей общнице;
Радуйся, в темнице ти сущей, ангельскаго посещения сподобльшаяся.
Радуйся, в отраду болезней твоих орудия Страстей Христовых созерцавшая;
Радуйся, честный Крест и терновый венец нетленнаго Жениха твоего, Христа, узревшая.
Радуйся, язвы Господа на теле твоем носившая;
Радуйся, от всех язв Темже Господом чрез Ангела исцеленная.
Радуйся, яко Той же Господь дарова тебе крепость и премудрость, ейже не возмогоша противитися вси противляющиися истине;
Радуйся, от кровей твоих светлую себе ризу исткавшая.
Радуйся, яко тобою от многих ран грешнии исцеляются;
Радуйся, яко тобою от различных болезней с верою тя призывающии здравие приемлют.
Радуйся, уз греховных скорая решительнице;
Радуйся, о всех христианах пред Престолом Божиим верная молитвеннице.
Радуйся, Параскево, невесто Христова всехвальная.

Кондак 7
Хотящу безумному мучителю игемону желание свое улучити и паки покушающуся ласкательными словесы тебе, святая мученице Параскево, от истиннаго Бога обратити к поклонению идолом, ты же, яко богомудрая дева, вразумляющи его в суетстве идолов, рекла еси ему: «Покажи ми, игемоне, богов, ихже ты мниши исцеливших мя от ран», и по велению мучителя пришедши в храм идольский, помолилася еси Единому истинному Богу, от Егоже Святаго имене вси идоли падоша и разсыпашася в прах, во уверение, яко един есть Бог, прославляемый во Святей Троице, Емуже вкупе со святыми Ангелами выну вопиеши: Аллилуиа.

Икос 7
Новую показа безчеловечия ярость зверообразный мучитель, егда тебе, святая мученице Параскево, повеле на древе повесити и свещами горящими опаляти твоя девическая ребра. Сие пачеестественное терпение твое благоговейно воспоминающе, похвалами блажим тя сицевыми:
Радуйся, многообразныя болезни за Царя Христа Бога претерпевшая;
Радуйся, яко пред лицем человеческим аще и муку прияла еси, упование же твое безсмертия исполнено есть.
Радуйся, яко повешена была еси на древе Христа ради, на Кресте распятаго, да венцем нетления от Него увязешися;
Радуйся, яко строгана была еси по ребром, Иисуса ради, копием в ребро прободеннаго, да Царствием Его Небесным насладишися.
Радуйся, яко огнь любве к Богу в сердце твоем возжгла еси;
Радуйся, яко за Того свещами огненными палима была еси.
Радуйся, твердейшая адаманта в терпении твоем показавшаяся;
Радуйся, в вере во Христа Господа крепчае паче камене, в мужестве непоколебимом пребывшая.
Радуйся, яко, огнем опаляема, огненною мудростию пламень угасила еси естественный;
Радуйся, яко свещу неугасиму душевную соблюдши, вошла еси со Христом Женихом твоим в чертог Небесный.
Радуйся, яко, чудесными искрами страсти умертвивши, демонския полки страдальчески победила еси;
Радуйся, яко страданиями твоими мног народ к познанию истиннаго Бога привела еси.
Радуйся, Параскево, невесто Христова всехвальная.

Кондак 8
Странное и страшное святыя мученицы Параскевы страдание видяще, вернии удивляхуся зело: како млада отроковица сущи, в юностнем телеси таковыя мужественно за Христа терпит муки, слезнаго исполнишася умиления; невернии же, трепетом одержими и чудесными искрами опаляеми от Ангела, бежаху; мы же, прославляюще дивнаго во святых Бога, вопием: Аллилуиа.

Икос 8
Весь Сладчайший Иисус сладость, весь желание тебе бысть, святая мученице Параскево; сладце бо Его ради горькия терпела еси муки, глаголющи к мучителю: «Враже нечестивый игемоне, что неистовствуеши на христианы; ни царства у тебе отъях, ни града твоего разорих, но буими словесы увещати мя помышляеши. Аз плоти моея не щажду за Христа моего, зане Он любит мя; к Нему пойду и Того буду невеста. Той мене спасет от рук враг моих и дарует ми жизнь вечную». Поминающе сицевая твоя словеса и доблественныя подвиги твоего исповедничества, вопием ти:
Радуйся, злобы неверных не устрашившаяся;
Радуйся, твари паче Создавшаго не послужившая.
Радуйся, во еже сопротивлятися врагом Божиим, в духовное всеоружие благодати Божией облекшаяся;
Радуйся, идолом немым и глухим в капище идольском не поклонившаяся.
Радуйся, именем всесильнаго Господа и твоею к Нему молитвою вся идолы тамо сокрушившая;
Радуйся, демонов коварствия Божественною силою упразднившая.
Радуйся, томления мучителей Крестом Господним, яко державным оружием, мужески победившая;
Радуйся, огненное опаление и жжение девственнаго телесе твоего в воню мира Христу Богу принесшая.
Радуйся, веру, надежду и любовь к Богу сохраншая;
Радуйся, победы венец от руки Христа Жизнодавца приемшая.
Радуйся, реко, исполненная благодати Божия водами;
Радуйся, источниче, кипящий чудес излияний.
Радуйся, Параскево, невесто Христова всехвальная.

Кондак 9
Всеми богокрасными лепотами добродетелей украсивши себе, прехвальная мученице Параскево, явилася еси тверда и непоколебима во исповедании веры Христовы. Сего ради ангельское естество велиею возрадовася радостию, узревше мужественную крепость твою и твердое твое упование. И мы, слышавше, како посрамися лукавый враг, от девы побеждаемь, и како сам Христос Бог достойно венчает тя, мученицу, купно с тобою радостно вопием прославляющему тя Господу: Аллилуиа.

Икос 9
Ветийствующий язык не возможет восхвалити дела твоя и великия страдальческия твоя подвиги по достоянию, славная мученице Параскево; кто бо повесть страдания твоя и добродетели; на судищи бо исповедавши истиннаго Бога, от безчеловечных мучителей претерпела еси лютая, болезненная страдания; и в сих жестоких болезнех бывши палицами биема, железными ноготьми строгаема и огнем палима, ничтоже ино вещала еси к Создателю твоему, токмо сие: «Спаси мя, Господи, недостойную рабу, не разлучи мене, Христе, от Твоего желания!» Смиренно поминающе сицевая твоя страдания, умиленную песнь приносим ти, глаголюще:
Радуйся, кровию страдания твоего Христу Богу уневестившаяся;
Радуйся, Страстем Христовым подражавшая.
Радуйся, любве ради Господни жестокия мучения претерпевшая;
Радуйся, от Небеснаго Царя благолепный венец восприявшая.
Радуйся, яко всем верным воспоминание твое пресладко;
Радуйся, яко всей Церкви Христовой имя твое пречестно.
Радуйся, досточудное Ангелом и человеком зрелище бывшая;
Радуйся, и самых мучителей непобедимым терпением твоим удивившая.
Радуйся, яко Сам Господь свыше призре на твоя страдания;
Радуйся, яко Сам Той Подвигоположник похвали твоя подвиги.
Радуйся, девам доброто и похваление;
Радуйся, мучеником красото и верным утешение.
Радуйся, Параскево, невесто Христова всехвальная.

Кондак 10
Спасти хотящи душу твою, о теле твоем всячески небрегла еси, святая мученице Параскево; егда бо на тя и мечное на смерть осуждение изыде от беззаконнаго мучителя, ты под меч острый, аки под венец красный, радостно потекла еси; и во главу усекновена бывши, душею твоею воспарила еси в чертог Жениха твоего безсмертнаго, Христа Бога, Емуже выну на небесех ныне воспеваеши: Аллилуиа.

Икос 10
Стена была еси крепка и непоколебима во исповедании веры в Триединаго Бога; сего ради многоболезненная страдания от мучителя претерпела еси и, добре скончавши течение твое, венец от Христа Бога прияла еси и ангельских ликостояний на небеси сподобилася еси. Темже поминающе твоя подвиги, ублажаем тя, многострадальная:
Радуйся, течение мученическаго пути добре скончавшая;
Радуйся, веру безсмертному Жениху Христу до смерти сохраншая.
Радуйся, в житии твоем богоугодными делы Господеви послужившая;
Радуйся, за любовь ко Христу Богу всю мирскую суету отвергшая.
Радуйся, силою свыше на брань противу сил преисподних препоясанная;
Радуйся, победоносною славою в вышних от Христа победителя одеянная.
Радуйся, оружием благоволения Божия венчанная на земли;
Радуйся, цветом неувядаемым украшенная на небеси.
Радуйся, христианом крепкое прибежище;
Радуйся, верным твердое заступление.
Радуйся, безпомощных защитительнице;
Радуйся, сирых покровительнице.
Радуйся, Параскево, невесто Христова всехвальная.

Кондак 11
Пение наше всякое побеждается, и многое множество хвалебных песней, восписуемых ти, несть довольно по достоянию восхвалити тя, прехвальная мученице Параскево; обаче молитвами твоими получающе от Христа Бога неисчетная благодеяния, благодарни суще, поем о тебе Ему: Аллилуиа.

Икос 11
Возсиявши нам, яко светило светозарное, мрак демонский от человек твоими мольбами отгоняеши, святая мученице Параскево, приемши бо благодать целити недуги, всем верным, притекающим к тебе с молитвою, подаеши исцеление; кровоточивии бо и прокаженнии прикосновением к раце мощей твоих очищаются, глусии слышат, разслабленнии здрави бывают призыванием Святаго твоего имене. Мы же, поминающе скорое заступление твое, вопием ти:
Радуйся, благовонная смирно, Церковь Христову благоухающая;
Радуйся, благонадежная молитвеннице, фимиам молитвы о нас к Богу приносящая.
Радуйся, мироположнице исцелений неоскудная;
Радуйся, сокровище Божиих даров неиждиваемое.
Радуйся, чаше, от обилия дому Божия черплющая радость;
Радуйся, сосуде, от исполнения Христова приемлющий всех благ небесных сладость.
Радуйся, благодатную росу исцелений всем верным источающая;
Радуйся, скорбныя сердца недужных дарованием исцелений ободряющая.
Радуйся, яко Христос Бог за доблественная твоя страдания славу и велелепие на тя возложил есть;
Радуйся, яко тебе Царь царствующих и Господь господствующих блаженство Царствия Своего даровал есть.
Радуйся, Царствия Христова сонаследнице;
Радуйся, славы Божия сопричастнице.
Радуйся, Параскево, невесто Христова всехвальная.

Кондак 12
Благодать от Бога дана ти есть подавати исцеления всем требующим, яко от источника пребогатаго, хранити же и соблюдати от различных болезней, бед и скорбей всякаго человека, верою, любовию и благоговением честная твоя страдания воспоминающаго и почитающаго. Молитвеннаго твоего о нас предстательства и благодатных дарований не лиши и нас, многострадальная Христова страстотерпице; да и мы, здрави суще телом и духом, в нынешней и будущей жизни о тебе поем Богу: Аллилуиа.

Икос 12
Поем твоя крепкия подвиги, почитаем страдания, хвалим долготерпение, ублажаем святую твою кончину, славим твое в немощном теле непобедимое мужество, имже на земли и на небеси прославилася еси, святая и добропобедная мученице Параскево; и в честь твоих победоносных подвигов и страданий похвальная восписуем ти сия:
Радуйся, от ангельских чинов в сожительство их любезно приятая;
Радуйся, от девственных ликов в чертог Небесный радостно введенная.
Радуйся, от мученических полков под венец славы провождаемая во гласе радования;
Радуйся, от небесных жителей приемлющая о Господе целование.
Радуйся, яко мзда твоя многа есть на небесех;
Радуйся, яко радость твоя вечна есть во светлости святых.
Радуйся, в небеснем чертозе Божественнаго Жениха твоего со Ангелы Его веселящаяся;
Радуйся, лицезрением всеблагаго Господа тамо вкупе со святыми наслаждающаяся.
Радуйся, душевных и телесных недугов наших целительнице;
Радуйся, душеспасительных благих небесных даров подательнице.
Радуйся, яко тобою от нечаянныя смерти сохранитися уповаем;
Радуйся, яко твоим заступлением вечную жизнь от Христа Бога улучити благонадежно чаем.
Радуйся, Параскево, невесто Христова всехвальная.

Кондак 13
О святая, премудрая и всехвальная мученице, невесто Христова Параскево! От благоговейных сердец приносимую ти, аще и недостойную, хвалебную песнь сию приими от нас, яко усердную жертву сердец, любящих тя и чествующих святую память твою. Охраняй нас молитвами твоими святыми, и вся люди, притекающия к честней иконе твоей и с любовию лобызающия ю, избавляй от всякаго злаго обстояния и скорби; да тихое и безмолвное житие поживше в нынешнем веце, блаженство вечное наследим и купно с тобою и всеми святыми выну сподобимся воспевати Богу: Аллилуиа.
Этот Кондак читается трижды, затем 1-й Икос «Ангелом честную...» и 1-й Кондак «Избранной Богом...».

Молитва святой мученице Параскеве Пятнице
О святая невесто Христова, многострадальная мученице Параскево! Вемы, яко от юности твоея ты всею душею твоею и всем сердцем твоим возлюбила еси Царя славы, Христа Спасителя и Ему единому уневестилася еси, раздавши имения твоя неимущим и бедным.
Ты силою благочестия твоего, твоим целомудрием и праведностию, яко лучами солнечными, просияла еси, живши свято среди неверных и безбоязненно проповедавши им Христа Бога.
Ты от дней юности твоея, наученная твоими родителями, всегда благоговейно чествовала еси дни искупительных Страстей Господа нашего Иисуса Христа, Егоже ради и сама добровольно пострадала еси.
Ты, десницею Ангела Божия от неисцельных ран дивно исцеленная и восприявшая неизреченную светлость, изумила еси неверных мучителей.
Ты, именем Господа нашего Иисуса Христа и силою молитвы твоея в капище языческом всех идолов долу повергши, в прах сокрушила еси я.
Ты, опаляемая свещами, единою молитвою твоею ко всесильному Господу угасила еси огнь естественный, и темже пламенем, чудесно возжженным чрез Ангела Божия, попаливши неистовых беззаконников, мног народ привела еси к познанию истиннаго Бога.
Ты, во славу Господа приявши мечное главы твоея усечение от мучителей, доблественно скончала еси страдальческий твой подвиг, возшедши душею твоею на небеса, в чертог вожделеннаго твоего Жениха Христа Царя Славы, радостно сретшаго тя сим небесным гласом: «Радуйтеся, праведнии, яко мученица Параскева увенчася!»
Темже и мы днесь приветствуем тя, многострадальная, и, взирающе на святую твою икону, с умилением вопием ти: всечестная Параскево! Вемы, яко велие имаши дерзновение ко Господу; умоли убо Его, Человеколюбца, и о нас, предстоящих и молящихся ти, да подаст Он и нам, якоже тебе, терпение и благодушие в бедах и скорбных обстояниих; да дарует Он ходатайством твоим и заступлением радостное, благоденственное и мирное житие, здравие же и спасение, и во всем благое поспешение возлюбленному нашему Отечеству, да ниспослет святое Свое благословение и мир, и всем православным христианом да подаст твоими святыми молитвами утверждение в вере, благочестии и святости, преспеяние же в христианской любви и всякой добродетели; да очистит нас, грешных, от всякия скверны и порока; да оградит нас святыми Своими Ангелами, да заступит, сохранит и помилует всех святою Своею благодатию и соделает наследниками и причастниками Небеснаго Своего Царствия.
И тако улучивше спасение твоими святыми молитвами, предстательством и заступлением, всеславная невесто Христова Параскево, прославим вси пречестное и великолепое имя дивнаго во святых Своих истиннаго Бога, Отца и Сына и Святаго Духа, всегда, ныне и присно, и во веки веков. Аминь.

Молитва святой мученице Параскеве Пятнице (иная)
О святая и преблаженная мученице Христова Параскево, красото девическая, мучеников похвало, чистоты образе, великодушных зерцало, премудрых удивление, веры христианския хранительнице, идольския льсти обличительнице, Евангелия Божественнаго поборнице, заповедей Господних ревнительнице, сподобльшаяся приити ко пристанищу вечнаго покоя и в чертозе Жениха твоего Христа Бога светло веселящаяся, сугубым венцем девства и мученичества украшенная!
Молим тя, святая мученице, буди о нас печальница ко Христу Богу, Его же преблаженнейшим зрением присно веселитися; моли Всемилостиваго, иже словом очи слепым отверзе, да избавит нас от болезни очес наших, телесных вкупе и душевных; разжени твоими святыми молитвами темный мрак прибывший от грехов наших, испроси у Отца Света свет благодати душевным и телесным очесем нашим; просвети нас, омраченных грехми, светом Божия благодати, да твоих ради святых молитв дастся безочесным сладкое зрение.
О великая угодница Божия! О мужественнейшая дево! О крепкая мученице святая Параскево! Святыми твоими молитвами буди нам грешным помощница, ходатайствуй и молися о окаянных и зело нерадивых грешницех, ускори на помощь нам, ибо зело немощны есмы.
Моли Господа, чистая девице, моли Милосердаго, святая мученице, моли Жениха твоего, непорочная Христова невесто, да твоими молитвами пособствоваши, мрака же греховнаго избывше, во свете истинныя веры и деяний Божественных внидем во свет вечный дне невечерняго, во град веселия приснаго, в немже ты ныне светло блистаеши славою и веселием безконечным, славословящи и воспевающи со всеми Небесными Силами Трисвятительное Единое Божество, Отца и Сына и Святаго Духа, ныне и присно и во веки веков. Аминь.

Тропарь мученице Параскеве Пятнице
Тропарь, глас 4:
Премудрая и всехвальная Христова мученица Параскева, мужескую крепость приемши, женскую же немощь отвергши, диавола победи, и мучителя посрами, вопиющи и глаголющи: приидите, тело мое мечем ссецыте, и огнем сожгите, аз бо радующися иду ко Христу, Жениху моему. Тоя молитвами, Христе Боже, спаси души наша.

Ин тропарь, глас 8:
Иже веруя, и мужеством душевным, тезоименитне, диавола посрамила еси и мучительское прещение и раны доблественне победила еси, мученице Параскево, вопия: мечем сосецайте и огнем сожизайте тело мое, яко да, радуяся, прииду Жениху моему Христу Богу Егоже моли спастися душам нашим.

Кондак, глас 3:
Всесвятое и непорочное мучение принесши, яко вено пречестное безсмертному Жениху Христу, ангельское ликостояние возвеселила еси, и победила еси демонския козни; сего ради тя честно верою чтим, мученице Параскево, многострадальная.

Величание
Величаем тя, страстотерпице Христова Параскево, и чтим честное страдание твое, еже за Христа претерпела еси.