Кондак 1
Избранней угоднице Божией, преподобней Параскеве, Влахернския обители подвижнице доблей, житием богоугодным просиявшей, приидите, вернии, принесем похвальная пения. Ты же, честная мати, яко имущи дерзновение велие ко Господу, от всяких нас бед свободи, да зовем ти:
Радуйся, Параскево, преподобная мати наша.

Икос 1
Ангелов Творец и Господь Сил избра тя, преподобная мати, от младенства на служение Себе, во дни же гонений лютых на Церковь нашу яви тя славную исповедницу веры Христовы. Мы же, дивящеся таковому о тебе Божию промышлению, вопием сице:
Радуйся, от младенческих пелен Богом избранная;
радуйся, в страсе Божии родительми воспитанная.
Радуйся, Христа всем сердцем возлюбившая;
радуйся, Божественным писаниям навыкшая.
Радуйся, горлице Христова пустыннолюбная;
радуйся, Церкве ластовице сладкогласная.
Радуйся, дом и сродство оставльшая;
радуйся, от юности Господа взыскавшая.
Радуйся, Небесному Царю себе вручившая;
радуйся, с чистыми девами Господу послужившая.
Радуйся, райскаго сада цвете неувядаемый;
радуйся, света Евангельскаго свеще неугасимая.
Радуйся, Параскево, преподобная мати наша.

Кондак 2
Видящи мати дщерь свою Параскеву, трилетствующую отроковицу, в радости пришедшую из церкве, вопрошаше: чадо, что убо уразумела еси? Та же, прославляющи Бога, воспе хвалебную песнь Ему: Аллилуиа.

Икос 2
Разум небесный разумети ищущи, преподобная мати, Божественное Писание возлюбила еси и святому Иоанну Богослову в любви поревновала еси. Мы же, дивящеся таковому твоему произволению, воспеваем сице:
Радуйся, всякое презорство в себе победившая;
радуйся, измлада ближняго возлюбившая.
Радуйся, плотское мудрование умертвившая;
радуйся, постом и подвиги плоть духу покорившая.
Радуйся, путь узкий и прискорбный избравшая;
радуйся, в болезни всю себе в руце Божии предавшая.
Радуйся, пастырем Кронштадтским исцеленная;
радуйся, святым ангелом от внезапныя смерти спасенная.
Радуйся, благий ярем Христов подъемшая;
радуйся, образ благочестия нам явившая.
Радуйся, любомудрием неверие посрамляющая;
радуйся, непорочным житием грехи мира обличающая.
Радуйся, Параскево, преподобная Мати наша.

Кондак 3
Силою Вышняго укрепляема, преподобная Параскево, от юности возжелала еси мир оставити и вся, яже в мире. Темже, и жениха земнаго отвергши, потщалася еси обручити себе Единому Нетленному Жениху Христу, да присно сподобишися в Царствии Небеснем воспевати Ему: Аллилуиа.

Икос 3
Имущи твердое произволение Богови поработати, преподобная Параскево, дом отчий оставила еси и, во обитель Теолинскую вселившися, начало иноческим подвигом положила еси. Сего ради ублажаем тя сице:
Радуйся, постническаго жития возжелевшая;
радуйся, немощь телесную мужески одолевшая.
Радуйся, волю свою Господа ради отсекшая;
радуйся, Того всем сердцем возлюбившая.
Радуйся, неустанно ангельски Бога славившая;
радуйся, вечное блаженство в Нем нашедшая.
Радуйся, под покровом Богородицы пребывавшая;
радуйся, Пречистей Деве много послужившая.
Радуйся, икону Ея в видении узревшая;
радуйся, сию во обители, аки чудесное знамение, обретшая.
Радуйся, первоверховными апостолами исцеленная;
радуйся, предуказанное ими служение исполнившая.
Радуйся, Параскево, преподобная мати наша.

Кондак 4
Бурею душевных треволнений обдержима, преподобная мати, всю себе в послушание святителю Серафиму предала еси, иже, смирению и терпению тя научая, плевелы страстей из сердца твоего с любовию исторгаше. Ты же, видящи таковое о тебе отеческое попечение, с благодарностию воспевала еси Богу: Аллилуиа.

Икос 4
Слышати сподобльшися ангельский глас, тайны ти сказующий, равноангельнаго жития возжелала еси, преподобная Параскево. Темже, постом и бдением плоть твою духови покоривши, молитвами непрестанными козни вражия отразила еси. Сего ради чтим тя, глаголюще:
Радуйся, ангельскаго посещения таиннице;
радуйся, небесных ликов сопричастнице.
Радуйся, делателей винограда Христова соработнице;
радуйся, отеческих преданий хранительнице.
Радуйся, лучами мысленнаго Солнца озаряемая;
радуйся, во время глада дивно Богом укрепляемая.
Радуйся, сладость послушания, яко манну, вкусившая;
радуйся, терпение во искушениях стяжавшая.
Радуйся, преподобным женам подражательнице;
радуйся, чистоты и целомудрия наставнице.
Радуйся, данныя тебе таланты приумножившая;
радуйся, благая рабо и верная, вшедшая в радость Господа Твоего.
Радуйся, Параскево, преподобная мати наша.

Кондак 5
Божественным Духом просвещенная, лествицею добродетелей к Небесному Жениху востекла еси, идеже пребывающи, помощь и утешение верным людем подаеши, заблуждшия же вразумляеши, да воспевают Богу хвалебную песнь: Аллилуиа.

Икос 5
Возсия евангельски свет богоугоднаго жития твоего, преподобная мати, людие бо заблуждшии, на тя взирающе, путь к Богу обретаху и по достоянию ублажаху тя сице:
Радуйся, житием твоим Богу угодившая;
радуйся, лукаваго врага посрамившая.
Радуйся, терпением венец победный улучившая;
радуйся, ярость безбожную низложившая.
Радуйся, прелести мира отвергшая;
радуйся, корень самолюбия исторгшая.
Радуйся, святителю Серафиму в послушание себе предавшая;
радуйся, преподобную Рафаилу, яко матерь, почитавшая.
Радуйся, чистым сердцем Бога воспевавшая;
радуйся, чада церковная в лик собравшая.
Радуйся, малых сих во Христе утвердившая;
радуйся, пению разумному их научившая.
Радуйся, Параскево, преподобная мати наша.

Кондак 6
Проповедница благочестия делом и словом явльшися, святая мати, подвигу молитвенному себе предала еси, к Богу взывающи: даждь, Господи, сердцу моему чистоту и смирение и научи мя творити волю Твою. Помози и нам, преподобная, добре подвизатися, да вкупе с тобою воспоим Богу: Аллилуиа.

Икос 6
Видевши в чуднем видении верховныя апостолы, благословляющия тя, преподобная мати, на путь крестный, радости и утешения исполнилася еси. Темже, и в темнице сущи, тверда и непоколебима в вере пребыла еси и с любовию многим послужила еси. Мы же, дивящеся благому твоему терпению, вопием:
Радуйся, многими знаменьми и чудесы Богом в вере утвержденная;
радуйся, верховными апостолы на путь страдания благословленная.
Радуйся, сокровище духа неиждиваемое;
радуйся, богатство милости неоскудеваемое.
Радуйся, печальных скорое утешение;
радуйся, малодушных верное подкрепление.
Радуйся, душу за други полагавшая;
радуйся, никогдаже зла ближнему желавшая.
Радуйся, ум твой в горняя устремившая;
радуйся, молитву Пречистей Деве многочастне приносившая.
Радуйся, в лишениих и испытаниих образ терпения являющая;
радуйся, во исповедничестем подвизе верныя люди утверждающая.
Радуйся, Параскево, преподобная мати наша.

Кондак 7
Хотя в делании духовнем тя утвердити, да совершена будеши, преподобная Параскево, старец твой святитель Серафим с любовию во благочестии тя наставляше и во искушениих укрепляше. Ты же, от силы в силу восходящи, страданием и исповеданием чертога Небеснаго Жениха достигла еси, идеже с лики святых поеши хвалебную песнь: Аллилуиа.

Икос 7
Новая исповедница Христова в земли Русстей явилася еси, преподобная мати, веру бо непорочну сохранивши и, яко злато в горниле, страданьми очищшися, даже до конца вся мужественне претерпела еси. Сего ради воспеваем ти таковая:
Радуйся, Духа Святаго причастнице;
радуйся, веры правыя исповеднице.
Радуйся, кадило молитвы непрестанныя;
радуйся, фимиаме Христов благоуханный.
Радуйся, чистоты и целомудрия цвете неувядаемый;
радуйся, многих добродетелей лозо плодовитая.
Радуйся, Господа Иисуса агнице избранная;
радуйся, Церкве Русския чадо верное.
Радуйся, апостольским глаголом утвержденная;
радуйся, отеческими писании наставленная.
Радуйся, теплая наша молитвеннице;
радуйся, в нуждах скорая помощнице.
Радуйся, Параскево, преподобная мати наша.

Кондак 8
Странное чудо во дни безбожнаго гонения явися житие твое, преподобная мати. Егда же любовь ко Христу в вину тебе вменися, ты, страха смертнаго не убоявшися, изгнание и лишение мужественне претерпела еси, воспевающи Победителю смерти: Аллилуиа.

Икос 8
Всю себе в руце Божии предавши, преподобная мати, умиленною душею Тому всегда предстояла еси, и псаломски яко птица обретши себе храмину, в дому Божии непрестанно пребывала еси. Мы же, дивящеся таковой любви твоей ко Господу, ублажаем тя сице:
Радуйся, всем сердцем Бога возлюбившая;
радуйся, в дому Его усердно послужившая.
Радуйся, монашествующих красото пресветлая;
радуйся, Церкве Русския доброто боголепная.
Радуйся, Дмитровския земли похваление;
радуйся, обители Влахернския украшение.
Радуйся, невесто Христова богомудрая;
радуйся, образе нищеты духовныя.
Радуйся, сосуде Духа Святаго исполненный;
радуйся, молитвы органе доброгласный.
Радуйся, наставнице истиннаго покаяния;
радуйся, вкусившая яко Благ Господь.
Радуйся, Параскево, преподобная мати наша.

Кондак 9
Весь иноческий лик Влахернския обители чтит святую память твою, преподобная мати Параскево, и, с радостию духовною лобызая честныя мощи твоя, благодарне взывает Богу: Аллилуиа.

Икос 9
Ветии многовещанныя не возмогут восхвалити по достоянию подвиг многоскорбнаго жития твоего, преподобная Параскево. Ты бо, страждущи за Христа, познала еси любовь Божию, всяк разум превосходящую. Сего ради вопием ти сице:
Радуйся, яко Страсти Христовы воспевала еси;
радуйся, яко крест свой смиренно несла еси.
Радуйся, Иовле терпение явившая;
радуйся, страдания многоболезненная претерпевшая.
Радуйся, подвигу преподобных подражательнице;
радуйся, мученическаго лика сопричастнице.
Радуйся, дево мудрая, светильник елеем исполнившая;
радуйся, на брачный пир Жениха Христа вшедшая.
Радуйся, богатство славы Божия стяжавшая;
радуйся, сладости жизни вечныя сподобльшаяся.
Радуйся, молитвы лампадо неугасающая;
радуйся, нас, во тьме сущих, просвещающая.
Радуйся, Параскево, преподобная мати наша.

Кондак 10
Спасения ищущих наставляла еси, преподобная, закон Господень в сердце своем хранити, гнев кротостию и незлобием угашати, терпением твердым бесовския козни побеждати и за вся Бога благодарити, выну вопиюще: Аллилуиа.

Икос 10
Царя Небеснаго Христа Спаса нашего кротости подражающи, добром зло побеждала еси, преподобная мати, козни же и наветы вражия кротко претерпевающи, тяготы ближних смиренно носила еси. Таковому богоугодному житию твоему дивящеся, вопием сице:
Радуйся, агнице Божия незлобивая;
радуйся, смирением Господу Иисусу подобная.
Радуйся, о души, вещи безсмертней, прилежавшая;
радуйся, лесть и лукавство отвергавшая.
Радуйся, чистое сердце стяжавшая;
радуйся, внутреннима очима Бога зревшая.
Радуйся, якоже три отроцы в пещи огнем нечестия не опаленная;
радуйся, сострадания и любве к людем исполненная.
Радуйся, безбожие верою крепкою посрамившая;
радуйся, всем житием твоим Богу угодившая.
Радуйся, правды ради изгнанная;
радуйся, Царствие Небесное наследовавшая.
Радуйся, Параскево, преподобная мати наша.

Кондак 11
Пение всеумиленное Пресвятей Троице приносила еси, блаженная мати, и, многия юныя в лик певцев собравши, верности Церкви Христовой и благочестию научила еси. Помози убо и нам подвигом добрым подвизатися, веру соблюсти и сподобитися во веки пети: Аллилуиа.

Икос 11
Светозарную свещу, мрак безбожия разгоняющую, зрим тя, преподобная мати Параскево, зане просвети тя Господь светом истины и благодати Своея исполни. Темже вопием тебе сице:
Радуйся, свеще, Духом Святым возжженная;
радуйся, звездо, благочестием сияющая.
Радуйся, цевнице молитвы сладкозвучная;
радуйся, храмино, добродетельми украшенная.
Радуйся, источника мудрости взыскавшая;
радуйся, Бога на земли познавшая.
Радуйся, смиренномудрием страсти обуздавшая;
радуйся, иноком путь добрый указавшая.
Радуйся, от скверны беззакония нас изымающая;
радуйся, истаявшая сердца исцеляющая.
Радуйся, агнице, Агнцем Божиим запечатленная;
радуйся, причастнице красоты нетленныя.
Радуйся, Параскево, преподобная мати наша.

Кондак 12
Благодатию, от Бога тебе данною, преподобная мати, яко евангельская мудрая дева, елеем добрых дел светильник души твоея исполнила еси и, многия пастыри и люди верныя, во узах и горьких работах сущия, посещающи, яко Самому Христу послужила еси, воспевающи Ему: Аллилуиа.

Икос 12
Поюще равноангельное житие твое и прославляюще блаженную кончину, смиренно молим тя, преподобная мати Параскево: умоли Милосердаго Бога, да не погибнем в беззакониих наших, но благодатию Духа Святаго очистимся от всякия скверны и благодарне тебе воспоим:
Радуйся, житие твое милосердием украсившая;
радуйся, алчущих напитавшая и нагих одеявшая.
Радуйся, больных и во узах сущих посещавшая;
радуйся, тем Христу усердно послужившая.
Радуйся, венцем победы увенчанная;
радуйся, в скинию святых со славою введенная.
Радуйся, со Ангелы ныне ликовствующая;
радуйся, во свете невечернем пребывающая.
Радуйся, яко мощи твоя чудеса и исцеления источают;
радуйся, яко вси, притекающии к ним с верою, помощь получают.
Радуйся, новая звездо, на тверди церковней сияющая;
радуйся, мир и радость сердцам нашим подающая.
Радуйся, Параскево, преподобная мати наша.

Кондак 13
О, всехвальная мати, преподобноисповеднице Параскево! Приими малое сие моление наше, с любовию тебе приносимое, и умоли Господа нашего Иисуса Христа, да утвердит нас в вере Православней, благочестии и чистоте, и сподобит во Царствии Небеснем вкупе с тобою воспевати Богу: Аллилуиа.

Молитва
О, всехвальная преподобноисповеднице Параскево, кроткая Христова агнице, земли Российския цвете благоуханный, избранная, непорочная и добрая в женах!
Ты, благое иго заповедей Господних терпеливо подъемши и язвы Его преподобием носящи, любовию последовала еси Христу. Во дни же гонений на Церковь Русскую мужественне во исповедании Православныя веры пребыла еси и, житие монашеское подвигом страдания увенчавши, в чертог Небеснаго Жениха возшла еси.
Темже молим тя, славная в женах исповеднице: моли Церкви нашей в мире и благоденствии пребывати, стране же Российстей непоколебимей в Православии и мире сохранитися и всех врагов сокрушити. Верным, подвиг иночества воприимшым, во благочестии и послушании укрепитися, в ревности по Бозе не оскудевати и неропотным, бодренным и благодарным всегда быти. Нам же, любовию тя почитающым, испроси время на покаяние, твердость во исповедании веры истинныя, заступление от козней вражиих и на Страшнем Суде предстояние одесную Господа нашего Иисуса Христа. Емуже со Отцем и Святым Духом подобает всякая слава, честь и поклонение ныне и присно и во веки веков. Аминь.

Взято с сайта http://www.gimnograf.ru/texts/akafisty/