АКАФИСТ СВЯТОМУ МУЧЕНИКУ ПАРФЕНИЮ

КОНДАК 1
Избранный страстотерпче и пречудный исповедниче Христов Парфение,/ с сонмом мученик непобедимых Церкви Христовой состроитель явился еси,/ свет Пресвятыя Троицы во мраке идолонечестия возвестив,/ любовь ко Христу кровию своею запечатлев,/ и венцем славы неувядаемыя Страстоположником Голгофским увенчан был еси./ Но яко имеяй дерзновение ко Господу,/ в вере Православней не посрамитися/ и кончины христианския сподобитися нам умоли, да зовем ти:
Радуйся, пречудный мучениче Христов Парфение, молитвенниче о нас ко Господу теплейший.

ИКОС 1
Ангельстии лицы дивляхуся, егда, в немощной плоти сый, ангельски за Христа подвизался еси, Парфение, – девственниче Христов, и Сего Возлюбленнаго пред мучители тако исповедал еси: Христа – Сына Божия, со Отцем и Святым Духом исповедую, Троице Единосущней и Нераздельней покланяюся, боги же идольския нивочтоже вменяю, да со Христом жизнь вечную наследую. Мы же, видяще тя в вере святей сице подвизающася, умильно зовем ти:
Радуйся, друже Христов и наш пред Ним заступниче;
радуйся, Церкве Христовы верный обручниче.
Радуйся, евангельския Истины исповедниче неустрашимый;
радуйся, в подвизе веры непобедимый.
Радуйся, яко грозд зрелый, кровь свою за Христа пролиявый;
радуйся, житием нескверным Церковь Христову украсивый.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 2
Видяй брата своего Калогерия, велением императора Декия, мучители костьми растягаема и прочих мучеников, домостроительство Церкве Христовы мужественно совершающих, не устрашился еси, Парфение богомудре, но яко верный воин Христов, на делание сие дивное, со всеми Христу сраспинавшимися, сораспятися Сему потщился еси, да купно страждуще, воспоеши с ними победную песнь Богу: Аллилуиа.

ИКОС 2
Разум богодухновенный благочестием веры стяжал еси, Парфение премудре, егда дух злобы поднебесныя, со клевреты своими, основание Церкве Христовы разорити устремися. Ты же сего, человекоубийцу искони, страданьми твоими посрамил еси, кровь свою за Христа пролияти и сице Церковь Святую во всей вселенной утвердити, яко на пир дивный спешным явился еси. Подвигом сим и любовию твоею ко Господу умиляющеся, приносим ти сия похвалы:
Радуйся, мучениче Христов непобедимый;
радуйся, строителю Церкве Святыя предивный.
Радуйся, яко невесту преизрядную Церковь Святую возлюбивый;
радуйся, злобу мучителей нечестивых кровию своею потопивый.
Радуйся, яко заря утренняя в Церкви Христовой возсиявый;
Радуйся, терпением твоим добр образ верным показавый.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 3
Силою свыше препоясана быша чресла твоя, мучениче Христов Парфение, егда, яко жертва благовонная, за Христа принеслся еси, и тяжкая мучения, яко пир брачный, прияти возжелев, и тако Христу, за спасение мира на Кресте распяту, подражатель усердный явивыйся, богомудренное благочестие веры лет древних преславно миру свидетельствовал еси, да богатства некрадомаго Церкве Христовой вернии хранителие будем, непрестанно вопиюще Богу: Аллилуиа.

ИКОС 3
Имея твердое веры упование в воскресение живых и мертвых, оправданием Крови Сына Божия, Иже умре и воскресе, и мертвыя и оставльшияся в живых воскресит с Собою, костей сокрушение, кожи содрание и главы раздробление паче ценных ометов и почестей царских предпочел еси, и тако славы безсмертныя достигл еси, Парфение боголюбиве. Ныне же Церковь Святая, юже украсил еси подвигом своим, приносит ти благодарственныя сия похвалы:
Радуйся, страстотерпче земный, небесный венценосче;
радуйся, непостыдный исповедниче Пресвятыя Троицы.
Радуйся, Креста знамение славно воздвигнувый;
радуйся, багряницею спасения к вечней славе одеянный.
Радуйся, яко подвиги твоя земным и небесным присное радование;
радуйся, яко любовь твоя ко Господу верным достойное подражание.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 4
Буря неистовства яростнаго воздвижеся на Церковь Христову, егда кесари римстии возомниша богами нарещися. Киими мученьми и изуверскою смерти страшною не устрашаху и не истребляху последователей Христовых? Онех огнем и кипящим елеем опаляху, инех зверьми растерзаху, прочих крестех смолистых сожигаху, но, Господу Богу содействующу, основания Церкве Святыя не поколебаху. Сему лику исповедник непобедимых с радостию причелся еси, терпеливодушне Парфение, да со всеми святыми и Ангелы небесными во веки вопиеши Богу: Аллилуиа.

ИКОС 4
Слышаще тя, Парфение предивный, пред Декием царем мужественно Христа исповедающа: «Мне бо еже жити Христос, а еже умрети – приобретение, ибо Сей есть воистину Сын Божий, спасаяй род человеческий, в Нем бо не постыдимся во веки», мучители злочестивии злобою распыхахуся, людие же, жаждавшии правды евангельския, инии водою, овии же своею кровию крещахуся, душы своя, грехми оскверненныя, во храм Божий освящаху. О сем, угодниче Божий, приносим ти таковая:
Радуйся, Церкве Христовы похвало пресветлая;
радуйся, девства непорочнаго красото предивная.
Радуйся, светильниче веры – Света неугасимаго;
радуйся, рабе благий и верный Господа непостижимаго.
Радуйся, за род христианский усердный молитвенниче;
радуйся, в земных испытаниих наша отрада и прибежище.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 5
Богопротивное веление Декия суемудреннаго не устраши тя, богомудре Парфение, ниже клеврета его Ливания адская мучения, имиже врага Христова соделати тя помышляху. Ты же, в вере и любви ко Господу укрепляяся, со апостолом Павлом взывал еси: «Ни скорбь, ни теснота, ни нагота, ни мечь, ни смерть, ни настоящая, ни грядущая не возможет разлучити мя от любве Божия, яже о Христе Иисусе Господе нашем», Емуже ангельскую песнь воспевал еси: Аллилуиа.

ИКОС 5
Видя благочестивое твое и служение прилежное нуждам Церкве страждущия, градоправитель Рима Эмилиан, иже христианин бе, умирая, все имение свое и юную дщерь свою Каллисту; яко Самому Господу, тебе и брату твоему Калогерию – еще вне гнева кесарева бывшым – в попечение отда, и о благонравней красоте вашего христианскаго служения посреде мрака греховнаго всей Церкви поведа, да вси ведяще любовь вашу ко Господу и ближним своим от рода в род приносят ти, Парфение, сия похвалы:
Радуйся, христианскаго благочестия преславный поборниче;
радуйся, святаго православия некрадомое сокровище.
Радуйся, достояния Церкве Христовы ревностный хранителю;
радуйся, вдов и сиротствующих усердный защитителю.
Радуйся, языка твоего лестию никогдаже осквернивый;
радуйся, усты твоими волю Божию присно благословивый.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 6
Проповедует и величает ныне Святая Церковь подвиги твоя, друже Христов Парфение, имиже с братом твоим Калогерием, аки два херувима, вертоград Христов, Церковь земную, пламенною любовию возлюбисте и сию от злобы нечестия языческаго мечем веры оградисте, да познает мир, яко Бог наш – Бог любве есть, восполняли есте немощь человеческаго естества силою Своею благодатною, да не постыдимся во веки, поюще песнь победную: Аллилуиа.

ИКОС 6
Возсия свет Евангелия Христова во тьме языческаго зловерия, и всю вселенную просвети, егоже ты, светоносче Парфение, со множеством воин Хри любовию сердец ваших, в пламя неугасимое возжже госте, кровию же своею, яко елеем чистейшим Духом Святым освященным, оживотворяете Имже просветися и утвердися Церковь Христова во веки. Мы же, зряще вас в котлех елея кипящаго и на крестех пламенеющих Рима нощнаго, трепещуще, в вере утверждаемся и со умилением приносим ти таковая:
Радуйся, светильниче Света незаходимаго;
радуйся, светоносче Огня неугасимаго.
Радуйся, священная трубо, истину Христову возвещающая;
радуйся, благословенная стрело, козни диавола поражающая.
Радуйся, хлебодаре, принесый себе Христу в жертву непорочную;
радуйся, виночерпию, послуживый небесному Жениху кровию медоточною.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 7
Хотя Господь посрамити зломудрие Ливания богохульнаго и иже с ним, пред народом и ученики твоими, молитвою теплою издалеча утешавшими тя с братом твоим во страданиих ваших, укрепи тя, многострадальне Парфение, адаманта твердейша. Видя же тя мучитель злочестивый в вере непоколебима, сожжению огненному осуди тя, но не утешися. Десница бо Божия, якоже отроком в пещи вавилонстей, пламя огненное охлади, да не коснется телес ваших, в немже, якоже в чертозе царском, услышася песнь ваша к Богу: Аллилуиа.

ИКОС 7
Новое богатство сокровища некрадомаго украси славою Церковь Христову, егда богоборец Ливаний, видя свое посрамление в свидетельстве истиннаго благочестия веры христианския, юже вы с братом Калогерием мужественно исповедасте, неистовствуя, древом горящим раздроби главу твою, Парфение богомудре, и тако венцем славы неувядаемыя увенча тя. Народ же и ученицы твои, кончину твою непостыдную видевше, прославиша Бога, и тело твое с благоговением погребоша. С ними же и мы приносим ти благохваления сия:
Радуйся, славно покоривый худшее лучшему;
радуйся, богомудренно посвятивши настоящее грядущему.
Радуйся, славою и честию главу твою увенчавый;
радуйся, яко дань верности сию в руце Божий отдавый.
Радуйся, в пламени огненном братию по вере не посрамивый;
радуйся, верность Господу Иисусу кровию своею освятивый.
Радуйся, пречудный мучениче Христов Парфение, молитвенниче о нас ко Господу теплейший!

КОНДАК 8
Странницы и пришельцы есмы на земли, идеже, якоже рече Премудрый: всяческая суета сует – томление духа. Но ты, преславне мучениче Парфение, ревнуя о Господе, тленное сие облекл еси в нетление, и смертное облекл еси в безсмертие, и сице, в меру возраста мужа Христова, идеже поглощена смерть победою, якоже небесный, достигл еси образа небеснаго, да о тебе упование спасения имамы, егда вопием Христу победную песнь: Аллилуиа.

ИКОС 8
Весь еси в вышних, весь еси Христов, весь еси неувядаемое цветение и благоухание Церкве Небесныя, земный и небесный Парфение. О тебе вся небесная веселятся, земная же, видяще тя за мир молящагося, яко миро благовонное, у подножия Христова любовию за мир излиянное, все упование на тя возлагают, и якоже Эмилиан верный имение и дщерь свою, душы своя предстательству твоему пред Господем со упованием вверяют и с любовию тебе вопиют:
Радуйся, ищай Христа, обрел еси жизнь вечную;
радуйся, бояйся Господа – открыл еси любовь Предвечную.
Радуйся, силою любве ко Господу смерть нивочтоже вменивый;
радуйся, молитвою пламенною пламя огня вещественнаго погасивый.
Радуйся, в напастех житейских скорый наш помощниче;
радуйся, в пламени грехолюбия погибающим животворный источниче.
Радуйся, пречудный мучениче Христов Парфение молитвенниче о нас ко Господу теплейший.

КОНДАК 9
Всякое естество небесных и земных радости исполняется, видя оба брата по плоти небесными венцы увенчанных и, яко верных другов Христовых, престолу славы Его предстоящих и Пречистой Матери Его Преблагословенней Деве Марии ангельски служащих и к Ней дерзновение благое имущих. Сию бо, Матерь воплотившегося Сына Божия, пречистый храм Спасов и Духа Святаго жилище, всей вселенней исповедаша. О сем радующеся, дивному во святых Богу вопием: Аллилуиа.

ИКОС 9
Витии многовещаннии не возмогут глаголати по достоянию, како убо в земли Вирменстей родивыйся, со исповедники римскими мученически кровь свою за Христа пролияв, ныне же, славный Парфение, яко сокровище благодати Божией преисполненное, в земли нашей словенстей многоцелебными мощами твоими почиваеши, в нихже утешение духовное, болезней исцеление и благоволение Божие имамы. О сем чудящеся, благодарственно приносим ти сия похвалы:
Радуйся, сынов земли Вирменския достойный наследниче;
радуйся, от восток солнца до запад непоколебимый Христов исповедниче.
Радуйся, златовенчанная главо, земли Галицкия небесное благословение;
радуйся, православнаго народа нашего от зол всяческих избавление.
Радуйся, благий и верный о нас пред Богом ходатаю;
радуйся, о Божием мздовоздаянии неустанный глашатаю.
Радуйся, пречудный мучениче Христов Парфение молитвенниче о нас ко Господу теплейший.

КОНДАК 10
Спасительное утешение уготова Господь земли Галицтей и новаго ходатая воздвиже о народе нашем пред лицем Своим, темже святыя мощи вернаго исповедника Своего, Парфения чуднаго, на радость и духовное укрепление нам дарова, в нихже свет востока православнаго возвещает нам о единстве веры древних церквей Христовых и просвещает всех, единеми усты и единем сердцем, во единомыслии веры, братолюбии и смиренномудрии воспевати Богу: Аллилуиа.

ИКОС 10
Стена и ограждение еси всем, к заступлению твоему прибегающым и твоего предстательства теплаго пред лицем Божиим ищущим, страстотерпче Христов Парфение, яко вемы тя силы и благодати Божия исполнена, в нейже укреплен сый, вся козни лукаваго победив, можеши и нам помощи. Сего ради, всечестным мощем твоим припадающе и вселюбезно память твою празднующе, молим тя прилежно: вознеси молитвы твоя ко Господу и всем, по коегождо потребе, милости Божия и грехов прощения испроси, да зовем ти:
Радуйся, в бурях житейских пристанище утишное;
радуйся, в страстех телесных исправление безболезненное.
Радуйся, в греховном усыпании благодатное пробуждение;
радуйся, в нераскаянном отчаянии спасительное врачевание.
Радуйся, яко престарелых родителей слезы горькия отираеши;
радуйся, яко жестоковыйным чадом их суд Божий возвещаеши.
Радуйся, пречудный мучениче Христов Парфение молитвенниче о нас ко Господу теплейший.

КОНДАК 11
Песнь благохваления приносим ти, Парфение, радосте наша, усердно за истину Христову пострадавшему, Сему Возлюбленному последовавшему, со дивными строители Церкве Святыя сораспявшемуся, и тако созвездие Церкве Вселенския украсившему! Темже, Христу, благоизволившу во укрепление надежды нашего спасения облагодатствовати честными мощами твоими землю Галицкую, яко Богу Спасителю нашему благодарно вопием: Аллилуиа.

ИКОС 11
Светозарное светило, святыя мощи твоя, воздвиже Господь в земли словенстей и, яко Ангела верна и молитвенника прилежна, дарова тя, мучениче Парфение, православным людем земли Галицкия, егда лишени быша святых мощей великомученика Иоанна Новаго Сучавскаго. Ныне же, дар божественный и многоценный приимше, Благодателю нашему Богу всеумиленно покланяемся, тебе же, радосте наша, Парфение, яко молитвеннику и пред Богом за нас ходатаю, вопием:
Радуйся, земли Галицкия Ангеле неусыпный;
радуйся, заступниче наш пред Богом всещедрый.
Радуйся, супружеств христианских от распрей ограждение;
радуйся, прибегающих к тебе щедрое благословение.
Радуйся, ходатаю мира всемирнаго незыблемаго;
радуйся, предводителю верных к торжеству пира ангельскаго.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 12
Благодать Всесвятаго Духа укрепляше тя, мученичe Спасов Парфение, егда посреде пламене огненнаго твердо стоял еси на камени веры исповедания твоего, во еже не посрамитися верным Церкве Христовы во испытаниих лютых. Благодатныя же силы и действа Сего Вездесущаго и вся Исполняющаго и нам испроси, достохвальне Парфение, да не оскудеет вера наша и не умалится на Господа надежда наша, ниже посрамятся деяния отцев наших в исповедании нашем, егда вопием хвалебную песнь: Аллилуиа.

ИКОС 12
Поюще предивная страдания твоя и воспевающе любовь твою ко Господу, всехвальне Парфение, восхваляем вси неизреченное благоволение Божие, на нас свершившееся. Тя бо, возлюбленнаго раба Своего, Всеблагий Господь, во утешение и утверждение веры нам дарова, да уразумеем, яко щедр и милостив Господь, в род и род помощник и защититель нам будет: избавит души наша от смерти, очи от слез, нозе от поползновений лукавых, услышит нас, молитв ради твоих, и будет нам во спасение. О сем радующеся, приносим ти сия похвалы:
Радуйся, Церкве Православныя похвало и утверждение;
Радуйся, земли нашея от огня губительнаго избавление.
Радуйся, воине, щитом мира нас ограждаяй;
радуйся, верных от греховныя смерти сохраняяй.
Радуйся, яко молитвы твоя отрада наша спасительная;
радуйся, яко святыя мощи твоя душ наших прохлада священная.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 13
О пречудный исповедниче и преславный мучениче Христов Парфение, теплотою любве твоея ко Господу, посети и согрей сердца наша, и приими сие приношение наше, яко венец похвалы сердечныя, и, яко фимиам благовонный, вознеси молитву твою всех Владыце, и испроси земли нашей мира благоденственнаго, церквам Божиим единства и благостояния, нам же всем чистоты сердечныя и любви непорочныя, да спасаеми тобою, хвалебную песнь вопием Богу: Аллилуиа.
Сей кондак глаголется трижды. По сем икос 1-й и кондак 1-й.

МОЛИТВА
О преславный и Богом возлюбленный мучениче Христов Парфение! Тебе, облиставшему величие Церкви Христовой мученическою кровию своею, основание Ея утвердившему смертию своею, дивно сплетшему подвиг своего исповедничества со тьмы мученик Христовых, сораспявшихся Искупителю мира в воздвижении Его Святыя Церкви к возвещению евангельския истины во всей вселенной, припадающе молимся: яко покровитель и ходатай о народе нашем пред Богом, Парфение пречудный, вознеси молитвы твоя ко Господу о всех, с верою и любовию к честным мощем твоим припадающих и помощи твоея небесныя просящих.
Сотвори убо, да услышана будет пред Богом молитва матерей скорбящих о чадех своих, и чад благосердых о родителех их. Да не изнеможет пред Господем плач и стенание вдов и сирот, ниже ходатайство супругов верных в нуждах их; да утешится у ног твоих всяк в недузех душевных и телесных страждущий, и от клеветы человеческия напаствуемый, и не отыдет тощ всяк во отчаянии изнемогаяй, в скорбех и нуждах житейских к тебе прибегаяй.
Излей благодать твою, боголюбиве Парфение, и укрепи немощи наша противу сетей духа злобы поднебесныя. Да отлучится от мыслей наших дух нависти и злопомнения, зависти и лести, дух боязни и уныния, дух распрей и расколов, дух гордости и всякия иныя злобы, да не погибнем в суете житейстей, якоже страха Божия неимущии.
Еще испроси, угодниче Божий, мира Божия всей вселенной, во благостояние в братском единомыслии Святых Божиих Церквей и спасение всего рода челоческаго. Народам же нашим благоденствия и во всем благоуспевания умоли, и в вере православней укрепи. Пастырей Церкве Божия и честное иночество в молитвах согрей и поддержи, и воздыхания их о спасении мира благоприятны пред лицем Божиим сотвори. Наипаче же умоли Господа Сил, да не отвратит милость Свою от нас, грех ради наших, но яко Отец чадолюбивый, изольет милость Свою на достояние Свое, да не постыдимся во веки. Емуже честь и поклонение подобает: Отцу, и Сыну, и Святому Духу, во веки веков. Аминь.

Сайт создан в системе uCoz