Кондак 1
Избраннаго Господом и Возлюбленнаго Богоматерию, сына великаго народа славянскаго, святителя и чудотворца сербскаго Павла, на престоле святаго богоноснаго Саввы, аки солнце, возсиявшаго, всечестную твою память празднующе, похвальное пение приносим ти. Ты же, яко имеяй дерзновение ко Владыце небесе и земли, от всяких нас бед свободи, зовущих тебе с любовию таковая:
Радуйся, великий святителю Павле, скорый помощниче и молитвенниче о спасении нашем!

Икос 1
Ангельское житие от юности возлюбивше, ко исканию единаго на потребу направив помыслы твоя, святый отче наш Павле, и дивный образ добродетелей христианских и совершенства духовнаго во всем житии и велием служении твоем явил еси. Сего ради и возвеличен был еси на земли от боголюбиваго народа сербскаго и на небесах от Вседержителя прославлен. Мы же, благоговейно святую память твою чтуще, таковыя похвалы тебе возносим:
Радуйся, земли Сербския святое прозябение.
Радуйся, всех славянских стран духовная лепото.
Радуйся, многих святых добродетели в себе соединивший.
Радуйся, разрушителю страстей душетленных.
Радуйся, сокровище словес богодухновенных.
Радуйся, грозное бесовское устрашение.
Радуйся, пречудное в человецех удивление.
Радуйся, скорбящим душам утешение.
Радуйся, великий святителю Павле, скорый помощниче и молитвенниче о спасении нашем!

Кондак 2
Видяще обильную реку чудес, исцелений и помощи благодатней, от Всемилосерднаго Господа нашего по твоим, святителю Павле Сербский, молитвам истекающую, радости духовней и благоговения исполняемся и благодарим Творца и Бога нашего, тако прославляющего Святых Своих, и о тебе Ему со умилением вопием: Аллилуйя!

Икос 2
Разум твой учением Христовым умудривший, сердцем же твоим от дней детства твоего во благочестии благочестивою тетею твоею воспитанный, радость и утешение ближним твоим приносил еси, всехвальный угодниче Господень; и, видя суету мирскую, к Богу Всевышнему обратил взоры души твоей. Сего ради таковые похвалы тебе приносим:
Радуйся, обычаи благими зело удобренный.
Радуйся, путь Христов от юности возлюбивый;
Радуйся, чистоту телесную Тому сохранивый.
Радуйся, кротостию и смирением сердце твое умягчивый;
Радуйся, все заповеди Господни верно и непорочно сохранивший;
Радуйся, на милосердие Бога-Отца упование твое возложивший;
Радуйся, усердною молитвою ко Христу дух твой окрыливший;
Радуйся, Всенепорочную Матерь Его горячо почитавший;
Радуйся, великий святителю Павле, скорый помощниче и молитвенниче о спасении нашем!

Кондак 3
Сила благодати Божией чудесно от смерти лютыя спасе тя во дни Великой войны и сотвори тя сыном Царствия Христова быти; ибо ты, преславный Павле, по окончании брани братоубийственныя, в тихое пристанище спасения притекл еси и к чину черноризцев приобщился еси, в послушании ко игумену и братии кротко и смиренно душу твою хранил еси, празднословия всякаго удаляяся, и, труды к трудом неленостно прилагая, в подвизех духовных всегда поя Богу: Аллилуиа!

Икос 3
Имуще сердце твое, яко добрую почву, к восприятию благаго семене Слова Божия всегда отверстым, дивный угодниче Христов, вся мира сего красная ни во что же вменив, неуклонно шел еси по стопам Христа, зовуща: «аще кто хочет в след Мене идти, да отвержется себе и возмет крест свой, и в след мене да идет». Послеже и благодать священства восприим, молитвою и постом по чреслем препоясався, во всяцем деле духом твоим бодрствовал еси, единаго ко спасению взыскуя. Мы же, таковую ревность твою прославляюще, приносим ти сицевая:
Радуйся, небесная и нетленная сокровища вожделевый.
Радуйся, благоуветием и незлобием исполненный;
Радуйся, в братолюбии делателю прилежный.
Радуйся, чина ангельскаго достойный носителю;
Радуйся, благодатию Бога-Отца озаренный;
Радуйся, Христом Спасителем возлюбленный;
Радуйся, силою Духа Святого свыше обличенный;
Радуйся, прежде всего о Бозе мыслити наставляяй;
Радуйся, великий святителю Павле, скорый помощниче и молитвенниче о спасении нашем!

Кондак 4
Буря помышлений страстных обдержит ны: но воздержанием и трудами уморивый страсти и волнений множество укротивый, отче наш Павле, моли избавитися от напастей и нам, чтущим тя, да припадая во умилении душ и сердец наших к дивному Богу, прославляемому во святых своих, выну воспеваем: Аллилуиа!

Икос 4
Слышавше людие благочестивии по возвращении твоем из града Афинскаго, идеже ты восприял еси науку богословскую и учения святоотеческия, о твоих добродетелех и велием разуме твоем, Павле прехвальне, прихождаху к тебе, благословения, совета и молитв от тебе ищуще и зряще тя, пастыря добраго и крепкаго пред Богом молитвенника, дары Духа Святаго преисполненна, радуяся благодариша Бога, тя народу сербскому даровавшего. Сего ради и мы величаем тя сице:
Радуйся, восхождения от добродетели к добродетели невидимо совершивый;
Радуйся, совершенства о Христе богомудренно достигнувый;
Радуйся, яко Даниил, премудрость Божию разумети вожделевый;
Радуйся, яко Илия, молитвою чудеса велия сотворивый;
Радуйся, яко Елисей, сугубую благодать от Бога восприявый;
Радуйся, яко боговидец Моисей, чистым сердцем Бога зревый;
Радуйся, с небесными силами Бога ныне прославляющий;
Радуйся, подлинные пути жизни духовной нам открывающий;
Радуйся, великий святителю Павле, скорый помощниче и молитвенниче о спасении нашем!

Кондак 5
Боготочней звезде, путь в Небесные обители указующей, подобен бе, святый отче наш Павле, ты бо по избрании твоем на престол святаго Саввы, богомудро назидал еси паству твою, но и после пречестнаго успения твоего всем верным чадам и учеником Христовым пути спасительные отверзаеши и научаеши чистым сердцем Господеви воспевати: Аллилуйя!

Икос 5
Видя паству свою сербскую от многолетных угнетений, безбожныма поборниками рая земнаго возвигнутаго, в запустении сущу, умилосердився, святителю Христов, скорби их на рамена своя подъял еси и даже до смерти пострадати за них и веру Православную готов был еси. Темже благодарственно вопием ти:
Радуйся, самоотвержение всецелое показавый;
Радуйся, спасение многих взыскавый.
Радуйся, яко пастве твоей добрый вождь показался еси;
Радуйся, Церкве Христовой добрый кормчий был еси.
Радуйся, свет Христов верным возсиявый;
Радуйся, от потопления бурями житейскими правоверных спасаяй;
Радуйся, унывающих и мятущихся укрепляяй
Радуйся, и от заблуждения отреваяй.
Радуйся, великий святителю Павле, скорый помощниче и молитвенниче о спасении нашем!

Кондак 6
Проповедник делом, а не словом явился токмо был еси, преславне отче наш Павле, пред Господом, и яко пастырь добрый, всех поучая любве Божественней и житию христианскому. Сего ради прослави тя Христос пред паствою твоею и всем миром христианским. Ты же дерзновение велие имеяй у Престола Агнца Божия с небесными силами поеши со умилением песнь Богу:Аллилуйя!

Икос 6 Возсиял еси в многострадальней стране сербстей, богомудрый отче Павле, блистанием учений твоих, души верных озаряя и тьму нечестия разгоняя. Просвещал еси паству свою светом Евангелия Христова. Ты с ревностию учил еси о вере Православной, обличал еси пороки людския очищая от суеверия и лености, оберегая нечестия века сего. Сего ради и мы, припадаем к тебе, святителю Божий, слезно взывая: охраняй и ныне нас, да не престанем величати тя сице:
Радуйся, от потопления бурями житейскими правоверных спасаяй;
Радуйся, унывающих и мятущихся укрепляяй и от заблуждения отреваяй.
Радуйся, многия заблудшия на путь истины наставивый;
Радуйся, проповедниче чудес Божиих;
Радуйся, светозарный светильниче всех просвещаяй;
Радуйся, вместилище Божия премудрости;
Радуйся, благодатными вещании сердца верных утешаяй;
Радуйся, славу Божию житием и словом твоим проповедавый;
Радуйся, великий святителю Павле, скорый помощниче и молитвенниче о спасении нашем!

Кондак 7
Хотение едино имел еси, святче Божий, еже Богу угождати и спасению людей твоих служити, темже не дал еси сна очима твоима, ни веждома дремания, но присно подвизался еси во благо святыя Православныя Церкве, стяжавшия тя столпа веры и правды Христовей непоколебимаго, и стража дому Божия вернаго, примером твоим и нас поучающаго неленостно возносити песнь хвалы Христу Богу: Аллилуиа!

Икос 7
Новый и преславный наставниче всему миру христианскому явился еси, о святый отче Павле, ты бо еси украшение и всея земли Сербския похваление, ты бо благочестием и смиренномудрием души верных просвещаеши; Христу и ближним служити научаеши, благодатию святительскою сердца верных сердца озаряеши. Сице просим тя: озари и наша сердца любовию небесною и благодатию духовною, да зовем ти с надеждою сице:
Радуйся, луче, озаряющая сущия во мраце жития плотскаго.
Радуйся, светоподательный светильниче сущим во тьме неразумия.
Радуйся, деннице пресветлая, возвещающая всем грешным покаяние.
Радуйся, цевнице духовная услаждающая чувства сладкопением небесным.
Радуйся, источниче приснотекущий жаждущим вечныя жизни.
Радуйся, кладезю воды живыя, всем исцеление подавающий.
Радуйся, каменю пустынный, источаяй мед и млеко от неверия обращенным.
Радуйся, свеще, пламенем божественныя любве возжженная.
Радуйся, великий святителю Павле, скорый помощниче и молитвенниче о спасении нашем!

Кондак 8
Странствие земное совершая, мнозем благотоворил еси, богоблаженный отче Павле, бедным в скорбех помогал еси, радея не токмо о насыщении страждующих благами земныма, обаче же об обращении и возвращении их ко Иисусу Христу, Источнику и смыслу бытия человеческаго, сего ради молитвы горячия возносил еси. Мы же ныне просим тя: сподоби и ны в сокровенных храмех сердец воздвигнути духовныя престолы Спасителю, воспевая Ему ангельское пение: Аллилуиа!

Икос 8
Весь исполнень любви и сострадания к ближним, премилосердный святителю Павле, всякому притекавшему к тебе помогал еси, скорбящия утешая, сомневающихся в вере спасительней утверджая, таже и многая добрая дела творя втайне, их же Сам Господь весть. Ныне просим тя, отче святый: сотвори усердныя молитвы твоя за вся чады твоя, за Косово и Метохию, за Сербию, Славонию, Йадовно, за Печ, и Дечаны, и Грачаницу. За всю Вселенную и весь мир. Сего ради с надеждою возносим ти похвалы сия:
Радуйся, плате благословенный, слезы отирающий;
Радуйся, сосуде благодати Христовой, отрадою напояющий;
Радуйся, колеблющихся в вере укрепляющий;
Радуйся, согрешающих кроткий вразумителю.
Радуйся, скорби и болезни безропотно нести научаяй;
Радуйся, от заблуждений и кривотолков умы наши очищаяй;
Радуйся, от теплохладия сердца наши благодатно исцеляй;
Радуйся, внутренний мрак душ наших светом Христовым озаряй;
Радуйся, великий святителю Павле, скорый помощниче и молитвенниче о спасении нашем!

Кондак 9
Всяческия славы на небесех от Подвигоположника Христа исполнен был еси по блаженней кончине твоей, богоносный отче наш Павле, и ныне всеусердно просим тя: яко предстояй со архангелы и ангелы купно престолу Троицы Всесвятыя, да пребудем верны Христу Богу и Спасу твоему и нашему, Ему с надеждою на заступничество твое воспеваем днесь: Алллилуйя!

Икос 9
Ветии многовещанниии не возмогут по достоянию восхвалити твои, святителю отче Павле, труды неустаннии, на благо сербскаго народа и всех христиан Православных, тобою понесеннии, имиже соплел еси себе неувядаемии венцы на небесех. Темже и мы, на земли сущии, воспеваем ти таковыя похвалы:
Радуйся, яко с Царем Христом во веки пребываеши;
Радуйся, яко еси причастник неизреченныя Его славы.
Радуйся, светильниче, правы стези ко спасению освещаяй;
Радуйся, унылых, к молитве окрыляющий.
Радуйся, в пренесении скорбей утверждающий;
Радуйся, к воздержанию подвизающий;
Радуйся, сердца наша от скверн греховных очищающий;
Радуйся, суетою помраченный наш ум просвещающий.
Радуйся, великий святителю Павле, скорый помощниче и молитвенниче о спасении нашем!

Кондак 10
Спасения вечнаго ходатай нам являешися, отче Павле, погружаемых бо нас в житейстем море, от потопления конечнаго спасаеши, палимых страстьми прохлаждаеши, заблуждшия на истинный путь наставляеши и воздвизаеши за все благодарити Господа, поя Ему: Аллилуиа!

Икос 10
Стена ограждающая от всякаго зла был еси нам, богоносный святителю Павле, и по смерти, якоже обещался еси, ны не оставляеши твоим заступлением и всем, с верою к тебе прибегающим, помощь неоскудную подаеши. Сице тебе же, яко мощному о нас молитвеннику у Престола Всевышняго и Всемилосерднаго Господа Нешего, хвалебная приносим:
Радуйся, тяготы чад твоих на себе понесый;
Радуйся, истинную любовь ко ближнему нам показуяй.
Радуйся, к тебе взывающих скорое услышание;
Радуйся, отчаянныя от смерти вольныя отвращаяй;
Радуйся, верныя от напрасныя смерти спасаяй.
Радуйся, от бесов стужаемыя именем Христовым свобождаяй;.
Радуйся, от напастей предлежащих скорый избавителю;
Радуйся, благочестия верных мудрый учителю;
Радуйся, великий святителю Павле, скорый помощниче и молитвенниче о спасении нашем!

Кондак 11
Пение молебное возносим ти, пречудный святителю Павле, с радостию пресветлою и надеждою неугасимую, ибо веруем непреложно, яко источником милости Своея яви тя Господь Всемогущий, ты бо непрестанно исцеления и помощь во обстояниех скорбных подаеши всем, с верою к тебе притекающим. Мы же, радуясь Милосердию и Человеколюбию Господа нашего, явленным в тебе, вопием Ему с отрадою и умилением: Аллилуйя!

Икос 11
Свет нетварный со всема святыми созерцаеши ныне, святый Павле Сербский, яко чести велия предстояти пред престолом Святыя Троицы удостоился еси святаго и праведнаго жития твоего ради и велиих трудов твоих во славу Божию. Мы же, на представительство и покровительство твое небесное уповая, таковыя похвалы со умилением возносим ти:
Радуйся, звездо, путь живота честнаго нам указующая;
Радуйся, зарю, верою твоею души наша пробуждающая.
Радуйся, свете, любовию Христовою нас озаряющий;
Радуйся, милосердие Божие к нам преклоняющий;
Радуйся, кающихся грешников со Христом примиряющий;
Радуйся, об обращении заблудших Господа умоляющий;
Радуйся, от обычаев душевредных сердца наши отвращающий;
Радуйся, нравы добрыя и благочестие в нас насаждающий;
Радуйся, великий святителю Павле, скорый помощниче и молитвенниче о спасении нашем!

Кондак 12
Благодать Божия, днесь собра вся верныя, святый отче и заступниче наш Павле Сербский, любовию тя почитающия и смиренным сердцем в молении к тебе припадающия, и тя усердно просящия: души наша к покаянию приведи, телеса недужная исцели и всех нас молитвами твоими от всяких бед сохрани, да велегласно воспоем Богу, Дивному во святых Своих: Аллилуиа!

Икос 12
Поюще радостне песнь хвалы и благодарения Господу нашему Иисусу Христу, прославившему тя, святый отче наш Павле, величаем тя, дивный избраниче Спасителя и великий угодниче Господень, и просим убо тя со всеми святыми, от века Творцом нашим прославленныма: сотвори молитву о благоденствии и мире всех народов словенских, об обращении ко Христу, всех Его незнающих и непринимающих, о блазе Церкви Его; да твоими молитвами спасаемые, с благодарением и радостью взываем:
Радуйся, новый светильниче веры, в наши дни верный путь Богу указующий;
Радуйся, дух милосердия в сердцах наших воскресаяй;
Радуйся, от плевел ненависти и памятозлобия я очищаяй;
Радуйся, светом любве нелицемерныя нас озаряй;
Радуйся, от глада духовнаго всех нас избавляй;
Радуйся, данные Богу обеты исполняти побуждаяй;
Радуйся, в молитвах твоих нас не забываяй;
Радуйся, слезы и воздыхания скорбящих с любовию утоляй;
Радуйся, великий святителю Павле, скорый помощниче и молитвенниче о спасении нашем!

Кондак 13 О всеславный угодниче Божий и чудотворче, святой отче Павле Сербский! Приими малое сие моление наше, с горячею любовию сыновнею тебе возносимое и умоли Господа Бога нашего избавитися нам от всяких бед, скорбей и напастей, от нестроений общественных, междоусобной брани и внезапныя смерти, да сподобимся в жизни вечной с тобою купно Христу воспевати: Аллилуйя!

Автор акафиста Евгений Владимирович Храповицкий