Акафист схимонахине Рафаиле (Чернецкой), основательнице и настоятельнице Свято – Анастасиевского женского монастыря г. Житомира.

Кондак 1
Взбранной невесте Христовой, блаженней матери Рафаиле, угоднице Божией, в земли Волынстей просиявшей, с верою и любовию похвальное приносим пение. Ты же, милостивно нам преклонися, подвиги и страдания твоя воспевающим и умоли Христа Спаса спасение душам нашим даровати, со умилением сердечным зовущим:
Радуйся, мати Рафаило, избраннице Божия, светозарною свещею в земли Волынстей просиявшая!

Икос 1
Ангелов Творец и славы Сый Господь, яви тя, всехвальная мати Рафаило, яко многоценное сокровище людем русским. Мы же, поюще многия твоя чудеса, восхваляем Бога даровавшаго тобою не токмо граду Житомиру и земле Волынстей, а и всему Отечеству нашему непоколебимый столп веры и образ спасения во времена последняя. Тебе же, Царя Царствующих за нас грешных умоляющую, велегласно сицевая приносим:
Радуйся, Христова голубице избранная;
Радуйся, зарница небеснаго огня в земли Волынстей возсиявшая;
Радуйся, муки велии всю жизнь терпевшая;
Радуйся, на земле венец терновый носившая;
Радуйся, яко дар прозрения, терпением и смирением крайним стяжавшая и дар сей на спасение страждущих являвшая;
Радуйся, незлобие и кротость в сердца наша вливающая;
Радуйся, нас, своим житием, во страданиях хвалити Бога научающая;
Радуйся, яко богатство неистощимое исцелений от скорбей, тебе подаде Владыка Господь;
Радуйся, яко потоками твоея милости напояеши иже во глубоцей нужде люте жаждущих;
Радуйся, помощнице и молитвеннице наша, Христа за всех умоляющая;
Радуйся, яко обитель монашескую на земли основавшая, ныне же во обителех райских веселящаяся;
Радуйся, звездо, молниею на небо возшедшая;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 2
Хотя венец твой премного украсити, болезнию неизцельною измлада избра тя Господь, того бо сила в немощи совершается. Радуемся, блаженная мати Рафаило, таковому о тебе Божию смотрению. Ты же, вземши крест болезней телесных, яко от руку самого Христа, чрез все житие твое невозвратно Тому последовала, со благодарением воспевающее Жизнодавцу: Аллилуиа.

Икос 2
Спасения стезю хотя показати всем Господь, яви нам тебе, богоизбраннице мати Рафаило, яко образ истиннаго жития во Христе. Егда издетска нози твои ходити не могоша и вся члены твоя поразиша болезнь. Мы же тебе, нисколько не сомневающейся в болезни твоей, яко промыслительной, от Бога посланной, со благоговением приносим хваления:
Радуйся, от младенчества Богом избранная;
Радуйся, яко оставленная врачами на одре болезненном, неисповедимым промыслом Божиим к жизни вернувшаяся;
Радуйся, яко удивляемся силе духа твоего в немощнем телеси твоем пребывающей;
Радуйся, издетска возлюбившая Бога, яко Отца;
Радуйся, яко велиею радостию исполнялась душа твоя, егда во святую обитель Почаевскую, матушкой твоей возимая в немощех была;
Радуйся, к Богу любовию горящая;
Радуйся, яко Иов многострадальный, вся от Бога благодарне приемшая;
Радуйся, яко сила Вышняго даде тебе укрепление на тяжкие страдания телеси твоего;
Радуйся, яко научающая нас во благодушии вся претерпевати Христа ради;
Радуйся, хвалити Господа, всей жизнью своей, нас наставляющая;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 3
Провидев Господь ангелоподобное житие твое, преславная мати Рафаила , хотя истинное твое благочестие явити и в терпении тя укрепити, скорби многи попусти на тя, да просветися, яко злато в горниле и имя Владычне прославиши, всей жизнью воспевая Спасителю: Аллилуиа.

Икос 3
Сила Вышняго от юности твоея воистину осеняша тя и храняше и укрепляша тя на терпение, молитвы, пощение, во еже подражати Всемилостивому Богу. Ты же, мати Рафаило, исполняясь разума небеснаго, премудрости, страха Божия непрестанно горняя мудрствовавшая - возрастала еси в добродетелях и плодах духовных. Сего ради прими от нас похвалы сия:
Радуйся, яко немощь телесную ко очищению духовному от Бога приявшая;
Радуйся, яко священная жертва принеслась еси и приношение светлое;
Радуйся, яко невеста избранна бывши Вседержителю;
Радуйся, измлада чтению Божественных писаний навыкшая;
Радуйся, жития святых и поучения их возлюбившая;
Радуйся, яко страху Божию издетска матушкой научена, с усердием храму Божию и службам долгим церковным присно прилежала еси, на полу по немощи лежавшая;
Радуйся, яко телом немощная, в силу Христом облеченная;
Радуйся, токмо Христа в своем сердце носившая;
Радуйся, святыню церковную возлюбившая;
Радуйся, яко от юности монашескому житию ревновавшая;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 4
Токмо ему одному, Творцу ведомыми путями, управляет Он душу в Царствие Небесное. Ты же, мати Рафаило, во страданиях терпением и смирением от бед избавлятися научающая и надеждою на несумненную милость Божию окрыляющая, научи нас, и малой доли скорбей твоих не претерпевших и в ропоте на Бога и на ближних дни наша иждивающих, все свыше посылаемое терпети. Ему же Единому всех благ Подателю велегласно взывати: Аллилуиа.

Икос 4
Силою Христовою укрепляемая, мати Рафаило, немощи телесныя небрегла еси, евангельской истине поревновавши, по пути спасения за Господом последовала еси. Во времена власти безбожной, с матушкой твоей, в един день в рясофор тайно пострижены есте. Долгие лета тайно совершающи многотрудный путь иноческаго жития. Тем же и мы, взирающее на крепость духа твоего, от юности удивлявшую всех, молим тя: просветити тьму уныния сердечнаго, находящую на нас от маловерия и малодушия. Тебе же восхваления приносим таковая:
Радуйся, суету земную ни во что вменившая;
Радуйся, небесное сокровище зело возлюбившая;
Радуйся, все упование на Бога возлагавшая;
Радуйся, в ризу смирения христианскаго себе облекшая;
Радуйся, яко смиренно, с самоукорением наветы вражия сокрушала еси;
Радуйся, яко сокровище на небеси имети возжелавшая;
Радуйся, жилище Духу Святому в сердце твоем уготовившая;
Радуйся, яко смирением крестным силу Божию обретала еси;
Радуйся, узкий путь и тесныя врата избравшая;
Радуйся, яко Слову уневестилась и того живоносным стопам последовала еси;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 5
Боготечною звездою явилася еси, мати Рафаило, в век наш, злобою обуянный и любовию оскудевший. Верою, терпением и кротостию многих в благоговейный трепет приводила еси. Скупцов же и «для себя живущих» щедростию души своей святой удивлявшая. Да уразумеют, яко законно зде страждущие, тамо законно увенчаны будут праведными венцы и воспоют со Ангелы Владыке Сил небесных: Аллилуиа.

Икос 5
Скорбь и тесноту иноческаго жития сладце терпяще, в молитве бдяще, дивное терпение и кротость показала еси. Видя Сердцеведец Господь, благое сердца твоего изволение, мати Рафаило, яко верою, любовию и трудами твоими зело украсившася, преславная исполнительнице заповедей Его показалася еси, мудро устрояет пострижение твое в малый ангельский образ, с матушкой твоей, с наречением имени Серафима. Мы же, ти, в жертву Христу Богу житие твое принесшей, сицевые похвалы с любовию приносим:
Радуйся, Серафимским пламенем любви ко Господу горящая;
Радуйся, своим житием сияющая;
Радуйся, яве показавшая нам, како любви ради Христа, вся мучения и болезни сладце претерпевшая;
Радуйся, Спасова ученица небесномудренная;
Радуйся, голубице, под кровом Всевышняго возгнездившаяся;
Радуйся, яко одеяние чертога Небеснаго и память смертную паче возлюбившая;
Радуйся, в терпении твоем свыше укрепленная;
Радуйся, дух твой окрылявшая тайною молитвою;
Радуйся, на пир к Небесному Жениху избранная;
Радуйся, в Горний Иерусалим устремившаяся;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 6
Возсия богоугодное житие твое, всеблаженная мати Рафаило, яко небесная заря. Дивным промыслом, чрез тебя, Владыка Господь устрояет в лесу, близ града Житомирскаго, обитель монашескую – тихое пристанище, ищущим пути спасения. Многия скорби и труды претерпела еси на сем тяжцем пути, от единаго Господа помощи в созидании обители ожидавшая и молитвами вся побеждавшая. Мы же, к Богу, всяческих благ Подателю, преклоньше колена сердец наших взываем: Аллилуиа.

Икос 6
Издавна покрывался град Житомирский молитвами преподобной матери мученицы Анастасии Римляныни. Чья честная глава нетленная пребывала в храме соборнем. Испросила ты, мати Рафаило, дабы преподобная Анастасия под покров свой и обитель устрояемую взяла, аки земной удел свой. Дивно и благолепно расцвела обитель сия, силою Вышняго чудесно хранящаяся. Мы же тебе, все упование на Сладчайшего Иисуса возложившей, пение всеумиленное приносим:
Радуйся, яко святое устроительницы и первоначальницы обители послушание со смирением прияла еси;
Радуйся, яко молитвами твоими, трудами сестер и ктиторов обитель обустроилась;
Радуйся, святыя обители твоея невидимое охранение;
Радуйся, яко не токмо обитель святую, но град Житомир от бед и напастей молитвою защищала еси;
Радуйся, яко образом жития твоего , сестер и мирян на путь спасения наставляла еси;
Радуйся, сердце твое Господеви отдавшая;
Радуйся, много душею за чада твоя поболевшая;
Радуйся, жено небесномудрая и богоприятная;
Радуйся, наставнице инокиням и собеседнице Ангелом;
Радуйся, заре, во мраце суетнем падшаго мира сего светло возсиявшая;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 7
Новую тя заступницу, молитвенницу и ходатаицу к Богу, милосердная мати Рафаило, дарова Господь людем русским. Светозарным житием твоим, освещаеши мрак многосуетнаго мира сего и влечеши к себе души наша. Сего ради припадаем к тебе молящееся, не лиши нас, еще странствующих на земли, в сии последняя времена, помощи и заступления, просяще Всеблагого Господа, помиловати всех поющих ему: Аллилуиа.

Икос 7
Слышаша людие дар прозрений тобою, всехвальная мати Рафаило, чудно явленный и яко помощь в недузех душевных и телесных подаеши, прихождаху к тебе из разных градов и весей с упованием. Ты же, угоднице Божия, зарею своею сердца просвещающая, людем во гресех погибающим, путь спасения указывала еси. Мы же, тебе, любовию твоею многия окрест тебе спасавшей, благодарне воспоим:
Радуйся, праведнице, Богом нам дарованная;
Радуйся, притекающих в обитель твою, к покаянию направляла еси;
Радуйся, никокоже пришедшаго к тебе не отринувшая;
Радуйся, яко скорбь человеческую, яко свою восприяла еси;
Радуйся, ближнего душу паче мира сего любити нас научающую;
Радуйся, богатство твое токмо к любви к Богу и ближнему полагала еси;
Радуйся, яко мысленными очима волю Божию прозиравшая;
Радуйся, сокровенная сердец приходящих к тебе ведущая;
Радуйся, яко от источника воды живыя, жаждущия напояющая;
Радуйся, яко от всякого зла молитвою твоею ограждавшая;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 8
Бурю злых напастей, нестроений и искушений кротостью, незлобием и молитвою утишала еси богомудрая мати Рафаило, и ими от стрел лукаваго, аки щитом защищала еси. Подавала еси недоумевающим вразумление, страждущим ослабу, больным исцеление зовущи ко Владыце Сил Небесных: Аллилуиа.

Икос 8
Сама люте страждущи от недугов телесных, немощи человеческие брала на себя, милосердная мати Рафаило, всех обнимающе своею молитвою, всех впускающе в свое сердце, отдавая себя без остатка всем. Токмо тебе ведома цена вымоленной души людской – пролитие крови, взятие скорбей на себя. Мы же, подвигу жертвенней любви дивляшеся, приносим ти сицевая:
Радуйся, милостей Божиих присная ходатаице;
Радуйся, милосердием твоим всех утешавшая;
Радуйся, пребывающая на одре болезни, всюду яко птица духом носилася еси;
Радуйся, яко прозорливо указывала еси путь ко спасению;
Радуйся, терпения, незлобия и безгневия учительнице;
Радуйся, милостивая подательнице всем нуждающимся, за чистоту сердца Господа узревшая;
Радуйся, оледеневшия души наша молитвами твоими растаявающая;
Радуйся, яко сиянием светлости твоея, люди православные озаряеши;
Радуйся, от тяжкаго греховнаго сна пробуждающая;
Радуйся, в бездне отчаяния погибающих спасение;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 9
Спасти хотяще многия люди от страданий телесных и недуг душевных, пребывала еси, праведница Божия Рафаило, в молитве постоянней, прося у Всемилостиваго Бога укрепления. Ведуще благодать и велие дерзновение твое пред Вседержителем, тебе молимся мати всеблагая, молися о нас ко Господу да управит стопы наша, в сие время коварное антихристово, ко спасению, Ему токмо ведомыми путями, да не оставит малое стадо Свое. Мы же невозбранно Спаса превозносим: Аллилуиа.

Икос 9
Ветия многовещанные не возмогут достойно прославити многострадальное и святое житие твое и чудеса силою Божиею творимые, предивная старице Рафаило, несть числа бо по молитвам твоим помощи людем в немощех телесных и скорбех житейских. Яко облак тя Христос показа мати, дождь източающий животный, верою просящим у тебе преславная. Нам же, образ веры и терпения подавая, подвизаеши пети ти сице:
Радуйся, новая чудеса и пророчества чтущим тя являющая;
Радуйся, светило милосердия над землею Волынскою возшедшее;
Радуйся, людей, одурманенных суетой мира сего погибающего – возрождавшая;
Радуйся, токмо постом, молитвою и благодатиею Божиею подкреплявшаяся;
Радуйся, призывающим тя – молитвеннице теплая;
Радуйся, у Распятого на Кресте, за ны грешныя, мира и тишины непрестанно молившая;
Радуйся, посреде напастей и скорбей дивный покой нам посылающая;
Радуйся, присно умными очима горе зревшая;
Радуйся, зревшая грядущее яко настоящее;
Радуйся, венче из мира, милосердия и сострадания сплетенный;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 10
Возсияла еси в земли Волынстей дарами Божественными, мати Рафаило богомудрая, во смирении глубоце дела милосердия творила еси. Обаче Сердцеведец тя прослави, да не скрыется светильник под спудом, но светит всем, прославляющим Отца Небеснаго. Мы же, похвалу достойную возносим прославившему тя Богу: Аллилуиа.

Икос 10
Егда же, болезни телесныя твои, многострадальная мати Рафаило, усугубились, братом твоим игуменом Лазарем, в схиму была пострижена еси. Пение ангельское слышала еси, еще на земли живуще. Научи и нас, недостойных, како подобает славити Бога в Троице почитаемого, Ему же воспевают непрестанно воинства Небесные.Мы же ти, Ангельский образ приявшей, возпеваем похвалы таковыя:
Радуйся, яко равноангельски на земли пожила еси;
Радуйся, именем Архангела, предстоящаго Престолу Божию, нареченная;
Радуйся, ко Господу любовию горящая;
Радуйся, в житии твоем крест тяжкий понесшая;
Радуйся, яко жертву принесла еси житие твое Христу Богу;
Радуйся, великаго ангельскаго образа носительнице;
Радуйся, схимнице благая, полков демонских терпением и любовию сокрушительнице;
Радуйся, молитвеннице от Бога людем дарованная;
Радуйся, Бога, судии праведнаго, умилостивительнице;
Радуйся, яко со Ангелы ныне присно ликуеши;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 11
Великия скорби, досаждения и укорения претерпела еси , блаженная мати Рафаило, не сетующи о сем, но за вся благодаряще Бога и нас научаеши терпеливо нести крест свой. Сокрыты от взоров людских невидимые брани с силами тьмы, мужественно тобою перенесенные. Молим тя, не остави нас, в суете мира погибающих, просвети омраченные грехом сердца наши и к жизни небесней настави, научающи пети Творцу: Аллилуиа.

Икос 11
Ублажаем тя, богоизбранная мати Рафаило, яко многомощную о нас молитвенницу пред Господом, утешительницу и покровительницу. Благодать утешений обильно изливаеши всем чтущим память твою и к заступлению твоему притекающим. Мы же, тебе, унаследовавшей венец небесный, воспеваем:
Радуйся, яко птица на земли пожившая;
Радуйся, в пресветлый чертог прелюбезнаго Жениха во гласе радования вшедшая;
Радуйся, яко неисповедимыми судьбами Божиими прославленная;
Радуйся, яко в скорбех терпение неистощимое явила еси;
Радуйся, о спасении Отечества нашего присно молящаяся;
Радуйся, и ныне нашим прошениям тепле внемлющая;
Радуйся, уповающих на помощь твою не оставляющая;
Радуйся, крест нам нести помогающая;
Радуйся, яко милость богатую Христову на нас призываеши;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 12
Благодать Пресвятаго Духа стяжала еси в житии твоем, благая мати Рафаило, за велию любовь к Отцу Небесному и к ближним своим, сего ради молим тя – испроси у Господа Сил, да сохранит Церковь Православную, в грядущие лютые времена антихристовы, от ересей, расколов и гонений. Да укрепит нас в вере, исповедании ея и воспламенит сердца наша во еже крепко, даже до смерти стояти за Христа и Церковь Его. Мы же, даровавшему нам тя, крепкую заступницу нашу, Христу Богу восклицаем: Аллилуиа.

Икос 12
Света незаходимаго приснозрительнице, от здешняя к славе нетленней преставльшаяся, мати Рафаило сиятельная, и Сиона Горняго славою наслаждающаяся, поминай нас, поминающих тя. Ранее по страданиям телесным, не всегда была доступна искавшим помощи у тебя, ныне, яко источник неисчерпаемый, по неложному обещанию твоему – всем доступна, просящим помощи у могилки твоей. Мы же, почитающе память твою, со умилением ублажаем тя:
Радуйся, стезю тесную прошедши, к широте приспела еси райстей;
Радуйся, яко в скинию вселилася еси Света умнаго;
Радуйся, со лики святых и ангелы присно радуешися, непреходящею о Бозе радостию;
Радуйся, благоутробие Божие и на нас грешных свыше испрошающая;
Радуйся, истинной радости причастница;
Радуйся, и ныне верных принимающая пение и умоляющая Христа о спасении нашем;
Радуйся, о нас пред Господом, в день праведнаго воздаяния предстательнице;
Радуйся, свеще Божия, присно горящая;
Радуйся, чада духовныя твоя и по успении твоем не оставляющая;
Радуйся, мати Рафаило, избраннице Божия, светозарною свещею в земли Волынстей просиявшая!

Кондак 13
О, многострадальная и славная наша мати Рафаило! Прими от нас, во гресех сущих, чад твоих сие акафистное пение. Благодать свыше щедро ниспошли нам, прилежно молящимся тебе и испроси у Господа прощение всех наших согрешений и добрый ответ на суде страшнем. Не престай подавати нам помощь, славящим с тобою Христа Бога и поющим ему: Аллилуиа.

Молитва
О, великая угоднице Божия, всеблаженная мати Рафаило, венец терновый телесных страданий и духовных скорбей в житии твоем смиренно понесшая. Верою, крайним смирением и терпением у Господа великую силу стяжавшая. Всех приходящих к тебе в горестех, в свое сердце впустившая.Соль и свет миру ты была еси. Паче всего Небесное Отечество возлюбившая и к нему всю жизнь стремившаяся. Ныне же, предстоя у Престола Пресвятыя Троицы, ликуеши со святыми и ангельскими чинами. Не остави нас сирых, мати всеблагая, почитающих память твою. Умоли Спаса Всемилостиваго, да простит нам беззакония наша, да укрепит нас силою Своею свыше в близгрядущие лютые времена и Царствия Небеснаго причастники да сотворит нас. Аминь.

Краткое житие
Схимонахиня Рафаила, в миру Нина Евстафьевна Чернецкая родилась 25 марта 1947 года в с.Глибочок, близ г. Житомира. В 9-ть лет девочка сильно заболела, лечение не давало результатов. Приговор врачей был однозначным – жить не долго.
Однако промыслом Божиим девочка осталась жить, но не могла самостоятельно даже стоять на ногах, все суставы тела были поражены недугом. Мать Нины, неотступно пребывала с ней: совершая поездки с недвижимой девочкой в Почаевскую Лавру, постоянно присутствуя с ней в храмах г. Житомира на богослужениях.
В 1971 году, мать и дочь приняли тайный постриг в рясофор. Четырнадцать лет, после этого, тайно совершали иноческое житие.
В 1985 году, в один день пострижены в мантию с наречением имен: Магдалина и Серафима.
В 1998 году в связи с ухудшением здоровья, игумен Лазарь, родной брат матушки, совершает постриг в великую схиму, с наречением имени Рафаила.
В 1999 году, в лесу на окраине г.Житомира, открылся Свято – Анастасиевский женский монастырь, основательницей и первой настоятельницей которого была схимонахиня Рафаила. Зная о том, что Господь наделил матушку даром прозорливости и сильной молитвы, в монастырь съезжались тысячи людей, ищущих помощи в телесных недугах и жизненных скорбях. Сердце матушки вмещало всех, не смотря на свою усугубляющуюся болезнь и телесную неподвижность. Для всех она была всем, всех обнимала своей молитвой. Нет числа свидетельств о помощи людям по молитвам матушки.
Представилась схимонахиня Рафаила 16 декабря 2005 года. Похоронена на монастырском кладбище.

Сайт создан в системе uCoz
Кондак 5 Скупцов же и «для себя живущих» щедростию души своей святой поражавшая -> удивлявшая 1-й хайретизм 11-го икоса:
Радуйся, яко птица на земли пожившая; Что это значит? Икос 12-й: "...ныне, яко источник неисчерпаемый, по неложному обещанию твоему – всем доступна, просящим помощи у могилки твоей..." М.б. убрать "могилки"?