Акафист святому великомученику за Христа и за Царя Григорию новому молитвеннику за Святую Русь и ея пресветлаго отрока

Кондак 1
Избранный пророче и изрядный чудотворче, яко избавльшеся клевет и наветов о имени твоем, благодарственная ти приносим о Мученецех Царственных, зане утешитель неусыпный им был еси: темже ны бодрствующии и воздвижени в делание сподоби быти, да поем ти:
Радуйся, Странне Григорие, Крестом смирения Христова Руси в Небесный Иерусалим восхождение.

Икос 1
Ангел-предстатель ты еси Царству Русскому, Авеля-провидца, Серафима Саровскаго, Иоанна Кронштадтскаго наследниче: радуешися и веселишися ныне, за еже быти тебе ради Христа поносиму, иждиваему, всяцем злым глаголом даже до днесь обреченну, темже и вся Земля Русская поет ти:
Радуйся, имже тайна Руси Святой возсияет.
Радуйся, имже гордое знание прекращается.
Радуйся, России воззвание.
Радуйся, плена иудейскаго избавление.
Радуйся, простото Небесная.
Радуйся, глубино зрения судеб Божиих.
Радуйся, яко еси царево покоище.
Радуйся, яко носиши Царевича.
Радуйся, звездо-полынь, попаляющая христоборныя.
Радуйся, утробо имущая наше покаяние.
Радуйся, имже обновляемся Христу.
Радуйся, имже преклоняется гордыня наша.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 2
Видящий святый себе оклеветана, глаголет хулителем не противяся: увидимся на Страшнем Суде. Мы же молитвами праведнаго Григория чающе усрести ся одесную Господа Славы, уповаем купно со страстотерпцем Богу воспети: Аллилуиа.

Икос 2
Разум недоразумеваемый разумети мнози от верных ищуще, вопрошают недоуменно: како Бог попусти таким клеветам быти нань иже вящше неже десятерицею искупи Цесаревича у смерти? Верою и любовию память праведнаго совершающе, поем сице:
Радуйся, верха заповедей блаженства причастниче.
Радуйся, Верха Господня коснувшийся совенечниче.
Радуйся, в новом содоме хоящий благочестно жити о Христе Иисусе.
Радуйся, надолзе гонимый.
Радуйся, гонимый, но не оставленный.
Радуйся, во всем скорбящий, но не стужающий си.
Радуйся, гонимый за Царя.
Радуйся, также гонимый за Христа.
Радуйся, гонимый словесе ради.
Радуйся, до конца претерпевый.
Радуйся, яко гонение любве Христовы тебе не разлучило есть.
Радуйся, гонимый, якоже вси прежде бывшии пророцы.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 3
Сила Вышняго осени тогда болярыню Анну, егда миру всему вопиющу: возми, возми его, отвещала есть страстотерпице дщи названная царева: никогдаже и ничесоже злаго видех и слышах надолже быв близ человека сего: паче же по смерти своей, блаженный сей, поможе мне нести крест поругания и клеветы, пою о нем Бога: Аллилуиа.

Икос 3
Имущий Духа Свята приимательную утробу, знамения чудеснаго на селе труждающийся сподобился еси, Григорие, егда Владычица явлением Образа Казанскаго вращшася от рала соделала есть тебе: отонудуже возложи руку свою на рало работы Господни, никогдаже зря вспять: темже Знамением Своим Владычица напутствовала есть пришествие твое к Селам Небесным от Царскаго Села, царственным чадом поющим о тебе:
Радуйся, заступниче усердный рода царскаго.
Радуйся, молящийся о матери и сыне ея.
Радуйся, рабе благий и верный.
Радуйся, покрове молитвенный державствующим.
Радуйся, всем, к тебе прибегающим утешение.
Радуйся, иже в напастех и в скорбех и болезнех обремененным помощниче.
Радуйся, клятво народа русскаго.
Радуйся, имже и избытие клятвы.
Радуйся, знамение пререкаемое.
Радуйся, знание точное ихже о России.
Радуйся, знамение сотворенное во благо, имже постыждаются ненавидящии Русь Святую.
Радуйся, жительствуяй во знамении Сына Человеческаго.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 4
Бурю внутрь имея помышлений сумнительных священномученик Гермоген непщеваше, яко смерть блаженнаго - благо для Церкви и России есть: обаче слыша мертва, глаголюща к нему, яко жива, болезнующа о нем, Страшный глаголюща Суд Христов, грядущий на Россию, со страхом вопиял есть: Аллилуиа.

Икос 4
Слышаша пастырие: Феофан Полтавский, Макарий Невский, Питирим Петроградский, Варнава Тобольский, Исидор Балахниниский: ангельски поющего тя покаяние и любы Божественную, искаша видети и слышати тя, и рещи тебе:
Радуйся, младенче, ему же открыл сия Сый Отец Небесный.
Радуйся, яко тако бысть благоволение пред Богом иже о тебе.
Радуйся, яко единое на потребу избрал еси.
Радуйся, яко лютые взыскателие ничесоже обретоша о тебе.
Радуйся, взыскавый благословения святителя Макария.
Радуйся, яко и сей взыскал есть тя в дому вдовицы.
Радуйся, яко прещаше хулити тя сей воистинну блаженный.
Радуйся, яко именем твоим блаженство изгнания возблагодать Макарий приял есть.
Радуйся, яко гонимый Питирим ни единыя вины глаголет на тебе.
Радуйся, яко вся сия суть словеса лукавствия, вина о своих их гресех.
Радуйся, яко храбрствует о тебе пред Синодом Варнава Тобольский.
Радуйся, купно с ним Иоанна Тобольскаго прославивый.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 5
Боготечной звездой все пределы земли нашей пешешествовал еси: даже до Гроба Господня достиже, Горняго Иерусалима взыскуя: наконец же ста, идеже бе царственное отроча: матерь же его, видевши сие, возрадовася радостию велиею зело, Богу зовущи: Аллилуиа.

Икос 5
Видеша врачеве премудрии рукою твоею исцеляемаго Царевича, иже множицею цел бываше о единем слове твоем, далече от отрока сказанном, дивляхуся силам Божиим, яже утаил Сый Бог от премудрых и сильных и в тебе открыл есть. Мы же о дивном враче, Богом данном, поем сице:
Радуйся, туне приявый.
Радуйся, яко туне подавал еси.
Радуйся, младенец сый, вора обличителю.
Радуйся, лихоимания его целителю.
Радуйся, многочадие пророчествуяй.
Радуйся, блуда сокрушителю.
Радуйся, имже глаголет Бог заблудшей: Россиия, где еси?
Радуйся, имже не ищем вины о гресех.
Радуйся, гордыни кроткий целителю.
Радуйся, земное наше поклонение.
Радуйся, сокрушенных возставителю.
Радуйся, извращенных уяснителю.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 6
Проповедниче Богоносный был еси, в пустыне содома новаго вопия: покайтеся! Егда же возвратился еси в малое отечество твое под Покров Матери Божией, изгнанный быв, абие брань всемирную учиняху бесоводимии, темже днем рану вмале не смертну тебе возлагают, ты же, аще и стражда, Богу пел еси: Аллилуиа.

Икос 6 Возсиявый во отечестве нашем просвещение истины, разгнал еси лжи тьму, Богомудре Григорие рек: двум летом истекшим по смерти моей ни единаго от рода сего, прелободейна и грешна, некогда соли земли сей, ныне обуявшей, не будет в пределах отечества. Мы же зряще страшные суды Божии о России, сице поем тебе:
Радуйся, полагаяй жизнь за Царя.
Радуйся, самой смертию пророчествуяй.
Радуйся, прежде смерти Крест лобызаяй.
Радуйся, по смерти для Крестнаго Знамения персты сочетаяй.
Радуйся, кающимся тепле о убиении твоем напастей облак разгнание.
Радуйся, в потопе слез седмицветие избавления.
Радуйся, откровение Руси Святой.
Радуйся, возвращение России в Русь Святую.
Радуйся, престание пианства народнаго.
Радуйся, покаяние блуда земнаго
Радуйся, имже ненавидим рожцы свиний.
Радуйся, имже приходим в себе.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 7
Хотящу Иоанну Кронштадтскому от нынешняго века преставитися прелестнаго: "По имени твоему буди тебе", - глаголет страннику Григорию: бодрствовати о Царстве Русском призывая его. Егда вси уклонишася, вкупе неключими быша, тогда на Божественней страже, ты о пророче, вещал еси: "Се Жених градет, исходите в сретение": Царственнии же послушателие отвещаваху: "Аллилуиа".

Икос 7
Новаго Николая Чудотворца, новую Царицу мученицу Александру, новаго Божиего человека Алексия показует нам именем твоим Господь, егда безмолвный доселе младенец царственный: "Новый!" - глаголет зряще тебе, святче Божий: мы же обновляясь познанием истины, сице поем ти:
Радуйся, новый пророче.
Радуйся, новый целебниче.
Радуйся, новый чудотворче.
Радуйся, новый царей поборниче.
Радуйся, праведный Лоте новый.
Радуйся, снова деющий куплю о новом содоме.
Радуйся, Новому Николаю собеседниче.
Радуйся, Новой Александре утешителю.
Радуйся, Новаго Божиего человека здравие.
Радуйся, Новый Завет отверзая нам.
Радуйся, Новой Земли насельниче.
Радуйся, Новаго Неба звезде пресветлая.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 8
Странное чудо Исаино о Езекии паки зрим тобою о Царе-Мученике, о Григорие: дванадесять лет по молитве твоей прибавляет Господь Царству Русскому, Государь же святый, внемля путеводству Божию, вопиял есть: Аллилуиа.

Икос 8
Весь бе в нижних, кийждо прошение тщася удовлити, и вышних никакоже отступи, святче Григорие, храм созидая в малой родине твоей, паче же о храме нерукотворенном, Святой Руси, попечение имея: егда плакася горько Новый Езекия, умрети для мира приуготовляясь, тогда знамение от Бога показа ему, якоже древле Исайя, тень смертную паче неже десятижды возвращая от Царевича, Государю поющу Господеви: Радуюсь в высоте дней моих, яко оставил Сый мне лета прочая. Радуюсь, яко узрю спасение Божие на земле живых. Радуюсь, яко не остах от сродства моего. Радуюсь, не отиде бо от мене, аки разрушаяй кущу поткнувый. Радуюсь, яко не приближается ткатель отрезати дух мой, яко платно. Радуюсь, яко не предан дух мой до заутра аки льву. Радуюсь, яко не сокруши Господь кости моя от дне до нощи. Радуюсь, яко ластовица, тако возопил есмь. Радуюсь, аще и исчезосте очи мои, еже взирати на высоту небесную. Радуюсь, яко избавил Господь душу мою, да не погибнет. Радуюсь, яко завергл Сый за мя вся грехи моя. Радуюсь, живии бо возблагословят Тя, яко же и аз.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 9
Всякое естество ангельское удивися, како Путь, Истина и Живот препростаго тебе избра в распутие жизни народныя: сие же распутие аще ли не крест восписует, Егоже чрез все житие влекл еси, никакоже отметаяся, выну хваля Бога: Аллилуиа.

Икос 9
Ветия многовещанныя егда глаголют имя твое о Григорие, показуют нам, иже истинно есть скрежет зубный: пламенем несветимым объяты сии суть, ад еще в днешней жизни себе созидая: ты же, о простоте небесная, немногими словесы Царя и всех, иже царевы, утешаеши, поющих тебе:
Радуйся, вся бо канут, едина правда останется.
Радуйся, глаголяй едино злато - любы.
Радуйся, глаголяй любы безценну.
Радуйся, рекший сию унше всего творения.
Радуйся, ведый любы премудршей Соломона.
Радуйся, не токмо глаголяй, но ведый любы.
Радуйся, яко любы твоя страдание и искушения.
Радуйся, совершенный в любви.
Радуйся, нарицаяй любы богата купца духовнаго.
Радуйся, изгнанниче милосердый.
Радуйся, любы бо твоя тайна неизглаголанная.
Радуйся, свидетельствуяй, яко Бог есть Любы.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 10
Спасти хотя всех, хотящих спастися и в разум Истины приидти, путь нам опытным странником по превосхождению показует Христос, мы же поем: Аллилуиа.

Икос 10
Стено еси западная Храма Руси Святой, тлен Богоотступный отженяя от взыскующих Царствия Божия, приглашали нас звати тебе:
Радуйся, глаголяй языком ангельским.
Радуйся, не бывый яко медь звенящи.
Радуйся, чрез любы имущий пророчество.
Радуйся, любовию ведущий тайны.
Радуйся, преставляющий горы каменносердечия верою.
Радуйся, предавый тело твое, во еже сжещи е, за други твоя, за Цари.
Радуйся, долготерпяй, милосердствуяй.
Радуйся, не завидяй, не превозносяйся.
Радуйся, не гордящийся, не безчинствуяй.
Радуйся, не ищай своих си.
Радуйся, все уповаяй, вся терпяй.
Радуйся, никогдаже отпадаяй в молитве за ны.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 11
Заповедь всякая попирается двема князми содомскими, иже учреждение творят смертоносное: отонудуже открывается нестерпимый гнев Божий на новый содом: вопиет грех сей на небо даже доныне. Ты же моляся не престаеши за убивающих тя, и в самой смерти пророчествуеши Царю образ смерти его: огнестрельное убиение, в воде погружение и всесожжение иудейское предпоказуя, со страхом поющим нам: Аллилуиа.

Икос 11
Светоприемную свещу во рве алапаевстем зрим преподобномученицу царственную Елисавету: зрим же и два смертоносных снаряда близ нетленнаго тела ея: яко не можаста гранаты вредити мощей ея, сице же и клятвенныя оныя две епистолии. аще и близ святаго жития ея еста, обаче клеветны суть, обаче несть от нея отнюдь, никако могут вредити свету святые славы ея: мы же купно со всеми святыми, иже на Небесех едину волю во Христе имут, поем о блаженном:
Радуйся, никогоже судивый.
Радуйся, кротце врагов простивый.
Радуйся, не на лица взиравый.
Радуйся, возставителю потемненных образов.
Радуйся, ведче душ наших.
Радуйся, любовию вся просвещаяй.
Радуйся, не ведый еллина и иудея.
Радуйся, молящийся за врази твои.
Радуйся, во убиении за убийцу молящий.
Радуйся, благоденственное мирное житие именем его ему пророчествующий.
Радуйся, позорной страсти сего избавивый.
Радуйся, молитвой твоей, имиже веси, судьбами, душу его спасый.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 12
Благодать восхотев дати Новому Израилю, благочестивейшаго воистинну Царя зиждет Господь - якоже Давиду, и якоже Езекии посылая ему пророка своего, новаго Нафана, новаго Исайю являя тя, о Григорие: мы же дивяся о сем, вопием: Аллилуиа.

Икос 12
Поюще житие твое и страдания твоя, вемы, страстотерпче святый, яко причастницы будем ихже о тебе: помолися о нас Господу Иисусу Сладчайшему, якоже и прежде о всех, к тебе прибегающих, просил еси: милый, дорогой, помози: да будет нам во искушениих и избытие, паче же терпение и верность Христу, поющим о тебе:
Радуйся, пленных свободителю.
Радуйся, нищих защитителю.
Радуйся, немоществующих врач.
Радуйся, победоносче о Христе.
Радуйся, правило веры.
Радуйся, образе кротости.
Радуйся, воздержания учителю.
Радуйся, смирение высокое.
Радуйся, нището духа пребогатая.
Радуйся, положивый душу о людех твоих.
Радуйся, победивый гордаго.
Радуйся, творяй ны дерзновенны за Русю.
Радуйся, Странне Григорие, Крестом смирения Христова, Руси в Небесный Иерусалим восхождение.

Кондак 13
О страстотерпче святый великомучениче Григорие! даже доднесь глаголют о тебе, имже аще кто почитает страдания твоя за Христа, за Царя: Воздаждь славу Богу: вемы, яко человек сей грешник. Мы же рцем вси: Вемы свята тя, Григорие, яко множицею избавлял есть от смерти Царевича поюще Богу: Аллилуиа.
Сей Кондак глаголи трижды, посем паки Икос 1-й и Кондак 1-й

Молитва новому чудотворцу Григорию
О пророче, яко един от древних, сый един от последних, препростый, якоже пресветлое стекло для воли Христовой. Что ся умножиша стужающие тебе: мнози восстают на тя даже доныне. Ты же заступник еси Алексию Царевичу, славо Руси Святыя, возносяй главы наша от египетских котлов. Тобою Господь сокровиществует нам спасение. яко на людех твоих тобою благословение Христа Бога нашего в Троице приснославимаго. Аминь.

Сайт создан в системе uCoz