Акафист Сладчайшему Спасителю Иисусу

Сей акафист составлен в Свято-Успенской Киево-Печерской Лавре

Кондак 1

Возбранный Воеводо, Христе, Царю славы, приими песнословия благостно наша за вся, яже нам дарова, вопиющим:

Иисусе, мой Боже и Спасе;

Иисусе, Иисусе Сладчайший.

Икос 1

Ангелом Светлая Радосте, Боже, сколь дивен и Свят еси, Спасе, зовущим:

Иисусе, Искупителю мира;

Иисусе, Царю Всемогущий;

Иисусе, в Промысле дивный;

Иисусе, Подателю света;

Иисусе, Сияние Славы;

Иисусе Непостижимый;

Иисусе, Красото пресветлая;

Иисусе, Любы беспредельная;

Иисусе, судеб Глубино;

Иисусе, Заре воскресения;

Иисусе, Знамя спасения;

Иисусе, мой Боже и Спасе;

Иисусе, Иисусе Сладчайший.

Кондак 2

Нам Тя познавати подаждь, Святый Боже, взыскали со трепетом Тя, Святый Крепкий, да присно сподобимся Ти возносити во веки веков: Аллилуиа.

Икос 2

Боже, верных рождаеши Словом Твоим, благодать излучающе Ти вопиющим:

Иисусе, Слово Святейшее;

Иисусе, Свете вселенныя;

Иисусе, могуществом Дивный;

Иисусе, Правда Светлейшая;

Иисусе Неизследимый;

Иисусе, разума Свете;

Иисусе, духа Свободо;

Иисусе, дыхание наше;

Иисусе, Покрове живущих;

Иисусе, Надеждо отшедших;

Иисусе, мой Боже и Спасе;

Иисусе, Иисусе Сладчайший.

Кондак 3

Всяк ум изнеможет во трепете, Боже, за ны Твоя Страсти Креста помышляя, егда Ангелов лики к нам с неба приникли, да вкупе зовем: Аллилуиа.

Икос 3

Вси роди и роди да славят Тя, Боже, Искупителю Спасе, сия приносяще:

Иисусе, Агнче Закланный;

Иисусе, Жертва Святейшая;

Иисусе, душ Искупление;

Иисусе, Тайна страданий;

Иисусе, Любы высочайшая;

Иисусе, весь Всепрощение;

Иисусе, Крестная Сило;

Иисусе, ада Попрание;

Иисусе, наше Воззвание;

Иисусе, Пасха Светлейшая;

Иисусе, Радосте вечная;

Иисусе, мой Боже и Спасе;

Иисусе, Иисусе Сладчайший.

Кондак 4

Боже, огнь до земли Ты сошел низвести, да вся возсияет Любы, да растают сердца, познавая Творца со гласом хвалы: Аллилуиа.

Икос 4

Боже, Цель еси жизни всех душ возрожденных, Удел вожделенный, сия приносящим:

Иисусе, Солнце духовное;

Иисусе, Трепете верных;

Иисусе, от Троицы Единый;

Иисусе, Свете от Света;

Иисусе, Благосте Вечная;

Иисусе, Боже Предивный;

Иисусе, Крещение Духом;

Иисусе, свыше Рождение;

Иисусе, Росо Обожения;

Иисусе, Пение горних;

Иисусе, Радосте дольних;

Иисусе, мой Боже и Спасе;

Иисусе, Иисусе Сладчайший.

Кондак 5

Даждь Дух Твой стяжати, Всеспасе Христе, себе отречения, дух нищеты, да ими потщимся служити Тебе со гласом хвалы: Аллилуиа.

Икос 5

«Буди верен до смерти и дам венец жизни», — речеши, Всеспасе, сия приносящим:

Иисусе, ревностных Сило;

Иисусе, Бодросте духа;

Иисусе, душ сокрушение;

Иисусе, Плач покаяния;

Иисусе, Огню очищения;

Иисусе, Боже прощения;

Иисусе, Мужество веры;

Иисусе, Славо смирения;

Иисусе, душ Возрождение;

Иисусе, Венче терпения;

Иисусе, наше Спасение;

Иисусе, мой Боже и Спасе;

Иисусе, Иисусе Сладчайший.

Кондак 6

Живая Вода еси, Боже Благий, сокровище Духа Святаго дающа, Источника жизни зовущим за вся во страсе святем: Аллилуиа.

Икос 6

Вся, вся от Тебе нам исходит, Христе, ко вечнему благу, сия приносящим:

Иисусе, Сокровище поля;

Иисусе, Бисере моря;

Иисусе, Живая Вода;

Иисусе, Излияние Духа;

Иисусе, Реко Благодати;

Иисусе, Сило моя;

Иисусе, Алчба духовная;

Иисусе, Жаждо священная;

Иисусе, душ Утоление;

Иисусе, Дне Невечерний;

Иисусе, Мир вожделенный;

Иисусе, мой Боже и Спасе;

Иисусе, Иисусе Сладчайший.

Кондак 7

Се, у двери стоиши, Христе, и стучиши, да услышим Тя, Благостный Боже, да отверзем сердца, славословяще Тя со гласом святых: Аллилуиа.

Икос 7

Лучи Твоя, Солнце Светлейшее, Боже, исцеление есть вопиющим смиренне:

Иисусе, Наставниче жизни;

Иисусе, Пастырю Добрый;

Иисусе, душ Пробуждение;

Иисусе, целомудрия Свете;

Иисусе, чувств Освящение;

Иисусе, сердца Хранение;

Иисусе, Вождю Всемогущий;

Иисусе, Видящий тайная;

Иисусе, Возмездие явное;

Иисусе, Всекроткий и Грозный;

Иисусе, Спасе всего мира;

Иисусе, мой Боже и Спасе;

Иисусе, Иисусе Сладчайший.

Кондак 8

Источник освящения, Боже, еси наших душ и телес, Тя взыскавших, Христе; сия благостно храмом Твоим сотвори, да вечне зовем: Аллилуиа.

Икос 8

Твое Имя, Всеспасе, наш дух оживляет и сердце ликует, зовущее сице:

Иисусе, Сияние Отчее;

Иисусе, Огню Серафимов;

Иисусе, небес отверзение;

Иисусе, Око Всевышняго;

Иисусе, Духа Подателю;

Иисусе, всех Утешение;

Иисусе, Проповедь веры;

Иисусе, сердец Привлечение;

Иисусе, Ключу возрождения;

Иисусе, Церкви веселие;

Иисусе, наше Спасение;

Иисусе, мой Боже и Спасе;

Иисусе, Иисусе Сладчайший.

Кондак 9

Боже, бури мирския колеблют ны присно, в пучину влекуще, Всеспасе, да в Тебе и Тобой токмо узрим покой, взывающе Ти: Аллилуиа.

Икос 9

Мир свыше всетихий низводиши, Спасе, Ти, Боже, взыскавшим, сия приносящим:

Иисусе, во веки Живущий;

Иисусе, Примирителю Дивный;

Иисусе, Мессия Желанный;

Иисусе, Владыко народов;

Иисусе, Благовест мира;

Иисусе, Победа избранных;

Иисусе, Сильный спасати;

Иисусе, верных Святыне;

Иисусе, наша Твердыне;

Иисусе, наше Воззвание;

Иисусе, мое Оправдание;

Иисусе, мой Боже и Спасе;

Иисусе, Иисусе Сладчайший.

Кондак 10

В алтарях всего мира Ты, Боже, незримо нисходиши в Тайны Святии, да Духом и Телом вселишися в ны при пении всех: Аллилуиа.

Икос 10

Се, силы Небесныя Тя, Царю Славы, любовию в страсе святем прославляют:

Иисусе, Спасителю мира;

Иисусе, Сокровище вечное;

Иисусе, всех Упование;

Иисусе, Манна Небесная;

Иисусе, Миро Священное;

Иисусе, жизни Сияние;

Иисусе, душ Освящение;

Иисусе, наше Целение;

Иисусе, даров Излияние;

Иисусе, Хлебе Святейший;

Иисусе, Вино Обожения;

Иисусе, мой Боже и Спасе;

Иисусе, Иисусе Сладчайший.

Кондак 11

О Тебе вси скорбящии души смиреннии отрешитися жаждут и внити в Тя, Боже, в Тя, Море Святейшее света и жизни, зовуще за вся: Аллилуиа.

Икос 11

Не взыдоша на сердце, не видеста очи, яко верным, Христе, уготова, зовущим:

Иисусе, Имя Священное;

Иисусе, благости Море;

Иисусе, Цель бытия;

Иисусе, Покою пресветлый;

Иисусе, Милосте вечная;

Иисусе, Надеждо моя;

Иисусе, Вечнаго Зрение;

Иисусе, духа Стремление;

Иисусе, душ Единение;

Иисусе, желания Краю;

Иисусе, Уделе избранных;

Иисусе, мой Боже и Спасе;

Иисусе, Иисусе Сладчайший.

Кондак 12

Жених наших душ еси, Боже Благий, се, — мы Церковь, Невеста Твоя; прииди же, прииди, наша вечная Жизнь, ко зовущим Тебе: Аллилуиа.

Икос 12

Благословен буди, буди, Всеспасе, во веки сердца бо горят от избытка любви, зовуще:

Иисусе, Иисусе Предивный;

Иисусе, Отчее Сердце;

Иисусе, Славы Сияние;

Иисусе, Вечный Завете;

Иисусе, Храме народов;

Иисусе, Святыне избранных;

Иисусе, Хвало Литургии;

Иисусе, Песнь Херувимов;

Иисусе, Безсмертие верных;

Иисусе, Море Святейшее;

Иисусе, Любы Безпредельная;

Иисусе, мой Боже и Спасе;

Иисусе, Иисусе Сладчайший.

Кондак 13

О Иисусе Сладчайший, Всеспасе Христе, Боже истины, света и жизни, пребуди в ны присно, да Ти воззовем во веки веков: Аллилуиа.

Сей кондак читается тpижды, затем 1-й Икос и 1-й Кондак.

Молитва

Боже сил, Царю Славы, Великий и Дивный! Сколь близок к нам, Благостный Спасе, еси. Се, духом Тя алчем, Искупителю мира; Тя алчем и жаждем, Всерадосте всех. Еси бо Пучина сокровищ нетленных, Божественный Свет, Вселюбве всесвятая и Жизнь безпредельная славящих присно Тя с трепетом, Боже. Аминь.