Акафист молитвенный ко Господу Спасителю во ослабу душевныя скорби

Один из редких покаянных акафистов - "Акафист молитвенный ко Господу Спасителю во ослабу душевныя скорби" - найден в тетрадях архимандрита Павла Груздева (род.1910 - †13 января 1996). В течение многих лет о. Павел переписывал акафисты из дореволюционных изданий, и этот текст, судя по всему, также сохранился благодаря трудам о. Павла.

Акафист молитвенный ко Господу Спасителю во ослабу душевныя скорби

Кондак 1

Взбранныхъ воеводъ небесныхъ Творче и Господи, всехъ любящихъ Тебе неизреченное веселіe, въ день скорби моея хвалу восписую Тебе умиленную, Ты же Адама отъ смерти возставивый и Еву отъ слезъ и печали избавивый, призри на мя отъ печали на всякъ день стужаема и Тебе въ сокрушеніи сердца молитвенно зовуще: Господи мой, Господи, радосте моя, даруй ми да возрадуюся о милости Твоей.

Икос 1

Ангеломъ своимъ безплотнымъ служителемъ заповедый хранити души человеческіе на всехъ путях житія превратнаго, Всемилоседный Господи, не попусти мене въ день испытанія уклонитися на пути унынія, но пошли мне Ангела Твоего, укрепляюща мя въ терпеніи, и не презри моихъ воздыханій сердечныхъ, имиже Тебе молюся сице: Господи мой, Господи, Ты далъ еси мне жизнь и дыханіе, сохрани ныне душу мою отъ унынія. Господи мой, Господи, Ты вдунуль еси в лице мое душу безсмертную, воздвигни мя надъ прахомъ и тленіемъ. Господи мой, Господи, Ты предуставилъ еси пределы житія человеческаго, отврати отъ мене горесть напрасныя смерти. Господи мой, Господи, Ты со мною пребываеши, не остави мене въ онь же день скорблю. Господи мой, Господи, Тебе мое пеніе, услыши мя ныне тепле молящагося. Господи мой, Господи, радосте моя, даруй ми да возрадуюся о милости Твоей.

Кондак 2

Землю и мір весь, и вся яже въ міре создавый Господи, вемъ яко въ вышніхъ живеши и на смиренныя призираеши. Что есть чедовекъ? Но Ты помниши его, или сынъ человечъ, но Ты посещаеши его, къ Тебе убо въ день уничиженія прибегаю и Тебе въ сокрушеніи сердца пою: Аллилуіа.

Икос 2

Къ кому азъ прибегну въ день скорби? Къ кому воззову в день печали? Аще не къ Богу, спасающему мя отъ малодушія и отъ бури, рекшему сладчайшій глаголъ: „Пріидите ко Мне, вси труждающіися и обремененніи, и Азъ упокою вы, и обрящете покой душамъ вашимъ”. Ныне убо изъ бездны отчаянія прихожу къ Тебе, Господи, за грехи мои азъ праведный гневъ Твой прияхъ. Но каяся, имя Твое призываю, Господи спаси мя, къ Тебе бо взываю изъ глубины души: Господи мой, Господи, идеже Ты пребываеши, тамо потребляется всякая печаль. Господи мой, Господи, идеже Ты не присещаеши, оттуду всякая радость отъемлется. Господи мой, Господи, безъ конца согрешихъ предъ Тобою, но не погуби мене до конца. Господи мой, Господи, страшенъ грешнику гневъ Твой, но и велія къ падшему милость Твоя. Господи мой, Господи, въ паденіи моемъ отступихъ отъ Тебе, но привлецы мя, якоже блуднаго. Господи мой, Господи, во гресехъ моихъ укрыхся отъ Тебе, но взыщи мя, яко погибшую драхму. Господи мой, Господи, радосте моя, даруй ми да возрадуюся о милости Твоей.

Кондак 3

Боготечною кровію, Спасе, от вечныя смерти мя спаслъ еси, даровавъ мне Твой Крестъ честный на попраніе адовы силы, но азъ окаянный греху поклонився, расслабленъ являюся телом и духомъ. Темъ же къ Тебе вопію изъ греховныя бездны: Грехъ мой очисти, о Боже, да паки возстану и на врага ополчуся, поя Тебе песнь: Аллилуіа.

Икос 3

Отъ юности моея недоумеваю азъ о житіи моемъ и не вемъ исхода моего и входа моего, кіимъ путемъ пойду и кому подражаю в житіи да блаженствъ небесныхъ улучу часть. Ты же, Господи, открывая ми пути заповедей Твоихъ, реклъ еси: „Блажени нищіи духомъ”. Но бысть мне слово сіе, яко вода мимотекущая, ибо путь гордыхъ избрахъ паче смиренія и самовозношеніе прияхъ паче нищиты духовныя, темже смятеніе духа вместо покоя обретохъ. Ныне же въ сокрушеніи сердца вопію к Тебе: Господи мой, Господи, благо мне, яко смирил мя еси, пріими мя во смиреніи моемъ. Господи мой, Господи, благо мне на Тебя надеятися, покрый мя отъ всякаго зла не къ тому убоюся. Господи мой, Господи, благъ мне законъ Твой, научи мя поучатися въ немъ день и нощь. Господи мой, Господи, блага мне милость Твоя, со мною пребуди въ день скорби. Господи мой, Господи, благи мне все судьбы Твоя, воззову къ Тебе: услыши мя. Господи мой, Господи, благи дни отъ Тебе видехъ, помози ми и въ злы дни не отчаятися. Господи мой, Господи, радосте моя, даруй ми да возрадуюся о милости Твоей.

Кондак 4

Греховъ моих бурями потопляемъ, камо иду, аще не къ пристани храма святаго Твоего, идеже тихое всемъ веетъ дыханіе благодати Твоея; идеже матерніи молитвы приносить за міръ Пречистая Матерь Твоя, скорби сердца человеческаго ведуще, и отраду духу моему сокрушенному подающе, да печаль яко прахъ отрину, поя Богу: Аллилуіа.

Икос 4

Указуя ми путь в Царство Небесное, реклъ еси Господи: „ Блажени плачущіи”. Азъ же не восхотевъ сему блаженству приобщитися, не разумехъ, яко сеющіи слезами радости пожнуть. И любезень мне бысть жребій веселящихся, но веселіе взыскуя, обретохъ печаль. И ныне сетуя хожду, и Тебе вопію азъ моляся: Господи мой, Господи, укрепи мя взыскати заповеди и оправданія Твоя. Господи мой, Господи, удержи мя суетнымъ міра сего не работати. Господи мой, Господи, оправдай мя отъ греховъ моихъ, да исполнятся уста моя радости. Господи мой, Господи, возбуди мя, да некогда усну въ смерть во уныніи. Господи мой, Господи, помоги ми, благая пріявшему, и злая до конца претерпети. Господи мой, Господи, радосте моя, даруй ми да возрадуюся о милости Твоей.

Кондак 5

Великій въ рожденныхъ женами Креститель Твой, Господи, гласомъ состраданія и обличенія и ныне вопіетъ въ пустыни сердца моего: „ Покайся! Приближися бо Царствіе Божіе”. Азъ же земнымъ прелестямъ уязвихся, уши имамъ, но не слышу сихъ спасительныхъ глаголовъ. Темже и въ ровъ страстей, яко слепый, впадохъ, отнюду же щедре воззови мя, да надежду на прощеніе пріиму и гласомъ радованія воспою Тебе: Аллилуіа.

Икос 5

Оправданіи Твоими ко спасенію мя грешнаго привлекая, Ты реклъ еси, Господи: „Блажени кротціи”. Азъ же не послушавъ гласа Твоего, на сильныхъ возложихъ упованіе, надменными мняхъ наследити землю. Но се ныне очима вижу, яко сильніи низлагаются, и како крепцыи оскудевають, и изнеможе крепость моя, смятошеся во мне духъ мой, темже к Тебе, Господи, воззову и къ Богу моему вздыхая молюся: Господи мой, Господи, помилуй мя, яко къ Тебе прибегая спасуся. Господи мой, Господи, воими ми, яко къ Тебе возопіхъ: не остави мене. Господи мой, Господи, не отрини мене, яко унылъ во мне духъ мой. Господи мой, Господи, пріими мя, яко Тебе желаеть душа моя. Господи мой, Господи, оживотвори мя, яко боязнь смерти объятъ мя. Господи мой, Господи, радосте моя, даруй ми да возрадуюся о милости Твоей.

Кондак 6

Зовутъ мя апостоли Твои, Господи, въ послушаніе заповедемъ Твоимъ сятымъ. Но азъ благое иго Твое отвергохъ, яко тяжкое, и легкое бремя, яко неудобоносимое, и врагу приклонихъ слухъ и тому въ рабство лютое впадохъ. Избавителю и защитителю мой, Господи. воззови мя отъ горести моея, да пою Тебе песнь избавленія: Аллилуіа.

Икос 6

Законополагая мне путь жизни и спасенія, глаголалъ еси усты Твоими, Господи: „Блажени алчущіи и жаждущіи правды”. Азъ же не въ правде, но въ силе полагахъ спасеніе, и не на небеси, а на земли правды взыскахъ. И умножися на мя неправда гордыхъ, и печаль приятъ от возстающих на мя. Темже и Тебе ныне прибегаю, молюся: Господи мой, Господи, просвети очи мои и уразумею тайну чудесъ Твоихъ. Господи мой, Господи, отверзи уши мои, да научуся опраданіемъ Твоимъ. Господи мой, Господи, исцели сердце мое, да укреплюся въ заповедехъ Твоихъ. Господи мой, Господи, расшири уста моя, и да возглашаю выну хвалу Тебе. Господи мой, Господи, возбуди душу мою, да не пребудеть до конца въ уныніи и печали. Господи мой, Господи, возвесели духъ мой, да радуяся исповедаю Тя во дни и въ нощи. Господи мой, Господи, радосте моя, даруй ми да возрадуюся о милости Твоей.

Кондак 7

Все множество святыхъ мученикъ Твоихъ, Господи, пролиявшихъ кровь за имя Твое святое, гласомъ подвиговъ своихъ вопіеть въ слухъ сердца моего: Не возлюби зло и вся злая. Но азъ греховными связася похотьми, врагу и погубителю спасенія моего служу, и отъ дома Отчаго Твоего, яко блудный сынъ, въ страну далече отхожду, приложихся скотомъ безсмысленнымъ и уподобихся имъ. Ты же любовію безпредельною обращаеши мя и въ язвы совести влагаеши персты спасительные, да исполненъ и обновленъ воспою Тебе: Аллилуіа.

Икос 7

Азъ вемъ, Господи, вящую заповедь Твою человекомъ: „Блажени милостивіи”, но превозношу и исполняю сію усты токмо, сердце же мое окаменело пребываетъ и не принесохъ Тебе, Благій, плодовъ милосердія, сего ради и постиже мя праведный Судъ Твой, писано бо есть: судъ безъ милости къ несотворившему милости. Темже изъ глубины души моея вопію къ Тебе: Господи мой, Господи, щедрый и милостивый, помилуй мя немилосерднаго. Господи мой, Господи, долготерпеливый, даруй ми совершати плодъ покаянія. Господи мой, Господи, святый и благословенный, научи мя делами милосердія. Господи мой, Господи, Свете неприступный, коснися мя и жестокое сердце мое умягчи. Господи мой, Господи, седяй на Херувимехъ, вознеси мя долу грехами приклоненнаго. Господи мой, Господи, певаемый отъ Серафимъ, услыши воздыханіе души моея. Господи мой, Господи, радосте моя, даруй ми да возрадуюся о милости Твоей.

Кондак 8

Хощеши, Боже мой Премилосердный, да спасуся и въ разумъ истины пріиду, сонмъ же преподобныхъ Твоихъ образъ мне подаетъ, какъ терпеніемъ и нуждою восхищати Царствіе Твое. Но врагъ отъ юности моея мя искушаеть и страстьми палить мя, до ада низводя душу мою, темже от нощи и мрака унынія и печали вопію Тебе, Свете мой, лучами надежды спасенія озари мя и даждь дыханію моему изнести Тебе хвалебный гласъ: Аллилуіа.

Икос 8

Истинный путь указуя недоумевающей душе моей, Ты реклъ еси, Господи: „Блаженни чистіи сердцемъ”. Азъ же от юности моея грехами многими сердце мое осквернихъ и зерцало совести омрачихъ. Темже не могу ныне воззрети на высоту небесную, до ада низверженный и въ пучине греховной потопляемый, отнюдуже яко іона вопію моляся: Господи мой, Господи, Сотворителю мой, сердце чисто созижди во мне. Господи мой, Господи, обновителю мой, духъ правъ обнови во утробе моей. Господи мой, Господи, Спасителю мой, спаси десницею Твоею раба Твоего. Господи мой, Господи, наставниче мой, наставь мя на путь Твой. Господи мой, Господи, просветителю мой, просвети светильникъ мой во спасеніе. Господи мой, Господи, покровителю мой, покрый мя отъ всехъ ненавидящіхъ и обидящіхъ. Господи мой, Господи, радосте моя, даруй ми да возрадуюся о милости Твоей.

Кондак 9

Сердце мое смятеся во мне, боязнь и трепетъ нападе на мя, егда посети мя праведный гневъ Твой, Господи, и познавъ вину горькаго паденія моего, ждахъ въ скорби соскорбящаго и не взыскахъ, въ печали же утешающаго и не обретохъ, Ты бо единъ еси источникъ утешенія и Тебе во умиленіи сердца пою: Аллилуіа.

Икос 9

Победу надъ грехомъ уготовляя ми, училъ еси Господи, глаголя: «Блажени миротворцы». Азъ же не восхотевъ обути нози мои во уготованіе и благовествованіе мира ближнімъ и дальнімъ, но вражду, свару, злобу, рвеніе, разженіе и многія грехи, имже несть числа, возлюбихъ. Единенію міра и духа никакоже послушахъ и плода правды миром не принесохъ. Сего ради недостоинъ Отцемъ нарещи Тя, Небесного Бога, и яко рабъ неключимый, вопію Тебе, моляся: Господи мой, Господи, миръ Твой с высоты принесый, укрепи во мне нравъ миролюбія. Господи мой, Господи, миръ намъ преподавый, угаси во мне огонь самолюбія. Господи мой, Господи, правда сый и миръ на земли, научи мя миромъ служити Тебе. Господи мой, Господи, вышній миръ любящимъ Тя, утоли во мне всякую вражду и ненависть. Господи мой, Господи, міръ свой намъ оставивый, благослови люди Твоя миромъ. Господи мой, Господи, радосте моя, даруй ми да возрадуюся о милости Твоей.

Кондак 10

Аще не Ты мя во объятія Отча приемлеши, Господи, къ кому прибегну азъ, напастьми гонимый? Аще Ты не избавиши, Спасе мой, избавить ли человекъ? Богатство мимо течетъ, слава, яко дымъ, исчезаеть, гордыня даже до праха смирится, и лукавство обличается. Къ Тебе убо Господи Боже, прибежище мое, прибегаю, потокомъ сладости Твоея напой мя и да с радостію воспою Тебе: Аллилуіа.

Икос 10

Стояти за правду Твою наставляя мя, глаголалъ еси Христе Спасе нашъ: „Блаженни изгнаніи правды ради”. Азъ же неправду и злобу паче благостыни возлюбихъ, сего ради изгнанъ есмь отъ лица Твоего и несмь достоинъ воззрети на высоту славы Твоея. Темже въ скорби сый милости отъ Тебе взыскую моляся: Господи мой, Господи, въ вышніхъ живый, свыше осіяй мою бездну греховъ. Господи мой, Господи, на смиренныя призираяй, возведи отъ тли животъ мой. Господи мой, Господи, тайны сердца испытуяй, озари светомъ душу мою. Господи мой, Господи, возводяй изъ тьмы низверженныя, изведи изъ темницы греховныя душу мою. Господи мой, Господи, возводяй нища и убога, возстави мя и правдою Твоею спаси мя, Господи мой, Господи, сотворивый небеса разумомъ, воздвигни душу мою изъ мглы неразумія Господи мой, Господи, радосте моя, даруй ми да возрадуюся о милости Твоей.

Кондак 11

Егда пріидеши во славе Своей, Господи, и на суде Твоем вопросиши мя о содеянныхъ мною, откуду начну плакати моего окаянства; все бо житіе мое изждихъ сластолюбиво: алчущаго не напитахъ, жаждущаго не напоихъ, в болезнии и темнице сущаго не посетихъ; скорбящаго не утешихъ, о ближнемъ моемъ николиже вспомнянухъ. Но Ты, Жизнодавче, подаждь мне время на покаяние, да слезами моими омоется одежда души моея, и в ризе светлой предстану предъ Славой Твоей поя: Аллилуіа.

Икос 11

Святыхъ Твоихъ учениковъ утверждая въ непоколебимой вере, реклъ еси Господи: «Блажени есте егда поносятъ вамъ и ижденуть и рекуть всякъ золъ глаголъ на вы лжуще Мене ради». Они же духом пламенея, смертію запечатлеша веру, но азъ же теплохладенъ сый, не студенъ ниже горящь быхъ, стыдяся Тебе и Твоихъ словесъ предъ человеки глаголати, сего ради горькую часть уготовляю себе на Суде Твоемъ, Господи. Темже изъ клети серда моего каяся и совестию снедаемъ, молюся Ти с умиленіем тепле: Господи мой, Господи, верую, темже и возглаголю, помози моему неверию. Господи мой, Господи, прискорбна есть душа моя, устрой существо мое ко спасенію. Господи мой, Господи, смятеся сердце мое, не вмени мне греховъ моихъ множество. Господи мой, Господи, унылъ во мне духъ мой, не постыди мене на суде Твоемъ. Господи мой, Господи, во векъ исповемся Тебе, обрати въ радость печали мои. Господи мой, Господи, готово сердце мое, отжени отъ мене духъ унынія. Господи мой, Господи, радосте моя, даруй ми да возрадуюся о милости Твоей.

Кондак 12

Многими бедами лютыми содержимъ, многими стрелами вражіими уязвленъ, и впадохъ въ пучину отчаянія, горечь и желчь се пища моя, печаль и сетованіе питіе мое. Но Ты, Избавителю мой, молитву далъ еси мне, яко крыле голубине, и полещу, и надежду на спасеніе Твое обрету, воспевая радостно ангельській гласъ: Аллилуіа.

Икос 12

Икоже къ ближнему, яко къ брату любимому, приходиши ко мне любвеобильно, Господи, и глаголиши: «Се стою при дверяхъ и стучу. Аще услышиши гласъ Мой и отверзеши двери души твоея, вниду къ тебе и вечеряю съ тобою, и ты со Мною». Азъ же, слышахъ гласъ сей, Давидски вопію Тебе: «Коль сладка гортани моей словеса Твоя, паче меда устомъ моимъ». Темже услыши гласъ воздыханія моего, имже Тебе помолюся отъ сердца: Господи мой, Господи, не отрини мене, окаяненъ есмь греховъ моихъ ради. Господи мой, Господи, обогати мя духомъ Твоимъ Святымъ, безна есть душа моя добродетелію. Господи мой, Господи, пріими мя подъ кровъ Твой, нищъ бо есмь, яко забвенъ и оставленъ. Господи мой, Господи, скажи мне путь, въ оньже пойду, слепъ бо есмь, не разумею путей Твоихъ. Господи мой, Господи, просвети одеяніе души моея, нагъ бо есть, погубивъ добродетели ризу. Господи мой, Господи, отверзи ми дверь спасенія, странен бо есмъ и лишенъ дома Отца моего иже на небесехъ. Господи мой, Господи, радосте моя, даруй ми да возрадуюся о милости Твоей.

Кондак 13

О Боже Святый! О Боже крепкій! О Боже безсмертный! Въ трехъ лицахъ Единый Господь мой Спаситель и Преблагій искупитель! Услыши мя горько зовуща, вонми воздыханіямъ слезнымъ. Подаждъ ми терпеніе въ скорби, скоро пошли утешеніе въ печали. Да славлю Твою неизреченную и всемогущую власть и державу, и въ часъ избавленія ангельски имя Твое воспою: Аллилуіа, Аллилуіа, Аллилуіа.

(Этот кондак читается трижды, затем икос 1 и кондак 1)

Блажени есте, егда поносять вамъ и ижденуть и рекутъ всякъ золъ глаголъ на вы лжуще мене ради: радуйтеся и веселитеся, яко мзда ваша многа на небесехъ.

Евангелие от Матфея, гл. 5, ст. 3-12

Источник:

Ярославль - 2003