Кондак 1
Избранный сосуде благодати Божией, новый Златоусте, преподобне отче наш Серафиме, Церкви Православныя украшение, веры и благочестия нашего утверждение, скорый заступниче в нуждех и напастех наших, усердный молитвенниче о всех, чающих твоея помощи, от любве душевныя величаем (и ублажаем) тя, святаго покровителя нашего, яко теплыми молитвами твоими у престола Пресвятыя Троицы укрепляемы, благодарно зовем ти:
Радуйся, преподобне отче наш, Серафиме Платинский, светом Христовым, путие жизни нашея озаряющий!

Икос 1
Ангелов и человеков Творец и всея твари Промыслитель и Создатель, во всяцем народе и языце имеяй верных чад своих, от земли западныя, призва тя, всехвальный Серафиме, на апостольское служение для спасения душ человеческих; ты бо тленныя сокровища мира сего отвергнув, ко стяжанию сокровищ небесных обратил еси взоры духа твоего и учениями святоотеческими просвещаемый, многих на путь спасения направил еси. Мы же, сия ныне поминающе, просим тя, угодниче Христов, твоими молитвами просвети и нас, взывающих ти сице:
Радуйся, Сына Божия Иисуса Христа пред всеми исповедавый;
Радуйся, прежде всего Царствия Божия искавый;
Радуйся, многообразные искушения погибельные отклонивый;
Радуйся, козни врага спасения нашего добропобедно обличивый;
Радуйся, в духовнем просвещении разум книжный стяжавый;
Радуйся, чистое сердце твое Господеви отдавый;
Радуйся, яко свет богопознания в сердца чтущих тя изливаеши;
Радуйся, яко чистоту души в них добре насаждаеши;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 2
Видя Всемилосердный Отец Наш Небесный тя, честный Евгение, истину и правду усердно взыскующа от дней отрочества твоего, просвети тя, аки святаго Августина во дни древнии, дарами благодати Духа Святаго; ты бо, яко и святитель Гиппонский во дни оны, от несовершенной мудрости человеческой возшел еси ко Христу, Премудрости Божественней, сердцем боголюбивым же и разумом богопросвещенным созерцая таинства Царствия Небеснаго, воспевал еси Триединому Богу, Просветившему тя, песнь покаяния и благодарения: Аллилуйя!

Икос 2
Разумом божественным благодатно просвещенный, угодниче Божий, начаток и конец жития твоего на камени благом, Христе Распятем, положил еси и Всеблагим Господем умудренный, веру православную удобь восприял еси, тем же святое миропомазание и причащение Святых Христовых Тайн сподобился еси прияти. Мы же, славяще просвещение твое благодатию Духа Святаго, величаем тя сице:
Радуйся, имя от крещения ти данное во Православии сохранивый;
Радуйся, по имени благородно житие твое выну проводивый;
Радуйся, Богу Всевышнему, а не человеком, угождати учивый;
Радуйся, в подвигах молитвы и покаяния душу твою обновивый;
Радуйся, учению богодуховенных отец свято последовавый;
Радуйся, царем православным честь достодолжную воздавый;
Радуйся, Царя Небеснаго паче всего земнаго почитавый;
Радуйся, в Его руце себе и весь мир с надеждою предававый;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 3
Силою и благодатию Божиею просвещаемь и укрепляемь бе, всехвальный отче наш Серафиме, во дни земнаго жития твоего, от силы в силу восходил еси, да прославится в тебе Христос, Его же ради подвизался еси, Его же возлюбил еси, Его же Единаго вожделе душа твоя, и, волю Божественнаго Спасителя нашего исполняя, за вся благодарил еси Вседержителя. Мы же ныне просим тя: настави и нас на молитву благодарения и славословия, да купно с тобою воспоем Господу Всеблагому, милующему и спасающему нас: Аллилуйя!

Икос 3
Имуще сердце чистое и душу непорочну, прошедшее путь жития в миру благочестиваго, угодниче Божий, удалился еси, аки Сергий Радонежский, на гору Платинскую в дебри лесов калифорнийских, и тамо, пути (путем) древних и новых пустынножителей следуя, в трезвлении и богомыслии усердно подвизался еси; а послеже и в ризы монашеския облеклся еси и новое имя Серафима, сиречь пламеннаго, восприял еси. Мы же ныне вся сия поминающе, таковые похвалы приносим ти:
Радуйся, злато духовное, в горниле страданий очищенное;
Радуйся, древо Христово, при истоках великих вод насажденное;
Радуйся, на путь узкий, ведущий в жизнь вечную, вступивый;
Радуйся, мысль свою в Бозе (смиренномудренно) утвердивый;
Радуйся, на высоту безстрастия (и богомыслия) возшедый;
Радуйся, в служении Богу дарованные ти таланты зело умноживый;
Радуйся, пострижение и священство, аки дары Божии, приявивый;
Радуйся, словом мудрым всех приходивших к тебе питавый;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 4
Бурю сомнений, от недомыслия воздвигаемую, умирити желая, возвестил еси, богоносне отче наш Серафиме, духовным чадом твоим, от разных народов и колен приходившим слушати богомудрыя поучения твоя, яко вера Православная не есть точию во странех греческой и российской, но и во дни древния и в пределех западных сохраняема была и сего ради, примеру святителя Иоанна Шанхайского следуя, труды многия для изучения и написания житий древлезападных угодников Божиих приложил еси, с ними же ныне во славе купно со ангелы пред престолом Святыя Троицы престоиши, вопиюще : Аллилуйя!

Икос 4
Слышавше глагол Господень, яко Царствие Небесное нудится и токмо нужницы восхищают е; наставлениям богомудрых святителей Иоанна, Нектария, Аверкия, Саввы, преподобней Ариадны и праведней Елены следуя, усердно в посте, бдении и молитве подвизался еси, пречудне отче наш Серафиме, преподобным же отцем Востока и Запада ревностно подражая, плоть свою со страстьми и похотьми распял еси и плод красный добродетелей богоугодных Спасителю принес еси. Мы же, зряще прехвальная труды и подвиги твоя, благодарением и радостию исполняемы, глаголем ти сицевая:
Радуйся, аки Ириней Лионский, о чистоте веры свято ревновавый;
Радуйся, аки Григорий Турский, святых радостно прославлявый;
Радуйся, в житии твоем св. Герману Аляскинскому подражавый;
Радуйся, подобно св. Петру Алеутскому, ревность и силу веры явивый;
Радуйся, аки Серафим Саровский, священное безмолвие возлюбивый;
Радуйся, аки святый Евгений Александрийский пред лицем Божиим непорочно ходивый;
Радуйся, аки Герасим Аляскинский, бисер духовный сохранивый и преумноживый;
Радуйся, аки святитель Иоанн в Новом Свете подвиги твоима возсиявый;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 5
Боготечней звезде уподобился еси, верный служителю Христов, просвещающе светом апостольских истин всех к тебе приходивших во дни земнаго жития твоего; наставляя на путь царственный добродетелей богоугодных и поучая ни одесную, ни ошую от него не уклонятися; тем же молим тя: не остави и нас, в суете мира сего пребывающих, просвети омраченные грехом умы и сердца наша и к жизни небесный нас направи, да сподобимся купно с тобою Спасителю мира воспевати песнь: Аллилуйя!

Икос 5
Видевши ангельские чинове еще во временней жизни подвизи твоя, богоносне отче наш Серафиме, во всяком благочестии и чистоте удивляхуся, прославляюще Человеколюбца Бога, немощное человеческое естество благодатию своею преизобильно обновляющего: обогати убо тя Всемогущий Бог на земли и великими дары благодатными: прозорливости, пророчества, любве, молитвы, исцеления; ими же ближним твоим усердно и нелицемерно послужил еси. Сего ради чествуем тя похвалами сими:
Радуйся, в мире тварнем (присутствие) десницу Творца созерцавый;
Радуйся, от красот дольных к лепоте горней воспарявый;
Радуйся, веры Православныя столпе и утверждение;
Радуйся, иноков в подвизех благодатное укрепление;
Радуйся, отцев Добротолюбия достойный сонаследниче;
Радуйся, наследия святых земли российския восприемниче;
Радуйся, жизнь истинную во Христе обретый;
Радуйся, тояжде образ и нам верно показавый;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 6
Проповедник немолчный и вещатель истин евангельских и святоотеческих явился еси, преподобне отче наш Серафиме, во всем служении твоем; ты бо не точию усты, но всем житием твоим заповеди Господни изъяснил еси, яко да просветится свет твой пред человеки, и людие благочестивыя, видевше добрая дела твоя, прославят Отца Небеснаго, вопиюще Ему (о тебе ): Аллилуйя!

Икос 6
Возсиял еси светом добродетелей твоих, богоблаженне авво Серафиме, и сими озарил еси всю церковь Христову, многия души ко Христу привел еси, многих бо в вере и благочестии укрепил еси, иных же к покаянию и исправлению жития (их) направил еси. Мы же, вся сия ныне поминающе, просим тя, угодниче Господень, настави и нас на путь жития благочестиваго, да радостно зовем ти:
Радуйся, нечестивых и душетленных обычаев неуклонный искоренителю;
Радуйся, кротких и благих нравов благоискусный насадителю;
Радуйся, в добродетелех преуспевати нам помогающий; Радуйся, от вражды к друг другу христиан отвращающий;
Радуйся, к земным богатствам сердцем не приляптися научающий;
Радуйся, от похоти себялюбия нас благодатно исцеляющий;
Радуйся, милосердие в сердцах наших пробуждающий;
Радуйся, за вся Творца благодарити нас подвизающий;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 7
Хотяще истинным и верным учеником Христовым быти, удалился еси, богомудрый авво Серафиме, от путей небратолюбия и благочестия теплохладнаго (им же мнозие люди прельщены быша), и сего ради от христиан неблагомысленных многообразныя скорби кротце претерпел еси; во Христе Распятем, отцев святых просвятившем, единую надежду благодатно обретая; сего ради просим тя, преподобне отче, утверди и наша сердца по Бозе горети, да воспоем купно с тобою Спасителю Нашему ангельское пение: Аллилуйя!

Икос 7
Новаго пустынножителя, иноком честным и миряном, пути Христова взыскующим, наставника и учителя богопросвещеннаго дарова Господь нам тя, преблаженне авво Серафиме; ты же убо, аки пчела трудолюбивая, нектар духовный отовсюду сбирая, дивный списатель дел минувших воистину явился еси, егда о подвизех святых отцев и матерей Фиваиды Северней (и древлей Галлии) возвестил еси, и тако премудрый Промысел Создателя, вся племена и языки, ко спасению ведущий, воспел еси. Мы же, сия поминая просим тя: сотвори молитву о спасении и благополучии нашем купно со святыми Востока и Запада и приими похвалы сия:
Радуйся, всех добре жительствующих благодатно ограждающий;
Радуйся, немощных и сирых пречудно укрепляющий;
Радуйся, волны сомнений о камень веры разбивающий;
Радуйся, падающим руку помощи с небес простирающий;
Радуйся, от блудныя страсти всех приходящих к тебе исцеляющий;
Радуйся, кающимся слезы утешительные ниспосылающий;
Радуйся, любити Христа и творити волю Его научающий;
Радуйся, радостию духовной души наши наполняющий;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 8
Странному и неизреченному смирению воплотившегося Бога Слова подражая, блаженне Серафиме, сам исполнился еси великаго смирения и незлобия. Мы же ныне молим тя, угодниче Божий, представительством твоим небесным испроси и нам сия боголюбезныя добродетели, да не поработимся страстем греховным, но благочестно воспоем Спасителю Нашему: Аллилуйа!

Икос 8
Весь исполнен бе, богоблаженне авво, серафимическия любве ко Христу Спасителю Нашему, источнику и смыслу бытия человеческаго; Его бо ради усердно подвизался еси и с радостию велиею вся сокровища души твоей и разума твоего на служение Церкви Святей отдал еси: Божиим бо изволением из обители, в горах дальних сокрытой, явишася потоцы живых словес твоих и открыся источник благодатных учений, утоляяй всякаго жаждущего и с верою к нему припадающего. Мы же, ублажающе великия труды твоя, вопием ти сице:
Радуйся, воине Христов, мечем обоюдоострым ратоборствавый;
Радуйся, силою премудрости твоея уста еретическия заграждавый;
Радуйся, правду учения Церкви Христовой в писаниех твоих утвердивый;
Радуйся, индуистское зловерие дерзновенно обличивый;
Радуйся, лжеучение о переселении душ добропобедно посрамивый;
Радуйся, книгу Бытия, яко Василий Великий, преславно изъяснивый;
Радуйся, истину сотворения Богом всего сущего проповедуяй;
Радуйся, веру в Милосердие и Промысел Творца насаждаяй;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 9
Всяк притекающий к тебе, богоносне отче наш Серафиме, словом любве и наставлением в вере бысть тобою встречаемь ; мы же ныне сия поминающе, просим тя, угодниче Христов, в час сомнений и скорби духовныя не остави и нас, духовных чад твоих, без заступления твоего, да купно с тобою в радости духовней воспоим тобою благодеющему нам Милосердному Господу нашему: Аллилуйя!

Икос 9
Ветия многовещанныя и риторы благоискусные не возмогут достодолжно воспети вси подвизи всечестнаго и досточуднаго жития твоего, святый авво Серафиме; кто бо в силах исповесть вся моления, пощения и болезни твоя? Кто убо достойную хвалу воздаст велию терпению и смирению твоему? Кто же изочтет вся слезы и воздыхания твоя, яже к Богу? Кто убо любы твою к Богу и ближним воспоет праведно? Кто изочтет вся труды твоя, ими же трудился еси во благовестии Христове? Обаче мы, любовию к тебе подвизаемы, на милосердие твое к нам, грешным, уповая, таковые похвалы смиренно приносим ти:
Радуйся, аки Сергий Радонежский, всеусердный служитель Святыя Троицы бывый;
Радуйся, аки святитель Иннокентий, на пути спасении мнозих утвердивый;
Радуйся, аки Макарий Алтайский, ветви новыя к древу православному прививый;
Радуйся, аки Феофан –Затворник, писаниями твоими мнозих духовно возвеселивый;
Радуйся, аки Иоанн Кронштадтский, в вере истинней утвердждавый;
Радуйся, преподобному Силуану Афонскому в созерцании и богомыслии последовавый;
Радуйся, исполнение заветов святителя Иоанна явивый;
Радуйся, многих святых добродетели в себе совокупивый;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 10
Спасти хотя мнози словесныя овцы от волков, губящих е, непрестанно проповедывал еси истину новопросвещенным чадом твоим духовным, сострадание и любовь к тем являя и спасения вечнаго тем желая, мнози труды полагал еси, прехвальне Серафиме, во проповедех, беседах пастырстих, книг теснении, переводех творений святых отцев на наречия современныя, дабы и отчизна твоя Америка и страна Российская (православно) воспевали Спасителю нашему: Аллилуйя!

Икос 10 (вариант 1)
Стена необоримая и заступление всемощное всем людем русским в рассеянии сущим даровася образ Пречистей Матери Божий Курския- Коренныя, ты же, прехвальный Серафиме, купно с народом российским усердно молил еси Царицу Небесную о возрождении веры Христовой во уделе Ея, от Нея же исцеление и утверждение в служении твоем Сыну Ея сподобился еси прияти. Сего ради мы, все свое упование на Пречистую Деву по Бозе возлагая, тебя, преподобне отче наш Серафиме, яко истиннаго служителя и послушника Владычицы Нашей Небесной восхваляем:
Радуйся, в кротости и смирении Матери Божией подражавый;
Радуйся, все упование твое на Царицу Небесную возлагавый;
Радуйся, Небесную помощь от Нея получавый;
Радуйся, об обращении молодежи Ея неустанно умолявый;
Радуйся, Пресвятей Богородице верно послуживый;
Радуйся, во дни и в нощи молитвы к Ней слезно возносивый;
Радуйся, милость Взбранныя Воеводы к нам преклоняющий;
Радуйся, иконы Ея благоговейно почитати научающий;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Икос 10 (вариант 2)
«Стеною нерушимою молитв своих покрывает Пречистая Богородица весь род христианский, и блаженные вси, по Бозе, на Ея предстательство надежду имущие», - тако поучал еси, прехвальне Серафиме, чад твоих духовных, за них и за весь мир молитвы горячие Матери Христовой неустанно вознеся, да сотворит всех нас Всенепорочная Дева быти верными учениками Сына Своего. Ныне же, во славе неизреченной Царицу Небесную созерцая, не забуди и нас, во святых твоих молитвах, да зовем ти сице:
Радуйся, в кротости и смирении Матери Божией подражавый;
Радуйся, все упование на Взбранную Воеводу возлагавый;
Радуйся, Пресвятей Богородице верно послуживый;
Радуйся, во дни и нощи молитвы к Ней слезно возносивый;
Радуйся, мысль благу в сердце от Нея влагаему свято сохранявый;
Радуйся, иконы Ея благоговейно почитати нас научающий;
Радуйся, милосердие и благословение Ея к нам приклоняющий;
Радуйся, купно с Нею о спасении нашем Христа умоляющий;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 11
Пение молебное возносиша духовныя чада твоя, святый авво Серафиме, подле смертнаго одра твоего, егда ты, с кротостью ангельскою недуг лютый смиренно переносил еси, взором же твоим духовным Божественнаго Спасителя Нашего созерцая; и тако, любовию ко Христу озаряемый «скончався бо вмале исполни лета долга», яко «угодна бе Господеви душа» твоя и сего ради восхити тя Создатель «от среды лукавствия» (Прем 4:13-14); ангели же, душу твою во обителие Отчия возносяще, воспеваху радостно Господеви: Аллилуйя!

Икос 11
Света нетварнаго зритель и радости Божественныя сопричастник явился еси, преподобне Серафиме, тем же просим тя: не престани молитися о нас (купно со всеми святыми в земли российстей и в рассеянии просиявшими), да помилует нас Господь твоего предстательства ради и сподобит нас, немощных, новую силу нечестия посрамити и победителие злонравия явистися, да ублажаем тя сицевыми похвалы:
Радуйся, честный ковчеже сокровищ неоскудеваемых;
Радуйся, сосуде драгоценный даров неисчерпаемых;
Радуйся, трезвлением духовным всех нас обогащаяй;
Радуйся, в любви Христовой непрестанно пребывати нас научаяй;
Радуйся, яко тобою вера спасительная выну утверждается;
Радуйся, яко предстательством твоим вся ложная и суетная изгоняется;
Радуйся, яко делателей на нивы Христовы посылаеши;
Радуйся, яко милосердие Божие ко всем нам приклоняеши;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 12
Благодать Божия прослави тя, святый отче наш Серафиме, в житии твоем, и по смерти твоея Дивный во святых Своих Бог прославляет тя (во святых мощех твоих.) Вси бо притекающии с верою к тебе приемлют (от тебе) врачевания благодатныя, сего ради и мы молим тя: избави и всех нас от всякия нужды и болезней, да поем во смирении сердец наших Богу: Аллилуйя!

Икос 12
Поюще преславныя подвизи твоя и служение твое во славу Всеблагаго Господа Нашего, величаем и ублажаем тя, преподобне и богоносне отче наш Серафиме, торжествуем славу твою небесную и преславныя чудеса твоя воспеваем и просим убо тя: буди и нам молитвенник и защитник от стрел лукаваго, укрепляя и наставляя нас к проповедованию Слова Божиего среди язык и безбожник. Сего ради приими милостиво с любовью (и надеждою) приносимые ти похвалы и услыши ны, во умилении вопиющих ти сицевая:
Радуйся, неустанными подвиги, яко воин Христов, Бога-Отца прославивый;
Радуйся, жертвенною любовию к ближним Богу - Сыну последовавый;
Радуйся, добродетельми многими дары Духа Святаго стяжавый;
Радуйся, праведно почитати Святую Троицу нас научающий;
Радуйся, от закваски фарисейския сердца наша очищающий;
Радуйся, от плевел ненависти их благодатно исцеляющий;
Радуйся, верныя от тлетворных духов злобы ограждающий;
Радуйся, неверныя глаголами вечной жизни просвещающий;
Радуйся, преподобне отче наш, Серафиме Платинский, светом Христовым, путие жизни нашея озаряющий!

Кондак 13
О преподобне отче наш Серафиме, теплотою любве твоея ко Господу, посети и согрей души наша и приими убогое сие приношение наше, яко венец похвалы сердечныя, и, яко фимиам благовонный, вознеси молитву твою Отцу всех и Владыце и испроси земли нашей – мира благодейственнаго; Церквам Божиим – единства и благосостояния; нам же всем – чистоты сердечныя и любве непорочныя, да тобою охраняемы и спасаемы, Господеви вопием: Аллилуйя!
Сей кондак читается трижды; затем паки Икос 1, Кондак 1 и заключительная молитва.

Перевод с английского Евгений Владимирович Храповицкий