Акафист преподобному Серафиму Саровскому, первый Акафист преподобному и богоносному отцу нашему Серафиму Саровскому чудотворцу

Кондак 1
Избранный угодниче Христов и чудотворче, скорый помощниче и теплый молитвенниче о всех просящих твоего заступления, преподобне отче Серафиме, восхваляем тя любовию от души: ты же яко имеяй велие дерзновение у Престола Царя небесе и земли, молитвами твоими от всяких нас бед свобождай и в след себе в царствие Горнее руководствуй зовущих ти:
Радуйся, Серафиме молитвенниче о душах наших.

Икос 1
Ангел земный, и человек небесный воистинну был еси отче наш Серафиме, от ранния юности весь Богу освященный и на подвиги духовныя чудно предъизбранный благодатным исцелением в недузе от чудотворныя иконы Богоматери, приемшей тя в покров милостей и щедрот Своих, и тем внушающей нам хвалебно взывати к тебе:
Радуйся, отца добраго и матери благочестивыя чадо боголюбезное!
Радуйся, добродетели рождшей тя унаследивый!
Радуйся, радость и утешение родительнице твоей в вдовстве ея бывый!
Радуйся, ею на подвиги духовныя крестом Господним благословенный!
Радуйся, благочестию и страху Божию от юности наученный!
Радуйся, вся страсти плотския крепко победивый!
Радуйся, иго Христово благое и легкое паче всех благ мира возлюбивый!
Радуйся, еще в младенчестве удостоивыйся благоволения Богоматере!
Радуйся, сосуде непорочный Божия благодати!
Радуйся, Серафиме молитвенниче о душах наших.

Кондак 2
Видя непостоянство мира и его красот тленных, всеблаженне отче, возлюбил еси блага нетленныя царства Христова и сия взыскати потщался еси, подвиги иноческими распиная плоть свою со страстьми и похотьми и преуспевая во всех добродетелях темже и сподобился еси еще во плоти свято и богоугодно пети Творцу Серафимскую песнь: Аллилуиа.

Икос 2
Разум небесный свыше тебе даровася преподобне, имже ясно познал еси, яко вси имамы умрети, и все богатство земное оставити. Темже во образе странника оставил еси дом отеческий, един крест Христов от имения родительскаго взем и устремился еси искати вышняго града Иерусалима небеснаго, на каковем пути твоем, дивяся чудному твоему произволению сретаем тя благохвалении сими:
Радуйся, любве ради Отца Небеснаго, дом отеческий оставивый!
Радуйся, во след Владыки Христа ходити искренно возжелавый!
Радуйся, Аврааму праотцу странничеством твоим подражавый!
Радуйся, любовию земною лестною неуязвлен пребывый!
Радуйся, богатство тленное, яко уметы вменивый!
Радуйся, всею душею и всем помышлением твоим единому Богу прилепивыйся!
Радуйся, тесным путем странничества себе на подвиги духовныя предъискусивый!
Радуйся, кладом и жаждою плотскою мудрование Духу покоривый!
Радуйся, постом и молитвою страсти юношеския в себе усыпивый!
Радуйся, Серафиме молитвенниче о душах наших.

Кондак 3
Сила Господня осени тя, преподобне отче наш Серафиме, егда во град Киев притекл еси, да поклонишися Преподобным Печерским и наставишися от наследников их богоугоднаго жительства на путь непрелестный ко спасению. Темже от уст Преподобнаго Досифея услышав повеление, итти тебе на подвиги духовныя в пустыню Саровскую благодарственно воспел еси сице благоволившему о тебе Владыце небесе и земли: Аллилуиа.

Икос 3
Имея велию ревность к подвигам духовным, яко пернатый потекл еси в пустыню Саровскую, и тамо в послушание совершенное себе вдал еси настоятелю и всей братии, да будеши совершен инок, не имый воли своея, но весь покоривыйся воле Божией. О сем великом самоотвержении твоем чудящеся, преподобне отче наш Серафиме, чествуем тя сицевым песненными хвалами:
Радуйся, совершеннаго послушания истинный рачителю!
Радуйся, боголюбезнаго смирения искренний любителю!
Радуйся, правило веры и благочестия!
Радуйся, образе кротости и нищеты духовныя!
Радуйся, умиления слезнаго преисполненный!
Радуйся, столпе терпения непоколебимый!
Радуйся, святопроцветший крине девства и чистоты!
Радуйся, молитв кадило богоприятное!
Радуйся, псалмопения органе изящный!
Радуйся, Серафиме молитвенниче о душах наших.

Кондак 4
Буря страдания телесных возшуме на храм души твоея преподобне, да яко в горниле искусится произволения твоего сила, огнем болезни лютыя и явится на тебе новое знамение благоволения Богоматери, Иже со апостолы Петром и Иоанном Богословом благоволи посетити тя болящаго и исцеление тебе даровати, да поеши рождшемуся от Нея Христу: Аллилуиа.

Икос 4
Слышав милостивыя глаголы от уст Царицы небесе и земли, нарекшей тя принадлежащим Ея духовному роду, отче Серафиме, ты весь великия любве к Ней преисполнился еси. Исцеленный Ею от недуга и возставленный от одра смертнаго, да подвизаешися во славу Божию и на пользу ближних твоих, от них же яко избранник Божий, слышал еси глаголы таковыя:
Радуйся, воине Христов мужественный и добропобедный!
Радуйся, рабе благий и верный небеснаго Домовладыки!
Радуйся, не обязавыйся куплями житейскими, да Господу Твоему угоден будеши!
Радуйся, яко сподобился еси посещения Богоматере со Апостолы!
Радуйся, яко наименован был еси от Нея принадлежащим Ея Роду!
Радуйся, яко чудное исцеление от Нея в недузе твоем получил еси!
Радуйся, яко любовию теплейшею к Ней преисполнился еси!
Радуйся, яко всю надежду спасения твоего по Бозе на Нея возложил еси!
Радуйся, яко имя Ея благословенное непрестанно в молитвах призывал еси!
Радуйся, Серафиме молитвенниче о душах наших.

Кондак 5
Боготечней звезде древле волхвов, к Рождшемуся Солнцу правды Христу путеводившей уподобити тя дерзаем, преподобне отче, ибо светило богосветлое воистинну был еси, делы и словесы твоими всех приводивый к благочестию и любве Божией. Темже сиянием подвигов твоих озареннии и хлебом небеснаго учения твоего насыщеннии, тебя усердно величаем и прославльшему тя Царю Славы Христу вопием: Аллилуиа.

Икос 5
Видевше тя настоятель обители Саровския, яко Ангела Божия, всеми добродетельми украшеннаго, постриже тя во иночество наименовав Серафимом, и воистинну Серафимскою любовию ко Господу преисполненно бысть сердце твое, преблаженне отче. Темже яко небеснаго человека во плоти ангелоподобно пожившаго и ангельское имя достойно носившаго восхваляем тя и зовем:
Радуйся, святыя Русския Церкве радование и похвало!
Радуйся, воспитавшей тя обители удобрение и славо!
Радуйся, подвижниче богопрославленный и прозорливый!
Радуйся, постниче не изнемогающий и духоносный!
Радуйся, пустынниче дарами благодатными преисполненный!
Радуйся, затворниче древним пророком равночестный!
Радуйся, преподобных и от богоносных отец нравы себе усвоивый!
Радуйся, святых отшельников стопам последовавый!
Радуйся, Отечество твое подвиги твоими духовно просветивый!
Радуйся, Серафиме молитвенниче о душах наших.

Кондак 6
Проповедает пустыня тобою избранная подвиги и труды твоя богоносне угодниче Христов, ибо леса и дебри ея пустынныя духовно облагоухал еси, дивным житием твоим, пророку Божию Илии и Крестителю Господню Иоанну подражал еси. И явился еси пустыни красное прозябение, многоплодное дарами Святаго Духа, Его же действием многая и преславная деяния соделал еси, подвизая верных славословити за тя благих подателя Бога, пением: Аллилуиа.

Икос 6
Возсиял еси благодатно на тверди Русския Церкви и сию украсил еси преподобным житием твоим, отче богоблаженне, на степени диаконства и священства возведенный служение олтарю Господню непорочно совершил еси и был тайнозритель великих и неизреченных чудес Божиих во Святей Литургии сокрытых, тебе же явленных благоволением Вседержителя, возбуждающаго нас звати к тебе:
Радуйся, слуго Господень равноангельный и непорочный!
Радуйся, священнослужителю благоговейный и богоприятный!
Радуйся, руце твои преподобнии со дерзновением многим ко Господу воздеявый!
Радуйся, молитвы о всем мире неленостно Христу приносывый!
Радуйся, сподобивыйся Божественных видений при совершении Святыя Литургии!
Радуйся, возносивый Безкровную Жертву со страхом и любовию!
Радуйся, хлебом жизни насыщенный, и питием безсмертия напоенный!
Радуйся, созерцавый еще во плоти пресветлыя Ангельския силы!
Радуйся, провидевый вся козни духов тьмы!
Радуйся, Серафиме молитвенниче о душах наших.

Кондак 7
Хотя человеколюбец Господь уверити чрез тя сынов святыя Православныя Церкви, яко в храме Божиим при совершении Божественныя Литургии Сам Владыка Христос невидимо присутствует, сподоби тя видети Его явственно, с лики ангельскими во храм Божий нисходяща и люди молящияся благословляюща. Темже в трепете и радости о преславном сем видении воспевал еси Агнцу Божию, вземшему грехи мира, хвалебную песнь: Аллилуиа.

Икос 7
Ново знамение благоволения Божия видим на тебе, преподобне, егда древо в пустыни по молитве твоей без секиры паде на землю, и безсловесный дивий зверь ярость свою на кротость преложив, от рук твоих хлеб приимаше о сем прославляем верховнаго Творца чудес Господа, тебе же силою Его чудодействующему вопием:
Радуйся, отшельниче пустыннолюбивый!
Радуйся, чудотворче преславный!
Радуйся, яко тебе стихии и безсловесныя звери Господь покори!
Радуйся, яко тобою многия милости людем Бог прояви!
Радуйся, благочестия учителю и к покаянию руководителю!
Радуйся, безвестных и тайных согрешений человеческих обличителю!
Радуйся, будущее яко настоящее провидевый!
Радуйся, добрый целебниче недугом душевным и телесным!
Радуйся, благодатный возбудителю спящих совестей!
Радуйся, Серафиме молитвенниче о душах наших.

Кондак 8
Странно и пачеестественно силою Божией укрепляемый, тысящу дний и тысящу нощей на каменех, молитвенно препроводил еси, преподобне отче наш Серафиме, сим показуя нам немощным и грешным, яко вся возможна человеку о укрепляющем его Господе, Его же сила благодатная никогда же оскудевает, но присно готова в помощь верующему, и воспевающему богоугодно: Аллилуиа.

Икос 8
Весь в Бозе быв благоволением Богоматере обитель девам основал еси, о ней яко отец чадолюбивый всегда благопромышлял еси, Серафиме богомудре, пророчествуя, яко будет сия обитель славна и благоустроена. Видя ныне пророчество твое сие сбывшимся и чествуем тя, яко основателя и благодетеля и заступника обители тобою возлюбленныя, во умилении душевнем взываем к тебе:
Радуйся, угодниче Божий, предивный в чудесех!
Радуйся, праведниче Господень неоскудный в милостех!
Радуйся, дев и вдовиц благосердый попечителю!
Радуйся, сирот и убогих любвеобильный питателю!
Радуйся, многомощный защитниче обидимых и гонимых безвинно!
Радуйся, грозный карателю не благоговейных и злочестивых!
Радуйся, любящим и чтущим тя ходатаю спасения!
Радуйся, приводяй грешников ко исправлению!
Радуйся, любовь к Богу любовию к ближним твоим показавый!
Радуйся, Серафиме молитвенниче о душах наших.

Кондак 9
Вся Ангелов воинства удивишася видя незлобие твое, преподобне отче, и крайнюю Евангельсткую твою кротость, егда разбойников немилостивно тя избивших, от достойнаго наказания освободити просил еси, сим показуя, яко верный ученик еси Господа Иисуса, за распинателей своих на Кресте молившагося. Научи убо и нас, угодниче Христов, подражати незлобию твоему в отношении обидящих нас, и нескорым быти на отмщение, да возможем богоприятно пети Спасителю мира: Аллилуиа.

Икос 9
Витии человеческия не возмогут изрещи славу небесную чуднаго видения, свыше тебе дарованнаго, святче Божий, егда безмолствующу ти в пустыни, в день Благовещения Богоматере, Сама Она всеблагая мира заступница, посети тя со Предтечею и Богословом, и ликом святых Ангелов и Дев, обетовании благодатными о святей обители тобою основанной, обвеселив твое сердце, яко будет Ей присная покровительница и помощница, темже тебе сице обрадованному и мы радостно взываем:
Радуйся, посещением Царицы Небесе и земли облагодатствованный!
Радуйся, лицезрением Невесты Неневестныя просвещенный!
Радуйся, утешенный Ею о, обители тобою возлюбленной, матернем попечении!
Радуйся, приемый неложная Ея обетования!
Радуйся, любимиче Ея преискренний!
Радуйся, друже святых присный Богу!
Радуйся, тайнозрителю видений Божественных!
Радуйся, провозвестниче воли Божией человеком!
Радуйся, известный умилостивителю Царя небеснаго Бога!
Радуйся, Серафиме молитвенниче о душах наших.

Кондак 10
Спасительнаго пути наставник непрелестный был еси всем истинным ревнителем благочестия, Серафиме богомудре, и вся православныя христианы неленостно учил еси Бога любити и вся заповеди Его хранити, наипаче же девы богоизбранныя обители твоея к совершенству духовному добре руководил еси, и был еси им истинный отец о Господе, приводя их примером и учением твоим к немолчному славословию Вседержителя пением: Аллилуиа.

Икос 10
Стена заступления и молитвенный предстатель к Богу был еси, угодниче Христов, всем с верою и любовию прибегавших к тебе и не токмо ближним, но и далече сущих, имя же твое в помощь призывавшим от бед различных избавлял еси. Темже слышиши ныне, яко достойную почесть подвигом твоим, сия песненная возглашения:
Радуйся, иночествующих ликов пресветлая красото!
Радуйся, Русския страны благодатное прозябение!
Радуйся, пастырей Церкве наставниче Богомудрия!
Радуйся, сильным мира сего проповедниче смирения!
Радуйся, богатством изобилующим учителю нищелюбия!
Радуйся, неверных и суеверных увещателю к истинной вере!
Радуйся, Православия великий поборниче!
Радуйся, Евангелия Христова верный последователю!
Радуйся, апостольких посланий богословесный истолкователю!
Радуйся, Серафиме молитвенниче о душах наших.

Кондак 11
Пение Пресвятей Троице приносил еси деннонощно, преподобне отче, и на молитве коленопреклоненный предал еси святую душу твою в руце Божии, юже Ангели светлии вознесоша горе ко Престолу Вседержителя, идеже ты ныне со всеми святыми предстоиши во славе невечерней и поеши вечно хвалебную песнь святых святейшему Слову: Аллилуиа.

Икос 11
Светоподательный светильник быв при жизни и по смерти твоей богоблаженне отче, просвещаеши нас благодатно чудесы твоими сими уверяя нас, яко приял еси награду небесную от мздовоздаятеля Христа тебе убо Богом прославленному на небеси и на земли, и мы дерзаем приносити дары песней духовных зовуще:
Радуйся, дивною кончиною твоею святость жития твоего ознаменовавый!
Радуйся, неболезненным исходом твоим пророчества твоя о нем исполнивый!
Радуйся, воздаяние подвигом твоим свыше восприявый!
Радуйся, венцем безсмертия увенчанный от руки Вседержителя!
Радуйся, небесным силам сопричтенный от Ангелов Творца!
Радуйся, блаженство райское унаследовавый со всеми святыми!
Радуйся, торжествуяй вечный праздник спасенных на небеси!
Радуйся, прославленный чудес множеством на земли!
Радуйся, Серафиме молитвенниче о душах наших.

Кондак 12
Благодать Божию свыше испроси нам угодниче Христов, любовию почитающим святую твою память, и имя твое честное в помощь призывающим с верою несомненною, яко велие дерзновение имаши ко Господу, и много может молитва твоя пред благостию Его, не посрами убо упования нашего и явися нам заступник усерден, да поем тобою благодеющему нам Творцу: Аллилуиа.

Икос 12
Поюще подвиги твоя ублажаем тя, преподобне отче наш Серафиме, как чудо Творца преславнаго и милостиваго ко услышанию призывающим тя в скорбех и болезнех: тебе бо дарова нам всеблагий Бог, утешителя сострадательнаго и целебника безмезднаго, присноготоваго помогати нам и исцеляти недуги наши свыше данною ти благодатию. Темже тебе с любовию зовем:
Радуйся, силою Божиею многая и преславная чудеса содеявый!
Радуйся, мантиею твоею недужныя многажды исцеливый!
Радуйся, бесноватыя от демонскаго насилия избавивый!
Радуйся, разслабленныя укрепивый!
Радуйся, ранами покрытых уврачевавый!
Радуйся, безнадежных больных здравы возставивый!
Радуйся, усердно в молитвах тя призывающих благий послушателю!
Радуйся, в бедах и скорбех сущым скорый помощниче!
Радуйся, в грозный час смерти всем нам многомощный заступниче!
Радуйся, Серафиме молитвенниче о душах наших.

Кондак 13
О великий угодниче Христов и чудотворче, преподобне отче наш Серафиме! Приими милостивно сие малое моление наше в похвалу тебе возносимое и теплыми молитвами твоими ко Господу, сохрани и соблюди нас от всякаго зла и геенския избави муки, да с тобою на земли живых вечно поем Богу: Аллилуиа.
Сей Кондак глаголется трижды, таже Икос 1 и Кондак 1

Молитва
О священная главо, великий угодниче Божий преподобне и богоносне отче наш Серафиме! Призри от горния славы от обителей райских, на нас смиренных и немощных обремененных грехами многими и не имущих помощи и утешения!
Приникни к нам благосердием твоим отеческим, и помози нам заповеди Господни непорочно сохраняти святоотеческую Православную веру крепко содержати, покаяние во гресех наших усердно Богу приносити, во благочестии христианстем благодатно преуспевати, и достойными быти твоего о нас любвеобильнаго благопромышления.
Ей, святче Божий! Услыши нас молящихся тебе с верою и любовию не презри нас требующих твоего заступления ныне и в час кончины нашея, помози нам и заступи нас молитвами твоими от злобных наветов врага спасения человеческаго: да не обладает нами его сила, но да сподобимся помощию твоею победити его коварства и унаследовати блаженныя обители райския. На тя бо упование наше возлагаем, отче благосердый, буди нам воистину отец чадолюбивый, и приведи нас к свету невечернему вечныя жизни, богоприятным и многомощным предстательством твоим у Престола Пресвятыя Троицы: да славим и поем со всеми святыми достопокланяемое Имя Отца и Сына и Святаго Духа, Триединаго Бога во веки веков. Аминь.

Акафист дивеевских сестер
Всенародное почитание преподобнаго Серафима Саровского сделало возможным прославление его в лике святых в июле 1903 г. Больше всех радовались прославлению батюшки Серафима дивеевские сестры, хранившие его заветы и наставления, веровавшие в его святость и силу его молитв перед Богом. Почитание ими преподобного Серафима было совершенно особым - они обращались к нему как к самому близкому человеку, как к родному отцу, поверяя ему все свои скорби, печали и надежды. Они были первыми авторами и исполнителями акафиста батюшке. Дивеевские сестры составили и пели этот акафист еще за 20 лет до прославления Преподобного.
В 1887 г. Дивеевская обитель праздновала 25-летие игуменства матушки Марии (Ушаковой). Рукописный вариант акафиста, созданный дивеевскими сестрами, был поднесен матушке Марии в день юбилея. Во многих рукописях сохранялся он в Дивеевскмо монастыре, но до нас дошли только две. По одной из них он и печатается.