Кондак 1
Избранный от Бога и лику преподобных сопричтенный, чудесы многими всю страну Российскую озаривый, неусыпный о нас молитвенниче, преподобне отче Серафиме, восхваляем тя с любовию, небеснаго предстателя и святаго заступника нашего. Ты же, яко имеяй дерзновение ко Господу, молитвами твоими от всяких бед и скорбей свободи ны, да зовем ти:
Радуйся, преподобне Серафиме Вырицкий, земли Российския преславный чудотворче.

Икос 1
Ангела дивна яви тя Господь во дни многих бед и скорбей в стране нашей, отче Серафиме, ангельски бо жительствуя на земли, предал еси себе на служение всем приходящим к тебе и был еси наставник благий, утешитель и чудотворец не токмо в житии, но и по успении твоем. Темже яко Божия избранника восхваляем тя сице:
Радуйся, земли Ярославския светлое украшение;
радуйся, благочестивых родителей твоих отрадо и утешение.
Радуйся, от юности Христа Бога всем сердцем возлюбивый;
радуйся, верою и любовию Ему угодивый.
Радуйся, великим старцем утешителем Варнавою воспитанный;
радуйся, богатство земное и почести мирския ни во чтоже вменивый.
Радуйся, от мира во обитель Александро-Невскую удаливыйся;
радуйся, высотою подвигов твоих люди российския удививый.
Радуйся, многими дары Духа Святаго осиянный;
радуйся, преподобных светлое украшение.
Радуйся, яко тобою весь Вырицкая славится;
радуйся, яко молитвами твоими отчизна наша хранится.
Радуйся, преподобне Серафиме Вырицкий, земли Российския преславный чудотворче.

Кондак 2
Видя Христос душу твою к приятию благодати предуготованную, от юности избра тя, отче преподобне. Темже смотрением Божиим по кончине родителя изшел еси из дому матере твоея во град святаго Петра, идеже навыкал еси учению книжному, усердно дела мирскаго служения твоего исполняя, и радостно воспевал еси Богу благодарственную песнь: Аллилуиа.

Икос 2
Разум богопросвещенный имея, возжелал еси Единому Христу поработати и во обитель Александро-Невскую притекл еси к старцу, умоляя его, да причтет тя к сонму иноков. Старец же лаврский, прозорливыма очима провидя в тебе сокровище превелие Святаго Духа, благослови тя в супружестве пожити, дондеже Господь изволит исполнити желание сердца твоего, да тобою Бог прославится и да воспоют вси вернии тако:
Радуйся, родителей благочестивых сыне;
радуйся, образе кротости и послушания.
Радуйся, дом родительский смотрением Божиим оставивый;
радуйся, во град святаго Петра вселивыйся.
Радуйся, книжною мудростию напоенный;
радуйся, разумом Божественным просвещенный.
Радуйся, беседы со старцем святым промыслительно удостоенный;
радуйся, ко спасению им наставленный.
Радуйся, на путь иночества старцем духоносным направленный;
радуйся, благословение его исполнивый.
Радуйся, благодатию Божиею покровенный;
радуйся, непорочностию житие свое украсивый.
Радуйся, преподобне Серафиме Вырицкий, земли Российския преславный чудотворче.

Кондак 3
Сила веры и благодать Божия укрепляше тя, отче преподобне, егда браком сочетался еси со избранницею твоею и, добре во благочестии с нею пожив, образ боговиднаго жития людем мирским показал еси. Ты же, в браце честнем крест свой несый, в молитве и доброделании пребывал еси, благодарственно воспевая Богу: Аллилуиа.

Икос 3
Имея воистину попечение о спасении души, угодниче Божий, предал еси себе вкупе с супругою твоею в послушание преподобному старцу утешителю Варнаве Гефсиманскому, да наставит вас на путь истиннаго жительства и благословит на подвиг духовный. Сего ради из глубины сердца вопием ти:
Радуйся, преподобнаго старца Варнавы верный учениче;
радуйся, совершенное послушание духовному наставнику своему явивый.
Радуйся, любовь и преданность старцу своему показавый;
радуйся, без воли и благословения его ничесоже творивый.
Радуйся, с супругою в любви и целомудрии поживый;
радуйся, добродетель милосердия в радости исполнивый.
Радуйся, трудолюбче благословенный, праздность возненавидевый;
радуйся, купче, в любостяжание не уклонивыйся.
Радуйся, божественныя службы красоту возлюбивый;
радуйся, церквам Божиим и обителем иноческим благотворивый.
Радуйся, чрез все житие твое Богу послуживый;
радуйся, данныя ти от Бога таланты преумноживый.
Радуйся, преподобне Серафиме Вырицкий, земли Российския преславный чудотворче.

Кондак 4
Буря лютых гонений на Церковь Русскую не поколеба крепкия веры и любве твоея ко Господу, преподобне. Ты бо, расточив богатство земное, пострижение иноческое восприял еси в Лавре Александро-Невстей, в нейже подвизался еси добре, воспевая Богу ангельскую песнь: Аллилуиа.

Икос 4
Слышаша людие града святаго Петра, яко сила духовная даровася тебе, отче всеблаженный, егда главнаго свещника и казначея Лавры послушание восприяв, не токмо о братии святыя обители твоея, но и о всех чадех Божиих попечение имел еси. Сего ради и мы, на твое покровительство уповающе, вопием ти:
Радуйся, вкупе с супругою твоею вся блага мира сего Христа ради оставивый;
радуйся, любовию с Господем на веки сочетавыйся.
Радуйся, богатство многое обителем православным, храмом и нищим раздавый;
радуйся, всякое пристрастие земное от себе отгнавый.
Радуйся, во обитель Александро-Невскую на подвиги духовныя пришедый;
радуйся, монашеское житие зде восприявый.
Радуйся, образом равноангельным достойне почтенный;
радуйся, житию и подвигом древних преподобных отцев поревновавый.
Радуйся, благочиния монастырскаго верный хранителю;
радуйся, иноческаго жития строгий ревнителю.
Радуйся, искушения от плоти, мира и диавола победивый;
радуйся, Православия столпе непоколебимый.
Радуйся, преподобне Серафиме Вырицкий, земли Российския преславный чудотворче.

Кондак 5
Боготечное светило, путь жизни твоея озаряющее, бысть тебе великий угодник Божий Серафим Саровский, егоже имя в схиме восприяв, уподобился еси небесному твоему покровителю и к заступлению его в молитвах прибегал еси, Господу радостно взывая: Аллилуиа.

Икос 5
Видевше равноангельное житие твое и дары благодати Духа Святаго, в тебе являемыя, отче Серафиме, возлюбиша тя братия святыя Александро-Невския Лавры и избраша тя духовника и старца, яко искуснаго руководителя иноков и предстателя пред Богом. Мы же, благодаряще Человеколюбца Господа, даровавшаго тебе толикую силу благодатную, ублажаем тя и зовем:
Радуйся, великим ангельским образом украшенный;
радуйся, ум и сердце твое молитве посвятивый.
Радуйся, имя в честь преподобнаго Серафима Саровскаго достойно восприявый;
радуйся, в иноческих трудех и подвизех тому подражавый.
Радуйся, серафимскою любовию к Богу пламеневый;
радуйся, велие дерзновение ко Господу стяжавый.
Радуйся, духовником и старцем обители братиею избранный;
радуйся, на подвиг сей Богом призванный.
Радуйся, благое иго Христово на себе восприемый;
радуйся, на высоту безстрастия возшедый.
Радуйся, братию Лавры в стоянии за веру укрепивый;
радуйся, в годину скорби светом любве Христовы страну Российскую озаривый.
Радуйся, преподобне Серафиме Вырицкий, земли Российския преславный чудотворче.

Кондак 6
Проповедник богоносный милосердия Божия к стране нашей явился еси, отче преподобне, во дни лихолетия, егда врази веры Христовы святыя обители и храмы разориша и многия православныя люди в темницы и на мучения ведоша. Ты же, отче Серафиме, Богом храним, молил еси Господа спасти от погибели землю Русскую и веру православную в ней сохранити, научая всех верных непрестанно воспевати Богу победную песнь: Аллилуиа.

Икос 6
Возсия свет велий в земли нашей, егда милосердый Господь пресели тя, отче Серафиме, в весь Вырицкую, место святое, Богом избранное, в нейже подвизался еси и многими чудесы прославился еси. Сего ради притекаху к тебе священницы и мирстии, мужие и жены, отроцы и старцы в напастех, скорбех и болезнех, утешение и исцеление получающе и воспевающе тебе хвалы сия:
Радуйся, исповедниче Христов непобедимый;
радуйся, посреде лютых гонений мужественный веры хранителю.
Радуйся, в годину скорби об отечестве и народе нашем теплый молитвенниче;
радуйся, пламенную любовь людей России стяжавый.
Радуйся, за веру православную даже до смерти стояти заповедавый;
радуйся, в подвизех и страданиих за правду верныя укрепивый.
Радуйся, в годы лихолетия многих от неверия к Богу обративый;
радуйся, чудесы твоими в вере тех утвердивый.
Радуйся, весь Вырицкую своим житием освятивый;
радуйся, благодатный ея покровителю.
Радуйся, яко весь Вырицкая твоим служением прославися;
радуйся, яко вся земля Русская благодатию чудес твоих исполнися.
Радуйся, преподобне Серафиме Вырицкий, земли Российския преславный чудотворче.

Кондак 7
Хотя Всемилостивый Господь даровати утешение страждущим людем российским, воздвиже тя, отче Серафиме, якоже пророка и чудотворца. Ты же, грядущия судьбы страны нашея и всего мира предвозвещая, научал еси будущих бед не страшитися, ободряя чад Божиих, яко не оставит Господь верных Своих, поющих Ему: Аллилуиа.

Икос 7
Новаго тя Серафима дарова Господь стране Российстей, отче преподобне, якоже бо той прежде землю нашу светом добродетелей и чудес просвети, тако и ты всю Церковь Русскую Православную подвиги твоими и чудесы духовно облистал еси и по достоянию именем Серафима пламенеющаго именуешися. Темже и слышиши от нас похвалы таковыя:
Радуйся, отче Серафиме, миру новый светильниче;
радуйся, пред Богом наш усердный молитвенниче.
Радуйся, древним пророком в служении твоем уподобивыйся;
радуйся, пророчествы твоими многих вразумивый.
Радуйся, владыке Алексию патриаршество предсказавый;
радуйся, грядущая, яко настоящая, провидевый.
Радуйся, духом ведения просвещенный;
радуйся, прозорливости благодатныя преисполненный.
Радуйся, тайных помышлений человеческих зрителю;
радуйся, грехов сокровенных обличителю.
Радуйся, яко пророческая твоя словеса ныне исполняются;
радуйся, яко сим образом мы славу твою уразумеваем.
Радуйся, преподобне Серафиме Вырицкий, земли Российския преславный чудотворче.

Кондак 8
Странное чудо видим на тебе, святе, како старец немощный тысящу нощей на камени в молитве пребывал еси, преподобному Серафиму Саровскому подражая, воздевая руце твои к Богу и моля Пречистую Его Матерь о спасении отечества нашего от погибели во времена лютая. Темже благодарственно воспеваем укрепившему тя Господу хвалебную песнь: Аллилуиа.

Икос 8
Вся страна наша радостию исполнися, егда дарова Господь российскому воинству победу на враги. Ты же, отче Серафиме, победу сию прорекл еси, такожде и открытие церквей Божиих и обителей иноческих возобновление за покаяние людей русских предвозвестил еси. Темже хвалим Христа Бога нашего, даровавшаго ти дух пророчества и премудрости, и молим тя о заступлении нас, грешных, поющих ти:
Радуйся, святою ревностию о спасении отечества твоего пламеневый;
радуйся, дивную любовь к народу нашему показавый.
Радуйся, о спасении земли Российския молитвенниче богодарованный;
радуйся, всея страны нашея печальниче и страже неусыпный.
Радуйся, в молитве и плаче дни и нощи проводивый;
радуйся, тысящу нощей на камени руце твои к Богу воздевавый.
Радуйся, победу воинства российскаго на поли брани провидевый;
радуйся, избавление страны нашея от нашествия иноплеменных предсказавый.
Радуйся, благочестивых воинов в битвах укрепляяй;
радуйся, покровом молитв твоих в день брани их осеняяй.
Радуйся, многия люди от плена и лютыя смерти оградивый;
радуйся, земли нашея защитниче верный.
Радуйся, преподобне Серафиме Вырицкий, земли Российския преславный чудотворче.

Кондак 9
Всем сердцем Бога возлюбив, отче Серафиме, возлюблен был еси Богом, Иже молитвам твоим внимаше и вся твоя прошения милостиво исполняше. Ты же, яко един от древних отцев преподобных, явился еси в последняя времена, наставляя чад твоих хранити веру православную, во вся дни воспевающе благодателю Богу: Аллилуиа.

Икос 9
Витий человеческих похвалы превосходит святое житие твое, преподобне отче Серафиме, кто бо может достойно восхвалити тя, чудотворца преславнаго, отвсюду бо притекающия от недугов душевных и телесных врачевал еси, бесныя от духов злобы свобождая, греховныя язвы обличая, скорбящия утешая, от бед избавляя, всем потребная ко спасению подавая. Сего ради, благодарни суще, воспеваем ти сице:
Радуйся, непостижимыя судьбы Божия прозреваяй;
радуйся, волю Божию верным открываяй.
Радуйся, пастырю благодатный и учителю;
радуйся, благий наш и дивный российский старче.
Радуйся, моления и прошения наша скоро приемляй;
радуйся, радости духовныя нас исполняяй.
Радуйся, власть на диавола и слуг его от Господа получивый;
радуйся, от мучительства демонскаго многия люди свободивый.
Радуйся, неплодным родителем чадородие испросивый;
радуйся, увечныя и хромыя здравы сотворивый.
Радуйся, слепым прозрение, глухим слышание подаваяй;
радуйся, Божественный врачу, всяку болезнь скоро исцеляяй.
Радуйся, преподобне Серафиме Вырицкий, земли Российския преславный чудотворче.

Кондак 10
Спасительный подвиг завершая, преподобне отче Серафиме, сподобился еси зрети Пресвятую Владычицу нашу Богородицу в видении дивнем и обетование о кончине твоей из уст Ея услышал еси, яко верный служитель и угодник Божий. Моли убо Пречистую Матерь Господа, да и нас, грешных, не отринет и сподобит со святыми зрети лик Ея пресветлый, поюще Богу: Аллилуиа.

Икос 10
Стена необоримая явился еси, чудотворче святый Серафиме, стране нашей Российстей, Домом Пресвятыя Богородицы именуемей. Темже возлюби тя Господь и дарова нам тебе молитвенника ко Пречистей Своей Матери. Мы же, видяще любовь твою к Царице Небесней и неотступное упование на милость Ея, благодарне зовем ти:
Радуйся, Заступницы Усердныя благоговейный почитателю;
радуйся, воли Ея святыя исполнителю.
Радуйся, все упование на Матерь Божию возложивый;
радуйся, во дни и нощи молитвы к Ней со слезами возносивый.
Радуйся, Покровом Царицы Небесныя осененный;
радуйся, велие дерзновение к Ней стяжавый.
Радуйся, посещением Царицы Небесе и земли утешенный;
радуйся, слышавый милостивыя Ея глаголы.
Радуйся, весть от Нея о преселении твоем во обители Небесныя получивый;
радуйся, в кровы Небесныя Богородицею приятый.
Радуйся, яко Преблагословенную Матерь Господа ходатайствовати о нас, грешных, преклоняеши;
радуйся, яко с Нею о мире отечества нашего ко Христу руце воздеваеши.
Радуйся, преподобне Серафиме Вырицкий, земли Российския преславный чудотворче.

Кондак 11
Пение молитвенное в веси Вырицстей у гроба твоего, угодниче Божий, не умолкаше от дне блаженнаго успения до прославления твоего, яко молитвенника дерзновеннаго, исповедника веры и чудотворца. И ныне со всеми святыми Церкве Русския умоляеши о верных чадех ея, о мире всего мира, о устроении святых обителей и церквей, научая всех чтущих тя воспевати в сердцах своих Богу: Аллилуиа.

Икос 11
Возсиял еси в стране нашей, Серафиме богомудре, яко столп утверждения верных и светильник благодатный в нощи многомятежнаго и плачевнаго жития нашего, разгоняя тьму неверия и озлобления и просвещая землю Русскую светом веры. Ныне же, со ангелы предстоя Престолу Божию, озаряеши всех ко гробу твоему святому приходящих и вопиющих с любовию таковая:
Радуйся, в молитвах непрестанных душу свою праведную Богу предавый;
радуйся, и по кончине твоей чудеса творити не преставый.
Радуйся, к преселению в Небесныя обители всецело себе уготовивый;
радуйся, и по смерти нас не оставивый.
Радуйся, в день погребения твоего весь храм ароматом дивным наполнивый;
радуйся, младенцу слепому у гроба твоего внезапу исцеление даровавый.
Радуйся, с верою приходящих ко гробу твоему благодатию освящаяй;
радуйся, во благоухании святыни нетленно почиваяй.
Радуйся, яко с горящим светильником вшел еси в радость Христа;
радуйся, радоватися о Господе нас научаяй.
Радуйся, яко чудес сияньми отчизну твою земную озаряеши;
радуйся, путеводителю наш во Отечество Небесное.
Радуйся, преподобне Серафиме Вырицкий, земли Российския преславный чудотворче.

Кондак 12
Благодати велию силу излия на тя Христос, отче святый, и яви тя в сонме российских подвижников и исповедников веры последних времен. Ты бо благовидным образом своим, словом, житием, кротостию добродетели евангельския исполнил еси, апостольское проповедание, мученическое терпение, преподобных воздержание, нестяжание, смирение и чистоту духовную. Сего ради мы, память твою светло торжествующе, Богу благодарственно воспеваем: Аллилуиа.

Икос 12
Поюще святое и равноангельное житие твое, преподобне отче Серафиме, хвалим, благодарим и славословим прославившаго тя Господа, даровавшаго нам в тебе образ пророка, великаго чудотворца и врача духовнаго на вся времена до скончания века. Приими убо, угодниче Христов, от любящих сердец приносимое тебе моление наше:
Радуйся, лику преподобных сопричтенный;
радуйся, прославлением твоим Церковь Русскую радостию исполнивый.
Радуйся, чудесы от мощей твоих благочестие и веру в стране нашей умноживый;
радуйся, отче святый, духовная чада у гроба твоего собираяй.
Радуйся, всех притекающих в Вырицу под кров свой и заступление приемляй;
радуйся, веси Вырицкия благоуханный крине.
Радуйся, обитель Александро-Невскую и по смерти не оставивый;
радуйся, приходящих в ню на поклонение благий заступниче.
Радуйся, у престола Владыки Христа теплый о нас ходатаю;
радуйся, в День Судный пред Господем о всех верных предстателю.
Радуйся, яко с новомученики и исповедники земли нашея ныне торжествуеши;
радуйся, яко со всеми святыми Бога о нас, грешных, умоляеши.
Радуйся, преподобне Серафиме Вырицкий, земли Российския преславный чудотворче.

Кондак 13
О великий угодниче Божий, преподобне отче Серафиме, веси Вырицкия и всея земли Русския похвало и утверждение, днесь во имя твое собравшеся, от умиленных сердец приносим ти песнь хвалебную и молим тя: сохрани отчизну нашу от враг видимых и невидимых, яви нам отеческую любовь твою и умоли Господа избавити нас муки вечныя и удостоити Царствия Небеснаго, да воспоем Ему со ангелы и всеми святыми: Аллилуиа.
Этот Кондак читается трижды, затем Икос 1-й «Ангела дивна…» и Кондак 1-й «Избранный от Бога…»

МОЛИТВА
О великий угодниче Божий, преподобне отче Серафиме, в годину лютых искушений, обышедших страну нашу, яви тя Господь Церкви Русстей Православней столпа непоколебима, благочестия учителя и многим людем российским старца и утешителя в скорбех, бедах и напастех. Ты бо, во иночестем образе многи подвиги показав, духовник великия Александро-Невския Лавры соделался еси, гонения от руки безбожных приял еси и, промышлением Божиим направляем, в весь Вырицкую вселился еси, идеже Христос тя прослави и даром чудес обогати. И ныне, во времена новых испытаний, помози нам, притекающим ко гробу твоему и чтущим святую память твою, вознеси молитвы о спасении державы нашея и всея земли Русския, да не оскудеют в ней истиннии ревнители веры и подражатели святому и богоугодному житию твоему. Умоли Господа, да подаст нам силы в борьбе со страстьми и похотьми, да укрепит в нас правую веру и благочестие нелицемерное, да соблюдет нас от нечестивых и еретических учений, неверия и суеверия, да вкоренит в сердца наша дух смирения и кротости, дух терпения и целомудрия, дух ревности о славе Божией и о спасении близких и да сподобит твоим предстательством славити Отца и Сына и Святаго Духа во веки веков. Аминь.

Тропарь, глас 4
Яко пресветлая звезда Российския земли, / возсиял еси в веси Вырицстей, преподобне Серафиме, / и, силою Святаго Духа наставляем, / светом чудес твоих страну нашу озарил еси духовно. / Темже и мы, притекающе ко гробу твоему, / умильно глаголем: // моли Христа Бога спастися душам нашим.

Кондак, глас 5
Уподобился еси древним отцем / и подвигом добрым подвизался еси, / благодатию Христовою просветився, / от Негоже прием дарования чудес, / недугующих исцеляти, / печальных и скорбящих утешати, / обидимых и гонимых защищати / и всем в нуждах сущим отраду / и скорое избавление подавати. / Сего ради, яко великаго чудотворца чтуще, / молим тя, чада твоя, преподобне Серафиме, // от всех бед избави нас молитвами твоими.

Взято с http://alexandrtrofimov.ru/?p=93