АКАФИСТ БЛАЖЕННЫМ СТАРИЦАМ СХИМОНАХИНЯМ
СЕРАФИМЕ И МАРИИ КИЕВСКИМ
Ежегодное молитвенное поминовение обеих стариц благолепно совершается 16/29 июля.
Кондак 1.
Земли Киевския радование духовное, подвигом юродства Христа ради просиявшия и все житие свое в нищете
духовней иждившия, и тако, по заповеди Христа Бога нашего, Царствие Небесное улучившия, идеже с сонмом
блаженствующих душ святых двема своима душама равноангельски во свете невечернем славы Божественныя купно
пребываете, помнящих же и любящих вас и яко благоразумных дев со светильникама, елеом благодатным не
истощающимися, и яко невест Христовых почитающих, помощию чудесною доднесь не оставляете, за то присно
поминаем, хвалим, славим ваю, величаем и поем:
Радуйтеся, Серафимо и Марие, чудотворицы Киевския, блаженныя и достохвальныя.
Икос 1.
Ангелоподобному Антонию Печерскому, взамен Втораго Третий удел Богородицы приобретшему, последовала еси
Серафимо ангелоименная. Якоже бо он за послушание игумену своему прииде в Киев град с
благословением Афонския горы, такожде и ты по самовластному указанию Царицы Небесныя сюду притекла еси из
Иверскаго жребия Ея. И яко же той благоволением Божией Матери насадил есть на Киевских горах чудесный
вертоград подобных себе преподобных ученик и Феодосия, первейшаго из них, такожде и ты, укореняся ту,
богоносных жен и Марию блаженную, первую из них, яко древо плодовитое и благосеннолиственное во граде Киеве
возрастила еси. За то присно поминаем, хвалим, славим ваю, величаем и поем:
Радуйтеся, дивныя избранницы Божии и досточудныя; радуйтеся, Богородицею насажденныя спасатися в Ея
благословенный Киевский удел.
Радуйтеся, сугубою благодатию Божественною отмеченныя и Царицею Небесною особно наставляемыя; радуйтеся,
искушенныя в горниле подвигов духовных и яко злато в них очищенныя.
Радуйтеся, ко спасению от века предуведенныя Господем и блаженство вечное от Него получившия; радуйтеся,
Христу Богу уневещенныя и сподобльшияся Царствия Его.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 2.
Феодосию Печерскому, Самим Богом Антонию данному, началом подвига своего уподобилася еси, Анно благодатная:
такожде бо еще юницею сущи к Серафиме пламенней, в Киеве подвизающейся, спасения души своея ища, притекла
еси, и иноческого пострижения с именем Михаила Архангела сподобилася еси. И, якоже Феодосий у
Антония, сорок лет послушницею у старицы своея блаженныя пребыла еси, и свято ея по вся дни тыя послушала
еси. Царица же Небесная молитвами Серафимиными будущую госпожу духовную, Марию схимонахиню в тебе растя, выну
есть назидала тя. За то хвалим Богородицу, спасающую нас, славим Бога Отца, промышляющаго о нас, величаем
Господа Иисуса, нас искупившаго и Духу Святому Божию, утешающему нас, поем: Аллилуиа.
Икос 2.
Преподобным Антонию и Феодосию подражали вы есте своею двоицею, Серафимо и Марие достоблаженныя. Такожде
бо подвигом добрым и жестоким житием близ обители их славныя Печерския подвизалися есте: девства и чистоты
хранением, бдением и пощением, умным деланием
молитвенным и трезвением, созерцанием и смирением, назиданием ближних и нечестивых обличением,
неизцельно недугующих - изцелением, смертельно болящих - возрождением, мертвецев воскрешением,
бедствующим
поможением, гонимых покрытием, пленяемых освобождением, суду причастных предстательством и
оправданием, во тьме блуждающих к свету окормлением, Христа исповеданием, Богородицы почитанием, веры
христианския достойным украшением. За то присно поминаем, хвалим, славим ваю, величаем и поем:
Радуйтеся, схимы великия ангельския сподобльшияся; радуйтеся, небесными человеки воочию всех явльшияся.
Радуйтеся, плоть и кровь свою смирившия; радуйтеся, вы томящаго томившия.
Радуйтеся, веры добрый плод явившия; радуйтеся, свято житие свое иждившия.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 3.
В вертограде лавры святыя Печерския сподобилася еси ты, Серафимо юная, узрети Царицу Небесную, яко Игумению
Ея Успению посвященныя обители и пещерным житием святых мужей прославленныя горы. И удостоилася еси слышати
от Пречистых уст Ея слово укорения за неподобным чтением помрачение преподобнаго твоего жития. Николиже от
видения сего чуднаго не прияла ты еси в руце свои житейскаго ничесого, и за верное слово Матери Божией
исполнение паки и паки сподоблялася еси видети доброты и попечения о спасении нашем исполненный, и паче луч
солнечный славою Божественною сияющий Лик Ея. За то хвалим Богородицу, спасающую нас, славим Бога Отца,
промышляющаго о нас, величаем Господа Иисуса, нас искупившаго и Духу Святому Божию, утешающему нас, поем:
Аллилуиа.
Икос 3.
Внегда, злоумышлением человеческим, над царем земным, со всем домом своим путешествующим, нависла смертная
беда, ты, Серафимо прозорливая, от Царя Небеснаго о сем извещенная, телесем в Киеве находяся, духом своим
вместе со страждущими под Харьковом, молитвами же пред Господем сил и Царем царствующих, хранящим, по слову
пророческому, помазанных Своих, предста. И дивно бысть прочим, но не келейнице твоей, такожде молящейся, не
токмо слышати к Александру Третьему обращенная словеса твоя, но наипаче видети тя, горе руце воздевшую и тако
поддерживающую сего царственнаго богатыря. И призре Господь на избранных Своих, и услыша вы, и спасе тогда на
земли харьковской смертно пострадати могущия Августейшия Своя рабы. За то
присно поминам, хвалим, славим ваю, величаем и поем:
Радуйтеся, яко в беде сущаго защитника людей царства Русскаго молитвенно защитили есте; радуйтеся, яко за
спасение рода царскаго часовня, церковь и монастырь возсияша на месте гибельнем сем.
Радуйтеся, яко по времени преподобномученицы просияша во обители сей исповедничеством своим; радуйтеся, яко в
годину лютых гонений за веру, за Христа умучени быша братия обители сея со игуменом их честным.
Радуйтеся, яко безвестны быша царю земному моления ваша и ваша труды; радуйтеся, яко мзда ваша многа есть за
подвиги земныя на небеси.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 4.
Несть довольно глаголати, како возрадовашася православнии людие киевстии, внегда Христовой веры светильник
пресветлый, чудотворец Кронштадтский и к Богу великий молитвенник град их святый посети. Трие дни тепле
молился есть добрый пастырь сей в древних церквах и обителех матери градов русских и у тамо покоящихся святых
нетленных и многоцелебных мощей. Наипаче же почитая Царицу Небесную и любя, в лавре Печерской Свято-Успенской
слез своих умиленных потоками омываше нерукотворенную и чудотворную икону Успения Ея. Серафима же, все сие
видящи, о Господе исполнившися многоподвижническия ревности, и у благодати Божией соименнаго Иоанна
праведнаго быти с ним духом единою благословения себе испроси. За то хвалим Богородицу, спасающую нас, славим
Бога Отца, промышляющаго о нас, величаем Господа Иисуса, нас искупившаго и Духу Святому Божию, утешающему
нас, поем: Аллилуиа.
Икос 4.
Хлада и глада терпением, жаждою и сухоядением плоть вашу духовом вашим подклонили есте, Серафимо и Марие
досточудныя. И яко сами люте подвигами сими искушени бысте, тако и людем, всеми сими измождаемым, помощи
сподоблялися есте. Сия ведуще, християне прихождаху к вама в засуху, помощи ища. Вы же постом сугубым постяся
и Богу моляся со страждущими купно страждуще, далече из Киева ко кладезю водному пешешествовасте. Поелику же
горе имели есте ваша сердца, толику ходисте не по земли бренней, но по воздуху над нею пред множеством тех
людей. И яко Древний Израиль оживотворил есть Господь благодатным дождем по молитве Илии, тако и по вашим
молитвам николиже не оставляя есть, яко Новый Израиль, верныя Себе людие. За то присно поминаем хвалим,
славим ваю, величаем и поем:
Радуйтеся, от глада не изнемогающия; радуйтеся, водою неоскудевающия благодати Божия жажду утоляющия.
Радуйтеся, молитвою в стужу зимнюю согреваемыя; радуйтеся, зноя летняго в богомыслии чистем не замечающия.
Радуйтеся, людем страждущим выну помогающия; радуйтеся, не токмо духом но и телесем горе возлетающия.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 5.
Реки крови христианския по земли Русской от руки безбожник злых суть потекли. Сонмы мученик умерщвлени быша
или же заточени быша за Христа. Обители разорени быша, монаси разогнани быша, храмы же быша поругани. Двоицу
же вашу, Христа ради юродую, яко некогда Илию и седмь тысящ с ним во Израили, от пагубы Господь сохрани и чад
ваших верных рукою Своею крепкою от нечестия удержи. И, якоже Фесвитянин той некогда, такожде продолжали вы
есте пророчествовати, слово истины возвещати и Господа проповедовати. И Божиих человек множество, за веру
свою могущих злопострадати, молитвами вашими к Божией Матери, яко кровом ангельских крил, покрывати. За то
хвалим Богородицу, спасающую нас, славим Бога Отца, промышляющаго о нас, величаем Господа Иисуса, нас
искупившаго и Духу Святому Божию, утешающему нас, поем: Аллилуиа.
Икос 5.
Кто возможет труды и болезни ваша, скорби и злострадания, Христа ради понесенныя, изрещи? И что о них людем,
при жизни вашей ваю не ведавшим, поведати? То ли, яко от смертоубийства сироту защитисте? И яко властию, вама
от Господа Иисуса данною, Именем Его и знамением Животворящаго Креста одержимых духами злыми от плена вражия
свободисте и неизцельно болящих изцелисте? К пользе бо страждущих Христос Бог наш щедре даде вама силу и
власть на вся бесы, и недуги целити, и в силе древних пророк ваю людем Своим Он яви. Посему мнозии прибегаху
к вама божественная послушати и изцелитися от недуг своих, и страждущии от дух нечистых; и изцеляхуся. И
мертвии по слову вашему от смерти к животу возвращахуся. За то присно поминаем, хвалим, славим ваю, величаем
и поем:
Радуйтеся, болящим изцеление подававшия; радуйтеся, и умерших воскресавшия.
Радуйтеся, на земли киевской явившия достоинство первых человек, в раи бывшее; радуйтеся, яко господие со
властию несмысленным тварям не вредити человекам повелевавшия.
Радуйтеся, ради Христа и во Христе все житие ваше иждившия; радуйтеся, от себе самих ничесого не глаголавшия
и не творившия.
Радуйтеся, Серафиме и Марие, чудотворицы Киевския, блажеиныя и достохвальныя.
Кондак 6.
Венцем мученическим возжелела еси украситися, Серафимо богомудрая, под конец многоподвижнически прожитых дний
твоих. На служение же старческое во граде святем Божией Матери по себе оставила еси Марию досточудную, паки
Богу поработати долженствующую на земли. Себе же и Александре, кротцей послушнице твоей, испросила еси у
Господа благословения Вышняго за правду пострадати от иноплеменник злых. Видяще же врата Иерусалима
Небеснаго, для ваю растворенныя, и Господа Бога и Спаса нашего Иисуса Христа, смертию Своею всех людей от
жала смерти древле искупившаго ведяще, с радостию горе устремилися вы есте. За то Хвалим Богородицу,
спасающую нас, славим Бога Отца, промышляющаго о нас, величаем Господа Иисуса, нас искупившаго и Духу Святому
Божию, утешающему нас, поем: Аллилуиа.
Икос 6.
На Голгофу вашу в Киеве, на Подоле взыдосте вы, Серафимо и Александро, новыя Киевския мученицы. И послежде
купели единей паки пакибытия баню кровию своею собственною прияли есте. Умучени же бысте от воинов, горе,
плач и стон народу Божию несущих и смерть сеющих, жизни же Подателя не ведущих и рабов Христовых, смирением
своим демонам и слугам их страшных, люте ненавидящих. Не леть подобообразно вся страдания ваша исчести, девы,
девам святым Варваре и Екатерине мучениями уподобившияся. Посему потоки крови вашея не токмо телеса ваша
оросиша и души ваша просветиша, но абие землю сию от скверны омыша и от нашествия иноплеменников и плена
вражия свободиша люди ея. За то присно поминаем, хвалим, славим ваю, величаем и поем:
Радуйтеся, душама вашима, по слову апостола, скоро от тела разлучитися возжелавшия; радуйтеся, по кончине
вашей быти со Христом вожделевшия.
Радуйтеся, мучений и тлена смертнаго не убоявшияся; радуйтеся, врагов Христовых, единоплеменных и
иноплеменных вама правды ради обличавшия.
Радуйтеся, токмо ради продолжения старческаго окормления людей Божиих пред лицем смерти разлученныя;
радуйтеся, Серафимо крест мученический, Марие же крест старчества на рамо своя за послушание вземшия.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 7.
Ко славе вашей вящей, в жизни будущаго века открытися имущей, попустил есть Господь сил телесне
сокрушитися вама, Серафимо и Александро многострадальныя, яко спелей пшенице в мельничных
жерновех, от рук злых врагов. Останки же ваша честныя благословил есть, Серафиме в соннем видении со тщанием
погребсти повелети истинным Своим рабом. Изволением же Божией Матери обитель невест Христовых Флоровская, на
Подоле стоящая, яко мати скорбящая умерщвленных чад своих, ваю прияла есть в свой земный подол. И яко
сокровище многоценное, на поле сокрытое, огради Серафиму до времени мощей ея обретения перваго, Александру же
до дне воскресения всеобщаго. За то хвалим Богородицу, спасающую нас, славим Бога Отца, промышляющаго о нас,
величаем Господа Иисуса, нас искупившаго и Духу Святому Божию, утешающему нас, поем: Аллилуиа.
Икос 7.
Сохранити «крупинок» твоих завещала еси, Серафимо блаженная, преемнице своей и бывшей своей келейнице. И с
просфорою освященною, подобно милоти Илииной, с небеси Елисею низпосланной, благодать старчествования
возблагодать послушничества изволением Иисуса Христа Сына Божия и Божией Матери в руце Марие блаженней из рук
своих преподала еси. И дабы выну за весь мир, и за всех и за вся молитися, пострижения в схиму великую
ангельскую искати и сподобитися, всегдашней послушнице своей повелела еси. Жити же ей токмо на окраине Киева,
в Святошино странницею бездомною у доброхотных людей положила еси. То-то же преподобный Никола Святоша,
Черниговский князь возрадовался есть на небеси. Весь бо его Святошинская наипаче освятитися долженствовала
есть жительством в ней новыя и истинно духовныя госпожи. За то присно поминаем, хвалим, славим ваю, величаем
и поем:
Радуйтеся, ревностию по благодати пророкам Божиим Илии и Елисею уподобившияся; радуйтеся, не милотию
ветхозаветною, но просфорою церковною Благодати сугубыя ко дщери духовней от ея матери снисхождение
прознаменовавшия.
Радуйтеся, чад духовных ваших и всех к вама в нуждах прибегающих николиже без помощи не оставлявшия;
радуйтеся, делательницы нивы Христовой, чад ваших, яко крупицы хлеба священнаго рачительно с рук на
руки и преемственно друг другу предавшия.
Радуйтеся, посещениями своими Святошино освятившия; радуйтеся, в годину гонений на церковь весь преподобнаго
Николы Святоши, чудотворца Печерскаго, жительством своим во Христе просветившия.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 8.
Обрадованная Мати Божия, молитвами блаженныя старицы схимонахини Серафимы во вся дни живота нашего не остави
ны, всякаго врага и супостата от нас отжени, от нападок гнусных лукавых духов злобы человеческия защити,
напитай и вразуми, заступи и спаси — тако взывати духовных чад твоих, Марие схимнице блаженная, учила еси ты.
И молитва веры сия многажды спасала еси ны от беды. Се бо Пресвятую, Пречистую, Преблагословенную, Славную
Владычицу нашу Богородицу и Приснодеву Марию, со старицами нашими блаженными помянувше и сами себе, и друг
друга, и весь живот наш Христу Богу нашему предавше, николиже посрамляеми бываем есмы. За то хвалим
Богородицу, спасающую нас, славим Бога Отца, промышляющаго о нас, величаем Господа Иисуса, нас искупившаго и
Духу Святому Божию, утешающему нас, поем: Аллилуиа.
Икос 8.
О предстоящем тебе явлении Божией Матери свыше извещенная, восхотела ты еси, Марие Блаженная,
иерея Василия, сына духовнаго твоего, к сему православия торжеству приобщити для укрепления веры
его. И испросила еси у Владычицы позволения и ему во время оно горнему соприсутствовати и молитвы Ей, в пении
акафистнем составленныя, яко жертву хваления за сие принести. И тако сподобился есть и не помышлявший о сем
иерей сей, яко некогда с преподобным Сергием смиренный Михей и с Серафимом преподобным Евпраксия блаженная,
быти при явлении сем, молитися и видети, и нам сие засвидетельствовати: яко таял он есть, яко воск, и яко
сияющею, подобно солнцу, и, беседующею с невидимою для него Богородицею, блаженную старицу свою, сих великих
и пространных явлений в нашем дольнем мире мира горняго от Серафимы блаженныя унаследовавшую, созерцал он
есть. За то присно поминаем, хвалим, славим ваю, величаем и поем:
Радуйтеся, сподобившияся видети Царицу Небеси на земли; радуйтеся, удостоившияся собеседования Ея.
Радуйтеся, выну слышимыя Пречистою и Ею хранимыя; радуйтеся, и нас молитвами вашими к Ней хранившия и
хранящия.
Радуйтеся, Богородицу и Матерь Света в песнех возвеличившия; радуйтеся, Божиею Материю отмеченныя и Сыном Ея
уневещенныя.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 9.
Далече на севере страны Российския, гласом Твоим Владычним, бывшим в домах их от икон Твоих святых, известила
Ты еси, Дево Богородице, бесноватых страдалиц двоицу о имущем, по промыслу Божию и благости Твоея,
совершитися в Киеве изцелении их. И велела еси, приискати тамо угодницу Вашу блаженную, Марию схимонахиню и
испросити святых ея молитв. В Святошино указали суть им жилище Мариино и се бысть, яко сюду жены те суть
притекли, бесы в них вострепетали суть и от снеди Марииной: млека и хлеба, ею благословеннаго, страдалицами
употребленной, скоро от одержимых ими отбежали суть. Мария же прозорливица грехи жен сиих тайныя
обличив, к таинствам Покаяния и Причащения в лавру Печерскую направи их. За то хвалим Богородицу, спасающую
нас, славим Бога Отца, промышляющаго о нас, величаем Господа Иисуса, нас искупившаго и Духу Святому Божию,
утешающему нас, поем: Аллилуиа.
Икос 9.
Внегда время кончины твоея приспе, благословила еси ты, Марие богоизбранная, честныя останки старицы твоея
Серафимы иерею Николаю, верному чаду ея, и монахине Палладии, верней своей келейнице, из обители Флоровския
на Святошинское кладбище изнести. И тако исполнено бысть о погребении ея иереем тем и о услуге велией ей от
монахини сей Серафимино проречение. И сподобилися оныя избранницы мученицы сея мощи ея руками своими обрести,
и благодати Духа Святаго, и силы Божией целительней обильное от них излияние очами своими видети. Палладия же
монахиня гроб духовныя матери блаженныя старицы своея уготовала есть и вложити в него драгоценныя останки ея,
яко древле Нестор Печерский останки честныя преподобнаго Феодосия, сподобилася есть. И еще прорекла есть
словами Марииными о вторицею имеющем совершитися зде Серафимы блаженныя мощей обретении и в церкви святей ея
прославлении. За то присно поминаем, хвалим, славим ваю, величаем и поем:
Радуйтеся, не инуде, но точию в Святошино пребывание сами себе и друг другу у Господа испросившия; радуйтеся,
еще живущая старице, мощам преставившейся матери своея духовныя, а тая дочери своей духовней, молитвами
своими пред престолом Божиим, послужившия.
Радуйтеся, душама вашима друг со другом во Христе неразлучныя; радуйтеся, и по смерти вашей паки зде
сподобившияся телесного на земле сретения.
Радуйтеся, яко едиными усты чад ваших общих наставлявшия; радуйтеся, яко и сердцем единем
о них болезновавшия.
Радуйтеся, Серафимо и Марие чудотворицы Киевския, блаженныя и достохвальныя.
Кондак 10.
Весть Господь путь праведных, провозвестил есть во псалмех пророк Давид, и дние лет их кроме Господа кто
исчестит? Ты же, Марие дивная, пред Лицем Божиим выну ходя, от Самаго Господа сподобилася еси уведети о
скором души твоея от тела разлучении. И тако в молчании, бдении и пощении, умном делании и приуготовлении
время конечное с сугубою ревностию провела еси. Киев же и святыни его с неумолчною молитвою к Божией Матери о
граде сем святем, всяком граде, стране, мире всем и всех верою живущих в них людех, накануне преставления
твоего, яко стража нощная на колеснице, с девама двема обтекла еси. За то хвалим Богородицу, спасающую нас,
славим Бога Отца, промышляющаго о нас, величаем Господа Иисуса, нас искупившаго и Духу Святому Божию,
утешающему нас, поем: Аллилуиа.
Икос 10.
Христовы избранницы, юроды миру сему безумному, такожде, яко и ты, Марие блаженная, извещени быша от Господа
в Киеве и Почаеве о грядущем изхождении твоем из юдоли плача в землю обетованную, исполненную духовного меда
и млека, наипаче же сладости лицезрения Божия и доброты Его славословия, идеже и Серафима блаженная старица и
предшественница бе твоя. И се откровением Своим, блаженней Екатерине, преемнице твоей по старчеству, бывшем о
грядущем твоем преставлении всех тя любящих Господь извести и о еже с тобою проститися вразуми. Ты же, Марие
мати любвеобильная, яко кокош птенцы своя под крила своя чад твоих духовных множество напоследок собрала еси
и каждаго на потребу душевную прозорливо наставляла еси. За то присно поминаем, хвалим, славим ваю, величаем
и поем:
Радуйтеся, девы богомудрыя и блаженныя; радуйтеся, подвигом добрым подвизавшияся и тако от Господа
освятившияся.
Радуйтеся, юродством Христа ради спасшияся и других спасавшия; радуйтеся, добрый плод по себе в лице
Екатерины блаженныя преемственно возрастившия.
Радуйтеся, друг за друга молившияся и друг друга во Христе возлюбившия; радуйтеся, и в вечности между собою
не разлучившияся.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 11.
Христианския кончины живота твоего, безболезненной, непостыдной, мирной сподобилася ты еси, Марие мати
блаженная. И плотию твоею уснув, яко невеста в чертоги царския, ко Христу Богу нашему духом твоим Блаженно
взошла еси. И яко началом подвижническаго жития твоего Феодосию, Великому чудотворцу Печерскому ты
уподобилася еси, тако и кончиною твоею праведною и славною, и знамением огненнаго от земли до неба столпа,
дивному подвижнику сему сопросияла еси. Слава же молниевиднаго души твоея восхождения и во врата Царствия
Небеснаго прохождения, и Престолу Божию поклонения на лице твоем мертвеннем неизреченным блаженством твоим и
отсветом света божественнаго просия. За то хвалим Богородицу, спасающую нас, славим Бога Отца, промышляющаго
о нас, величаем Господа Иисуса, нас искупившаго и Духу Святому Божию, утешающему нас, поем: Аллилуиа.
Икос 11.
Яко на источник воды живой во время зноя летняго притекает в день кончины Марииной на место вашего упокоения
множество почитающих ваю угодницама Божиима человек, пением молитвенным благоговейно поминовение ваше
совершающих, яко великое церковное торжество. И яко агапу древнюю творят у ограды вашей трапезу поминальную
для всех сюду притекающих бедных и нуждающихся, и ваю во Христе любящих и николиже не забывающих верных рабов
Его. Внегда же жена, домом своим трапезе той служившая, усумнися в пользе ея, ты, Серафимо огнедухновенная,
благоволением Божиим ю вразумиша из вечности блаженныя. Виде бо та жена в соннем видении велий плат,
исполненный яств, у ног твоих стоящ, и слыша от тебе слово утешения и к Богу его виде стремительно
возносящсь. За то присно поминаем, хвалим, славим ваю, величаем и поем:
Радуйтеся, не оставляти помощию своею молитвенною ваю помнящих обетовавшия; радуйтеся, дерзновение на сие
пред Богом, Иже есть Любы, имущия.
Радуйтеся, всех, за ваю молящихся, выну с небеси видящия и слышащия; радуйтеся, вся помышления сердечныя
людей в Боге ведущия.
Радуйтеся, яко выну память ваша светло совершается; радуйтеся, яко почитание ваше ширится и слава умножается.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 12.
Виде и ина жена, внегда в духе бе, множество приходящих на поклонение к вама людей и славу Божию, явленную на
месте сем святем: в ограде вашей храм нерукотворен, и высящийся до небес иконостас, иконы Троицы Святыя,
Владычицы Пречистыя и Николая великаго чудотворца и угодника Их. Видела есть и елея исполненный светильник
златый, и слышала есть о ваю свидетельствующий глас Христов, и получи есть от Него крестообразное помазание
па свое чело. И виде ваю живыма, над могилама вашима надлежащима в схиме, и руки ваша целоваше, и верова
увиденному, и мы сами сего не видяще, уверовали еси сему, о сем слышаще. За то хвалим Богородицу, спасающую
нас, славим Бога Отца, промышляющаго о нас, величаем Господа Иисуса, нас искупившаго и Духу Святому Божию,
утешающему нас, поем: Аллилуиа.
Икос 12.
На полвека состареся летами, но не душею своею тая же жена и накануне дня поминовения вашего сподобися
вторицею ваю живыма в соннем видении узрети, не возлежащих точию, но в полном облачении схимническом
предстоящих у гробниц своих, труждающихся в поте лица своего за ны и просящих Богородицу и Господа о
помиловании, очищении и оставлении грехов всех приходящих к вама людей, умоляющих ваю о помощи и по вашим
молитвам святым чающих получити от Господа великия и богатыя Его милости. И паки уверишеся та жена, и с нею
мы, в блаженней участи вашей и спасению людей грешных, к предстательству вашему прибегающих, великом вашем
служении. За то присно поминаем, хвалим, славим ваю, величаем и поем:
Радуйтеся, молитвенницы к Богу крепция и дерзновенныя; радуйтеся, яко дивно прославляет Господь славящих Его.
Радуйтеся, яко воочию чистых сердцем предвоздвизает Он ваю из гробницы на свещницу церковную; радуйтеся, яко
не точию молитвенным предстательством, но еще и освященныма телама вашима чудотворите нам.
Радуйтеся, молитвами вашими ко Господу убеляти ны от чернящих ны грехов могущия; радуйтеся, и за гробом Богу
и людем Его послужившия и еще множицею послужити имущия.
Радуйтеся, Серафимо и Марие, чудотворицы Киевския, блаженныя и достохвальныя.
Кондак 13.
Воспоминая драгоценная лета живота вашего многоподвижническаго и всем вашим житием явленное живое и
деятельное свидетельство о возлюбившем нас даже до муки крестныя Божественнем Христе, и поминая доднесь
непрестающая у могил ваших, вашими молитвами к Богу и Богородице оказываемая нам благодеяния: скорое в
скорбех утешение и безмездно в болезнех получаемое чудесное врачевство, радуемся свидетельствам сим вашея
святости, ко славе Божией и прославлению Божией Матери являющейся воочию чающих правды Божественныя
торжество. За то хвалим Богородицу, спасающию нас, славим Бога Отца, промышляющего о нас, величаем Господа
Иисуса, нас искупившаго и Духу Святому Божию, утешающему нас, поем: Аллилуиа, аллилуиа, аллилуиа.
(Сей кондак читается трижды, затем чтется икос 1 и кондак 1)
МОЛИТВА КО БЛАЖЕННЫМ СТАРИЦАМЪ СЕРАФИМЕ И МАРИИ КИЕВСКИМ
О Блаженныя матери наша, Серафимо и Марие Киевския, Господа Бога всем сердцем и всею душею, и всем
разумением вашим и ближняго яко сами себе возлюбившия, подвигом добрым подвизавшияся и Христа ради юродство
на себе от руки Иисусовой приявшия! Блаженно житие ваше иждившия: даров нищеты духовныя, о гресех мира плача
непрестаннаго, кротости христоподражательныя, алчбы и жажды правды вышния, милости Божия, чистоты сердечныя,
умиротворения человек мятущихся и враждующих, гонения правды ради, поношения Христа ради, изгнания, злых
глагол слышания на вы лжущих в веце сем скорбнем и приуготовительнем к вечней жизни по слову евангельскому
приявшия, и по неложному обетованию Божию за сие мзду многу: иже есть Царствие Небесное, утешение от Господа,
рая наследие, правды Божией ненасытимое насыщение вечное помилование, нетварнаго Света Божественнаго зрение,
Богу усыновление и со Христом соцарствование, вечную радость и веселие на небесех купно с венцами праведных
по блаженней кончине вашей получившия. Лицезрения Царицы Небесныя еще на земли сподобльшияся и тамо, на месте
светлем, месте злачнем, месте
покойнем, в селениих праведных, и в недрех Авраамлех радостно сподобляющияся. При жизни вашей и по кончине
чудотворящия, и помощь Божественную нам испрашивающия, молите за ны Пресвятую Марию Деву Богородицу и Святую
Троицу Отца, и Сына, и Святаго Духа Господа, да поживем по-евангельски и сподобимся душ спасения, дабы в
жизни века будущаго хотя малую толику блаженства вашего улучити, и ваю тамо видети, и вместе с вама хвалити
Богородицу, спасшую нас, славити Бога Отца, промышляющаго о нас, величати Господа Иисуса, нас искупившаго и
Духу Святому Божию, утешившему нас, пети, и славословити Господа за щедроты Его и любы неизреченныя к
творению Своему и блаженство сие вечное. Аминь.
Тропарь, глас 4.
От юности вашея Христовою любовию уязвленныя / и иго Его легкое на себе приявшия, / крест Христов на рамена
своя возложившия / и подвигом добрым во вся дни живота вашего подвизавшияся, / Царицею Небеси и земли на
жительство многоподвижническое в удел Ея Киевский призванныя / и тамо миру со страстьми и похотьми его
распеншияся, / и яко буйи Христа ради, от людей несмысленных презираемии и попираемии многоскорбно пожившия,
/ даров смирения крайнего, прозорливости, цельбы и чудотворения от Бога сподобльшияся, / яве Матерь Божию
видевшия и с Нею беседовавшия, / людей же Божиих множество в вере истинней укрепившия / и коемуждо из них по
потребе каждаго молитвами вашими Богоугодными послужившия, / пророческим служением светло просиявшия, /
Серафимо и Марие блаженнии, / молите Бога Вышняго, / да ниспослет нам мир Свой и благословение, / и простит
вся наша прегрешения, / помилует нас и спасет души наша.
На небольшом Святошинском кладбище Киева, среди мраморных памятников и мощных чугунных решеток, в скромной
оградке, ныне покоятся великие подвижники Божии, блаженные старицы убиенная, расстрелянная фашистами в годы
войны, схимонахиня Серафима и схимонахиня Мария, гонимые за веру Христову, не имевшие «где главу приклонити».
Идут и идут сюда люди за помощью, слезно припадая к могилкам, а в дни особого поминовения и 29 июля ежегодно
совершаются торжественные панихиды при огромном стечении народа.
Еще при жизни матушка Серафима пророчествовала, что на ее могиле будет часовенка. И еще говорила: «Кто меня
будет помнить, и просить о помощи, тому помогу. Приходите ко мне на могилку». И это свое обещание блаженная
неуклонно выполняет и сегодня. Также и матушка Мария обещала никогда не забывать в загробной жизни тех, кто
прибегал при жизни, и будет прибегать по
кончине к ее молитвенной помощи. На просьбу одного из своих духовных чад Василия: «Матушка, не забывайте
нас!», - ответила: «Никогда не забуду!»
По благословению Блаженнейшего ВЛАДИМИРА, Митрополита Киевского и всея Украины.