Акафист преподобной и богоносной матери нашей Серафиме, чудотворице Мичуринской

Кондак 1
Избранная от матерних пелен Господом и яко старица, в миру подвизатися имущая, святым Амвросием Оптинским предуказанная, явилася еси Анатолия, Нектария и Исаакия преподобных преемница, сподобившися крещения и пострижения таинственнаго во время явления тебе бывшаго Игумении Пречистыя, восприемницею ти ставшия богоблагодатною, молися за ны недостойныя, просящыя тя о помощи и купно с чады твоими о Господе пети тебе хотящия:
Радуйся, святая блаженная чудотворице Серафимо, мати наша духовная.

Икос 1
Ангельскою чистотою издетска сияющи, даром пророческим прославилася еси, егоже еще отроковица сущи исперва людем являющи, девицу кроткую, доброты и вида не имущую, неизреченно возрадовала еси, супруга ея будущаго, Господом ей ниспосланнаго и в дом к ней внити имущаго предуказующи. Мы же уведевше в сем начаток служения твоего во благо ближняго тако поем ти:
Радуйся, земли Российския благодатное прозябение.
Радуйся, Руси Святыя новое украшение.
Радуйся, родителей благочестивых отрасле праведная.
Радуйся, прародителем твоим преставившымся блаженнаго упокоения ходатаице.
Радуйся, святаго Амвросия, старца Оптинскаго рождеством твоим возвеселившая.
Радуйся, преподобных ученик его чадо благословенное бывшая.
Радуйся, чистоту сердечную измлада соблюдавшая.
Радуйся, выну молитися возлюбившая.
Радуйся, верою несумненною и терпением Господеви угождавшая.
Радуйся, смирению и трудолюбию навыкавшая.
Радуйся, дивную прозорливость от юности твоея стяжавшая.
Радуйся, даром божественным сим грешник спасению послужившая.
Радуйся, святая блаженная чудотворице Серафимо, мати наша духовная.

Кондак 2
Видящи труды твоя рачительныя невознагражденныя, ихже на земли чуждей нужды ради крайния сродник твоих понесла еси, скорбела и унывала еси, отроковице богоблаженная, обаче материю твоею утешаемая, глаголом уст ея внимала еси и точию на Господа надеятися научалася, грехи и прегрешения ближним прощати с любовию навыкала еси, и всем напасти деющым благотворити по заповеди Христовой тщалася, выну взывающи: Аллилуиа.

Икос 2
Разума духовнаго ищущи, якоже елень на источники водныя ко Старцем Оптинским устремлялася еси, преподобная, у гроба Амвросиева помолитися и Анатолию, ученику его богомудрому, исповедание помышлений своих принести, и яко овца Христова, пастырей святых двойцу имущая, духом твоим на пажитях тучных возрастала еси, и от волков мысленных не окрадываемая, младоумию чуждая явилася еси, сего ради зовем ти:
Радуйся, к источнику воды живыя Господу Иисусу стремившаяся, и живот вечный обретшая.
Радуйся, жаждущи правды спасительныя, к служителем слова, в Оптине славней подвизавшымся, притекавшая.
Радуйся, почившаго авву твоего свято чтившая и благословения его исполнение с кротостию ожидавшая.
Радуйся, волю свою связавшая и в послушании старцем твоим, духом здравствовавшым, искренне пребывавшая.
Радуйся, помыслы непотребныя, суетныя и ложныя отсекавшая.
Радуйся, откровением их на исповеди демонския дерзости посрамлявшая.
Радуйся, советы подвижников многоопытных смолоду научаемая.
Радуйся, молитвами отец твоих духоносных спасаемая и ограждаемая.
Радуйся, в миру живущи иночествовати навыкавшая.
Радуйся, занятий мирских не гнушавшаяся и Богу, в Троице Святей славимому, благоугождавшая.
Радуйся, не точию освятившася, но и искусною в брани невидимей ставшая.
Радуйся, яко сама искушена бывшая, искушаемым помогати могущая.
Радуйся, святая блаженная чудотворице Серафимо, мати наша духовная.

Кондак 3
Силою благословения старческаго преоруженная, честнаго супружества крест восприяла еси, жено благодатная, и проречение Амвросия преподобнаго исполняющи, с любовию чадом твоим и супругу служащи, молитвою непрестанною подвизалася еси, церковь свою домашнюю праведно окормляющи, и в Оптину пустынь со тщанием прибегала еси, идеже плоды спасительныя послушания совершеннаго показующи, духом своим вселилася еси немолчно взывающи: Аллилуиа.

Икос 3
Имущи ходатаи и молитвенники твоя отцы преподобныя Анатолия и Нектария, нечаянныя радости явления Божия Матери сподобилася еси, из Оптины в Шамордино пешешествующи, и изволением Девы Пречистыя, пострижение твое в мантию и в великий ангельский образ благоловившия, святым чудотворцем Марии Египтяныни и Серафиму Саровскому тезоименитою быти назнаменовалася еси, сего ради от нас ныне слышиши:
Радуйся, в миру подвизавшаяся и в брачном соузе жившая, избранница Царицы Небесныя ставшая.
Радуйся, за послушание старцу святому твоему Анатолию из земныя обители в горнюю с телом чудесно возшедшая.
Радуйся, ангелы наставляемая, символы осквернения душ человеческих, яко древеса, молниею сожженныя, разселины земныя и тимение видевшая.
Радуйся, в образах земли расчищенныя и воды чистыя о прощении душ раскаянных и в страданиях своих Бога славящих Приснодевою вразумленная.
Радуйся, материю твоею почишею, в ограде обители небесныя тя сретившею, о предстоящем тебе духовном рождении извещенная.
Радуйся, Игумениею Святыя Горы Афонския, к купели приведенная и от Нея восприятая.
Радуйся, от скверны греховной омытая, со светильники, монахинями пред вама носимыми, во храм с Богородицею возшедшая и от руки иереевой постриженная, распятие Иисусово целовавшая.
Радуйся, душею твоею в ризу белу одеянная, на поклонение Господу вознесенная, и паки с телом соединенная, из чаши спасения причащенная.
Радуйся, заступничеством восприемницы твоея всенепорочныя мытарства прошедшая и от насильства бесовскаго освобожденная.
Радуйся, похвалу всепречистыя Марии Александрийской, блудницею бывшей, но подвигом покаяния освятившейся, яко безплотная ставшей и на воздусе молившейся, слышавшая.
Радуйся, удела Дивеевскаго Владычицею Саровскому Старцу врученная и иконою его, святынею твоею келейною ставшею, на небе благословенная.
Радуйся, с Нектарием старцем блаженным в скиту Оптинском молившаяся и посещением Богоматери купно с ангелы, Предтечею Спасовым и ангелоименным преподобным почтенная.
Радуйся, святая блаженная чудотворице Серафимо, мати наша духовная.

Кондак 4
Бурею гонений лютых, на церковь Русскую от безбожник воздвигнутых, испытуемая, со старцы святыми собеседования духовнаго лишилася еси, мати преподобная, обаче Марии Девы явления и откровения паки сподобившися, проповедница покаяния монашествующих, яко залога жития всенароднаго мирнаго и безмятежнаго стала еси, победы же оружия русскаго предуслышавши, молитвами воина непобедимаго святаго благовернаго князя Александра Невскаго одержаны быти имущыя, со гласом радования воспела еси: Аллилуиа.

Икос 4
Слышащи и видящи Богородица моление твое теплое, пред иконою Ея святою, Скорбящею именуемою, яко столп огненный возносимое, от глада избави внуки твоя, ещеже и кров для упокоения телеснаго тебе и от нашествия иноплеменник бегающым и не имущым где главы приклонити сродником твоим дарова, мы же и по ныне образу сему чудотворному благоговейно покланяющеся, сице ти зовем:
Радуйся, странствовашая со ужики твоими в годину бранную, образ Скорбящия Божия Матери на руку твоею державшая.
Радуйся, в скорбех твоих и нуждах молитвою преоружавшаяся и абие просимое улучавшая.
Радуйся, вечнаго пребывания горняго взыскующая, домашняго очага лишившымся и пристанища на землине имущым прибежище безопасное исходатайствовавшая.
Радуйся, постившаяся строго и жаждою ся томившая, от глада невольнаго и нестерпимаго мучимым брашно и питие подававшая.
Радуйся, николиже не унывавшая и спутники твоя многострадальныя утешавшая.
Радуйся, в спасении своем отчаявшыяся и о кончине мучительней ужасающыяся от зол, на них движимых, заступавшая.
Радуйся, на поле брани являвшаяся и от оружия смертоноснаго ограждавшая.
Радуйся, израненным воином жажду утолявшая и от опасности пленения их избавлявшая.
Радуйся, к молитвам древняго Невскаго чудотворца о победе воинства русскаго прошения твоя богоугодныя неленостно прилагавшая.
Радуйся, за землю нашу плененную и люди, под игом потомков псов-рыцарских и ливонских томившыяся, яко Иеремиа за иудеи пред Господом плакавшая и стенавшая.
Радуйся, к покрову Царицы Небесныя и земныя молитвенно обращавшаяся и дому Ея российскому, иноверными и неверными мучители разоряемому, помилования испрашивавшая.
Радуйся, во тме и сени смертней под игом гонителей сущым отраду богообщения и умиления молитвеннаго благожелавшая.
Радуйся, святая блаженная чудотворице Серафимо, мати наша духовная.

Кондак 5
Боготечная звезда показалася еси, преподобная, в Воронеж богоспасаемый возвращающаяся, идеже храм святителя и чудотворца Николая, богоборцами разрушенный, возсоздати потщалася еси, и церковь сию, во время оно кафедральным собором ставшую, аки солнце чудесы сияющею иконою твоею домашнею Взыскание Погибающих украсила еси, пред нею же Богомладенцу молящися, к Пречистей Матери руце сыновне простирающему, выну взывала еси: Аллилуиа.

Икос 5
Видя епископ Иона воронежский труды твоя ктиторския неустанныя и безукоризненныя, награду ти уготовал есть прилюдно хвалу тебе воздая, Мария же Приснодева, с кротостию неизглаголанною храминою нерукотворенною от Нея воплотившемуся Сыну Божию бывшая, сугубаго воздаяния небеснаго Христу Господу на земли послужившым ищущи, венец болезни терпения безропотнаго к венцу за труды, тобою понесенныя, тебе приложи, мы же поем ти:
Радуйся, святителями своими прославленнаго града Воронежа благотворительнице.
Радуйся, ко святым отцем нашым Митрофанию, Тихону и Антонию крепкая молитвеннице.
Радуйся, подвигом их дивившаяся и вере их чудодейственней подражавшая.
Радуйся, безбожники упраздненныя церкви и кафедры Воронежския возстановления свидетельнице и деятельнице.
Радуйся, войною губительною устрашенными гонители единаго на Воронеже храма открытаго зиждительнице и благоукрасительнице.
Радуйся, единыя разрешенныя в граде сем общины верных новыя первенеце и возглавительнице.
Радуйся, великаго Мирликийскаго архипастыря и чудотворца вселенскаго Николая сугубо почтившая.
Радуйся, с сотрудники твоими во славу имене его ревностно потрудившаяся.
Радуйся, иноплеменники разоренныя Свято-Никольския Воронежския церкви возобновительнице.
Радуйся, дарами молитвы действенныя, совета мудраго, чудотворения и утешения от Господа исполненная, благоуспешному храмоздательству послужившая.
Радуйся, явлением в молитвах и камне тобою славимаго чудотворца вознагражденная.
Радуйся, Пречистою Богородицею посещенная и на болезни терпение благословенная.
Радуйся, святая блаженная чудотворице Серафимо, мати наша духовная.

Кондак 6
Проповедница явилася еси, преподобная, милостей неизглаголанных, Господом и Богородицею верным подаваемых, имиже веру твою крепкую, любовь нелицемерную и праведность несумненную показующи, болящым и страждущым людем многажды испрашивала еси, и тако Богу, в Троице Святей славимому, угождающи, апостолом заповеданное друг друга тягот ношение и друг за друга подателю благ всяческих о исцелении молитися повеление на деле исполнила еси, научающи благодарственно пети Ему: Аллилуиа.

Икос 6
Возсияла еси в граде Мичуринске, преподобная, чудесы твоими и даром прозрения, имиже людей множество ко Христу привела еси, и яко старица благодатная их окормляющи, от козней лукавых духов ограждала еси, ещеже и немощи душевныя и телесныя исцеляла еси, чуждыя страдания и болезни себе усвояющи, ихже с терпением и кротостию переносила еси, душу свою за ближния полагающи, призри же и на ны, паки поющыя ти:
Радуйся, в Мичуринске всельшаяся, земли тамбовския крепость и ограждение ставшая.
Радуйся, яко в миру подвизавшаяся великая старица благодатная зде просиявшая.
Радуйся, всем приходящым к тебе с многоразличными скорбями и нуждами выну помогавшая.
Радуйся, изнемогающыя посещающая и силою Божиею, на тебе почивающею, укрепляющая.
Радуйся, верныя чада твоя духовныя, яко на руце своя принимавшая и о спасении их Господа умолявшая.
Радуйся, незнаемыя тобою, к тебе притекающыя, по имени глашавшая и сокровенныя пожелания их сердечныя ведевшая.
Радуйся, чудесы твоими неизреченными малодушныя уверявшая и верующым веру прилагавшая.
Радуйся, прозорливостию, Господом Богом тебе дарованною, ближния защищавшая и злыя посрамлявшая.
Радуйся, напасти бесовския, на чада твоя воздвизаемыя, провидевшая и молитвами, Богу и Богородице возносимыми, одолевавшая.
Радуйся, люди злочастныя, на Господа возстающыя, демоном служащыя и на верныя нападающыя, побеждающая.
Радуйся, о открытии храмов тамбовских и церкви мичуринския боголюбивыя, на всю Россию прославитися долженствующия, пророчествовавшая.
Радуйся, богоборцами отнятыя мощи святителя Питирима Тамбовскаго, вторицею обретены быти имущыя, верующыя извествовавшая.
Радуйся, святая блаженная чудотворице Серафимо, мати наша духовная.

Кондак 7
Хотящи жити в спасительнем послушании, игумену Серафиму (Мякинину), подвигом исповедническим во узах подвизавшемуся, и, общину тайную подвижниц монашествующих при храме своем руководствовавшему, в водительство духовное предалася еси, преподобная, и сподвижницею, ему равною, и сомолитвенницею ему стала еси, за благословение его старческое смертельно недугующыя воскрешающею, и иныя дивныя чудесы совершающи, совестию твоею покоилася еси, Господеви смиренно взывающи: Аллилуиа.

Икос 7
Новый источник откровений Божественных имуще в тебе чада твоя духовныя, пророчице преподобная, чистоте жития твоего дивляхуся, ведяще, яко смиренным рабом Христовым и сердцем очищенным точию, даруется сия благодать, польза же верными от нея обретаемая несумненная, телесная и душевная, радостию в сердце твоем растворяшеся, сеяния бо бесовския видела еси изсыхаемыя и плевелы сожигаемыя скверны и нечистоты, сего ради приими сицевыя хвалы:
Радуйся, искушаемыя от демонскаго стужения со властию избавлявшая.
Радуйся, чада твоя о Господе возлюбленныя целомудрием исполнявшая.
Радуйся, меру подвигом всякаго из них знавшая и от прелести вражия их сохранявшая.
Радуйся, ленящыяся к деланию побуждавшая, самочинныя же делатели укорявшая.
Радуйся, тайным и явным иноком и инокиням многополезная наставнице и путеводительнице.
Радуйся, рабом Божиим, в девстве и чистоте в миру живущым, охранительнице.
Радуйся, людем, в браке сущым, молитвами и советами помогавшая и на чадородие благословлявшая.
Радуйся, дети, ими рожденныя, родителя своя чтити научавшая и слушати их наставлявшая.
Радуйся, заблуждшыя прозорливо вразумлявшая и на спасения стези обращавшая.
Радуйся, пути своего ищущым и обрести не могущым волю Божественную открывавшая.
Радуйся, иныя подвижники и подвижницы прозорливыя от Духа Свята ведевшая и почитавшая.
Радуйся, яко угодница Христова ими любимая и яко сестра им бывшая.
Радуйся, святая блаженная чудотворице Серафимо, мати наша духовная.

Кондак 8
Странное чудо являеши, преподобная, землю тамбовскую освящающи и зде живущыя люди явлении твоими, советы и чудесы от бед и напастей всяческих ограждающи, имаши бо по дару Христову якоже святый Николай чудотворец и блаженная Ксения Петербуржская дерзновение велие моления страждущих предваряющи бедствующым скоро помогати, да молитвами твоими от мучительства диаволя избавление нечаянное приемлюще, Богу благодарственно вопиют: Аллилуиа.

Икос 8
Вся о Господе всем пребыла еси недоумевающыя вразумляющею, скупящыяся ущедряющею, обидимыя заступающею, скорбящыя утешающею, недугующыя врачующею, разслабленныя утверждающею, чады и матери, безвременно умирающыя, воскрешающею, да Христу Богу нашему их приобрящеши, не презри же ныне и ны, сице поющыя ти:
Радуйся, премилостивая мати, промышления о людех приятелище.
Радуйся, мати пречудная, чудес Христовых наследнице.
Радуйся, мати прещедрая, тя призывающым помогающая.
Радуйся, мати благосердая, прошения о помощи предваряющая.
Радуйся, мати пресладостная, скорбящым попечение приятное.
Радуйся, мати предивная, быстрое нищих услышание.
Радуйся, мати преславная, требующым подающая благостроение.
Радуйся, мати предобрая, нуждающымся уготовляющая изобилие.
Радуйся, мати прелюбимая, бедне живущым богатство Богом данное.
Радуйся, мати пребогатая, убогим воздвижение скорое.
Радуйся, мати пресильная, безнадежным надеяние.
Радуйся, мати прекрепкая, отчаявшымся спасение.
Радуйся, святая блаженная чудотворице Серафимо, мати наша духовная.

Кондак 9
Всякому притекавшему к тебе яко к старице с печали своими и радости: седины убеленному и юному, простому и знатному, убогому же и богатому сердечно сорадовалася и сострадала еси, мати преподобная, и всем подавала еси единое наставление, егоже и ныне любящым тя и помнящым вослед Златоусту внушаеши: в скорбех своих и веселии, избыточестве и лишениях Господеви приносити молитву благодарения: Аллилуиа.

Икос 9
Ветийству чуждии недоумеваем, како еще прославити песньми и пении духовными подвиги и труды твоя, преподобная, имиже Господу Богу нашему благоугодила еси, и точию любовию и благодарении понуждаемии уста нашя косныя отверзаем есмы, дабы умом младенствующе истину о тебе возглаголати не нашими слабыми, а Господом даруемыми и из глубины сердец исходящими словесы, сего ради не возгнушайся нас грешников, паки и паки поющих ти:
Радуйся, избраннице Божия и Божия Матери.
Радуйся, пустыни Оптинския воспитаннице.
Радуйся, отец ея преподобных послушнице.
Радуйся, старцев великих преемнице.
Радуйся, благодатию Духа Святаго осиянная.
Радуйся, Христовою любовию преисполенная.
Радуйся, именем Иисусовым демоны прогонявшая.
Радуйся, с небожители видевшаяся и общавшаяся.
Радуйся, в смирении и терпении о Господе спасавшаяся.
Радуйся, и рабом Его верным спасению послужившая.
Радуйся, душевныя и телесныя немощи безмездно лечившая.
Радуйся, душею и телом умершыя духовно воскрешавшая.
Радуйся, святая блаженная чудотворице Серафимо, мати наша духовная.

Кондак 10
Спасения души твоея взыскующи, мати наша преподобная, любовию благодатною возгорелася еси, и спасения ближним твоим возжаждавши, молитвы ко Господу возносила еси, прощения грехов им испрашивающи, и веры колеблемыя умножения, ещеже и богопознания опытнаго стяжания всем желающи, в единаго Бога истиннаго, в лицах триех славимаго, уверовавших, достойно хвалити и превозносити Отца, и Сына, и Духа Святаго учила еси, поюще Ему: Аллилуиа.

Икос 10
Стену необориму тя имамы, преподобная, и ходатаицу неусыпающую за ны, недостойныя, молишибося Творцу и Зиждителю и Богу нашему, и честным своим омофором нас покрывающей Приснодеве Марии Богородице о избавлении нас от враг видимых и невидимых, и заступлении от стужения демонскаго и всяческих зол, ещеже души нашя и телеса очищающия благодати Божественныя нисхождения испрашиваеши, и тако для вечности блаженныя уготовляеши, и подвигаеши благодарственно пети ти:
Радуйся, Господа Бога всем сердцем, и всею душею, и всем разумением твоим возлюбившая.
Радуйся, и к ближним своим любовь стяжавшая, людей множество ко Христу обратившая.
Радуйся, Господом заповеданныя простоты детския и веры чистыя образ показавшая.
Радуйся, согрешивших к покаянию призывавшая и Спасителю мира о прощении их молившаяся.
Радуйся, Царицу Небесную о исправлении кающихся и от работы вражия упразднении непрестанно просившая.
Радуйся, от мести лукаваго и вреда его душепагубнаго люди православныя сохраняющая.
Радуйся, безумствующым чародеям и ворожеям пакости человеком и скотом деяти воспрещающая.
Радуйся, неверным обижаемыя чада твоя о Господе заступающи, злобствующыя умягчающая и неистовствующыя усмиряющая.
Радуйся, жен честных, в миру неленостно потрудившыхся, при храме Божием Господу послужити благословлявшая.
Радуйся, ко иночеству пригодныя о предстоящем им пострижении пророчески извещавшая.
Радуйся, мужей благочестных к священству располагавшая.
Радуйся, иереи благоговейныя почитавшая и от гонений и притеснений молитвенно ограждавшая.
Радуйся, святая блаженная чудотворице Серафимо, мати наша духовная.

Кондак 11
Пение хвалебное Господу выну совершающи, молитвенное трезвение стяжала еси, старице преподобная, семуже и пощение строгое соблюдающыя чада твоя монашествующыя научала еси, и тако мужи и жены, во ангельстем чине подвизающыяся, вдохновляла еси не точию при пострижении обещати, но и на деле обещанное исполняюще, молитися непрестанно, Господа Бога славяще, и токмо Ему Единому в Троице Святей покланятися, со ангелы вопиюще Ему и взывающе: Аллилуиа.

Икос 11
Светоприемную свещу по себе оставляющи, чадо твое возлюбленное, мужу блаженному тезоименитое, отцем своим духовным избрала еси, от егоже руки и пострижения в схиму великую сподобилася еси, равноангельское жительство провождающи, и яко пламень огненный, от раздаяния не умаляющийся, любовь двуединую к Богу и людем в преемнике твоем благодатном возжгла еси. За сие же и похвалу сицевую приемлеши:
Радуйся, жено великая, старчества оптинскаго розго плодовитая.
Радуйся, от постриженника почаевскаго, последними глинскими подвижники в схиму облеченнаго, великий ангельский образ восприявшая.
Радуйся, к отцам преподобным Севастиану Карагандинскому и Андронику Глинскому чада твоя на благословение и дары своя посылавшая.
Радуйся, от прозорливыя насельницы Свято-Введенския киевския обители схимонахини Евфросинии на гробе Господнем освященный наглавник схимнический приемшая.
Радуйся, Свято-Троицкия Сергиевы лавры духовника богомудраго и боголюбиваго Тихона архимандрита сиянием святости твоея и силою пророческою удивившая.
Радуйся, дщери его о Христе параман вручившая и пострижение тайное в день чествования Тихфинския иконы Богородицы предсказавшая.
Радуйся, всемощными твоими молитвами ко Господу страдальцы слепотствующыя зрячыя сотворившая.
Радуйся, больныя, от рака тающыя, врачами оставленныя и смерти своея ожидающыя, многажды исцелявшая.
Радуйся, яко орлица, в небе высоцем парящая, птенцы своя назиравшая.
Радуйся, питавшая их наставлении твоими и молитвами, яко крылами, покрывавшая.
Радуйся, младыя чадца твоя о Господе от насилия и растления охранявшая.
Радуйся, в подвигах помыслов откровения и послушания души их очищавшая и закалявшая.
Радуйся, святая блаженная чудотворице Серафимо, мати наша духовная.

Кондак 12
Благодатию Духа Святаго исполненная, духом веселилася, преподобная, болезнию же предсмертною измождаемая и жаждою мучимая, людем, в последния дни на земли пребывати, и жаждати, и алкати имущым от неурожаев и засухи, сострадала еси, о времени жатвы страшныя душ человеческих пророчествующи, обаче с Иовом Многострадальным волю Божию спасительную, благую и совершенную славяще, сама непрестанно взывала и всех воспевати учила еси: Аллилуиа.

Икос 12
Поюще твое праведное преставление и славное престолу Божию предстояние, восхваляем тя, старице преподобная, яко имаши дерзновение велие страждущым помогати, моления твоя теплыя от избавлении их и исцелении Богу приносящи, и Приснодеве Марии подражающи, на земли являешися, в опасностех сущыя невредимы сохраняющи, ещеже и знаменьми чудесными, на гробе твоем совершающимися, подобно тебе ревностно подвизатися видящия их и слышащиыя о них располагаеши, сего ради и славословия таковыя приемлеши:
Радуйся, подвигом добрым подвизавшаяся и веру соблюдшая, течение живота своего непостыдно и мирно скончавшая.
Радуйся, Господу и Спасителю нашему, на престоле славы сидящему, поклонившаяся и яко раба Его верная в Раи учиненная.
Радуйся, во время живота твоего земнаго Господа Бога славившая, ныне славящая и в безконечныя веки веком со ангелы и святыми славити имущая.
Радуйся, за православныя людстие молитву Иисусову творившая непрестанно и ныне Отцу, и Сыну, и Духу Святому неустанно о нас молящаяся.
Радуйся, якоже апостол Павел глагола, зерцалом в гадании Божественное на земли ведевшая, ныне же лицем к лицу зрящая и ясно разумеющая.
Радуйся, Пресвятую Владычицу нашу Богородицу многажды на земли видевшая и сладости лицезрения Ея в Божественным светом сияющем мире горнем сподобившаяся.
Радуйся, славы человеческия при жизни твоей избегающи, знаемым и ближним твоим точию дивными чудеся помогавшая.
Радуйся, Господом Вседержителем ныне прославляемая, не знавшым тя лично и далече сущым являющаяся и вспомоществующая.
Радуйся, душею на небеси сияющи, свещами невещественными, во очию приходящих на могиле твоей горящими, свыше знаменуемая.
Радуйся, мощами твоими во гробе покоившаяся, теплом благодатным, и в зимнюю стужу от них исходящим, проталину чудотворящую в снегу соделавшая.
Радуйся, в еще не закрытую сухотинскую Знаменскую обитель святителем Питиримом, к тебе со дщерию твоею, тяжко болевшею, яве пришедшим и у раки мощей своих елеем ея помазавшим и исцелившим, введенная.
Радуйся, обитель сию, ныне возобновленную, молитвенною, а не работною именовавшая, и прославления твоего ради обретенными останками твоими многоцелебными зде водворитися обетовавшая.
Радуйся, святая блаженная чудотворице Серафимо, мати наша духовная.

Кондак 13
О блаженная мати Серафимо, Богу истинному искренне послужившая и Пречистей Деве Марии Богородице благоугодившая, всеславных старцев Оптинских чадо благословенное бывшая и преемницею достойною им ставшая, прозорливостию, чудотворении и исцелении свыше прославленная и от человек благодарных пред всеми свидетельствуемая, моли Бога Вышняго Святую Троицу Отца, и Сына, и Святаго Духа Господа о исполнении прошений наших и согрешений наших прощении, да и мы с тобою сподобившеся блаженнаго упокоения, выну поем Ему: Аллилуиа.
Трижды, затем Икос 1 и Кондак 1

Молитва
О преподобная и богоносная мати наша Серафимо, Тамбовская и Мичуринская чудотворице и похвало! Ты ныне на небеси блаженствуеши, мы же долу на земли пребывающе, страдаем есмы, томимся и претыкаемся. Спасения же душ наших, грехов и страстей своих ради отщетившеся, к грешником нераскаянным грозному, единому судии праведному, Господу и Спасителю нашему молитися не смеем, ниже решаемся. Сего ради просим тя, блаженная старице: буди наша ходатаица, и неотступно молися Отцу, и Сыну, и Духу Святому Богу нашему, да помилует ны, рабы своя непотребныя и безответныя.
Ведуще же, что врачества для души ниспосылаются разныя, просим тя: горечь их услади молитвами твоими богоприятными, и милостивно испроси нам смирение должное и терпение. Буди всем нам в болезнех, за грехи наши попущенных, утешительница любвеобильная и скорая целебница, ещеже и ревность о подражании подвигом твоим добрым исходатайствуй.
Ей, жено святая и богомудрая, споручнице грешным и погибающим взыскательнице Приснодеве Марии Богородице и Господу Вседержителю верно послужившая, испроси нам прощение и спасение, ихже туне: не по делом нашим, но по вере нашей и благодати Духа Святаго сподобившеся, в песнех величаем Царицу нашу Небесную и Богу, в Троице Святей славимому, благодарственно поклоняемся в безконечныя веки веков, аминь.

Тропарь, глас 2
Возсияла еси, преподобная Серафимо, в граде Мичуринске/ чудесы твоими и даром прозрения, / имиже людей множество ко Христу привела еси, / и яко старица благодатная окормляющи, / от козней демонских ограждала еси, / и немощи душевныя и телесныя исцеляла еси, / душу свою за ближния полагающи, / призри же и на ныне молящыяся ти// и просящыя тя о помощи.

Кондак
Избранная от матерних пелен Господом/ и яко старица, в миру подвизатися имущая, / святым Амвросием Оптинским предуказанная, / явилася еси Анатолия, Нектария и Исаакия преподобных преемница, / сподобившися крещения и пострижения таинственнаго/ во время явления тебе бывшаго Игумении Пречистыя/ восприемницею ти ставшия блгоблагодатною, / молися за ны недостойныя, просящыя тя о помощи/ и купно с чады твоими о Господе пети тебе хотящыя: /
Радуйся, блаженная чудотворице Серафимо,// мати наша духовная.

Сайт создан в системе uCoz