Акафист святому мученику, благоверному великому князю Сергию

Кондак 1
Избранный от рода венценоснаго, благоверный великий княже Сергие, в годину смут и нестроений от врагов Престола, и Церкви Христовой смерть лютую приявый, и дерзновение велие ко святей Троице стяжавый, поминай и ны во святых твоих молитвах, славящих благочестивое житие твое и кончину мученическую и вопиющих ти сице:
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Икос 1
Ангелов сонмы непрестанно славословят Предвечнаго Царя Небеснаго, с ними вкупе и ты, святый благоверный великий княже Сергие, присно ликуеши, яко богоугодным житием и всепобедным страстотерпчеством просиял еси на земли. Ныне же купно со всехвальными святыма сродниками твоима и собором монархов праведных, предстояще пред престолом Вседержителя, молишися за ны, величающих тя сице:
Радуйся, всем житием твоим и подвиги сокровенныма Господеви угодивый!
Радуйся, в поселениях Христовых выну усердно ходивый;
Радуйся, всякима добродетели боголюбезныма душу твою украсивый;
Радуйся, высокий образ благочестия и ревностнаго служения в житии твоем явивый;
Радуйся, за истину Христову от богоборец убиение лютое приявый;
Радуйся, яко ныне за чтущих тя пред Спасителем предстательствуяй;
Радуйся, на пути спасительныя наставление;
Радуйся, о делех земных благоугодное попечение;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 2
Видевше в летах детства твоего, святый Сергие, благочестие и любы к Богу и ближнему, терпение невзгод и болезней, усердное делание молитвенное прехвальныя матери твоея, благочестивыя царицы Марии Александровны, ея добродетелем последовал еси во всем житии твоем; ныне же во славе купно с нею предстоиши Царю царей м молишися о всех святую память вашу чтущих и Господеви о вас с благодарностию вопиющих: Аллилуйя!

Икос 2
Разумеем, яко многая великая и преславная дарова ти Всемудрый Господь Наш, святый благоверный великий княже Сергие, яко ти бо, Предтече подобящеся, освещен бе благодатию Божиею еще в лоне сый матери твоея, иже в ожидании рождения твоего священное миропомазание и венчание на царство прия, яко во благочестии, чистоте, богомыслии, молитве и служении людям прошел еси подвиг земнаго жития и яко мученически завершил еси е, яко велию славою увенчан был еси на небесех. Сице молим тя: не забуди и ны, во молениях твоих ко Троице Святей, да зовем ти сице:
Радуйся, Отца Безначальнаго и Вековечнаго всем житием прославивый;
Радуйся, Спасителю крестным путем смиренне последовавый;
Радуйся, правду Евангелия Христова в земном служении твоем утверждавый;
Радуйся, и нас верными последователями Сына Божия бытии сподобляяй;
Радуйся, животворящую силу Духа Святаго к нам приклоняй;
Радуйся, раны сердечныя и страсти душевныя скоро врачующий;
Радуйся, омраченныя умы светом истины Божией выну озаряющий;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 3
Силою и благодатию Духа Святаго укрепляемый, движимый и благословляемый, святый и благоверный великий княже Сергие, от дней юности твоея ревностно и усердно послужил еси Государям боговенчаным и народу всероссийскому, правду Божию непрестанно утверждая. Мы же ныне, вспоминая и величая добрыя дела твоя, прославляем Отца Небеснаго, благ всяческих Подателя и вопием Ему: Аллилуйя!

Икос 3
Имуще в сердце твоем любы велию ко Иисусу Сладчайшему, благоверный княже Сергие, благима желание твоима движимый, купно с собратом и сродником твоими, князем благочестивым и богомольным Константином, посетил еси Святую Землю, идеже Сам Спаситель чудеса сотвори и жало смерти вечныя порази; а послеже и паломником русстим путь в Земный Иерусалим устроял еси. Сице молим тя: купно со святыма и праведныма сродники твоима вознеси молитвы твоея ко Божественному Искупителю Нашему, да приведут земныя путие нас ко Иерусалиму Небесному. Сего же ради с надеждою вопием ти сице:
Радуйся, очеса наша к зрению воли Божией отверзающий;
Радуйся, ушеса наша к услышанию глаголов Христовых чуткима быти сотворяющий;
Радуйся, длани наша к творению дел милосердия направляющий;
Радуйся, нози наша на стези закона Христова поставляющий;
Радуйся, паломников стяжати благоволение Спасово научаяй;
Радуйся, от сует сует и празднословия всех нас исцеляяй;
Радуйся, миром и благостию сердца наша наполняющий;
Радуйся, плевелы ненависти и сомнений огнем благодати Божия испепеляющий;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 4
Бурю испытаний тяжких и сомнений мучительных силою веры твоея победил еси, богоблаженне княже Сергие, яко выну на Христа, Победителя смерти, упование твое возлагал еси, Ему же и моления горячие во уединении возносил еси, Ему же всеусердно послужил еси на всех поприщех святаго жития твоего, Ему же и ныне во славе со мученики купно предстоиши и взываеши: Аллилуйя!

Икос 4
Слышавше глаголы апостола первоверховнаго, «не сообразуйтеся веку сему, но преобразуйтеся обновлением ума вашего», дабы разумети волю Божию, угодную и совершенную [Рим 12:2], сему преусердно поревновал и последовал еси, богомудрый княже Сергие, яко выну искал еси токмо правды Божия и ею же все житие твое исполнил еси. Сему же и нас настави, да зовем ти сице:
Радуйся, пред памятию Преображения Господня сугубое благоговение имевый;
Радуйся, на горе Фавор моление Христу усердное сотворивый;
Радуйся, источником милости, света и радости ближним и дальним твоим бывый;
Радуйся, и нас милостивыма и мудрыма бытии сотворяющий;
Радуйся, от лукавства и прельщений вражеских ны удаляющий;
Радуйся, в разумении путей духовных ны взращающий;
Радуйся, в уповании на Милосердие и Всемогущество Спасителя утверждение;
Радуйся, от тлетворных сомнений и кривомыслия благодатное исцеление;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 5
Богоугодному житию святаго Сергия Радонежского усердно подражающе и последующе, благоверный великий княже, яко и святый твой покровитель, радел еси о торжестве правды Божией в державе российстей, о исполнении заповедей Евангельстих в каждодневном житии, о просвещении народа нашего во истине Христовой, сице молим тя, святый княже, купно со аввой Сергием вознеси молитвы твоея, да дух ревности о славе Божией, дух мира, любви и благочестия николиже да не оскудеет в нас, взывающих ныне Господеви: Аллилуйя!

Икос 5
Видевше праведное житие твое и велию любы твою ко Господу, благочестивая принцесса гесенская Елизавета, остави отчизну твою и преселися в державу российскую, идеже с тобою, благочестивийший княже, в любве, согласии и целомудрии поживе; тобою бо просвещаемая и вдохновляема, веру прия Православную, а послеже и святости достиже. Мы же, воспевая святость вашу, угодницы Божии царственныя Сергие и Елизавето, просим тя, благоверный княже, паки о заступничестве пред Господем, увенчавшим тя с супругою купно диадимами нетленными, и взываем ти сице:
Радуйся, прежде искати царствия Божия научаяй;
Радуйся, выну творити дела добрыя сподвигаяй;
Радуйся, от теплохладия и веры оскуднения ны исцеляяй;
Радуйся, согласие и миролюбие нам даруяй;
Радуйся, от сомнений и преткновений на пути Божием ны удаляяй;
Радуйся, от глубин греховных к высотам духовным возводяй;
Радуйся, ревностию по Бозе и благою решительности ны наполняяй;
Радуйся, молящихся тебе дарами Духа Святаго обогащаяй.
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 6
Проповедник и ревнитель любве деятельныя ко всякому нуждающемуся и обременному воистину явился еси, многомилостивый княже Сергие, егда волею благовернаго императора Александра Третияго служение наместническое приял еси во первопрестольнем граде Москве, идеже благоизволению святаго сердца твоего следуя, многим преусердно благотворил еси, мнозих бо от бед и падений оберегл еси, иным же вспоможение даровал еси; сего ради благочестивыя людие московстии о тебе радостно воспеваша Вседержителеви: Аллилуйя!

Икос 6
Возсиял еси, богомудре Сергие, дарованною ти благодатию Господнею, наставлением пророка царственнаго внимая, яко токмо Богом царие царствуют, а правители правду устрояют, все упование твое на Всемогущаго Творца Нашего возложи, и Им же движимый и укрепляемый, по словеси апостольскому всем вся был еси. Мы же, сия ныне убо воспоминающе, просим тя: укрепи слабые души наши в надежде и вере, яже к Богу, любве и милосердии, яже к ближнему, приими милостливо величания сия:
Радуйся, в Бозе токмо утешение искати ны сподвигаяй;
Радуйся, Его благость к страждущим душам нашим неустанно приклоняяй;
Радуйся, благим примером жития твоего воодушевляяй;
Радуйся, доброделем твоим следовати всех нас сподвигаяй;
Радуйся, кротостью и смирением твоим преславно обогащаяй;
Радуйся, милость и правду в судех господствовати сотворяяй;
Радуйся, от лжи и жестосердия начальствующих исцеляяй;
Радуйся, власть имущих духом ответственности преображаяй;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 7
Хотяще нам величати и славословити святую память твою и благодатное заступничество просим тя, святый великий княже Сергие, благодатию ти от Всемогущаго Бога данною, очисти сердца наша ото всякия скверны греховныя, от недоверия Господеви, от страха пред неизвестностию и боязни испытаний грядущих, да тобою вразумляемы, укрепляемы и направляемы, возможем еще на земли Царю Небесному [во умилении] возносити песнопение ангельское: Аллилуйя!

Икос 7
Новый благочестивый и богомудрый Иоанн Калита воистину явился еси святый Сергие во граде Москве, идеже во благо людей русских велия труды подъял еси и о людех труждающихся сугубое попечение сотворил еси. Ныне же молим тя: не остави без покровительства твоего град сей и всех, в нем сущих и нас благослови, да зовем ти сице:
Радуйся, истинныя премудрости исполненный;
Радуйся, благодатию Духа Святаго озаренный;
Радуйся, милосердия неисчерпаемое сокровище.
Радуйся, ищущим спасения готовый споспешниче.
Радуйся, милостивый скорбящим помощниче.
Радуйся, обилием любве твоея вся удививый и многия друзи себе стяжавый.
Радуйся, правыя веры и добродетелей ревностный насадителю;
Радуйся, суеверий и пороков мужественный искоренителю;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 8
Странно есть людем маловерным видети взорем духовным тя, угодниче Христов, во славе небесней купно со святыма твоима сродники предстоиши Иисусу Христу, и со царие Николаем Вторым и Павлом-страстотерпцем, царицею Александрою, великою княгинею Анастасиею Киевскою, царевнами – мученицами и наследником Алексеем и иныма князи и царии благоверными молишися Святей Троице, да помилует страну российскую, от безбожия очистит ю, да воспоют людие русстие Творцу Своему песнь покаяния за грехи своя и отцев своих глаголя Богу с надеждою: Аллилуйя!

Икос 8
Весь исполнен сый веры и надежды, святый благоверный великий княже Сергие, по Завету Евангельскому, аще кто хочет «вящий быти, да будет всем слуга» последовал еси, разумея, яко правитель повинен не принимати служение токмо, паче сам же со смирением и самоотречением служити всем насельникам державы своея; сего ради и мы величая тя, просим: вкорени в душах наших братолюбие и мудрость, да зовем ти сице:
Радуйся, от греховнаго самолюбия души наша преславно исцеляяй;
Радуйся, милосердию и истинней любве к ближнему ны наполняяй;
Радуйся, выну памятовати о христианстем долзе научаяй;
Радуйся, служити страждущим, елико можемы, сподвигаяй;
Радуйся, подлинною ревностию о делех ближних ны обогащение;
Радуйся, от лицемерия и теплохладия врачевание;
Радуйся, властем предержащим служити людем понуждение;
Радуйся, богатых к благотворению преизрядное направление;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 9
Всякому человеку, иже взыва к тебе во дни земнаго жития твоего благотворил и вспомоществовал еси, святый Сергие; ныне же во славе сый, предстоиши пред престолом Спасителя и помощи твоея не лишаеши всех, чтущих святую память твою и с благодарностью вопиющих прещедро милующему ны по молитвам и предстательству святых своих Вселенныя Царю и Искупителю Нашему: Аллилуйя!

Икос 9
Витийствующий язык не возможет достойно и справедливо изрещи и воспети всю полноту богоугоднаго жития твоего, святый благоверный великий княже Сергие, ибо не того, кто в силех и мудрости есть, дабы по достоянию восхвалити добродетели твоя христоугодныя, подвизи благочестия и служения твоего Вере Православней, Царем Боговенчанным и Отечеству возлюбленному нашему. Кто бо возможе добропобедное страстотерпчество твое превознести, кто восславит чудеса твои и помощь благодатную. Обаче на милость твою к нам уповая, воспеваем ти сице:
Радуйся, благословение Божие к народу российскому приклоняяй;
Радуйся, ум наш от суеты к горнему миру возводяяй;
Радуйся, идолы духовныя наша, яки прах попирающий;
Радуйся, светом богомудрия все житие наше озаряющий;
Радуйся, от пристрастий и треволнений ны исцеляющий;
Радуйся, выну во Христа облекатися назидающий;
Радуйся, любовию и благоговением пред Спасителем ны наполняющий;
Радуйся, славословию и ревностному благодарению наставляющий;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 10
Спасительный твой подвиг совершая, преподобных житию сокровенно последовал еси, святый княже. Обличен сый славою, честию и властию, выну памятовал еси, яко служитель Господень еси, и токмо Спасителю Сладчайшему чадом Его повинен еси служити; и тако от скверны страстей тщеславия и идолобесия душу твою чисту сохранил еси и благодатию ю напитавше, Небесному Цареви неустанно воспевал еси: Аллилуйя!

Икос 10
Царя Небеснаго служитель верный и монарха благовернаго земнаго сродник и соработник благий был еси, о благоверне Сергие; сего ради от богоборец злочестивых покушения многочисленныя и убиение лютое претерпел еси, за истину Христову и веру Православную живот свой положивши. Сего ради увенчан был еси на Небесех Всемогущим Господем Нашим, Его же милосердие к нам , маловерным и страждущим, приклони, да тебе, преславному заступнику и покровителю нашему, воззовем сице:
Радуйся, ангелы святыма ко Отцу Небесному вознесенный;
Радуйся, в лице мученичестем Богом вчиненный;
Радуйся, о благах духовных с ними купно предстательствуяй;
Радуйся, упования наша непреложныма быти сотворяяй;
Радуйся, омраченная очеса и сердца народа просвещаяй.
Радуйся, провозвестниче Благодати, сумнящихся в вере словом Божиим утверждаяй.
Радуйся, благолепия церковнаго усердный рачителю.
Радуйся, добрых нравов и любве к Богу и ближним насадителю.
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 11
Пение благодарственное возносим ти, святый княже, яко ты выну на Всемогущаго Господа уповал еси, и Егоже милостию и силою движимый, восходил еси по лествице добродетелей христоугодных; сице просим тя: укрепи предстательством твоим слабеющую волю и угасающую любы нашу; веру преобрази и плодоносною ю быти сотвори; да возможем купно с тобою и ангелы воспевати во веки Господеви: Аллилуйя!

Икос 11
Свет Нетварный созерцаеши ныне , святый страстотерпче благоверный великий княже Сергие; мы же не дерзаем по достоянию возглагати хвалу тебе, обаче уповаем на твое к нам милосердие и просим убо тя: купно с супружницею твоею, преподобномученицию Елизоветою и святыма сродника твоима вознеси молитвы за ны Триипостасному Богу Нашему и благосклонно прими возносимые ти похвалы сия:
Радуйся, благословенныя династии Романовых прехвальное украшение;
Радуйся, истины Христовой в державе нашей благодатное утверждение;
Радуйся, немощей душевных и телесных целителю скоромилостивый.
Радуйся, нераскаянных грешников из глубины погибели изымаяй.
Радуйся, в несении креста всех ны укрепляяй;
Радуйся, от ропота и сомнений исцеляяй;
Радуйся, за вся Христа благодарити ны научаяй;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 12
Благодать молитися и предстательствовати за ны обретый у Возлюбленного тобою Господа Нашего, святый княже Сергие; сице просим тя: исполни во благих прошение наша, испроси благоприятныма молитвами твоима вся благая и полезная душам нашим, паче же оставление согрешений наших, да со умилением сердца выну Господеви поим: Аллилуйя!

Икос 12
Поюще многая твоя чудотворения угодниче Божий, благоверный святый княже Сергие, молитвенно совершаем святую память твою, яко торжество веры Христовей, в нейже бо процветают толицы угодницы и заступницы, сильные пред Богом предстательством своим и благодеющии бедствующим и болящим человеком свыше данною им благодатию, юже к тебе добре ведуще, святче Божий, от благодарных устен сице тебе зовем:
Радуйся, яко исповеда Тя Христос пред Отцем Своим Небесным.
Радуйся, яко и пред ангелы Своими Господь сил прослави тя.
Радуйся, Деву Богородицу с лики сил небесных воспеваеши.
Радуйся, на небеси присно торжествуяй.
Радуйся, на земли преславно чудодействуяй.
Радуйся, Божественныя истины усердный проповедниче;
Радуйся, оправданий Господних немолчный провозвестниче;
Радуйся, веру во Благих Промысел Божий в сердцех наших пресловно обновляяй;
Радуйся, святый благоверный великий княже Сергие, (всеблагомощными) молитвами твоими милосердие Божие к нам приклоняющий!

Кондак 13
О святый благоверный великий княже Сергие, страстотерпче богоносный и добропобедный, приими милостивно от нас сие малое и приносимое ти моление и твоима молитвы у Престола Божия утверди в стране нашей мир и благочестие: Церковь Православную сохрани от ереси и раскола, престол монархов боговенчанных востави нам скоро, всех же христиан огради от враг видимых и невидимых, от неверия и развращения, от бед и скорбей, да благодарне суще, купно с тобою возможем во веки Спасителю Нашему воспевати: Аллилуйя!

Автор акафиста Евгений Владимирович Храповицкий

Сайт создан в системе uCoz