АКАФИСТ преподобному Симеону Новому Богослову
Одобрено Издательским Советом Русской Православной Церкви для келейного чтения

Кондак 1
Избранный любителю небесныя мудрости и предивный богослове Христов, скорый помощниче в учении и молитвенниче наш, преподобне отче Симеоне! Величающе прославльшаго тя Господа, в песнех восхваляем тя с любовию. Ты же, имея велие дерзновение ко Господу нашему Иисусу Христу, от тьмы неведения, от всяких нас бед свободи, зовущих: Радуйся, преподобне отче Симеоне, Новый Богослове.

Икос 1

Ангелов и человеков Творец избра тя изначала, да прославиши житием твоим пречудное имя Святыя Троицы, явился бо еси воистину Ангел на земли: яко луч пресветлый вечнаго Солнца Правды, просветися житие твое. Мы же, зряще прехвальныя иноческия и богословския труды твоя, с трепетом, благоговением и радостию глаголем ти сицевая:
Радуйся, правило веры православныя и наставниче благочестия;
радуйся, того ради удостоивыйся длительнаго безчестия.
Радуйся, преславное учителя твоего величание;
радуйся, претихое скорбным в гонениих утешение.
Радуйся, живущим в мире присное вразумление;
радуйся, прелюбимое иноков наставление.
Радуйся, всем жаждущим правды Божия научение;
радуйся, всем православным людем просвещение.
Радуйся, преподобне отче Симеоне, Новый Богослове.

Кондак 2
Видя Господь, преподобне отче Симеоне, сердца твоего расположение к небесному, приведе тя к старцу Симеону Благоговейному, егоже до конца жития твоего преданно почитал еси, знаменуя преданностию к учителю велию любовь твою к распеншемуся за ны Христу Богу, Емуже вси со умилением зовем: Аллилуия.

Икос 2
Сердце чисто тебе даровася, святче Божий: от юности твоея не престая уклонятися от мира сего, не долго учился еси земным наукам, но возлюбил еси поучения святаго старца Симеона, Царствия Божия ради и света Христова. Сего ради приими от нас похвалу сию:
Радуйся, Пафлагонии древния чадо богоизбранное;
радуйся, родителей именитых отрасле пречестная.
Радуйся, от юности мирских сует всем сердцем отрешивыйся;
радуйся, ради жизни небесныя со святым старцем содруживыйся.
Радуйся, на будущия подвиги духовником наставленный;
радуйся, советы его до конца жизни в сердце сохранивый.
Радуйся, по молитвам старца светом трисиянным озаренный;
радуйся, вся красная мира сего по озарении ни во что же вменивый.
Радуйся, преподобне отче Симеоне, Новый Богослове.

Кондак 3
Имея тщание о подвизе иноческаго равноангельскаго жития, во град столичный Константинополь притекл еси, и тамо, в Студийский монастырь вселився, житие твое богоугодное в борьбе со страстьми и немощьми проводил еси, выну взывая ко Господу: Аллилуия.

Икос 3
Сила Вышняго от юности воистину храняше тя, преподобне: родителей бо противление, братии обители наветы и козни, плотскую брань и срамныя помыслы, вся претерпел еси по совету твоего наставника, святаго Симеона, с кротостию и смирением, в посте и молитве пребывая. Мы же, дивящеся таковому о тебе Божию промышлению, со умилением вопием ти:
Радуйся, благое иго Христово на себе восприемый;
радуйся, Небеснаго Владыки рабе благий и верный.
Радуйся, Христа всем сердцем и душею возлюбивый;
радуйся, совет родителей оставити монастырь отклонивый.
Радуйся, послушания к духовному отцу преисполненный;
радуйся, по молитвам старца, диавола посрамивый.
Радуйся, незлобием твоим нападки братии победивый;
радуйся, душу свою в скорбех неврежденну сохранивый.
Радуйся, преподобне отче Симеоне, Новый Богослове.

Кондак 4
Бурю злых напастей утишая, волю старца своего исполняя, прешел еси к славному Антонию, игумену монастыря святаго Маманта, и тамо быв монах и схимник, прошел еси весь тесный и прискорбный путь подвига аскетическаго, молчания и всенощнаго бдения. И тако, благодатию Божиею, восходя от силы в силу, прешел еси от деяния к боговедению, непрестанно взывая Богу: Аллилуия.

Икос 4
Слышаще и видяще житие твое, отче Симеоне, и не могуще подвиги твоя уразумети, вся братия и игумен начаша смущатися. Ты же, да не искушаются немощныя братия, в новую обитель изшел еси. Темже убо хвалебно вопием ти сице:
Радуйся, всего себе терпением обид в жертву Господу принесый;
радуйся, на высоту ангельскаго безстрастия скоро возшедый.
Радуйся, мира и послушания ради монастырь Студийский оставивый;
радуйся, к игумену Антонию, в монастырь святаго Маманта, вселивыйся.
Радуйся, монашеский постриг тамо приявый;
радуйся, облечения в схиму сподобивыйся.
Радуйся, в трудах иноческих благодатию укрепленный;
радуйся, к богомыслию от дел благочестия возшедый.
Радуйся, преподобне отче Симеоне, Новый Богослове.

Кондак 5
Божественная благодать осия тя, преподобне отче Симеоне, егда приял еси посвящение иерейское и возведение в сан игумена от патриарха Николая Хрисоверга. И вся четыредесять и осмь лет священства твоего, егда служил еси Литургию, Божественный свет сия в тебе, подвизая благодарне пети Господеви: Аллилуия.

Икос 5
Силою, данною тебе свыше, исполняя послушание, в церкви поучал еси братий и всех христиан, послежде, восприем сан священнический и быв игумен обители, всех блуждающих по морю страстнаго жития сего и погибающих к небесному отечеству смиренно вел еси. Мы же, любовию к тебе понуждаеми, дерзаем пети сицевая:
Радуйся, приемый тяжкое иго священства;
радуйся, понесый и бремя игуменства.
Радуйся, рукоположению твоему бывшу, пламенем осиянный;
радуйся, на пир Царствия Богом званный и избранный.
Радуйся, на Литургии в сердце своем огнь благодати созерцавый;
радуйся, истинное достоинство и высоту священства познавый.
Радуйся, просвещенный всецело Божественным светом;
радуйся, деливыйся с народом мудростию и советом.
Радуйся, преподобне отче Симеоне, Новый Богослове.

Кондак 6
Воспевает обитель святаго Маманта подвиги твоя, богоносне угодниче Христов: хотя избран дом Духа Святаго себе сотворити и взем на рамо свое Крест Христов, подъял еси братии ради труды великия по обновлению и благоустроению обветшавшия обители. Сего ради, познавше благих подателя Бога, вси со умилением зовем Ему: Аллилуия.

Икос 6
Новое поприще пастырского служения твоего избра Благопромыслитель Господь обитель святаго Маманта, аможе преселился еси, идеже вельми прослави тя Господь Бог. Мы же, любовию твоею побеждаеми и от усердия нашего вопием ти сице:
Радуйся, ангельское житие нам явивый;
радуйся, страсти греховныя вся оставивый.
Радуйся, дом Духа Святаго себе сотворивый;
радуйся, труды по обновлению обители подъемый.
Радуйся, соблюдый сам вся уставы церковныя;
радуйся, познавый при сем вся законы духовныя.
Радуйся, подвижниче, умом прозорливый;
радуйся, монахов наставниче чадолюбивый.
Радуйся, преподобне отче Симеоне, Новый Богослове.

Кондак 7
Хотя истину утвердити, поминая богоугодное житие и труды подвижническия и чистоту сердца святаго Симеона Благоговейнаго, отошедшаго ко Господу в старости маститей, проповедник немолчен явился еси, преподобне Симеоне, славы отца твоего духовнаго, составив в честь его слова похвальная, песни и каноны, светло празднуя память его. Мы же, видяще твою любовь к учителю, николиже отпадающую, поем всем сердцем умиленным: Аллилуия.

Икос 7
Видя враг рода человеческаго чистое и святое житие твое и сердце, любве преисполненное, преподобне Симеоне, восхоте погубити тя, наведе бо на тя люди злы: митрополита Никомидийскаго Стефана, книжника, человека мира сего, иже беззаконно по зависти много лет клеветаше на тя патриарху. Ты же, отче святый, яко агнец кроток, все претерпел еси, за обидящих тя Господеви моляся. Сподоби и нас незлобия твоего, мы же прославим дивная дела твоя и воспоем ти таковая:
Радуйся, преданный своему учителю учениче;
радуйся, от клеветы пострадавый доблий мучениче.
Радуйся, посрамивый мудрыя мира сего;
радуйся, духом познавый тайны мира всего.
Радуйся, от новых иконоборцев претерпевый безчестие;
радуйся, уклонивыйся от лютыя злобы и мести.
Радуйся, унывающих мирян в скорбех утешение;
радуйся, согрешающих людей исправление.
Радуйся, преподобне отче Симеоне, Новый Богослове.

Кондак 8
Бурю ярости и гнева воздвигоша безумнии людие, клевещуще, о Симеоне, на тя патриарху Сергию, он же изгнати тя от царствующаго града повеле. Обаче благодать Божия и во изгнании соблюдаше тя, Симеоне, научающи в терпении нести Крест Христов. Ты же присно взывал еси Богу: Аллилуия.

Икос 8
Блажени изгнани правды ради, яко тех есть Царство Небесное: бурю гонений и изгнание мужественно претерпел еси и венец нетленный на Небеси себе уготовал еси. Мы же восхваляем тя, вопиюще сицевая:
Радуйся, изгнанный, яко Иоанн Златоуст, из града столичнаго;
радуйся, во всем видевый Промысл Божий и забывый обиды личныя.
Радуйся, имевый преданнаго Христофора Фагуру, духовнаго сына;
радуйся, получивый в дар от него молитвенный дом святыя Марины.
Радуйся, новую обитель спасения там основавый;
радуйся, до конца жития своего в той пребывавый.
Радуйся, пастырю немощных доблий;
радуйся, отче наш милостивый и кроткий.
Радуйся, преподобне отче Симеоне, Новый Богослове.

Кондак 9
Видя Церковь Христову неведением обуреваему и Божию призванию повинуяся, проповедник всему миру истины Христовы явился еси, преподобне отче Симеоне, да вси вернии сердцем Троице Святей воспоют: Аллилуия.

Икос 9
Возсиял еси яко новый боговидец, Иоанну Богослову и Григорию Богослову подобный, Симеоне блаженне, сподобився быти обновитель христианския жизни на веки. Сему Божию о тебе благоволению дивящеся, воспеваем ти сице:
Радуйся, боговидче преславный, древним подобный;
радуйся, светом Христа весь преображенный.
Радуйся, Сына Божия служителю верный;
радуйся, Бога Отца духовныма очима узревый.
Радуйся, со Христом беседы о животе имевый;
радуйся, о сем в своих гимнех воспевый.
Радуйся, мыслителю добрый и прозорливый;
радуйся, грядущая, яко настоящая, провидевый.
Радуйся, преподобне отче Симеоне, Новый Богослове.

Кондак 10
Пению подобает приносиму быти тебе с Небес, а не от земли, о пречудный отче Симеоне, Небес бо явление на земли был еси, и к Небеси богомудрыми ученьми твоими умы верных возводиши до ныне, и всем нам благодать подаеши от Щедродателя, Христа Бога нашего, Емуже со Ангелы на Небесех выну поеши: Аллилуия.

Икос 10
Светоносный светильник, богословским даром сияяй, явился еси, отче Симеоне, темже и ны просвети, в добродетели настави, в заповедех Христовых укрепи и к Царствию Небесному ныне же направи, зовущих ти сице:
Радуйся, Церкве Христовы боговидче преславный;
радуйся, водителю к жизни православней.
Радуйся, подвижниче, талант богословия не погубивый;
радуйся, святый, богословием народ от греха отвративый.
Радуйся, Царствия Божия в душе любителю;
радуйся, Царства Небеснаго верный строителю.
Радуйся, многи иноки в обителех насадивый;
радуйся, писаньми твоими и мирян просветивый.
Радуйся, преподобне отче Симеоне, Новый Богослове.

Кондак 11
Странное чудо видим на тебе, преподобне, яко, старец сый, немощный и многоболезненный, в молитве пребывал еси, аки Ангел небесный, висяй на воздусе на четыре лактя от земли. Сиянием чудесе сего просвещени и хлебом учения твоего насыщени, тебе усердно величаем и прославльшему тя Христу вопием: Аллилуия.

Икос 11
Спасительнаго твоего подвига, преподобне, достиг скончания, на молитве, посреде учеников своих верных, святую душу твою в руце Богу предал еси. Мы же, дивящеся праведней кончине твоей, днесь вопием ти:
Радуйся, тринадесять лет в изгнании Богу служивый;
радуйся, Церкве Православныя житие обновивый.
Радуйся, небесных высот достойный обитателю;
радуйся, камень преткновения земным обывателем.
Радуйся, пред кончиною святость жития твоего чудом показавый;
радуйся, принятием Святых Тайн каждодневно себе укреплявый.
Радуйся, посреде учеников дух твой Богу предавый;
радуйся, наставниче наш, богоизбранный авво.
Радуйся, преподобне отче Симеоне, Новый Богослове.

Кондак 12
Поюще радостно, вернии обретоша святыя мощи твоя, Симеоне, егда проидоша тридесять лет по смерти твоей, душа же твоя на Небесех пребываше давно со святыми Ангелы. Сего ради, видяще твое прославление на Небеси и на земли, ублажаем тя, преподобне, победне вопиюще: Аллилуия.

Икос 12
Разум, душу и тело богопросвещенны стяжал еси, святче Божий, от юности соделався верный исполнитель и проповедник заповедей Христовых. Яко многомощнаго молитвенника о нас пред Господем, утешителя и заступника, ублажаем тя и с любовию возглашаем ти сице:
Радуйся, странниче, во отечество Небесное вшедый;
радуйся, со святыми общение обретый.
Радуйся, яко тление не коснуся костем твоим;
радуйся, яко угодил еси Богу житием своим.
Радуйся, по смерти чудес многих источниче;
радуйся, притекающим к тебе верный помощниче.
Радуйся, усердный пред Богом о всех нас предстателю;
радуйся, покаянием церковным сердец очистителю.
Радуйся, преподобне отче Симеоне, Новый Богослове.

Кондак 13
О великий Новый Богослове и чудотворче, преподобне отче Симеоне! Приими малое сие моление наше, в похвалу тебе возносимое, и, предстоя ныне Пресвятей Троице, молися о всех нас, да обрящем милость у Господа нашего Иисуса Христа, стяжавше Духа Святаго и познавше Отца Небеснаго, в радости поюще: Аллилуия.
Этот кондак читается трижды, затем икос 1 и кондак 1.

Молитва
О великий преподобный Симеоне, Новый Богослове! Угодниче Христов, златоусте Православныя Церкве! Велия богословския подвиги и труды твоя во славу Святыя Церкве совершил еси, исповедник твердый богообщения и лицезрения Христа уже на земли явився, светом своего боговедения верныя озаряя. На тя бо упование наше ныне возлагаем: услыши нас, грешных (имена), молящихся тебе, и преподаждь нам твое пастырское святое благословение, и принеси молитву нашу к милостивому и человеколюбивому Богу, Емуже ныне в радости святых и с лики Ангел предстоиши; буди нам воистину ко спасению путеводитель, приведи нас к невечернему свету Христову своим пречудным богословием, да по словеси твоему молитвенному услышим глас Владыки Христа нашего: приидите, благословеннии Отца Моего, наследуйте уготованное вам Царствие от сложения мира. Аминь.

Отсканировано с издания: П.В. Челышев.
Преподобный Симеон Новый Богослов о духовном преображении человека. Акафист. М.: Изд-во храма св. вмч. Димитрия Солунского на Благуше, 2004. Стр. 236-251.