Кондак 1
Избранней угоднице Божией, истинней подвижнице и твердей исповеднице, предивней матери нашей Софии похвальное восписуем пение. Ты же, яко имущая велие дерзновение ко Господу, о спасении нашем Того умоли, да зовем ти:
Радуйся, Софие славная, Христа Сладчайшаго невесто избранная.

Икос 1
Ангельских чинов сопричастницею была еси, суету мира презревши, мати блаженная, и до скончания жития своего прилежно Христу поработала еси, веру в Него пред гонители непоколебимо исповедавши. Темже вопием ти:
Радуйся, именем премудрости нареченная;
радуйся, дарами благодати ущедренная.
Радуйся, сияющая чистотою девства;
радуйся, непорочная Христова невесто.
Радуйся, любви Божией слезно просившая;
радуйся, вечное Царство любви улучившая.
Радуйся, цвете райскаго сада;
радуйся, жен преподобных славо.
Радуйся, Церкве Христовой похвало;
радуйся, лика исповедниц красото.
Радуйся, горних воинств собеседнице;
радуйся, нетленных благ наследнице.
Радуйся, Софие славная, Христа Сладчайшаго невесто избранная.

Кондак 2
Видя прозорливый старец Оптинский в церкви тя, младую отроковицу, и будущая яко настоящая созерцая, Духом Святым просвещенный, сан игумении тебе предрече, Богу воспевая: Аллилуиа.

Икос 2
Разум боголюбивый и вопль сердечный ко Христу устремила еси, преподобная, егда во днех юности твоея страшнаго волка сретила еси. Мы же, прославляюще Господа, хранящаго угодники Своя, зовем ти таковая:
Радуйся, старцами Оптины пустыни усмотренная;
радуйся, пророчества об игуменстве удостоенная.
Радуйся, Владычицы всего мира избраннице;
радуйся, дивных проречений о тебе таиннице.
Радуйся, Промыслом Божиим хранимая;
радуйся, Десницею Его водимая.
Радуйся, напрасныя смерти избежавшая;
радуйся, инокинею быти обещавшая.
Радуйся, Господним чудом уловленная;
радуйся, Его безмерной милостью плененная.
Радуйся, исполнити обет помышлявшая;
радуйся, благоизволения от Бога ожидавшая.
Радуйся, Софие славная, Христа Сладчайшаго невесто избранная.

Кондак 3
Сила Господня, в приятии Святых Таин тебе явленная, Софие всечестная, воздвиже тя от одра смертнаго, егда болезнию лютою обдержима была еси, да Единому Жизнодавцу Богу послужиши, благодарственно поющи: Аллилуиа.

Икос 3
Имущи сердце твое уязвлено любовию Христовою, мати благая, во иноческий образ облеклася еси, и в убогом месте обитель Отрады и Утешения устроила еси, в честь Пречистыя Богоматери ея нарекши. Сего ради взываем ти:
Радуйся, Небесным Врачем исцеленная;
радуйся, ко иночестей жизни возставленная.
Радуйся, вся блага земная отвергшая;
радуйся, во след Христу потекшая.
Радуйся, обитель чудную основавшая;
радуйся, труды ко трудом прилагавшая.
Радуйся, яблоне лесная, пчел духовных собравшая;
радуйся, боготочным нектаром их напоявшая.
Радуйся, милостей Господних сладкая цевнице;
радуйся, возлюбленная дщи Всепетыя Царицы.
Радуйся, Оптинскими подвижники руководимая;
радуйся, на гору совершенства ими возводимая.
Радуйся, Софие славная, Христа Сладчайшаго невесто избранная.

Кондак 4
Бури многомятежнаго мира избежавши, Софие дивная, ум свой всецело в любовь Божию вперила еси, в нищете и смирении глубоцем подвиг совершающи, Христу же вопиющи: Аллилуиа.

Икос 4
Слышавши об ангелоподобнем твоем житии, мати благосердая, многия людие во обитель твою притекаху, взыскующе отрады в скорбех и утешения в печалех, и никтоже уныл и тосклив от тебе отъиде. Темже ублажаем тя сице:
Радуйся, Евангельския любве сокровище;
радуйся, Святаго Духа вместилище.
Радуйся, чашу Божественныя премудрости приявшая;
радуйся, утешение всем скорбным подававшая.
Радуйся, добродетельми преукрашенная;
радуйся, благородством духовным одаренная.
Радуйся, богопротивныя учения духом ниспровергавшая;
радуйся, заблудших ко Христу обращавшая.
Радуйся, истинныя веры проповеднице;
радуйся, примирения с Богом возвестительнице.
Радуйся, кающихся во объятия Отча приводившая;
радуйся, на стезю спасения их путеводившая.
Радуйся, Софие славная, Христа Сладчайшаго невесто избранная.

Кондак 5
Боготечною звездою явися ти блаженный старец Серафим, мати святая, ходатайством бо его щедрая милостыня бедней обители твоей даровася и неотложная купля земли совершися, вси же прославляху Бога песнию: Аллилуиа.

Икос 5
Видя непорочное хождение твое в законе Господни и доброхвальное житие твое, Софие благолюбивая, облече тя Христос силою свыше, да ближния и дальния приведеши ко спасению. Не остави же и нас, тако зовущих ти:
Радуйся, в руце Божия обитель предавшая;
радуйся, угодника Саровскаго зело любившая.
Радуйся, в скобрех неотступно к нему взывавшая;
радуйся, молитвою Господа на милость преклонявшая.
Радуйся, маслино, ветви славы и благодати прозябшая;
радуйся, заповеди Божия ревностно хранившая.
Радуйся, благоуханный крине благочестия и чистоты;
радуйся, неиссякаемый источниче сердечныя доброты.
Радуйся, сокровище на небесех собравшая;
радуйся, храмину души твоея украсившая.
Радуйся, Богодарованные таланты приумножившая;
радуйся, душу во обитель Пресвятей Троице уготовавшая.
Радуйся, Софие славная, Христа Сладчайшаго невесто избранная.

Кондак 6
Проповедницею благоговейныя покорности воле Господней явилася еси, мати досточудная, егда Десницею Божией поставлена была еси во игумении Киево-Покровския обители, из глубины сердечныя взывающи Христу: Аллилуиа.

Икос 6
Возсияла еси, мати боголюбезная, во обители Покровстей: свидетельствоваше бо светлость лица твоего душевное незлобие, слово же молчаливое кротость являше; сего ради людие воспеваху ти:
Радуйся, в земный Удел Богоматери призванная;
радуйся, судьбами Божиими взысканная.
Радуйся, благому игу Христову главу подклонившая;
радуйся, в царственную обитель града Киева прибывшая.
Радуйся, яко знамение дивное во сретении твоем явися;
радуйся, яко в нем темничное пророчество тобою усмотреся.
Радуйся, вертограда Богородицы возделательнице;
радуйся, храмов Господних благоукрасительнице.
Радуйся, монахинем изрядная наставнице;
радуйся, словесных овец кроткая начальнице.
Радуйся, материнскою любовию всех согревавшая;
радуйся, благодушием своим обитель озарявшая.
Радуйся, Софие славная, Христа Сладчайшаго невесто избранная.

Кондак 7
Хотящи последовати заветам царственныя инокини Анастасии, основательницы Покровския обители, потщалася еси богоугодно ея монастырем управляти, Софие небомудренная, Господу поющи: Аллилуиа.

Икос 7
Новая брань со иноплеменники постиже землю нашу, сего ради во обители Покровстей врачебницы воинстии устроены быша. Мы же, величающе подвиги твоя, мати милосердная, глаголем сице:
Радуйся, заповедей Княгини-подвижницы преемнице;
радуйся, Небесныя Игумении добрая послушнице.
Радуйся, благолюбием блиставшая;
радуйся, обителию благочестно управлявшая.
Радуйся, помощи воинам устроительнице;
радуйся, вдов и сирот утешительнице.
Радуйся, безкровных приютом наделявшая;
радуйся, плененным милостыню посылавшая.
Радуйся, Государя-страстотерпца во обители сретившая;
радуйся, икону во благословение ему даровавшая.
Радуйся, Царю и Отечеству верно послужившая;
радуйся, Бога о победе присно молившая.
Радуйся, Софие славная, Христа Сладчайшаго невесто избранная.

Кондак 8
Странно бе слышати тебе, мати преподобная, како людие, некогда избраннии, ныне во след богов иных поидоша, Всецаря Христа отвергше и царствие земное разрушити потщашася, не ведуще воспевати Господеви: Аллилуиа.

Икос 8
Все Отечество наше плачем огласися, междоусобныя бо брани и братоубийства в нем явишася. Ты же, мати добрая, на крепцем камени веры стоящи, всем бедствующим руку помощи подавала еси. Сего ради приносим ти таковыя похвалы:
Радуйся, веры христианския адаманте;
радуйся, надежды несумненныя столпе.
Радуйся, мира Христова сеятельнице;
радуйся, горя людскаго печальнице.
Радуйся, инокинь примером своим укреплявшая;
радуйся, безропотному терпению их научавшая.
Радуйся, дерзновенно к Богу руце простиравшая;
радуйся, своею молитвою обитель ограждавшая.
Радуйся, воинов от гнева безбожников укрывавшая;
радуйся, стрелы лукаваго щитом благодати отражавшая.
Радуйся, отчаянным пристанище уготовлявшая;
радуйся, за ближних душу свою полагавшая.
Радуйся, Софие славная, Христа Сладчайшаго невесто избранная.

Кондак 9
Вся ужаса исполнилася еси, мати боголюбивая, узревши тьму безбожия, землю Святыя Руси покрывающую, обаче неисповедимым судьбам Господним покаряющися, вопияла еси: Аллилуиа.

Икос 9
Ветия никийже возможет изрещи злострадания твоя во время гонений от властей безбожных. Ты же, мати предивная, все упование на Господа возложшая, по долгу слышиши от нас:
Радуйся, лютость властей нивочтоже вменившая;
радуйся, многия слезы в скорбех пролившая.
Радуйся, за обитель свою твердо стоявшая;
радуйся, тяготы ея смиренно несшая.
Радуйся, Небеснаго Владыки теплая молитвеннице;
радуйся, пред земными владыками о твоей обители ходатаице.
Радуйся, стадо, тебе врученное, верно упасшая;
радуйся, ниедину от сестер попечения не лишившая.
Радуйся, церковных расколов обличительнице;
радуйся, обители от злых наветов хранительнице.
Радуйся, злохудожных обновлений противнице;
радуйся, православнаго благочестия поборнце.
Радуйся, Софие славная, Христа Сладчайшаго невесто избранная.

Кондак 10
Спасти хотящи душу свою, мати всехвальная, отвергла еси волков, губящих стадо Христово, сего ради и глаголемым обновленцем не повинулася еси, Началопастырю Христу выну воспевающи: Аллилуиа.

Икос 10
Стена необорима явися тебе Владычица Державная, о мати праведная, аще бо ты из обители изгнана была еси, обаче Вышняго покровом хранима с духовными сестрами тайно подвизалася еси. Сего ради тебе вопием:
Радуйся, правды Божией алкавшая;
радуйся, свидений Его жаждавшая.
Радуйся, нечестивым не покорившаяся;
радуйся, Евангельскому гласу повинувшаяся.
Радуйся, горькое разлучение с обителию понесшая;
радуйся, тихое пристанище инде обретшая.
Радуйся, на всякое время Господа благословлявшая;
радуйся, выну Его восхвалявшая.
Радуйся, повелений Христовых исполнительнице;
радуйся, терпения и незлобия учительнице.
Радуйся, в подвизех иноческих не ослабевавшая;
радуйся, всех приходящих к тебе утешавшая.
Радуйся, Софие славная, Христа Сладчайшаго невесто избранная.

Кондак 11
Пение умиленное возносила еси, скорбную чашу испивающи, Софие богоневестная, за любовь бо ко Христу трикраты в темницех заключена была еси. Имя Его небоязненно пред богоборцы исповедающи и взывающи: Аллилуиа.

Икос 11
Светоприемною свещею Божественныя любве во тьме безбожия явилася еси, мати богомудрая, Распятому Господу последущи и яко миро благовонное своя страдания Ему приносящи. Мы же, неизреченную красоту души твоея зряще, тако восхваляем тя:
Радуйся, Божественнаго страдальца прославлявшая;
радуйся, на Голгофу стопы души своея направлявшая.
Радуйся, любовию к Богу присно горящая;
радуйся, язвы Христовы верно носящая.
Радуйся, Сладчайшему Жениху сораспеншаяся;
радуйся, судьбам правды Его пригвоздившаяся.
Радуйся, со креста своего Христа исповедавшая;
радуйся, Искупительную Жертву Его проповедавшая.
Радуйся, прещения мучителей презревшая;
радуйся, вся козни вражия победившая.
Радуйся, во узах за Христа заключенная;
радуйся, навеки Ему обрученная.
Радуйся, Софие славная, Христа Сладчайшаго невесто избранная.

Кондак 12
Благодать Божия укрепляше тя во дни испытаний, исповеднице Христова, неправедное бо изречение от беззаконных судий приемши, изгнание претерпела еси, вопиющи Господу: Аллилуиа.

Икос 12
Поюще подвиги и страдания твоя, Софие добропобедная, ублажаем велие терпение и великодушие твое. Странницею бо течение жизни своея благочестно скончавши, Небесное Отечество унаследовала еси. Темже умиленно зовем ти сицевая:
Радуйся, в Горний Иерусалим преселившаяся;
радуйся, блаженству праведных причастивашаяся.
Радуйся, на брак Агнца Божия введенная;
радуйся, в чистый виссон исповедания облеченная.
Радуйся, яко имя Божие на челе твоем написася;
радуйся, яко имя твое пред Ангелы прославися.
Радуйся, с Любезным Женихом вечно царствующая;
радуйся, лицем к лицу правду Божию созерцающая.
Радуйся, Покровския обители крепкая заступнице;
радуйся, о народе Божием милосердная предстательнице.
Радуйся, мощи своя нам даровавшая в залог благоволения;
радуйся, пред ними приемлющая усердныя моления.
Радуйся, Софие славная, Христа Сладчайшаго невесто избранная.

Кондак 13
О преподобномудрая и всеблаженная мати наша Софие! Нынешнее наше приемши пение, уязви души наша горнею любовию, в вере Православней нас присно утверди, от наветов и искушений вражиих сохрани, наследниками Небеснаго Царствия быти сподоби богоприятным твоим ходатайством, да с тобою воспеваем Христу Богу: Аллилуиа.
Сей Кондак чтется трижды, затем Икос 1 и Кондак 1

Молитва
О преподобная и досточудная мати наша Софие, исповеднице всехвальная! Во время гонения безбожнаго ничтоже возможе разлучити тя от любве Христовы: ты бо темничныя узы мужественно претерпевающи, от сокровищницы души твоея спасительное исповедание Православныя веры изнесла еси и образ терпения и непостыднаго упования явила еси.
Ныне убо призри на нас, недостойных чад твоих, умиленною душею и сокрушенным сердцем тя в молитве призывающих.
Умоли Господа Сил, да утвердит Церковь Свою непоколебиму в мире сем многомятежнем и лукавом, обитель же твою сохранит во благочестии и святости, нам же неослабное терпение даже до конца жития нашего дарует.
Буди всем нам благосердая мати и теплая молитвенница, научи нас всегда творити волю Божию и хранити заповеди Его, укрепи нас, малодушных, да и мы всегда и всюду противостанем духу безбожия и льсти. Егда же найдет на ны испытания час, распали любовию Христовою сердца наша и помози незыблему соблюсти веру Православную, да купно с тобою прославим имя Пресвятыя Троицы, Отца и Сына и Святаго Духа во веки веков. Аминь.

Тропарь, гл.5
От юности Христу уневестилася еси, / добродетельми преславно сияющи,/ преодобная мати наша Софие,/ премудрая наставнице инокинем явилася еси,/ и пред богоборцы дерзновенно Христа исповедала еси./ Темже в вечней славе ныне пребываеши,/ Владыце всех молися, мир Церкви даровати/ и душам нашим велию милость.

Кондак, гл.4 Яко крин благоуханный/ посреде пустыни безбожия,/ в земнем Отечестве твоем процвела еси,/ преподобная мати наша Софие,/ и подвиги воздержания исповеданием веры украсивши,/ востекла еси к Небесному Жениху Христу,/ Иже увенча тя красотою славы нетленныя.

Свято-Покровский женский монастырь
Киев
2013