Икос 1
Да отверзется дверь небесная днесь, Безначальное бо Слово Отчее, яко младенец четыредесятодневен, Материею вольне приносится в церковь, сего ради зовем:
Иисусе безначальне.
Иисусе, Отцу единославне.
Иисусе, единоначальне.
Иисусе несозданне.
Иисусе, гряди в сретение души моея!

Кондак 2
Украси твой чертог, Сионе, хвали Марию — небесную дверь. Та бо престол херувимский явися, носяще на руках Божия Сына, Его же благовествуя, поем: Аллилуиа!

Икос 2
Воссиявшего прежде век от Отца, принесе в церковь Неискусобрачная Мати, радостно вопия:
Иисусе, радости моей исполнение.
Иисусе, сердца моего веселие.
Иисусе, людем спасение.
Иисусе, ангелов поклонение.
Иисусе, гряди в сретение души моея!

Кондак 3
Два птенца голубина, яко Начальника Ветхаго и Новаго завета от Иосифа приемлет дары боголепно Церковь законная. Зряще Божие снисхождение, поем: Аллилуиа!

Икос 3
Приими Симеоне, Всечистая вопияше, во объятия Господа славы, яко Младенца, и Сему радостно возопий:
Иисусе, нас ради воплотивыйся.
Иисусе, яко тихий Свет невечерний открывыйся.
Иисусе, Истиною мирови явивыйся.
Иисусе, пророками провозвестивыйся.
Иисусе, гряди в сретение души моея!

Кондак 4
Богомладенца Иисуса видев, Симеон вопияше: страшуся и боюся руками объяти Тя, Владыко, но мира Твоего ищай, вопию со трепетом: Аллиуиа!

Икос 4
Лик ангельский да удивится чудеси, зря неизреченное Божие снисхождение. Егоже бо трепещут силы небесные, ныне объемлют руце Симеоновы, Емуже вопиет:
Иисусе, отпусти ныне раба Твоего.
Иисусе, чаяние народа моего.
Иисусе, мирови просиявый.
Иисусе, мир в душу пославый.
Иисусе, гряди в сретение души моея!

Кондак 5
Глаголи, Симеоне, чесо в церкви Божией стоиши, со трепетом духом радуешися? Боговидец сподобился еси ныне быти. Зиждителя и Господа своего приемлеши, Сему радостно возопий: Аллилуиа!

Икос 5
Во пророцех виден был еси Иисусе, яко же можно Тебе видети. Ныне плотию всему миру явился еси волею, сего ради вопием:
Иисусе, како Себе Самому, яко Отроча свято приносишися?
Иисусе, како плотию младенствуеши?
Иисусе, како во храм вносишися?
Иисусе, како всю тварь содержиши и руками Симеоновыми объемлешися?
Иисусе, гряди в сретение души моея!

Кондак 6
Со Отцем на престоле Присносущий, пришел на землю от Девы родився, Симеоном во объятия приемлешися, веселиши раба Твоего, поющего: Аллилуиа!

Икос 6
Видеша очи мои спасение Твое, от века таинство сокровенное, отпусти раба Твоего к нестареемей жизни, поющего Ти:
Иисусе, Его же трепещут херувими.
Иисусе, Его же благословляют серафими.
Иисусе, Его же славят ангели.
Иисусе, Ему же кланяются архангели.
Иисусе, гряди в сретение души моея!

Кондак 7
Крепитеся, руце Симеони, Христа в церкви, яко Младенца держаще. Ему же вернии возопийте: Аллилуиа!

Икос 7
Веселитеся, небеса, радуйся земля, исполнися хваления, Симеоне, зовый Ему: Иисусе, жизни источниче. Иисусе, человече видиме и Боже совершенне. Иисусе, всю тварь премудростию сотворивый. Иисусе, свет от тьмы разделивый. Иисусе, гряди в сретение души моея!

Кондак 8
Сиону камень возложился еси, Господи, непокоривым претыкание, верных нерушимое спасение. Его же восприявше поем: Аллилуиа!

Икос 8
Богородице Дево, Твое сердце оружие пройдет, Симеон Пречистой возгласи, на кресте бо узриши Сына Твоего. Ему воспоим:
Иисусе, землю на водах утвердивый.
Иисусе, море песком оградивый.
Иисусе, жертву о нас сотворивый.
Иисусе, мое естество освятивый.
Иисусе, гряди в сретение души моея!

Кондак 9
Свет во откровение языков явился еси, Господи, начало изъявления новыя благодати. Тебе вси поем: Аллилуиа!

Икос 9
Анна пророчица, дщи Фануилова, прииди и стани с нами, благодари Христа Господа:
Иисусе, Агнче присно закалаемый.
Иисусе, всем благочестивым, яко Хлеб Жизни подаваемый.
Иисусе, николиже иждиваемый.
Иисусе, Сыном Человеческим нарицаемый.
Иисусе, гряди в сретение души моея!

Кондак 10
Приидем вси Божественными песньми Христа прославим, приимем, яко же Симеон приял Его и радостно воспоим: Аллилуиа!

Икос 10
Людие православнии, славу Эммануила зряще, ныне ликуйте:
Иисусе, верою Тя поющих приими.
Иисусе, в храме стоящих спаси.
Иисусе, хвалу нашу приими.
Иисусе, сердце к любви обрати.
Иисусе, гряди в сретение души моея!

Кондак 11
Сам Господь во гласе трубнем снидет с небесе и мертвии о Христе воскреснут первее, потом же мы, оставшиеся, вместе с ними восхищени будем на облацех в сретение Господне на воздусе, поя Ему: Аллилуиа!

Икос 11
Приидет Сын Челоевческий во славе Своей, сего ради во второе сретение паче снега просветимся, свещи Истинному Свету с мудрыми девами принесем:
Иисусе милостиве.
Иисусе правосудне.
Иисусе, в царство Свое нас призвавый.
Иисусе причастниками сего соделай.
Иисусе, гряди в сретение души моея!

Кондак 12
Сам сый Законодавец закон совершает, пришед бо не разорити закон, но исполнити, да суда ради боящеся сохраним закон, да будем споспешницы Богу, любяще Его всем сердцем своим, да услышим во второе сретение Его: приидите благословеннии Отца Моего, примите уготованное царство от сложения мира. Того приемницы будем, славяще песнею: Аллилуиа!

Икос 12
Светло сретение Господне духом играюще провождаем. Свет от Света изыде, выше горлицы на небо возлетим, на облацех противу Божию сретению изыдем, со ангелы ликуем, с Девою Богородицею возрадуемся, с Иосифом принесем, с Симеоном на руку Христа приимем, со Анною пророчицей исповедуем:
Иисусе, смерть поправый.
Иисусе, клятву разоривый.
Иисусе, тварь всю украсивый.
Иисусе, мир обновивый.
Иисусе, гряди в сретение души моея!

Взято с http://ierokirik.livejournal.com