Кондак 1
Избранный чудотворче Христов и скорый помощниче, преподобне отче наш Стилиане, прославляюще Бога, от утробы матерни тя освятившаго, похвальная восписуем ти; ты же, яко теплый предстатель и милостивый, от всяких нас бед свободи, да зовем ти:
Радуйся, преподобне Стилиане, великий чудотворче.
Икос 1
Ангелов и человеков Творец избра тя изначала, да прославиши ангельским твоим житием имя Святыя Троицы, и мирская отринув попечения, возблистаеши, яко Солнца правды луча светлейшая. Мы же, зряще твоя всечестныя подвиги, смирением и радостию глаголем ти сицевая:
Радуйся, Церкве святыя похвало,
Радуйся, Пафлагонии крепкий столпе;
Радуйся, помощи требующих усердное слышание,
Радуйся, отшельников небурное отишие;
Радуйся, образе кротости и смирения,
Радуйся, грешников исправление;
Радуйся, молитвы пустынныя высото,
Радуйся, упования и любве глубино;
Радуйся, недужным усердное вспоможение,
Радуйся, верных честное удобрение.
Радуйся, преподобне Стилиане, великий чудоворче.
Кондак 2
Видя тя Бог, яко семя благое и избранное, от ложесн матерних освяти тя и Духа сосуд яви тя. Ты же, стопы своя к безмолвию направляя, крест честный чрез все житие пронесл еси, знаменуя тем велию любовь нас ради Распятаго, Ему же приносим песнь: Аллилуиа.
Икос 2
Разум небесный даровася ти, отче Стилиане, еще бо юну ти сущу, горняя мудрствоваше; сего ради имение раздав, осия молитвами твоими мрак пещеры, в нейже скрылся еси. Темже услыши от нас таковая:
Радуйся, от юности Христу послуживый,
Радуйся, мироотречное житие явивый;
Радуйся, яко лютая в пещере терпевый,
Радуйся, яко тленная вся презревый;
Радуйся, свете монашества златосиянный,
Радуйся, цвете преподобия богоизбранный;
Радуйся, имже Пафлагония величается,
Радуйся, имже лик святых украшается;
Радуйся, силою крестною победителю,
Радуйся, верный Христов служителю.
Радуйся, преподобне Стилиане, великий чудотворче.
Кондак 3
Сильну надежду возложших на тя многи недуги душевныя же и телесныя целиши, таже припадающих ти бед и скорбей свобождаеши. Сего ради ныне к тебе притекающе, молим тя со слезами: к Вышняго престолу наша прошения принеси, славящих Бога и поющих Тому: Аллилуиа.
Икос 3
Имея ревность к подвигом монашескаго жития, также безмолвие возлюбив, в пещере, токмо любовию Божиею освященней, водворися, идеже пищу от ангела приимая, живот свой богоугодне в нищете, посте и молитве сконча. Мы же, святым твоим трудом дивящеся, приносим ти пения таковая:
Радуйся, тленных всех устранивыйся,
Радуйся, к Царству Небесному устремивыйся;
Радуйся, яко Христа воистину возлюбил еси,
Радуйся, яко ум и сердце в молитве к Богу утвердил еси;
Радуйся, мудре, ветия просвещающий,
Радуйся, радость небесную возвещающий;
Радуйся, источниче живоносный пустыни,
Радуйся, трубо велегласная, отгоняющая уныние;
Радуйся, теплый в бедах и скорбех утешителю,
Радуйся, со страстьми борющимся споспешителю.
Радуйся, преподобне Стилиане, великий чудотворче.
Кондак 4
Бурю злых искушений отгоняя, тесный и многоскорбный путь прохождаше, иго Христово, иго безмолвия же и всенощных стояний взем, богодарованне на верх совершенства возшел еси, да сподобишися со ангелы славити Бога, поя Ему: Аллилуиа.
Икос 4
Слыша и видя житие твое чистое и святое, преподобне отче Стилиане, лик монашеский от страны пафлагонския зело дивляшеся, тщащеся всячески похвалити тя. Мы же верою и радостию глаголем ти сицевая:
Радуйся, на высоту святости восшедый,
Радуйся, крине избранный, пустыню облагоухавый;
Радуйся, вышнее чудо и Церкве честнейший сосуде,
Радуйся, дары небесными вооруженный воине Христов;
Радуйся, в предних предстателю наш у престола Великаго Царя,
Радуйся, добрый Божий служителю, во благая уготованный;
Радуйся, Богу угодный постниче,
Радуйся, крепкое основание и скорый помощниче;
Радуйся, яко Христу Богу со смирением послужил еси,
Радуйся, яко верныя молитвами своими укрепил еси.
Радуйся, преподобне Стилиане, великий чудотворче.
Кондак 5
Богоприятными твоими мольбами скоротечную смерть младенцев уставил еси, изымая призывающих имя твое и подобие зрака твоего изобразующих пагубы и смерти; тогда матери печальныя возрадовашася, Бога славящя и Тому поющя: Аллилуия.
Икос 5
Видя младенцы, на одре болезни страждущыя, сих мольбами твоими воздвигл еси, скорби матерни на веселие прелагая, добрых чад рождение испрошая, Стилиане святе. Убо дар сицевый от Бога приемшему, вернии твоя чудныя и прехвальныя подвиги сведуще, песнопоим таковая:
Радуйся, кротостию духа лукаваго отгнавый,
Радуйся, матерей о болящих чадех печалующих утешивый;
Радуйся, яко многи чада недужныя исцеливый,
Радуйся, тако ся покровителя отрочат явивый;
Радуйся, к немуже младенцы непрестанно прибегаху,
Радуйся, яко ревнитель Божией любви от дел показался еси;
Радуйся, малодушных укрепление,
Радуйся, семейств наших утверждение;
Радуйся, чад небесный хранителю,
Радуйся, вышними дары вооруженный отшельниче.
Радуйся, преподобне Стилиане, великий чудотворче.
Кондак 6
Проповедует даже до днесь край Пафлагонский подвиги и труды твоя, Стилиане святе, понеже непроходныя места и дикия исполнишася благоуханий твоих молитв, и якоже иногда фесвитянин Илия, пустыни прозябение ты показался еси. Сего ради Богу хвалебными гласы поем: Аллилуиа.
Икос 6
Возсияв звездою блистающею, отгнал еси неверия тьму: мнози бо священными твоими предстательствы от греховнаго мрака ко спасения свету извел еси, того ради от Бога чудотворения благодать приим. Мы же, чтуще труды и духовныя дары твоя, восписуем ти таковая:
Радуйся, боговидче пресветлый,
Радуйся, храме Духа Святаго преудобренный;
Радуйся, имже преподобнии украшаются,
Радуйся, имже делатели укрепляются;
Радуйся, яко еще в теле сый, райстей сладости причастися,
Радуйся, яко водою животною напоися;
Радуйся, грехолюбивым оградо,
Радуйся, многопечальным отрадо;
Радуйся, яко пути небесному научаеши,
Радуйся, яко молитвою демонския полки расточаеши.
Радуйся, преподобне Стилиане, великий чудотворче.
Кондак 7
Всякое естество человеческое удивися, святе, безмолвному житию твоему, во одежду бо смирения истиннаго оболчен, велиими дарами свыше обогатился еси. Сего ради с тобою вкупе славим Бога, поюще: Аллилуиа.
Икос 7
Новое показа житие Владыка всех тобою, преподобне отче, Господа бо ради живот в пустыни препроводил еси, помыслы смирением к вышним возводя и молитвою источник даров низводя. Мы же, попеченьми и страстьми потемненнии, хвалим со умилением чистую и святую твою яже к Богу любовь, радостная поюще:
Радуйся, цвете таинственнаго благоухания,
Радуйся, сокровищнице неиссякаемая щедрот;
Радуйся, молитвою пламенеющий о уязвленных страстьми,
Радуйся, буиих тихостию укрощающий;
Радуйся, пастырю наш предобрый,
Радуйся, отче милостивый и кроткий;
Радуйся, острупленных душею и телом целителю,
Радуйся, ко истинней жизни путеводителю;
Радуйся, малодушныя утешаяй,
Радуйся, падшия возставляяй.
Радуйся, преподобне Стилиане, великий чудотворче.
Кондак 8
Страннну ти сущу в мире сем, вся возвеселил еси ангельским твоим житием, ныне же, в небесней славе Царю Христу предстоя, не забуди совершающих память твою, обаче моли дароватися грехов разрешению и причастию вечных благ, да с тобою во веки поим: Аллилуиа.
Икос 8
Вся пафлагонская страна устремися к тебе, яко сосуду избранному Святаго Духа, таже от дальних мнози к тебе притекаху, помощи чающе, ты же, тогда и днесь врачевания щедре точащий, приими от нас таковая:
Радуйся, молитвенниче о спасении чтущих тя,
Радуйся, Духа свиреле, к покаянию вся зовущая;
Радуйся, яко молитвою стрелы вражия отразил еси,
Радуйся, яко в чистое твое сердце Бог вселися;
Радуйся, яко подвиги твоими Ангелы возвеселил еси,
Радуйся, яко теми диавола препобедил еси;
Радуйся, верных от враг молитвенное ограждение,
Радуйся, монашествующих крепкое утверждение;
Радуйся, о мире неисчетное ходатайство,
Радуйся, присное за ны у Бога предстательство.
Радуйся, преподобне Стилиане, великий чудотворче.
Кондак 9
Хотящу ти, преблаженне отче, скончати спасительныя твоя труды, душу в руце Господа предал еси, святыми ангелы ко престолу, яже превыше небес, носимь, воспевати песни хвалебныя Богови, дивному во святых Своих: Аллилуиа.
Икос 9
Ветия добровещанная недоумеют хвалити по достоянию силу твоея яже по Бозе любве, яко милостив яви ся молитвою же и деяньми: заблуждшим яко добр путевождь, недужным яко благоуветлив врач, матерем обезчадствованным яко утешитель; мы же, о таковом ти даровании ниспосланнем радующеся, благодарственная поим:
Радуйся, мира сокрывыйся выну Бога хвалити,
Радуйся, яко и ныне Того не преставый о нас молити;
Радуйся, дар чудотворения свыше приявый,
Радуйся, яко матерей о умерших чадех печальных, новым плодоношением возвеселивый;
Радуйся, яко многоразличных страстей целитель показался еси,
Радуйся, врачу скоропослушливый;
Радуйся, теплое о нас заступление,
Радуйся, отрочат от недуг ограждение;
Радуйся, о тезоименных ти попечителю,
Радуйся, скорый помощниче чтущим тя.
Радуйся, Стилиане, великий чудотворче.
Кондак 10
Спасительное дерзновение ко Христу Богу нашему имея, того, святе Стилиане моли о нас, совершающих память твою, прославляя Бога и поя ему: Аллилуиа.
Икос 10
Стена явился еси благоотишная от напастей и бед, и преграда страстем, зане души наша и телеса обретают тобою помощь, преподобне отче. Тем смирением Богу припадающе, таже твой святый лобызающе образ, хвалим тя, вопиюще:
Радуйся, Христов благоуханный мире,
Радуйся, боголюбезныя молитвы кадило;
Радуйся, имже верным дары ниспосылаются,
Радуйся, имже всяческая искушения побеждаются;
Радуйся, о спасении нашем попечение,
Радуйся, в День Судный о нас заступление;
Радуйся, о сущих в бедах печальниче,
Радуйся, страстей телесных отгнание;
Радуйся, в таинствах достигий Божия всыновления,
Радуйся, изводяй верныя ко спасению.
Радуйся, преподобне Стилиане, великий чудотворче.
Кондак 11
Пение всеумиленное ти, отче, плещуще, яко истиннаго делателя заповедей Господних молим: помози и нам во исполнении повелений Божиих потрудитися, да небесное Царство наследим, и с тобою вкупе во веки прославим Того: Аллилуиа.
Икос 11
Светолепныя вземше свещи, вернии, приидите, в храме Божием поклонимся, преподобному же Стилиану да помолимся, тако поюще:
Радуйся, аки безплотен сый в телеси,
Радуйся, Ангелом собеседниче;
Радуйся, яко к Богови все житие управил еси,
Радуйся, яко тем раб Его показался еси;
Радуйся, венец нетленный от Бога приявый,
Радуйся, блаженство небесное со святыми наследовавый;
Радуйся, яко оттуду на ны призираеши,
Радуйся, яко молитвами твоими ны направляеши;
Радуйся, яко и ныне твоему заступлению прибегаем,
Радуйся, юных кормчий и жезле старых.
Радуйся, преподобне Стилиане, великий чудотворче.
Кондак 12
Благодать подаждь хвалити и величати тя, вси бо вернии тя ублажаем, чистейший отче, имже Церковь Христова красуется и сияет монашествующих лик. Моли милостиваго Бога, да сохранит Церковь и люди своя от всякаго злаго обстояния, огради домы наша теплотою твоих молитв, да с тобою вкупе вознесем песнословие: Аллилуиа.
Икос 12
Поюще всепразднственную память твою, преподобне отче, тебе, добровонному цвету, дарований Христовых исполнену, и облагоухавшему мира концы, восписуем похвальная:
Радуйся, его же любовию людие Божии освящаются,
Радуйся, его же божественным даром недужнии исцеляются;
Радуйся, реко неиссякаемая святыя хвалы;
Радуйся, о преславных и неизреченных радование;
Радуйся, отрочат сокровище возлюбленное,
Радуйся, всерадостная всех отрадо;
Радуйся, яко тобою пути истинному научаемся,
Радуйся, яко образу жития твоего последующии спасаются;
Радуйся, помощи твоея требующих спомогателю,
Радуйся, верных столпе и предстателю.
Радуйся, преподобне Стилиане, великий чудотворче.
Кондак 13
О, преблаженне чудотворче святый, преподобне отче Стилиане! Приими малое моление сие наше, в похвалу тебе возносимое, испроси у благаго Бога чтущим тя, прегрешений прощения, нам и чадом нашим здравия, мирови мир, тишину домом нашим, да поим и славим Его: Аллилуиа.
Молитва
О, преподобне отче Стилиане, крепосте и путевождю молитв наших! Ты страсти телесныя препобедив и со ангелы вселився, непрестанно зриши славу, уготованную святым, небеснаго веселия исполняяся. Ныне, в невечернем свете пребывая и Царю Христу предстоя, не забуди уповающыя на тя, иже со дерзновением молитвы к тебе возносят, просяще у тебе укрепления. Ты, от чрева матерня освященный, сосуд Духа Святаго соделавыйся, простираяй теплое попечение о матерех же и чадех, свобождаяй тыя печали и скорби, покажи ся скорый врач страстей и болезней душевных же и телесных хвалящих тя. Ты, Пафлагонию местом прославления Святыя Троицы соделавый, ныне пустыню сердец наших в плодородную землю претвори, да достойны дара божественнаго явятся, процветут крины веры спасительныя и умножат плоды подвигов добрых. О, преподобне отче Стилиане! Сохрани твоими молитвами семьи и чада наша, моля Милостиваго Бога о прощении грехов, здравии и спасении, да с тобою вкупе восхвалим всесвятое имя Отца и Сына и Святаго Духа. Аминь.
Примечания:
Акафист переведен с румынского через русский подстрочник.
Во избежание стилистических ошибок и тавтологии (в том числе, смысловой), осуществлена радикальная редактура, а посему переводом текст акафиста назвать нельзя, скорее подойдет определение: приблизительный пересказ.
Еще возможна несущественная стилистическая правка.