Кондак 1
Избранный архиерею, исповедниче и угодниче Христов, Православия непоколебимый столпе, Отечеству нашему крепкое ограждение и ходатаю нашего спасения, благодаряще прославльшаго тя Господа, восхваляем тя, великаго предстателя и заступника нашего. Ты же, яко имеяй дерзновение ко Господу, от всяких нас бед свободи, любовию тебе зовущих:
Радуйся, святителю Тихоне, всея Российския земли добрый пастырю и дивный предстоятелю.

Икос 1
Ангела хранителя Российския земли дарова тя Господь во дни великих бед и напастей, обышедших страну нашу, да спасет ю от погибели и призовет чад Божиих к подвигу стояния за веру и к покаянию. И ныне, егда за умножение беззаконий оскуде вера, охладе любы, надежда подвижеся, да светит всем подвиг твой и да поют вси обретшии тобою спасение:
Радуйся, Истиннаго Бога верный служителю.
Радуйся, веры Христовы непобедимый исповедниче.
Радуйся, молитвенниче за Русь неотступный.
Радуйся, пастырю наш добрый и вселюбимый.
Радуйся, страстем Христовым приобщивыйся.
Радуйся, душу за паству твою положивый.
Радуйся, благодатию Святаго Духа озаренный.
Радуйся, Христа всем сердцем возлюбивый.
Радуйся, Российския державы славо и ограждение.
Радуйся, кротости и смирения исполненный.
Радуйся, отеческих богодухновенных преданий верный хранителю.
Радуйся, правило веры и образе кротости духовныя.
Радуйся, святителю Тихоне, всея Российския земли добрый пастырю и дивный предстоятелю.

Кондак 2
Видя Господь сердца твоего изволение, от юности избра тя, да прославиши житием твоим имя святое Его, и дарова отцу твоему чрез сонное видение пророчество, яко сын его Василий будет велий пред Богом. Ты же, закону Божию усердно поучаяся, бысть пример братии твоей и исполнися духа разума, Христу Богу поя: Аллилуиа.

Икос 2
Разум имея Богом просвещенный, отче Тихоне, познал еси суету мира сего, егда во граде Пскове приял еси пострижение монашеское с именем в честь святителя Тихона, Задонскаго чудотворца, емуже подражал еси кротостию и смирением, всего себе отдав служению Единому Богу. Мы же, благоговейне тя почитающе, зовем:
Радуйся, от рождения твоего Богом избранный.
Радуйся, честных родителей чадо благословенное.
Радуйся, святителю Василию Великому тезоименитый и подражателю верный.
Радуйся, цвете благоуханный добраго воспитания.
Радуйся, от юности божественное учение возлюбивый.
Радуйся, любве ради ко Господу дом отеческий оставивый.
Радуйся, во граде Торжце под кровом великия святыни — иконы Божия Матере Корсунския поживый.
Радуйся, церковному служению от детства прилежавый.
Радуйся, еще во учении дар рассуждения явивый.
Радуйся, от друзей пророчески патриархом прозванный.
Радуйся, дарованный тебе талант умноживый.
Радуйся, покровом Пресвятыя Богородицы осененный.
Радуйся, святителю Тихоне, всея Российския земли добрый пастырю и дивный предстоятелю.

Кондак 3
Силою свыше облече тя Дух Святый, архипастыря Церкве Российския поставляя; ты же в добродетелех возрастая, уготовлял еси себе к подвигу сему, разумея, яко истинное служение архипастыря есть непрестанное умерщвление от забот, трудов и печалей, ревностно подвизался еси о спасении вверенныя тебе паствы и о помощи небесней молился еси, взывая Богу: Аллилуиа.

Икос 3
Имея в сердце своем твердую веру во Христа, святителю Тихоне, не точию в России, но и в Новем Свете послужил еси Богу, идеже, подражая апостолом, обходил еси грады и веси, просвещая люди светом Православия, и усердно молил еси Бога, да утвердит их в вере и благочестии и да прославит имя Свое. Сего ради и мы, воспоминающе велия труды и подвиги твоя, величаем тя:
Радуйся, апостольскую силу восприемый.
Радуйся, во благовестии Христове потрудивыйся.
Радуйся, запад солнца светом Православия озаривый.
Радуйся, молитвенниче к Богу дерзновенный.
Радуйся, равноапостольным просветителем Новаго Света преподобному Герману и святителю Инокентию в трудех и подвизех поревновавый.
Радуйся, Православныя Церкве во Америце небесный покровителю.
Радуйся, светильниче, седящих во тьме просветивый.
Радуйся, правую веру непреложно утвердивый.
Радуйся, стадо, тебе от Христа врученное, сохранивый и ко спасению наставивый.
Радуйся, Христова виноградника делателю верный.
Радуйся, всех православных христиан заступниче.
Радуйся, у Престола Святыя Троицы всегда за ны молящийся.
Радуйся, святителю Тихоне, всея Российския земли добрый пастырю и дивный предстоятелю.

Кондак 4
Бурю лютых искушений воздвиже князь мира сего на державу Российскую и Церковь Божию. Во дни сия мятежей и нестроений соборно избирает тя народ православный Московскаго архипастыря, отче Тихоне, да будеши всем верующым пастырь и наставник в жизни сей, да охраниши и оградиши молитвою твоею от бед и напастей град Москву — сердце Руси православныя. Мы же, таковому промышлению Божию радующеся, благодарне вопием: Аллилуиа.

Икос 4
Слыша Господь ходатайства Царицы Небесныя о спасении и устроении России, Дома Ея земнаго, воздвиже тя, святителю отче Тихоне, пастыря и отца по сердцу нашему, уготовляя всех на день испытания, дабы собрал ты воедино ратоборцы Христовы и извел их на брань со враги Церкве Его. Сего ради приими от нас похвалы сия:
Радуйся, Православия великий ревнителю.
Радуйся, светильниче земли Российския.
Радуйся, за Дом Пречистыя Богородицы даже до смерти стояти призываяй.
Радуйся, воине Христов непобедимый.
Радуйся, любовию своею нас согреваяй.
Радуйся, отче милостивый и благодатный.
Радуйся, любви к Богу и ближним нас научаяй.
Радуйся, народа твоего премудрый наставниче.
Радуйся, на вся времена образ истиннаго пастыря земли нашея показавый.
Радуйся, не посрамивый нашего упования.
Радуйся, граду Москве Богом данный покровителю.
Радуйся, Церкве Христовы мужественный защитниче.
Радуйся, святителю Тихоне, всея Российския земли добрый пастырю и дивный предстоятелю.

Кондак 5
Яко лучезарную звезду, весь мир озаряющую до края земли показала еси нам, Владычице мира, честную икону Свою, Державною именуемую, на нюже взирая святитель Московский Тихон Тебе, Пречистая, покланяяся, молися о спасении и избавлении Отчизны нашея от нужды и печали, поя Богу: Аллилуиа.

Икос 5
Видевше тя людие Российстии главу великаго Собора Церкве Русския Православныя, удивишася, егда рекл еси, яко ныне, во дни скорби и гонений, переживаем радостное время. Ты бо, ведая, яко прииде Благодатная во спасение людей Своих, вверил еси страну нашу и Церковь Русскую Владычице Державней. Мы же в Державный Ея Покров прибегающе, воспеваем тя, святителю Божий и верный служителю Господа:
Радуйся, все упование на Матерь Божию возложивый.
Радуйся, Отчизну нашу и Церковь Христову Покрову Ея вручивый.
Радуйся, явлением иконы Божия Матере Державныя возвеселивыйся.
Радуйся, дивный акафист иконе сей написати благословивый.
Радуйся, икону святую Державную в щит и ограждение страны Российския показавый.
Радуйся, яко иконою тою многая чудеса изливаются.
Радуйся, к Богоматере молитвенниче наш неусыпный.
Радуйся, яко милостию Пречистыя дарова Господь тя в радость и утешение страждущым.
Радуйся, Божия Матере избранниче.
Радуйся, верный таин Божиих строителю.
Радуйся, сердце свое во всегдашнее Богу и Божией Матери служение предавый.
Радуйся, яко вшел еси в радость Господа твоего.
Радуйся, святителю Тихоне, всея Российския земли добрый пастырю и дивный предстоятелю.

Кондак 6
Проповедует вся земля Российская милость Твою, о Богомати, како во дни разорения и смуты в Отчизне нашей священный Собор Церкве Русския Патриарха, всея же Руси единаго пастыря и молитвенника утверди. Ты же, Пречистая, от иконы Твоея Владимирския жребий первосвятительства сего Твоему избраннику, святителю Московскому Тихону, даровала еси, да расточенная чада Церкве паки воедино соберет и грядут по нему вси, поюще Богу: Аллилуиа.

Икос 6
Возсия свет радости в сердцах верных, егда Собора освященнаго избранник взыде на престол патриаршия власти, глаголя: «Понеже священный и великий Собор суди меня, недостойнаго, быти в таковом служении, благодарю, приемлю и нимало вопреки глаголю». Темже и мы, чудное твое избрание воспоминающе, поем:
Радуйся, в день Успения Пресвятыя Богородицы главою Собора Всероссийскаго возглашенный.
Радуйся, тем Собором к великому и страшному служению твоему призванный.
Радуйся, пред иконою Божия Матере Владимирскою по жребию Патриархом избранный.
Радуйся, на престол патриарший в день Введения во Храм Пресвятыя Богородицы возшедый.
Радуйся, жезл перваго святителя Московскаго Петра достойно приемый.
Радуйся, в ризу священномученика Патриарха Ермогена облаченный.
Радуйся, великих святителей Российских сопрестольниче.
Радуйся, всех под покров и защищение отечески приемляй.
Радуйся, тяжкий жребий патриаршества со смирением понесый.
Радуйся, от Господа умудренный в служении своем.
Радуйся, первосвятителю, от Самаго Господа предызбранный.
Радуйся, заступниче наш и верный от бед хранителю.
Радуйся, святителю Тихоне, всея Российския земли добрый пастырю и дивный предстоятелю.

Кондак 7
Хотя враг рода человеческаго веру Христову истребити в земли Российстей, воздвиже бурю злобы нечестивых на Церковь Божию. Тогда мнози архиереи, священницы, монаси и мирстии страшныя муки и смерть прияша. Ты же, отче Тихоне, моление устави совершати о гонимых и убиенных исповедницех и новомученицех, ихже имена весть Господь. Темже прославляюще укрепившаго их Христа Бога нашего, благодарно поем Ему: Аллилуиа.

Икос 7
Новый светильник и Церкве непоколебимый столп явился еси, святителю отче Тихоне, егда призвал еси народ православный к подвигу стояния за веру, возвысив глас свой: «Аще нужно есть пострадати за дело Христово, зовем вас, возлюбленная чада Церкве, на сия страдания вместе с собою, да расточатся и посрамлени будут врази Церкве силою Креста Христова». Мы же, ведуще силу благословения твоего, величаем тя:
Радуйся, исповедниче веры во Христа неустрашимый.
Радуйся, всех верных стоянию до смерти за Православие научивый.
Радуйся, прияти мученическую смерть желавый.
Радуйся, чашу страдания и долготерпения до конца испивый.
Радуйся, на страже Руси Православныя до смерти стоявый.
Радуйся, свободу и достоинство Церкве Христовы хранивый.
Радуйся, отрадо и утешение скорбящих людей Российских.
Радуйся, паствы твоея добрый наставниче.
Радуйся, неправедно гонимых защитниче.
Радуйся, немощных укрепление.
Радуйся, к духовному подвигу всех чад Церкве Христовы призываяй.
Радуйся, образе мужества духовнаго.
Радуйся, святителю Тихоне, всея Российския земли добрый пастырю и дивный предстоятелю.

Кондак 8
Странно есть маловерным и малодушным видети, како святитель Христов Тихон грозно обличает безбожных властителей тьмы века сего, пророчествуя, яко Господь посрамит и разорит их замыслы, и от меча погибнут взявшии меч, и взыщется от них всякая кровь праведная, ими проливаемая. Тогда вси людие узреша, яко Патриарх всея России не ведает страха пред князем мира сего с его служители. Мы же, прославляюще Господа, даровавшаго избраннику Своему таковое дерзновение, поем Ему: Аллилуиа.

Икос 8
Вся сила вражия ополчися на тя, святителю Тихоне, егда приидоша тати и разбойницы, послушнии своим повелителем, покушавшиися лишити тя патриаршаго и священнаго сана. Во гневе воззре Господь на них и посмеяся им: не послушался бо еси, святителю Божий, разбойническаго собора, не предал еси земным лиходеем власти своей, врученныя тебе Самою Царицею Неба и земли. Таковую победу твою над слугами тьмы празднующе, поем тебе:
Радуйся, поборниче крепкий противу вождей тьмы века сего.
Радуйся, дерзновенный заступниче за веру православную, теми гонимую.
Радуйся, грозный обличителю нечестия, лжи и беззакония.
Радуйся, праведности дивное благоухание.
Радуйся, неправедное лишение патриаршаго сана и монашества претерпевый.
Радуйся, разбойническому собору не подчинивыйся.
Радуйся, анафему врагом Креста Господня изрекий.
Радуйся, стено нерушимая посреде бури страстей, безбожия и злобы.
Радуйся, вся угрозы и прещения врагов Церкве Христовы презревый.
Радуйся, лжеучителей лукавство разоривый.
Радуйся, в разуме Богом просвещенный.
Радуйся, яко стяжал еси блаженство гонимых за правду.
Радуйся, святителю Тихоне, всея Российския земли добрый пастырю и дивный предстоятелю.

Кондак 9
Слышавше твое обличение, святителю Тихоне, сыны беззакония убояшася тя, яко втораго Ермогена и, ярости исполнившеся, в темницу ввергоша тя, не ведающе, яко несть преграды молитве первосвятителя Церкве Русския, Богом поставленнаго, ни в темничных стенах, ни в разстояниих, но яко фимиам благовонный возносятся его моления к Престолу Святыя Троицы, идеже со ангелы весь сонм святых земли нашея поет: Аллилуиа.

Икос 9
Витий человеческих уста не возмогут изъяснити чудо освобождения твоего, но яко апостол Петр избавлен бысть от уз темничных силою молитвы Церкве Христовы, тако просия вскоре победою вера православных людей и молитва твоя. Видяще тя из темницы возвращающася, людие возглашаху: «Христос Воскресе», чада же твоя со слезами лобызаху следы ног святейшаго отца своего, готовии идти за него в темницы и на смерть. Услыши и нас, верою поющих из глубины души:
Радуйся, заточение в темницу за Христа претерпевый.
Радуйся, сердца всех православных христиан России в молитвах за тя соединивый.
Радуйся, угрозы мучителей презревый.
Радуйся, народом России возлюбленный.
Радуйся, николиже в сделку с князем мира сего не вступивый.
Радуйся, кротостию и смирением вражия сети сокрушивый.
Радуйся, скорый помощниче всем за веру истинную гонимым.
Радуйся, всем народом православным почитаемый и славимый.
Радуйся, сущым в темницах и узах утешителю.
Радуйся, сильным мира сего небоязненный суда Божия провозвестниче.
Радуйся, путь жизни всей стране Российстей осветивый.
Радуйся, вольным страданием Христовым подражавый.
Радуйся, святителю Тихоне, всея Российския земли добрый пастырю и дивный предстоятелю.

Кондак 10
Спасение устрояя роду человеческому, попусти Господь велия бедствия и искушения претерпети Церкви Русстей; но не потопити морю житейскому корабля Христова, да не погибнет Церковь Православная. Се бо добрый кормчий, Патриарх Тихон направи корабль Российский к тихой пристани Православныя Церкве, да подвижется держава Российская, благодатию Святаго Духа осененная и кровию новомучеников обагренная, ко исполнению призвания своего. Мы же, радующеся сему, благодарно вопием Богу: Аллилуиа.

Икос 10
Стена необоримая и оружие непобедимое был еси, святителю Тихоне, противу миродержителей тьмы века сего, егда радостный возшел еси на крест служения своего, апостольское дерзновение с духовным разумом соединив, и соделался еси главою великаго и славнаго воинства страдальцев за веру Христову: царие со сродники, святители и пастыри Церкве, монаси и мирстии, мужи и жены, младенцы и отроцы составиша Собор новомучеников и исповедников Российских. Мы же с любовию воззовем ти, помощнику всех душу свою полагающих за други своя:
Радуйся, кормчий Церкве Русския Православныя, Богом избранный.
Радуйся, в бурях и стихиях мира корабль церковный проведый.
Радуйся, в гефсиманийстей молитве паствою твоею не оставленный.
Радуйся, Голгофу свою с радостию приявый.
Радуйся, живым сердцем православныя России соделавыйся.
Радуйся, к сонму новомучеников и исповедников Российских сопричтенный.
Радуйся, великий архиерею, безкровную жертву о людех приносивый.
Радуйся, о прощении прегрешений народа своего пред Богом молитвенниче.
Радуйся, проповедниче и учителю покаяния.
Радуйся, печальниче земли нашея.
Радуйся, в стоянии за истину Православия жизнь свою отдавый.
Радуйся, со всеми святыми Богу угодившими, наследие обретый.
Радуйся, святителю Тихоне, всея Российския земли добрый пастырю и дивный предстоятелю.

Кондак 11
Пение надгробное и рыдание творит Русь Православная у гроба Патриарха Тихона, скончавшагося с тихою молитвою благодарения и славословия. Мы же, с любовию припадающе к мученическому ложу новаго Ермогена, воспоминаем слова святителя Филиппа грозному повелителю Руси: «Мертвый буду вам еще страшнее, а истязуемому вами народу еще милее, нежели живый». Темже убо людие православнии душу святейшаго отца своего к Небеси провождающе, умиленно воспеша Богу: Аллилуиа.

Икос 11
Светом благодати Божия осиян бысть град Москва и обитель Донская, егда прииде день прощания, яко велие духовное торжество и дивная радость в сердцах, растворенная печалию о безвременней кончине духовнаго отца народа нашего. Зряще на сей день скорби и торжества Православия, и мы веруем, яко непреложно есть обетование Господа нашего: «Созижду Церковь Мою, и врата адова не одолеют ея». Темже, святителю Тихоне, светом любве твоей озаряеми, поем тебе:
Радуйся, в день Благовещения Пресвятыя Богородицы в вечныя обители призванный.
Радуйся, в храме Донския иконы Богоматере упокоивыйся.
Радуйся, в Неделю Ваий погребенный.
Радуйся, тем путь к Голгофе Русстей Церкви от Господа указавый.
Радуйся, славнейшаго града Москвы похвало и украшение.
Радуйся, обители Донския неусыпный хранителю.
Радуйся, Архангелов и Ангелов сослужителю.
Радуйся, праотцев радосте.
Радуйся, пророческому служению причастный.
Радуйся, апостолов достойный преемниче.
Радуйся, в сонме мучеников и исповедников прославленный.
Радуйся, святителей и преподобных сонаследниче.
Радуйся, святителю Тихоне, всея Российския земли добрый пастырю и дивный предстоятелю.

Кондак 12
Благодати Божия сокровище явишася нам святыя мощи твоя, святителю Тихоне. Вся в мире падшем истлевают, обаче сила Божия побеждает естества чин: тако мощи и ризы твоя нетленны сохранишася в недрех земли. Темже радуемся мы грешнии, имуще чудныя мощи твоя в храме Донския обители яко знамение милости Божия в новая смутная времена державы Российския, и благодарственно взываем Богу: Аллилуиа.

Икос 12
Поюще твое прославление, святителю Тихоне, почитаем страдания, хвалим долготерпение и кротость, славим мужество и вся подвиги твоя, яко великаго молитвенника о нас пред Богом, утешителя и предстателя. Тобою Бог украси Дом Матере Своея — землю Русскую, и тело твое, многолетно в земли сокровенное, чадом твоим возврати. И ныне, пред ракою мощей твоих предстояще, величаем тя:
Радуйся, знамение милости Божия открытием твоих мощей явивый.
Радуйся, нетлением мощей твоих зарю общаго воскресения мертвых показавый.
Радуйся, благодать исцелений от раки мощей твоих изливаяй.
Радуйся, яко мощей твоих демони трепещут.
Радуйся, яко молящымся тебе даруеши духовное утешение.
Радуйся, ты бо, яко солнце новое, освещаеши страну нашу.
Радуйся, мирския бури, волнения и мятежи в тишину мудре прелагаяй.
Радуйся, радостию о Господе озаренный.
Радуйся, путь спасения многим людем Российским указуяй.
Радуйся, всех под кров и защищение отечески приемляй.
Радуйся, Матерь Божию яко Заступницу рода Христианскаго почитавый.
Радуйся, от Господа венцем славы на Небесех венчанный.
Радуйся, святителю Тихоне, всея Российския земли добрый пастырю и дивный предстоятелю.

Кондак 13
О великий святителю и страстотерпче Христов отче Тихоне, подвиг стояния до смерти противу сил злобы подъемый, веру Христову яко щит пред лжеучении мира сего державый и нам образ терпения и мужества духовнаго явивый, приими моление наше, тебе приносимое, даруй духовному стаду твоему и Отечеству нашему помощь в битве за веру православную, за спасение России, укрепи в сердцах наших веру, надежду и любовь, да сподобимся в радости воспевати Богу и Спасителю нашему: Аллилуиа.
Этот Кондак читается трижды, затем 1-й Икос: «Ангела хранителя...» и 1-й Кондак: «Избранный архиерею...»

Молитва святителю Тихону, Патриарху Московскому и всея России чудотворцу
О пастырю наш добрый, святый великий Патриарше Тихоне! Яко град горний ты явился еси: добрая дела твоя и доныне светятся пред человеки. Вемы, яко ты, предстоя Престолу Святыя Троицы, велие имаши дерзновение в молитвах пред Господем. Воззри и ныне на нас, грешных и недостойных чад твоих, к тебе бо, яко имущему велие дерзновение пред Творцем всяческих, ныне припадаем и усердно молимся: умоли Господа, да подаст нам решимость стяжати благочестие отцев наших, егоже ты стяжал еси от юности твоея. Ты в житии своем ревностный защититель и хранитель истинныя веры был еси, помози и нам незыблему соблюсти веру православную. Тихая бо душа твоя зело преуспела есть в божественнем смиренномудрии: научи и нас разум наш питати не многомятежною мудростию человеческою, но смиренным познанием воли Божия. Ты пред лицем лютых врагов Христовых Истиннаго Бога дерзновенно исповедал еси; молитвою своею укрепи нас, малодушных, да и мы всегда и всюду противустанем духу безбожия и льсти. Ей, угодниче Божий, не презри нас, молящихся тебе, ибо не токмо от бед и скорбей избавления просим, но силы и твердости, великодушия и любве, дабы претерпети оныя напасти, востающия на ны. Испроси нам неослабное терпение даже до конца жития нашего, мир с Господем и грехов стпущение. Отче святый! Укроти в стране нашей ветры неверия и смуты, да водворит Господь на земли Российстей тишину, благочестие и любовь нелицемерную; молитвами твоими да сохранит ю от междоусобныя брани, да укрепит Святую Церковь нашу Православную, да не оскудеет она истинными пастырьми, добрыми делательми, право правящими слово Евангельския истины; упаси и заблуждшыя овцы стада Христова. Наипаче же моли Господа Сил, да возродится Русская земля святым покаянием и единем сердцем и едиными усты прославит дивнаго во святых Своих Бога, в Троице славимаго Отца, и Сына, и Святаго Духа во веки веков. Аминь.

Молитва иная
О великий угодниче Божий, страстотерпче и святителю отче Тихоне, яко благоуханный цвет Российскаго луга духовнаго дивно процветый и добрый плод Христу Богу в терпении принесый, главо славнаго воинства новомучеников и исповедников Российских, ты соделался еси отцем всем православным христианом страны нашея и разсеянным по миру чадом Русския Церкве, ты еси наш хранитель и ходатай пред Господем, печальник и молитвенник за землю Русскую — Дом Пресвятыя Богородицы. С любовию припадаем к тебе и прославляюще подвиги твоя благоговейно молим тя, молися Господу нашему Иисусу Христу, яко Насадителю жизни и Победителю смерти, да не погибнет Россия, Отчизна наша, но да будет даже до конечнаго суда Божия светом православныя правды во откровение языков, да не оскудеет вера наша, да не угаснет надежда, да утвердится любы в сердцах наших. О святителю наш милостивый, Церкве Русския светило и столпе непоколебимый, покаяния мудрый проповедниче, молим тя, укроти междоусобную брань страстей наших, огради Церковь Русскую Православную от ересей и расколов, сохрани нас от тлетворных учений и суеверия, избави от лукавых человек, сохрани жизнь нашу от развращений и нестроений, врагами веры и Отечества нашего воздвизаемых, всяческих же искушений избави нас и сподоби в любви и единомыслии совершати дело Господне и воспевати со всеми верными чады Церкве Христовы славу Отцу и Сыну и Святому Духу во веки веков. Аминь.