Акафист преподобному Варнаве Гефсиманскому

День памяти преподобного Варнавы Гефсиманского – 17 февраля (2 марта) и в Соборе Радонежских святых – 6 (19) июля. 

Тропарь, глас 5
Измлада Христа Бога чисте возлюбив, / сын утешения был еси, / преподобне отче Варнаво. / По имени и житие твое бысть: / коемуждо страждущему, и нищу, и царю / пастырь кроток, утешитель и целитель явился еси. / Поминай нас, благодатный отче, / да молитвами теплыми твоими / Жизнодавец Бог дарует нам / утешение и велию милость..

Кондак, глас 2
Печальнику земли Российския Преподобному Сергию от юности последовал еси, святе Варнаво, / и завет старца твоего, сице рекшаго: / «Тако хощет Бог: / словом и хлебом питай алчущих», - поистине до конца исполнил еси. / Сего ради и ныне молим тя, / не остави нас, утешительный отче, / небесною любовию твоею.

Кондак 1
От утробы матерней предъизбранный на служение Христу Богу, отроком зрел еси Его и Ангельскаго посещения сподобился еси; к Преподобному Сергию в юности притекл еси и шед от силы в силу совершенную основал еси обитель монашескую на Выксе-реце; луче Гефсиманскаго скита, отче Варнаво, достигл еси вечныя обители, идеже пребываеши и молишися непрестанно о душах наших, поющих ти:
Радуйся, преподобне Варнаво, монахов наставниче, мирских напутие, верных утешение.

Икос 1
Нищетою духовною стяжал еси благодать подавати многоцелебные плоды страждущим телесно и духовно, сего ради молитвами твоими укрепляеми взываем ти:
Радуйся, вездеприсутствие Божие на всяк час во уме своем имевый;
Радуйся, не токмо хлебом, но паче духом питавый;
Радуйся, не умеющим нам самим себе помощи, помогаяй;
Радуйся, яко из Горняго Мира старцами-наставниками бе укрепляемь, тако и нас ныне заступаяй;
Радуйся, паче нас слышащий нежели мы умеем тя призывати;
Радуйся, всем взаимнаго мира и любви желавый искати;
Радуйся, жизнь свою спасению других посвятивый;
Радуйся, духом всякую страсть умертвивый;
Радуйся, со всяким смирением ради Господа нищету духовную возлюбивый;
Радуйся, идеже мы ропщем Господа благодаривый;
Радуйся, греха непричастный, славы Небесной причастниче;
Радуйся, во олтаре церковнем кончину приявый Божий избранниче;
Радуйся, преподобне Варнаво, монахов наставниче, мирских напутие, верных утешение.

Кондак 2
Приявши телесное и добре воспитанный родителями твоими Илией и Дарией на жизнь земную временную, сторицею воздал еси духовное, по прошествии же многих лет во инокини обители тобою созданной постригл еси матерь свою, напутствовав в радость жизни вечной, идеже со Ангелы вопиет есть Богу: Аллилуиа.

Икос 2
На свой путь подает Господь силы, рекл еси, отче Варнаво, да исполним малое в подвизе, ниже в гордости возжелаем большаго самоизвольнаго креста и чуждаго дела. Тако поучаеми взываем ко наставнику предоброму:
Радуйся, с пути неправеднаго на путь правый наставляяй;
Радуйся, ниже премудростию высокой, обаче простотою сердечной человеков от грехов изимаяй;
Радуйся, верою притекающих тебе греховных недуг исцеляяй;
Радуйся, на жизнь вечную из рук смертных человеков таскаяй;
Радуйся, самоотвержение и смиренномудрие себе вспоможением имеяй;
Радуйся, молитвами тебе ко Господу нас приближаяй;
Радуйся, недуг смущения человеков чрез кротость побеждителю;
Радуйся, смелых в нанесении скорбей, малодушных в пренесении я обличителю;
Радуйся, непослушных, исполняющих послушание, аще предваряет е своеволие исправителю;
Радуйся, стоящих на своем и к другим неуступчивым к истине наставителю;
Радуйся, благодушествуемый в терпении,
Радуйся, вознесыйся по смирении,
Радуйся, преподобне Варнаво, монахов наставниче, мирских напутие, верных утешение.

Кондак 3
В простоте сердца проходил еси безпреткновенно вся скорбныя наветы лукаваго, помози и нам дмению чуждым быти, яко преити нам в час смертный испытаний последних край, да не возмется от нас, еже мним имети и вкупе с тобою воспоем на небесех: Аллилуия.

Икос 3
Узким путем утеснения плоти шествовал еси, почитая недозревшим плодом себя, чрез томление чрева, всеночное стояние, воду в меру, хлеб в скудости, очистительное питие безчестия, насмешки, поругания, отсечение своей воли, терпение нападков, безропотное переношение небрежения, вменение ни во что оскорблений, и навык, егда обижают не сердитися, егда унижают не гневатися, егда осуждают смирятися, пременил ся во зрел плод. Темже и образ действовати указал и нам, благодарно хвалящих тя:
Радуйся, томлением чрева щедрыми плодами благодати душу напитавый;
Радуйся, питием безчестия очищение приявый;
Радуйся, паче Тайнами Христовыми, нежели пищей тленной подкреплявыйся;
Радуйся, претерпением насмешек и заушений в радость Господа восшедый;
Радуйся, временныя поругания в вечную хвалу претворивый;
Радуйся, от трудов попечительных снести свой хлеб забываяй;
Радуйся, небрежения безропотным переношением великаго промышления о тебе Господа приявый;
Радуйся, ни во что оскорбления вменивый;
Радуйся, уныние пренесением обид победивый;
Радуйся, всеночными стояниями всевечный покой достигнувый;
Радуйся, пренесением унижения безгневие стяжавый;
Радуйся, в нечестии осуждения тя златой плод смирения ископавый;
Радуйся, преподобне Варнаво, монахов наставниче, мирских напутие, верных утешение.

Кондак 4
Бурю искушений имевшую приити на тя в многотрудном житии твоем победил еси упованием Божиим и твоих старцев-наставников заступлением укрепляемый, подвизаеши и нас уповати ниже на свои немощныя силы, но паче на Божие, всех святых и твое заступление, вопия: Аллилуия.

Икос 4
Вся скорби со всяческим смирением учил переносити, образом Иова, плачущаго на гноищи, Предтечи, алчущаго в пустыни, Петра, распятаго на кресте, Самой Преблагословенной Матери Спаса нашего при Кресте Божественнаго Сына, темже наставнику нашему поим:
Радуйся, бедствия привременныя в радость вечную претворивый;
Радуйся, всякое плотское упокоение презревый;
Радуйся, аще страдавый телом, ныне духом упокоеваемый;
Радуйся, горьким лекарством скорбей грехи и немощи целити призываяй;
Радуйся, многих напастей претерпением в Царствие Божие вшедый;
Радуйся, страдавый по времени, ныне выну блаженствующий;
Радуйся, образом смирения и нам благой пример явивый;
Радуйся, неотступно просивый благая у Господа и просимое получивый;
Радуйся, плакати о гресех, доколе время есть и жизнь не пресеклася учивый;
Радуйся, скорби, тесноту, всякую болезнь и злострадания в благодарности встречавый;
Радуйся, нашего спасения небесный благожелателю;
Радуйся, не престающих от грехов и льстящих милости удостоитися, яко прелести бесовской обличителю;
Радуйся, преподобне Варнаво, монахов наставниче, мирских напутие, верных утешение.

Кондак 5
Краткое время делания и искуса со всяким благоугождением Господу провел еси, сохранив чистоту и целомудрие в отрицании всякаго греха мыслию и делом. И рекл еси: «Не смерть бо, но грех разлучает нашу душу с Богом». Сего ради на небесех выну воспеваеши Ему: Аллилуия.

Икос 5
На месте, среди идольскаго мрака, святым нареченнем и чудесно посещеннем иконой Оранской Божией Матери, основал еси обитель Иверскую и удостоверенный утешительным посещением Божиим во устранение сомнений, извел еси благая от недостоинства раскола, да и мы с сестрами-будильщицами сей обители воскликнем: «Православные вставайте! Бдению настало время и молитве час!». Виновнику же сего возопиим:
Радуйся, ко благочестию единомысленному люди приводящий;
Радуйся, людям заблуждающим светом Христовым путь указующий;
Радуйся, внятному, неспешному и истовому чтению и пению в ней насадителю;
Радуйся, монастырскаго устава строгий наблюдателю;
Радуйся, «для монаха праздника нет», рекий, Христов трудолюбче;
Радуйся, чадом твоим верным спасительный отче;
Радуйся, нападения бесов отражати чадом твоим помогаяющий;
Радуйся, многотрудную жизнь во обители, яко в раи, соблюдением заповедей Божиих соделавший;
Радуйся, никогоже чад твоих небрежением презревый;
Радуйся, полунощней молитве, яко наипаче благодатней, поучавый;
Радуйся, блаженную кончину исповедуя чад твоих, во олтаре приявый;
Радуйся, сеявый в горестех, в сладости возрастивый;
Радуйся, преподобне Варнаво, монахов наставниче, мирских напутие, верных утешение.

Кондак 6
Умерщвлением греховным приношаем Ти страдания, Христе, яко гвоздие в Твоя раны вонзаеми, но молитвами отца нашего Варнавы утверди в нас гвоздь веры, еже от всех скорбей и бед привременных крепчае пригвождает душы наша ко кресту Твоему, вопиющих Ти: Аллилуиа.

Икос 6
По малу восходя на высоту преспеяния достигл еси вершин небесных, будучи нам образом постепеннаго делания, да не взявшись за многое посмеваемы будем от враг бесплотных за нетерпение, но имея тя заступника, отче Варнаво, возопиим ти:
Радуйся, непосильных подвигов, яко понуждений вражиих обличителю;
Радуйся, человекоугодия приклоньшихся строгий исправителю;
Радуйся, путем искушений достигший спасения;
Радуйся, сердечные помышления людские прозреваяй;
Радуйся, в страданиих страсти телесныя умертвивший;
Радуйся, смирением и любовию страсти душевныя поборавший;
Радуйся, памятию смертною враги побеждавший;
Радуйся, на всяк день и ночь испытати душу свою призывавый;
Радуйся, хвалу Господу за вся воздававый;
Радуйся, к покаянию аки ко врачевству от греха прибегати побуждавый;
Радуйся, отсекати житейские страсти и навыки терпением научаяй;
Радуйся, нищетою духовною притекающих к тебе насыщаяй;
Радуйся, преподобне Варнаво, монахов наставниче, мирских напутие, верных утешение.

Кондак 7
Видехом Свет Истинный непщевани быша во свете, но всегдашним преклонением ко греху растеряли спасительную благодать, во мраце неведения водворились есте. Помози нам Господи, всегда зрети Свет Твой, попаляяй греси наша, да взываем вкупе с молитвенником о нас крепким, отцем Варнавой: Аллилуия.

Икос 7
Аще царские брашна низводят долу дух наш, земное же ядие удобее дух горе возводит, паче же удалением злаго плод содевает зрел поста. Сего ради поучениями сими возгреваеми возопием Варнаве, преподобному отцу нашему:
Радуйся, не хлебом, но паче правдою Божией питавыйся;
Радуйся, от всякия лукавыя вещи огребавыйся;
Радуйся, постивыйся телесне, прилагавый к сему и сердца плод духовный;
Радуйся, постом удалятися зовый не токмо злых дел, но мыслей неподобных и слов праздных;
Радуйся, не уподоблению, но поучениям Святых Отцев, яко млечной пище паче твердой призывавый;
Радуйся, труд молитвы в наслаждение претворивый;
Радуйся, чрез любовь к ближним сердечныя очи отверсты выну имевый;
Радуйся, слезами сердечнаго покаяния недостающее правых дел восполняти советовавый;
Радуйся, покаяния плачем утешения дар получивый;
Радуйся, яко тем даром добрым вполне другим послуживый;
Радуйся, Господу жертвами духовными – верою, надеждею, любовию, благоугодивый;
Радуйся, рекий: «праведника нет единаго на земле, все грешники пред Богом оправдываются туне, благодатию Господа Иисуса Христа»;
Радуйся, преподобне Варнаво, монахов наставниче, мирских напутие, верных утешение.

Кондак 8
Время покаяния скорой жизни нашей, яко молния проходит и не возвращается, но ради Господа да сотворим труды и спасет тем души наша. Тако научал еси, преподобне отче, да и нам, творя тако, воспети с тобою на небесех: Аллилуиа.

Икос 8
Поучал еси нас, яко совести гласу, обличающу нас всяко внимать следует: сей бо есть глас неба к нашему исправлению взывающий. Но аще пробуждаются в нас мир и радость и святыя помышления, да познаем ктому: сие бо суть к точному исполнению заповедей Божиих, еже творил по всяк день и час, сего ради поем ти:
Радуйся, верные пути нам, коемуждо словом, коемуждо жизнию своею указующий;
Радуйся, начальных к царскому пути приуготовляяй;
Радуйся, внушениям доброй совести следовавый;
Радуйся, обаче «старец-простец» прозванный, но духом в превыспренняя проницаяй;
Радуйся, от злых бесед отвращавыйся;
Радуйся, праздность трудолюбием отгонявый;
Радуйся, светом Христовым облиставаемый;
Радуйся, хвалы Богу возносяй, сего ради ныне многими похваляемый;
Радуйся, молитвы наша ко Господу преносяй;
Радуйся, время благоприятное ко спасению употребивый;
Радуйся, от скверн греховных вполне душу очистивый;
Радуйся, сквозе тесныя врата прошедый;
Радуйся, преподобне Варнаво, монахов наставниче, мирских напутие, верных утешение.

Кондак 9
Любы Божия вся побеждает, и время, и смерти преграду, сего ради на покров любве твоея надеемся, преподобне отче Варнаво, яко возгреваеми ею убежим маловерия, возставляеми тобою Богу нашему пети: Аллилуиа.

Икос 9
Верные ученицы твои, вкупе со святыми Царственными мученицами и всеми новомучениками Росийскими, напутием твоим претерпеша годину богоборческих испытаний, овы мученицы, овы старцы явистеся, ныне славы небесной сподобистеся, сего ради мы причастия награды получити за их подвиг, надежду имамы, яко и ты рекл еси: «Пред концем рассвет будет», взываем ти:
Радуйся, надежду безнадеждным возвращаяй;
Радуйся, всяцей маловажней немощи, яко от Бога удаляющей, противниче;
Радуйся, чад твоих жизнями достойными познавыйся;
Радуйся, яко вкупе с ними ныне наставником нам являешися;
Радуйся, двумя крилами: послушанием и смирением к Богу возлетевый;
Радуйся, душу свою ради Господа отщетивый;
Радуйся, яко свою волю на Божию пременивый;
Радуйся, со страстьми и похотьми плоть распявый;
Радуйся, ниже своих, но паче святых отец поучения предлагавый;
Радуйся, алкавый прежде правды Божией, ныне насытивыйся и других насыщаяй;
Радуйся, певец пресладкий смирения;
Радуйся, присносущнаго света сияние;
Радуйся, преподобне Варнаво, монахов наставниче, мирских напутие, верных утешение.

Кондак 10
Егда отречемся себя, тогда по явлению действуемаго Духа Святаго, познати сможем истинное естество наше, еже на тебе, отче Варнаво, зримо видехом исполньшеся, и да возопиим Царю царствующих: Аллилуиа. 

Икос 10
Разбойника, страстию пиянства уязвляема, имущаго помышление убити тя, простил еси и предстательством за него на судищи избавил еси от уз, тако и нас, страстям подклонившихся заступи в час кончины нашея, вопиющих ти:
Радуйся, на Господа вся печали своя возверзавый;
Радуйся, всепрощением Божие прощение приявый;
Радуйся, злое на доброе прелагавый;
Радуйся, волю Господню познавый;
Радуйся, во всякое время в ней поучавыйся;
Радуйся, всякаго зла не убоявыйся;
Радуйся, не точию слышатель, но заповедей Божиих делателю усердный;
Радуйся, луга духовнаго цвете благоуханный;
Радуйся, невидимое земному естеству, яко небожитель видящий;
Радуйся, всуе рыдающих к исцеляющему покаянию наставляяй;
Радуйся, добра бегающих и чрез сие в беды впадающих, терпеливый наставителю;
Радуйся, чистый сердцем, славы Господней тайнозрителю;
Радуйся, преподобне Варнаво, монахов наставниче, мирских напутие, верных утешение.

Кондак 11
Не умеет ум человеческий познати тайны Божии и чудеса, являемии чрез святых Своих, но удобее нам воспевати в простоте сердечней, тебе подобно, отче Варнаво, ниже испытати судьбы Господни в мудрованиях плотских, но пети Ему: Аллилуиа.

Икос 11
Егда полвека монашества твои чада справляху, рекл еси «Я сам – ничто. Вся суть от Бога», и просил я токмо о молитвах. Сего ради ныне в светлостех Божиих пребывая, моли о нас Всемилостиваго Бога, улучити нам Царствие Небесное вопиющих ти:
Радуйся, молитвою непрестанною, греха избегнувый;
Радуйся, довольный малым и скудным, считая себя и того недостойным;
Радуйся, овец твоих истины уклоньшихся добрый пастырю;
Радуйся, яко богатиши нас от славы твоея небесныя;
Радуйся, разумением духовный плод к укреплению других стяжавый;
Радуйся, трудом и испытанием себя на всяк день очищавый;
Радуйся, на последнее место текий, ныне в первых на пиру Господнем преседяй;
Радуйся, всякаго к тебе притекающаго без различия лица утешаяй;
Радуйся, неопустительно храм Божий посещати учяй;
Радуйся, последняя своя поминаяй и чад своих сему призываяй;
Радуйся, от суемудрия гордаго отвращаяй;
Радуйся, почитаяй себя низшим всех, ныне в превысших селениих обитаяй;
Радуйся, преподобне Варнаво, монахов наставниче, мирских напутие, верных утешение.

Кондак 12
К небесней славе, явльшейся в тебе, присовокупил еси земную, егда прославлен был еси посреде Радонежских Святых в день соборный. С ними же вкупе поминаеши ныне нас и вопиеши на небесех Триединому Богу: Аллилуиа.

Икос 12
Преподобне отче Варнаво, яко прешедый путь земной со всяким терпением и достигнувый славы небесной, имеющий власть и другим помощи, помози нам с надеждою и любовию к тебе притекающим преити сей путь искушений, имея тебе образ благодатный пред собою, да вопием ти:
Радуйся, задняя прежних подвигов забываяй;
Радуйся, со усердием в передняя ся простираяй;
Радуйся, сердце богатству текущему николиже приложивший;
Радуйся, почести вышняго Божия звания достигший;
Радуйся, разговоров праздных избегавый;
Радуйся, светильниче церковный верху ставый;
Радуйся, во благих селениих пребываяй;
Радуйся, среди райской радости молитвами своими и нас не забываяй;
Радуйся, всякое самолюбие и зависть отбросивый;
Радуйся, многим нуждением венец нетленный от Господа получивый;
Радуйся, служивый Единому Богу и других тому научавый;
Радуйся, ниже словесное, но смирение сердечное стяжавый;
Радуйся, преподобне Варнаво, монахов наставниче, мирских напутие, верных утешение.

Кондак 13
Приношая малое моление сие наше, радуйся, взываем ти, преподобне отче Варнаво, благовествуяй бо лето Господне приятно, деющи учил еси чистым сердцем вопити ко Царю Светов, подателю жизни нашея и избавителю от власти мрачнаго миродержца, песнь сладчайшую: Аллилуиа.
Трижды, затем икос 1-й и кондак 1-й.

Величание
Ублажаем тя, преподобне отче Варнаво, и чтим святую память твою, наставниче монахов и собеседниче Ангелов.

Молитва 
О преподобне отче Варнаво, пастырю наш кроткий и утешительный, милостивный помощниче и теплый о нас молитвенниче! Ты измлада чадо благословения Божия быв, образ послушания родителем, повиновения господем и служения ближним показал еси. Заповеди Господни возлюбив, в Лавру Преподобнаго Сергия притекл еси и того верный ученик явился еси. Во обители же Божия Матере повелением настоятеля аввы Антония пребывая, дух смиренномудрия, кротости и терпения стяжал еси и дар рассуждения и прозрения помышлений душевных от Бога приял еси. Сего ради монашествующим духовный наставник, инокинем созидатель обители Иверския на Выксе-реце и всем страждущим и болезнующим целитель и попечитель милостивый даже до часа смертнаго был еси. По преставлении же твоем Бог многия милости почитающим память твою яви и иноком учителя тя верна дарова.
Темже молим тя, праведный отче, якоже и прежде ходатайствуй пред Богом молитвами твоими всем людем во всяцем звании дух утешительный стяжати и коемуждо потребная обрести: юным послушание и целомудрие страхом Божиим сохранити; в возрасте сущим – любовь Божию и согласие стяжати; алчущим – не токмо хлебом насущным, но и наипаче словом Божиим насытитися; плачущим – утешитися; изгнанником и странником – пристанище обрести; в темнице сущим – от уз свободитися; благочестивым – в Дусе Божием возрастати и смиренномудрия достигнути. Сшествуй нам во всех путех жизни нашея, паче же умоли Господа нашего о прощении прегрешений и неправд наших и к свету заповедей Божиих стопы наши направи, да единым сердцем и усты славим Пресвятую Троицу, Отца и Сына и Святаго Духа во веки веков. Аминь.