Кондак 1
Возбранный всего мира пресветлый светильниче и Христовой Церкви премудрейший учителю, монашеских уставов первейший списателю, Василие Великий, Троицы Всесвятыя теплый и верный служителю, молися о нас ко Господу, верно тя восхваляющих и с умилением тебе вопиющих:
Радуйся, Василие Великий, всемирный светильниче!

Икос 1
Ангелом Творец равно Ангельна показа тебя на земли святителю Василие, равноангельный нам путь к небеси ведущий показавши, законоположением монашеских уставов, им же на всяк день поучающеся и благодарение о сем Творцу всех Богу воздающе, со умилением тебе вопием сице:
Радуйся, Василие, Царствия тезоименитый;
Радуйся, Прото*1-Патриарх Монахов нарочитый;
Радуйся, чистоты и целомудрия предивный хранителю;
Радуйся, безмолвнаго жития истинный любителю
Радуйся, пастырю, иже словесныя пасти овцы власть от Самаго Бога приявый;
Радуйся, хищныя ересей волки от стада Его отгнавый;
Радуйся, свеще, мрачную кумирослужения тму прогоняющая;
Радуйся, светозрачная молние, весь мир весело просвещающая;
Радуйся, Евангельския Истины ревнительный научителю;
Радуйся, всезлобныя Ариевы лжи мужественный раззорителю;
Радуйся, спасеннаго пути верный и известный предводителю;
Радуйся, всех призывающих тя на защищение скорый защитителю;
Радуйся, Василие Великий, всемирный светильниче!

Кондак 2
Видяще тя правовернии Кессарийстии людие тепла [Пре]Святыя Троицы поборника, возведоша на святительский престол, аще не хотяща и по премногу возбраняющася на нем седящь, Божественная возгремел еси учения, и Трисолнечный нераздельный проповедал еси свет Божества; тем же твоими озарившеся Богодухновенными учении, Всесвятой покланяющеся Троице, умильно поем: Аллилуиа.

Икос 2
Разумом и языком огненным, Богоборных еретик злокозненная попалил еси шатания, верных же трисолнечным просветил еси светом в Триех бо Лицех Единаго Бога хвалити нас научил еси, Его же, бренными восхваляюще устнами вопием тебе:
Радуйся, цевнице и гусли Троичную песнь сладостно возглашающая;
Радуйся, златопорфирная хламидо Христову Церковь лепотно украшающая;
Радуйся, книго Богословскими учении преисполненная;
Радуйся, пучино Кафолических догмат неизмеримая;
Радуйся, фимиаме, огнем Святаго Духа возженный;
Радуйся, Христова благоухания исполневый весь круг Земный;
Радуйся, смрад идольских жертв силою Духа Божия разгнавый;
Радуйся, идолослужительныя люди ко истинному Богу призвавый;
Радуйся, глубины Кафолических правил искусный измерителю;
Радуйся, еретических баснословий премудр и худог*2 истребителю;
Радуйся, глубино, злочестиваго Ария с его единомысленники в бездне адской потопившая;
Радуйся, высото, трисолнечный свет благоразумно миру явившая;
Радуйся, Василие Великий, всемирный светильниче!

Кондак 3
Сила Вышняго, непобедима яви тя воина, святителю Василие, крепко и мужественно бравшася с отступником Иулианом и его злобными кумирослужительми, их же злокозненное языческое, мечем сятым веры посекл еси, учение; Троице же святой в Единстве Божества повелевал еси воспевати: Аллилуиа.

Икос 3
Имеяй Богосиянную Богословия зарю преблаженне отче Василие, темный отступническаго Иулианова нечестия облак разгнал еси, и многобожное его зловерие до конца испепелил еси, Единаго же Бога в Триех Лицах песнословити верных научил еси, мы же тобою наставльшеся вопием тебе сице:
Радуйся, вторый Моисею, от идольския работы нас свободивый;
Радуйся, Иулиана аки гордаго фараона в геенне огненней потопивый;
Радуйся, огненный столпе, нощь кумирослужения просвещающий;
Радуйся, свещниче ясносветящий к земли обетованней путь нам показующий;
Радуйся, источниче, в пустыне иноческаго жития небесными водами жажду утоляющий;
Радуйся, питателю, пищею Слова Божия верных насыщающий;
Радуйся, яко горькия вожделения плоти в целомудрие претворил еси;
Радуйся, яко терпкия воздержания труды, Крестом Христовым усладил еси;
Радуйся, яко Тому, Его же змий проображаше, научил еси последовати;
Радуйся, яко скрижали велений Христовых твердо завещал еси всем содержати;
Радуйся, вождю новаго Израиля крепкий и непобедимый;
Радуйся, враги противо Богу возстающия всеконечно сокрушивый;
Радуйся, Василие Великий, всемирный светильниче!

Кондак 4
Бурю злочестиваго Царя Оуалента арианским злочестием беснующася, силою Божественнаго Духа разгнал еси, и свирепое его на правоверных возстание утишил еси; Церковь же еретиками восхищенную паки верным силою молитвы твоея возвратил еси, в нейже с неизреченною правоверных радостию Троице [Пре]Святой возопил еси: Аллилуиа.

Икос 4
Слышавше еретическое соборище твоя Пресвятой Троице Богодухновенная поучения, святителю Христов Василие, своими, паче мгары*3 распыхахуся сердцы, глаголюще на праведнаго беззаконие и неправду: ты же аки непреодоленный воин мужественно ко [Пре]Святой подвизался еси Троице, неужасаяся их лаяния, паче же и посмеваяся безумному оных злословию, велегласно же Троицу пресущественную, Единицу Триипостасную проповедал еси, юже мы восхваляюще, вопием тебе:
Радуйся, Василие, учителю святый Церкви от Бога дарованный;
Радуйся, Архиерею Божий, святый предъизбранный;
Радуйся, яко Отцу Сына Собезначальна богословил еси;
Радуйся, яко Свет Превечный от Света Превечна просиявший, верным изъяснил еси;
Радуйся, яко Бога воплощенна рекл еси быти Спасителю всех человек;
Радуйся, яко того же Господа Иисуса исповедал еси быти Творца всех век;
Радуйся, яко Ария хулителя Сына Божия, ложная уста твердо заградил еси;
Радуйся, яко Оуалента христоненавистна временным огнем казнил еси;
Радуйся, яко пращею словес твоих победил еси зловерных арианов;
Радуйся, яко высотою твоея премудрости возвеличил еси христианов;
Радуйся, бодрый благоверия поборниче и уме высочайший;
Радуйся, христовых явлений учителю сладчайший;
Радуйся, Василие Великий, всемирный светильниче!

Кондак 5
Боготечная звезда мысленнаго Востока явился еси Святителю Христов Василие, еретическаго злосмрадную учения мглу и яже на Господа нашего Иисуса Христа безбожную хулу, пресветлыми Богословия лучами разгоняющая, и Тогожде Сына Божия Единосущна Отцу и Духови, равно честна же и сопрестольна являющая, Ему же, яко истинному Богу и совершенному Человеку всегда поеши: Аллилуиа.

Икос 5
Видевши, словесное твое стадо, скоро преспевшую погибель зловерным и христоненавистным Царем, тобою первее предреченную, неизглаголанною возвеселися радостию, и благодарственную Триипостасному песнь воспе Господу, возвратившему мир своей Церкви, святыми твоими и теплыми молитвами, им же и мы вручающеся, вопием тебе:
Радуйся, Василие, огненный столпе, Небесныя высоты досязающий;
Радуйся, высокопарный орле, Троичный свет проницающий;
Радуйся, яко птенцы земнаго гнезда к Троичному Свету горе возносиши;
Радуйся, яко слепотствующих ересию в тьму кромешную низводиши;
Радуйся, крилатый орле, весь мир учением твоим прелетающий;
Радуйся, зловерие темных вранов до конца истребляющий;
Радуйся, источниче Животных Вод Духа Параклита;
Радуйся, излиятелю учительных струй во вся концы Света;
Радуйся, сладкопеснивый славию, сердца верных увеселяющий;
Радуйся, благогласный канарие всегдашними Бога песньми прославляющий;
Радуйся, Райская реко от Едема происходящая;
Радуйся, быстрино сладких учений всю землю напаяющая;
Радуйся, Василие Великий, всемирный светильниче!

Кондак 6
Проповедник Богогласный, Богодухновенная уста и паче меда сладчайшая явился еси Христов святителю Василие, во время, в неже в великом смущении Кафолическая Православная Церковь: ты бо аки доброгласная труба вогремел еси всем земли концем спасение Бога нашего и Святую Православную Веру невредиму и непреодоленну снабдил и соблюл еси; в ней же и нас соблюди поющих Богу: Аллилуиа.

Икос 6
Возсиял еси яко светозарное солнце, в тьме зловерия и страшнаго заблуждения пребывающим святителю Христов Василие избра бо тя отеческаго существа Сияние Христос Господь, тем же, яко многосветлая луча освятил еси поднебесную учением светлых твоих словес, мнози бо тобою к единомыслию Кафолическия присовокупившеся Веры, в нейже неподвижно стояще единодушно тебе поют с нами:
Радуйся, луче таинственнаго света Богосиянная;
Радуйся, трубо Евангельския Истины златокованная;
Радуйся, церковное светило учением мир просвещающее;
Радуйся, вещание Богодухновенными глаголы всю вселенную исполняющее;
Радуйся, органе Пресвятаго Духа, возшумевший нам песнь спасенную;
Радуйся, источниче медоточными песнми исполнивший всю поднебесную;
Радуйся, Риторе сладкословесный, Таинства вещающий Небесная;
Радуйся, Богослове, Божия постизающий Ипостаси Тройственныя;
Радуйся, монашеских правил и селений основателю;
Радуйся, Кессарийскаго престола преизящный правителю;
Радуйся, Богонасажденная маслино, добродетельных сынов Церкви процветшая;
Радуйся, лозо, Богомудрых учителей и православия защитителей израстившая;
Радуйся, Василие Великий, всемирный светильниче!

Кондак 7
Хотяще Христос Господь превысочайший Архиерей Архиерейскою украсити тя властию, первее украси даровании Святаго Духа, аки многоценными каменьми ими же еретическая и ложная сокрушил еси баснословия, стадо же тебе врученное, на живоносных пажитях, преподобием и правдою упасл еси, купно же и научил еси Единому в Троице Богу воспевати: Аллилуиа.

Икос 7
Новаго тя Аарона восхваляем, святителю Василие, не ветхозаконного многоценными дванадесятьми каменьми светящеюся одеждою, но Христовою Ангельским исповеданием, аки дванадесятокаменным устроением истканного, оболчена и украшена, в нейже Божественная, и Ангелам говейная священнодействовал еси Таинства, мы же тебе днесь от многоценных бисерей исплетше пение вопием:
Радуйся, Сардие истинныя Веры, Небесною Зарею сияющий;
Радуйся, Смарагде добрыми делы всегда зеленеюшийся, и никогда же увядающий;
Радуйся, Анфраксе, ревностию спасения человеческаго украшенный;
Радуйся, Сапфире на земли пребывающ сердцем на Небо вознесенный;
Радуйся, Агате, яд еретическаго учения до конца уничтоживший;
Радуйся, Иакинфе, распри любящия сердца, к соединению и согласию обративый;
Радуйся, Амефисте, неусыпную бодрость в Божием служении имевший;
Радуйся, Хрисолите, очи горе и сердце к Небеси воздевший;
Радуйся, Ониксине, грехами отягощенных к покаянию обращающий;
Радуйся, Адаманте, кратко и мужественно гонения претерпевающий;
Радуйся, паче всех бисерей и маргарит дражайший и честнейший;
Радуйся, небеснаго Архиерея Иерарше святейший;
Радуйся, Василие Великий, всемирный светильниче!

Кондак 8
Странная и преславна виде в тебе святый Ефрем, святителю Христов Василие, виде бо тя Серафимским милости Божия огнем горяща и высоты Небесныя досязающа, сподоби убо и нас честнейший отче, твоих чад, сею, милости Божия добродетелию, непрестанно горети, и николиже угасати, и в горячести сердца всегда пети Богу: Аллилуиа.

Икос 8
Весь сый Трисолнечнаго Света преисполнен преподобне отче Василие, уста бо твоя огненная, словеса молниеносная, глас громоподобен, учение аки дождь волен, верных орошающее, и в добродетели укрепляющее сердце, ороси убо и наша, грехопадениями изсохшая сердца, да целомудренно тебе вопием:
Радуйся, Василие Великий, Серафимским милости Божия огнем горящий;
Радуйся, Святей Церкви, Небесная Таинства разумно изъясняющий;
Радуйся, пламеновидный Василие, всезлобныя ереси пожигающий;
Радуйся, гордаго Евномия проклятое кичение посрамляющий;
Радуйся, студныя Несториевыя ереси мужественный обличителю;
Радуйся, славы и чести Пречистыя Богоматери усердный хранителю;
Радуйся, иже о Ней радоватися и веселитеся всей повелел еси твари;
Радуйся, иже верным христианом испрашиваеши победы на зловерныя варвары;
Радуйся, Безкровныя Жертвы непорочно Богу приносивый;
Радуйся, тыяже Богу приносити и прочих иереев научивый;
Радуйся, иже мучеников похвальным почтил еси словом;
Радуйся, купно с ними и нас сподоби стати пред Божиим Престолом;
Радуйся, Василие Великий, всемирный светильниче!

Кондак 9
Все бесовское множество не возможе твоей неодоленней преподобне отче противостати силе, юношу бо, погибельным рукописанием в адскую впадшаго гортань, силою молитвы твоея исторгнул еси; по четыредесятодневном бо онаго покаянии, рукописание восприятое раздрал еси, юношу же паки Творцу примирил и присоединил еси; и в умилении сердца пети научил еси: Аллилуиа.

Икос 9
Ветия еретическая суемудренныя, видяще преславное на юноши бывшее чудо, велиим содержахуся страхом, зряще же сие, к единомыслию Кафолическия православныя присоединишася Церкви и единодушно с тобою, Единому в Троице Богу благодарственная восписующе тебе, страшному бесов прогонителю, умильно возопиша:
Радуйся, Василие, страшным громом лютаго змия поразивый;
Радуйся, в гордое того сердце Древо Крестное водрузивый;
Радуйся, иже всю демонскую силу аки дым разгнавый;
Радуйся, свиток рукописания с горы спадший в присудствии многих раздравый;
Радуйся, погибшаго сына к Богу Отцу возвративый;
Радуйся, иже тогожде, Телом и Кровию Сына Божия насытивый;
Радуйся, иже всех верных неизреченныя исполнил еси радости;
Радуйся, иже погибшее овча в Райския ввел еси сладости;
Радуйся, яко о нем, вся Ангелы на Небесах радуются;
Радуйся, яко вси, немощи адскаго зверя ругающися, посмеваются;
Радуйся, теплый любителю душ, драгоценною Христовою Кровию купленных;
Радуйся, и такожде всех нас сподоби быти ликов Святых спричтенным;
Радуйся, Василие Великий, всемирный светильниче!

Кондак 10
Спасти хотя Творец свое создание, многих зело, тобою из тьмы неверия, в Свет Правоверия изведе, смертно бо уже тогда, болезновал и ко блаженней кончине приближаяся еси, егда жидовина врача, с женою и чады, святым Крещением просветил еси, и научил еси како чистым сердцем подобает пети Троице [Пре]Святей песнь: Аллилуиа.

Икос 10
Стена еси Церкви, и твердое верных ограждение, святителю Христов Василие, невозможе бо зловерных обстояние поколебати Ея, основана бо бе на Камени Петроваго неподвижимаго исповедания, от Нея же, аки от твердаго адаманта, злокозненная их стреляния воспящахуся, и вспять к ним возвращахуся, правоверие же чудесными твоими делы славяшеся и крепляшеся, ты бо, на кончине времяннаго твоего жития, жидовина святым Крещением просветил еси, сам же в вечныя Небесная селения преселился еси, от нюдуже на нас призирай твоими молитвами, таковая тебе вопиющих:
Радуйся, Кессарийскаго престола пречудное удобрение и пресветлое украшение;
Радуйся, иже тому твоим правительством мудрое узаконил еси строение;
Радуйся, иже Небесный Свет облистал еси прежде неверну жидовину;
Радуйся, иже близ смерти сущий дал еси спасения вину;
Радуйся, великий чудотворче и во время твоея смерти;
Радуйся, иже не дал ему в жидовском неверии умрети;
Радуйся, страшный бесов прогонителю;
Радуйся, злобных их вражд и наветов храбрый победителю;
Радуйся, иже вся беды и печали от человек отгоняеши;
Радуйся, иже всем тя призывающим, скорую помощь подаваеши;
Радуйся, сирот кормителю, и скорый предстателю всем в нуждах сущим;
Радуйся, посетителю и помощниче в страстех бедствующим;
Радуйся, Василие Великий, всемирный светильниче!

Кондак 11
Пения по достоянию воздати тебе несть мощно, о пречудный Василие, с небес бо на ны призираеши и Божественную нам Благодать твоим прилежным молением ходатайствуеши; идеже неувядаемым венчаешися венцем от Всемилостивыя Десницы Пастыреначальника Христа Бога, Емуже, яко Истинному Богу со Ангелы поем: Аллилуиа.

Икос 11
Светоприемный светильниче и великий Христов Угодниче Василие, Богоразумный Свете, просвещающий верных сердца, ты в небесная святая святых весь многими добродетельми сияющь, вшел еси, и яко истиннный святитель и верный Божий служитель Троице [Пре]Святой предстал еси, идеже и нас поминай вопиющих тебе:
Радуйся, незаходимое сияние мысленныя Зари;
Радуйся, светлостию Богодухновенных словес Твоих Земныя освятивый Цари;
Радуйся, Звезда утренняя от Восток восходящая;
Радуйся, даже до Запада своими сиянии досязающая;
Радуйся, молние облиставающая севера и моря пределы;
Радуйся, ясносветлый бисере украшающий мир чудными твоего жития делы;
Радуйся, живый источниче прохлаждающий в знои грехов сущих;
Радуйся, кормчие и управителю в море жития плавающих;
Радуйся, крине от благия земли святых родителей процветший;
Радуйся, иже облаговонил еси мир, в злосмрадии неверия увядший;
Радуйся, благовонный шипче, пребывающий в Райском вертограде;
Радуйся, и молися всегда Богу о твоем любезном стаде;
Радуйся, Василие Великий, всемирный светильниче!

Кондак 12
Благодать ЕдиноТройственнаго Богоначалия возблагодати тебе твоя подвиги болезни же и труды, святителю Василие, лицезрением неизреченныя славы, и неисповедимых красот же и доброт: сподоби бо тя со святыми пребывания и соцарствования конца неимущаго, идеже и о нас, твое святое славящих преставление, памятствуй, поющих Богу: Аллилуиа.

Икос 12
Поюще восхваляют тя вся Ангельская л

Икостояния, Ангельски бо отче на земли пожил еси, святых же сословие спразднует тебе: величием бо трудов твоих земныя удивил еси концы, на земли вся совокупления верных ублажают тя, твоя бо многоцелебныя святыя мощи, различныя, многовремянныя врачуют недуги, и болезни исцеляют, тем же и мы радующеся таковая тебе вопием:
Радуйся, Царское священие прехвальне и преблаженне Василие;
Радуйся, пресущественныя Троицы чистое и честное селение;
Радуйся, Ангелов собеседниче, с Патриархи почтенный;
Радуйся, пророкам и апостолам в трудех и подвизех сравненный;
Радуйся, святителей сопрестольниче и преподобных главо;
Радуйся, иночествующих правило и девствующих хвало и славо;
Радуйся, всех святых сожителю в селениях небесных;
Радуйся, добрый наш блюстителю от наветов ада прелестных;
Радуйся, Василие Великий – учительским венцем на небесех венчанный;
Радуйся, теплый ходатаю от Бога всем Православным дарованный;
Радуйся, ускорителю всем в помощь, наипаче во время борьбы;
Радуйся, всех нас верный хранителю во всякой беде и скорби;
Радуйся, Василие Великий, всемирный светильниче!

Кондак 13
О всесвятый и превеликий Иерарше Христов, Василие Великий, утешение скорбящих, взыскание погибших, нынешнее от нас приими моление, и принеси е к Престолу Пресвятыя Троицы, яко да твоими святыми молитвами обрящемся наследниками Небеснаго Царствия, и сподобимся купно с тобою и со всеми святыми во веки воспевати Богу: Аллилуиа.
Сей Кондак глаголи трижды, и посем опять Икос 1й и Кондак 1й

Молитва ко святому Василию Великому
О всесвятый отче Василие Преславный! Всея вселенныя Церкви учителю; бодрственный словеснаго Христова стада пастырю и предобрый наставниче! Неизмеримая Богословия пучино! Непостижимых Божиих Таин всеискуснейший испытателю, и вернейший толкователю и сказателю; первейший общаго монашескаго жития законопложниче и основателю; пресветлое чистоты и целомудрия зерцало; прекрасный смиренномудрия и кротости взоре; живый терпения образе, правило воздержания, искренний нищеты и нестяжания хранителю же и любителю; мужественный Богопротивных ересей раззорителю, и крепкий победителю; непреоборимый Триипостаснаго Божества защитниче; славы и чести Пресвятыя Троицы всеусерднейший поборниче; теплейший Матери Божия рачителю и Ея Пренепорочнаго Девства и Матеро-Божия преизбранный исповедниче и преизящный заступниче. Се аз окаянный, и многогрешный, смиренно припадая молю тя о всемирный Христовыя Церкви учителю!
Ты научи мя тако благоговейно, стезями заповедей Божиих шествовати и богобоязненно ходити, да никогдаже на путь, Божиим повелениям противен совращуся, или уклонюся; ты, грубый мой разум умудряй, просвещай и вразумляй, да всегда горняя мудрствует, присноБожественная в ум пестунствует, и мене унылаго к восприятию оных на всяк день понуждает и приуготовляет; ты, многоразвращенную волю, и весьма к благому заледеневшую, разжжи и распали, во еже бы ей земная презирати, маловременных не желати, мимотекущих гнушатися, Небесных же и вечных искренно желати, и всегда теми мысленно утешатися и услаждатися; память мою сице исправи да незабвенно о сем памятствует мне же на всякий час сие воспоминает: чесо ради создан есмь и в числе живых вчинен и вменен; еще настави ю да воспоминающе сия: ими же Преблагаго моего Творца и Создателя огорчих, понуждает мя искренно всех тех каятися, горько рыдати, от всего сердца болезновати и умильно с кающим Давидом глаголати и вещати: грех юности моея не помяни, и не вниди в суд с рабом Твоим, яко неоправдится пред Тобою всяк живый; вем преблагий отче, яко весь исполнился безмесных дел, и студных деяний, всеми бо моего тела чувствии многократно и многообразно неизреченную Божию Благостыню тягостно прогневах, и жестоко раздражих: сего ради прилежно прошу тя и всеусердно молю, отселе управляй зеницы моих очес помраченная мира сего суетою, да более невзирают на доброты мирския неполезныя, ниже прилепляются красотам вежды*4 человеческия прельщающим.
Слух же ми воспящая, от внимания и слышания неполезных бесед, и неугодных повествований, но паче понудих вниманию Божественных Писаний, и слышанию Евангельских повелений и поучений. Скверная моя уста, и нечистый язык, тако глаголати устрой и вещати научи, да та никогда же обрящутся празднословная, лжеглаголивая и злоречивая. Руце мои многими осквернившияся студодеянии, Богоугодная делати настави; к добрым и полезным простиратися убеди, блюсти же ся всякаго сицеваго грехопадения научи, им же душа и тело безместно оскверняются, и нечиста пред Всевидящими Очесы являются; непопусти ногама моима, паче же запрети и возбрани, теми стезями ходити, еже удалятися творят создание от Вселюбезнаго Создателя, но сохрани я от всякаго поползновения, и от всякаго соблюди душевреднаго грехопадения.
О, добрый жития человеческаго управителю и строителю, сице вся моя уды управи, яко не быти уже им прочее орудием греха студодеяния, блуда же, нечистосты, и всякия неправды, но орудием добродетели, благоговения, целомудрия, воздержания и чистоты. Аз убо окаянный и скверный, отселе, всеми моими греховными гнушаюся мерзостьми, и отселе прилежно и всеусердно присное твое овча быти желаю, упаси убо мя на живоносных пажитях, снабди мя от лютых и хищных зверей, непопусти твоим предстательством, быти мне от тех пожерту и поглощенну, иже по вся дни и нощи на мое свирепо наветуют, и устремляются уловление, и на мое своя расширяюще уста поглощения, яросно зубы понуряют, но тако мя от их злокозненных наветов защити, и от сетей исторгни, яко же исторгнул еси онаго беднаго юношу, самопроизвольно вдавшагося льствому сатане, и своеручным писанием адския тьмы князю данным, свое от Вселюбезнейшаго Создателя и Дражайшаго Спасителя отступнление утвердившаго.
Сотвори мя, твоим многомогущим ходатайством, истиннаго сих твоих добродетелей подражателя, имиже Богу и всея твари Содетелю благоугодил еси, и Всемилостивую Его Благостыню благоветливу сотворил еси: сотвори мя в Вере тверда, постоянна, и сице непоколебима и неподвижима, яко, да ни малейшая сумнения, или недоумения сень, во мне когда обрящется; укрепи мя в надежде и уповании, да всегда вечных благ благонадежен пребываю; возжги и воспламени в сердце моем истинную к Богу Любовь, омерзи вся земная и временная, да всею душею Небесных возжелаю, и оными надежно услаждаюся; исходатайствуй мне нелицемерное покаяние, истинное за прегрешения жаление, да прочее живота моего время в истинном и Богоприемном провожду покаянии, и в сердечнем умилении, и в сем дущеполезнем деле, постоянно и неподвижимо пребуду, даже до последняго моего издыхания; егда же час моего скончания приближится, и время от сего мира отшествия приспеет, ты, о преблагий отче, с Преблагословенною Девою Мариею, ускори на помощь, ты защити мя, от злобных диавольских нападений, и враждебных наветов; ты сподоби мя общника быти прекрасных Райских Селений да купно с тобою, и со всеми святыми Богу благоугодившими, неприступнаго Божия Величества Престолу предстану и Живоначальную, Единосущную и Нераздельную Троицу прославляю, и воспеваю, в безконечные веки, Аминь.

Тропарь святителю, глас 1
Во всю землю изыде вещание твое, яко приемшую слово твое, имже боголепно научил еси, естество сущих уяснил еси, человеческия обычаи украсил еси, царское священие, отче преподобне, моли Христа Бога, спастися душам нашим.

Кондак святителю, глас 4
Явился еси основание непоколебимое Церкве, подая всем некрадомое господство человеком, запечатлея твоими веленьми, небоявленне Василие преподобне.

Величание:
Величаем тя, / святителю Христов Василие, / благочестно Церковь Христову сохраншаго.
Величаем тя, святителю отче Василие, и чтем святую память твою, ты бо молиши за нас Христа Бога нашего.
Величаем вас, святителие велиции Василие, Григорие и Иоанне, и чтем святую память вашу, вы бо молите за нас Христа Бога нашего.

Источник - библиотека Троице-Сергиевой Лавры, набрано с фотографий рукописи:
№ 337. Акафист Василию Великому.
1861 г. Скоропись новая. 92 л. (49 чист.). 15,0 x 10,0. Переплет картонный. На л. 1запись писца: «С. Петербург 1861 год февраля 11-го» (дата списка). Штампа биб-ки лавры нет.
http://old.stsl.ru/manuscripts/book.php?col=2&manuscript=337

Примечания-сноски:
*1 - Прото — (от др.-греч. πρῶτος — «первый») — часть сложных слов, указывающая на высшую степень (преимущественно в церковных званиях). (Википедия)
*2 - Худог — разумный, ученый, мудрый, умный. (Краткий церковнославянский словарь)
*3 - от старорусского - "мга" - пелена тумана, или "мгарь" - пелена дыма - от далекого лесного пожара.
*4 –вежда – веко, глаз, зрак (Викисловарь)

СВЯТИТЕЛЬ ВАСИЛИЙ ВЕЛИКИЙ
Дни памяти: Январь 1, Январь 30 (3 свт.)
Василий Великий родился около 330 г. в Кесарии. В семье свт. Василия к лику святых причислены мать Эмилия (память 1 января), сестра Макрина (память 19 июля), брат Григорий (память 10 января). Отец был адвокат, под его руководством Василий получил первоначальное образование, затем он обучался у лучших учителей Кесарии Каппадокийской, где познакомился со святым Григорием Богословом (память 25 января), а позже перешел в школы Константинополя. Для завершения обучения св. Василий отправился в Афины — центр классического образования. В Афинах Василий Великий приобрел все доступные знания. О нем говорили, что «он так изучил все, как другой не изучает одного предмета, каждую науку он изучил до такого совершенства, как будто не учился ничему другому. Философ, филолог, оратор, юрист, естествовед, имевший глубокие познания в медицине, — это был как корабль, столь нагруженный ученостью, сколь сие вместительно для человеческой природы».
В Афинах между Василием Великим и Григорием Богословом установилась теснейшая дружба, продолжавшаяся всю жизнь. Около 357 г. святой Василий возвратился в Кесарию, где вскоре вступил на путь аскетической жизни. Василий, приняв Крещение от епископа Кесарийского Диания, был поставлен чтецом. Желая найти духовного руководителя, он посетил Египет, Сирию, Палестину. Подражая наставникам, вернулся в Кесарию и поселился на берегу реки Ирис. Вокруг него собрались иноки. Сюда же Василий привлек своего друга Григория Богослова. Они подвизались в строгом воздержании; при тяжелых физических трудах изучали творения древнейших толковате-лей Священного Писания. Ими был составлен сборник Добротолюбие. В царствование Констанция (337-362) распространилось лжеучение Ария.
Церковь призвала к служению Василия и Григория. Василий вернулся в Кесарию, где в 362 г. был рукоположен в сан диакона, в 364 г. — в сан пресвитера. При императоре Валенте (334-378), стороннике ариан, в тяжелые времена для Православия к Василию перешло управление церковными делами. В это время он составил чин Литургии, «Беседы на Шестоднев», а также книги против ариан. В 370 г. Василий был возведен епископом на Кесарийскую кафедру. Он прославился своей святостью, глубоким знанием Священного Писания, великой ученостью, трудами на благо церковного мира и единства. Среди постоянных опасностей св. Василий поддерживал православных, утверждая их веру, призывая к мужеству и терпению. Все это вызывало ненависть к нему ариан. Все свои личные средства он употреблял в пользу бедных: создавал богадельни, странноприимные дома, лечеб-ницы, устроил два монастыря — мужской и женский.
Ариане всюду преследовали его. Св. Василию угрожали разорением, изгнанием, пытками и смертью. Он же сказал: «Смерть для меня благодеяние. Она скорее приведет меня к Богу, для Которого живу и тружусь».
Болезни от юности, труды учения, подвиги воздержания, заботы и скорби пастырского служения истощили силы святителя, и 1 января 379 г. он преставился ко Господу, будучи 49 лет. Церковь тотчас стала праздновать его память. Современник Василия Великого, епископ Амфилохий (память 23 ноября) так оценил его заслуги: «Он принадлежит не одной Кесарийской Церкви, и не в свое только время, не одним соплеменникам своим был полезен, но по всем странам и градам вселенной и всем людям приносил и приносит пользу, и для христиан всегда был и будет учителем спасительнейшим».