Акафист преподобным Вассиану и Ионе

Кондак 1

Возбраннии воины Духа Святаго, данные Соловецкому краю чудотворцы всехвальнии, преподобнии отцы Вассиане и Ионо, благодарственную песнь приносим Христу Богу, ибо молитвами вашими от нашествия иноплеменных и смутнаго времени надежду имамы избавитися, яко имея дерзновение ко Господу, от всяких нас бед и напастей свободите, да зовем к вам: Радуйтеся, Вассиане и Ионо, скорые помошницы и преславнии чудотворцы.

Икос 1

Иноков отцы, в безвестном всеусердном иноческом подвиге пребывая, стяжали есте благодать Святаго Духа, сотаинники и собеседники Пресвятыя Троицы явилися есте. Покорные же ваша чада научите вопити сице: Радуйтеся, ко Престолу всех Царя от века предуставленные, радуйтеся, рабы Христовы явленные. Радуйтеся, непоколебимые воины Святаго Духа, радуйтеся, благодатию озаренные свыше. Радуйтеся, по всей вселенней прославлении, радуйтеся, постное иноческое житие исполнившие. Радуйтеся, козней диявольских отгонители, радуйтеся, бесов неисцельный струпе. Радуйтеся, заблуждших утешители, радуйтеся, к вечному крову направляющие. Радуйтеся, в яве потерянную родительницу к чадам направившие, радуйтеся тем поморстии люди удивившие. Радуйтеся, Вассиане и Ионо, скорые помошницы и преславнии чудотворцы.

Кондак 2

Видевши Соловецкий край и вся Россия благодать Божию, преизобильно на вас почивающую, чудеса исцелений источающи, с верою крепкою к вашим святым мощам, прибегаем,и в веселии духовнем прославляем вас, верных помощников, блаженных Христовых овец, Богу поя: Аллилуйя.

Икос 2

Святую Троицу прославити всеусердно потщалися есте, о, Вассиане и Ионо, веру крепкую, любовь нелицимерную сподобились благодатно прияти, обитель Пертоминскую по предуведению Превечной Троицы от века готовы были устроити и во оной начало иноческаго жития положити. Сего ради телеса ваша святыя ей отдати изволили есте и научили чтущих вас воспевати тако: Радуйтеся, кротости исполненныя, радуйтеся, столпы послушания. Радуйтеся, иноков пастырие и служителие, радуйтеся, добрых монахов родителие. Радуйтеся, сотаинники Ангелов, радуйтеся, сосуды благодати. Радуйтеся, доброзрачнии светила благочестия, радуйтеся, претихое грешным утешение. Радуйтеся, святыя обители устроителие, радуйтеся, лес поморстим людем посекати запретившия. Радуйтеся, из того леса обитель создати готовыя, радуйтеся храм Бога живаго из него устроившие. Радуйтеся, Вассиане и Ионо, скорые помошницы и преславнии чудотворцы.

Кондак 3

Силою многою, данною вам свыше, преподобныи отцы Вассиане и Ионо, прославили есте Спасителя душ наших, исповедники же тайного великого жития явилися есте. В скрытом подвиге подвизаяся, созерцания Божественного Света, достигли высот есте. Духа же Святаго схождение сподобилися прияти есте преобильно. Тем же и мы молим вас, достоблаженнии отцы, благодати Божественной прикоснутися, Богу поя: Аллилуйя.

Икос 3

Имуще помышление великой рыбной ловле быти, устремилися поморстии люди к брегу морскому, но обретоша ваша телеса вместо добычи, удивльшеся зело. Увидев их от птиц врановых невредимы, и силу Божественную, их покрывающу, узревши, разумея нечто преславное быти, нетленныя телеса в ладью свою пояли, глаголюще в себе таковая: Радуйтеся, отроцы Пресвятыя Богородицы, радуйтеся, сотаинники благодати Божией. Радуйтеся, постники предивныя, радуйтеся, поморских христиан удивление и увеселение. Радуйтеся, кротости и смирения исполненныя, радуйтеся, вся мира сего прелести презревшия. Радуйтеся, венцем небесныя славы увенчании, радуйтеся, земнии ангели, чистотою сердец ваших рая вожделеннаго достигшии. Радуйтеся, силу диявола немощную низложившия, радуйтеся, от пути греховнаго многия ко Господу обратившия. Радуйтеся, лесорубов, презревших Ваше прещение, потоплением в пучине морстей, наказавшии, радуйтеся, оным грядущий нелицеприятный суд всем нечестивым показавшия. Радуйтеся, Вассиане и Ионо, скорые помошницы и преславнии чудотворцы.

Кондак 4

Бурю жития мира сего, козни диявола и плоти смущения презревшии, преподобнии, достойно воспеваем ваша чудеса, блаженнии Вассиане и Ионо. Никтоже бо может их исчести и в книги мнози собрати. Но мы, Богу дивно в Вас прославляемому, со дерзновением и умилением сердца вопием: Аллилуйя.

Икос 4

Слышаша, преподобнии отцы, ближнии и дальнии, о сладчайшей струе чудотворений Ваших, яко слепии прозирают, хромии ходят и разнообразных недуг болящии избавляются, душевныя скорби, яко дым, исчезают. Сих чудес и себе испросивше, вопием к вам сице: Радуйтеся, избавители от печали, радуйтеся, благодати источницы. Радуйтеся, скорбей отгонители, радуйтеся, плачущих утешители. Радуйтеся, от наглыя и лютыя смерти избавители, радуйтеся, душевных и телесных недугов наших целители. Радуйтеся, ко спасению многих души свои положившии, радуйтеся, всяких желаемых благ исполнители. Радуйтеся заповедей Христовых благовестители, радуйтеся Христа возлюбивши. Радуйтеся, в видении крест и часовню чудную над мощами своими устроити повелевшии, радуйтеся в яве в нее вшедшии. Радуйтеся, Вассиане и Ионо, скорые помощницы и преславнии чудотворцы.

Кондак 5

Боготечное духовное созвездие явилися есте, преподобнии отцы, Вассиане и Ионо, неба Российскаго церковнаго украшение. Всех заблудших в сем житейском море к берегу направляющии, от мрака печали и мглы языческой избавляющии, молитвою своею к вечному Небесному Отечеству ведущии, поющии Богу: Аллилуйя.

Икос 5

Видящи, преподобнии отцы, Вассиане и Ионо, яко мир сей есть всяческая суета и тлен, потщалися есте всеусердно Предвечному Богу благоугодити и воистину Ему не вотще потрудилися есте, и паче же предстояния у Престола Пресвятыя Троицы возжелели сподобитися, нежели миру работати. Тем же и мы, любовию к Вам побеждаемии, сице вопием: Радуйтеся, милости Божия житницы, радуйтеся, промышления о людях исполнении. Радуйтеся, скорбящих утешителие, радуйтеся, немощей телесных исцелителие. Радуйтеся, Духа Святаго собеседницы, радуйтеся, Сына Божия созерцателие. Радуйтеся, Отца всеблаженного чада блаженныя, радуйтеся, нищи духом, яко ваше есть Царствие Небесное. Радуйтеся, в бурное время от потопления княжескую ладью охранившия, радуйтеся, тем дружину его вразумившие. Радуйтеся, храм Преображения Господня в пустыне устроившия, радуйтеся, в нем токи чудес от мощей своих источившия. Радуйтеся, Вассиане и Ионо, скорые помощницы и преславнии чудотворцы.

Кондак 6

Проповедует держава Российская, богомудрии отцы Вассиане и Ионо, труды ваша, крепкое послушание, воли своея отсечение. Их же ради прослави вас Господь славою неизреченною, тем же преподобнии отцы, православия столпи непоколебимии явльшиеся, и в тайном подвиге огня небесного вкусивыя, вся скоро гибнущая в мире сем презревшии, радостно в Горний Иерусалим возшедшия, предстоя там одесную Бога, вопиете: Аллилуйя.

Икос 6

Возсия Церкви Российстей и Соловецкому краю просвещение ваших чудес, преподобнии отцы Вассиане и Ионо, непрестанно благодарственную песнь приносим Отцу Небесному, радостно воспевая вас, яко верных заступников и молитвенников о душах наших, и со Ангельскими лики взываем тако: Радуйтеся, Ангельское житие нам явившии, радуйтеся, славнии воины Христа явльшиися. Радуйтеся, бурю страстей угашающии, радуйтеся, небесного совершенства исполненныя. Радуйтеся, исполнителие заповедей Христовых, радуйтеся, Богородицы Пресвятыя пред Сыном своим похваление. Радуйтеся, в лики преподобных вшедшии, радуйтеся, великаго тайнаго жития содетелие. Радуйтеся, боярскую лодью разрушившии, радуйтеся, оным того дружину на поклонение к себе призвавшии. Радуйтеся, от того часа здравие больному посреде них бывшему подавшии, радуйтеся, безбедное плавание им сотворшии. Радуйтеся, Вассиане и Ионо, скорые помощницы и преславнии чудотворцы.

Кондак 7

Хотя быти избранные Духу Святому в содруги, преподобныи отцы, Вассиане и Ионо, потщалися есте всеусердно тесным и прискорбным путем шествовати, воеже души своя в вечную жизнь устроити. Иго Христово, крест Владыцы, в сердцах своих от юности своея написуя, достигли есте уготованнаго вам Царствия Небеснаго, вопиющи: Аллилуйя.

Икос 7

Новую тварь в вас показа всех Творец и Владыка, богомудрыя отцы Вассиане и Ионо, многия и преславныя чудеса живущим в мире показующии, по смерти телесней посреде мирстей суеты возлежати не восхотели есте. Указуя пустынножительство Ваше преблагое, затмение солнца устроити изволили есте. Темже благодарственно вопием вам: Радуйтеся, тучныя грозды винограда истиннаго, радуйтеся, наставницы иноков всеусердныя. Радуйтеся, душ наших спасение, радуйтеся, иноческих трудов плодоносящии древа. Радуйтеся, печальных быстрое услышание, радуйтеся, Ангельския чистоты вкусившии. Радуйтеся, миро благоуханное, радуйтеся, жителие Великаго Града. Радуйтеся, подножницы Престола Господня, радуйтеся, Богородицы славное восхваление. Радуйтеся, оскудение во обители обильно исполнившии, радуйтеся, хлебныя зерна чудно в нее доставившии. Радуйтеся, Вассиане и Ионо, скорые помощницы и преславнии чудотворцы.

Кондак 8

Страшное и преславное чудо являете нам, втайне подвизавшиеся, Вассиане и Ионо, Богу угодши нетление телесное стяжали есте. Позорную смерть претерпели есте и в пустыннем месте погребенны были, блазии. Темже прославился в вас Бог, яко в безвестности пребывше, по смерти чудотворцы явилися есте. От напастей диявола нас охраняете, всем труждающимся в мире сем помогаете, в Горней Стране со бесплотными силами Богу поя: Аллилуйя.

Икос 8

Вси в богомыслии и доброделании прибыли есте, Вассиане и Ионо, в трудах и заботах о Творце всяческих не забывая, сподобилися увидеть небесную лествицу, и по ней подняться потщалися к Небу. Также и мы от усердия нашего к Вашим трудам вопием сицевая: Радуйтеся, иноческое житие возлюбившии, радуйтеся, иго благое на рамена своя приявшии. Радуйтеся, смирением украшенныя, радуйтеся, просвещение ума Духом Святым достигшии. Радуйтеся, тайн вечнаго горняго мира исполненыя, радуйтеся, ангельской манны небесной вкусившии. Радуйтеся, блаженнаго жития удостоеннии, радуйтеся, Царствия Божия достигнувшии. Радуйтеся, обитель от пожара покрывшии, радуйтеся, во умаление случившихся убытков в обители Пертоминской росомаху неукротимую, зверя дикого, в монастырь приславшии. Радуйтеся, яко в ловитве его помощь оказавшии, радуйтеся, тем братию обители удивившии. Радуйтеся, Вассиане и Ионо, скорые помощницы и преславнии чудотворцы.

Кондак 9

Ангельский чин удивися великому вашему дарованию, преподобнии отцы, Вассиане и Ионо, еще на земли пребывали, аки на небесех. Сего ради украсил вас Господь, чистотою боголюбезною, силою Своего Духа прославил еси, в небесных чертозех непрестанно вопиющих: Аллилуйя.

Икос 9

Вития многовещанныя недоумеют, како прославити вас, преподобнии отцы Вассиане и Ионо, ибо пачеестественное ваше житие в видениях дивных открыли есте. Глаголали есте о славе вашей вечней, проповедали слово Божие, воспевая Ему сицевая: дивен Бог во святых своих, Бог Израилев. Тем же и мы дерзаем купно пети Вам сице: Радуйтеся, земнии Ангели и небеснии воины, радуйтеся, достойнии ученицы преславнаго Филиппа. Радуйтеся, жившии на земли телом, душею же в Раи, радуйтеся, очима душевныма выну Господа созерцавшии. Радуйтеся, пред лицем учителя, яко пред лицем самого Христа Иисуса шествовавши, радуйтеся, яко Божиею благодатию оправдании. Радуйтеся, на гору Сионскую востекшии, радуйтеся, тайну предвечнаго Рождества постигнувши. Радуйтеся, Пресвятыя Богородицы наперсное украшение, радуйтеся, Святого Духа дыхания сподобльшиися. Радуйтеся, труженнику обители святыя зрение даровавшии, радуйтеся, душевного его ока исцелителие. Радуйтеся, Вассиане и Ионо, скорые помощницы и преславнии чудотворцы.

Кондак 10

Спасти хотя души свои отсечением воли плотския, постригли власы своея и были всеусерднии иноцы, покорившие себя воли игумена Филиппа, яко во образ Начальника бесплотных сил. Его же повеления тако слушали есте, яко самаго Господа, ни в чем же ему не прекословя, но слово делом исполняя. Всякое же искушение и само потопление свое, яко вернии раби Христовы, яко от десницы Господней прияли есте, Ему же ныне на Небесах предстоя, вопиете: Аллилуйя.

Икос 10

Стено веры всем нерушимая есте, преподобнии отцы Вассиане и Ионо. Тем же и мы молимся к вам, и верим, во всяких нуждах и печалях испросите нам спасения, будите стена необоримая, защита несумненная, от всяких нас бед застеняя и охраняя, за еже мы вопием вам таковая: Радуйтеся, чресла лентием послушания препоясавшие, радуйтеся, адаманты Христовой веры. Радуйтеся, книги совестныя чистотою своего жития наполнившии, радуйтеся, облики благочестивыя. Радуйтеся, лампады храма Преображения Христова горящии, радуйтеся, кадильницы многоценныя. Радуйтеся, мироварницы Духа Святаго, радуйтеся, идольския прелести низложители. Радуйтеся, имущество монастырское от татьбы спасшия, радуйтеся, татя язвою ног поразивши. Радуйтеся, за его покаяние здравие ему возвративши, радуйтеся, к покаянию его приведшии. Радуйтеся, Вассиане и Ионо, скорые помощницы и преславнии чудотворцы.

Кондак 11

Пение благодарственное Господу Иисусу Христу приносим, блажении, яко даровал вам толикую благодать: слепыя просвещати, больныя исцеляти, язычницы вразумляти. Толико сильные яко же и не увидевших Святыя мощи ваша, тии от греховнаго жития отбегаху, и к тому же николиже возвращахуся, боящеся силы Божией, от Вас исходящия, юже прославляет на небеси Сам Бог, Ему же там ангельскую песнь вопиете: Аллилуйя.

Икос 11

Светолепныя светила в православней Российстей стране и во всей вселенней явльшиеся, преподобнии Вассиане и Ионо, пребогато благодатью Сына Божия исполненнии, зрим вас, стоящих одесную Престола Владычня в славе вечней и Божественными лучами Трисолнечнаго Света осияваемых, с лики Архангелов и Серафимов собеседующих, с невещественными силами вкупе радующихся. Того же света дерзаем у Бога испросити, облистаими славой вашей вечней и вопием таковая: Радуйтеся, добродетелей Христовых учителие, радуйтеся, два орля в горнем мире парящии. Радуйтеся, крылья молитвы и смирения стяжавшии, радуйтеся, от земли в чертози небеснии возшедшии. Радуйтеся, мощи свои нам в утешение оставивишии, радуйтеся, яко ваша телеса оплотом веры являются. Радуйтеся, теплые к Богу ходатаи, радуйтеся, слезоточныя источницы райстии. Радуйтеся, оскудение веры отринувшии, радуйтеся, морскаго зверя, кита буйнаго на берег обители Пертоминской пославыя. Радуйтеся, монастырстии нужды тем покрывши, радуйтеся, тем поморстии люди вразумивши. Радуйтеся, Вассиане и Ионо, скорые помощницы и преславнии чудотворцы.

Кондак 12

Видевши благодатныя дары от Господа Иисуса Христа вам данныя, приснопоминаемии Вассиане и Ионо, милостиво и прилежно просим вас: пролейте теплую свою молитву о нас, грешных, яко да отринув вся наша прегрешения даст нам Господь крепость телесную, веру несумненную, страну нашу Российскую укрепит, Церковь Святую от распрей и расколов непозыблему да сохранит, обилие даров земных да дарует, время мирное ниспослет нам, и вся православныя христианы предстательством вашим сохранит и помилует, чесого от Всеправедного Владыцы улучити чаем, Ему вопия: Аллилуйя.

Икос 12

Совет превечный, Пресвятая Троица, Бог Отец, Бог Сын, Бог Дух Святый, славят вас, о Вассиане и Ионо, тайны обожения достигших, преподобны стали Ему в рождении инокоческом, подобны были Ему в послушании Отцу, уподобились Ему в исхождении благодати Святаго Духа, во всякое же время Господу были благопотребны. Темже и мы, радуяся таковей награде, в дивном восхищении вопием вам сице: Радуйтеся, фимиам Бога живаго, радуйтеся, жертва Ему непорочная. Радуйтеся, кадильницы благовонныя, радуйтеся, благодатию Святаго Духа Божества достигшия. Радуйтеся, Пресвятыя Богородицы верные чадца, радуйтеся, Ангелов немолчныя уста. Радуйтеся, Евангелия Христова исполнителие, радуйтеся, Святыя Троицы собеседницы. Радуйтеся, дерзкое касание мощей Ваших расслаблением наказавшии, радуйтеся, тем продерзца вразумившии. Радуйтеся, Российскую страну от богопротивных латинян сохранившие, радуйтеся, Российския державы славо и ограждение. Радуйтеся, Вассиане и Ионо, скорые помощницы и преславнии чудотворцы.

Кондак 13

О, преславнии Пертоминские чудотворцы, скорые и причуднии наши помощницы, Вассиане и Ионо, нынешнее приемше приношение, богоприятным Вашим ходатайством от всяких бед нас свободите, от нашествия антихриста заступите, от геенны избавите и в день Страшного Суда Господа умолите, да спасет Он и помилует вся православныя Христианы, и нас недостойных сподобит у Престола Вседержителя предстоящих, вечную песнь воспевати: Аллилуйя. 3 раза, затем 1 икос, 1 кондак.

Молитва

О, Духа Святаго сотаинники, венценоснии отцы Вассиане и Ионо, еще на земли чистотою сердец в тайну Святыя Троицы проникшии, Пресвятую Богородицу житием прославльшии, поминайте нас в своих благоприятных молитвах к Богу, велие ко Христу Иисусу имеяй дерзновение. Испросите нам от великодаровитаго Бога нашего здравие духовное и телесное улучити, мира умирение сотворите, от глада и пагубы градов избавление соделайте, от нашествия иноплеменных орд Русь Святую охраните, подвизающимся в иноческом житии крепость послите, юным наставление подайте, неверующих вразумления сподобите, сиротам и вдовицам утешение сотворите, усопшим блаженное упокоение даруйте, да и мы в день Страшнаго Суда блаженный оный глас Владыки Христа услышим: «Приидите, благословеннии Отца Моего, наследуйте уготованное вам Царствие от сложения мира». Аминь.