Кондак 1
Избранный от Господа Сил и предуставленный на спасение многим, / ты отче благоверный Ярославе, земли Русския собирателю явися, / Церковь Христову в земли нашей утвердивый, / мнози храмы и грады устроивый, / тако и храм Софии Премудрости Божией / указует на богомудрие твое, / за сие приими от нас похвалу таковую: //
Радуйся, богомудре княже Ярославе, теплый за ны к Богу молитвенниче.

Икос 1
Ангельстии силы возвеселишася, егда узрешатя, еще отрока, восшедша с богомудрым иноком Иларионом на святый холм, его же освяти десница святаго Андрея Первозваннаго, и единаго, тя вшедша в пещеру, тогда бо осени тя благодать Духа Святаго, сердце твое узре Бога, и живо восчувствова Его отеческое присутствие, и возжада душа твоя Бога крепкаго, Бога Живаго, Ему же, отче святый Ярославе, молися о чтущих память твою и поющих тебе таковая:
Радуйся, ангельских ликов удивление;
радуйся, Божие к людем благоволение.
Радуйся, честныя ветви княжеской прозябение;
радуйся, народа русского прославление.
Радуйся, Церкви Христовой на Руси утверждение;
радуйся, благодати с юных лет имевый познание.
Радуйся, святаго рода наследниче;
радуйся, лику святых русских сопричастниче.
Радуйся, богомудре княже Ярославе, теплый за ны к Богу молитвенниче.

Кондак 2
Виде, яко в единстве сила земли русской проявляется, благоволение же Бога к русскому народу в Православной вере открывается, ты богомудрию с юных лет прилежно учивыйся, в подвизех поста и молитвы усердно жизнь свою проводил еси, яко делатель верный, данные тебе Богом таланты, весьма приумножил еси, воспевая Богу: Аллилуиа.

Икос 2
Разум вещественный на изучение и постижение Священнаго Писания, с детских лет употребивый, разума божественнаго и Духа Святаго вселения сподобился еси, чистоты сердечныя взыскуя, мнози подвиги совершил еси, и яко купец рачительный, безценный бисер Христа приобрел еси, Его же моли даровати сердце чистое всем, поющим тебе сицевая:
Радуйся, княже, Божий избранниче;
радуйся, новый за ны молитвенниче.
Радуйся, Священное Писание вельми возлюбивый;
радуйся, от лет отроческих прилежание к нему имевый.
Радуйся, к чистоте сердечной в жизни стремивыйся;
радуйся, в подвизех душевных и телесных подвизавыйся.
Радуйся, храмом Божиим сердце свое соделавый;
радуйся, молитвенную вечерю Богу сотворивый.
Радуйся, богомудре княже Ярославе, теплый за ны к Богу молитвенниче.

Кондак 3
Силою божией просвещаемый на страсти и прилози демонския от юности укрепился еси, мудраго в Бозе наставника, чернеца Илариона, вопрошавый, в духовной мудрости преуспел еси, молитвы сладость вкусивый, всем сердцем Богу воспевал еси: Аллилуиа.

Икос 3
Имущи пред очами добродетельное житие святаго князя Владимира, отца твоего, народом прозываемаго Красным Солнышком, сердцем умягчался еси, в подвизех целомудреннаго жития ему соревнуя, достойный сыне княжескаго рода, Ярославе боголюбиве явивыйся, не токмо от Бога помилован еси, обаче к лику святых сопричтен еси, Ему же молися о всех, поющих тебе таковая:
Радуйся, от юных лет к Богу прилепивыйся;
радуйся, в молитве сердцем согревыйся.
Радуйся, святые примеры жития по Бозе имевый;
радуйся, в стремлении угодити Богу им подражавый.
Радуйся, в богомыслии вельми преуспевый;
радуйся, творения святоотеческия с иноком Божиим изучивый.
Радуйся, Свет Христов восприявый;
радуйся, любовь Христову стяжавый.
Радуйся, богомудре княже Ярославе, теплый за ны к Богу молитвенниче.

Кондак 4
Бурю искушений, воздвизаемую от врага рода человеческаго, на юное сердце твое, достойно претерпел еси, достоблаженне княже Ярославе, темже в вере Христовой утвердивыйся, дом души своея на сем камени незыблемом основал еси, всем сердцем поя Богови: Аллилуиа.

Икос 4
Слыша слова Священнаго Писания, ищите прежде Царствия Божия, взыскал еси в сердце твоем путь смирения, ведущий к нему, неуклонно шествуя по сему пути блаженства райскаго достиже, темже с блаженными части сподобился еси, святый княже Ярославе, с ними же вкупе молися о спасении душ наших, с любовию поющих тебе:
Радуйся, дом души твоея на твердом камени основавый;
радуйся, на имени Христовом его утвердивый.
Радуйся, бури искушений не устрашивыйся;
радуйся, добродетельным житием на ту ополчивыйся.
Радуйся, ангелы Божии терпением скорбей удививый;
радуйся, падшия духи в плач повергнувый.
Радуйся, в христианстей вере утвердивыйся;
радуйся, именем Иисусовым во бранех укрепивыйся.
Радуйся, богомудре княже Ярославе, теплый за ны к Богу молитвенниче.

Кондак 5
Боготечной звезде подобно, протекл еси землю отеческую от града Киева до Ростова и Новаграда, святый княже Ярославе, идеже Свет христианской веры возсиял еси, еще же храмы Божиими землю украсиша, к Богопочитанию истинному народ побудиша, научая пети Богу: Аллилуиа.

Икос 5
Видеша тя язычницы, идола медвежьяго убивша, велиим страхом исполнишася, к христианстей вере обращахуся, темже из зверонравных в добронравных превращахуся, сердцем Христа Бога истиннаго прияша, вкупе с тобою, княже боголюбиве, град Ярославль основаша и церковь пророку Божию Илии устроиша, идеже ныне имя твое прославляем, поюще тебе таковая:
Радуйся, странниче всю землю русскую, яко апостол, исходивый;
радуйся, мнози язычницы в веру Христову обративый.
Радуйся, воине, лютаго зверя с помощью Божией победивый;
радуйся, идолопоклонников к свету христианства направивый.
Радуйся, град Ярославль на реце Волзе основавый;
радуйся, церковь пророку Божию мудро устроивый.
Радуйся, яко имя твое на земли величается;
радуйся, Церковь Божия тобою красуется.
Радуйся, богомудре княже Ярославе, теплый за ны к Богу молитвенниче.

Кондак 6
Проповедуют добродетельное житие твое дела твои, во славу Божию и народа ради содеянныя, ты бо не токмо вся повеленная сотворил еси, обаче и людие благочестиво жити научил еси, церкви Божии на земли созидая и храмы душ без попечения не оставлял еси, отечески научая Богу пети: Аллилуиа.

Икос 6
Возсия свет мученическаго подвига святых страстотерпцев Бориса и Глеба, братий твоих единокровных, коварно Святополком убиенных, егда святыя мощи их в церкви, тобою, княже Ярославе, созданною, были положени и с честью, святым подобающею, прославлены, тогда весь народ русский прослави я, поюще тебе таковая:
Радуйся, святых братьев твоих усердный почитателю;
радуйся, святых подвигов братолюбивых мучеников утвердителю.
Радуйся, святыя мощи Бориса и Глеба народу явивый;
радуйся, храм во имя их устроивый.
Радуйся, новых молитвенников за землю русскую народу даровавый;
радуйся, полк мученический пополнивый.
Радуйся, Церковь Божию подвиги их украсивый;
радуйся, землю Русскую предстательством их оградивый.
Радуйся, богомудре княже Ярославе, теплый за ны к Богу молитвенниче.

Кондак 7
Хотя Господь Бог наш Иисус Христос спасти заблуждающихся язычников земли Русския, о них же молиша святии апостоли, вкупе с Андреем Первозванным, той бо провозвестиша свет веры Христовой на Руси возсияти, ты же, отче Ярославе, деяниям апостольстим верен явися, научил еси пети нас Богови: Аллилуиа.

Икос 7
Новое имя святаго великомученика и победоносца Георгия во святом Крещении получивый, житию того подражавый, мужественно на врази Христовы ополчивыйся, благоверный княже Ярославе, идольския капища на Руси сокрушал еси и благолепный монастырь, во имя святаго Георгия, в земли Новгородстей основал еси, за сие людие возлюбиша тя и пояху тебе таковая:
Радуйся, апостольских деяний ревнителю;
радуйся, верой Христовой Руси просветителю.
Радуйся, свет миру новгородцам возвестивый;
радуйся, обитель святаго Георгия основавый.
Радуйся, мужественно на врази Христовы ополчивыйся;
радуйся, невидимых козней вражиих не устрашивыйся.
Радуйся, немощных дерзостей их презрителю;
радуйся, безстрашный Божий служителю.
Радуйся, богомудре княже Ярославе, теплый за ны к Богу молитвенниче.

Кондак 8
Странником и пришельцем на земли себе помышляя, сердцем Богу служение непрестанно в сокровенной клети души своея совершал еси, всякое дело с молитвы начиная, и во славу Божию его сотворяя, всем христианом пример являеши, памяти смертной нас научаеши, побуждая Богу пети: Аллилуиа.

Икос 8
Вся Русь Православная ныне поет тебе песнь хвалы, богомудре княже Ярославе, ты бо добре правил еси слово истины, яко отец чадолюбивый, о Церкви Русстей денно и нощно попечение имущи, не токмо в строительстве Божиих церквей вельми преуспел еси, обаче и училища веры и благочестия устрояя, пастырей мнозих на Руси возрастил еси, и митрополита Илариона боголюбива народу даровал еси, за сие приими от нас похвалы таковыя:
Радуйся, странниче, об Отечестве Небесном помышление имущий;
радуйся, новый Моисее, в землю обетованную народ ведущий.
Радуйся, зиждителю, Церкви Божии на земли созидающий;
радуйся, строителю, души человеческия в боголюбии устрояющий.
Радуйся, Иове, мнози скорби от врага претерпевающий;
радуйся, ратоборче, вся смирением побеждающий.
Радуйся, перваго митрополита на Руси поставивый;
радуйся, Церковь Русскую возвысивый.
Радуйся, богомудре княже Ярославе, теплый за ны к Богу молитвенниче.

Кондак 9
Все помышление имущи, како угодити Господеви, и Пречистую Его Матерь Деву Богородицу прославляя, не вотще на земли потрудился еси, врази же не терпяще твоего благоговейнаго жития по Бозе, умертвиша сына твоего первенца Илию, ты же все упование на Бога возложивый, в скорби воспевал еси Ему: Аллилуиа.

Икос 9
Ветии многоглаголивии умолкоша, не возможе перечислити все скорби и беды твои, многострадальный княже Ярославе, еще же мнози козни, по наущению демонскому, твориша ти волхвы языческия, жену твою и сына умориша, и другия пакости тебе и дому твоему содеяша, ты же, душу свою в руцы Божии предавый, вся благодарно претерпел еси, мы же мужество души твоея прославляем и песнь хвалы тебе воспеваем:
Радуйся, верность Христу Богу в житии твоем имевый;
радуйся, душу твою в руцы Божии предавый.
Радуйся, вся скорби Господа ради претерпевый;
радуйся, врази своя по заповеди Божией выну прощавый.
Радуйся, смерть сына своего достойно приявый;
радуйся, за скорби и радости Бога благодаривый.
Радуйся, благодати источниче преизобильный;
радуйся, помощниче в скорбех преизрядный.
Радуйся, богомудре княже Ярославе, теплый за ны к Богу молитвенниче.

Кондак 10
Спасти хотя землю Русскую и народ наш, дарова нам Господь тя, правителя мудраго, боголюбиве княже Ярославе, ты бо вверенное тебе стадо овец Христовых соблюл еси от волков зверонравных; язычников и еретиков добре в свете истины охранял еси, научая вкупе с тобою пети Богу: Аллилуиа.

Икос 10
Стены твердейшие заступление и молитвенное предстательство твое ко Господу за ны, грешнии и немощнии духом чада твоя, святе княже Ярославе, ты бо, с великим сонмом святых земли Русския, немолчно молиши за ны, да избавит от глада, труса, потопа, от нашествия иноплеменников и от всякия другия беды и напасти всех, поющих тебе таковая:
Радуйся, мудрый и верный правителю;
радуйся, веры Христовой на Руси насадителю.
Радуйся, стено и ограждение роду Христианскому явивыйся;
радуйся, о нечестии язычников вельми печаливыйся.
Радуйся, спасение во Христе людем возвестивый;
радуйся, дела мнози во Славу Христову сотворивый.
Радуйся, новое солнце на Руси возсиявшее;
радуйся, духовное светило всю вселенную просветившее.
Радуйся, богомудре княже Ярославе, теплый за ны к Богу молитвенниче.

Кондак 11
Пение хвалы тебе, отче святый, приносим, аще и недостойны есть мы, презрители заповедей Божиих и твоих богомудрых заветов не соблюдиши, обаче любовию движемии, дерзновенно взываем ти, не остави нас в беззакониих умрети, испроси у Господа отпущения грехов и просвещения ума и сердца поющих Ему: Аллилуиа.

Икос 11
Светоносную свещу, возженную Божественною десницей на свещнице Церкви Русския помышляем тя, отче благоверне княже Ярославе, ты бо яко маяк пресветлый, от потопления кораблецы душ наших спасаеши, на мель самолюбия и гордыни сести им возбраняеши, и путь в Пристань Христову верно указуеши всем, поющим тебе похвалу таковую:
Радуйся, маяк пресветлый, от потопления в море грехов, нас спасающий;
радуйся, путь неложный в Пристань Христову нам указующий.
Радуйся, отче богомудре, благочестию и вере чада научающий;
радуйся, княже благоверный, законы Русской Правды народу показующий.
Радуйся, маслино многоплодная, в чадех всю Русь Святую имущий;
радуйся, лозо виноградная, питие жизни вечной людем в вере подающий.
Радуйся, добрую пшеницу веры Христовой насадивый;
радуйся, мног плод добродетельнаго жития пожавый.
Радуйся, богомудре княже Ярославе, теплый за ны к Богу молитвенниче.

Кондак 12
Благодать Духа Святаго ниспосли нам от Бога, в Троице славимаго и поклоняемаго, да узрим свет неприступный Божественныя Его славы, и тако в тишине сердец наших прославим имя твое святое, княже Ярославе благословенный, и вкупе с тобою воспоем с любовию Богу: Аллилуиа.

Икос 12
Поем благодарение Богу и Пречистой Богородице за устроение спасения нашего, воспеваем песнь хвалы всем святым в земли Российстей просиявшим, благоверным князем и княгинем веру христианскую на Руси явившим, и тебе, княже святый Ярославе, веру истинную утвердившему, благодарныя хваления приносим:
Радуйся, каменю драгий в диадиме славы Христовой;
радуйся, ковчеже златокованный, исполненный любви Иисусовой.
Радуйся, фимиаме благоуханный, молитвы о нас Богу возносящий;
радуйся, источниче целебный, благодатию нас очищающий.
Радуйся, храме благолепный, Троицы Святыя присное селение;
радуйся, доме благоукрашенный, добродетелей пребывание.
Радуйся, всея Руси ликование;
радуйся, града Ярославля и всея земли украшение.
Радуйся, богомудре княже Ярославе, теплый за ны к Богу молитвенниче.

Кондак 13
О, святый благоверный княже Ярославе, услыши ны грешнии, земнии сродницы твои, с верою и любовию тебе молящиеся, защити нас молитвами твоими от козней вражиих, и сподоби безбедно житейское море жития сего миновати, и Царствия Небеснаго достигнути, идеже вкупе с тобою, воспевати Богу: Аллилуиа.
Сей кондак глаголется трижды. И паки чтется 1-й икос и 1-й кондак.

Молитва
О,святый богомудрый княже Ярославе, ты в житии своем волю Божию постиглеси, и вся Заповеди Христовы верно исполняя, чистоты сердечной достиглеси, испроси нам у Господа сию добродетель, да и мы узрим Бога в тишине сердец наших. Еще же, молим тя, отче блаженне, умоли Господа даровати веру крепкую, любовь нелицемерную на спасение душ наших. Церквам благостояние, архиереем мудрость и силу, пастырем ревность о спасении пасомых испроси, монашествующих дух смирения и послушания, наипаче же молитвеннаго преуспеяния, да прославим едиными усты Подателя всех благ, Господа нашего, в Троице суща во веки. Аминь.