Акафист всем святым женам в земли Российстей просиявшим
для келейного чтения
Кондак 1
Избранным от российскаго рода, славным угодницам Божиим, благодарственное пение возносим любовию вам, святыя жены земли нашея, и молим вас усердно. Вы же, имущия дерзновение ко Господу, оградите нас от всяких бед молитвами вашими и наследники Царствия Небеснаго соделайте всех во умилении сердец поющих:
Радуйтеся, вся святыя жены, в земли Российстей просиявшия.
Икос 1
Ангели земнии и человецы небеснии воистину явистеся, святыя жены, добродетельным житием вашим Пресвятей Богородице подражавшия и тако образы совершенства духовнаго нам оставльшия. Сего ради, чудесы вашими озаряеми, с радостию зовем вам сице:
Радуйтеся, Единаго Христа паче всех возлюбившия;
Радуйтеся, радость Матере Божия во вся дни до скончания века восприявшия.
Радуйтеся, путь от земли на Небо нам показующия;
Радуйтеся, яко Ангелов и человеков удивили есте чистым и непорочным вашим житием.
Радуйтеся, страны нашея Российския духовное сокровище;
Радуйтеся, всем женам российским похвало и утверждение.
Радуйтеся, любовь нелицемерную от народа своего снискавшия;
Радуйтеся, яко вас ради пресвятое имя Господа прославляется.
Радуйтеся, исполнению Промысла Божия о спасении мира послужившия;
Радуйтеся, небесныя предстательницы наша.
Радуйтеся, Пресвятыя Девы Богородицы верныя послушницы;
Радуйтеся, всея Церкве Христовы преславное украшение.
Радуйтеся, вся святыя жены, в земли Российстей просиявшия.
Кондак 2
Видя Отец Светов благое изволение сердца твоего, призва тя, святая равноапостольная Ольго, просветити отцы наша светом веры Христовы и наставити их творити волю Господню. Ты же, яко духовная мати наша, мудрыми словесы посреде людей твоих веру истинную утвердила еси, и тобою познахом покланятися в Троице Творцу. Темже, яко первоугодница Российская, научаеши нас единеми усты и единем сердцем с тобою воспевати Единому в Троице славимому Богу: Аллилуиа.
Икос 2
Разум небесный даровася вам, святыя жены, в познании Бога истиннаго, во еже обратити народ русский к вере Христовой и призвати его во язык свят, в люди обновления. Темже и мы, таковому вашему разуму дивящеся, благодаряще Бога, прославляем вас, яко просветительницы и молитвенницы наша, и с любовию вопием сице:
Радуйтеся, апостольскаго служения причастницы;
Радуйтеся, множество душ ко Христу приведшия.
Радуйтеся, истинную мудрость возлюбившия;
Радуйтеся, многи в разуме просветившия.
Радуйтеся, премудрость и благость Божию нам открывающия;
Радуйтеся, яко вами мрак неведения прогоняется.
Радуйтеся, на путь спасения к Небесному Отечеству нас наставляющия;
Радуйтеся, от враг видимых и невидимых нам заступницы.
Радуйтеся, заповеди Христа Бога усердно исполнявшия;
Радуйтеся, вся добродетели в себе совокупившия.
Радуйтеся, неисповедимым промыслом Божиим прославленныя;
Радуйтеся, ко Престолу Славы Господа нас ведущия.
Радуйтеся, вся святыя жены, в земли Российстей просиявшия.
Кондак 3
Сила Вышняго воздвиже тя, преподобная благоверная княгине Анно, от Запада возсиявшую, яко звезда пресветлая, прияти Православную веру, в нейже плод благословенный Российстей земли принесши, Христа всем сердцем возлюбила еси, и сокровище Великаго Новаграда и всея страны нашея явилася еси, да приемлющи от тебе свет богоразумия благодарно взывают Богу: Аллилуиа.
Икос 3
Имуще, святыя жены, непоколебимую ревность по Бозе, сердца ваша во всегдашнее Богу и Божией Матери служение предали есте. Пречистая же Мати Господа нашего благоизволи призвати вас ко трудом во спасение чад Своих, подвизающи люди российския воспевати вам сице:
Радуйтеся, благое иго Христово на себе восприемшия;
Радуйтеся, святым житием вашим Божией Матери подражавшия.
Радуйтеся, ум и сердце в Бозе молитвенно утвердившия;
Радуйтеся, вся заповеди Господни совершенно сохранившия.
Радуйтеся, во образ всем женам христианским свыше пронареченныя;
Радуйтеся, всем подражающим житию вашему наставницы.
Радуйтеся, от ваших благодатных даров и нам подательницы щедрыя;
Радуйтеся, яко молитвами вашими безчадным родителем велия радость чадородия даруется.
Радуйтеся, матерински любовию нас согревающия;
Радуйтеся, радости и нежности материнстей всех жен российских научающия.
Радуйтеся, цветом нетления украшенныя на Небеси;
Радуйтеся, ко Пресвятей Богородице непрестанно за ны молящияся.
Радуйтеся, вся святыя жены, в земли Российстей просиявшия.
Кондак 4
Бурю искушений победила еси, преподобная мати Евфросиние, силою благодати Христовы и предстательством Пресвятыя Богородицы и прошла еси весь путь тесный и скорбный подвига иноческаго, затвора, многонощнаго бдения, нестяжания, послушания и целомудрия. Темже и обитель иноческую во граде Полоцке основала еси, да вся жены российския уставы жития монашескаго познают, от нихже во веки яко фимиам благовонный, с тобою, материю инокинь земли Российския, вознесем Богови песнь: Аллилуиа.
Икос 4
Слышавше российстии роди дивную любовь вашу к чадом Божиим, святыя жены, со умилением сердца славят Господа, дивнаго во святых Своих. Вы же, подражающе Божией Матери, разумели есте, яко радость матерняго сердца многих печалей бывает причастна. Темже, яко искушенных и сострадати матерней скорби могущих, верою и любовию восхваляем вас сице:
Радуйтеся, вся прелести мирския ради Христа ни во чтоже вменившия;
Радуйтеся, страданием вашим Божией Матери спострадавшия.
Радуйтеся, мудрыя еванегльския девы, во свете веры и дел благих ходившия;
Радуйтеся, послужившия Господу преподобием и правдою.
Радуйтеся, измлада истинную простоту и безмолвие возлюбившия;
Радуйтеся, постом и молитвою плоть вашу духови покорившия.
Радуйтеся, ангельски на земли пожившия;
Радуйтеся, обетом девства чистоту сердец ваших явившия.
Радуйтеся, обетом нестяжания высоту духа вашего показавшия;
Радуйтеся, обетом послушания всецелое служение ваше Богу и Пресвятей Богородице во веки утвердившия.
Радуйтеся, наставницы инокинь предивныя и богомудрыя;
Радуйтеся, к Богородице молитвенницы наша неусыпныя.
Радуйтеся, вся святыя жены, в земли Российстей просиявшия.
Конадк 5
Боготечней звезде явилася еси подобна в житии твоем, святая благоверная княгине Февроние, блистающи славою и добродетелию, и Божественнаго Духа преисполнена была еси, зане кротка, милостива сердцем, терпелива, непамятозлобна, страннолюбива была еси, и с супругом твоим, святым благоверным князем Петром, неразлучна в житии, неразлучна и в кончине явилася еси, да во свете любве вашея вси людие умом и сердцем к Богу возвышаются, поюще песнь: Аллилуиа.
Икос 5
Ведяще неизреченную славу святых жен российских на небесех, сами себе и друг друга к подражанию тем подвигнем, молитвами их наставляеми на путь правый, к Небесному Отечеству ведущий. Темже со дерзновением взываем:
Радуйтеся, благодатию Святаго Духа осиянныя;
Радуйтеся, в кротости и смирении Христу Богу и Пречистей Его Матери подражавшия.
Радуйтеся, спасительных благ земных и небесных ходатаицы;
Радуйтеся, утверждение наше на пути спасения.
Радуйтеся, от любве земныя к небесней Божией любви нас привлекающия;
Радуйтеся, чистоты и целомудрия хранительницы усердныя.
Радуйтеся, супружество в союзе любве и единомыслии сохраняющия;
Радуйтеся, нарушителей супружескаго согласия грозное обличение.
Радуйтеся, многи скорби и беды претерпевшия;
Радуйтеся, друг друга тяготы носити нас научающия.
Радуйтеся, о мире всего мира непрестанно Господа умоляющия;
Радуйтеся, светом любве Христовы нас озаряющия.
Радуйтеся, вся святыя жены, в земли Российстей просиявшия.
Кондак 6
Проповедница покаяния и ревнительница веры Православныя была еси во граде Суздали, преподобная мати Евфросиние, егда, царским путем Креста Господня следующи, безстрастия достигла еси и всем женам российским образ терпения показала еси, да и мы, во искушениих и бедах суще, вопием смиренно Богу: Аллилуиа.
Икос 6
Возсияли есте, святыя жены, паче мужества терпением вашим, егоже стяжали есте, взирающе на Начальника веры Господа. Темже и святая Церковь достойно почитает подвиги ваша, имиже трудистеся, подражающе терпению и любви Матере Господа, призывающе всех на благоугождение Богу и на делание духовное со усердием, да вси последующии вам зовем:
Радуйтеся, образ отвержения себе нам показавшия;
Радуйтеся, в подвизех дневных и нощных течение жизни временныя совершившия.
Радуйтеся, носившия на земли венцы терновыя;
Радуйтеся, унаследовавшия на небеси венцы небесныя.
Радуйтеся, до конца в подвизех служения Богу претерпевшия;
Радуйтеся, терпением вашим Ангелы и человеки удивишия.
Радуйтеся, чувства ваша противу триех врагов, плоти, мира и диавола, крепко заключившия;
Радуйтеся, постом и молитвою страсти плотския обуздавшия.
Радуйтеся, во иночестве благоскорбящим радость подающия;
Радуйтеся, всем ищущим пути ко спасению наставницы благодатныя.
Радуйтеся, научившия нас упование на Всеблагую Матерь Господа возлагати;
Радуйтеся, источницы чудес обильнии.
Радуйтеся, вся святыя жены, в земли Российстей просиявшия.
Кондак 7
Хотя Всеблагий Господь явити благодать Свою и неизреченное к людем милосердие, призва тя, преподобная мати великая княгине Анно, к служению чадом Своим во дни скорбей и печалей в земли Русской. Ты же с терпением и смирением путь многоскорбнаго жития совершила еси, велию крепость явила еси, делы и словесы приводящи чад твоих ко благочестию и любви Божией. Сего ради и святыя мощи твоя оставила еси нам нетленны и многочудесны во граде Кашине, да взирающе на них и подвиги твоя поминающе, величаем тя и прославльшему тя Христу поем: Аллилуиа.
Икос 7
Дивная показа дела Своя Господь в вас, святыя жены, ибо все житие ваше на земли многими печальми и болезньми исполнено бе от клеветы и досаждения, укорения и иных многих бед и напастей. Вы же клеветы слышаще и хулы, духом пребывали есте в Бозе утверждены и помыслы не смущены, да и мы вси прибегаем к вам в нуждах во времена глада, смертоносныя язвы и во вся годины бед и искушений и да предстательством вашим исполнятся радости и веселия скорбная сердца всех поющих вам:
Радуйтеся, благодатиею Божиею озаренныя;
Радуйтеся, силою свыше на брань противу сил преисподних препоясанныя.
Радуйтеся, крилами богомыслия сети вражия сокрушившия;
Радуйтеся, того вся злобная умышления на вас до конца посрамившия.
Радуйтеся, многи скорби и хуления с благодарением претерпевшия;
Радуйтеся, заповедь Христову, яже о любви ко врагом, исполнившия.
Радуйтеся, немощи немощных вземлющия;
Радуйтеся, богоблагодатныя человеком помощницы.
Радуйтеся, Отечеству нашему щит и ограждение;
Радуйтеся, всех врагов наших крепкое побеждение.
Радуйтеся, людем российским любовь истинную показавшия;
Радуйтеся, страны нашея надеждо крепкая и утверждение.
Радуйтеся, вся святыя жены, в земли Российстей просиявшия.
Кондак 8
Странное и страшное святыя Иулиании страдание и смерть зрим, яко образ подвига в хранении целомудрия и святости союза брачнаго. Сего ради от Христа Бога нетленным и вечным венцем венчавшися, хранительница и заступница целомудрия явилася еси, мати, и благодать прияла еси целити плотския страсти, такожде и ходящих по пути погибели ко спасению приводити. Мы же, ко гробу твоему во граде Торжце притекающе и таковое утешение имуще, молим тя: моли Господа прощение прегрешений нам прежде конца даровати, да непрестанно поем Ему: Аллилуиа.
Икос 8
Всеми вышними и нижними владычествуя, Господь, узрев желание поработати Ему всем житием вашим, святыя жены, прослави вас и дарова благодать и помощь миру, в бедах погибающему. Мы же, неисчетная благодеяния ваша видяще, душею же и сердцем радующеся, восхваляем вас любовию:
Радуйтеся, бедных и убогих милостивыя попечительницы;
Радуйтеся, христианским смирением украсившияся.
Радуйтеся, многи скорби в мире претерпевшия;
Радуйтеся, яко силою молитв препобедили есте диавольская искушения.
Радуйтеся, печаль и уныние скоро отгоняющия;
Радуйтеся, грешников ко исправлению направляющия.
Радуйтеся, окамененная сердца наша во умиление приводящия;
Радуйтеся, покой душам нашим подающия.
Радуйтеся, блаженныя матери, в женстем естестве мужескую крепость показавшия;
Радуйтеся, всех последующих вам к мужественному со врагом борению наставляющия.
Радуйтеся, яко ходатайствуете им венцы, достойныя трудов и подвигов, от Христа Бога;
Радуйтеся, яко души ваша святыя ныне в Небесных скиниях обретаются.
Радуйтеся, вся святыя жены, в земли Российстей просиявшия.
Кондак 9
Все естество ангельское удивися житию твоему, преподобная великая княгине Евфросиние, егда всю жизнь свою повинувши Богу и обитель иноческую во граде Москве создавши, к венцу мудрыя благоверныя княгини венец инокини приложила еси и радости исполняеши сердца наша, яко радости тезоименитая. Темже и внити сподобилася еси в радость Господа своего, Емуже предстоиши ныне, со Ангелы поюще: Аллилуиа.
Икос 9
Ветии многовещаннии не возмогут достойно прославити дивное житие ваше, святыя жены, кто бо исповесть вся моления и пощения, болезни и труды ваша, предали бо есте себе на служение Богу и чадом вашим. Мы же, неисчетная благодеяния ваша видяще, с радостию и благодарением от всего сердца взываем вам сице:
Радуйтеся, радостию Божия Матере обрадованныя;
Радуйтеся, хранительницы радости вечныя в земли Российстей.
Радуйтеся, любве ради вашея радости Царствия Небеснаго сподобившияся;
Радуйтеся, пред Престолом Божиим лампады неугасимыя.
Радуйтеся, многими чудесы от Господа прославленныя;
Радуйтеся, в радость Господа своего вшедшия.
Радуйтеся, суетныя радости мира сего презирати нас научающия;
Радуйтеся, светом радости души наша озаряющия.
Радуйтеся, радости нам, благодати же и славы вечныя благоприятныя ходатаицы;
Радуйтеся, скорбящим радость утешения подающия.
Радуйтеся, яко нечаянную радость по молитвам вашим получаем;
Радуйтеся, яко радость ваша многа на Небесех.
Радуйтеся, вся святыя жены, в земли Российстей просиявшия.
Кондак 10
Спасению чад Божиих послужила еси, преподобная мати, благоверная княгине Харитино, егда от земли Литовския в землю Русскую вселилася еси и во обители иночестей Великаго Новаграда многотрудный подвиг преподобнический подъяла еси. Темже убо и венцем украсилася еси от Господа на Небеси, идеже со всеми святыми предстоящи с мольбами о нас, воспеваеши Богу: Аллилуиа.
Икос 10
Стену нерушимую воздвиже вас Господь, святыя жены, и показа ограждение наше от свяких бед и источник исцелений. Мы же, балгодаряще Господа за вся благодеяния и любовь Его, обильно являемыя предстательством вашим, приносим радостное пение:
Радуйтеся, стено и заступление всех людей российских, почитающих вас;
Радуйтеся, наставницы наша в духовней жизни.
Радуйтеся, прославившия Господа во всех делех ваших;
Радуйтеся, в подвизех дневных и нощных земное течение совершившия.
Радуйтеся, любве ко Пресвятей Богородице нас научающия;
Радуйтеся, яко вся концы земли Российския любовию вашею объяли есте.
Радуйтеся, в тайне Богу послужившия;
Радуйтеся, сокровенно от людей Тому угодившия.
Радуйтеся, нужды наша скоро к Престолу Божию возносящия;
Радуйтеся, реки, исполненныя благодати Божия водами.
Радуйтеся, в странствии земнем велия нам отрадо и утешение;
Радуйтеся, в час кончины за нас пред Богом заступницы.
Радуйтеся, вся святыя жены, в земли Российстей просиявшия.
Кондак 11
Пение непрестанное Пресвятей Богородице возносят святыя жены, преподобная мати Мария Радонежская, Иулиания княгиня Ольшанская, Иулиания Лазаревская, Гликерия дева Новаградская, София княгиня Слуцкая, блаженная Ксения Петербургская, святыя мученицы великая княгиня Елисавета и инокиня Варвара и вся святыя жены земли нашея, зде нами не именованныя, Богу же знаемыя, те бо всем житием своим подвижницы благочестия явишася и людей, в скорбех сущих, не оставиша, заблуждшим вразумление, обидимым заступление, скорбящим утоление печалей, болящим душею и телом исцеление подающе, убогим трапезы умножающе, вражду умиряюще, любовь и милосердие насаждающе. Мы же, на тех предстательство уповающе, зовем Богу: Аллилуиа.
Икос 11
Светильницы света небеснаго вы есте, святыя жены, у Престола Святыя Троицы со ангельскими Силами в молитве о нас присно горящия. Вы бо, имуще попечение о людех своих, неусыпно подвизаетеся ко благу их и на светлую спасения стезю всех наставляете. Темже и Пречистая Мати Господа, видящи подвиги ваша, землю Российскую благослови и велиими добродетельми жен российских украси, подвизающи воспети всех сице:
Радуйтеся, яко о глубине милосердия и любве вашея Мати Божия возрадовася;
Радуйтеся, служению святых жен мироносиц Марфы и Марии подражавшия.
Радуйтеся, древа благосеннолиственная, страну Российскую осеняющая;
Радуйтеся, Отечество наше от бед и врагов избавляющия.
Радуйтеся, всем житием вашим Богу и Пресвятей Богородице верно послужившия;
Радуйтеся, непорочныя голубицы, возлетевшия от земли в Небесныя обители.
Радуйтеся, нетлением мощей ваших зарю общаго всех воскресения нам показующия;
Радуйтеся, светом Божиим от растления нас охраняющия.
Радуйтеся, болящим исцеление подающия;
Радуйтеся, преподобных и праведных сонаследницы.
Радуйтеся, от глада духовнаго всех нас избавляющия;
Радуйтеся, любви к Божию творению нас научающия.
Радуйтеся, вся святыя жены, в земли Российстей просиявшия.
Кондак 12
Благодать Божественную испросите нам у Небеснаго Владыки и Бога, святыя жены земли нашея, прострите нам руку помощи и молитвами вашими покрыйте нас; умолите Пречистую Матерь Господа, да избавит нас от всякия напасти, бед и скорбей и сохранит нас во святей православней вере, во всяком благочестии и чистоте, и да приимет нас в Небесное Отечество, идеже вы радующеся предстоити Господу и воспеваете Ему: Аллилуиа.
Икос 12
Поюще милости и чудеса Твоя, Богородице, хвалим Тя вси, яко сонм святых жен в земли Российстей воздвигла еси, ихже молитвами от всех зол избавляемся, сердца наша любовию и радостию исполняютсся и души наша жизни вечныя сподобляются. Сего ради радостно прославляем святых жен, в земли Российстей просиявших, и с любовию возглашаем к ним сице:
Радуйтеся, святыя жены со Святейшею всея твари Приснодевою Мариею;
Радуйтеся, Ангели хранителие земли Российския.
Радуйтеся, апостолом в служении поревновавшия и светом веры Христовы люди российския озарившия;
Радуйтеся, кровию своею торжество веры православныя возвеличившия.
Радуйтеся, преподобныя матери, в подвизех иноческих земное течение совершившия;
Радуйтеся, святыя благоверныя княгини, на земли благочестиво царствовавшия и Небесное Царствие наследившия.
Радуйтеся, девственницы, целомудрие сохранившия и непорочному Агнцу Христу последовавшия;
Радуйтеся, юродивыя девы, поношения и укорения Христа ради потерпевшия.
Радуйтеся, терпеливыя странницы, Небеснаго Отечества достигшия;
Радуйтеся, безсребренницы, туне болящим исцеления подававшия и на Небеси мзду приявшия.
Радуйтеся, во всяком возрасте угодившия Богу жены российския;
Радуйтеся, вся святыя жены земли нашея, явленныя и неявленныя, но присно молящияся за ны.
Радуйтеся, вся святыя жены, в земли Российстей просиявшия.
Кондак 13
О великия угодницы Божии, вся святыя жены, в земли Российстей просиявшия, нынешнее приемше приношение наше, умолите Господа, да избавит нас от всякия напасти, бед и скорбей и от вечнаго осуждения и да сподобит нас вкупе с вами и со всеми святыми во Царствии Небеснем пети Пресвятей Троице хвалебную песнь: Аллилуиа.
Этот кондак читается трижды, затем 1-й икос: "Ангели земнии..." и 1-й кондак: "Избранным от российскаго рода..."
Тропарь, глас 8
Якоже плод красный Твоего спасительнаго сеяния, земля Российская приносит Ти Господи, вся святыя жены, в той просиявшия. Тех молитвами в мире глубоце Церковь и страну нашу Богородицею соблюди, Многомилостиве.
Кондак, глас 3
Днесь собор святых жен земли нашея за ны молится Богу и воспевает деву Пречистую, истинную Матерь Божию. Ангели с ними славословят и вси святии Церкве Христовы ликовствуют, нас бо ради молит Богородица Превечнаго Бога.
Молитва
О преславныя матери наша, вся святыя жены, в земли Российстей просиявшия! Поминайте нас всегда в непрестанных ваших и благоприятных молитвах к Богу. Молите Христа Бога нашего даровати Церкви Святей Православней и всей богохранимей стране Российстей мир, тишину и благоустроение, властем и воинству державы нашея на враги победы и одоление, земли нашей плодоносие, воздухом благорастворение и всем нам от всякаго зла ограждение. Испросите у Всемилостиваго Господа, да дарует нам сокрушение сердечное и покаяние истинное, да подаст нам дух вашея ревности ко исполнению святых Его заповедей. Руководите нас к Небесному Отечеству, возбудите в нас святую любовь ко Господу. Умолите милосердую Матерь Света, да утвердит всех людей российских в вере, надежде и любви и да будут вси едины в Бозе. Величаем возвеличивших вас Христа Бога нашего и Его Пречистую Матерь, Имже верою и любовию послужисте, да и мы, грешнии и недостойнии, сподобимся купно с вами покланятися Пресвятей Троице и прославляти Отца, и Сына, и Святаго Духа во веки веков. Аминь.
Александр Трофимов
Издательство "Благо" 2004.
123423, Москва, а/я 27
(095) 953-55-50