Заупокойный Акафист.

Кондак 1

Непостижиме Промысле, к вечному благу мир уготовляй, всем время и образ кончины определивый, прости Господи, согрешения умершим, прими их во обители света и радования. Объятия Отча отверзи им милостиво и услыши нас, память их совершающих и поющих: Отче наш, Любовь неизреченная, помяни усопших раб Твоих.

Икос 1

Адама падшаго и весь род наш от вечныя погибели спасаяй, послал еси Боже в мир сына Твоего Крестом бо и Воскресением Его возсия нам жизнь вечная. Уповая на милосердие Твое, чаем нетленнаго царствия славы и просим упокоити в Нем усопших и молимся:
Отче наш, возвесели души удрученных до конца бурями житейскими.
Отче наш, да забудут они вся скорби и воздыхания земныя.
Отче наш, услыши их на лоне Твоем якоже мать чада своя.
Отче наш, возвести им: прощаются вам грехи ваши.
Отче наш, прими их в Твое блаженное тихое пристанище.
Отче наш, отверзи им Чертог Ангелов и Святых.
Отче наш, Любовь неизреченная, помяни усопших раб Твоих.

Кондак 2

Озарением Вышняго просвещения преподобный Макарий узре череп жреца языческаго и внят гласу от него исходящему. Егда вы христиане молитвы творите о страждущих во аде, тогда и язычникам бывает отрада. О, сила молитв христианских, имиже преисподняя озаряется, с верными и неверные утешение приемлют егда мы о всем мире поем: Аллилуйя.

Икос 2

Помянув слова Ефрема Сирина глаголюща, сердце милующее о людех, о безсловесных и о всей твари ежечасно приносит молитву да сохранятся и очистятся и мы дерзновенно просим у Господа помощи всем от века умершим взывая:
Отче наш, посли нам дар пламенной молитвы о усопших.
Отче наш, помяни всех заповедавших нам молитися о них.
Отче наш, изглади грехи забвенные ими.
Отче наш, согрей сердце наше жалостию ко врагам истины.
Отче наш, помилуй всех без напутствия молитвеннаго погребенных.
Отче наш, приими в Твои селения умерших якоже от горя тако и от радости внезапно.
Отче наш, низпошли преставльшимся мир и покой о Святом Духе.
Отче наш, Любовь Неизреченная, помяни усопших раб Твоих.

Кондак 3

Повинны есмы в бедах мира, в страданиях безсловесныя твари, в муках младенцев непорочных, зане грехопадением прародительским, не токмо на людей но и на вся сотворенная клятва и гнев наведеся. Едине Безгрешне, на Кресте за ны пострадавый, Ты имаши власть оставляти грехи наша, простив нас паки подаждь миру твоему дивную доброту и благоденствие, да и мы радость обрящем, взывая: Аллилуйя.

Икос 3

Сыне Божий! Любовию своею объемлющий весь мир. Свете Тихий, Искупитель вселенныя! Слышахом молитву Твою со Креста о врагах: Отче, отпусти им, и во имя Твоего всепрощения сами дерзаем молитися о вечном покое Твоих и наших врагов.
Отче наш, прости проливавших кровь неповинную.
Отче наш, прости устилавших нам путь тернием скорбей.
Отче наш, прости создавших благоденствие на слезах ближних.
Отче наш, не суди клеветавших и злобующих на нас.
Отче наш, воздаждь милостию Твоею всем пострадавшим о нас.
Отче наш, утеши всех ихже по неведению преогорчихом.
Отче наш, да будет молитва сия таинством примирения их с нами, и прощения нас Тобою.
Отче наш, истреби рукописание грехов почивших.
Отче наш, Любовь неизреченная, помяни усопших раб Твоих.

Кондак 4

Спаси Господи скончавшихся в тяжких мучениях, убиенных, погребенных живыми, поглощенных землею, волнами, огнем, растерзанных зверями, умерших от глада, мраза, с высоты падения. И за скорби кончины их даруй им вечную радость Твою, да благословят страдания своя яко дань искупления их воспевая: Аллилуйя.

Икос 4

Всем, у них же жизнь отъята бысть в светлой юности, иже путь свой шествоваху в венце страданий терновых, и ни единыя радости земныя не познаша, всем воздай за гробом лучами Твоея безконечныя любви.
Отче наш, услади их радостию твоих вечных даров.
Отче наш, даруй вожделенный покой умершим под бременем тяжких грехов.
Отче наш, приими в Чертог Твой отроков и дев.
Отче наш, сподоби их ликования на вечери Сына Твоего.
Отче наш, утоли скорби об утрате детей.
Отче наш, упокой всех одиноких не имущих ближняго молящагося о них.
Отче наш, да истают грехи их в лучах всепрощения Твоего.
Отче наш, даждь рабом Твоим одежду светлую победную.
Отче наш, Любовь неизреченная помяни усопших раб твоих.

Кондак 5

Яко врачество конечное ко вразумлению и покаянию рода человеческаго Ты, Господи, даровал еси нам смерть. При грозном явлении ея обнажается суета земная, утихают стремления плотския, смиряется непокорный, открывается правда вечная. Тогда закосневшии в безбожии неции, на смертном одре страхом объемлются и исповедуют Бытие Твое, милосердию Твоему взывая: Аллилуйя.

Икос 5

Светом Солнечным осиявая злыя и благия, посылая дождь праведным и неправедным, милостиве к верным и долготерпеливе к врагам Твоим, веруем яко и за гробом неистощимо милосердие Твое, милующее и самых отверженных грешников.
Отче наш, скорбим об ожесточении беззаконных хулителей Твоего Имени и Святыни.
Отче наш, да будет над ними спасительная воля Твоя.
Отче наш, умилосердися над уязвленными гибельным неверием.
Отче наш, да возлюбят Тя и на небеси, познавшие Тя на земли.
Отче наш, прости скончавшихся без покаяния.
Отче наш, спаси погибших в помрачении ума.
Отче наш, да угаснет пламень нечестия человеческаго в море благости Твоея.
Отче наш, Победителю ада, избави преставльшихся от осуждения в нем.
Отче наш, Любовь неизреченная помяни усопших раб Твоих.

Кондак 6

Страшен мрак души от Бога отлученной. Терзания совести, скрежет зубов, огнь неугасимый, червь неумирающий: трепещу, да и мне в такую муку не впасти. Яко о себе самом молюся, и о страждущих во аде, да снидет росою прохлаждающая наша песнь: Аллилуйя.

Икос 6

Где бы не возсиял свет Твой Христе Боже, аще и на седящих во тьме и сени смертней. Темже поминают Тя сущии во аде души. Сниди паки в преисподнюю, изведи во отраду разлученных с Тобою грехами, но не отрекшихся от Тебе во имя Сына и Святого Духа. Помолимся ко Отцу:
Отче наш, чада Твои страждут помилуй их.
Отче наш, согрешиша они пред Тобою.
Отче наш, тяжки их грехи, но сильна милость Твоя.
Отче наш, Ты Сына своего послал грешныя спасти.
Отче наш, прости горькую нищету удаленных от Тебе душ.
Отче наш, помилуй гнавших истину по неведению.
Отче наш, да будет Любовь Твоя им не огнем, но прохладою райскою.
Отче наш, избави от пламени вечнаго отшедших к Тебе.
Отче наш, Любовь неизреченная помяни усопших раб Твоих.

Кондак 7

Хотя умершим руку помощи подати, разрешил еси им в сониях и видениях являтися, да поминая отшедших, живущие на земли творят в их память добрыя дела и подвиги веры, взывая с надеждою: Аллилуйя.

Икос 7

Церковь Христова по всей вселенней всякий день возносит молитвы о почивших, ежечасно по всей земли грехи мира омываются чистительною Кровию Божественнаго Агнца. От смерти к жизни, от земли к небеси восходят души усопших, силою молитв о них пред Алтарем Господним.
Отче наш, да будет ходатайство Церкви лествицею им на Небеса.
Отче наш, помилуй их предстательством Пресвятыя Девы и всех Святых.
Отче наш, очисти грехи их ради верных, вопиющих Тебе день и нощь.
Отче наш, ради незлобивых младенцев, прости грехи их родителей.
Отче наш, слезами матерей искупи грехи их чад.
Отче наш, приими наши милостыни яко во исполнение их добродетелей.
Отче наш, да будет Кровь Сына Твоего источником жизни и для ныне принимаемых.
Отче наш, Любовь неизреченная помяни усопших раб Твоих.

Кондак 8

Весь мир есть не токмо обитель живых, но общая священная усыпальница почивших. На всяком месте прах наших отец и братий, сотворенных по образу и по Подобию Божию, единокровных нам по Адаму. Едине Боже, неизменно нас возлюбивый! Прости прегрешения всем от века до ныне усопшим, да воспоют они безсмертной любви Твоей: Аллилуйя.

Икос 8

Се грядет день великий и страшный последняго суда; обнажатся тайны человеческия и откроется книга совести. Примиритеся с Богом, вопиет апостол Павел. Прежде онаго страшнаго дне помози нам Господи! И слезами живых восполни недостающее умершим.
Отче наш, да будет глас трубы Ангельской им благовестием спасения.
Отче наш, в час суда сподоби их всерадостнаго помилования.
Отче наш, увенчай славою ближних страдавших Тебе ради.
Отче наш, покрый благостию согрешения немощных.
Отче наш, даждь радость Твою очистившимся грозою бед земных.
Отче наш, ведый всех по имени, помяни в мирском и иноческом чине спасавшихся.
Отче наш, приими пастырей благоговейных с духовными чадами их.
Отче наш, да встретим вси Жениха со светильниками горящими.
Отче наш, Любовь неизреченная помяни усопших раб Твоих.

Кондак 9

Благословляйте скоротекущее время: вси бо ежечасно от времени жития к вечному приближаемся. Новая скорбь, новая седина - суть вестники из мира грядущаго и знамение тленности всего земнаго в яве возвещающее нам яко преходит для нас образ мира сего, и близ есть Царствие Небесное, вечное, идеже несть ни слез ни воздыхания, но песнь победная: Аллилуйя!

Икос 9

Якоже древа к зиме обнажаются от своего покрова лиственнаго, сице житие наше ко оскудению нудится. Юность увядает, светильник радости угасает, близ есть при дверех скорбная многонемощная старость, друзи и сродницы смертию отъемлются. Где суть вси жившие? Юные, безпечные, радостные? Безмолвны их гробы, но души их в Деснице Твоей, Господи.
Отче наш, чувствуем их на нас взоры из мира загробнаго, побуждающие к молитве.
Отче наш, Солнце Пресветлое, озари и согрей селения усопших.
Отче наш, да не будет горестное разлучение с ними для нас безконечным.
Отче наш, сподоби нас радостнаго сретения с ними во Царствии Твоем.
Отче наш, сотвори да вси будем едино с Тобою.
Отче наш, очисти сердца наши и почивших, да вси по слову Твоему Бога узрят.
Отче наш, умягчи скорби об усопших надеждою сретения с ними в небесном Сионе.
Отче наш, да будет им вечная жизнь праздником Светло-Пасхальным.
Отче наш, Любовь неизреченная помяни усопших раб Твоих.

Кондак 10

Капли слезныя проливаем на месте упокоения сродников наших. Молим с верою, взываем с упованием, с любовию припадаем Ти Господи, подаждь им прощение прегрешений! Аще Ты простил еси их, тайну сию открой скорбным сердцам нашим, да радостно воспоем Ти: Аллилуйя.

Икос 10

Вспять взирая на мимошедший путь жития моего поминаю усопших сродников и знаемых, иже от рождения моего во дни младенчества, еще же и старости находящей с любовию во благо послужиша ми. О них моляся и долг воздавая вопию:
Отче наш, сподоби Славы Твоея родителей и близких.
Отче наш, воздай милостию Твоею денно и нощно бдевших над младенческим ложем моим.
Отче наш, помилуй всех благотворителей и благожелателей моих.
Отче наш, спаси благовествовавших мне Слово Твое.
Отче наш, прослави пред Ангелами научивших мя любити Тя.
Отче наш, даждь отраду вразумившим мя примером своим.
Отче наш, сокровищами вечных благ услади послуживших мне в тяжкие дни.
Отче наш, царствию Твоему не будет конца да внидут усопшие в радость Твою.
Отче наш, Любовь неизреченная помяни усопших раб Твоих.

Кондак 11

Где твое смерти жало? Где твой мрак и страх? Сочетавая нас с Богом, ты отныне вожделенна, ты великий покой и таинственное субботство, егда всяк человек почиет от всех дел суетных, дел земных. Апостол взывает: желание, имам умерети и со Христом быти. Темже взирая на смерть, яко на путь к жизни вечной, зовем победителю смерти Спасу Христу: Аллилуйя.

Икос 11

Воскреснут мертвии, возстанут иже во гробех, возвеселятся живущие на земли по гласу Исаии пророка, ибо телеса наша соделаются духовными, прославленными, светлонетленными. Кости сухи, слышите слово Господне, взывает пророк Иезекииль, связуйтеся жилами облецытеся плотию, возстаните от древних прошедших времен, искуплены бо суть Кровию Сына Божия и свет Воскресения Христова над вами.
Отче Наш, открой им величие совершенств Твоих.
Отче Наш, оживотвори их теплотою и благоуханием пребывания райскаго.
Отче Наш, да будет жизнь их светом солнца и сиянием луны.
Отче Наш, да узрят они славу огненных ангельских ликов.
Отче Наш, Ты услаждал еси их зрением зари утреней и вечерней.
Отче Наш, да просветятся души их яко солнце во Царствии Твоем.
Отче Наш, Любовь неизреченная помяни усопших раб Твоих.

Кондак 12

Плоть и кровь Царствия Небеснаго не наследят. Доколе во плоти живем, отлучены есмы от Христа, доколе не умрем. Подобает бо тленному сему облещися в нетление, и мертвенному сему просиять безсмертием. Потщимся убо временным стяжати вечная и тако да сподобимся во свете невечерняго дне воспевати: Аллилуйя.

Икос 12
Чаем воскресения мертвых, и жизни будущаго века егда вси сущии во гробех услышат глас Сына Божия и услышавше оживут. С трепетом моляся припадаем, Любовь Неизреченная! Да воскреснут вси не на осуждение, но на общее радостное сретение и жизнь вечную с Тобою. С верою и упованием торжествуя грядущее преображение всея твари, и откровение во вселенной славы Спасителя и Бога, Егоже Царствию не будет конца, Возсоздателю нашему вопием:
Отче наш, Ты создал еси мир к торжеству, радости и добру.
Отче наш, Ты возставил еси нас из глубины греха к Святости.
Отче наш, даждь усопшим царствовати посреде обновленнаго бытия.
Отче наш, да возсияют они яко светила на небеси в день славы Твоея.
Отче наш, да будет им Агнец Божественный светом неугасимым.
Отче наш, даждь и нам праздновати с ними Пасху нетления.
Отче наш, сочетай умерших и живых в радости нескончаемой.
Отче наш, пребуди всегда с рабами Твоими.
Отче наш, Любовь неизреченная помяни усопших раб Твоих.

Кондак 13

О, премилосердный Отче Безначальный! Всем хотяй спастися, к погибающим Сына Твоего низпославый, и благодать Духа Твоего Животворящаго на нас непристанно изливаяй, помилуй, прости и спаси всех от века усопших и сродников наших преставльшихся. Воздаждь Твоею милостию им за добро и любовь нам, неоплатным должником. Светлыми и вечными радостями возвесели их за вся скорби, слезы и страдания земныя, нас же зде оставльшихся благослови, и молитвами их радостнаго сретения, жизни вечныя с ними сподоби. Да вси спасении Тобою на Небе и на земли принесем Тебе победную песнь: Аллилуйя! Аллилуйя! Аллилуйя!