Кондак 1
Избранный чудотворче и предивный угодниче Христов, скорый помощниче и молитвенниче наш,преподобне и богоносне отче наш Зосимо! Величающе прославльшего тя Господа, похвальная восписуем ти, к образу твоему с упованием, надеждою и любовию притекающе. Ты же, яко имеяй дерзновение ко Господу, от всяких нас бед свободи, зовущих:
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Икос 1
Ангелов Творец и судеб человеческих Промыслитель призвал тя, богоносне отче наш Зосимо, от рода благочестивых боляр смоленских, животворящую же благодатию Своею наполни и преобрази тя, ты бо зову Господню внимая, усердно поработал еси Ему, заветом отец святых следуя, возрастал еси в преподобии и правде; сего ради через тебя яви Вседержитель милосердие к чадом своим. Мы же, вся сия благоговейно воспоминая, с радостию и умилением приносим ти, заступниче наш небесный и богомудрый наставниче, похвалы сия:
Радуйся, в сонме преподобных Господеви предстаяй;
Радуйся, со ангелы гимны хвалебныя Царю Небесному воспеваяй;
Радуйся, за любящих тя Троицу Святую присно умоляяй;
Радуйся, милость Всенепорочныя Богоматери к нам приклоняяй;
Радуйся, о Бозе памятовати и размышляти ны присно научаяй;
Радуйся, ревностию о делании молитвенном обогащающий;
Радуйся, дарами благости и кротости нас преображдающий;
Радуйся, от греховных навыков души слабые прехвально исцеляющий;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 2
Видением чудным посети Господь благочестиваго родителя твоего, святый Зосимо, повеле Ему обучити тя премудрости духовней паче науки мирския; ты же поучением сродник твоих благочестивых и наставник духовных следуя, от младенческих лет навыкл еси умиленно и неустанно взывати Господеви: Аллилуйя!

Икос 2
Разум богопросвещен имея, уразумел еси, всехвальне, по словеси апостольскому, яко нужнейши всего есть благочестие, имже и потщался еси обогатитися от дней отрочества твоего, душу твою, в молитвах и научении словеси Божию всеусердно пребывая. Сего ради величаем тя сице:
Радуйся, сокровище Божественных разумений.
Радуйся, научивыйся исполнению Божественных хотений.
Радуйся, нищетою духа облеченный;
Радуйся, плач, омывающий и утешающий душу обретый.
Радуйся, кротостию, яже зло добром побеждаяй себе украсивый;
Радуйся, плод правды, совершенство добродетелей в себе возрастивый.
Радуйся, чисто сердце обителью Божией сотворивый.
Радуйся, мир чрез умаление зла и богатство любви источавый;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 3
Силою животворящия и освещающия благодати Божия движимый, прехвальне угодниче Господень, оставил еси служение благочестивей императрице российстей Елисавете и в обитель Коневскую удалился еси, тамо убо наставлением богомудрых наставник твоих Андриана и Василика следуя, начала подвиг твоих, о еже возрасти во благодати Духа Всесвятаго положил еси, сего ради просим тя: укрепи и нас, слабых и колеблемых злыма вихрями века сего, в делании духовнем, да тобою наставлениями, воспоем Господеви: Аллилуйя!

Икос 3
Имуще в богоозаренном сердце твоем любовь велию ко Спасителю, святый Зосимо, Богоматерию сокровенно наставляемый, притекл еси в леса рославльстии, богомудрым уроком пустынножителей приобщилися желая; идеже верным учеником и близким другом богоноснаго старца Василиска явился еси. Мы же начало жития твоего преподобническаго воспеваем и просим тя: помози нас утвердитися в добродетелех христоугодных и приими величания сия:
Радуйся, учения прехвальнаго Паисия Величковскаго ревностный восприемниче;
Радуйся, отцев Добротолюбия ревностный учениче и богоносный сонаследниче;
Радуйся, чистоты ангелоподобной и целомудрия поборниче;
Радуйся, веру и любовь ко Спасителю в сердцах наших воспламеняй;
Радуйся, от душевныя туги и уныния спасающий;
Радуйся, во Христе токмо отраду и утешение стяжати наставляющий;
Радуйся, велием благоговением пред Творцем души наша наполняющий;
Радуйся, ревностию ко спасению всех нас воодушевляяй;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 4
Бурю страстей и треволнений угасил еси, прехвальне Зосимо, егда в уединении пустыннем купно с Василиском преподобным в безмолвии и созерцании подвизался еси, с ним же паломничал по обителям российским, аки пчела трудолюбивая, нектар мудрости духовныя от старец богносных собирая; сие же поминая, просим тя: вдохнови и нас, слабых в молитве и делах благочестия, подражати тебе, наставниче наш небесный, в добродетельнем и христоугодном житии, да сподобимся и мы во веки со ангелы Спасителю воспевати: Аллилуйя!

Икос 4
Слышавше и читавше многоя о подвизех отцев афонстиих, преподобные и богоносные Зосимо и Василиче, к спасительной мудрости и освящающему деланию их приобщиться желая, любовию ко Господу Иисусу, нетварным светом озаряющему верных ученик своих, движимые, от пределов полунощных в страну греческую направили еста стопы своя. Обаче иный путь суди Вам Спаситель, призва вас на подвиг в землю Сибирскую. Сего же ради величаем тя, богоносне Зосимо, и вопием ти сице:
Радуйся, богомудрый страниче прежде всего Царствия Небеснаго искавый;
Радуйся, многие труды любве ради ко Господу восприявый;
Радуйся, тяготы пути дальняго кротце притерпевый;
Радуйся, отраду небесную еще на земли сокровенно вкусивый;
Радуйся, нам свято чтущих тя, дороги верныя указуяй;
Радуйся, разумети и творити волю Божию ны научаяй;
Радуйся, кающихся грешников со Иисусом примиряяй;
Радуйся, милость Богоматери к нам приклоняяй;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 5
Боготечно, яко звезда путеводная, путешествовал еси, преподобне отче наш Зосимо, и примером жития твоего многих ко Христу привел еси; ныне же всю Церковь Христианскую благодатно озаряеши чудесами и богомудрыми поучении твоими. Темже просим тя: не престай умоляти за нас Господа, о еже сподобитися и нам купно с тобою пети Ему: Аллилуйя!

Икос 5
Видевше оком духовным выну пред собою Предвечнаго Сладчайшего Господа и Возлюбленнаго Спасителя Нашего и в сердце твоем непрестанно творя молитву Иисусову, преподобный и богоносный отче наш Зосимо, в дебрех велиих лесов сибирстиих, древлем пустынножителям последуя, двадесять лет ангелоподобно и свято пожил еси, от силы в силу восходя в созерцании и богопознании; прилоги бесовстии благоискусно и всепобедно сокрушая, Господь видя веру твою и усердие от гибели от глада и потпления в пучине речной спасе тя. Темже и мы, величаем тя и просим преобрази мрак душ наших и приими благосклонно вещания сия:
Радуйся, мир о Дусе Святе в сердца наша таинственно вселяющий;
Радуйся, духовно бодрствовати нам помогающий;
Радуйся, к трезвлению и усердной молитве верныя приводящий;
Радуйся, живоносною водою благодати души наша наполняющий;
Радуйся, взоры духа нашего ко Христу Господу выну обращающий;
Радуйся, нечистые помыслы скоро пожигающий;
Радуйся, искушения и соблазны от нас прогоняющий;
Радуйся, к покаянию и исправлению жизни нашая подвизающий;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 6
Проповедует самое место пустынное, святый старче, на немже до конца жизни твоея подвизался еси; каковы бяху твои труди, подвизи и терпение, вселився же в пустыню, иже под градом Кузнецком, преподобне отче наш Зосимо, Крестителю в житии уподобися и в небесных дворех славу получивши, с небесными жители Богу предстоиши и поеши купно с ними: Аллилуйя!

Икос 6
Возсия, яко солнце в пустыни Сибирстей, но бегая молвы человеческия, преподобне Зосимо, отшел еси в непроходныя дебри, там убо внутренняго делания высоты молитвы непрестанныя достигл еси, отонудуже умными очами сердечными Свет присносущный воистину сподобился еси зрети, имже вельми озаренный сам световиден верным показался еси, темже просим тя: озари наша сердца, тьмою греховною покровенная; да елеем благих дел возжегши угасшия святильники наша, сподобимся брачнаго Христова чертога, идеже ты пребываеши со святыми и слышиши сия от нас благохваления:
Радуйся, безмолвия рачителю, пустыню духовно уплодоносивый;
Радуйся, подвижническим житием твоим сию прославивый;
Радуйся, древо благоплодное, при водах пустынных возрастшее;
Радуйся, плоды многия Христу принесый;
Радуйся, сладость безмолвия пустыннаго вкусивый;
Радуйся, постом и воздержанием плоть твою духу покоривый;
Радуйся, от козней вражеских святым крестом себе оградивый;
Радуйся, покрову Пресвятыя Богородицы ся предавый;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 7
Хотяй всем человеком спастися и Царствия Божия достигнути, ты, отче святый, в своем отречении от мира и строгом затворе обрел еси великий источник вдохновения, обаче любовию к ближнему пламеня, волю Божию исполняя, не отринул еси пришедших жен, спасения душ ради – общине начало в единей от весей сибирстиих положил еси и тако подражая Пастыреначальнику Христу, дерзновенно и невозбранно служил еси людем, поя Господу: Аллилуйя!

Икос 7
Новыя слезы радости и благодарения Богу излиял еси, преподобне отче, пламенем еже ко Христу любве разжегаемь, ты бо весь от юности Господеви предался еси, и к Нему добродетелию приблизился еси, тленная бо же на земли оставив, нетленное обрел еси богатство, и ныне во обителех небесных водворился еси со ангелы святыми и всеми праведниками. Сице молим тя: и нас озари светом любве Божия, да зовем ти:
Радуйся, духовных добродетелей доме, богоразумением украшенный;
Радуйся, твердый в уме, благодатию и истиною освященный;
Радуйся, великий в мудрости и больший в благоговении;
Радуйся, житием твоим Отца Небеснаго прославивый;
Радуйся, любовь Христову в сердце своем имевый;
Радуйся, заповеди Того сохранивый;
Радуйся, непрестанную молитву за вся люди носивый;
Радуйся, многих ищущих спасения духовному деланию научивый;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 8
Странника и пришельца в мире сем помышляя себе быти, преподобне отче наш Зосимо, от юности твоея девственное житие возлюбил еси, в посте и молитвах пребывая, и благоугождая Богу благоугождением всяческим, во еже быти тебе освященным сосудом Духа Святаго, всельшагося в непорочное сердце твое, и воздыхании неизглаголанными научившаго тя благоприятно пети Пресвятей Троице: Аллилуиа!

Икос 8
Весь исполнен был еси любве к Богу и ближним твоим, святый Зосимо, и сего ради безропотне принимал еси неисчетныя обиды от гонящих тя из обители Туринстей, идеже бесовским обещаниям угождая, жены нечестивыя изгнаша тя из обители клеветы ради, преподобне отче. Ты же преселился еси во пределы Московстии, идеже премного потрудился еси, обитель в честь похвалу Святыя Богородицы - Одигитрии; темже молим тя: помози нам представительством твоим у Всенепорочныя Владычицы Нашея сохранити в сердце веру истинную, упование непреложное, любовь к Богу и к ближним нелицемерную и приими величания сия:
Радуйся, изгнание правды ради претерпевший;
Радуйся, в кротости и смирении Матери Божией подражавший;
Радуйся, все упование твое на Царицу Небесную возлагавший;
Радуйся, Небесную помощь от Нея получавший;
Радуйся, козни нечестивых человек смирением победивый;
Радуйся, потоками слез спасительных орошенный;
Радуйся, спасительнаго долготерпения учителю;
Радуйся, светом добродетелей твоих град и страну нашу озаривый;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 9
Всякия собрал еси в души твоей плоды духовнаго делания, и сих ради честное обиталище Пресвятаго Духа был еси, заступниче теплый и ходатаю о всех сирых и обремененных, да молитвами твоима не отступит от нас вседеятельная благодать Господа нашего Всесвятаго Утешителя и не оскудеет в сердцах наших любовь ко Господу, всякое желание и всякий страх побеждающая, да тою направляеми и окриляеми сподобимся и мы с тобою присно пребывати в невечернем дни Царствия Божия, благодарственно поюще Вседержителю: Аллилуйя!

Икос 9
Витии земнороднии не возмогут по достоянию восхвалити досточудное житие твое, преподобне отче Зосимо, твоя подвиги и добродетели, имиже дух твой возвысив, на высоту духовнаго совершенства восшел еси, яко и при житии твоем и по преставлении твоем чудес множество великое сотворил еси, такожде бо и кладезь, своими руками ископал еси, иже и доныне изливает свои студеные воды на врачевание недуг человеческих, во славу Божию и на радость православным людем. Мы же таковым дивящеся, во умилении сердец наших приносим ти хваления сия:
Радуйся, добродетельная маслино, в дому Божии возращенная;
Радуйся, шипок благовонный в пустынных удолиях процветший;
Радуйся, любвеобильный наш наставник;
Радуйся, неверие и суеверие наше победивший;
Радуйся, сланное море страстей наших изсушающий;
Радуйся, от грехопадений наших, имже несть числа, избавляющий;
Радуйся, миром и любовию к добру души наша снабдевающий;
Радуйся, в добродетелех христианских преуспевати нам помогающий.
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 10
Спасительнаго делания наставниче многомудрый воистину явился еси, богоносне отче Зосимо, ты бо в писаниех твоих о делании духовнем возвестил еси, о стяжании благодати Всесвятаго Духа, и творении молитвы Иисусовой, образы христоугождения в житиих Василиска и Петра преподобных в назидание всем оставил еси; уставы общежития писанием утвердил еси, сам же во бдении и молитве не вкусил еси покоя, дондеже Господеви предал еси святую душу твою, воспевая: Аллилуйя!

Икос 10
Стена, ограждающая от всех прилогов диавольских, был еси сестрам новооснованней Одитриевой пустыни, многия души ко Христу привел еси, многих бо в вере и благочестии укрепил еси, иных же к покаянию и исправлению жития привел еси, наставляя, како избегати козней вражиих и како получити Небесное Царствие. Мы же, зряще твое отеческое неусыпное попечение, благодарне вопием ти:
Радуйся, стадо свое премудре собравый;
Радуйся, многия и многия спасый;
Радуйся, аки кокош птенцы своя согреваяй;
Радуйся, повсюду благочестия лампады возжегший;
Радуйся, вся повеления тебе от Господа сотворивый;
Радуйся, паче солнца всех освещаяй;
Радуйся, душу свою за человеки положивый;
Радуйся, от обители земныя, в небесную водворивыйся;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 11
Пение молебное и похвалу сию смиренную не презри, прехвальне отче наш Зосимо, се бо верою и любовию к тебе подвизаеми, пред образом твоим предстояще, ублажаем тя, заступника нашего, и молимся: молися за ны выну ко Господу, вемы бо к Нему твое невозбранное дерзновение и твоих молитв благодатное действо, яко многия годы людие благочестивыя прихождаху ко гробнице твоей, помощи просяще и обретаху просимое и память твоя воссияла еси в сердцех христиан православных. Имуще таковаго предстателя, благодарно зовем дивному во святых Своих Богу нашему: Аллилуйя!

Икос 11
Светозарную жизнь скончавая, старец сый, яко отец чадолюбив, вся смотрительне устроил еси во обители твоей. Пред концем же живота твоего ты, богоносне Зосимо, затворился еси в келии твоей и начал еси готовитися; последи же собрал еси чад твоих духовных к смертному одру твоему, моля их имети любовь между собою, благословив же их, мирно предал еси дух твой Богу, и погребен был еси во обители Одигитриевстей, идеже мощи твоя токи чудес изливают, подвизающе нас взывати тебе сице:
Радуйся, Пресвятыя Богородицы покровом осененный;
Радуйся, разслабленным благодатное укрепление;
Радуйся, питателю наш, сладостьми небесными насыщаяйся;
Радуйся, покровителю наш, во кровех небесных водворивыйся;
Радуйся, представителю наш пред Богом, ангельская зряй утешения;
Радуйся, младенцев небесный покровителю;
Радуйся, матерей, скорбящих о чадех усопших, скорый утешителю;
Радуйся, ревнующим о спасении помощниче богодарованный;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 12
Благодать приял еси от Всещедраго Бога, преподобне отче наш Зосимо, недуги и язи человеческия врачевати преславно. Темже ведуще тя яко целителя, утешителя и помощника от Всемилосерднаго Господа нам дарованнаго, молитвенно торжествующе святую память твою, к тебе прибегаем и по прошению дарованная благодеяния приемлем, поюще Богу песнь: Аллилуйя!

Икос 12
Поюще преславное о тебе смотрение Божие и чудеса твоя, богоносне Зосимо, яко молитвами твоими обитель в годину лихолетия и безбожия сохранил еси, и ныне всецерковно прославлен был еси. Мы же с любовию чтим святую память твою, яко небеснаго предстателя и помощника; веруем, яко Господь молитвами твоими вся просимая нам дарует, и молим тя усердно, не забуди нас, но всегда пребывай с нами, да твоим заступлением и помощию ограждаеми, спасаеми и избавляеми от всех зол видимых и невидимых, вопием ти сице:
Радуйся, обители твоея неусыпный попечителю;
Радуйся, Пречистыя Богородицы верный служителю;
Радуйся, даром велия мудрости чтущих тя наполняюший;
Радуйся, миром и благостию души наши преображающий;
Радуйся, в служении нашем помощь и укрепление дарующий;
Радуйся, благих помощников и друзей верных христианам посылающий;
Радуйся, молящимся тебе озарение и вдохновение посылающий;
Радуйся, сомневающихся и колеблющихся благодатно укрепляющий;
Радуйся, преподобне и богоносне отче наш Зосимо, неусыпный о нас ко Христу Богу молитвенниче!

Кондак 13
О, великий угодниче Христов и преславный чудотворче, преподобне отче наш Зосимо, приими недостойное сие моление наше, с любовию ти приносимое, и благоприятными твоими к Богу молитвами испроси, у Спасителя нашего Господа Иисуса Христа всем нам добродетельное и богоугодное житие, терпение, здравие телесное и духовное преуспеяние. Да тако спасаемии в вечней жизни с тобою воспеваем Создателю нашему: Аллилуйя, аллилуйя, аллилуйя!
Сей Кондак глаголи трижды. А по сем читается Икос 1 и Кондак 1

Тропарь преподобному Зосиме (Верховскому), гл.8
Отеческаго учения ревнителю,/ Сибирския пустыни всекрасное прозябение,/ деяния и созерцания бодренный подвижниче,/ безмолвия рачителю и обители невест Христовых устроителю,/ сосуде Духа, Зосимо преподобне,// моли Христа Бога, да просветит души наша.

Кондак, гл.4
Первее в Сибирстей стране/ инокиням пустынную обитель возградил еси,/ оттуду же неправедне изгоняемь,/ на Промысл Божий упование возложил еси,/ имже паче ума огражден,/ яко неврежден, путьшествие творя,/ Богоматерию Одигитриею управляемь,/ Московских пределов достигл еси,/ и зде паки руководство обителию восприим,/ Богособранную паству твою/ добре упасл еси,/ нам же образ жития твоего/ и медоточная учения оставил еси,/ преподобне Зосимо,/ моли Христа Бога// сохранитися от всякия скверны душам нашим.

Автор акафиста Евгений Владимирович Храповицкий